| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. புப்ப²ச்ச²த³னியத்தே²ரஅபதா³னவண்ணனா
4. Pupphacchadaniyattheraapadānavaṇṇanā
ஸுனந்தோ³ நாம நாமேனாதிஆதி³கங் ஆயஸ்மதோ புப்ப²ச்ச²த³னியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்வா ஸகஸிப்பேஸு நிப்ப²த்திங் பத்தோ மஹாபோ⁴கோ³ மஹாயஸோ தா³னாபி⁴ரதோ அஹோஸி. ஏகதி³வஸங் ஸோ ‘‘ஸகலஜம்பு³தீ³பே இமே யாசகா நாம ‘அஹங் தா³னங் ந லத்³தொ⁴ஸ்மீ’தி வத்துங் மா லப⁴ந்தூ’’தி மஹாதா³னங் ஸஜ்ஜேஸி. ததா³ பது³முத்தரோ ப⁴க³வா ஸபரிவாரோ ஆகாஸேன க³ச்ச²தி. ப்³ராஹ்மணோ தங் தி³ஸ்வா பஸன்னசித்தோ ஸகஸிஸ்ஸே பக்கோஸாபெத்வா புப்பா²னி ஆஹராபெத்வா ஆகாஸே உக்கி²பித்வா பூஜேஸி. தானி ஸகலனக³ரங் சா²தெ³த்வா ஸத்த தி³வஸானி அட்ட²ங்ஸு.
Sunando nāma nāmenātiādikaṃ āyasmato pupphacchadaniyattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā sakasippesu nipphattiṃ patto mahābhogo mahāyaso dānābhirato ahosi. Ekadivasaṃ so ‘‘sakalajambudīpe ime yācakā nāma ‘ahaṃ dānaṃ na laddhosmī’ti vattuṃ mā labhantū’’ti mahādānaṃ sajjesi. Tadā padumuttaro bhagavā saparivāro ākāsena gacchati. Brāhmaṇo taṃ disvā pasannacitto sakasisse pakkosāpetvā pupphāni āharāpetvā ākāse ukkhipitvā pūjesi. Tāni sakalanagaraṃ chādetvā satta divasāni aṭṭhaṃsu.
26. ஸோ தேன புஞ்ஞகம்மேன தே³வமனுஸ்ஸேஸு ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் ஏகஸ்மிங் குலகே³ஹே நிப்³ப³த்தோ ஸத்³தா⁴ஜாதோ பப்³ப³ஜித்வா கு²ரக்³கே³யேவ அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுனந்தோ³ நாம நாமேனாதிஆதி³மாஹ. தங் ஹெட்டா² வுத்தனயத்தா ஸுவிஞ்ஞெய்யமேவாதி.
26. So tena puññakammena devamanussesu sukhaṃ anubhavitvā imasmiṃ buddhuppāde sāvatthiyaṃ ekasmiṃ kulagehe nibbatto saddhājāto pabbajitvā khuraggeyeva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento sunando nāma nāmenātiādimāha. Taṃ heṭṭhā vuttanayattā suviññeyyamevāti.
புப்ப²ச்ச²த³னியத்தே²ரஅபதா³னவண்ணனா ஸமத்தா.
Pupphacchadaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. புப்ப²ச்ச²த³னியத்தே²ரஅபதா³னங் • 4. Pupphacchadaniyattheraapadānaṃ
