| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
4. පුප්‌ඵච්‌ඡදනියත්‌ථෙරඅපදානවණ්‌ණනා
4. Pupphacchadaniyattheraapadānavaṇṇanā
සුනන්‌දො නාම නාමෙනාතිආදිකං ආයස්‌මතො පුප්‌ඵච්‌ඡදනියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො අනෙකෙසු භවෙසු විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ බ්‍රාහ්‌මණකුලෙ නිබ්‌බත්‌තො විඤ්‌ඤුතං පත්‌වා සකසිප්‌පෙසු නිප්‌ඵත්‌තිං පත්‌තො මහාභොගො මහායසො දානාභිරතො අහොසි. එකදිවසං සො ‘‘සකලජම්‌බුදීපෙ ඉමෙ යාචකා නාම ‘අහං දානං න ලද්‌ධොස්‌මී’ති වත්‌තුං මා ලභන්‌තූ’’ති මහාදානං සජ්‌ජෙසි. තදා පදුමුත්‌තරො භගවා සපරිවාරො ආකාසෙන ගච්‌ඡති. බ්‍රාහ්‌මණො තං දිස්‌වා පසන්‌නචිත්‌තො සකසිස්‌සෙ පක්‌කොසාපෙත්‌වා පුප්‌ඵානි ආහරාපෙත්‌වා ආකාසෙ උක්‌ඛිපිත්‌වා පූජෙසි. තානි සකලනගරං ඡාදෙත්‌වා සත්‌ත දිවසානි අට්‌ඨංසු.
Sunando nāma nāmenātiādikaṃ āyasmato pupphacchadaniyattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā sakasippesu nipphattiṃ patto mahābhogo mahāyaso dānābhirato ahosi. Ekadivasaṃ so ‘‘sakalajambudīpe ime yācakā nāma ‘ahaṃ dānaṃ na laddhosmī’ti vattuṃ mā labhantū’’ti mahādānaṃ sajjesi. Tadā padumuttaro bhagavā saparivāro ākāsena gacchati. Brāhmaṇo taṃ disvā pasannacitto sakasisse pakkosāpetvā pupphāni āharāpetvā ākāse ukkhipitvā pūjesi. Tāni sakalanagaraṃ chādetvā satta divasāni aṭṭhaṃsu.
26. සො තෙන පුඤ්‌ඤකම්‌මෙන දෙවමනුස්‌සෙසු සුඛං අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං එකස්‌මිං කුලගෙහෙ නිබ්‌බත්‌තො සද්‌ධාජාතො පබ්‌බජිත්‌වා ඛුරග්‌ගෙයෙව අරහත්‌තං පත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සුනන්‌දො නාම නාමෙනාතිආදිමාහ. තං හෙට්‌ඨා වුත්‌තනයත්‌තා සුවිඤ්‌ඤෙය්‍යමෙවාති.
26. So tena puññakammena devamanussesu sukhaṃ anubhavitvā imasmiṃ buddhuppāde sāvatthiyaṃ ekasmiṃ kulagehe nibbatto saddhājāto pabbajitvā khuraggeyeva arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento sunando nāma nāmenātiādimāha. Taṃ heṭṭhā vuttanayattā suviññeyyamevāti.
පුප්‌ඵච්‌ඡදනියත්‌ථෙරඅපදානවණ්‌ණනා සමත්‌තා.
Pupphacchadaniyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 4. පුප්‌ඵච්‌ඡදනියත්‌ථෙරඅපදානං • 4. Pupphacchadaniyattheraapadānaṃ
