| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ಪುಪ್ಫಸುತ್ತವಣ್ಣನಾ
2. Pupphasuttavaṇṇanā
೯೪. ದುತಿಯೇ ವಿವದತೀತಿ ‘‘ಅನಿಚ್ಚಂ ದುಕ್ಖಂ ಅನತ್ತಾ ಅಸುಭ’’ನ್ತಿ ಯಥಾಸಭಾವೇನ ವದನ್ತೇನ ಸದ್ಧಿಂ ‘‘ನಿಚ್ಚಂ ಸುಖಂ ಅತ್ತಾ ಸುಭ’’ನ್ತಿ ವದನ್ತೋ ವಿವದತಿ। ಲೋಕಧಮ್ಮೋತಿ ಖನ್ಧಪಞ್ಚಕಂ। ತಞ್ಹಿ ಲುಜ್ಜನಸಭಾವತ್ತಾ ಲೋಕಧಮ್ಮೋತಿ ವುಚ್ಚತಿ। ಕಿನ್ತಿ ಕರೋಮೀತಿ ಕಥಂ ಕರೋಮಿ? ಮಯ್ಹಞ್ಹಿ ಪಟಿಪತ್ತಿಕಥನಮೇವ ಭಾರೋ, ಪಟಿಪತ್ತಿಪೂರಣಂ ಪನ ಕುಲಪುತ್ತಾನಂ ಭಾರೋತಿ ದಸ್ಸೇತಿ। ಇಮಸ್ಮಿಂ ಸುತ್ತೇ ತಯೋ ಲೋಕಾ ಕಥಿತಾ। ‘‘ನಾಹಂ, ಭಿಕ್ಖವೇ, ಲೋಕೇನಾ’’ತಿ ಏತ್ಥ ಹಿ ಸತ್ತಲೋಕೋ ಕಥಿತೋ, ‘‘ಅತ್ಥಿ, ಭಿಕ್ಖವೇ, ಲೋಕೇ ಲೋಕಧಮ್ಮೋ’’ತಿ ಏತ್ಥ ಸಙ್ಖಾರಲೋಕೋ, ‘‘ತಥಾಗತೋ ಲೋಕೇ ಜಾತೋ ಲೋಕೇ ಸಂವಡ್ಢೋ’’ತಿ ಏತ್ಥ ಓಕಾಸಲೋಕೋ ಕಥಿತೋ। ದುತಿಯಂ।
94. Dutiye vivadatīti ‘‘aniccaṃ dukkhaṃ anattā asubha’’nti yathāsabhāvena vadantena saddhiṃ ‘‘niccaṃ sukhaṃ attā subha’’nti vadanto vivadati. Lokadhammoti khandhapañcakaṃ. Tañhi lujjanasabhāvattā lokadhammoti vuccati. Kinti karomīti kathaṃ karomi? Mayhañhi paṭipattikathanameva bhāro, paṭipattipūraṇaṃ pana kulaputtānaṃ bhāroti dasseti. Imasmiṃ sutte tayo lokā kathitā. ‘‘Nāhaṃ, bhikkhave, lokenā’’ti ettha hi sattaloko kathito, ‘‘atthi, bhikkhave, loke lokadhammo’’ti ettha saṅkhāraloko, ‘‘tathāgato loke jāto loke saṃvaḍḍho’’ti ettha okāsaloko kathito. Dutiyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಪುಪ್ಫಸುತ್ತಂ • 2. Pupphasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಪುಪ್ಫಸುತ್ತವಣ್ಣನಾ • 2. Pupphasuttavaṇṇanā
