| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. புப்ப²தூ²பியத்தே²ரஅபதா³னவண்ணனா
2. Pupphathūpiyattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ புப்ப²தூ²பியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிபு³த்³த⁴ஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்வா ஸகஸிப்பே நிப்ப²த்திங் பத்தோ தத்த² ஸாரங் அபஸ்ஸந்தோ கே³ஹங் பஹாய ஹிமவந்தங் பவிஸித்வா அத்தனா ஸஹக³தேஹி பஞ்சஸிஸ்ஸஸஹஸ்ஸேஹி ஸத்³தி⁴ங் பஞ்சாபி⁴ஞ்ஞா அட்ட² ஸமாபத்தியோ நிப்³ப³த்தெத்வா குக்குரனாமபப்³ப³தஸமீபே பண்ணஸாலங் காரெத்வா படிவஸதி. ததா³ பு³த்³து⁴ப்பாத³பா⁴வங் ஸுத்வா ஸிஸ்ஸேஹி ஸஹ பு³த்³த⁴ஸ்ஸ ஸந்திகங் க³ந்துகாமோ கேனசி ப்³யாதி⁴னா பீளிதோ பண்ணஸாலங் பவிஸித்வா ஸிஸ்ஸஸந்திகா பு³த்³த⁴ஸ்ஸானுபா⁴வங் லக்க²ணஞ்ச ஸுத்வா பஸன்னமானஸோ ஹிமவந்ததோ சம்பகாஸோகதிலககேடகாத்³யனேகே புப்பே² ஆஹராபெத்வா தூ²பங் கத்வா பு³த்³த⁴ங் விய பூஜெத்வா காலங் கத்வா ப்³ரஹ்மலோகூபகோ³ அஹோஸி. அத² தே ஸிஸ்ஸா தஸ்ஸ ஆளஹனங் கத்வா பு³த்³த⁴ஸந்திகங் க³ந்த்வா தங் பவத்திங் ஆரோசேஸுங். அத² ப⁴க³வா பு³த்³த⁴சக்கு²னா ஓலோகெத்வா அனாக³தங்ஸஞாணேன பாகடீகரணமகாஸி. ஸோ அபரபா⁴கே³ இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ விஞ்ஞுதங் பத்தோ புப்³ப³வாஸனாப³லேன ஸத்த²ரி பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Himavantassāvidūretiādikaṃ āyasmato pupphathūpiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassibuddhassa bhagavato kāle brāhmaṇakule nibbatto viññutaṃ patvā sakasippe nipphattiṃ patto tattha sāraṃ apassanto gehaṃ pahāya himavantaṃ pavisitvā attanā sahagatehi pañcasissasahassehi saddhiṃ pañcābhiññā aṭṭha samāpattiyo nibbattetvā kukkuranāmapabbatasamīpe paṇṇasālaṃ kāretvā paṭivasati. Tadā buddhuppādabhāvaṃ sutvā sissehi saha buddhassa santikaṃ gantukāmo kenaci byādhinā pīḷito paṇṇasālaṃ pavisitvā sissasantikā buddhassānubhāvaṃ lakkhaṇañca sutvā pasannamānaso himavantato campakāsokatilakakeṭakādyaneke pupphe āharāpetvā thūpaṃ katvā buddhaṃ viya pūjetvā kālaṃ katvā brahmalokūpago ahosi. Atha te sissā tassa āḷahanaṃ katvā buddhasantikaṃ gantvā taṃ pavattiṃ ārocesuṃ. Atha bhagavā buddhacakkhunā oloketvā anāgataṃsañāṇena pākaṭīkaraṇamakāsi. So aparabhāge imasmiṃ buddhuppāde sāvatthiyaṃ kulagehe nibbatto viññutaṃ patto pubbavāsanābalena satthari pasanno pabbajitvā nacirasseva arahā ahosi.
10. அத² ஸோ அத்தனோ புப்³ப³குஸலங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. தங் ஹெட்டா² வுத்தத்த²மேவ. குக்குரோ நாம பப்³ப³தோதி பப்³ப³தஸ்ஸ ஸிக²ரங் குக்குராகாரேன ஸுனகா²காரேன ஸண்டி²தத்தா ‘‘குக்குரபப்³ப³தோ’’தி ஸங்க்²யங் க³தோ, தஸ்ஸ ஸமீபே பண்ணஸாலங் கத்வா பஞ்சதாபஸஸஹஸ்ஸேஹி ஸஹ வஸமானோதி அத்தோ². நயானுஸாரேன ஸேஸங் ஸப்³ப³ங் உத்தானத்த²மேவாதி.
10. Atha so attano pubbakusalaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ heṭṭhā vuttatthameva. Kukkuro nāma pabbatoti pabbatassa sikharaṃ kukkurākārena sunakhākārena saṇṭhitattā ‘‘kukkurapabbato’’ti saṅkhyaṃ gato, tassa samīpe paṇṇasālaṃ katvā pañcatāpasasahassehi saha vasamānoti attho. Nayānusārena sesaṃ sabbaṃ uttānatthamevāti.
புப்ப²தூ²பியத்தே²ரஅபதா³னவண்ணனா ஸமத்தா.
Pupphathūpiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. புப்ப²தூ²பியத்தே²ரஅபதா³னங் • 2. Pupphathūpiyattheraapadānaṃ
