| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၂. ပုပ္ဖထူပိယတ္ထေရအပဒာနဝဏ္ဏနာ
2. Pupphathūpiyattheraapadānavaṇṇanā
ဟိမဝန္တသ္သာဝိဒူရေတိအာဒိကံ အာယသ္မတော ပုပ္ဖထူပိယတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိဗုဒ္ဓသ္သ ဘဂဝတော ကာလေ ဗ္ရာဟ္မဏကုလေ နိဗ္ဗတ္တော ဝိညုတံ ပတ္ဝာ သကသိပ္ပေ နိပ္ဖတ္တိံ ပတ္တော တတ္ထ သာရံ အပသ္သန္တော ဂေဟံ ပဟာယ ဟိမဝန္တံ ပဝိသိတ္ဝာ အတ္တနာ သဟဂတေဟိ ပဉ္စသိသ္သသဟသ္သေဟိ သဒ္ဓိံ ပဉ္စာဘိညာ အဋ္ဌ သမာပတ္တိယော နိဗ္ဗတ္တေတ္ဝာ ကုက္ကုရနာမပဗ္ဗတသမီပေ ပဏ္ဏသာလံ ကာရေတ္ဝာ ပဋိဝသတိ။ တဒာ ဗုဒ္ဓုပ္ပာဒဘာဝံ သုတ္ဝာ သိသ္သေဟိ သဟ ဗုဒ္ဓသ္သ သန္တိကံ ဂန္တုကာမော ကေနစိ ဗ္ယာဓိနာ ပီဠိတော ပဏ္ဏသာလံ ပဝိသိတ္ဝာ သိသ္သသန္တိကာ ဗုဒ္ဓသ္သာနုဘာဝံ လက္ခဏဉ္စ သုတ္ဝာ ပသန္နမာနသော ဟိမဝန္တတော စမ္ပကာသောကတိလကကေဋကာဒ္ယနေကေ ပုပ္ဖေ အာဟရာပေတ္ဝာ ထူပံ ကတ္ဝာ ဗုဒ္ဓံ ဝိယ ပူဇေတ္ဝာ ကာလံ ကတ္ဝာ ဗ္ရဟ္မလောကူပဂော အဟောသိ။ အထ တေ သိသ္သာ တသ္သ အာဠဟနံ ကတ္ဝာ ဗုဒ္ဓသန္တိကံ ဂန္တ္ဝာ တံ ပဝတ္တိံ အာရောစေသုံ။ အထ ဘဂဝာ ဗုဒ္ဓစက္ခုနာ ဩလောကေတ္ဝာ အနာဂတံသဉာဏေန ပာကဋီကရဏမကာသိ။ သော အပရဘာဂေ ဣမသ္မိံ ဗုဒ္ဓုပ္ပာဒေ သာဝတ္ထိယံ ကုလဂေဟေ နိဗ္ဗတ္တော ဝိညုတံ ပတ္တော ပုဗ္ဗဝာသနာဗလေန သတ္ထရိ ပသန္နော ပဗ္ဗဇိတ္ဝာ နစိရသ္သေဝ အရဟာ အဟောသိ။
Himavantassāvidūretiādikaṃ āyasmato pupphathūpiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassibuddhassa bhagavato kāle brāhmaṇakule nibbatto viññutaṃ patvā sakasippe nipphattiṃ patto tattha sāraṃ apassanto gehaṃ pahāya himavantaṃ pavisitvā attanā sahagatehi pañcasissasahassehi saddhiṃ pañcābhiññā aṭṭha samāpattiyo nibbattetvā kukkuranāmapabbatasamīpe paṇṇasālaṃ kāretvā paṭivasati. Tadā buddhuppādabhāvaṃ sutvā sissehi saha buddhassa santikaṃ gantukāmo kenaci byādhinā pīḷito paṇṇasālaṃ pavisitvā sissasantikā buddhassānubhāvaṃ lakkhaṇañca sutvā pasannamānaso himavantato campakāsokatilakakeṭakādyaneke pupphe āharāpetvā thūpaṃ katvā buddhaṃ viya pūjetvā kālaṃ katvā brahmalokūpago ahosi. Atha te sissā tassa āḷahanaṃ katvā buddhasantikaṃ gantvā taṃ pavattiṃ ārocesuṃ. Atha bhagavā buddhacakkhunā oloketvā anāgataṃsañāṇena pākaṭīkaraṇamakāsi. So aparabhāge imasmiṃ buddhuppāde sāvatthiyaṃ kulagehe nibbatto viññutaṃ patto pubbavāsanābalena satthari pasanno pabbajitvā nacirasseva arahā ahosi.
၁၀. အထ သော အတ္တနော ပုဗ္ဗကုသလံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဟိမဝန္တသ္သာဝိဒူရေတိအာဒိမာဟ။ တံ ဟေဋ္ဌာ ဝုတ္တတ္ထမေဝ။ ကုက္ကုရော နာမ ပဗ္ဗတောတိ ပဗ္ဗတသ္သ သိခရံ ကုက္ကုရာကာရေန သုနခာကာရေန သဏ္ဌိတတ္တာ ‘‘ကုက္ကုရပဗ္ဗတော’’တိ သင္ခ္ယံ ဂတော, တသ္သ သမီပေ ပဏ္ဏသာလံ ကတ္ဝာ ပဉ္စတာပသသဟသ္သေဟိ သဟ ဝသမာနောတိ အတ္ထော။ နယာနုသာရေန သေသံ သဗ္ဗံ ဥတ္တာနတ္ထမေဝာတိ။
10. Atha so attano pubbakusalaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ heṭṭhā vuttatthameva. Kukkuro nāma pabbatoti pabbatassa sikharaṃ kukkurākārena sunakhākārena saṇṭhitattā ‘‘kukkurapabbato’’ti saṅkhyaṃ gato, tassa samīpe paṇṇasālaṃ katvā pañcatāpasasahassehi saha vasamānoti attho. Nayānusārena sesaṃ sabbaṃ uttānatthamevāti.
ပုပ္ဖထူပိယတ္ထေရအပဒာနဝဏ္ဏနာ သမတ္တာ။
Pupphathūpiyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၂. ပုပ္ဖထူပိယတ္ထေရအပဒာနံ • 2. Pupphathūpiyattheraapadānaṃ
