Library / Tipiṭaka / ཏིཔིཊཀ • Tipiṭaka / མཧཱནིདྡེས-ཨཊྛཀཐཱ • Mahāniddesa-aṭṭhakathā

    ༡༠. པུརཱབྷེདསུཏྟནིདྡེསཝཎྞནཱ

    10. Purābhedasuttaniddesavaṇṇanā

    ༨༣. དསམེ པུརཱབྷེདསུཏྟནིདྡེསེ ཀཐཾདསྶཱིཏི ཨིམསྶ སུཏྟསྶ ཨིཏོ པརེསཉྩ པཉྩནྣཾ ཀལཧཝིཝཱདཙཱུལ༹བྱཱུཧམཧཱབྱཱུཧཏུཝཊཀཨཏྟདཎྜསུཏྟཱནཾ སམྨཱཔརིབྦཱཛནཱིཡསུཏྟཝཎྞནཱཡཾ (སུ॰ ནི॰ ཨཊྛ॰ ༢.༣༦༢ ཨཱདཡོ) ཝུཏྟནཡེནེཝ སཱམཉྙཏོ ཨུཔྤཏྟི ཝེདིཏབྦཱ། ཝིསེསཏོ པན ཡཐེཝ ཏསྨིཾ མཧཱསམཡེ རཱགཙརིཏདེཝཏཱནཾ སཔྤཱཡཝསེན དྷམྨཾ དེསེཏུཾ ནིམྨིཏབུདྡྷེན ཨཏྟཱནཾ པུཙྪཱཔེཏྭཱ སམྨཱཔརིབྦཱཛནཱིཡསུཏྟནྟ- (སུ॰ ནི॰ ༣༦༡ ཨཱདཡོ) མབྷཱསི, ཨེཝཾ ཏསྨིཾཡེཝ མཧཱསམཡེ ‘‘ཀིཾ ནུ ཁོ པུརཱ སརཱིརབྷེདཱ ཀཏྟབྦ’’ནྟི ཨུཔྤནྣཙིཏྟཱནཾ དེཝཏཱནཾ ཙིཏྟཾ ཉཏྭཱ ཏཱསཾ ཨནུགྒཧཏྠཾ ཨཌྜྷཏེལ༹སབྷིཀྑུསཏཔརིཝཱརཾ ནིམྨིཏབུདྡྷཾ ཨཱཀཱསེན ཨཱནེཏྭཱ ཏེན ཨཏྟཱནཾ པུཙྪཱཔེཏྭཱ ཨིམཾ སུཏྟམབྷཱསི།

    83. Dasame purābhedasuttaniddese kathaṃdassīti imassa suttassa ito paresañca pañcannaṃ kalahavivādacūḷabyūhamahābyūhatuvaṭakaattadaṇḍasuttānaṃ sammāparibbājanīyasuttavaṇṇanāyaṃ (su. ni. aṭṭha. 2.362 ādayo) vuttanayeneva sāmaññato uppatti veditabbā. Visesato pana yatheva tasmiṃ mahāsamaye rāgacaritadevatānaṃ sappāyavasena dhammaṃ desetuṃ nimmitabuddhena attānaṃ pucchāpetvā sammāparibbājanīyasuttanta- (su. ni. 361 ādayo) mabhāsi, evaṃ tasmiṃyeva mahāsamaye ‘‘kiṃ nu kho purā sarīrabhedā kattabba’’nti uppannacittānaṃ devatānaṃ cittaṃ ñatvā tāsaṃ anuggahatthaṃ aḍḍhateḷasabhikkhusataparivāraṃ nimmitabuddhaṃ ākāsena ānetvā tena attānaṃ pucchāpetvā imaṃ suttamabhāsi.

    ཀཐཾ? བུདྡྷཱ ནཱམ མཧནྟཱ ཨེཏེ སཏྟཝིསེསཱ, ཡཾ སདེཝཀསྶ ལོཀསྶ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ ན ཀིཉྩི ཀཏྠཙི ནཱིལཱདིཝསེན ཝིབྷཏྟརཱུཔཱརམྨཎེསུ ཝིབྷཏྟརཱུཔཱརམྨཎཾ ཝཱ, བྷེརིསདྡཱདིཝསེན ཝིབྷཏྟསདྡཱརམྨཎཱདཱིསུ སདྡཱདིཨཱརམྨཎཾ ཝཱ ཨཏྠི, ཡཾ ཨེཏེསཾ ཉཱཎམུཁེ ཨཱཔཱཐཾ ནཱགཙྪཏི། ཡཐཱཧ – ‘‘ཡཾ, བྷིཀྑཝེ, སདེཝཀསྶ ལོཀསྶ…པེ॰… སདེཝམནུསྶཱཡ དིཊྛཾ སུཏཾ མུཏཾ ཝིཉྙཱཏཾ པཏྟཾ པརིཡེསིཏཾ ཨནུཝིཙརིཏཾ མནསཱ, ཏམཧཾ ཛཱནཱམི ཏམཧཾ ཨབྦྷཉྙཱསི’’ནྟི (ཨ॰ ནི॰ ༤.༢༤)། ཨེཝཾ སབྦཏྠ ཨཔྤཊིཧཏཉཱཎོ བྷགཝཱ སབྦཱཔི ཏཱ དེཝཏཱ བྷབྦཱབྷབྦཝསེན དྭེ ཀོཊྛཱསེ ཨཀཱསི། ‘‘ཀམྨཱཝརཎེན ཝཱ སམནྣཱགཏཱ’’ཏིཨཱདིནཱ (པུ॰ པ॰ ༡༢) ཧི ནཡེན ཝུཏྟཱ སཏྟཱ ཨབྷབྦཱ ནཱམ། ཏེ ཨེཀཝིཧཱརེ ཝསནྟེཔི བུདྡྷཱ ན ཨོལོཀེནྟི། ཝིཔརཱིཏཱ པན བྷབྦཱ ནཱམ། ཏེ དཱུརེ ཝསནྟེཔི གནྟྭཱ སངྒཎྷནྟི། ཏསྨིཾ དེཝཏཱསནྣིཔཱཏེ ཡེ ཨབྷབྦཱ, ཏེ པཧཱཡ བྷབྦེ པརིགྒཧེསི། པརིགྒཧེཏྭཱ ‘‘ཨེཏྟཀཱ ཨེཏྠ རཱགཙརིཏཱ, ཨེཏྟཀཱ དོསཱདིཙརིཏཱ’’ཏི ཙརིཡཝསེན ཚ ཀོཊྛཱསེ ཨཀཱསི། ཨཐ ནེསཾ སཔྤཱཡདྷམྨདེསནཾ ཨུཔདྷཱརེནྟོ ‘‘རཱགཙརིཏཱནཾ དེཝཱནཾ སམྨཱཔརིབྦཱཛནཱིཡསུཏྟཾ (སུ॰ ནི॰ ༣༦༡ ཨཱདཡོ) ཀཐེསྶཱམི, དོསཙརིཏཱནཾ ཀལཧཝིཝཱདསུཏྟཾ (སུ॰ ནི॰ ༨༦༨ ཨཱདཡོ), མོཧཙརིཏཱནཾ མཧཱབྱཱུཧསུཏྟཾ (སུ॰ ནི॰ ༩༠༡ ཨཱདཡོ), ཝིཏཀྐཙརིཏཱནཾ ཙཱུལ༹བྱཱུཧསུཏྟཾ (སུ॰ ནི॰ ༨༨༤ ཨཱདཡོ), སདྡྷཱཙརིཏཱནཾ ཏུཝཊཀསུཏྟཾ (སུ॰ ནི॰ ༩༢༡ ཨཱདཡོ), བུདྡྷིཙརིཏཱནཾ པུརཱབྷེདསུཏྟཾ (སུ॰ ནི॰ ༨༥༤ ཨཱདཡོ) ཀཐེསྶཱམཱི’’ཏི དེསནཾ ཝཝཏྠཱཔེཏྭཱ པུན ཏཾ པརིསཾ མནསཱཀཱསི ‘‘ཨཏྟཛ྄ཛྷཱསཡེན ནུ ཁོ ཛཱནེཡྻ, པརཛ྄ཛྷཱསཡེན, ཨཊྛུཔྤཏྟིཀེན, པུཙྪཱཝསེནཱ’’ཏི། ཏཏོ ‘‘པུཙྪཱཝསེན ཛཱནེཡྻཱ’’ཏི ཉཏྭཱ ‘‘ཨཏྠི ནུ ཁོ ཀོཙི དེཝཏཱནཾ ཨཛ྄ཛྷཱསཡཾ གཧེཏྭཱ ཙརིཡཝསེན པཉྷཾ པུཙྪིཏུཾ སམཏྠོ’’ཏི ‘‘ཏེསུ པཉྩསཏེསུ བྷིཀྑཱུསུ ཨེཀོཔི ན སཀྐོཏཱི’’ཏི ཨདྡས། ཏཏོ ཨསཱིཏིམཧཱསཱཝཀེ, དྭེ ཨགྒསཱཝཀེ ཙ སམནྣཱཧརིཏྭཱ ‘‘ཏེཔི ན སཀྐོནྟཱི’’ཏི དིསྭཱ ཙིནྟེསི – ‘‘སཙེ པཙྩེཀབུདྡྷོ བྷཝེཡྻ, སཀྐུཎེཡྻ ནུ ཁོ’’ཏི། ‘‘སོཔི ན སཀྐུཎེཡྻོ’’ཏི ཉཏྭཱ ‘‘སཀྐསུཡཱམཱདཱིསུ ཀོཙི སཀྐུཎེཡྻཱ’’ཏི སམནྣཱཧརི། སཙེ ཧི ཏེསུ ཀོཙི སཀྐུཎེཡྻ, ཏཾ པུཙྪཱཔེཏྭཱ ཨཏྟནཱ ཝིསྶཛྫེཡྻ། ན པན ཏེསུཔི ཀོཙི སཀྐོཏི། ཨཐསྶ ཨེཏདཧོསི – ‘‘མཱདིསོ བུདྡྷོཡེཝ སཀྐུཎེཡྻ, ཨཏྠི པན ཀཏྠཙི ཨཉྙོ བུདྡྷོ’’ཏི ཨནནྟཱསུ ལོཀདྷཱཏཱུསུ ཨནནྟཉཱཎཾ པཏྠརིཏྭཱ ལོཀཾ ཨོལོཀེནྟོ ན ཨཉྙཾ བུདྡྷཾ ཨདྡས། ཨནཙྪརིཡཉྩེཏཾ, ཨིདཱནི ཨཏྟནཱ སམཾ ན པསྶེཡྻ, ཡོ ཛཱཏདིཝསེཔི བྲཧྨཛཱལཝཎྞནཱཡཾ (དཱི॰ ནི॰ ཨཊྛ॰ ༡.༧) ཝུཏྟནཡེན ཨཏྟནཱ སམཾ ཨཔསྶནྟོ ‘‘ཨགྒོཧམསྨི ལོཀསྶཱ’’ཏི (དཱི॰ ནི॰ ༢.༣༡) ཨཔྤཊིཝཏྟིཡཾ སཱིཧནཱདཾ ནདི། ཨེཝཾ ཨཉྙཾ ཨཏྟནཱ སམཾ ཨཔསྶིཏྭཱ ཙིནྟེསི ‘‘སཙེ ཨཧཾ པུཙྪིཏྭཱ ཨཧམེཝ ཝིསྶཛྫེཡྻཾ, ཨེཝཾ ཏཱ དེཝཏཱ ན སཀྑིསྶནྟི པཊིཝིཛ྄ཛྷིཏུཾ། ཨཉྙསྨིཾ པན བུདྡྷེཡེཝ པུཙྪནྟེ མཡི ཙ ཝིསྶཛྫནྟེ ཨཙྪེརཀཾ བྷཝིསྶཏི, སཀྑིསྶནྟི ཙ དེཝཏཱ པཊིཝིཛ྄ཛྷིཏུཾ, ཏསྨཱ ནིམྨིཏབུདྡྷཾ མཱཔེསྶཱམཱི’’ཏི ཨབྷིཉྙཱཔཱདཀཾ ཛྷཱནཾ སམཱཔཛྫིཏྭཱ ཝུཊྛཱཡ ‘‘པཏྟཙཱིཝརགྒཧཎཾ ཨཱལོཀིཏཾ ཝིལོཀིཏཾ སམིཉྫིཏཾ པསཱརིཏཉྩ མམ སདིསཾཡེཝ ཧོཏཱུ’’ཏི ཀཱམཱཝཙརཙིཏྟེཧི པརིཀམྨཾ ཀཏྭཱ ‘‘པཱཙཱིནཡུགནྡྷརཔརིཀྑེཔཏོ ཨུལླངྒྷཡམཱནཾ ཙནྡམཎྜལཾ བྷིནྡིཏྭཱ ནིཀྑམནྟོ ཝིཡ ཨཱགཙྪཏཱུ’’ཏི རཱུཔཱཝཙརཙིཏྟེན ཨདྷིཊྛཱསི། དེཝསངྒྷོ ཏཾ དིསྭཱ ‘‘ཨཉྙོཔི ནུ ཁོ བྷོ, ཙནྡོ ཨུགྒཏོ’’ཏི ཨཱཧ། ཨཐ ཙནྡཾ ཨོཧཱཡ ཨཱསནྣཏརེ ཛཱཏེ ‘‘ན ཙནྡོ, སཱུརིཡོ ཨུགྒཏོ’’ཏི། པུན ཨཱསནྣཏརེ ཛཱཏེ ‘‘ན སཱུརིཡོ, དེཝཝིམཱནཾ ཨེཏ’’ནྟི། པུན ཨཱསནྣཏརེ ཛཱཏེ ‘‘ན དེཝཝིམཱནཾ, དེཝཔུཏྟོ ཨེསོ’’ཏི། པུན ཨཱསནྣཏརེ ཛཱཏེ ‘‘ན དེཝཔུཏྟོ, མཧཱབྲཧྨཱ ཨེསོ’’ཏི། པུན ཨཱསནྣཏརེ ཛཱཏེ ‘‘ན མཧཱབྲཧྨཱ, ཨཔརོཔི བྷོ བུདྡྷོ ཨཱགཏོ’’ཏི ཨཱཧ།

    Kathaṃ? Buddhā nāma mahantā ete sattavisesā, yaṃ sadevakassa lokassa diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā na kiñci katthaci nīlādivasena vibhattarūpārammaṇesu vibhattarūpārammaṇaṃ vā, bherisaddādivasena vibhattasaddārammaṇādīsu saddādiārammaṇaṃ vā atthi, yaṃ etesaṃ ñāṇamukhe āpāthaṃ nāgacchati. Yathāha – ‘‘yaṃ, bhikkhave, sadevakassa lokassa…pe… sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ jānāmi tamahaṃ abbhaññāsi’’nti (a. ni. 4.24). Evaṃ sabbattha appaṭihatañāṇo bhagavā sabbāpi tā devatā bhabbābhabbavasena dve koṭṭhāse akāsi. ‘‘Kammāvaraṇena vā samannāgatā’’tiādinā (pu. pa. 12) hi nayena vuttā sattā abhabbā nāma. Te ekavihāre vasantepi buddhā na olokenti. Viparītā pana bhabbā nāma. Te dūre vasantepi gantvā saṅgaṇhanti. Tasmiṃ devatāsannipāte ye abhabbā, te pahāya bhabbe pariggahesi. Pariggahetvā ‘‘ettakā ettha rāgacaritā, ettakā dosādicaritā’’ti cariyavasena cha koṭṭhāse akāsi. Atha nesaṃ sappāyadhammadesanaṃ upadhārento ‘‘rāgacaritānaṃ devānaṃ sammāparibbājanīyasuttaṃ (su. ni. 361 ādayo) kathessāmi, dosacaritānaṃ kalahavivādasuttaṃ (su. ni. 868 ādayo), mohacaritānaṃ mahābyūhasuttaṃ (su. ni. 901 ādayo), vitakkacaritānaṃ cūḷabyūhasuttaṃ (su. ni. 884 ādayo), saddhācaritānaṃ tuvaṭakasuttaṃ (su. ni. 921 ādayo), buddhicaritānaṃ purābhedasuttaṃ (su. ni. 854 ādayo) kathessāmī’’ti desanaṃ vavatthāpetvā puna taṃ parisaṃ manasākāsi ‘‘attajjhāsayena nu kho jāneyya, parajjhāsayena, aṭṭhuppattikena, pucchāvasenā’’ti. Tato ‘‘pucchāvasena jāneyyā’’ti ñatvā ‘‘atthi nu kho koci devatānaṃ ajjhāsayaṃ gahetvā cariyavasena pañhaṃ pucchituṃ samattho’’ti ‘‘tesu pañcasatesu bhikkhūsu ekopi na sakkotī’’ti addasa. Tato asītimahāsāvake, dve aggasāvake ca samannāharitvā ‘‘tepi na sakkontī’’ti disvā cintesi – ‘‘sace paccekabuddho bhaveyya, sakkuṇeyya nu kho’’ti. ‘‘Sopi na sakkuṇeyyo’’ti ñatvā ‘‘sakkasuyāmādīsu koci sakkuṇeyyā’’ti samannāhari. Sace hi tesu koci sakkuṇeyya, taṃ pucchāpetvā attanā vissajjeyya. Na pana tesupi koci sakkoti. Athassa etadahosi – ‘‘mādiso buddhoyeva sakkuṇeyya, atthi pana katthaci añño buddho’’ti anantāsu lokadhātūsu anantañāṇaṃ pattharitvā lokaṃ olokento na aññaṃ buddhaṃ addasa. Anacchariyañcetaṃ, idāni attanā samaṃ na passeyya, yo jātadivasepi brahmajālavaṇṇanāyaṃ (dī. ni. aṭṭha. 1.7) vuttanayena attanā samaṃ apassanto ‘‘aggohamasmi lokassā’’ti (dī. ni. 2.31) appaṭivattiyaṃ sīhanādaṃ nadi. Evaṃ aññaṃ attanā samaṃ apassitvā cintesi ‘‘sace ahaṃ pucchitvā ahameva vissajjeyyaṃ, evaṃ tā devatā na sakkhissanti paṭivijjhituṃ. Aññasmiṃ pana buddheyeva pucchante mayi ca vissajjante accherakaṃ bhavissati, sakkhissanti ca devatā paṭivijjhituṃ, tasmā nimmitabuddhaṃ māpessāmī’’ti abhiññāpādakaṃ jhānaṃ samāpajjitvā vuṭṭhāya ‘‘pattacīvaraggahaṇaṃ ālokitaṃ vilokitaṃ samiñjitaṃ pasāritañca mama sadisaṃyeva hotū’’ti kāmāvacaracittehi parikammaṃ katvā ‘‘pācīnayugandharaparikkhepato ullaṅghayamānaṃ candamaṇḍalaṃ bhinditvā nikkhamanto viya āgacchatū’’ti rūpāvacaracittena adhiṭṭhāsi. Devasaṅgho taṃ disvā ‘‘aññopi nu kho bho, cando uggato’’ti āha. Atha candaṃ ohāya āsannatare jāte ‘‘na cando, sūriyo uggato’’ti. Puna āsannatare jāte ‘‘na sūriyo, devavimānaṃ eta’’nti. Puna āsannatare jāte ‘‘na devavimānaṃ, devaputto eso’’ti. Puna āsannatare jāte ‘‘na devaputto, mahābrahmā eso’’ti. Puna āsannatare jāte ‘‘na mahābrahmā, aparopi bho buddho āgato’’ti āha.

    ཏཏྠ པུཐུཛྫནདེཝཏཱ ཙིནྟཡིཾསུ – ‘‘ཨེཀབུདྡྷསྶ ཏཱཝ ཨཡཾ དེཝཏཱསནྣིཔཱཏོ། དྭིནྣཾ ཀཱིཝམཧནྟོ བྷཝིསྶཏཱི’’ཏི། ཨརིཡདེཝཏཱ ཙིནྟཡིཾསུ – ‘‘ཨེཀིསྶཱ ལོཀདྷཱཏུཡཱ དྭེ བུདྡྷཱ ནཱམ ནཏྠི, ཨདྡྷཱ བྷགཝཱ ཨཏྟནཱ སདིསཾ ཨཉྙཾ ཨེཀཾ བུདྡྷཾ ནིམྨིནཱི’’ཏི། ཨཐསྶ དེཝསངྒྷསྶ པསྶནྟསྶེཝ ནིམྨིཏབུདྡྷོ ཨཱགནྟྭཱ དསབལཾ ཨཝནྡིཏྭཱཝ སམྨུཁཊྛཱནེ སམསམཾ ཀཏྭཱ མཱཔིཏེ ཨཱསནེ ནིསཱིདི། བྷགཝཏོ བཱཏྟིཾསམཧཱཔུརིསལཀྑཎཱནི, ནིམྨིཏསྶཱཔི, བྷགཝཏོ སརཱིརཱ ཚབྦཎྞརསྨིཡོ ནིཀྑམནྟི, ནིམྨིཏསྶཱཔི, བྷགཝཏོ སརཱིརརསྨིཡོ ནིམྨིཏསརཱིརེ པཊིཧཉྙནྟི, ནིམྨིཏསྶ རསྨིཡོ བྷགཝཏོ ཀཱཡེ པཊིཧཉྙནྟི། ཏཱ དྭིནྣམྤི བུདྡྷཱནཾ སརཱིརཏོ ཨུགྒམྨ བྷཝགྒཾ ཨཱཧཙྩ ཏཏོ ཏཏོ པཊིནིཝཏྟིཏྭཱ དེཝཏཱནཾ མཏྠཀམཏྠཀཔརིཡནྟེན ཨོཏརིཏྭཱ ཙཀྐཝཱལ༹མུཁཝཊྚིཡཾ པཏིཊྛཧིཾསུ། སཀལཙཀྐཝཱལ༹གབྦྷཾ སུཝཎྞམཡཝངྐགོཔཱནསིཝིནདྡྷམིཝ ཙེཏིཡགྷརཾ ཝིརོཙིཏྠ། དསསཧསྶཙཀྐཝཱལ༹དེཝཏཱ ཨེཀཙཀྐཝཱལེ༹ རཱསིབྷཱུཏཱ དྭིནྣཾ བུདྡྷཱནཾ རསྨིཨབྦྷནྟརཾ པཝིསིཏྭཱ ཨཊྛཾསུ། ནིམྨིཏོ ནིསཱིདནྟོཡེཝ ‘‘ཀཐཾདསྶཱི ཀཐཾསཱིལོ, ཨུཔསནྟོཏི ཝུཙྩཏཱི’’ཏིཨཱདིནཱ ནཡེན ཨདྷིཔཉྙཱདིཀཾ པུཙྪནྟོ གཱཐམཱཧ།

    Tattha puthujjanadevatā cintayiṃsu – ‘‘ekabuddhassa tāva ayaṃ devatāsannipāto. Dvinnaṃ kīvamahanto bhavissatī’’ti. Ariyadevatā cintayiṃsu – ‘‘ekissā lokadhātuyā dve buddhā nāma natthi, addhā bhagavā attanā sadisaṃ aññaṃ ekaṃ buddhaṃ nimminī’’ti. Athassa devasaṅghassa passantasseva nimmitabuddho āgantvā dasabalaṃ avanditvāva sammukhaṭṭhāne samasamaṃ katvā māpite āsane nisīdi. Bhagavato bāttiṃsamahāpurisalakkhaṇāni, nimmitassāpi, bhagavato sarīrā chabbaṇṇarasmiyo nikkhamanti, nimmitassāpi, bhagavato sarīrarasmiyo nimmitasarīre paṭihaññanti, nimmitassa rasmiyo bhagavato kāye paṭihaññanti. Tā dvinnampi buddhānaṃ sarīrato uggamma bhavaggaṃ āhacca tato tato paṭinivattitvā devatānaṃ matthakamatthakapariyantena otaritvā cakkavāḷamukhavaṭṭiyaṃ patiṭṭhahiṃsu. Sakalacakkavāḷagabbhaṃ suvaṇṇamayavaṅkagopānasivinaddhamiva cetiyagharaṃ virocittha. Dasasahassacakkavāḷadevatā ekacakkavāḷe rāsibhūtā dvinnaṃ buddhānaṃ rasmiabbhantaraṃ pavisitvā aṭṭhaṃsu. Nimmito nisīdantoyeva ‘‘kathaṃdassī kathaṃsīlo, upasantoti vuccatī’’tiādinā nayena adhipaññādikaṃ pucchanto gāthamāha.

    ཏཏྠ པུཙྪཱཡ ཏཱཝ སོ ནིམྨིཏོ ཀཐཾདསྶཱིཏི ཨདྷིཔཉྙཾ, ཀཐཾསཱིལོཏི ཨདྷིསཱིལཾ, ཨུཔསནྟོཏི ཨདྷིཙིཏྟཾ པུཙྪཏི། སེསཾ པཱཀཊམེཝ།

    Tattha pucchāya tāva so nimmito kathaṃdassīti adhipaññaṃ, kathaṃsīloti adhisīlaṃ, upasantoti adhicittaṃ pucchati. Sesaṃ pākaṭameva.

    ནིམྨིཏབུདྡྷཱདིཝིབྷཱཝནཏྠཾ པེཊཀེ –

    Nimmitabuddhādivibhāvanatthaṃ peṭake –

    ‘‘ཨུཔེཏི དྷམྨཾ པརིཔུཙྪམཱནོ, ཀུསལཾ ཨཏྠུཔསཉྷིཏཾ།

    ‘‘Upeti dhammaṃ paripucchamāno, kusalaṃ atthupasañhitaṃ;

    ན ཛཱིཝཏི ན ནིབྦུཏོ ན མཏོ, ཏཾ པུགྒལཾ ཀཏམཾ ཝདནྟི བུདྡྷཱ༎ (པརི॰ ༤༧༩)།

    Na jīvati na nibbuto na mato, taṃ puggalaṃ katamaṃ vadanti buddhā. (pari. 479);

    ‘‘སཾསཱརཁཱིཎོ ན ཙ ཝནྟརཱགོ, ན ཙཱཔི སེཀྑོ ན ཙ དིཊྛདྷམྨོ།

    ‘‘Saṃsārakhīṇo na ca vantarāgo, na cāpi sekkho na ca diṭṭhadhammo;

    ཨཁཱིཎཱསཝོ ཨནྟིམདེཧདྷཱརཱི, ཏཾ པུགྒལཾ ཀཏམཾ ཝདནྟི བུདྡྷཱ༎

    Akhīṇāsavo antimadehadhārī, taṃ puggalaṃ katamaṃ vadanti buddhā.

    ‘‘ན དུཀྑསཙྩེན སམངྒིབྷཱུཏོ, ན མགྒསཙྩེན ཀུཏོ ནིརོདྷོ།

    ‘‘Na dukkhasaccena samaṅgibhūto, na maggasaccena kuto nirodho;

    སམུདཡསཙྩཏོ སུཝིདཱུརཝིདཱུརོ, ཏཾ པུགྒལཾ ཀཏམཾ ཝདནྟི བུདྡྷཱ༎

    Samudayasaccato suvidūravidūro, taṃ puggalaṃ katamaṃ vadanti buddhā.

    ‘‘ཨཧེཏུཀོ ནོཔི ཙ རཱུཔནིསྶིཏོ, ཨཔཙྩཡོ ནོཔི ཙ སོ ཨསངྑཏོ།

    ‘‘Ahetuko nopi ca rūpanissito, apaccayo nopi ca so asaṅkhato;

    ཨསངྑཏཱརམྨཎོ ནོཔི ཙ རཱུཔཱི, ཏཾ པུགྒལཾ ཀཏམཾ ཝདནྟི བུདྡྷཱ’’ཏི༎ –

    Asaṅkhatārammaṇo nopi ca rūpī, taṃ puggalaṃ katamaṃ vadanti buddhā’’ti. –

    ཝུཏྟཾ།

    Vuttaṃ.

    ཏཏྠ པཋམགཱཐཱ ནིམྨིཏབུདྡྷཾ སནྡྷཱཡ, དུཏིཡགཱཐཱ པཙྪིམབྷཝིཀབོདྷིསཏྟཾ སནྡྷཱཡ, ཏཏིཡགཱཐཱ ཨརཧཏྟཕལཊྛཾ སནྡྷཱཡ, ཙཏུཏྠགཱཐཱ ཨརཱུཔེ ནིབྦཱནཔཙྩཝེཀྑཎམནོདྭཱརཔུརེཙཱརིཀཙིཏྟསམངྒིཾ སནྡྷཱཡ ཝུཏྟཱཏི ཉཱཏབྦཱ། ཀཱིདིསེན དསྶནེནཱཏི ཀཱིདིསཝསེན དསྶནེན། ཀིཾསཎྛིཏེནཱཏི ཀིཾསརིཀྑེན། ཀིཾཔཀཱརེནཱཏི ཀིཾཝིདྷེན། ཀིཾཔཊིབྷཱགེནཱཏི ཀིཾཨཱཀཱརེན།

    Tattha paṭhamagāthā nimmitabuddhaṃ sandhāya, dutiyagāthā pacchimabhavikabodhisattaṃ sandhāya, tatiyagāthā arahattaphalaṭṭhaṃ sandhāya, catutthagāthā arūpe nibbānapaccavekkhaṇamanodvārapurecārikacittasamaṅgiṃ sandhāya vuttāti ñātabbā. Kīdisena dassanenāti kīdisavasena dassanena. Kiṃsaṇṭhitenāti kiṃsarikkhena. Kiṃpakārenāti kiṃvidhena. Kiṃpaṭibhāgenāti kiṃākārena.

    ཡཾ པུཙྪཱམཱིཏི ཡཾ པུགྒལཾ པུཙྪཱམི, ཏཾ མཡ྄ཧཾ ཝིཡཱཀརོཧི། ཡཱཙཱམཱིཏི ཨཱཡཱཙཱམི། ཨཛ྄ཛྷེསཱམཱིཏི ཨཱཎཱཔེམི། པསཱདེམཱིཏི ཏཝ སནྟཱནེ སོམནསྶཾ ཨུཔྤཱདེམི། བྲཱུཧཱིཏི ནིདྡེསསྶ ཨུདྡེསཔདཾ། ཨཱཙིཀྑཱཏི དེསེཏབྦཱནཾ ‘‘ཨིམཱནི ནཱམཱནཱི’’ཏི ནཱམཝསེན ཀཐེཧི། དེསེཧཱིཏི དསྶེཧི ། པཉྙཔེཧཱིཏི ཛཱནཱཔེཧི། ཉཱཎམུཁཝསེན ཧི ཨཔྤནཾ ཋཔེནྟོ ‘‘པཉྙཔེཧཱི’’ཏི ཝུཙྩཏི། པཊྛཔེཧཱིཏི པཉྙཱཔེཧི, པཝཏྟཱཔེཧཱིཏི ཨཏྠོ། ཉཱཎམུཁེ ཋཔེཧཱིཏི ཝཱ། ཝིཝརཱཏི ཝིཝཊཾ ཀརོཧི, ཝིཝརིཏྭཱ དསྶེཧཱིཏི ཨཏྠོ། ཝིབྷཛཱཏི ཝིབྷཱགཀིརིཡཱཡ ཝིབྷཱཝེནྟོ དསྶེཧཱིཏི ཨཏྠོ། ཨུཏྟཱནཱིཀརོཧཱིཏི པཱཀཊབྷཱཝཾ ཀརོཧི།

    Yaṃ pucchāmīti yaṃ puggalaṃ pucchāmi, taṃ mayhaṃ viyākarohi. Yācāmīti āyācāmi. Ajjhesāmīti āṇāpemi. Pasādemīti tava santāne somanassaṃ uppādemi. Brūhīti niddesassa uddesapadaṃ. Ācikkhāti desetabbānaṃ ‘‘imāni nāmānī’’ti nāmavasena kathehi. Desehīti dassehi . Paññapehīti jānāpehi. Ñāṇamukhavasena hi appanaṃ ṭhapento ‘‘paññapehī’’ti vuccati. Paṭṭhapehīti paññāpehi, pavattāpehīti attho. Ñāṇamukhe ṭhapehīti vā. Vivarāti vivaṭaṃ karohi, vivaritvā dassehīti attho. Vibhajāti vibhāgakiriyāya vibhāvento dassehīti attho. Uttānīkarohīti pākaṭabhāvaṃ karohi.

    ཨཐ ཝཱ ཨཱཙིཀྑཱཏི དེསནཱདཱིནཾ ཚནྣཾ པདཱནཾ མཱུལཔདཾ། དེསནཱདཱིནི ཚ པདཱནི ཨེཏསྶ ཨཏྠསྶ ཝིཝརཎཏྠཾ ཝུཏྟཱནི། ཏཏྠ དེསེཧཱིཏི ཨུགྒྷཊིཏཉྙཱུནཾ ཝསེན སངྑེཔཏོ པཋམཾ ཨུདྡེསཝསེན དེསེཧི། ཨུགྒྷཊིཏཉྙཱུ ཧི སངྑེཔེན ཝུཏྟཾ པཋམཾ ཝུཏྟཉྩ པཊིཝིཛ྄ཛྷནྟི། པཉྙཔེཧཱིཏི ཝིཔཉྩིཏཉྙཱུནཾ ཝསེན ཏེསཾ ཙིཏྟཏོསནེན བུདྡྷིནིསཱནེན ཙ པཋམཾ སཾཁིཏྟསྶ ཝིཏྠཱརཏོ ནིདྡེསཝསེནེཝ པཉྙཔེཧི། པཊྛཔེཧཱིཏི ཏེསཾཡེཝ ནིདྡིཊྛསྶ ནིདྡེསསྶ པཊིནིདྡེསཝསེན ཝིཏྠཱརིཏཝསེན ཋཔེཏི པཊྛཔེཧི། ཝིཝརཱཏི ནིདྡིཊྛསྶཔི པུནཔྤུནཾ ཝཙནེན ཝིཝརཱཧི། ཝིབྷཛཱཏི པུནཔྤུནཾ ཝུཏྟསྶཱཔི ཝིབྷཱགཀརཎེན ཝིབྷཛཱཧི། ཨུཏྟཱནཱིཀརོཧཱིཏི ཝིཝཊསྶ ཝིཏྠཱརཏརཝཙནེན ཝིབྷཏྟསྶ ཙ ནིདསྶནཝཙནེན ཨུཏྟཱནིཾ ཀརོཧི། ཨཡཾ དེསནཱ ནེཡྻཱནམྤི པཊིཝེདྷཱཡ ཧོཏཱིཏི།

    Atha vā ācikkhāti desanādīnaṃ channaṃ padānaṃ mūlapadaṃ. Desanādīni cha padāni etassa atthassa vivaraṇatthaṃ vuttāni. Tattha desehīti ugghaṭitaññūnaṃ vasena saṅkhepato paṭhamaṃ uddesavasena desehi. Ugghaṭitaññū hi saṅkhepena vuttaṃ paṭhamaṃ vuttañca paṭivijjhanti. Paññapehīti vipañcitaññūnaṃ vasena tesaṃ cittatosanena buddhinisānena ca paṭhamaṃ saṃkhittassa vitthārato niddesavaseneva paññapehi. Paṭṭhapehīti tesaṃyeva niddiṭṭhassa niddesassa paṭiniddesavasena vitthāritavasena ṭhapeti paṭṭhapehi. Vivarāti niddiṭṭhassapi punappunaṃ vacanena vivarāhi. Vibhajāti punappunaṃ vuttassāpi vibhāgakaraṇena vibhajāhi. Uttānīkarohīti vivaṭassa vitthārataravacanena vibhattassa ca nidassanavacanena uttāniṃ karohi. Ayaṃ desanā neyyānampi paṭivedhāya hotīti.

    ༨༤. ཝིསྶཛྫནེ པན བྷགཝཱ སརཱུཔེན ཨདྷིཔཉྙཱདཱིནི ཨཝིསྶཛྫེཏྭཱཝ ཨདྷིཔཉྙཱདིཔྤབྷཱཝེན ཡེསཾ ཀིལེསཱནཾ ཨུཔསམཱ ‘‘ཨུཔསནྟོ’’ཏི ཝུཙྩཏི, ནཱནཱདེཝཏཱནཾ ཨཱསཡཱནུལོམེན ཏེསཾ ཨུཔསམམེཝ དཱིཔེནྟོ ‘‘ཝཱིཏཏཎྷོ’’ཏིཨཱདིཀཱ གཱཐཱཡོ ཨབྷཱསི། ཏཏྠ ཨཱདིཏོ ཨཊྛནྣཾ གཱཐཱནཾ ‘‘ཏཾ བྲཱུམི ཨུཔསནྟོ’’ཏི ཨིམཱཡ གཱཐཱཡ སམྦནྡྷོ ཝེདིཏབྦོ, ཏཏོ པརཱསཾ ‘‘ས ཝེ སནྟོཏི ཝུཙྩཏཱི’’ཏི ཨིམིནཱ སབྦཔཙྪིམེན པདེན།

    84. Vissajjane pana bhagavā sarūpena adhipaññādīni avissajjetvāva adhipaññādippabhāvena yesaṃ kilesānaṃ upasamā ‘‘upasanto’’ti vuccati, nānādevatānaṃ āsayānulomena tesaṃ upasamameva dīpento ‘‘vītataṇho’’tiādikā gāthāyo abhāsi. Tattha ādito aṭṭhannaṃ gāthānaṃ ‘‘taṃ brūmi upasanto’’ti imāya gāthāya sambandho veditabbo, tato parāsaṃ ‘‘sa ve santoti vuccatī’’ti iminā sabbapacchimena padena.

    ཨནུཔདཝཎྞནཱནཡོ – ཝཱིཏཏཎྷོ པུརཱབྷེདཱཏི ཡོ སརཱིརབྷེདཱ པུབྦམེཝ པཧཱིནཏཎྷོ། པུབྦམནྟམནིསྶིཏོཏི ཨཏཱིཏདྡྷཱདིབྷེདཾ པུབྦཨནྟཾ ཨནིསྶིཏོ། ཝེམཛ྄ཛྷེ ནུཔསངྑེཡྻོཏི པཙྩུཔྤནྣེཔི ཨདྡྷནི ‘‘རཏྟོ’’ཏིཨཱདིནཱ ནཡེན ན ཨུཔསངྑཱཏབྦོ ། ཏསྶ ནཏྠི པུརཀྑཏནྟི ཏསྶ ཨརཧཏོ དྭིནྣཾ པུརེཀྑཱརཱནཾ ཨབྷཱཝཱ ཨནཱགཏེ ཨདྡྷནི པུརཀྑཏམཔི ནཏྠི, ཏཾ བྲཱུམི ཨུཔསནྟོཏི ཨེཝམེཏྠ ཡོཛནཱ ཝེདིཏབྦཱ། ཨེས ནཡོ སབྦཏྠ།

    Anupadavaṇṇanānayo – vītataṇho purābhedāti yo sarīrabhedā pubbameva pahīnataṇho. Pubbamantamanissitoti atītaddhādibhedaṃ pubbaantaṃ anissito. Vemajjhe nupasaṅkheyyoti paccuppannepi addhani ‘‘ratto’’tiādinā nayena na upasaṅkhātabbo . Tassa natthi purakkhatanti tassa arahato dvinnaṃ purekkhārānaṃ abhāvā anāgate addhani purakkhatamapi natthi, taṃ brūmi upasantoti evamettha yojanā veditabbā. Esa nayo sabbattha.

    པུརཱ ཀཱཡསྶ བྷེདཱཏི ཀརཛཀཱཡསྶ བྷེདཏོ པུབྦེཡེཝ། ཨཏྟབྷཱཝསྶཱཏི སཀལཏྟབྷཱཝསྶ། ཀལེ༹ཝརསྶ ནིཀྑེཔཱཏི ཀལེ༹ཝརསྶ ནིཀྑེཔཏོ སརཱིརསྶ ཋཔནཏོ། ཛཱིཝིཏིནྡྲིཡསྶ ཨུཔཙྪེདཱཏི དུཝིདྷསྶ ཛཱིཝིཏིནྡྲིཡསྶ ཨུཔཙྪེདཏོ པུབྦམེཝ།

    Purā kāyassa bhedāti karajakāyassa bhedato pubbeyeva. Attabhāvassāti sakalattabhāvassa. Kaḷevarassa nikkhepāti kaḷevarassa nikkhepato sarīrassa ṭhapanato. Jīvitindriyassa upacchedāti duvidhassa jīvitindriyassa upacchedato pubbameva.

    པུབྦནྟོ ཝུཙྩཏི ཨཏཱིཏོ ཨདྡྷཱཏི པུབྦསངྑཱཏོ ཨནྟོ ཀོཊྛཱསོ ‘‘ཨཏཱིཏོ ཨདྡྷཱཏི, ཨཏིཀྐནྟོ ཀཱལོ’’ཏི ཀཐཱིཡཏི། ཨཏཱིཏཾ ཨདྡྷཱནཾ ཨཱརབྦྷཱཏི ཨཏཱིཏཀཱལཾ པཊིཙྩ ཏཎྷཱ པཧཱིནཱ།

    Pubbanto vuccati atīto addhāti pubbasaṅkhāto anto koṭṭhāso ‘‘atīto addhāti, atikkanto kālo’’ti kathīyati. Atītaṃ addhānaṃ ārabbhāti atītakālaṃ paṭicca taṇhā pahīnā.

    ཨཔརམྤི བྷདྡེཀརཏྟཔརིཡཱཡཾ (མ॰ ནི॰ ༣.༢༧༢ ཨཱདཡོ) དསྶེནྟོ ‘‘ཨཐ ཝཱ’’ཏིཨཱདིམཱཧ། ཏཏྠ ཨེཝཾརཱུཔོ ཨཧོསིནྟི ཀཱལོ༹པི སམཱནོ ཨིནྡནཱིལམཎིཝཎྞོ ཨཧོསིནྟི ཨེཝཾ མནུཉྙརཱུཔཝསེནེཝ ཨེཝཾརཱུཔོ ཨཧོསིཾ། ཀུསལསུཁསོམནསྶཝེདནཱཝསེནེཝ ཨེཝཾཝེདནོ། ཏཾ སམྤཡུཏྟཱནཾཡེཝ སཉྙཱདཱིནཾ ཝསེན ཨེཝཾསཉྙོ། ཨེཝཾསངྑཱརོ། ཨེཝཾཝིཉྙཱཎོ ཨཧོསིཾ ཨཏཱིཏམདྡྷཱནནྟི ཏཏྠ ནནྡིཾ ན སམནྣཱནེཏཱིཏི ཏེསུ རཱུཔཱདཱིསུ ཏཎྷཾ ཝཱ ཏཎྷཱསམྤཡུཏྟདིཊྛིཾ ཝཱ ནཱནུཔཝཏྟཡཏི། ཨཔརེན པརིཡཱཡེན མཧཱཀཙྩཱནབྷདྡེཀརཏྟཔརིཡཱཡཾ དསྶེནྟོ ‘‘ཨཐ ཝཱ ཨིཏི མེ ཙཀྑུ ཨཧོསཱི’’ཏིཨཱདིམཱཧ། ཏཏྠ ཙཀྑཱུཏི ཙཀྑུཔསཱདོ། རཱུཔཱཏི ཙཏུསམུཊྛཱནིཀརཱུཔཱ། ཨིམིནཱ ནཡེན སེསཱཡཏནཱནིཔི ཝེདིཏབྦཱནི། ཝིཉྙཱཎནྟི ནིསྶཡཝིཉྙཱཎཾ། ན ཏདབྷིནནྡཏཱིཏི ཏཾ ཙཀྑུཉྩེཝ རཱུཔཉྩ ཏཎྷཱདིཊྛིཝསེན ནཱབྷིནནྡཏི། ཨིཏི མེ མནོ ཨཧོསི ཨིཏི དྷམྨཱཏི ཨེཏྠ པན མནོཏི བྷཝངྒཙིཏྟཾ། དྷམྨཱཏི ཏེབྷཱུམཀདྷམྨཱརམྨཎཾ། ཧསིཏལཔིཏཀཱིལི༹ཏཱནཱིཏི དནྟཝིདཾསཀཧསིཏཉྩ ཝཱཙཱལཔིཏཉྩ ཀཱཡཀཱིལཱ༹དིཀཱིལི༹ཏཉྩཱཏི ཧསིཏལཔིཏཀཱིལི༹ཏཱནི། ན ཏདསྶཱདེཏཱིཏི ཏཱནི ཧསིཏཱདཱིནི ནཱབྷིནནྡཏི། ན ཏཾ ནིཀཱམེཏཱིཏི ཀནྟཾ ན ཀརོཏི། ན ཙ ཏེན ཝིཏྟིཾ ཨཱཔཛྫཏཱིཏི ཏེན ཙ ཏུཊྛིཾ ན པཱཔུཎཱཏི།

    Aparampi bhaddekarattapariyāyaṃ (ma. ni. 3.272 ādayo) dassento ‘‘atha vā’’tiādimāha. Tattha evaṃrūpo ahosinti kāḷopi samāno indanīlamaṇivaṇṇo ahosinti evaṃ manuññarūpavaseneva evaṃrūpo ahosiṃ. Kusalasukhasomanassavedanāvaseneva evaṃvedano. Taṃ sampayuttānaṃyeva saññādīnaṃ vasena evaṃsañño. Evaṃsaṅkhāro. Evaṃviññāṇo ahosiṃ atītamaddhānanti tattha nandiṃ na samannānetīti tesu rūpādīsu taṇhaṃ vā taṇhāsampayuttadiṭṭhiṃ vā nānupavattayati. Aparena pariyāyena mahākaccānabhaddekarattapariyāyaṃ dassento ‘‘atha vā iti me cakkhu ahosī’’tiādimāha. Tattha cakkhūti cakkhupasādo. Rūpāti catusamuṭṭhānikarūpā. Iminā nayena sesāyatanānipi veditabbāni. Viññāṇanti nissayaviññāṇaṃ. Na tadabhinandatīti taṃ cakkhuñceva rūpañca taṇhādiṭṭhivasena nābhinandati. Iti me mano ahosi iti dhammāti ettha pana manoti bhavaṅgacittaṃ. Dhammāti tebhūmakadhammārammaṇaṃ. Hasitalapitakīḷitānīti dantavidaṃsakahasitañca vācālapitañca kāyakīḷādikīḷitañcāti hasitalapitakīḷitāni. Na tadassādetīti tāni hasitādīni nābhinandati. Na taṃ nikāmetīti kantaṃ na karoti. Na ca tena vittiṃ āpajjatīti tena ca tuṭṭhiṃ na pāpuṇāti.

    ཏཾ ཏཾ པཙྩཡཾ པཊིཙྩ ཨུཔྤནྣོཏི པཙྩུཔྤནྣོ། རཏྟོཏི ནུཔསངྑེཡྻོཏི རཱགེན རཏྟོཏི གཎནཾ ན ཨུཔནེཏབྦོ། ཨུཔརིཔི ཨེསེཝ ནཡོ། ཨེཝརཱུཔོ སིཡནྟིཨཱདཱིསུ པཎཱིཏམནུཉྙརཱུཔཱདིཝསེནེཝ ཏཎྷཱདིཊྛིཔཝཏྟནསངྑཱཏཱ ནནྡཱི སམནྣཱནཡནཱ ཝེདིཏབྦཱ། ན པཎིདཧཏཱིཏི པཏྠནཱཝསེན ན ཋཔེཏི། ཨཔྤཎིདྷཱནཔཙྩཡཱཏི ན པཏྠནཱཋཔནཀཱརཎེན།

    Taṃ taṃ paccayaṃ paṭicca uppannoti paccuppanno. Rattoti nupasaṅkheyyoti rāgena rattoti gaṇanaṃ na upanetabbo. Uparipi eseva nayo. Evarūpo siyantiādīsu paṇītamanuññarūpādivaseneva taṇhādiṭṭhipavattanasaṅkhātā nandī samannānayanā veditabbā. Na paṇidahatīti patthanāvasena na ṭhapeti. Appaṇidhānapaccayāti na patthanāṭhapanakāraṇena.

    ༨༥. ཨསནྟཱསཱིཏི ཏེན ཏེན ཨལཱབྷཏོ ཨསནྟསནྟོ། ཨཝིཀཏྠཱིཏི སཱིལཱདཱིཧི ཨཝིཀཏྠནསཱིལོ། ཨཀུཀྐུཙོཏི ཧཏྠཀུཀྐུཙྩཱདིཝིརཧིཏོ། མནྟབྷཱཎཱིཏི མནྟཱཡ པརིགྒཧེཏྭཱ ཝཱཙཾ བྷཱསིཏཱ། ཨནུདྡྷཏོཏི ཨུདྡྷཙྩཝིརཧིཏོ། ས ཝེ ཝཱཙཱཡཏོཏི སོ ཝཱཙཱཡ ཡཏོ སཾཡཏོ ཙཏུདོསཝིརཧིཏཾ ཝཱཙཾ བྷཱསིཏཱ ཧོཏི།

    85.Asantāsīti tena tena alābhato asantasanto. Avikatthīti sīlādīhi avikatthanasīlo. Akukkucoti hatthakukkuccādivirahito. Mantabhāṇīti mantāya pariggahetvā vācaṃ bhāsitā. Anuddhatoti uddhaccavirahito. Sa ve vācāyatoti so vācāya yato saṃyato catudosavirahitaṃ vācaṃ bhāsitā hoti.

    ཨཀྐོདྷནོཏི ཡཉྷི ཁོ ཝུཏྟནྟི ‘‘ན ཀོདྷནོ ཨཀོདྷནོ ཀོདྷཝིརཧིཏོ’’ཏི ཡཾ ཀཐིཏཾ, ཏཾ པཋམཾ ཏཱཝ ཀོདྷཾ ཀཐེཏུཀཱམོ ‘‘ཨཔིཙ ཀོདྷོ ཏཱཝ ཝཏྟབྦོ’’ཏི ཨཱཧ། ཀོདྷོ ཏཱཝ ཝཏྟབྦོཏི པཋམཾ ཀོདྷོ ཀཐེཏབྦོ། དསཧཱཀཱརེཧི ཀོདྷོ ཛཱཡཏཱིཏི དསཧི ཀཱརཎེཧི ཀོདྷོ ཨུཔྤཛྫཏི། ཨནཏྠཾ མེ ཨཙརཱིཏི ཨཝཌྜྷིཾ མེ ཨཀཱསི, ཨིམིནཱ ཨུཔཱཡེན སབྦཔདེསུ ཨཏྠོ ཝེདིཏབྦོ། ཨཊྛཱནེ ཝཱ པན ཀོདྷོ ཛཱཡཏཱིཏི ཨཀཱརཎེ ཀོདྷོ ཨུཔྤཛྫཏི། ཨེཀཙྩོ ཧི ‘‘དེཝོ ཨཏིཝསྶཏཱི’’ཏི ཀུཔྤཏི, ‘‘ན ཝསྶཏཱི’’ཏི ཀུཔྤཏི, ‘‘སཱུརིཡོ ཏཔྤཏཱི’’ཏི ཀུཔྤཏི, ‘‘ན ཏཔྤཏཱི’’ཏི ཀུཔྤཏི, ཝཱཏེ ཝཱཡནྟེཔི ཀུཔྤཏི, ཨཝཱཡནྟེཔི ཀུཔྤཏི, སམྨཛྫིཏུཾ ཨསཀྐོནྟོ བོདྷིཔཎྞཱནཾ ཀུཔྤཏི, ཙཱིཝརཾ པཱརུཔིཏུཾ ཨསཀྐོནྟོ ཝཱཏསྶ ཀུཔྤཏི, ཨུཔཀྑལིཏྭཱ ཁཱཎུཀསྶ ཀུཔྤཏི། ཨིདཾ སནྡྷཱཡ ཝུཏྟཾ – ‘‘ཨཊྛཱནེ ཝཱ པན ཀོདྷོ ཛཱཡཏཱི’’ཏི། ཏཏྠ ཧེཊྛཱ ནཝསུ ཋཱནེསུ སཏྟེ ཨཱརབྦྷ ཨུཔྤནྣཏྟཱ ཀམྨཔཐབྷེདོ ཧོཏི།

    Akkodhanoti yañhi kho vuttanti ‘‘na kodhano akodhano kodhavirahito’’ti yaṃ kathitaṃ, taṃ paṭhamaṃ tāva kodhaṃ kathetukāmo ‘‘apica kodho tāva vattabbo’’ti āha. Kodho tāva vattabboti paṭhamaṃ kodho kathetabbo. Dasahākārehi kodho jāyatīti dasahi kāraṇehi kodho uppajjati. Anatthaṃ me acarīti avaḍḍhiṃ me akāsi, iminā upāyena sabbapadesu attho veditabbo. Aṭṭhāne vā pana kodho jāyatīti akāraṇe kodho uppajjati. Ekacco hi ‘‘devo ativassatī’’ti kuppati, ‘‘na vassatī’’ti kuppati, ‘‘sūriyo tappatī’’ti kuppati, ‘‘na tappatī’’ti kuppati, vāte vāyantepi kuppati, avāyantepi kuppati, sammajjituṃ asakkonto bodhipaṇṇānaṃ kuppati, cīvaraṃ pārupituṃ asakkonto vātassa kuppati, upakkhalitvā khāṇukassa kuppati. Idaṃ sandhāya vuttaṃ – ‘‘aṭṭhāne vā pana kodho jāyatī’’ti. Tattha heṭṭhā navasu ṭhānesu satte ārabbha uppannattā kammapathabhedo hoti.

    ཨཊྛཱནགྷཱཏོ པན སངྑཱརེསུ ཨུཔྤནྣོ ཀམྨཔཐབྷེདཾ ན ཀརོཏི། ཙིཏྟཾ ཨཱགྷཱཏེནྟོ ཨུཔྤནྣོཏི ཙིཏྟསྶ ཨཱགྷཱཏོ། ཏཏོ བལཝཏརོ པཊིགྷཱཏོ། པཊིཧཉྙནཝསེན པཊིགྷཾ། པཊིཝིརུཛ྄ཛྷཏཱིཏི པཊིཝིརོདྷོ། ཀུཔྤནཝསེན ཀོཔོ། པཀོཔོ སམྤཀོཔོཏི ཨུཔསགྒཝསེན པདཾ ཝཌྜྷིཏཾ། དུསྶནཝསེན དོསོ། པདོསོ སམྤདོསོཏི ཨུཔསགྒཝསེན པདཾ ཝཌྜྷིཏཾ། ཙིཏྟསྶ བྱཱཔཏྟཱིཏི ཙིཏྟསྶ ཝིཔནྣཏཱ ཝིཔརིཝཏྟནཱཀཱརོ། མནཾ པདཱུསཡམཱནོ ཨུཔྤཛྫཏཱིཏི མནོཔདོསོ། ཀུཛ྄ཛྷནཝསེན ཀོདྷོ། ཀུཛ྄ཛྷནཱཀཱརོ ཀུཛ྄ཛྷནཱ། ཀུཛ྄ཛྷིཏསྶ བྷཱཝོ ཀུཛ྄ཛྷིཏཏྟཾ། དུསྶཏཱིཏི དོསོ། དུསྶནཱཏི དུསྶནཱཀཱརོ། དུསྶིཏཏྟནྟི དུསྶིཏབྷཱཝོ། པཀཏིབྷཱཝཝིཛཧནཊྛེན བྱཱཔཛྫནཾ བྱཱཔཏྟི། བྱཱཔཛྫནཱཏི བྱཱཔཛྫནཱཀཱརོ། ཝིརུཛ྄ཛྷཏཱིཏི ཝིརོདྷོ། པུནཔྤུནཾ ཝིརུཛ྄ཛྷཏཱིཏི པཊིཝིརོདྷོ། ཝིརུདྡྷཱཀཱརཔཊིཝིརུདྡྷཱཀཱརཝསེན ཝཱ ཨིདཾ ཝུཏྟཾ། ཙཎྜིཀོ ཝུཙྩཏི ཙཎྜོ, ཐདྡྷཔུགྒལོ, ཏསྶ བྷཱཝོ ཙཎྜིཀྐཾ། ན ཨེཏེན སུརོཔིཏཾ ཝཙནཾ ཧོཏི, དུརུཏྟཾ ཨཔརིཔུཎྞམེཝ ཧོཏཱིཏི ཨསུརོཔོ། ཀུདྡྷཀཱལེ ཧི པརིཔུཎྞཝཙནཾ ནཱམ ནཏྠི, སཙེཔི ཀསྶཙི ཧོཏི, ཏཾ ཨཔྤམཱཎཾ། ཨཔརེ པན ‘‘ཨསྶུཛནནཊྛེན ཨསྶུརོཔནཏོ ཨསྶུརོཔོ’’ཏི ཝདནྟི, ཏཾ ཨཀཱརཎཾ སོམནསྶསྶཱཔི ཨསྶུཛནནཏོ། ཧེཊྛཱཝུཏྟཨཏྟམནཏཱཔཊིཔཀྑཏོ ན ཨཏྟམནཏཱཏི ཨནཏྟམནཏཱ། སཱ པན ཡསྨཱ ཙིཏྟསྶེཝ, ན སཏྟསྶ, ཏསྨཱ ‘‘ཙིཏྟསྶཱ’’ཏི ཝུཏྟཾ།

    Aṭṭhānaghāto pana saṅkhāresu uppanno kammapathabhedaṃ na karoti. Cittaṃ āghātento uppannoti cittassa āghāto. Tato balavataro paṭighāto. Paṭihaññanavasena paṭighaṃ. Paṭivirujjhatīti paṭivirodho. Kuppanavasena kopo. Pakopo sampakopoti upasaggavasena padaṃ vaḍḍhitaṃ. Dussanavasena doso. Padoso sampadosoti upasaggavasena padaṃ vaḍḍhitaṃ. Cittassabyāpattīti cittassa vipannatā viparivattanākāro. Manaṃ padūsayamāno uppajjatīti manopadoso. Kujjhanavasena kodho. Kujjhanākāro kujjhanā. Kujjhitassa bhāvo kujjhitattaṃ. Dussatīti doso. Dussanāti dussanākāro. Dussitattanti dussitabhāvo. Pakatibhāvavijahanaṭṭhena byāpajjanaṃ byāpatti. Byāpajjanāti byāpajjanākāro. Virujjhatīti virodho. Punappunaṃ virujjhatīti paṭivirodho. Viruddhākārapaṭiviruddhākāravasena vā idaṃ vuttaṃ. Caṇḍiko vuccati caṇḍo, thaddhapuggalo, tassa bhāvo caṇḍikkaṃ. Na etena suropitaṃ vacanaṃ hoti, duruttaṃ aparipuṇṇameva hotīti asuropo. Kuddhakāle hi paripuṇṇavacanaṃ nāma natthi, sacepi kassaci hoti, taṃ appamāṇaṃ. Apare pana ‘‘assujananaṭṭhena assuropanato assuropo’’ti vadanti, taṃ akāraṇaṃ somanassassāpi assujananato. Heṭṭhāvuttaattamanatāpaṭipakkhato na attamanatāti anattamanatā. Sā pana yasmā cittasseva, na sattassa, tasmā ‘‘cittassā’’ti vuttaṃ.

    ཨདྷིམཏྟཔརིཏྟཏཱ ཝེདིཏབྦཱཏི ཨདྷིམཏྟབྷཱཝོ པརིཏྟབྷཱཝོ ཙ, བལཝབྷཱཝོ མནྡབྷཱཝོཏི ཨཏྠོ། ཀཉྩི ཀཱལེཏི ཨེཀདཱ། ‘‘ཀཉྩི ཀཱལ’’ནྟིཔི པཱཋོ། ཙིཏྟཱཝིལཀརཎམཏྟོ ཧོཏཱིཏི ཙིཏྟསྶ ཨཱཝིལཀརཎཔྤམཱཎོ, ཙིཏྟཀིལིཊྛཀརཎཔྤམཱཎོཏི ཨཏྠོ། ‘‘ཙིཏྟཱལསཀརཎམཏྟོ’’ཏིཔི པཱཋོ, ཏཾ ན སུནྡརཾ། ཏསྶ ཙིཏྟཀིལམཐཀརཎམཏྟོཏི ཨཏྠོ། ན ཙ ཏཱཝ མུཁཀུལཱནཝིཀུལཱནོ ཧོཏཱིཏི མུཁསྶ སངྐོཙནཝིསངྐོཙནོ ན ཙ ཏཱཝ ཧོཏི། ན ཙ ཏཱཝ ཧནུསཉྩོཔནོ ཧོཏཱིཏི དྭིནྣཾ ཧནཱུནཾ ཨཔརཱཔརཾ ཙལནོ ན ཙ ཏཱཝ ཧོཏི། ན ཙ ཏཱཝ ཕརུསཝཱཙཾ ནིཙྪཱརཎོ ཧོཏཱིཏི པརེསཾ མམྨཙྪེདཀཾ ཕརུསཝཱཙཾ མུཁཏོ ནཱིཧརཎེན བཧི ནིཀྑམནོ ན ཙ ཏཱཝ ཧོཏི། ན ཙ ཏཱཝ དིསཱཝིདིསཱནུཝིལོཀནོ ཧོཏཱིཏི པརསྶ ཨབྦྷུཀྐིརཎཏྠཾ དཎྜཱདིཨཏྠཱཡ དིསཉྩ ཨནུདིསཉྩ པུནཔྤུནཾ ཝིལོཀནོ ན ཙ ཏཱཝ ཧོཏི།

    Adhimattaparittatā veditabbāti adhimattabhāvo parittabhāvo ca, balavabhāvo mandabhāvoti attho. Kañci kāleti ekadā. ‘‘Kañci kāla’’ntipi pāṭho. Cittāvilakaraṇamatto hotīti cittassa āvilakaraṇappamāṇo, cittakiliṭṭhakaraṇappamāṇoti attho. ‘‘Cittālasakaraṇamatto’’tipi pāṭho, taṃ na sundaraṃ. Tassa cittakilamathakaraṇamattoti attho. Na ca tāva mukhakulānavikulāno hotīti mukhassa saṅkocanavisaṅkocano na ca tāva hoti. Na ca tāva hanusañcopano hotīti dvinnaṃ hanūnaṃ aparāparaṃ calano na ca tāva hoti. Na ca tāva pharusavācaṃ nicchāraṇo hotīti paresaṃ mammacchedakaṃ pharusavācaṃ mukhato nīharaṇena bahi nikkhamano na ca tāva hoti. Na ca tāva disāvidisānuvilokano hotīti parassa abbhukkiraṇatthaṃ daṇḍādiatthāya disañca anudisañca punappunaṃ vilokano na ca tāva hoti.

    ན ཙ ཏཱཝ དཎྜསཏྠཔརཱམསནོ ཧོཏཱིཏི ཨཱགྷཱཏནཏྠཾ དཎྜཉྩ ཨེཀཏོདྷཱརཱདིསཏྠཉྩ ཨཱདིཡནོ ན ཙ ཏཱཝ ཧོཏི། ན ཙ ཏཱཝ དཎྜསཏྠཨབྦྷུཀྐིརཎོ ཧོཏཱིཏི ཝུཏྟཔྤཀཱརཾ དཎྜསཏྠཾ ཨུཀྑིཔིཏྭཱ པཧརཎོ ན ཙ ཏཱཝ ཧོཏི། ན ཙ ཏཱཝ དཎྜསཏྠཨབྷིནིཔཱཏནོ ཧོཏཱིཏི ཨེཏཾ དུཝིདྷཾ པརསྶ པཧརཎཏྠཾ ན ཙ ཏཱཝ ཁིཔནོ ཧོཏི། ན ཙ ཏཱཝ ཚིནྣཝིཙྪིནྣཀརཎོ ཧོཏཱིཏི དཎྜསཏྠཱདིཁིཔནེན པརསརཱིརཾ དྭིདྷཱཀརཎོ ཙ ཝིཝིདྷཱཀཱརེན ཝཎཀརཎོ ཙ ན ཏཱཝ ཧོཏི། ‘‘ཚིདྡཝིཙྪིདྡཀརཎོ’’ཏིཔི པཱཋོ། ན ཙ ཏཱཝ སམྦྷཉྫནཔལིབྷཉྫནོ ཧོཏཱིཏི སརཱིརཾ བྷཉྫིཏྭཱ ཙུཎྞཝིཙུཎྞཀརཎོ ན ཙ ཏཱཝ ཧོཏི། ན ཙ ཏཱཝ ཨངྒམངྒཨཔཀཌྜྷནོ ཧོཏཱིཏི ཨངྒཔཙྩངྒཾ སམྤགྒཧེཏྭཱ ཨཔནེཏྭཱ ཀཌྜྷནོ ན ཙ ཏཱཝ ཧོཏི། ན ཙ ཏཱཝ ཛཱིཝིཏཱ ཝོརོཔནོ ཧོཏཱིཏི ཛཱིཝིཏིནྡྲིཡཏོ ཝོརོཔནོ ན ཙ ཏཱཝ ཧོཏི། ན ཙ ཏཱཝ སབྦཙཱགཔརིཙྩཱགཱཡ སཎྛིཏོ ཧོཏཱིཏི སབྦཾ པརསྶ ཛཱིཝིཏཾ ནཱསེཏྭཱ ཨཏྟནོ ཛཱིཝིཏནཱསནཏྠཱཡ སཎྛིཏོ ན ཙ ཏཱཝ ཧོཏི། ཨིདཾ ཝུཏྟཾ ཧོཏི – ཡདཱ ཨཉྙཾ ཛཱིཝིཏཱ ཝོརོཔེཏྭཱ ཨཏྟཱནཾ ཛཱིཝིཏཱ ཝོརོཔནཏྠཱཡ ཋིཏོ, ཏདཱ སབྦཙཱགཔརིཙྩཱགཱ ནཱམ ཧོཏི། ཝུཏྟཉྷེཏཾ བྷགཝཏཱ –

    Na ca tāva daṇḍasatthaparāmasano hotīti āghātanatthaṃ daṇḍañca ekatodhārādisatthañca ādiyano na ca tāva hoti. Na ca tāva daṇḍasatthaabbhukkiraṇo hotīti vuttappakāraṃ daṇḍasatthaṃ ukkhipitvā paharaṇo na ca tāva hoti. Na ca tāvadaṇḍasatthaabhinipātano hotīti etaṃ duvidhaṃ parassa paharaṇatthaṃ na ca tāva khipano hoti. Na ca tāva chinnavicchinnakaraṇo hotīti daṇḍasatthādikhipanena parasarīraṃ dvidhākaraṇo ca vividhākārena vaṇakaraṇo ca na tāva hoti. ‘‘Chiddavicchiddakaraṇo’’tipi pāṭho. Na ca tāva sambhañjanapalibhañjano hotīti sarīraṃ bhañjitvā cuṇṇavicuṇṇakaraṇo na ca tāva hoti. Na ca tāva aṅgamaṅgaapakaḍḍhano hotīti aṅgapaccaṅgaṃ sampaggahetvā apanetvā kaḍḍhano na ca tāva hoti. Na ca tāva jīvitā voropano hotīti jīvitindriyato voropano na ca tāva hoti. Na ca tāva sabbacāgapariccāgāya saṇṭhito hotīti sabbaṃ parassa jīvitaṃ nāsetvā attano jīvitanāsanatthāya saṇṭhito na ca tāva hoti. Idaṃ vuttaṃ hoti – yadā aññaṃ jīvitā voropetvā attānaṃ jīvitā voropanatthāya ṭhito, tadā sabbacāgapariccāgā nāma hoti. Vuttañhetaṃ bhagavatā –

    ‘‘ཀོདྷཾ ཚེཏྭཱ སུཁཾ སེཏི, ཀོདྷཾ ཚེཏྭཱ ན སོཙཏི།

    ‘‘Kodhaṃ chetvā sukhaṃ seti, kodhaṃ chetvā na socati;

    ཀོདྷསྶ ཝིསམཱུལསྶ, མདྷུརགྒསྶ བྲཱཧྨཎ།

    Kodhassa visamūlassa, madhuraggassa brāhmaṇa;

    ཝདྷཾ ཨརིཡཱ པསཾསནྟི, ཏཉྷི ཚེཏྭཱ ན སོཙཏཱི’’ཏི༎ (སཾ॰ ནི॰ ༡.༡༨༧, ༢༦༧)།

    Vadhaṃ ariyā pasaṃsanti, tañhi chetvā na socatī’’ti. (saṃ. ni. 1.187, 267);

    ཡཏོཏི ཡདཱ། པརཔུགྒལཾ གྷཱཊེཏྭཱཏི པརཔུགྒལཾ ནཱསེཏྭཱ། ཨཏྟཱནཾ གྷཱཊེཏཱིཏི ཨཏྟཱནཾ མཱརེཏི། པརམུསྶདགཏོཏི ཨཏིབལཝབྷཱཝཾ གཏོ། པརམཝེཔུལླཔྤཏྟོཏི ཨཏིཝིཔུལབྷཱཝཾ པཏྟོ། ཀོདྷསྶ པཧཱིནཏྟཱཏི ཨནཱགཱམིམགྒེན ཝུཏྟཔྤཀཱརསྶ ཀོདྷསྶ པཧཱིནབྷཱཝེན། ཀོདྷཝཏྠུསྶ པརིཉྙཱཏཏྟཱཏི ཀོདྷསྶ པཏིཊྛཱབྷཱུཏསྶ ཀཱརཎབྷཱུཏསྶ པིཡཱཔིཡཨཊྛཱནསངྑཱཏསྶ ཝཏྠུསྶ ཉཱཏཏཱིརཎཔརིཉྙཱཧི བྱཱཔེཏྭཱ ཉཱཏབྷཱཝེན། ཀོདྷཧེཏུསྶ ཨུཔཙྪིནྣཏྟཱཏི ཀོདྷསྶ ཛནཀཧེཏུནོ དོམནསྶསཧགཏཙིཏྟུཔྤཱདསྶ ཨུཙྪིནྣབྷཱཝེན།

    Yatoti yadā. Parapuggalaṃ ghāṭetvāti parapuggalaṃ nāsetvā. Attānaṃ ghāṭetīti attānaṃ māreti. Paramussadagatoti atibalavabhāvaṃ gato. Paramavepullappattoti ativipulabhāvaṃ patto. Kodhassa pahīnattāti anāgāmimaggena vuttappakārassa kodhassa pahīnabhāvena. Kodhavatthussa pariññātattāti kodhassa patiṭṭhābhūtassa kāraṇabhūtassa piyāpiyaaṭṭhānasaṅkhātassa vatthussa ñātatīraṇapariññāhi byāpetvā ñātabhāvena. Kodhahetussa upacchinnattāti kodhassa janakahetuno domanassasahagatacittuppādassa ucchinnabhāvena.

    ཏཱསཱིཏི བྷཱཡནསཱིལོ ཧོཏི། ཨུཏྟཱསཱིཏི ཨཏིབྷཱཡནསཱིལོ། པརིཏྟཱསཱིཏི སམནྟཏོ བྷཱཡནསཱིལོ། བྷཱཡཏཱིཏི བྷཡཾ ཨུཔྤཛྫཏི། སནྟཱསཾ ཨཱཔཛྫཏཱིཏི ཝིརཱུཔབྷཱཝཾ པཱཔུཎཱཏི། ཀཏྠཱི ཧོཏཱིཏི ཨཏྟནོ ཝཎྞབྷཎནསཱིལོ ཧོཏི། ཝིཀཏྠཱིཏི ཝིཝིདྷཱ ནཱནཔྤཀཱརཏོ ཝཎྞབྷཎནསཱིལོ། ཛཱཏིཡཱ ཝཱཏི ཁཏྟིཡབྷཱཝཱདིཛཱཏིསམྤཏྟིཡཱ ཝཱ། གོཏྟེན ཝཱཏི གོཏམགོཏྟཱདིནཱ ཨུཀྐཊྛགོཏྟེན ཝཱ། ཀོལཔུཏྟིཡེན ཝཱཏི མཧཱཀུལབྷཱཝེན ཝཱ། ཝཎྞཔོཀྑརཏཱཡ ཝཱཏི ཝཎྞསམྤནྣསརཱིརཏཱཡ ཝཱ། སརཱིརཉྷི ‘‘པོཀྑར’’ནྟི ཝུཙྩཏི, ཏསྶ ཝཎྞསམྤཏྟིཡཱ ཨབྷིརཱུཔབྷཱཝེནཱཏི ཨཏྠོ། དྷནེན ཝཱཏིཨཱདཱིནི ཨུཏྟཱནཏྠཱནེཝ།

    Tāsīti bhāyanasīlo hoti. Uttāsīti atibhāyanasīlo. Parittāsīti samantato bhāyanasīlo. Bhāyatīti bhayaṃ uppajjati. Santāsaṃ āpajjatīti virūpabhāvaṃ pāpuṇāti. Katthīhotīti attano vaṇṇabhaṇanasīlo hoti. Vikatthīti vividhā nānappakārato vaṇṇabhaṇanasīlo. Jātiyā vāti khattiyabhāvādijātisampattiyā vā. Gottena vāti gotamagottādinā ukkaṭṭhagottena vā. Kolaputtiyena vāti mahākulabhāvena vā. Vaṇṇapokkharatāya vāti vaṇṇasampannasarīratāya vā. Sarīrañhi ‘‘pokkhara’’nti vuccati, tassa vaṇṇasampattiyā abhirūpabhāvenāti attho. Dhanena vātiādīni uttānatthāneva.

    ཀུཀྐུཙྩནྟི ནིདྡེསསྶ ཨུདྡེསཔདཾ། ཏཏྠ ཀུཀྐུཙྩནྟི ཀུཙྪིཏཾ ཀཏཾ ཀུཀཏཾ, ཏསྶ བྷཱཝོ ཀུཀྐུཙྩཾ། ཏཾ པཙྪཱནུཏཱཔལཀྑཎཾ, ཀཏཱཀཏཱནུསོཙནརསཾ, ཝིཔྤཊིསཱརཔཙྩུཔཊྛཱནཾ, ཀཏཱཀཏཔདཊྛཱནཾ, དཱསབྱཾ ཝིཡ དཊྛབྦཾ། ཧཏྠཀུཀྐུཙྩམྤཱིཏི ཧཏྠེཧི ཀུཙྪིཏཾ ཀཏཾ ཀུཀཏཾ, ཏསྶ བྷཱཝོ ཧཏྠཀུཀྐུཙྩཾ། པཱདཀུཀྐུཙྩཱདཱིསུཔི ཨེསེཝ ནཡོ།

    Kukkuccanti niddesassa uddesapadaṃ. Tattha kukkuccanti kucchitaṃ kataṃ kukataṃ, tassa bhāvo kukkuccaṃ. Taṃ pacchānutāpalakkhaṇaṃ, katākatānusocanarasaṃ, vippaṭisārapaccupaṭṭhānaṃ, katākatapadaṭṭhānaṃ, dāsabyaṃ viya daṭṭhabbaṃ. Hatthakukkuccampīti hatthehi kucchitaṃ kataṃ kukataṃ, tassa bhāvo hatthakukkuccaṃ. Pādakukkuccādīsupi eseva nayo.

    ཨཀཔྤིཡེ ཀཔྤིཡསཉྙིཏཱཏི ཨཙྪམཾསཾ སཱུཀརམཾསནྟི ཁཱདཏི, དཱིཔིམཾསཾ མིགམཾསནྟི ཁཱདཏི, ཨཀཔྤིཡབྷོཛནཾ ཀཔྤིཡབྷོཛནནྟི བྷུཉྫཏི, ཝིཀཱལེ ཀཱལསཉྙིཏཱཡ བྷུཉྫཏི, ཨཀཔྤིཡཔཱནཀཾ ཀཔྤིཡཔཱནཀནྟི པིཝཏི། ཨཡཾ ཨཀཔྤིཡེ ཀཔྤིཡསཉྙིཏཱ། ཀཔྤིཡེ ཨཀཔྤིཡསཉྙིཏཱཏི སཱུཀརམཾསཾ ཨཙྪམཾསནྟི ཁཱདཏི, མིགམཾསཾ དཱིཔིམཾསནྟི ཁཱདཏི, ཀཔྤིཡབྷོཛནཾ ཨཀཔྤིཡབྷོཛནནྟི བྷུཉྫཏི, ཀཱལེ ཝིཀཱལསཉྙིཏཱཡ བྷུཉྫཏི, ཀཔྤིཡཔཱནཀཾ ཨཀཔྤིཡཔཱནཀནྟི པིཝཏི། ཨཡཾ ཀཔྤིཡེ ཨཀཔྤིཡསཉྙིཏཱ། ཨཝཛྫེ ཝཛྫསཉྙིཏཱཏི ནིདྡོསེ དོསསཉྙིཏཱ། ཝཛྫེ ཨཝཛྫསཉྙིཏཱཏི སདོསེ ནིདྡོསསཉྙིཏཱ། ཀུཀྐུཙྩཱཡནཱཏི ཀུཀྐུཙྩཱཡནཱཀཱརོ། ཀུཀྐུཙྩཱཡིཏཏྟནྟི ཀུཀྐུཙྩཱཡིཏབྷཱཝོ། ཙེཏསོ ཝིཔྤཊིསཱརོཏི ཙིཏྟསྶ ཝིརཱུཔོ པཊིསརཎབྷཱཝོ། མནོཝིལེཁོཏི ཙིཏྟསྶ ཝིལེཁོ།

    Akappiyekappiyasaññitāti acchamaṃsaṃ sūkaramaṃsanti khādati, dīpimaṃsaṃ migamaṃsanti khādati, akappiyabhojanaṃ kappiyabhojananti bhuñjati, vikāle kālasaññitāya bhuñjati, akappiyapānakaṃ kappiyapānakanti pivati. Ayaṃ akappiye kappiyasaññitā. Kappiye akappiyasaññitāti sūkaramaṃsaṃ acchamaṃsanti khādati, migamaṃsaṃ dīpimaṃsanti khādati, kappiyabhojanaṃ akappiyabhojananti bhuñjati, kāle vikālasaññitāya bhuñjati, kappiyapānakaṃ akappiyapānakanti pivati. Ayaṃ kappiye akappiyasaññitā. Avajje vajjasaññitāti niddose dosasaññitā. Vajje avajjasaññitāti sadose niddosasaññitā. Kukkuccāyanāti kukkuccāyanākāro. Kukkuccāyitattanti kukkuccāyitabhāvo. Cetaso vippaṭisāroti cittassa virūpo paṭisaraṇabhāvo. Manovilekhoti cittassa vilekho.

    ཀཏཏྟཱ ཙ ཨཀཏཏྟཱ ཙཱཏི ཀཱཡདུཙྩརིཏཱདཱིནཾ ཀཏབྷཱཝེན ཙ ཀཱཡསུཙརིཏཱདཱིནཾ ཨཀཏབྷཱཝེན ཙ། ཀཏཾ མེ ཀཱཡདུཙྩརིཏནྟི མཡཱ ཀཱཡེན ཀིལེསཔཱུཏིཀཏྟཱ དུཊྛུ ཙརིཏཾ ཀཱཡེན ཀཏཾ། ཨཀཏཾ མེ ཀཱཡསུཙརིཏནྟི མཡཱ ཀཱཡེན སུཊྛུ ཙརིཏཾ ན ཀཏཾ། ཝཙཱིདུཙྩརིཏཝཙཱིསུཙརིཏཱདཱིསུཔི ཨེསེཝ ནཡོ ནིརོདྷཔརིཡོསཱནེསུ །

    Katattā ca akatattā cāti kāyaduccaritādīnaṃ katabhāvena ca kāyasucaritādīnaṃ akatabhāvena ca. Kataṃ me kāyaduccaritanti mayā kāyena kilesapūtikattā duṭṭhu caritaṃ kāyena kataṃ. Akataṃ me kāyasucaritanti mayā kāyena suṭṭhu caritaṃ na kataṃ. Vacīduccaritavacīsucaritādīsupi eseva nayo nirodhapariyosānesu .

    ཙིཏྟསྶཱཏི ན སཏྟསྶ ན པོསསྶ། ཨུདྡྷཙྩནྟི ཨུདྡྷཏཱཀཱརོ། ཨཝཱུཔསམོཏི ན ཝཱུཔསམོ། ཙེཏོ ཝིཀྑིཔཏཱིཏི ཙེཏསོ ཝིཀྑེཔོ, བྷནྟཏྟཾ ཙིཏྟསྶཱཏི ཙིཏྟསྶ བྷནྟབྷཱཝོ བྷནྟཡཱནབྷནྟགོཎཱདཱིནཾ ཝིཡ། ཨིམིནཱ ཨེཀཱརམྨཎསྨིཾཡེཝ ཝིཔྥནྡནཾ ཀཐིཏཾ། ཨུདྡྷཙྩཉྷི ཨེཀཱརམྨཎེ ཝིཔྥནྡཏི, ཝིཙིཀིཙྪཱ ནཱནཱརམྨཎེཏི། ཨིདཾ ཝུཙྩཏི ཨུདྡྷཙྩནྟི ཨཡཾ ཨུདྡྷཏབྷཱཝོ ཀཐཱིཡཏི།

    Cittassāti na sattassa na posassa. Uddhaccanti uddhatākāro. Avūpasamoti na vūpasamo. Ceto vikkhipatīti cetaso vikkhepo, bhantattaṃ cittassāti cittassa bhantabhāvo bhantayānabhantagoṇādīnaṃ viya. Iminā ekārammaṇasmiṃyeva vipphandanaṃ kathitaṃ. Uddhaccañhi ekārammaṇe vipphandati, vicikicchā nānārammaṇeti. Idaṃ vuccati uddhaccanti ayaṃ uddhatabhāvo kathīyati.

    མུསཱཝཱདཾ པཧཱཡཱཏི ཨེཏྠ མུསཱཏི ཝིསཾཝཱདནཔུརེཀྑཱརསྶ ཨཏྠབྷཉྫཀོ ཝཙཱིཔཡོགོ ཀཱཡཔཡོགོ ཝཱ། ཝིསཾཝཱདནཱདྷིཔྤཱཡེན པནསྶ པརཝིསཾཝཱདཀཀཱཡཝཙཱིཔཡོགསམུཊྛཱཔིཀཱ ཙེཏནཱ མུསཱཝཱདོ།

    Musāvādaṃ pahāyāti ettha musāti visaṃvādanapurekkhārassa atthabhañjako vacīpayogo kāyapayogo vā. Visaṃvādanādhippāyena panassa paravisaṃvādakakāyavacīpayogasamuṭṭhāpikā cetanā musāvādo.

    ཨཔརོ ནཡོ – མུསཱཏི ཨབྷཱུཏཾ ཨཏཙྪཾ ཝཏྠུ། ཝཱདོཏི ཏསྶ བྷཱུཏཏོ ཏཙྪཏོ ཝིཉྙཱཔནཾ། ལཀྑཎཏོ པན ཨཏཐཾ ཝཏྠུཾ ཏཐཏོ པརཾ ཝིཉྙཱཔེཏུཀཱམསྶ ཏཐཱཝིཉྙཏྟིསམུཊྛཱཔིཀཱ ཙེཏནཱ མུསཱཝཱདོ, ཏཾ མུསཱཝཱདཾ། པཧཱཡཱཏི ཨིམཾ མུསཱཝཱདཙེཏནཱསངྑཱཏཾ དུསྶཱིལྱཾ པཛཧིཏྭཱ ། པཊིཝིརཏོཏི པཧཱིནཀཱལཏོ པཊྛཱཡ ཏཏོ དུསྶཱིལྱཏོ ཨོརཏོ ཝིརཏོཝ། ནཏྠི ཏསྶ ཝཱིཏིཀྐམིསྶཱམཱིཏི ཙཀྑུསོཏཝིཉྙེཡྻཱ དྷམྨཱ, པགེཝ ཀཱཡཝིཉྙེཡྻཱཏི ཨིམིནཱ ནཡེན ཨཉྙེསུཔི ཨེཝརཱུཔེསུ པདེསུ ཨཏྠོ ཝེདིཏབྦོ།

    Aparo nayo – musāti abhūtaṃ atacchaṃ vatthu. Vādoti tassa bhūtato tacchato viññāpanaṃ. Lakkhaṇato pana atathaṃ vatthuṃ tathato paraṃ viññāpetukāmassa tathāviññattisamuṭṭhāpikā cetanā musāvādo, taṃ musāvādaṃ. Pahāyāti imaṃ musāvādacetanāsaṅkhātaṃ dussīlyaṃ pajahitvā . Paṭiviratoti pahīnakālato paṭṭhāya tato dussīlyato orato viratova. Natthi tassa vītikkamissāmīti cakkhusotaviññeyyā dhammā, pageva kāyaviññeyyāti iminā nayena aññesupi evarūpesu padesu attho veditabbo.

    སཙྩཾ ཝདཏཱིཏི སཙྩཝཱདཱི། སཙྩེན སཙྩཾ སནྡཧཏི གྷཊེཏཱིཏི སཙྩསནྡྷོ, ན ཨནྟརནྟརཱ མུསཱ ཝདཏཱིཏི ཨཏྠོ། ཡོ ཧི པུརིསོ ཀདཱཙི མུསཱ ཝདཏི, ཀདཱཙི སཙྩཾ, ཏསྶ མུསཱཝཱདེན ཨནྟརིཏཏྟཱ སཙྩཾ སཙྩེན ན གྷཊིཡཏི, ཏསྨཱ སོ ན སཙྩསནྡྷོ, ཨཡཾ པན ན ཏཱདིསོ, ཛཱིཝིཏཧེཏུཔི མུསཱ ཨཝཏྭཱ སཙྩེན སཙྩཾ སནྡཧཏིཡེཝཱཏི སཙྩསནྡྷོ།

    Saccaṃ vadatīti saccavādī. Saccena saccaṃ sandahati ghaṭetīti saccasandho, na antarantarā musā vadatīti attho. Yo hi puriso kadāci musā vadati, kadāci saccaṃ, tassa musāvādena antaritattā saccaṃ saccena na ghaṭiyati, tasmā so na saccasandho, ayaṃ pana na tādiso, jīvitahetupi musā avatvā saccena saccaṃ sandahatiyevāti saccasandho.

    ཐེཏོཏི ཐིརོ, ཐིརཀཐོཏི ཨཏྠོ། ཨེཀོ ཧི པུགྒལོ ཧལིདྡིརཱགོ ཝིཡ, ཐུསརཱསིམྷི ནིཁཱཏཁཱཎུ ཝིཡ, ཨསྶཔིཊྛེ ཋཔིཏཀུམྦྷཎྜམིཝ ཙ ན ཐིརཀཐོ ཧོཏི, ཨེཀོ པཱསཱཎལེཁཱ ཝིཡ, ཨིནྡཁཱིལཱ ཝིཡ ཙ ཐིརཀཐོ ཧོཏི, ཨསིནཱ སཱིསཾ ཚིནྡནྟེཔི དྭེ ཀཐཱ ན ཀཐེཏི, ཨཡཾ ཝུཙྩཏི ཐེཏོ།

    Thetoti thiro, thirakathoti attho. Eko hi puggalo haliddirāgo viya, thusarāsimhi nikhātakhāṇu viya, assapiṭṭhe ṭhapitakumbhaṇḍamiva ca na thirakatho hoti, eko pāsāṇalekhā viya, indakhīlā viya ca thirakatho hoti, asinā sīsaṃ chindantepi dve kathā na katheti, ayaṃ vuccati theto.

    པཙྩཡིཀོཏི པཏྟིཡཱཡིཏབྦཀོ, སདྡྷཱཡིཏབྦཀོཏི ཨཏྠོ། ཨེཀཙྩོ ཧི པུགྒལོ ན པཙྩཡིཀོ ཧོཏི, ‘‘ཨིདཾ ཀེན ཝུཏྟཾ, ཨསུཀེནཱ’’ཏི ཝུཏྟེ ‘‘མཱ ཏསྶ ཝཙནཾ སདྡཧཐཱ’’ཏི ཝཏྟབྦཏཾ ཨཱཔཛྫཏི། ཨེཀོ པཙྩཡིཀོ ཧོཏི, ‘‘ཨིདཾ ཀེན ཝུཏྟཾ, ཨསུཀེནཱ’’ཏི ཝུཏྟེ ‘‘ཡདི ཏེན ཝུཏྟཾ, ཨིདམེཝ པམཱཎཾ, ཨིདཱནི ཨུཔཔརིཀྑིཏབྦཾ ནཏྠི, ཨེཝམེཝ ཨིད’’ནྟི ཝཏྟབྦཏཾ ཨཱཔཛྫཏི, ཨཡཾ ཝུཙྩཏི པཙྩཡིཀོ།

    Paccayikoti pattiyāyitabbako, saddhāyitabbakoti attho. Ekacco hi puggalo na paccayiko hoti, ‘‘idaṃ kena vuttaṃ, asukenā’’ti vutte ‘‘mā tassa vacanaṃ saddahathā’’ti vattabbataṃ āpajjati. Eko paccayiko hoti, ‘‘idaṃ kena vuttaṃ, asukenā’’ti vutte ‘‘yadi tena vuttaṃ, idameva pamāṇaṃ, idāni upaparikkhitabbaṃ natthi, evameva ida’’nti vattabbataṃ āpajjati, ayaṃ vuccati paccayiko.

    ཨཝིསཾཝཱདཀོ ལོཀསྶཱཏི ཏཱཡ སཙྩཝཱདིཏཱཡ ལོཀཾ ན ཝིསཾཝཱདེཏཱིཏི ཨཏྠོ།

    Avisaṃvādako lokassāti tāya saccavāditāya lokaṃ na visaṃvādetīti attho.

    པིསུཎཾ ཝཱཙཾ པཧཱཡཱཏིཨཱདཱིསུ ཡཱཡ ཝཱཙཱཡ ཡསྶ ཏཾ ཝཱཙཾ བྷཱསཏི, ཏསྶ ཧདཡེ ཨཏྟནོ པིཡབྷཱཝཾ པརསྶ ཙ སུཉྙབྷཱཝཾ ཀརོཏི, སཱ པིསུཎཱ ཝཱཙཱ། ཡཱཡ པན ཨཏྟཱནམྤི པརམྤི ཕརུསཾ ཀརོཏི, ཡཱ ཝཱཙཱ སཡམྤི ཕརུསཱ, ནེཝ ཀཎྞསུཁཱ ན ཧདཡངྒམཱ, ཨཡཾ ཕརུསཱ ཝཱཙཱ། ཡེན སམྥཾ པལཔཏི ནིརཏྠཀཾ, སོ སམྥཔྤལཱཔོ། ཡཱ ཏེསཾ མཱུལབྷཱུཏཱ ཙེཏནཱཔི པིསུཎཝཱཙཱདིནཱམམེཝ ལབྷཏི, སཱ ཨེཝ ཙ ཨིདྷ ཨདྷིཔྤེཏཱ།

    Pisuṇaṃ vācaṃ pahāyātiādīsu yāya vācāya yassa taṃ vācaṃ bhāsati, tassa hadaye attano piyabhāvaṃ parassa ca suññabhāvaṃ karoti, sā pisuṇā vācā. Yāya pana attānampi parampi pharusaṃ karoti, yā vācā sayampi pharusā, neva kaṇṇasukhā na hadayaṅgamā, ayaṃ pharusā vācā. Yena samphaṃ palapati niratthakaṃ, so samphappalāpo. Yā tesaṃ mūlabhūtā cetanāpi pisuṇavācādināmameva labhati, sā eva ca idha adhippetā.

    ཨིམེསཾ བྷེདཱཡཱཏི ཡེསཾ ཨིཏོ ཝུཏྟཱནཾ སནྟིཀེ སུཏཾ, ཏེསཾ བྷེདཱཡ། བྷིནྣཱནཾ ཝཱ སནྡྷཱཏཱཏི དྭིནྣཾ མིཏྟཱནཾ ཝཱ སམཱནུཔཛ྄ཛྷཱཡཀཱདཱིནཾ ཝཱ ཀེནཙིདེཝ ཀཱརཎེན བྷིནྣཱནཾ ཨེཀམེཀཾ ཨུཔསངྐམིཏྭཱ ‘‘ཏུམྷཱཀཾ ཨཱིདིསེ ཀུལེ ཛཱཏཱནཾ ཨེཝཾ བཧུསྶུཏཱནཾ ཨིདཾ ན ཡུཏྟ’’ནྟིཨཱདཱིནི ཝཏྭཱ སནྡྷཱནཾ ཀཏྟཱ ཨནུཀཏྟཱ།

    Imesaṃbhedāyāti yesaṃ ito vuttānaṃ santike sutaṃ, tesaṃ bhedāya. Bhinnānaṃ vā sandhātāti dvinnaṃ mittānaṃ vā samānupajjhāyakādīnaṃ vā kenacideva kāraṇena bhinnānaṃ ekamekaṃ upasaṅkamitvā ‘‘tumhākaṃ īdise kule jātānaṃ evaṃ bahussutānaṃ idaṃ na yutta’’ntiādīni vatvā sandhānaṃ kattā anukattā.

    ཨནུཔྤདཱཏཱཏི སནྡྷཱནཱནུཔྤདཱཏཱ། དྭེ ཛནེ སམགྒེ དིསྭཱ ‘‘ཏུམྷཱཀཾ ཨེཝརཱུཔེ ཀུལེ ཛཱཏཱནཾ ཨེཝརཱུཔེཧི གུཎེཧི སམནྣཱགཏཱནཾ ཨནུཙྪཝིཀམེཏ’’ནྟིཨཱདཱིནི ཝཏྭཱ དལ༹ྷཱིཀམྨཾ ཀཏྟཱཏི ཨཏྠོ། སམགྒོ ཨཱརཱམོ ཨསྶཱཏི སམགྒཱརཱམོ, ཡཏྠ སམགྒཱ ནཏྠི, ཏཏྠ ཝསིཏུམྤི ན ཨིཙྪཏཱིཏི ཨཏྠོ། ‘‘སམགྒརཱམོ’’ཏིཔི པཱལི༹, ཨཡམེཝེཏྠ ཨཏྠོ། སམགྒརཏོཏི སམགྒེསུ རཏོ, ཏེ པཧཱཡ ཨཉྙཏྲ གནྟུམྤི ན ཨིཙྪཏཱིཏི ཨཏྠོ། སམགྒེ དིསྭཱཔི སུཏྭཱཔི ནནྡཏཱིཏི སམགྒནནྡཱི། སམགྒཀརཎིཾ ཝཱཙཾ བྷཱསིཏཱཏི ཡཱ ཝཱཙཱ སཏྟེ སམགྒེཡེཝ ཀརོཏི, ཏཾ སཱམགྒིགུཎཔརིདཱིཔིཀམེཝ ཝཱཙཾ བྷཱསཏི, ན ཨིཏརནྟི།

    Anuppadātāti sandhānānuppadātā. Dve jane samagge disvā ‘‘tumhākaṃ evarūpe kule jātānaṃ evarūpehi guṇehi samannāgatānaṃ anucchavikameta’’ntiādīni vatvā daḷhīkammaṃ kattāti attho. Samaggo ārāmo assāti samaggārāmo, yattha samaggā natthi, tattha vasitumpi na icchatīti attho. ‘‘Samaggarāmo’’tipi pāḷi, ayamevettha attho. Samaggaratoti samaggesu rato, te pahāya aññatra gantumpi na icchatīti attho. Samagge disvāpi sutvāpi nandatīti samagganandī. Samaggakaraṇiṃ vācaṃ bhāsitāti yā vācā satte samaggeyeva karoti, taṃ sāmaggiguṇaparidīpikameva vācaṃ bhāsati, na itaranti.

    པརསྶ མམྨཙྪེདཀཀཱཡཝཙཱིཔཡོགསམུཊྛཱཔིཀཱ ཨེཀནྟཕརུསཙེཏནཱ ཕརུསཱ ཝཱཙཱ, ནེལཱཏི ཨེལཾ ཝུཙྩཏི དོསོ, ནསྶཱ ཨེལནྟི ནེལཱ, ནིདྡོསཱཏི ཨཏྠོ ‘‘ནེལངྒོ སེཏཔཙྪཱདོ’’ཏི ཨེཏྠ (ཨུདཱ॰ ༦༥; པེཊཀོ॰ ༢༥) ཝུཏྟནེལཾ ཝིཡ། ཀཎྞསུཁཱཏི བྱཉྫནམདྷུརཏཱཡ ཀཎྞཱནཾ སུཁཱ, སཱུཙིཝིཛ྄ཛྷནཾ ཝིཡ ཀཎྞསཱུལཾ ན ཛནེཏི༎ ཨཏྠམདྷུརཏཱཡ སཀལསརཱིརེ ཀོཔཾ ཨཛནེཏྭཱ པེམཾ ཛནེཏཱིཏི པེམནཱིཡཱ། ཧདཡཾ གཙྪཏི ཨཔཊིཧཉྙམཱནཱ སུཁེན ཙིཏྟཾ པཝིསཏཱིཏི ཧདཡངྒམཱ། གུཎཔརིཔུཎྞཏཱཡ པུརེ བྷཝཱཏི པོརཱི, པུརེ སཾཝཌྜྷནཱརཱི ཝིཡ སུཀུམཱརཱཏིཔི པོརཱི, པུརསྶ ཨེསཱཏིཔི པོརཱི, ནགརཝཱསཱིནཾ ཀཐཱཏི ཨཏྠོ། ནགརཝཱསིནོ ཧི ཡུཏྟཀཐཱ ཧོནྟི, པིཏིམཏྟཾ པིཏཱཏི བྷཱཏིམཏྟཾ བྷཱཏཱཏི ཝདནྟི། ཨེཝརཱུཔཱི ཀཐཱ བཧུནོ ཛནསྶ ཀནྟཱ ཧོཏཱིཏི བཧུཛནཀནྟཱ། ཀནྟབྷཱཝེནེཝ བཧུནོ ཛནསྶ མནཱཔཱ ཙིཏྟཝུཌྜྷིཀརཱཏི བཧུཛནམནཱཔཱ།

    Parassa mammacchedakakāyavacīpayogasamuṭṭhāpikā ekantapharusacetanā pharusā vācā, nelāti elaṃ vuccati doso, nassā elanti nelā, niddosāti attho ‘‘nelaṅgo setapacchādo’’ti ettha (udā. 65; peṭako. 25) vuttanelaṃ viya. Kaṇṇasukhāti byañjanamadhuratāya kaṇṇānaṃ sukhā, sūcivijjhanaṃ viya kaṇṇasūlaṃ na janeti. atthamadhuratāya sakalasarīre kopaṃ ajanetvā pemaṃ janetīti pemanīyā. Hadayaṃ gacchati apaṭihaññamānā sukhena cittaṃ pavisatīti hadayaṅgamā. Guṇaparipuṇṇatāya pure bhavāti porī, pure saṃvaḍḍhanārī viya sukumārātipi porī, purassa esātipi porī, nagaravāsīnaṃ kathāti attho. Nagaravāsino hi yuttakathā honti, pitimattaṃ pitāti bhātimattaṃ bhātāti vadanti. Evarūpī kathā bahuno janassa kantā hotīti bahujanakantā. Kantabhāveneva bahuno janassa manāpā cittavuḍḍhikarāti bahujanamanāpā.

    ཨནཏྠཝིཉྙཱཔིཀཱ ཀཱཡཝཙཱིཔཡོགསམུཊྛཱཔིཀཱ ཨཀུསལཙེཏནཱ སམྥཔྤལཱཔོ། ཀཱལེན ཝདཏཱིཏི ཀཱལཝཱདཱི, ཝཏྟབྦཡུཏྟཀཱལཾ སལླཀྑེཏྭཱ ཝདཏཱིཏི ཨཏྠོ། བྷཱུཏཾ ཏཐཾ ཏཙྪཾ སབྷཱཝམེཝ ཝདཏཱིཏི བྷཱུཏཝཱདཱི ། དིཊྛདྷམྨིཀསམྤརཱཡིཀཏྠསནྣིསྶིཏམེཝ ཀཏྭཱ ཝདཏཱིཏི ཨཏྠཝཱདཱི། ནཝལོཀུཏྟརདྷམྨསནྣིསྶིཏཾ ཀཏྭཱ ཝདཏཱིཏི དྷམྨཝཱདཱི། སཾཝརཝིནཡཔཧཱནཝིནཡསནྣིསྶིཏཾ ཀཏྭཱ ཝདཏཱིཏི ཝིནཡཝཱདཱི།

    Anatthaviññāpikā kāyavacīpayogasamuṭṭhāpikā akusalacetanā samphappalāpo. Kālena vadatīti kālavādī, vattabbayuttakālaṃ sallakkhetvā vadatīti attho. Bhūtaṃ tathaṃ tacchaṃ sabhāvameva vadatīti bhūtavādī. Diṭṭhadhammikasamparāyikatthasannissitameva katvā vadatīti atthavādī. Navalokuttaradhammasannissitaṃ katvā vadatīti dhammavādī. Saṃvaravinayapahānavinayasannissitaṃ katvā vadatīti vinayavādī.

    ནིདྷཱནཾ ཝུཙྩཏི ཋཔནོཀཱསོ, ནིདྷཱནམསྶ ཨཏྠཱིཏི ནིདྷཱནཝཏཱི, ཧདཡེ ནིདྷཱཏབྦཡུཏྟཀཾ ཝཱཙཾ བྷཱསིཏཱཏི ཨཏྠོ། ཀཱལེནཱཏི ཨེཝརཱུཔིཾ བྷཱསམཱནོཔི ཙ ‘‘ཨཧཾ ནིདྷཱནཝཏིཾ ཝཱཙཾ བྷཱསིསྶཱམཱི’’ཏི ན ཨཀཱལེན བྷཱསཏི, ཡུཏྟཀཱལཾ པན ཨཔེཀྑིཏྭཱཝ བྷཱསཏཱིཏི ཨཏྠོ། སཱཔདེསནྟི སཨུཔམཾ, སཀཱརཎནྟི ཨཏྠོ། པརིཡནྟཝཏིནྟི པརིཙྪེདཾ དསྶེཏྭཱ ཡཐཱསྶཱ པརིཙྪེདོ པཉྙཱཡཏི, ཨེཝཾ བྷཱསཏཱིཏི ཨཏྠོ། ཨཏྠསཾཧིཏནྟི ཨནེཀེཧིཔི ནཡེཧི ཝིབྷཛནྟེན པརིཡཱདཱཏུཾ ཨསཀྐུཎེཡྻཏཱཡ ཨཏྠསམྤནྣཾ བྷཱསཏི། ཡཾ ཝཱ སོ ཨཏྠཝཱདཱི ཨཏྠཾ ཝདཏི, ཏེན ཨཏྠེན སཧིཏཏྟཱ ཨཏྠསཾཧིཏཾ ཝཱཙཾ བྷཱསཏི, ན ཨཉྙཾ ནིཀྑིཔིཏྭཱ ཨཉྙཾ བྷཱསཏཱིཏི ཝུཏྟཾ ཧོཏི། ཙཏུདྡོསཱཔགཏཾ ཝཱཙཾ བྷཱསཏཱིཏི མུསཱཝཱདཱདཱིཧི ཙཏཱུཧི དོསེཧི ཨཔགཏཾ ཝཱཙཾ བྷཱསཏི། དྭཏྟིཾསཱཡ ཏིརཙྪཱནཀཐཱཡཱཏི དྭཏྟིཾསཱཡ སགྒམོཀྑཱནཾ ཏིརཙྪཱནབྷཱུཏཱཡ ཀཐཱཡ།

    Nidhānaṃ vuccati ṭhapanokāso, nidhānamassa atthīti nidhānavatī, hadaye nidhātabbayuttakaṃ vācaṃ bhāsitāti attho. Kālenāti evarūpiṃ bhāsamānopi ca ‘‘ahaṃ nidhānavatiṃ vācaṃ bhāsissāmī’’ti na akālena bhāsati, yuttakālaṃ pana apekkhitvāva bhāsatīti attho. Sāpadesanti saupamaṃ, sakāraṇanti attho. Pariyantavatinti paricchedaṃ dassetvā yathāssā paricchedo paññāyati, evaṃ bhāsatīti attho. Atthasaṃhitanti anekehipi nayehi vibhajantena pariyādātuṃ asakkuṇeyyatāya atthasampannaṃ bhāsati. Yaṃ vā so atthavādī atthaṃ vadati, tena atthena sahitattā atthasaṃhitaṃ vācaṃ bhāsati, na aññaṃ nikkhipitvā aññaṃ bhāsatīti vuttaṃ hoti. Catuddosāpagataṃ vācaṃ bhāsatīti musāvādādīhi catūhi dosehi apagataṃ vācaṃ bhāsati. Dvattiṃsāya tiracchānakathāyāti dvattiṃsāya saggamokkhānaṃ tiracchānabhūtāya kathāya.

    དས ཀཐཱཝཏྠཱུནཱིཏི ཨཔྤིཙྪཏཱདཱིནི དས ཝིཝཊྚནིསྶིཏཱཡ ཀཐཱཡ ཝཏྠུབྷཱུཏཱནི ཀཱརཎཱནི། ཨཔྤིཙྪཀཐནྟི ཨེཏྠ ཨཔྤིཙྪོཏི ཨིཙྪཱཝིརཧིཏོ ཨནིཙྪོ ནིཏྟཎྷོ། ཨེཏྠ ཧི བྱཉྫནཾ སཱཝསེསཾ ཝིཡ, ཨཏྠོ པན ནིརཝསེསོ། ན ཧི ཁཱིཎཱསཝསྶ ཨཎུམཏྟཱཔི ཨིཙྪཱ ནཱམ ཨཏྠི།

    Dasakathāvatthūnīti appicchatādīni dasa vivaṭṭanissitāya kathāya vatthubhūtāni kāraṇāni. Appicchakathanti ettha appicchoti icchāvirahito aniccho nittaṇho. Ettha hi byañjanaṃ sāvasesaṃ viya, attho pana niravaseso. Na hi khīṇāsavassa aṇumattāpi icchā nāma atthi.

    ཨཔིཙེཏྠ ཨཏྲིཙྪཏཱ པཱཔིཙྪཏཱ མཧིཙྪཏཱ ཨཔྤིཙྪཏཱཏི ཨཡཾ བྷེདོ ཝེདིཏབྦོ – ཏཏྠ སཀལཱབྷེ ཨཏིཏྟསྶ པརལཱབྷཔཏྠནཱ ཨཏྲིཙྪཏཱ ནཱམ, ཏཱཡ སམནྣཱགཏསྶ ཨེཀབྷཱཛནེ པཀྐཔཱུཝེཔི ཨཏྟནོ པཏྟེ པཏིཏེ ན སུཔཀྐོ ཝིཡ ཁུདྡཀོ ཝིཡ ཙ ཁཱཡཏི, སྭེཝ པན པརསྶ པཏྟེ པཀྑིཏྟོ སུཔཀྐོ ཝིཡ མཧནྟོ ཝིཡ ཙ ཁཱཡཏི། ཨསནྟགུཎསམྦྷཱཝནཏཱ པན པཊིགྒཧཎེ ཙ ཨམཏྟཉྙུཏཱ པཱཔིཙྪཏཱ ནཱམ, སཱ ‘‘ཨིདྷེཀཙྩོ ཨསདྡྷོ སམཱནོ སདྡྷོཏི མཾ ཛནོ ཛཱནཱཏཱུ’’ཏིཨཱདིནཱ (ཝིབྷ॰ ༨༥༡) ནཡེན ཨཏྲེཝ ཨཱགཏཱཡེཝ། ཏཱཡ ཙ སམནྣཱགཏོ པུགྒལོ ཀོཧཉྙེ པཏིཊྛཱཏི། སནྟགུཎསམྦྷཱཝནཏཱ པན པཊིགྒཧཎེ ཙ ཨམཏྟཉྙུཏཱ མཧིཙྪཏཱ ནཱམ, སཱཔི ‘‘ཨིདྷེཀཙྩོ སདྡྷོ སམཱནོ སདྡྷོཏི མཾ ཛནོ ཛཱནཱཏཱུཏི ཨིཙྪཏི, སཱིལཝཱ སམཱནོ སཱིལཝཱཏི མཾ ཛནོ ཛཱནཱཏཱུ’’ཏི (ཝིབྷ॰ ༨༥༡) ཨིམིནཱ ནཡེན ཨཱགཏཱཡེཝ། ཏཱཡ སམནྣཱགཏོ པུགྒལོ དུསྶནྟཔྤཡོ ཧོཏི, ཝིཛཱཏམཱཏཱཔིསྶ ཙིཏྟཾ གཧེཏུཾ ན སཀྐོཏི། ཏེནེཏཾ ཝུཙྩཏི –

    Apicettha atricchatā pāpicchatā mahicchatā appicchatāti ayaṃ bhedo veditabbo – tattha sakalābhe atittassa paralābhapatthanā atricchatā nāma, tāya samannāgatassa ekabhājane pakkapūvepi attano patte patite na supakko viya khuddako viya ca khāyati, sveva pana parassa patte pakkhitto supakko viya mahanto viya ca khāyati. Asantaguṇasambhāvanatā pana paṭiggahaṇe ca amattaññutā pāpicchatā nāma, sā ‘‘idhekacco asaddho samāno saddhoti maṃ jano jānātū’’tiādinā (vibha. 851) nayena atreva āgatāyeva. Tāya ca samannāgato puggalo kohaññe patiṭṭhāti. Santaguṇasambhāvanatā pana paṭiggahaṇe ca amattaññutā mahicchatā nāma, sāpi ‘‘idhekacco saddho samāno saddhoti maṃ jano jānātūti icchati, sīlavā samāno sīlavāti maṃ jano jānātū’’ti (vibha. 851) iminā nayena āgatāyeva. Tāya samannāgato puggalo dussantappayo hoti, vijātamātāpissa cittaṃ gahetuṃ na sakkoti. Tenetaṃ vuccati –

    ‘‘ཨགྒིཀྑནྡྷོ སམུདྡོ ཙ, མཧིཙྪོ ཙཱཔི པུགྒལོ།

    ‘‘Aggikkhandho samuddo ca, mahiccho cāpi puggalo;

    སཀཊེན པཙྩཡེ དེཏུ, ཏཡོཔེཏེ ཨཏཔྤཡཱ’’ཏི༎ (མ॰ ནི॰ ཨཊྛ॰ ༡.༢༥༢; ཨ॰ ནི॰ ཨཊྛ॰ ༡.༡.༦༣; ཨུདཱ॰ ཨཊྛ॰ ༣༡)།

    Sakaṭena paccaye detu, tayopete atappayā’’ti. (ma. ni. aṭṭha. 1.252; a. ni. aṭṭha. 1.1.63; udā. aṭṭha. 31);

    སནྟགུཎནིགཱུཧནཏཱ པན པཊིགྒཧཎེ ཙ མཏྟཉྙུཏཱ ཨཔྤིཙྪཏཱ ནཱམ, ཏཱཡ སམནྣཱགཏོ པུགྒལོ ཨཏྟནི ཝིཛྫམཱནམྤི གུཎཾ པཊིཙྪཱདེཏུཀཱམཏཱཡ སདྡྷོ སམཱནོ ‘‘སདྡྷོཏི མཾ ཛནོ ཛཱནཱཏཱུ’’ཏི ན ཨིཙྪཏི། སཱིལཝཱ… པཝིཝིཏྟོ… བཧུསྶུཏོ… ཨཱརདྡྷཝཱིརིཡོ… སམཱདྷིསམྤནྣོ… པཉྙཝཱ… ཁཱིཎཱསཝོ སམཱནོ ‘‘ཁཱིཎཱསཝོཏི མཾ ཛནོ ཛཱནཱཏཱུ’’ཏི ན ཨིཙྪཏི སེཡྻཐཱཔི མཛ྄ཛྷནྟིཀཏྠེརོ། ཨེཝཾ ཨཔྤིཙྪོ ཙ པན བྷིཀྑུ ཨནུཔྤནྣཾ ལཱབྷཾ ཨུཔྤཱདེཏི, ཨུཔྤནྣཾ ཐཱཝརཾ ཀརོཏི, དཱཡཀཱནཾ ཙིཏྟཾ ཨཱརཱདྷེཏི, ཡཐཱ ཡཐཱ ཧི སོ ཨཏྟནོ ཨཔྤིཙྪཏཱཡ ཨཔྤཾ གཎྷཱཏི, ཏཐཱ ཏཐཱ ཏསྶ ཝཏྟེ པསནྣཱ མནུསྶཱ བཧཱུ དེནྟི།

    Santaguṇanigūhanatā pana paṭiggahaṇe ca mattaññutā appicchatā nāma, tāya samannāgato puggalo attani vijjamānampi guṇaṃ paṭicchādetukāmatāya saddho samāno ‘‘saddhoti maṃ jano jānātū’’ti na icchati. Sīlavā… pavivitto… bahussuto… āraddhavīriyo… samādhisampanno… paññavā… khīṇāsavo samāno ‘‘khīṇāsavoti maṃ jano jānātū’’ti na icchati seyyathāpi majjhantikatthero. Evaṃ appiccho ca pana bhikkhu anuppannaṃ lābhaṃ uppādeti, uppannaṃ thāvaraṃ karoti, dāyakānaṃ cittaṃ ārādheti, yathā yathā hi so attano appicchatāya appaṃ gaṇhāti, tathā tathā tassa vatte pasannā manussā bahū denti.

    ཨཔརོཔི ཙཏུབྦིདྷོ ཨཔྤིཙྪོ པཙྩཡཨཔྤིཙྪོ དྷུཏངྒཨཔྤིཙྪོ པརིཡཏྟིཨཔྤིཙྪོ ཨདྷིགམཨཔྤིཙྪོཏི ། ཏཏྠ ཙཏཱུསུ པཙྩཡེསུ ཨཔྤིཙྪོ པཙྩཡཨཔྤིཙྪོ། སོ དཱཡཀསྶ ཝསཾ ཛཱནཱཏི, དེཡྻདྷམྨསྶ ཝསཾ ཛཱནཱཏི, ཨཏྟནོ ཐཱམཾ ཛཱནཱཏི། ཡདི ཧི དེཡྻདྷམྨོ བཧུ ཧོཏི, དཱཡཀོ ཨཔྤཾ དཱཏུཀཱམོ, དཱཡཀསྶ ཝསེན ཨཔྤཾ གཎྷཱཏི། དེཡྻདྷམྨོ ཨཔྤོ, དཱཡཀོ བཧུཾ དཱཏུཀཱམོ, དེཡྻདྷམྨསྶ ཝསེན ཨཔྤཾ གཎྷཱཏི། དེཡྻདྷམྨོཔི བཧུ, དཱཡཀོཔི བཧུཾ དཱཏུཀཱམོ, ཨཏྟནོ ཐཱམཾ ཉཏྭཱ པམཱཎེནེཝ གཎྷཱཏི།

    Aparopi catubbidho appiccho paccayaappiccho dhutaṅgaappiccho pariyattiappiccho adhigamaappicchoti . Tattha catūsu paccayesu appiccho paccayaappiccho. So dāyakassa vasaṃ jānāti, deyyadhammassa vasaṃ jānāti, attano thāmaṃ jānāti. Yadi hi deyyadhammo bahu hoti, dāyako appaṃ dātukāmo, dāyakassa vasena appaṃ gaṇhāti. Deyyadhammo appo, dāyako bahuṃ dātukāmo, deyyadhammassa vasena appaṃ gaṇhāti. Deyyadhammopi bahu, dāyakopi bahuṃ dātukāmo, attano thāmaṃ ñatvā pamāṇeneva gaṇhāti.

    དྷུཏངྒསམཱདཱནསྶ ཨཏྟནི ཨཏྠིབྷཱཝཾ ན ཛཱནཱཔེཏུཀཱམོ དྷུཏངྒཨཔྤིཙྪོ ནཱམ། ཡོ པན བཧུསྶུཏབྷཱཝཾ ན ཛཱནཱཔེཏུཀཱམོ, ཨཡཾ པརིཡཏྟིཨཔྤིཙྪོ ནཱམ། ཡོ པན སོཏཱཔནྣཱདཱིསུ ཨཉྙཏརོ ཧུཏྭཱ སོཏཱཔནྣཱདིབྷཱཝཾ ཛཱནཱཔེཏུཾ ན ཨིཙྪཏི, ཨཡཾ ཨདྷིགམཨཔྤིཙྪོ ནཱམ། ཁཱིཎཱསཝོ པན ཨཏྲིཙྪཏཾ པཱཔིཙྪཏཾ མཧིཙྪཏཾ པཧཱཡ སབྦསོ ཨིཙྪཱཔཊིཔཀྑབྷཱུཏཱཡ ཨལོབྷསངྑཱཏཱཡ པརིསུདྡྷཱཡ ཨཔྤིཙྪཏཱཡ སམནྣཱགཏཏྟཱ ཨཔྤིཙྪོ ནཱམ། ‘‘ཨཱཝུསོ, ཨཏྲིཙྪཏཱ པཱཔིཙྪཏཱ མཧིཙྪཏཱཏི, ཨིམེ དྷམྨཱ པཧཱཏབྦཱཏི, ཏེསུ ཨཱདཱིནཝཾ དསྶེཏྭཱ ཨེཝརཱུཔཾ ཨཔྤིཙྪཏཾ སམཱདཱཡ ཝཏྟིཏབྦ’’ནྟི ཝདནྟོ ཨཔྤིཙྪཀཐཾ ཀཐེཏི ནཱམ།

    Dhutaṅgasamādānassa attani atthibhāvaṃ na jānāpetukāmo dhutaṅgaappiccho nāma. Yo pana bahussutabhāvaṃ na jānāpetukāmo, ayaṃ pariyattiappiccho nāma. Yo pana sotāpannādīsu aññataro hutvā sotāpannādibhāvaṃ jānāpetuṃ na icchati, ayaṃ adhigamaappiccho nāma. Khīṇāsavo pana atricchataṃ pāpicchataṃ mahicchataṃ pahāya sabbaso icchāpaṭipakkhabhūtāya alobhasaṅkhātāya parisuddhāya appicchatāya samannāgatattā appiccho nāma. ‘‘Āvuso, atricchatā pāpicchatā mahicchatāti, ime dhammā pahātabbāti, tesu ādīnavaṃ dassetvā evarūpaṃ appicchataṃ samādāya vattitabba’’nti vadanto appicchakathaṃ katheti nāma.

    སནྟུཊྛཱིཀཐནྟིཨཱདཱིསུ ཝིསེསཏྠམེཝ དཱིཔཡིསྶཱམ, ཡོཛནཱ པན ཝུཏྟནཡེནེཝ ཝེདིཏབྦཱ། སནྟུཊྛཱིཀཐནྟི ཨིཏརཱིཏརཔཙྩཡསནྟོསཾ ནིསྶིཏཾ ཀཐཾ། སོ པནེས སནྟོསོ དྭཱདསཝིདྷོ ཧོཏི། སེཡྻཐིདཾ – ཙཱིཝརེ ཡཐཱལཱབྷསནྟོསོ, ཡཐཱབལསནྟོསོ, ཡཐཱསཱརུཔྤསནྟོསོཏི ཏིཝིདྷོ། ཨེཝཾ པིཎྜཔཱཏཱདཱིསུཔི།

    Santuṭṭhīkathantiādīsu visesatthameva dīpayissāma, yojanā pana vuttanayeneva veditabbā. Santuṭṭhīkathanti itarītarapaccayasantosaṃ nissitaṃ kathaṃ. So panesa santoso dvādasavidho hoti. Seyyathidaṃ – cīvare yathālābhasantoso, yathābalasantoso, yathāsāruppasantosoti tividho. Evaṃ piṇḍapātādīsupi.

    ཏསྶཱཡཾ པབྷེདཝཎྞནཱ – ཨིདྷ བྷིཀྑུ ཙཱིཝརཾ ལབྷཏི སུནྡརཾ ཝཱ ཨསུནྡརཾ ཝཱ། སོ ཏེནེཝ ཡཱཔེཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི། ཨཡམསྶ ཙཱིཝརེ ཡཐཱལཱབྷསནྟོསོ། ཨཐ པན ཡོ པཀཏིདུབྦལོ ཝཱ ཧོཏི, ཨཱབཱདྷཛརཱབྷིབྷཱུཏོ ཝཱ, གརུཙཱིཝརཾ པཱརུཔནྟོ ཀིལམཏི། སོ སབྷཱགེན བྷིཀྑུནཱ སདྡྷིཾ ཏཾ པརིཝཏྟེཏྭཱ ལཧུཀེན ཡཱཔེནྟོཔི སནྟུཊྛོཝ ཧོཏི། ཨཡམསྶ ཙཱིཝརེ ཡཐཱབལསནྟོསོ། ཨཔརོ པཎཱིཏཔཙྩཡལཱབྷཱི ཧོཏི། སོ པཏྟུཎྞཙཱིཝརཱདཱིནཾ ཨཉྙཏརཾ མཧགྒྷཙཱིཝརཾ, བཧཱུནི ཝཱ པན ཙཱིཝརཱནི ལབྷིཏྭཱ ‘‘ཨིདཾ ཐེརཱནཾ ཙིརཔབྦཛིཏཱནཾ, ཨིདཾ བཧུསྶུཏཱནཾ ཨནུརཱུཔཾ, ཨིདཾ གིལཱནཱནཾ, ཨིདཾ ཨཔྤལཱབྷཱིནཾ ཧོཏཱུ’’ཏི དཏྭཱ ཏེསཾ པུརཱཎཙཱིཝརཾ ཝཱ སངྐཱརཀཱུཊཱདིཏོ ཝཱ ནནྟཀཱནི ཨུཙྩིནིཏྭཱ ཏེཧི སངྒྷཱཊིཾ ཀཏྭཱ དྷཱརེནྟོཔི སནྟུཊྛོཝ ཧོཏི། ཨཡམསྶ ཙཱིཝརེ ཡཐཱསཱརུཔྤསནྟོསོ།

    Tassāyaṃ pabhedavaṇṇanā – idha bhikkhu cīvaraṃ labhati sundaraṃ vā asundaraṃ vā. So teneva yāpeti, aññaṃ na pattheti, labhantopi na gaṇhāti. Ayamassa cīvare yathālābhasantoso. Atha pana yo pakatidubbalo vā hoti, ābādhajarābhibhūto vā, garucīvaraṃ pārupanto kilamati. So sabhāgena bhikkhunā saddhiṃ taṃ parivattetvā lahukena yāpentopi santuṭṭhova hoti. Ayamassa cīvare yathābalasantoso. Aparo paṇītapaccayalābhī hoti. So pattuṇṇacīvarādīnaṃ aññataraṃ mahagghacīvaraṃ, bahūni vā pana cīvarāni labhitvā ‘‘idaṃ therānaṃ cirapabbajitānaṃ, idaṃ bahussutānaṃ anurūpaṃ, idaṃ gilānānaṃ, idaṃ appalābhīnaṃ hotū’’ti datvā tesaṃ purāṇacīvaraṃ vā saṅkārakūṭādito vā nantakāni uccinitvā tehi saṅghāṭiṃ katvā dhārentopi santuṭṭhova hoti. Ayamassa cīvare yathāsāruppasantoso.

    ཨིདྷ པན བྷིཀྑུ པིཎྜཔཱཏཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཏེནེཝ ཡཱཔེཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི། ཨཡམསྶ པིཎྜཔཱཏེ ཡཐཱལཱབྷསནྟོསོ། ཡོ པན ཨཏྟནོ པཀཏིཝིརུདྡྷཾ ཝཱ བྱཱདྷིཝིརུདྡྷཾ ཝཱ པིཎྜཔཱཏཾ ལབྷཏི, ཡེནསྶ པརིབྷུཏྟེན ཨཕཱསུ ཧོཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ ཧཏྠཏོ སཔྤཱཡབྷོཛནཾ བྷུཉྫིཏྭཱ སམཎདྷམྨཾ ཀརོནྟོཔི སནྟུཊྛོཝ ཧོཏི། ཨཡམསྶ པིཎྜཔཱཏེ ཡཐཱབལསནྟོསོ། ཨཔརོ བཧུཾ པཎཱིཏཾ པིཎྜཔཱཏཾ ལབྷཏི, སོ ཏཾ ཙཱིཝརཾ ཝིཡ ཐེརཙིརཔབྦཛིཏབཧུསྶུཏཨཔྤལཱབྷཱིགིལཱནཱནཾ དཏྭཱ ཏེསཾ ཝཱ སེསཀཾ པིཎྜཱཡ ཝཱ ཙརིཏྭཱ མིསྶཀཱཧཱརཾ བྷུཉྫནྟོཔི སནྟུཊྛོཝ ཧོཏི། ཨཡམསྶ པིཎྜཔཱཏེ ཡཐཱསཱརུཔྤསནྟོསོ།

    Idha pana bhikkhu piṇḍapātaṃ labhati lūkhaṃ vā paṇītaṃ vā, so teneva yāpeti, aññaṃ na pattheti, labhantopi na gaṇhāti. Ayamassa piṇḍapāte yathālābhasantoso. Yo pana attano pakativiruddhaṃ vā byādhiviruddhaṃ vā piṇḍapātaṃ labhati, yenassa paribhuttena aphāsu hoti, so taṃ sabhāgassa bhikkhuno datvā tassa hatthato sappāyabhojanaṃ bhuñjitvā samaṇadhammaṃ karontopi santuṭṭhova hoti. Ayamassa piṇḍapāte yathābalasantoso. Aparo bahuṃ paṇītaṃ piṇḍapātaṃ labhati, so taṃ cīvaraṃ viya theracirapabbajitabahussutaappalābhīgilānānaṃ datvā tesaṃ vā sesakaṃ piṇḍāya vā caritvā missakāhāraṃ bhuñjantopi santuṭṭhova hoti. Ayamassa piṇḍapāte yathāsāruppasantoso.

    ཨིདྷ པན བྷིཀྑུ སེནཱསནཾ ལབྷཏི མནཱཔཾ ཝཱ ཨམནཱཔཾ ཝཱ, སོ ཏེན ནེཝ སོམནསྶཾ ན དོམནསྶཾ ཨུཔྤཱདེཏི, ཨནྟམསོ ཏིཎསནྠཱརཀེནཱཔི ཡཐཱལདྡྷེནེཝ ཏུསྶཏི། ཨཡམསྶ སེནཱསནེ ཡཐཱལཱབྷསནྟོསོ། ཡོ པན ཨཏྟནོ པཀཏིཝིརུདྡྷཾ ཝཱ བྱཱདྷིཝིརུདྡྷཾ ཝཱ སེནཱསནཾ ལབྷཏི, ཡཏྠསྶ ཝསཏོ ཨཕཱསུ ཧོཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ སནྟཀེ སཔྤཱཡསེནཱསནེ ཝསནྟོཔི སནྟུཊྛོཝ ཧོཏི། ཨཡམསྶ སེནཱསནེ ཡཐཱབལསནྟོསོ།

    Idha pana bhikkhu senāsanaṃ labhati manāpaṃ vā amanāpaṃ vā, so tena neva somanassaṃ na domanassaṃ uppādeti, antamaso tiṇasanthārakenāpi yathāladdheneva tussati. Ayamassa senāsane yathālābhasantoso. Yo pana attano pakativiruddhaṃ vā byādhiviruddhaṃ vā senāsanaṃ labhati, yatthassa vasato aphāsu hoti, so taṃ sabhāgassa bhikkhuno datvā tassa santake sappāyasenāsane vasantopi santuṭṭhova hoti. Ayamassa senāsane yathābalasantoso.

    ཨཔརོ མཧཱཔུཉྙོ ལེཎམཎྜཔཀཱུཊཱགཱརཱདཱིནི བཧཱུནི པཎཱིཏསེནཱསནཱནི ལབྷཏི, སོ ཏཾ ཙཱིཝརཾ ཝིཡ ཐེརཙིརཔབྦཛིཏབཧུསྶུཏཨཔྤལཱབྷཱིགིལཱནཱནཾ དཏྭཱ ཡཏྠ ཀཏྠཙི ཝསནྟོཔི སནྟུཊྛོཝ ཧོཏི། ཨཡམསྶ སེནཱསནེ ཡཐཱསཱརུཔྤསནྟོསོ། ཡོཔི ‘‘ཨུཏྟམསེནཱསནཾ ནཱམ པམཱདཊྛཱནཾ, ཏཏྠ ནིསིནྣསྶ ཐིནམིདྡྷཾ ཨོཀྐམཏི, ནིདྡཱབྷིབྷཱུཏསྶ པུན པཊིབུཛ྄ཛྷཏོ པཱཔཝིཏཀྐཱ པཱཏུབྷཝནྟཱི’’ཏི པཊིསཉྩིཀྑིཏྭཱ ཏཱདིསཾ སེནཱསནཾ པཏྟམྤི ན སམྤཊིཙྪཏི, སོ ཏཾ པཊིཀྑིཔིཏྭཱ ཨབྦྷོཀཱསརུཀྑམཱུལཱདཱིསུ ཝསནྟོཔི སནྟུཊྛོཝ ཧོཏི། ཨཡམསྶ སེནཱསནེ ཡཐཱསཱརུཔྤསནྟོསོ།

    Aparo mahāpuñño leṇamaṇḍapakūṭāgārādīni bahūni paṇītasenāsanāni labhati, so taṃ cīvaraṃ viya theracirapabbajitabahussutaappalābhīgilānānaṃ datvā yattha katthaci vasantopi santuṭṭhova hoti. Ayamassa senāsane yathāsāruppasantoso. Yopi ‘‘uttamasenāsanaṃ nāma pamādaṭṭhānaṃ, tattha nisinnassa thinamiddhaṃ okkamati, niddābhibhūtassa puna paṭibujjhato pāpavitakkā pātubhavantī’’ti paṭisañcikkhitvā tādisaṃ senāsanaṃ pattampi na sampaṭicchati, so taṃ paṭikkhipitvā abbhokāsarukkhamūlādīsu vasantopi santuṭṭhova hoti. Ayamassa senāsane yathāsāruppasantoso.

    ཨིདྷ པན བྷིཀྑུ བྷེསཛྫཾ ལབྷཏི ལཱུཁཾ ཝཱ པཎཱིཏཾ ཝཱ, སོ ཡཾ ལབྷཏི, ཏེནེཝ ཏུསྶཏི, ཨཉྙཾ ན པཏྠེཏི, ལབྷནྟོཔི ན གཎྷཱཏི། ཨཡམསྶ གིལཱནཔཙྩཡེ ཡཐཱལཱབྷསནྟོསོ། ཡོ པན ཏེལེན ཨཏྠིཀོ ཕཱཎིཏཾ ལབྷཏི, སོ ཏཾ སབྷཱགསྶ བྷིཀྑུནོ དཏྭཱ ཏསྶ ཧཏྠཏོ ཏེལཾ གཧེཏྭཱ ཨཉྙདེཝ ཝཱ པརིཡེསིཏྭཱ བྷེསཛྫཾ ཀརོནྟོཔི སནྟུཊྛོཝ ཧོཏི། ཨཡམསྶ གིལཱནཔཙྩཡེ ཡཐཱབལསནྟོསོ།

    Idha pana bhikkhu bhesajjaṃ labhati lūkhaṃ vā paṇītaṃ vā, so yaṃ labhati, teneva tussati, aññaṃ na pattheti, labhantopi na gaṇhāti. Ayamassa gilānapaccaye yathālābhasantoso. Yo pana telena atthiko phāṇitaṃ labhati, so taṃ sabhāgassa bhikkhuno datvā tassa hatthato telaṃ gahetvā aññadeva vā pariyesitvā bhesajjaṃ karontopi santuṭṭhova hoti. Ayamassa gilānapaccaye yathābalasantoso.

    ཨཔརོ མཧཱཔུཉྙོ བཧུཾ ཏེལམདྷུཕཱཎིཏཱདིཔཎཱིཏབྷེསཛྫཾ ལབྷཏི, སོ ཏཾ ཙཱིཝརཾ ཝིཡ ཐེརཙིརཔབྦཛིཏབཧུསྶུཏཨཔྤལཱབྷཱིགིལཱནཱནཾ དཏྭཱ ཏེསཾ ཨཱབྷཏེན ཡེན ཀེནཙི ཡཱཔེནྟོཔི སནྟུཊྛོཝ ཧོཏི། ཡོ པན ཨེཀསྨིཾ བྷཱཛནེ ཙཏུམདྷུརཾ ཋཔེཏྭཱ ཨེཀསྨིཾ མུཏྟཧརཱིཏཀཾ ‘‘གཎྷ, བྷནྟེ, ཡདིཙྪསཱི’’ཏི ཝུཙྩམཱནོ ‘‘སཙསྶ ཏེསུ ཨཉྙཏརེནཔི རོགོ ཝཱུཔསམྨཏི, ཨཐ མུཏྟཧརཱིཏཀཾ ནཱམ བུདྡྷཱདཱིཧི ཝཎྞིཏ’’ནྟི ཙཏུམདྷུརཾ པཊིཀྑིཔིཏྭཱ མུཏྟཧརཱིཏཀེན བྷེསཛྫཾ ཀརོནྟོ པརམསནྟུཊྛོཝ ཧོཏི། ཨཡམསྶ གིལཱནཔཙྩཡེ ཡཐཱསཱརུཔྤསནྟོསོ། ཨིམེསཾ པན པཙྩེཀཔཙྩཡེསུ ཏིཎྞཾ ཏིཎྞཾ སནྟོསཱནཾ ཡཐཱསཱརུཔྤསནྟོསོཝ ཨགྒོ། ཨརཧཱ ཨེཀེཀསྨིཾ པཙྩཡེ ཨིམེཧི ཏཱིཧིཔི སནྟུཊྛོཝ།

    Aparo mahāpuñño bahuṃ telamadhuphāṇitādipaṇītabhesajjaṃ labhati, so taṃ cīvaraṃ viya theracirapabbajitabahussutaappalābhīgilānānaṃ datvā tesaṃ ābhatena yena kenaci yāpentopi santuṭṭhova hoti. Yo pana ekasmiṃ bhājane catumadhuraṃ ṭhapetvā ekasmiṃ muttaharītakaṃ ‘‘gaṇha, bhante, yadicchasī’’ti vuccamāno ‘‘sacassa tesu aññatarenapi rogo vūpasammati, atha muttaharītakaṃ nāma buddhādīhi vaṇṇita’’nti catumadhuraṃ paṭikkhipitvā muttaharītakena bhesajjaṃ karonto paramasantuṭṭhova hoti. Ayamassa gilānapaccaye yathāsāruppasantoso. Imesaṃ pana paccekapaccayesu tiṇṇaṃ tiṇṇaṃ santosānaṃ yathāsāruppasantosova aggo. Arahā ekekasmiṃ paccaye imehi tīhipi santuṭṭhova.

    པཝིཝེཀཀཐནྟི པཝིཝེཀནིསྶིཏཾ ཀཐཾ། ཏཡོ ཧི ཝིཝེཀཱ ཀཱཡཝིཝེཀོ ཙིཏྟཝིཝེཀོ ཨུཔདྷིཝིཝེཀོཏི། ཏཏྠ ཨེཀོ གཙྪཏི, ཨེཀོ ཏིཊྛཏི, ཨེཀོ ནིསཱིདཏི, ཨེཀོ སེཡྻཾ ཀཔྤེཏི, ཨེཀོ གཱམཾ པིཎྜཱཡ པཝིསཏི, ཨེཀོ པཊིཀྐམཏི, ཨེཀོ ཨབྷིཀྐམཏི, ཨེཀོ ཙངྐམཾ ཨདྷིཊྛཱཏི, ཨེཀོ ཙརཏི, ཨེཀོ ཝིཧརཏཱིཏི ཨཡཾ ཀཱཡཝིཝེཀོ ནཱམ། ཨཊྛ སམཱཔཏྟིཡོ པན ཙིཏྟཝིཝེཀོ ནཱམ། ནིབྦཱནཾ ཨུཔདྷིཝིཝེཀོ ནཱམ།

    Pavivekakathanti pavivekanissitaṃ kathaṃ. Tayo hi vivekā kāyaviveko cittaviveko upadhivivekoti. Tattha eko gacchati, eko tiṭṭhati, eko nisīdati, eko seyyaṃ kappeti, eko gāmaṃ piṇḍāya pavisati, eko paṭikkamati, eko abhikkamati, eko caṅkamaṃ adhiṭṭhāti, eko carati, eko viharatīti ayaṃ kāyaviveko nāma. Aṭṭha samāpattiyo pana cittaviveko nāma. Nibbānaṃ upadhiviveko nāma.

    ཝུཏྟམྤི ཧེཏཾ – ‘‘ཀཱཡཝིཝེཀོ ཙ ཝིཝེཀཊྛཀཱཡཱནཾ ནེཀྑམྨཱབྷིརཏཱནཾ། ཙིཏྟཝིཝེཀོ ཙ པརིསུདྡྷཙིཏྟཱནཾ པརམཝོདཱནཔྤཏྟཱནཾ། ཨུཔདྷིཝིཝེཀོ ཙ ནིརུཔདྷཱིནཾ པུགྒལཱནཾ ཝིསངྑཱརགཏཱན’’ནྟི (མཧཱནི॰ ༥༧)།

    Vuttampi hetaṃ – ‘‘kāyaviveko ca vivekaṭṭhakāyānaṃ nekkhammābhiratānaṃ. Cittaviveko ca parisuddhacittānaṃ paramavodānappattānaṃ. Upadhiviveko ca nirupadhīnaṃ puggalānaṃ visaṅkhāragatāna’’nti (mahāni. 57).

    ཨསཾསགྒཀཐནྟི ཨེཏྠ པན སཝནསཾསགྒོ དསྶནསཾསགྒོ སམུལླཔནསཾསགྒོ སམྦྷོགསཾསགྒོ ཀཱཡསཾསགྒོཏི པཉྩཝིདྷོ སཾསགྒོ། ཏེསུ ཨིདྷ བྷིཀྑུ སུཎཱཏི ‘‘ཨམུཀསྨིཾ གཱམེ ཝཱ ནིགམེ ཝཱ ཨིཏྠཱི ཝཱ ཀུམཱརཱི ཝཱ ཨབྷིརཱུཔཱ དསྶནཱིཡཱ པཱསཱདིཀཱ པརམཱཡ ཝཎྞཔོཀྑརཏཱཡ སམནྣཱགཏཱ’’ཏི, སོ ཏཾ སུཏྭཱ སཾསཱིདཏི ཝིསཱིདཏི, ན སཀྐོཏི བྲཧྨཙརིཡཾ སནྡྷཱརེཏུཾ, སིཀྑཱདུབྦལྱཾ ཨནཱཝིཀཏྭཱ ཧཱིནཱཡཱཝཏྟཏི། ཨེཝཾ པརེཧི ཀཐིཡམཱནརཱུཔཱདིསམྤཏྟིཾ ཨཏྟནཱ ཝཱ ཧསིཏལཔིཏགཱིཏསདྡཾ སུཎནྟསྶ སོཏཝིཉྙཱཎཝཱིཐིཝསེན ཨུཔྤནྣོ རཱགོ སཝནསཾསགྒོ ནཱམ།

    Asaṃsaggakathanti ettha pana savanasaṃsaggo dassanasaṃsaggo samullapanasaṃsaggo sambhogasaṃsaggo kāyasaṃsaggoti pañcavidho saṃsaggo. Tesu idha bhikkhu suṇāti ‘‘amukasmiṃ gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā’’ti, so taṃ sutvā saṃsīdati visīdati, na sakkoti brahmacariyaṃ sandhāretuṃ, sikkhādubbalyaṃ anāvikatvā hīnāyāvattati. Evaṃ parehi kathiyamānarūpādisampattiṃ attanā vā hasitalapitagītasaddaṃ suṇantassa sotaviññāṇavīthivasena uppanno rāgo savanasaṃsaggo nāma.

    ‘‘ཨིདྷ བྷིཀྑུ ན ཧེཝ ཁོ སུཎཱཏི, ཨཔི ཙ ཁོ སཱམཾ པསྶཏི ཨིཏྠིཾ ཝཱ ཀུམཱརིཾ ཝཱ ཨབྷིརཱུཔཾ དསྶནཱིཡཾ པཱསཱདིཀཾ པརམཱཡ ཝཎྞཔོཀྑརཏཱཡ སམནྣཱགཏཾ, སོ ཏཾ དིསྭཱ སཾསཱིདཏི ཝིསཱིདཏི, ན སཀྐོཏི བྲཧྨཙརིཡཾ སནྡྷཱརེཏུཾ, སིཀྑཱདུབྦལྱཾ ཨནཱཝིཀཏྭཱ ཧཱིནཱཡཱཝཏྟཏི། ཨེཝཾ ཝིསབྷཱགརཱུཔཾ ཨོལོཀེནྟསྶ པན ཙཀྑུཝིཉྙཱཎཝཱིཐིཝསེན ཨུཔྤནྣརཱགོ དསྶནསཾསགྒོ ནཱམ།

    ‘‘Idha bhikkhu na heva kho suṇāti, api ca kho sāmaṃ passati itthiṃ vā kumāriṃ vā abhirūpaṃ dassanīyaṃ pāsādikaṃ paramāya vaṇṇapokkharatāya samannāgataṃ, so taṃ disvā saṃsīdati visīdati, na sakkoti brahmacariyaṃ sandhāretuṃ, sikkhādubbalyaṃ anāvikatvā hīnāyāvattati. Evaṃ visabhāgarūpaṃ olokentassa pana cakkhuviññāṇavīthivasena uppannarāgo dassanasaṃsaggo nāma.

    ཨཉྙམཉྙཾ ཨལླཱཔསལླཱཔཝསེན ཨུཔྤནྣརཱགོ པན སམུལླཔནསཾསགྒོ ནཱམ། བྷིཀྑུནོ བྷིཀྑུནིཡཱ སནྟཀཾ བྷིཀྑུནིཡཱ ཝཱ བྷིཀྑུསྶ སནྟཀཾ གཧེཏྭཱ པརིབྷོགཀརཎཝསེན ཨུཔྤནྣརཱགོ སམྦྷོགསཾསགྒོ ནཱམ། ཧཏྠགྒཱཧཱདིཝསེན ཨུཔྤནྣརཱགོ པན ཀཱཡསཾསགྒོ ནཱམ། ཨརཧཱ ཨིམེཧི པཉྩཧི སཾསགྒེཧི ཙཏཱུཧིཔི པརིསཱཧི སདྡྷིཾ ཨསཾསཊྛོ, གཱཧམུཏྟཀོ ཙེཝ སཾསགྒམུཏྟཀོ ཙ། ཨསཾསགྒསྶ ཝཎྞཾ བྷཎནྟོ ཨསཾསགྒཀཐཾ ཀཐེཏི ནཱམ།

    Aññamaññaṃ allāpasallāpavasena uppannarāgo pana samullapanasaṃsaggo nāma. Bhikkhuno bhikkhuniyā santakaṃ bhikkhuniyā vā bhikkhussa santakaṃ gahetvā paribhogakaraṇavasena uppannarāgo sambhogasaṃsaggo nāma. Hatthaggāhādivasena uppannarāgo pana kāyasaṃsaggo nāma. Arahā imehi pañcahi saṃsaggehi catūhipi parisāhi saddhiṃ asaṃsaṭṭho, gāhamuttako ceva saṃsaggamuttako ca. Asaṃsaggassa vaṇṇaṃ bhaṇanto asaṃsaggakathaṃ katheti nāma.

    ཝཱིརིཡཱརམྦྷཀཐནྟི ཨེཏྠ ཡོ པགྒཧིཏཝཱིརིཡོ པརིཔུཎྞཀཱཡིཀཙེཏསིཀཝཱིརིཡོ ཧོཏི, གམནེ ཨུཔྤནྣཾ ཀིལེསཾ ཋཱནཾ པཱཔུཎིཏུཾ ན དེཏི, ཋཱནེ ཨུཔྤནྣཾ ཀིལེསཾ ནིསཛྫཾ, ནིསཛྫཱཡ ཨུཔྤནྣཾ ཀིལེསཾ སཡནཾ པཱཔུཎིཏུཾ ན དེཏི, དཎྜེན ཀཎྷསཔྤཾ ཨུཔྤཱིལེ༹ཏྭཱ གཎྷནྟོ ཝིཡ ཨམིཏྟཾ གཱིཝཱཡ ཨཀྐམནྟོ ཝིཡ ཙ ཝིཙརཏི, ཏཱདིསསྶ ཨཱརདྡྷཝཱིརིཡསྶ ཝཎྞཾ བྷཎནྟོ ཝཱིརིཡཱརམྦྷཀཐཾ ཀཐེཏི ནཱམ།

    Vīriyārambhakathanti ettha yo paggahitavīriyo paripuṇṇakāyikacetasikavīriyo hoti, gamane uppannaṃ kilesaṃ ṭhānaṃ pāpuṇituṃ na deti, ṭhāne uppannaṃ kilesaṃ nisajjaṃ, nisajjāya uppannaṃ kilesaṃ sayanaṃ pāpuṇituṃ na deti, daṇḍena kaṇhasappaṃ uppīḷetvā gaṇhanto viya amittaṃ gīvāya akkamanto viya ca vicarati, tādisassa āraddhavīriyassa vaṇṇaṃ bhaṇanto vīriyārambhakathaṃ katheti nāma.

    སཱིལཀཐནྟིཨཱདཱིསུ སཱིལནྟི ཙཏུཔཱརིསུདྡྷིསཱིལཾ། སམཱདྷཱིཏི ཝིཔསྶནཱཔཱདཀཱ ཨཊྛ སམཱཔཏྟིཡོ། པཉྙཱཏི ལོཀིཡལོཀུཏྟརཉཱཎཾ། ཝིམུཏྟཱིཏི ཨརཧཏྟཕལཝིམུཏྟི། ཝིམུཏྟིཉཱཎདསྶནནྟི ཨེཀཱུནཝཱིསཏིཝིདྷཾ པཙྩཝེཀྑཎཉཱཎཾ། སཱིལཱདཱིནཾ གུཎཾ པཀཱསེནྟོ སཱིལཱདིཀཐཾ ཀཐེཏི ནཱམ།

    Sīlakathantiādīsu sīlanti catupārisuddhisīlaṃ. Samādhīti vipassanāpādakā aṭṭha samāpattiyo. Paññāti lokiyalokuttarañāṇaṃ. Vimuttīti arahattaphalavimutti. Vimuttiñāṇadassananti ekūnavīsatividhaṃ paccavekkhaṇañāṇaṃ. Sīlādīnaṃ guṇaṃ pakāsento sīlādikathaṃ katheti nāma.

    སཏིཔཊྛཱནཀཐནྟིཨཱདཱིནི སངྒཛཱལམཏིཙྩ སོ མུནཱིཏིཔརིཡོསཱནཱནི པུབྦེ ཝུཏྟཱནུསཱརེན ཝེདིཏབྦཱནི།

    Satipaṭṭhānakathantiādīni saṅgajālamaticca so munītipariyosānāni pubbe vuttānusārena veditabbāni.

    ༨༦. ནིརཱསཏྟཱིཏི ནིཏྟཎྷོ། ཝིཝེཀདསྶཱི ཕསྶེསཱུཏི པཙྩུཔྤནྣེསུ ཙཀྑུསམྥསྶཱདཱིསུ ཨཏྟཱདིབྷཱཝཝིཝེཀཾ པསྶཏི། དིཊྛཱིསུ ཙ ན ནཱིཡཏཱིཏི དྭཱསཊྛིཡཱ དིཊྛཱིསུ ཀཱཡཙི དིཊྛིཡཱ ན ནཱིཡཏི།

    86.Nirāsattīti nittaṇho. Vivekadassī phassesūti paccuppannesu cakkhusamphassādīsu attādibhāvavivekaṃ passati. Diṭṭhīsu ca na nīyatīti dvāsaṭṭhiyā diṭṭhīsu kāyaci diṭṭhiyā na nīyati.

    ཝིཔརིཎཏཾ ཝཱ ཝཏྠུཾ ན སོཙཏཱིཏི པཀཏིབྷཱཝཾ ཛཧིཏྭཱ ནཊྛེ ཀིསྨིཉྩི ཝཏྠུསྨིཾ ན སོཀཾ ཨཱཔཛྫཏི། ཝིཔརིཎཏསྨིཾ ཝཱཏི ཝིནསྶམཱནེ ཝཏྠུམྷི།

    Vipariṇataṃvā vatthuṃ na socatīti pakatibhāvaṃ jahitvā naṭṭhe kismiñci vatthusmiṃ na sokaṃ āpajjati. Vipariṇatasmiṃ vāti vinassamāne vatthumhi.

    ཙཀྑུསམྥསྶོཏི ཙཀྑུཾ ཝཏྠུཾ ཀཏྭཱ ཙཀྑུཝིཉྙཱཎསཧཛཱཏོ ཕསྶོ ཙཀྑུསམྥསྶོ། སེསེསུཔི ཨེསེཝ ནཡོ། ཨེཏྠ ཙ པུརིམཱ ཙཀྑུཔསཱདཱདིཝཏྠུཀཱཝ, མནོསམྥསྶོ ཧདཡཝཏྠུཀོཔི ཨཝཏྠུཀོཔི སབྦོ ཙཏུབྷཱུམཀོ ཕསྶོ། ཨདྷིཝཙནསམྥསྶོཏི པརིཡཱཡེན ཨེཏསྶ ནཱམཾ ཧོཏིཡེཝ ། ཏཡོ ཧི ཨརཱུཔིནོ ཁནྡྷཱ སཡཾ པིཊྛིཝཊྚཀཱ ཧུཏྭཱ ཨཏྟནོ སཧཛཱཏསམྥསྶསྶ ཨདྷིཝཙནསམྥསྶོཏི ནཱམཾ ཀརོནྟི། པཊིགྷསམྥསྶོཏི ནིཔྤརིཡཱཡེན པན པཊིགྷསམྥསྶོ ནཱམ པཉྩདྭཱརིཀཕསྶོ། ཨདྷིཝཙནསམྥསྶོ ནཱམ མནོདྭཱརིཀཕསྶོ། སུཁཝེདནཱིཡོ ཕསྶོཏི སུཁཝེདནཱཡ ཧིཏོ ཨུཔྤཱདཀོ ཕསྶོ། ཨིཏརདྭཡེཔི ཨེསེཝ ནཡོ། ཀུསལོ ཕསྶོཏི ཨེཀཝཱིསཏིཀུསལཙིཏྟསཧཛཱཏོ ཕསྶོ། ཨཀུསལོཏི དྭཱདསཨཀུསལསཧཛཱཏོ ཕསྶོ། ཨབྱཱཀཏོཏི ཚཔྤཉྙཱསཨབྱཱཀཏསཧཛཱཏོ ཕསྶོ། ཀཱམཱཝཙརོཏི ཙཏུཔཉྙཱསཀཱམཱཝཙརསཧཛཱཏོ ཕསྶོ། རཱུཔཱཝཙརོཏི ཀུསལཱདིཔཉྩདསརཱུཔཱཝཙརསམྤཡུཏྟོ ། ཨརཱུཔཱཝཙརོཏི ཀུསལཱབྱཱཀཏཝསེན དྭཱདསཨརཱུཔཱཝཙརསམྤཡུཏྟོ།

    Cakkhusamphassoti cakkhuṃ vatthuṃ katvā cakkhuviññāṇasahajāto phasso cakkhusamphasso. Sesesupi eseva nayo. Ettha ca purimā cakkhupasādādivatthukāva, manosamphasso hadayavatthukopi avatthukopi sabbo catubhūmako phasso. Adhivacanasamphassoti pariyāyena etassa nāmaṃ hotiyeva . Tayo hi arūpino khandhā sayaṃ piṭṭhivaṭṭakā hutvā attano sahajātasamphassassa adhivacanasamphassoti nāmaṃ karonti. Paṭighasamphassoti nippariyāyena pana paṭighasamphasso nāma pañcadvārikaphasso. Adhivacanasamphasso nāma manodvārikaphasso. Sukhavedanīyo phassoti sukhavedanāya hito uppādako phasso. Itaradvayepi eseva nayo. Kusalo phassoti ekavīsatikusalacittasahajāto phasso. Akusaloti dvādasaakusalasahajāto phasso. Abyākatoti chappaññāsaabyākatasahajāto phasso. Kāmāvacaroti catupaññāsakāmāvacarasahajāto phasso. Rūpāvacaroti kusalādipañcadasarūpāvacarasampayutto . Arūpāvacaroti kusalābyākatavasena dvādasaarūpāvacarasampayutto.

    སུཉྙཏོཏི ཨནཏྟཱནུཔསྶནཱཝསེན ཝིཔསྶནྟསྶ ཨུཔྤནྣོ མགྒོ སུཉྙཏོ, ཏེན སཧཛཱཏོ ཕསྶོ སུཉྙཏོ ཕསྶོ། ཨིཏརདྭཡེཔི ཨེསེཝ ནཡོ། ཨནིམིཏྟོཏི ཨེཏྠ ཨནིཙྩཱནུཔསྶནཱཝསེན ཝིཔསྶནྟསྶ ཨུཔྤནྣོ མགྒོ ཨནིམིཏྟོ། ཨཔྤཎིཧིཏོཏི དུཀྑཱནུཔསྶནཱཝསེན ཝིཔསྶནྟསྶ ཨུཔྤནྣོ མགྒོ ཨཔྤཎིཧིཏོ། ལོཀིཡོཏི ལོཀོ ཝུཙྩཏི ལུཛྫནཔལུཛྫནཊྛེན ཝཊྚོ, ཏསྨིཾ པརིཡཱཔནྣབྷཱཝེན ལོཀེ ནིཡུཏྟོཏི ལོཀིཡོ, ཏེབྷཱུམཀོ དྷམྨོ། ལོཀུཏྟརོཏི ལོཀཏོ ཨུཏྟརོ ཨུཏྟིཎྞོཏི ལོཀུཏྟརོ, ལོཀེ ཨཔརིཡཱཔནྣབྷཱཝེནཔི ལོཀུཏྟརོ། ཨཏྟེན ཝཱཏི ཨཏྟབྷཱཝེན ཝཱ། ཨཏྟནིཡེན ཝཱཏི ཨཏྟཱཡཏྟེན ཝཱ།

    Suññatoti anattānupassanāvasena vipassantassa uppanno maggo suññato, tena sahajāto phasso suññato phasso. Itaradvayepi eseva nayo. Animittoti ettha aniccānupassanāvasena vipassantassa uppanno maggo animitto. Appaṇihitoti dukkhānupassanāvasena vipassantassa uppanno maggo appaṇihito. Lokiyoti loko vuccati lujjanapalujjanaṭṭhena vaṭṭo, tasmiṃ pariyāpannabhāvena loke niyuttoti lokiyo, tebhūmako dhammo. Lokuttaroti lokato uttaro uttiṇṇoti lokuttaro, loke apariyāpannabhāvenapi lokuttaro. Attena vāti attabhāvena vā. Attaniyena vāti attāyattena vā.

    ༨༧. པཏིལཱིནོཏི རཱགཱདཱིནཾ པཧཱིནཏྟཱ ཏཏོ ཨཔགཏོ། ཨཀུཧཀོཏི ཨཝིམྷཱཔཀོ ཏཱིཧི ཀུཧནཝཏྠཱུཧི། ཨཔིཧཱལཱུཏི ཨཔིཧནསཱིལོ, པཏྠནཱཏཎྷཱཡ རཧིཏོཏི ཝུཏྟཾ ཧོཏི། ཨམཙྪརཱིཏི པཉྩམཙྪེརཝིརཧིཏོ། ཨཔྤགབྦྷོཏི ཀཱཡཔཱགབྦྷིཡཱདིཝིརཧིཏོ། ཨཛེགུཙྪོཏི སམྤནྣསཱིལཱདིཏཱཡ ཨཛེགུཙྪནཱིཡོ ཨསེཙནཀོ མནཱཔོ། པེསུཎེཡྻེ ཙ ནོ ཡུཏོཏི དྭཱིཧི ཨཱཀཱརེཧི ཨུཔསཾཧརིཏབྦེ པིསུཎཀམྨེ ཨཡུཏྟོ།

    87.Patilīnoti rāgādīnaṃ pahīnattā tato apagato. Akuhakoti avimhāpako tīhi kuhanavatthūhi. Apihālūti apihanasīlo, patthanātaṇhāya rahitoti vuttaṃ hoti. Amaccharīti pañcamaccheravirahito. Appagabbhoti kāyapāgabbhiyādivirahito. Ajegucchoti sampannasīlāditāya ajegucchanīyo asecanako manāpo. Pesuṇeyye ca no yutoti dvīhi ākārehi upasaṃharitabbe pisuṇakamme ayutto.

    རཱགསྶ པཧཱིནཏྟཱཏི ཨརཧཏྟམགྒེན རཱགཀིལེསསྶ པཧཱིནབྷཱཝེན། ཨསྨིམཱནོ པཧཱིནོ ཧོཏཱིཏི ཨསྨཱིཏི ཨུནྣཏིམཱནོ སམུཙྪེདཝསེན པཧཱིནོ ཧོཏི།

    Rāgassa pahīnattāti arahattamaggena rāgakilesassa pahīnabhāvena. Asmimāno pahīno hotīti asmīti unnatimāno samucchedavasena pahīno hoti.

    ཏཱིཎི ཀུཧནཝཏྠཱུནཱིཏི ཏཱིཎི ཝིམྷཱཔནཀཱརཎཱནི། པཙྩཡཔཊིསེཝནསངྑཱཏཾ ཀུཧནཝཏྠཱུཏིཨཱདཱིསུ ཙཱིཝརཱདཱིཧི ནིམནྟིཏསྶ ཏདཏྠིཀསྶེཝ སཏོ པཱཔིཙྪཏཾ ནིསྶཱཡ པཊིཀྑིཔནེན ཏེ ཙ གཧཔཏིཀེ ཨཏྟནི སུཔྤཏིཊྛིཏཔསཱདེ ཉཏྭཱ པུན ཏེསཾ ‘‘ཨཧོ ཨཡྻོ ཨཔྤིཙྪོ, ན ཀིཉྩི པཊིགྒཎྷིཏུཾ ཨིཙྪཏི, སུལདྡྷཾ ཝཏ ནོ ཨསྶ, སཙེ ཨཔྤམཏྟཀམྤི ཀིཉྩི པཊིགྒཎྷེཡྻཱ’’ཏི ནཱནཱཝིདྷེཧི ཨུཔཱཡེཧི པཎཱིཏཱནི ཙཱིཝརཱདཱིནི ཨུཔནེནྟཱནཾ ཏདནུགྒཧཀཱམཏཾཡེཝ ཨཝིཀཏྭཱ པཊིགྒཧཎེན ཙ ཏཏོ པབྷུཏི ཨཔི སཀཊབྷཱརེཧི ཨུཔནཱམནཧེཏུབྷཱུཏཾ ཝིམྷཱཔནཾ པཙྩཡཔཊིསེཝནསངྑཱཏཾ ཀུཧནཝཏྠཱུཏི ཝེདིཏབྦཾ། པཱཔིཙྪསྶེཝ པན སཏོ སམྦྷཱཝནཱདྷིཔྤཱཡེན ཀཏེན ཨིརིཡཱཔཐེན ཝིམྷཱཔནཾ ཨིརིཡཱཔཐསངྑཱཏཾ ཀུཧནཝཏྠཱུཏི ཝེདིཏབྦཾ། པཱཔིཙྪསྶེཝ པན སཏོ ཨུཏྟརིམནུསྶདྷམྨཱདྷིགམཔརིདཱིཔནཝཱཙཱཡ ཏཐཱ ཏཐཱ ཝིམྷཱཔནཾ སཱམནྟཛཔྤནསངྑཱཏཾ ཀུཧནཝཏྠཱུཏི ཝེདིཏབྦཾ།

    Tīṇi kuhanavatthūnīti tīṇi vimhāpanakāraṇāni. Paccayapaṭisevanasaṅkhātaṃ kuhanavatthūtiādīsu cīvarādīhi nimantitassa tadatthikasseva sato pāpicchataṃ nissāya paṭikkhipanena te ca gahapatike attani suppatiṭṭhitapasāde ñatvā puna tesaṃ ‘‘aho ayyo appiccho, na kiñci paṭiggaṇhituṃ icchati, suladdhaṃ vata no assa, sace appamattakampi kiñci paṭiggaṇheyyā’’ti nānāvidhehi upāyehi paṇītāni cīvarādīni upanentānaṃ tadanuggahakāmataṃyeva avikatvā paṭiggahaṇena ca tato pabhuti api sakaṭabhārehi upanāmanahetubhūtaṃ vimhāpanaṃ paccayapaṭisevanasaṅkhātaṃ kuhanavatthūti veditabbaṃ. Pāpicchasseva pana sato sambhāvanādhippāyena katena iriyāpathena vimhāpanaṃ iriyāpathasaṅkhātaṃ kuhanavatthūti veditabbaṃ. Pāpicchasseva pana sato uttarimanussadhammādhigamaparidīpanavācāya tathā tathā vimhāpanaṃ sāmantajappanasaṅkhātaṃ kuhanavatthūti veditabbaṃ.

    ཀཏམཾ པཙྩཡཔཊིསེཝནསངྑཱཏནྟི ཨེཏྠ པཙྩཡཔཊིསེཝནནྟི ཨེཝཾ སངྑཱཏཾ པཙྩཡཔཊིསེཝནསངྑཱཏཾ། ནིམནྟེནྟཱིཏི ཨིདྷ གཧཔཏིཀཱ ‘‘བྷིཀྑཾ གཎྷཐཱ’’ཏི བྷིཀྑཱུ ནིམནྟེནྟི། ཨཡམེཝ ཝཱ པཱཋོ། ‘‘ནིམནྟེཏཱི’’ཏི ཝཱ ‘‘ཝདནྟཱི’’ཏི ཝཱ ཀེཙི པཋནྟི། ཏཱདིསེ ནིམནྟཱཔེནྟི། ནིམནྟེནྟཱིཏི པཱཋསྶ སམྦྷཝོ དཊྛབྦོ། ཙཱིཝརཾ པཙྩཀྑཱཏཱིཏི ཙཱིཝརཾ པཊིཀྑིཔཏི། ཨེཏཾ སཱརུཔྤཾ, ཡཾ སམཎོཏི ཡཾ ཙཱིཝརདྷཱརཎཾ སམཎོ ཀརོཏི, ཨེཏཾ སཱརུཔྤཾ ཨནུཙྪཝིཀཾ། པཱཔཎིཀཱ ཝཱ ནནྟཀཱནཱིཏི ཨཱཔཎདྭཱརེ པཏིཀཱནི ཨནྟཝིརཧིཏཱནི པིལོཏིཀཱནི། ཨུཙྩིནིཏྭཱཏི སཾཀཌྜྷིཏྭཱ། ཨུཉྪཱཙརིཡཱཡཱཏི བྷིཀྑཱཙརཎེན། པིཎྜིཡཱལོཔེནཱཏི པིཎྜཾ ཀཏྭཱ ལདྡྷཨཱལོཔེན། པཱུཏིམུཏྟེན ཝཱཏི གོམུཏྟེན ཝཱ། ཨོསདྷཾ ཀརེཡྻཱཏི བྷེསཛྫཀིཙྩཾ ཀརེཡྻ། ཏདུཔཱདཱཡཱཏི ཏཏོ པཊྛཱཡ། དྷུཏཝཱདོཏི དྷུཏགུཎཝཱདཱི། བྷིཡྻོ བྷིཡྻོ ནིམནྟེནྟཱིཏི ཨུཔརཱུཔརི ནིམནྟེནྟི། སམྨུཁཱིབྷཱཝཱཏི སམྨུཁཱིབྷཱཝེན, ཝིཛྫམཱནཏཱཡཱཏི ཨཏྠོ། པསཝཏཱིཏི པཊིལབྷཏི། སདྡྷཱཡ སམྨུཁཱིབྷཱཝེན སཀྐཱ ཀཱཏུནྟི ‘‘སདྡྷཱཡ སམྨུཁཱིབྷཱཝཱ’’ཏིཨཱདིམཱཧ། དེཡྻདྷམྨཱ སུལབྷཱ དཀྑིཎེཡྻཱ ཙ, སདྡྷཱ པན དུལླབྷཱ། པུཐུཛྫནསྶ ཧི སདྡྷཱ ཨཐཱཝརཱ, པདཝཱརེ པདཝཱརེ ནཱནཱ ཧོཏི། ཏེནེཝསྶ མཧཱམོགྒལླཱནསདིསོཔི ཨགྒསཱཝཀོ པཱཊིབྷོགོ བྷཝིཏུཾ ཨསཀྐོནྟོ ཨཱཧ ‘‘དྭིནྣཾ ཁོ ནེསཾ ཨཱཝུསོ དྷམྨཱནཾ པཱཊིབྷོགོ བྷོགཱནཉྩ ཛཱིཝིཏསྶ ཙ, སདྡྷཱཡ པན ཏྭཾ པཱཊིབྷོགོ’’ཏི།

    Katamaṃ paccayapaṭisevanasaṅkhātanti ettha paccayapaṭisevananti evaṃ saṅkhātaṃ paccayapaṭisevanasaṅkhātaṃ. Nimantentīti idha gahapatikā ‘‘bhikkhaṃ gaṇhathā’’ti bhikkhū nimantenti. Ayameva vā pāṭho. ‘‘Nimantetī’’ti vā ‘‘vadantī’’ti vā keci paṭhanti. Tādise nimantāpenti. Nimantentīti pāṭhassa sambhavo daṭṭhabbo. Cīvaraṃ paccakkhātīti cīvaraṃ paṭikkhipati. Etaṃ sāruppaṃ, yaṃ samaṇoti yaṃ cīvaradhāraṇaṃ samaṇo karoti, etaṃ sāruppaṃ anucchavikaṃ. Pāpaṇikā vā nantakānīti āpaṇadvāre patikāni antavirahitāni pilotikāni. Uccinitvāti saṃkaḍḍhitvā. Uñchācariyāyāti bhikkhācaraṇena. Piṇḍiyālopenāti piṇḍaṃ katvā laddhaālopena. Pūtimuttena vāti gomuttena vā. Osadhaṃ kareyyāti bhesajjakiccaṃ kareyya. Tadupādāyāti tato paṭṭhāya. Dhutavādoti dhutaguṇavādī. Bhiyyo bhiyyo nimantentīti uparūpari nimantenti. Sammukhībhāvāti sammukhībhāvena, vijjamānatāyāti attho. Pasavatīti paṭilabhati. Saddhāya sammukhībhāvena sakkā kātunti ‘‘saddhāya sammukhībhāvā’’tiādimāha. Deyyadhammā sulabhā dakkhiṇeyyā ca, saddhā pana dullabhā. Puthujjanassa hi saddhā athāvarā, padavāre padavāre nānā hoti. Tenevassa mahāmoggallānasadisopi aggasāvako pāṭibhogo bhavituṃ asakkonto āha ‘‘dvinnaṃ kho nesaṃ āvuso dhammānaṃ pāṭibhogo bhogānañca jīvitassa ca, saddhāya pana tvaṃ pāṭibhogo’’ti.

    ཨེཝཾ ཏུམྷེ པུཉྙེན པརིབཱཧིརཱ བྷཝིསྶཐཱཏི ཨེཏྠ པུཉྙེནཱཏི ནིསྶཀྐཏྠེ ཀརཎཝཙནཾ། པུཉྙཏོ པརིཧཱིནཱ པརམྨུཁཱ བྷཝིསྶཐ། བྷཱཀུཊིཀཱཏི མུཁཱནཾ པདྷཱནཔུརིམཊྛིཏབྷཱཝདསྶནེན བྷཱཀུཊིཀརཎཾ, མུཁསངྐོཙོཏི ཝུཏྟཾ ཧོཏི། བྷཱཀུཊིཀརཎཾ སཱིལམསྶཱཏི བྷཱཀུཊིཀོ, བྷཱཀུཊིཀསྶ བྷཱཝོ བྷཱཀུཊིཡཾ། ཀུཧནཱཏི ཝིམྷཱཔནཱ། ཀུཧསྶ ཨཱཡནཱ ཀུཧཱཡནཱ། ཀུཧིཏསྶ བྷཱཝོ ཀུཧིཏཏྟཾ།

    Evaṃ tumhe puññena paribāhirā bhavissathāti ettha puññenāti nissakkatthe karaṇavacanaṃ. Puññato parihīnā parammukhā bhavissatha. Bhākuṭikāti mukhānaṃ padhānapurimaṭṭhitabhāvadassanena bhākuṭikaraṇaṃ, mukhasaṅkocoti vuttaṃ hoti. Bhākuṭikaraṇaṃ sīlamassāti bhākuṭiko, bhākuṭikassa bhāvo bhākuṭiyaṃ. Kuhanāti vimhāpanā. Kuhassa āyanā kuhāyanā. Kuhitassa bhāvo kuhitattaṃ.

    པཱཔིཙྪོཏི ཨསནྟགུཎདཱིཔནཀཱམོ། ཨིཙྪཱཔཀཏོཏི ཨིཙྪཱཡ ཨཔཀཏོ, ཨུཔདྡུཏོཏི ཨཏྠོ། སམྦྷཱཝནཱདྷིཔྤཱཡོཏི བཧུམཱནཛ྄ཛྷཱསཡོ། གམནཾ སཎྛཔེཏཱིཏི ཨབྷིཀྐམཱདིགམནཾ ཨབྷིསངྑརོཏི, པཱསཱདིཀབྷཱཝཾ ཀརོཏཱིཏི ཝུཏྟཾ ཧོཏི། ཨིཏརེསུཔི ཨེསེཝ ནཡོ། པཎིདྷཱཡ གཙྪཏཱིཏི པཏྠནཾ ཋཔེཏྭཱ གཙྪཏི། སེསེསུཔི ཨེསེཝ ནཡོ། སམཱཧིཏོ ཝིཡ གཙྪཏཱིཏི ཨུཔཙཱརཔྤཏྟོ ཝིཡ གཙྪཏི། སེསེསུཔི ཨེསེཝ ནཡོ།

    Pāpicchoti asantaguṇadīpanakāmo. Icchāpakatoti icchāya apakato, upaddutoti attho. Sambhāvanādhippāyoti bahumānajjhāsayo. Gamanaṃ saṇṭhapetīti abhikkamādigamanaṃ abhisaṅkharoti, pāsādikabhāvaṃ karotīti vuttaṃ hoti. Itaresupi eseva nayo. Paṇidhāya gacchatīti patthanaṃ ṭhapetvā gacchati. Sesesupi eseva nayo. Samāhito viya gacchatīti upacārappatto viya gacchati. Sesesupi eseva nayo.

    ཨཱཔཱཐཀཛ྄ཛྷཱཡཱིཝ ཧོཏཱིཏི སམྨུཁཱ ཨཱགཏཱནཾ མནུསྶཱནཾ ཛྷཱནཾ སམཱཔཛྫནྟོ ཝིཡ སནྟབྷཱཝཾ དསྶེཏི། ཨིརིཡཱཔཐསྶཱཏི ཙཏུཨིརིཡཱཔཐསྶ། ཨཱཋཔནཱཏི ཨཱདིཊྛཔནཱ, ཨཱདརེན ཝཱ ཋཔནཱ། ཋཔནཱཏི ཋཔནཱཀཱརོ། སཎྛཔནཱཏི ཨབྷིསངྑརཎཾ, པཱསཱདིཀབྷཱཝཀརཎནྟི ཝུཏྟཾ ཧོཏི། ཨརིཡདྷམྨསནྣིསྶིཏནྟི ལོཀུཏྟརདྷམྨཔཊིབདྡྷཾ། ཀུཉྩིཀནྟི ཨཝཱཔུརཎཾ། མིཏྟཱཏི སིནེཧཝནྟོ། སནྡིཊྛཱཏི དིཊྛམཏྟཱ། སམྦྷཏྟཱཏི དལ༹ྷམིཏྟཱ། ཨུདྡཎྜེཏི ཨེཀོ པཏིསྶཡཝིསེསོ།

    Āpāthakajjhāyīva hotīti sammukhā āgatānaṃ manussānaṃ jhānaṃ samāpajjanto viya santabhāvaṃ dasseti. Iriyāpathassāti catuiriyāpathassa. Āṭhapanāti ādiṭṭhapanā, ādarena vā ṭhapanā. Ṭhapanāti ṭhapanākāro. Saṇṭhapanāti abhisaṅkharaṇaṃ, pāsādikabhāvakaraṇanti vuttaṃ hoti. Ariyadhammasannissitanti lokuttaradhammapaṭibaddhaṃ. Kuñcikanti avāpuraṇaṃ. Mittāti sinehavanto. Sandiṭṭhāti diṭṭhamattā. Sambhattāti daḷhamittā. Uddaṇḍeti eko patissayaviseso.

    ཀོརཛིཀཀོརཛིཀོཏི སངྐོཙསངྐོཙཀོ, ཨཏིསངྐོཙཀོཏི ཝུཏྟཾ ཧོཏི། ‘‘ཀོརཙཀཀོརཙཀོ’’ཏི ཝཱ པཱཋོ། བྷཱཀུཊིཀབྷཱཀུཊིཀོཏི ཨཏིཝིཡ མུཁསངྐོཙནསཱིལོ། ཀུཧཀཀུཧཀོཏི ཨཏིཝིཡ ཝིམྷཱཔཀོ། ལཔཀལཔཀོཏི ཨཏིཝིཡ སལླཱཔཀོ། མུཁསམྦྷཱཝིཀོཏི ཨཏྟནོ མུཁཝསེན ཨཉྙེཧི སཧ སམྦྷཱཝིཀོ, ཨཔྤིཏཙིཏྟོཏི ཨེཀེ། སནྟཱནནྟི ཀིལེསསནྟཏཱཡ སནྟཱནཾ། སམཱཔཏྟཱིནནྟི སམཱཔཛྫིཏབྦཱནཾ། གམྦྷཱིརནྟི ནིནྣཔཏིཊྛཱནཾ། གཱུལ༹ྷནྟི དསྶེཏུཾ དུཀྑཾ། ནིཔུཎནྟི སུཁུམཾ། པཊིཙྪནྣནྟི པདཏྠེན དུཔྤཊིཝིཛ྄ཛྷཱདྷིཔྤཱཡཾ། ལོཀུཏྟརནྟི དྷམྨདཱིཔཀཾ། སུཉྙཏཱཔཊིསཉྙུཏྟནྟི ནིབྦཱནཔཊིསཉྙུཏྟཾ། ཨཐ ཝཱ ལོཀུཏྟརསུཉྙཏཱཔཊིསཉྙུཏྟནྟི ལོཀུཏྟརདྷམྨབྷཱུཏནིབྦཱནཔཊིསཉྙུཏྟཾ།

    Korajikakorajikoti saṅkocasaṅkocako, atisaṅkocakoti vuttaṃ hoti. ‘‘Koracakakoracako’’ti vā pāṭho. Bhākuṭikabhākuṭikoti ativiya mukhasaṅkocanasīlo. Kuhakakuhakoti ativiya vimhāpako. Lapakalapakoti ativiya sallāpako. Mukhasambhāvikoti attano mukhavasena aññehi saha sambhāviko, appitacittoti eke. Santānanti kilesasantatāya santānaṃ. Samāpattīnanti samāpajjitabbānaṃ. Gambhīranti ninnapatiṭṭhānaṃ. Gūḷhanti dassetuṃ dukkhaṃ. Nipuṇanti sukhumaṃ. Paṭicchannanti padatthena duppaṭivijjhādhippāyaṃ. Lokuttaranti dhammadīpakaṃ. Suññatāpaṭisaññuttanti nibbānapaṭisaññuttaṃ. Atha vā lokuttarasuññatāpaṭisaññuttanti lokuttaradhammabhūtanibbānapaṭisaññuttaṃ.

    ཀཱཡིཀཾ པཱགབྦྷིཡནྟི ཀཱཡེ བྷཝཾ ཀཱཡིཀཾ། ཝཱཙསིཀཙེཏསིཀེསུཔི ཨེསེཝ ནཡོ། ཨཙིཏྟཱིཀཱརཀཏོཏི བཧུམཱནཀིརིཡརཧིཏོ། ཨནུཔཱཧནཱནཾ ཙངྐམནྟཱནནྟི ཨུཔཱཧནཝིརཧིཏཱནཾ ཙངྐམནྟཱནཾ སམཱིཔེ, ཨནཱདརེ ཝཱ སཱམིཝཙནཾ། སཨུཔཱཧནོཏི ཨུཔཱཧནཱརཱུལ༹ྷོ ཧུཏྭཱ ཙངྐམཏི། ནཱིཙེ ཙངྐམེ ཙངྐམནྟཱནནྟི ཨཀཏཔརིཙྪེདཱཡ བྷཱུམིཡཱ ཙངྐམནྟེ པརིཙྪེདཾ ཀཏྭཱ ཝཱལུཀཾ ཨཱཀིརིཏྭཱ ཨཱལམྦནཾ ཡོཛེཏྭཱ ཀཏཙངྐམེ ནཱིཙེཔི ཙངྐམེ ཙངྐམནྟེ། ཨུཙྩེ ཙངྐམེ ཙངྐམཏཱིཏི ཨིཊྛཀཙཡནསམྤནྣེ ཝེདིཀཱཔརིཀྑིཏྟེ ཨུཙྩེ ཙངྐམེ ཙངྐམཏི། སཙེ པཱཀཱརཔརིཀྑིཏྟོ ཧོཏི དྭཱརཀོཊྛཀཡུཏྟོ, པབྦཏནྟརཝནནྟརབྷཱུམནྟརསྶ ཝཱ སུཔྤཊིཙྪནྣོ, ཏཱདིསེ ཙངྐམེ ཙངྐམིཏུཾ ཝཊྚཏི, ཨཔྤཊིཙྪནྣེཔི ཨུཔཙཱརཾ མུཉྩིཏྭཱ ཝཊྚཏི། གྷཊྚཡནྟོཔི ཏིཊྛཏཱིཏི ཨཏིསམཱིཔེ ཏིཊྛཏི། པུརཏོཔི ཏིཊྛཏཱིཏི པུརཏྠིམཏོཔི ཏིཊྛཏི། ཋིཏཀོཔི བྷཎཏཱིཏི ཁཱཎུཀོ ཝིཡ ཨནོནམིཏྭཱ བྷཎཏི། བཱཧཱཝིཀྑེཔཀོཏི བཱཧུཾ ཁིཔིཏྭཱ ཁིཔིཏྭཱ བྷཎཏི།

    Kāyikaṃ pāgabbhiyanti kāye bhavaṃ kāyikaṃ. Vācasikacetasikesupi eseva nayo. Acittīkārakatoti bahumānakiriyarahito. Anupāhanānaṃ caṅkamantānanti upāhanavirahitānaṃ caṅkamantānaṃ samīpe, anādare vā sāmivacanaṃ. Saupāhanoti upāhanārūḷho hutvā caṅkamati. Nīce caṅkame caṅkamantānanti akataparicchedāya bhūmiyā caṅkamante paricchedaṃ katvā vālukaṃ ākiritvā ālambanaṃ yojetvā katacaṅkame nīcepi caṅkame caṅkamante. Ucce caṅkame caṅkamatīti iṭṭhakacayanasampanne vedikāparikkhitte ucce caṅkame caṅkamati. Sace pākāraparikkhitto hoti dvārakoṭṭhakayutto, pabbatantaravanantarabhūmantarassa vā suppaṭicchanno, tādise caṅkame caṅkamituṃ vaṭṭati, appaṭicchannepi upacāraṃ muñcitvā vaṭṭati. Ghaṭṭayantopi tiṭṭhatīti atisamīpe tiṭṭhati. Puratopitiṭṭhatīti puratthimatopi tiṭṭhati. Ṭhitakopi bhaṇatīti khāṇuko viya anonamitvā bhaṇati. Bāhāvikkhepakoti bāhuṃ khipitvā khipitvā bhaṇati.

    ཨནུཔཁཛྫཱཏི སབྦེསཾ ནིསིནྣཊྛཱནཾ པཝིསིཏྭཱ། ནཝེཔི བྷིཀྑཱུ ཨཱསནེན པཊིབཱཧཏཱིཏི ཨཏྟནོ པཏྟཱསནེ ཨནིསཱིདིཏྭཱ པུརེ ཝཱ པཙྪཱ ཝཱ པཝིསནྟོ ཨཱསནེན པཊིབཱཧཏི ནཱམ།

    Anupakhajjāti sabbesaṃ nisinnaṭṭhānaṃ pavisitvā. Navepi bhikkhū āsanena paṭibāhatīti attano pattāsane anisīditvā pure vā pacchā vā pavisanto āsanena paṭibāhati nāma.

    ཨནཱཔུཙྪམྤི ཀཊྛཾ པཀྑིཔཏཱིཏི ཨནཱཔུཙྪིཏྭཱ ཨནཔལོཀེཏྭཱ ཨགྒིམྷི དཱརུཾ ཁིཔཏི། དྭཱརཾ པིདཧཏཱིཏི ཛནྟཱགྷརེ པིདཧཏི།

    Anāpucchampi kaṭṭhaṃ pakkhipatīti anāpucchitvā anapaloketvā aggimhi dāruṃ khipati. Dvāraṃ pidahatīti jantāghare pidahati.

    ཨོཏརཏཱིཏི ཨུདཀཏིཏྠཾ པཝིསཏི། ནྷཱཡཏཱིཏི སརཱིརཾ སིནེཧེཏི། ཨུཏྟརཏཱིཏི ཨུདཀཏིཏྠཏོ ཏཱིརཾ ཨུགྒཙྪཏི།

    Otaratīti udakatitthaṃ pavisati. Nhāyatīti sarīraṃ sineheti. Uttaratīti udakatitthato tīraṃ uggacchati.

    ཝོཀྐམྨཱཔཱིཏི ཨཏིཀྐམིཏྭཱཔི། ཨོཝརཀཱནཱིཏི གབྦྷེ པཏིཊྛིཏསཡནགྷརཱནི།

    Vokkammāpīti atikkamitvāpi. Ovarakānīti gabbhe patiṭṭhitasayanagharāni.

    གཱུལ༹ྷཱནཱིཏི པཊིཙྪནྣཱནི། པཊིཙྪནྣཱནཱིཏི ཨཉྙེཧི པཊིཙྪཱདིཏཱནི།

    Gūḷhānīti paṭicchannāni. Paṭicchannānīti aññehi paṭicchāditāni.

    ཨནཛ྄ཛྷིཊྛོ ཝཱཏི ཐེརེཧི ‘‘དྷམྨཾ བྷཎཱཧཱི’’ཏི ཨནཱཎཏྟོ ཨནཱཡཱཙིཏོ ཙ།

    Anajjhiṭṭho vāti therehi ‘‘dhammaṃ bhaṇāhī’’ti anāṇatto anāyācito ca.

    པཱཔདྷམྨོཏི ལཱམཀདྷམྨོ། ཨསུཙིསངྐསརསམཱཙཱརོཏི ཨཉྙེཧི ‘‘ཨཡཾ དུསྶཱིལོ’’ཏི སངྐཱཡ སརིཏབྦོ ཨཱཙཱརོ སཾཡོགོ ཨེཏསྶཱཏི ཨསུཙིསངྐསརསམཱཙཱརོ། སངྐསྶརསམཱཙཱརོཏི སཀཱརཾ སཾཡོགཾ ཀཏྭཱཔི པཋནྟི། པཊིཙྪནྣཀམྨནྟོཏི པཊིཙྪཱདིཏཀཱཡཝཙཱིཀམྨནྟོ། ཨསྶམཎོཏི ན སམཎོ། སམཎཔཊིཉྙོཏི ‘‘ཨཧཾ སམཎོ’’ཏི པཊིཛཱནནྟོ། ཨབྲཧྨཙཱརཱིཏི སེཊྛཙརིཡཱ ཝིརཧིཏོ། བྲཧྨཙཱརིཔཊིཉྙོཏི ཝུཏྟཔཊིཔཀྑོ། ཨནྟོཔཱུཏཱིཏི ཨབྦྷནྟརེ ཀུསལདྷམྨཝིརཧིཏཏྟཱ ཨནྟོཔཱུཏིབྷཱཝམཱཔནྣོ། ཨཝསྶུཏོཏི རཱགེན ཏིནྟོ། ཀསམྦུཛཱཏོཏི སངྐཱརསབྷཱཝོ། ཨཱཙཱརགོཙརསམྤནྣོཏི ཨེཏྠ བྷིཀྑུ སགཱརཝོ སཔྤཏིསྶོ ཧིརོཏྟཔྤསམྤནྣོ སུནིཝཏྠོ སུཔཱརུཏོ པཱསཱདིཀེན ཨབྷིཀྐནྟེན པཊིཀྐནྟེན ཨཱལོཀིཏེན ཝིལོཀིཏེན སམིཉྫིཏེན པསཱརིཏེན ཨོཀྑིཏྟཙཀྑུ ཨིརིཡཱཔཐསམྤནྣོ ཨིནྡྲིཡེསུ གུཏྟདྭཱརོ བྷོཛནེ མཏྟཉྙཱུ ཛཱགརིཡམནུཡུཏྟོ སཏིསམྤཛཉྙེན སམནྣཱགཏོ ཨཔྤིཙྪོ སནྟུཊྛོ ཨཱརདྡྷཝཱིརིཡོ ཨཱབྷིསམཱཙཱརིཀེསུ སཀྐཙྩཀཱརཱི གརུཙིཏྟཱིཀཱརབཧུལོ ཝིཧརཏི, ཨཡཾ ཝུཙྩཏི ཨཱཙཱརོ། ཨེཝཾ ཏཱཝ ཨཱཙཱརོ ཝེདིཏབྦོ།

    Pāpadhammoti lāmakadhammo. Asucisaṅkasarasamācāroti aññehi ‘‘ayaṃ dussīlo’’ti saṅkāya saritabbo ācāro saṃyogo etassāti asucisaṅkasarasamācāro. Saṅkassarasamācāroti sakāraṃ saṃyogaṃ katvāpi paṭhanti. Paṭicchannakammantoti paṭicchāditakāyavacīkammanto. Assamaṇoti na samaṇo. Samaṇapaṭiññoti ‘‘ahaṃ samaṇo’’ti paṭijānanto. Abrahmacārīti seṭṭhacariyā virahito. Brahmacāripaṭiññoti vuttapaṭipakkho. Antopūtīti abbhantare kusaladhammavirahitattā antopūtibhāvamāpanno. Avassutoti rāgena tinto. Kasambujātoti saṅkārasabhāvo. Ācāragocarasampannoti ettha bhikkhu sagāravo sappatisso hirottappasampanno sunivattho supāruto pāsādikena abhikkantena paṭikkantena ālokitena vilokitena samiñjitena pasāritena okkhittacakkhu iriyāpathasampanno indriyesu guttadvāro bhojane mattaññū jāgariyamanuyutto satisampajaññena samannāgato appiccho santuṭṭho āraddhavīriyo ābhisamācārikesu sakkaccakārī garucittīkārabahulo viharati, ayaṃ vuccati ācāro. Evaṃ tāva ācāro veditabbo.

    གོཙརོ པན ཏིཝིདྷོ ཨུཔནིསྶཡགོཙརོ ཨཱརཀྑགོཙརོ ཨུཔནིབནྡྷགོཙརོཏི། ཏཏྠ ཀཏམོ ཨུཔནིསྶཡགོཙརོ? དསཀཐཱཝཏྠུགུཎསམནྣཱགཏོ ཀལྱཱཎམིཏྟོ, ཡཾ ནིསྶཱཡ ཨསྶུཏཾ སུཎཱཏི, སུཏཾ པརིཡོདཱཔེཏི, ཀངྑཾ ཝིཏརཏི, དིཊྛིཾ ཨུཛུཾ ཀརོཏི, ཙིཏྟཾ པསཱདེཏི; ཡསྶ ཝཱ པན ཨནུསིཀྑམཱནོ སདྡྷཱཡ ཝཌྜྷཏི, སཱིལེན, སུཏེན, ཙཱགེན, པཉྙཱཡ ཝཌྜྷཏི། ཨཡཾ ཝུཙྩཏི ཨུཔནིསྶཡགོཙརོ།

    Gocaro pana tividho upanissayagocaro ārakkhagocaro upanibandhagocaroti. Tattha katamo upanissayagocaro? Dasakathāvatthuguṇasamannāgato kalyāṇamitto, yaṃ nissāya assutaṃ suṇāti, sutaṃ pariyodāpeti, kaṅkhaṃ vitarati, diṭṭhiṃ ujuṃ karoti, cittaṃ pasādeti; yassa vā pana anusikkhamāno saddhāya vaḍḍhati, sīlena, sutena, cāgena, paññāya vaḍḍhati. Ayaṃ vuccati upanissayagocaro.

    ཀཏམོ ཨཱརཀྑགོཙརོ? ཨིདྷ བྷིཀྑུ ཨནྟརགྷརཾ པཝིཊྛོ ཝཱིཐིཾ པཊིཔནྣོ ཨོཀྑིཏྟཙཀྑུ ཡུགམཏྟདསྶཱཝཱི སུསཾཝུཏོ གཙྪཏི, ན ཧཏྠིཾ ཨོལོཀེནྟོ, ན ཨསྶཾ, ན རཐཾ, ན པཏྟིཾ, ན ཨིཏྠིཾ, ན པུརིསཾ ཨོལོཀེནྟོ, ན ཨུདྡྷཾ ཨུལློཀེནྟོ, ན ཨདྷོ ཨོལོཀེནྟོ, ན དིསཱཝིདིསཾ པེཀྑམཱནོ གཙྪཏི། ཨཡཾ ཝུཙྩཏི ཨཱརཀྑགོཙརོ།

    Katamo ārakkhagocaro? Idha bhikkhu antaragharaṃ paviṭṭho vīthiṃ paṭipanno okkhittacakkhu yugamattadassāvī susaṃvuto gacchati, na hatthiṃ olokento, na assaṃ, na rathaṃ, na pattiṃ, na itthiṃ, na purisaṃ olokento, na uddhaṃ ullokento, na adho olokento, na disāvidisaṃ pekkhamāno gacchati. Ayaṃ vuccati ārakkhagocaro.

    ཀཏམོ ཨུཔནིབནྡྷགོཙརོ? ཙཏྟཱརོ སཏིཔཊྛཱནཱ ཡཏྠ ཙིཏྟཾ ཨུཔནིབནྡྷཏི། ཝུཏྟཉྷེཏཾ བྷགཝཏཱ – ‘‘ཀོ ཙ, བྷིཀྑཝེ, བྷིཀྑུནོ གོཙརོ སཀོ པེཏྟིཀོ ཝིསཡོ? ཡདིདཾ ཙཏྟཱརོ སཏིཔཊྛཱནཱ’’ཏི (སཾ॰ ནི॰ ༥.༣༧༢), ཨཡཾ ཝུཙྩཏི ཨུཔནིབནྡྷགོཙརོཏི། ཨིཏི ཨིམིནཱ ཙ ཨཱཙཱརེན ཨིམིནཱ ཙ གོཙརེན ཨུཔེཏོ…པེ॰… སམནྣཱགཏོ། ཏེནཔི ཝུཙྩཏི ཨཱཙཱརགོཙརསམྤནྣོཏི།

    Katamo upanibandhagocaro? Cattāro satipaṭṭhānā yattha cittaṃ upanibandhati. Vuttañhetaṃ bhagavatā – ‘‘ko ca, bhikkhave, bhikkhuno gocaro sako pettiko visayo? Yadidaṃ cattāro satipaṭṭhānā’’ti (saṃ. ni. 5.372), ayaṃ vuccati upanibandhagocaroti. Iti iminā ca ācārena iminā ca gocarena upeto…pe… samannāgato. Tenapi vuccati ācāragocarasampannoti.

    ཨཎུམཏྟེསུ ཝཛྫེསུ བྷཡདསྶཱཝཱིཏི ཨཎུཔྤམཱཎེསུ ཨསཉྩིཙྩ ཨཱཔནྣསེཁིཡཨཀུསལཙིཏྟུཔྤཱདཱདིབྷེདེསུ ཝཛྫེསུ བྷཡདསྶནསཱིལོ། སམཱདཱཡ སིཀྑཏི སིཀྑཱཔདེསཱུཏི ཡཾཀིཉྩི སིཀྑཱཔདེསུ སིཀྑིཏབྦཾ, ཏཾ སབྦཾ སམྨཱ ཨཱདཱཡ སིཀྑཏི། ཨེཏྠ ཙ ‘‘པཱཏིམོཀྑསཾཝརསཾཝུཏོ’’ཏི ཨེཏྟཱཝཏཱ ཙ པུགྒལཱདྷིཊྛཱནཱཡ དེསནཱཡ པཱཏིམོཀྑསཾཝརསཱིལཾ དསྶིཏཾ། ‘‘ཨཱཙཱརགོཙརསམྤནྣོ’’ཏིཨཱདི པན སབྦཾ ཡཐཱཔཊིཔནྣསྶ ཏཾ སཱིལཾ སམྤཛྫཏི, ཏཾ པཊིཔཏྟིཾ དསྶེཏུཾ ཝུཏྟནྟི ཝེདིཏབྦཾ།

    Aṇumattesu vajjesu bhayadassāvīti aṇuppamāṇesu asañcicca āpannasekhiyaakusalacittuppādādibhedesu vajjesu bhayadassanasīlo. Samādāya sikkhati sikkhāpadesūti yaṃkiñci sikkhāpadesu sikkhitabbaṃ, taṃ sabbaṃ sammā ādāya sikkhati. Ettha ca ‘‘pātimokkhasaṃvarasaṃvuto’’ti ettāvatā ca puggalādhiṭṭhānāya desanāya pātimokkhasaṃvarasīlaṃ dassitaṃ. ‘‘Ācāragocarasampanno’’tiādi pana sabbaṃ yathāpaṭipannassa taṃ sīlaṃ sampajjati, taṃ paṭipattiṃ dassetuṃ vuttanti veditabbaṃ.

    ༨༨. སཱཏིཡེསུ ཨནསྶཱཝཱིཏི སཱཏཝཏྠཱུསུ ཀཱམགུཎེསུ ཏཎྷཱསནྠཝཝིརཧིཏོ། སཎྷོཏི སཎྷེཧི ཀཱཡཀམྨཱདཱིཧི སམནྣཱགཏོ། པཊིབྷཱནཝཱཏི པརིཡཏྟིཔརིཔུཙྪཱདྷིགམཔཊིབྷཱནེཧི སམནྣཱགཏོ། ན སདྡྷོཏི སཱམཾ ཨདྷིགཏདྷམྨཾ ན ཀསྶཙི སདྡཧཏི། ན ཝིརཛྫཏཱིཏི ཁཡཱ རཱགསྶ ཝིརཏྟཏྟཱ ཨིདཱནི ན ཝིརཛྫཏི།

    88.Sātiyesu anassāvīti sātavatthūsu kāmaguṇesu taṇhāsanthavavirahito. Saṇhoti saṇhehi kāyakammādīhi samannāgato. Paṭibhānavāti pariyattiparipucchādhigamapaṭibhānehi samannāgato. Na saddhoti sāmaṃ adhigatadhammaṃ na kassaci saddahati. Na virajjatīti khayā rāgassa virattattā idāni na virajjati.

    ཡེསཾ ཨེསཱཏི ཡེསཾ པུགྒལཱནཾ སཱཏཝཏྠཱུསུ ཀཱམགུཎེསུ ཨིཙྪཱ ཏཎྷཱ། ཨཔྤཧཱིནཱཏི སནྠཝསམྤཡུཏྟཱ ཏཎྷཱ ཨརཧཏྟམགྒེན ཨཔྤཧཱིནཱ། ཏེསཾ ཙཀྑུཏོ རཱུཔཏཎྷཱ སཝཏཱིཏི ཨེཏེསཾ ཙཀྑུདྭཱརཏོ པཝཏྟཛཝནཝཱིཐིསམྤཡུཏྟཱ རཱུཔཱརམྨཎཱ ཏཎྷཱ ཨུཔྤཛྫཏི། ཨཱསཝཏཱིཏི ཨོཀཱསཏོ ཡཱཝ བྷཝགྒཱ དྷམྨཏོ ཡཱཝ གོཏྲབྷཱུ སཝཏི། སནྡཏཱིཏི ནདཱིསོཏཾ ཝིཡ ཨདྷོམུཁཾ སནྡཏི། པཝཏྟཏཱིཏི པུནཔྤུནཾ ཨུཔྤཏྟིཝསེན པཝཏྟཏི། སེསདྭཱརེསུཔི ཨེསེཝ ནཡོ། སུཀྐཔཀྑེ ཝུཏྟཝིཔརིཡཱཡེན ཏཎྷཱ ཨརཧཏྟམགྒེན སུཔྤཧཱིནཱ། ཏེསཾ ཙཀྑུཏོ རཱུཔཏཎྷཱ ན སཝཏི།

    Yesaṃ esāti yesaṃ puggalānaṃ sātavatthūsu kāmaguṇesu icchā taṇhā. Appahīnāti santhavasampayuttā taṇhā arahattamaggena appahīnā. Tesaṃ cakkhuto rūpataṇhā savatīti etesaṃ cakkhudvārato pavattajavanavīthisampayuttā rūpārammaṇā taṇhā uppajjati. Āsavatīti okāsato yāva bhavaggā dhammato yāva gotrabhū savati. Sandatīti nadīsotaṃ viya adhomukhaṃ sandati. Pavattatīti punappunaṃ uppattivasena pavattati. Sesadvāresupi eseva nayo. Sukkapakkhe vuttavipariyāyena taṇhā arahattamaggena suppahīnā. Tesaṃ cakkhuto rūpataṇhā na savati.

    སཎྷེན ཀཱཡཀམྨེན སམནྣཱགཏོཏི ཨཕརུསེན མུདུནཱ ཀཱཡཀམྨེན སམངྒཱིབྷཱུཏོ ཨེཀཱིབྷཱུཏོ། ཝཙཱིཀམྨཱདཱིསུཔི ཨེསེཝ ནཡོ། སཎྷེཧི སཏིཔཊྛཱནེཧཱིཏིཨཱདཱིསུ སཏིཔཊྛཱནཱདཡོ ལོཀིཡལོཀུཏྟརམིསྶཀཱ། པརིཡཱཔུཎནཨཏྠཱདིཔརིཔུཙྪཱལོཀིཡལོཀུཏྟརདྷམྨཱདྷིགམཝསེན སལླཀྑཎཝིབྷཱཝནཝཝཏྠཱནཀརཎསམཏྠཱ ཏིསྶོ པཊིབྷཱནཔྤབྷེདསངྑཱཏཱ པཉྙཱ ཡསྶ ཨཏྠི, སོ པཊིབྷཱནཝཱ། ཏསྶ པརིཡཏྟིཾ ནིསྶཱཡ པཊིབྷཱཡཏཱིཏི ཏསྶ པུགྒལསྶ པརིཡཱཔུཎནཾ ཨལླཱིཡིཏྭཱ ཉཱཎཾ ཛཱཡཏི ཉཱཎཾ ཨབྷིམུཁཾ ཧོཏི། ཙཏྟཱརོ སཏིཔཊྛཱནཱཏི སཏྟཏིཾས བོདྷིཔཀྑིཡདྷམྨཱ ལོཀིཡལོཀུཏྟརམིསྶཀཝསེན ཝུཏྟཱ། མགྒཕལཱནི ནིབྦཏྟིཏལོཀུཏྟརཝསེན། ཙཏསྶོ པཊིསམྦྷིདཱཡོ ཚ ཙ ཨབྷིཉྙཱཡོ ཝིམོཀྑནྟིཀཝསེན ཝུཏྟཱཏི ཉཱཏབྦཱ།

    Saṇhenakāyakammena samannāgatoti apharusena mudunā kāyakammena samaṅgībhūto ekībhūto. Vacīkammādīsupi eseva nayo. Saṇhehi satipaṭṭhānehītiādīsu satipaṭṭhānādayo lokiyalokuttaramissakā. Pariyāpuṇanaatthādiparipucchālokiyalokuttaradhammādhigamavasena sallakkhaṇavibhāvanavavatthānakaraṇasamatthā tisso paṭibhānappabhedasaṅkhātā paññā yassa atthi, so paṭibhānavā. Tassa pariyattiṃ nissāya paṭibhāyatīti tassa puggalassa pariyāpuṇanaṃ allīyitvā ñāṇaṃ jāyati ñāṇaṃ abhimukhaṃ hoti. Cattāro satipaṭṭhānāti sattatiṃsa bodhipakkhiyadhammā lokiyalokuttaramissakavasena vuttā. Maggaphalāni nibbattitalokuttaravasena. Catasso paṭisambhidāyo cha ca abhiññāyo vimokkhantikavasena vuttāti ñātabbā.

    ཏཏྠ ཙཏསྶོ པཊིསམྦྷིདཱཡོཏི ཙཏྟཱརོ ཉཱཎཔྤབྷེདཱཏི ཨཏྠོ། ཨིདྡྷིཝིདྷཱདིཨཱསཝཀྑཡཔརིཡོསཱནཱནི ཨདྷིཀཱནི ཚ ཉཱཎཱནི། ཏསྶཱཏི པརསྶ, ཨཏྠོ པཊིབྷཱཡཏཱིཏི སམྦནྡྷོ། ཨཏྠོཏི སངྑེཔཏོ ཧེཏུཕལཾ། ཏཉྷི ཡསྨཱ ཧེཏུཨནུསཱརེན ཨརཱིཡཏི ཨདྷིགམཱིཡཏི པཱཔུཎཱིཡཏི, ཏསྨཱ ཨཏྠོཏི ཝུཙྩཏི། པབྷེདཏོ པན ཡཾཀིཉྩི པཙྩཡུཔྤནྣཾ ནིབྦཱནཾ བྷཱསིཏཏྠོ ཝིཔཱཀོ ཀིརིཡཱཏི ཨིམེ པཉྩ དྷམྨཱ ཨཏྠོཏི ཝེདིཏབྦཱ, ཏཾ ཨཏྠཾ པཙྩཝེཀྑནྟསྶ སོ ཨཏྠོ པབྷེདཏོ ཉཱཏོ པཱཀཊོ ཧོཏི། དྷམྨོཏི སངྑེཔཏོ པཙྩཡོ། སོ ཧི ཡསྨཱ ཏཾ ཏཾ ཝིདཧཏི པཝཏྟེཏི ཙེཝ པཱཔེཏི ཙ, ཏསྨཱ དྷམྨོཏི ཝུཙྩཏི། པབྷེདཏོ པན ཡོ ཀོཙི ཕལནིབྦཏྟཀོ ཧེཏུ ཨརིཡམགྒོ བྷཱསིཏཾ ཀུསལཾ ཨཀུསལནྟི ཨིམེ པཉྩ དྷམྨཱ དྷམྨོཏི ཝེདིཏབྦཱ, ཏཾ དྷམྨཾ པཙྩཝེཀྑནྟསྶ སོ དྷམྨོ པབྷེདཏོ ཉཱཏོ པཱཀཊོ ཧོཏི, ཏསྨིཾ ཨཏྠེ ཙ དྷམྨེ ཙ ཡཱ སབྷཱཝནིརུཏྟི ཨབྱབྷིཙཱརཱི ཝོཧཱརོ, ཏསྶ ཨབྷིལཱཔེ བྷཱསནེ ཨུདཱིརཎེ ཏཾ ལཔིཏཾ བྷཱསིཏཾ ཨུདཱིརིཏཾ སབྷཱཝནིརུཏྟིསདྡཾ ཨཱརམྨཎཾ ཀཏྭཱ པཙྩཝེཀྑནྟསྶ སཱ ནིརུཏྟི ཉཱཏཱ པཱཀཊཱ ཧོཏི།

    Tattha catasso paṭisambhidāyoti cattāro ñāṇappabhedāti attho. Iddhividhādiāsavakkhayapariyosānāni adhikāni cha ñāṇāni. Tassāti parassa, attho paṭibhāyatīti sambandho. Atthoti saṅkhepato hetuphalaṃ. Tañhi yasmā hetuanusārena arīyati adhigamīyati pāpuṇīyati, tasmā atthoti vuccati. Pabhedato pana yaṃkiñci paccayuppannaṃ nibbānaṃ bhāsitattho vipāko kiriyāti ime pañca dhammā atthoti veditabbā, taṃ atthaṃ paccavekkhantassa so attho pabhedato ñāto pākaṭo hoti. Dhammoti saṅkhepato paccayo. So hi yasmā taṃ taṃ vidahati pavatteti ceva pāpeti ca, tasmā dhammoti vuccati. Pabhedato pana yo koci phalanibbattako hetu ariyamaggo bhāsitaṃ kusalaṃ akusalanti ime pañca dhammā dhammoti veditabbā, taṃ dhammaṃ paccavekkhantassa so dhammo pabhedato ñāto pākaṭo hoti, tasmiṃ atthe ca dhamme ca yā sabhāvanirutti abyabhicārī vohāro, tassa abhilāpe bhāsane udīraṇe taṃ lapitaṃ bhāsitaṃ udīritaṃ sabhāvaniruttisaddaṃ ārammaṇaṃ katvā paccavekkhantassa sā nirutti ñātā pākaṭā hoti.

    ཨེཏྠ ཨཏྠེ ཉཱཏེ ཨཏྠོ པཊིབྷཱཡཏཱིཏི ཨིདཱནི ཏསྶ སདྡཾ ཨཱཧརིཏྭཱ ཝུཏྟཔྤབྷེདེ ཨཏྠེ པཱཀཊཱིབྷཱུཏེ ཝུཏྟཔྤབྷེདོ ཨཏྠོ ཏསྶ པུགྒལསྶ པཊིབྷཱཡཏི ཉཱཎཱབྷིམུཁོ ཧོཏི། དྷམྨེ ཉཱཏེ དྷམྨོ པཊིབྷཱཡཏཱིཏི ཝུཏྟཔྤབྷེདེ དྷམྨེ པཱཀཊཱིབྷཱུཏེ ཝུཏྟཔྤབྷེདོ དྷམྨོ པཊིབྷཱཡཏི། ནིརུཏྟིཡཱ ཉཱཏཱཡ ནིརུཏྟི པཊིབྷཱཡཏཱིཏི ཝུཏྟཔྤབྷེདཱཡ ནིརུཏྟིཡཱ པཱཀཊཱཡ ཝུཏྟཔྤབྷེདཱ ནིརུཏྟི པཊིབྷཱཡཏི། ཨིམེསུ ཏཱིསུ ཉཱཎེསུ ཉཱཎནྟི ཨཏྠདྷམྨནིརུཏྟཱིསུ ཨིམེསུ ཏཱིསུ སབྦཏྠཀཉཱཎམཱརམྨཎཾ ཀཏྭཱ པཙྩཝེཀྑནྟསྶ ཏེསུ ཏཱིསུ ཉཱཎེསུ པབྷེདགཏཾ ཉཱཎཾ, ཡཐཱཝུཏྟེསུ ཝཱ ཏེསུ ཏཱིསུ ཉཱཎེསུ གོཙརཀིཙྩཱདིཝསེན ཝིཏྠཱརགཏཾ ཉཱཎཾ པཊིབྷཱནཔཊིསམྦྷིདཱ། ཨིམཱཡ པཊིབྷཱནཔཊིསམྦྷིདཱཡཱཏི ཨིམཱཡ ཝུཏྟཔྤཀཱརཱཡ ཡཐཱཝུཏྟཝིཏྠཱརཔཉྙཱཡ ཨུཔེཏོ ཧོཏི། སོ ཝུཙྩཏི པཊིབྷཱནཝཱཏི ནིགམེནྟོ ཨཱཧ། ཡསྶ པརིཡཏྟི ནཏྠཱིཏི པརིཡཏྟི ནཱམ བུདྡྷཝཙནཾ། ཏཉྷི ཨུགྒཎྷནྟསྶ པཊིསམྦྷིདཱ ཝིསདཱ ཧོནྟི། ཡསྶ པུགྒལསྶ ཨེཝརཱུཔཱ པརིཡཏྟི ནཏྠི། པརིཔུཙྪཱ ནཏྠཱིཏི པརིཔུཙྪཱ ནཱམ པཱལི༹ཨཊྛཀཐཱདཱིསུ གཎྛིཔདཨཏྠཔདཝིནིཙྪཡཀཐཱ། ཨུགྒཧིཏཔཱལི༹ཨཱདཱིསུ ཧི ཨཏྠཾ ཀཐེནྟསྶ པཊིསམྦྷིདཱ ཝིསདཱ ཧོནྟི། ཨདྷིགམོ ནཏྠཱིཏི ཨདྷིགམོ ནཱམ ཨརཧཏྟཔྤཏྟི། ཨརཧཏྟཉྷི པཏྟསྶ པཊིསམྦྷིདཱ ཝིསདཱ ཧོནྟི། ཡསྶ ཝུཏྟཔྤཀཱརཱ ཏིཝིདྷཱ སམྤཏྟི ནཏྠི། ཀིཾ ཏསྶ པཊིབྷཱཡིསྶཏཱིཏི ཀེན ཀཱརཎེན ཏསྶ པུགྒལསྶ པབྷེདགཏཾ ཉཱཎཾ ཨུཔཊྛཧིསྶཏི།

    Ettha atthe ñāte attho paṭibhāyatīti idāni tassa saddaṃ āharitvā vuttappabhede atthe pākaṭībhūte vuttappabhedo attho tassa puggalassa paṭibhāyati ñāṇābhimukho hoti. Dhamme ñātedhammo paṭibhāyatīti vuttappabhede dhamme pākaṭībhūte vuttappabhedo dhammo paṭibhāyati. Niruttiyā ñātāya nirutti paṭibhāyatīti vuttappabhedāya niruttiyā pākaṭāya vuttappabhedā nirutti paṭibhāyati. Imesu tīsu ñāṇesu ñāṇanti atthadhammaniruttīsu imesu tīsu sabbatthakañāṇamārammaṇaṃ katvā paccavekkhantassa tesu tīsu ñāṇesu pabhedagataṃ ñāṇaṃ, yathāvuttesu vā tesu tīsu ñāṇesu gocarakiccādivasena vitthāragataṃ ñāṇaṃ paṭibhānapaṭisambhidā. Imāya paṭibhānapaṭisambhidāyāti imāya vuttappakārāya yathāvuttavitthārapaññāya upeto hoti. So vuccati paṭibhānavāti nigamento āha. Yassa pariyatti natthīti pariyatti nāma buddhavacanaṃ. Tañhi uggaṇhantassa paṭisambhidā visadā honti. Yassa puggalassa evarūpā pariyatti natthi. Paripucchā natthīti paripucchā nāma pāḷiaṭṭhakathādīsu gaṇṭhipadaatthapadavinicchayakathā. Uggahitapāḷiādīsu hi atthaṃ kathentassa paṭisambhidā visadā honti. Adhigamo natthīti adhigamo nāma arahattappatti. Arahattañhi pattassa paṭisambhidā visadā honti. Yassa vuttappakārā tividhā sampatti natthi. Kiṃ tassa paṭibhāyissatīti kena kāraṇena tassa puggalassa pabhedagataṃ ñāṇaṃ upaṭṭhahissati.

    སཱམནྟི སཡམེཝ། སཡཾ ཨབྷིཉྙཱཏནྟི སཡམེཝ ཏེན ཉཱཎེན ཨཝགམིཏཾ། ཨཏྟཔཙྩཀྑཾ དྷམྨནྟི ཨཏྟནཱ པཊིཝིཛ྄ཛྷིཏཾ པཙྩཝེཀྑིཏཾ དྷམྨཾ། ན ཀསྶཙི སདྡཧཏཱིཏི ཨཏྟཔཙྩཀྑཏཱཡ པརེསཾ ན སདྡཧཏི, སདྡྷཱཡ ན གཙྪཏི། ཨཝིཛྫཱཔཙྩཡཱ སངྑཱརཱཏིཨཱདིཀཾ དྭཱདསཔདིཀཔཙྩཡཱཀཱརདསྶནཝསེན ཝུཏྟཾ། ཨཝིཛྫཱནིརོདྷཱཏིཨཱདཡོ སཾསཱརནིཝཏྟིཾ སནྡྷཱཡ ཝུཏྟཱ། ཨིདཾ དུཀྑནྟིཨཱདི སཙྩདསྶནཝསེན། ཨིམེ ཨཱསཝཱཏིཨཱདཡོ ཨཔརེན པརིཡཱཡེན ཀིལེསཝསེན པཙྩཡདསྶནཝསེན། ཨིམེ དྷམྨཱ ཨབྷིཉྙེཡྻཱཏིཨཱདཡོ ཨབྷིཉྙེཡྻཔརིཉྙེཡྻཔཧཱཏབྦབྷཱཝེཏབྦསཙྪིཀཱཏབྦདྷམྨཱནཾ དསྶནཝསེན། ཚནྣཾ ཕསྶཱཡཏནཱནནྟིཨཱདཡོ ཕསྶཱཡཏནཱནཾ ཨུཔྤཏྟིཉྩ ཨཏྠངྒམཉྩ ཨསྶཱདཉྩ ཨུཔདྡཝཉྩ ནིསྶརཎཉྩ དསྶནཝསེན། པཉྩནྣཾ ཨུཔཱདཱནཀྑནྡྷཱནཾ པཉྩཝཱིསཏིཝིདྷེན ཨུདཡཉྩ ཝཡཉྩ, ཏེསུ ཚནྡརཱགཝསེན ཨསྶཱདཉྩ, ཏེསཾ ཝིཔརིཎཱམཾ ཨཱདཱིནཝཉྩ, ནིསྶརཎསངྑཱཏཾ ནིབྦཱནཉྩ། ཙཏུནྣཾ མཧཱབྷཱུཏཱནཾ ཨཝིཛྫཱདིསམུདཡཉྩ, ཨཝིཛྫཱདིནིརོདྷེ ཨཏྠངྒམཉྩ ཨེཝམཱདིདསྶནཝསེན ཝུཏྟཱ། ཨེཏེ དྷམྨཱ ཏཏྠ ཏཏྠ ཝུཏྟནཡེན ཝེདིཏབྦཱ།

    Sāmanti sayameva. Sayaṃ abhiññātanti sayameva tena ñāṇena avagamitaṃ. Attapaccakkhaṃ dhammanti attanā paṭivijjhitaṃ paccavekkhitaṃ dhammaṃ. Na kassaci saddahatīti attapaccakkhatāya paresaṃ na saddahati, saddhāya na gacchati. Avijjāpaccayā saṅkhārātiādikaṃ dvādasapadikapaccayākāradassanavasena vuttaṃ. Avijjānirodhātiādayo saṃsāranivattiṃ sandhāya vuttā. Idaṃ dukkhantiādi saccadassanavasena. Ime āsavātiādayo aparena pariyāyena kilesavasena paccayadassanavasena. Ime dhammā abhiññeyyātiādayo abhiññeyyapariññeyyapahātabbabhāvetabbasacchikātabbadhammānaṃ dassanavasena. Channaṃ phassāyatanānantiādayo phassāyatanānaṃ uppattiñca atthaṅgamañca assādañca upaddavañca nissaraṇañca dassanavasena. Pañcannaṃ upādānakkhandhānaṃ pañcavīsatividhena udayañca vayañca, tesu chandarāgavasena assādañca, tesaṃ vipariṇāmaṃ ādīnavañca, nissaraṇasaṅkhātaṃ nibbānañca. Catunnaṃ mahābhūtānaṃ avijjādisamudayañca, avijjādinirodhe atthaṅgamañca evamādidassanavasena vuttā. Ete dhammā tattha tattha vuttanayena veditabbā.

    ཨམཏོགདྷནྟི ནཏྠི ཨེཏསྶ མརཎསངྑཱཏཾ མཏནྟི ཨམཏཾ། ཀིལེསཝིསཔཊིཔཀྑཏྟཱ ཨགདནྟིཔི ཨམཏཾ། ཏསྨིཾ ནིནྣཏཱཡ ཨམཏོགདྷཾ། ཨམཏཔརཱཡནནྟི ཝུཏྟཔྤཀཱརཾ ཨམཏཾ པརཾ ཨཡནཾ གཏི པཏིཊྛཱ ཨསྶཱཏི ཨམཏཔརཱཡནཾ། ཨམཏཔརིཡོསཱནནྟི ཏཾ ཨམཏཾ སཾསཱརསྶ ནིཊྛཱབྷཱུཏཏྟཱ པརིཡོསཱནམསྶཱཏི ཨམཏཔརིཡོསཱནཾ།

    Amatogadhanti natthi etassa maraṇasaṅkhātaṃ matanti amataṃ. Kilesavisapaṭipakkhattā agadantipi amataṃ. Tasmiṃ ninnatāya amatogadhaṃ. Amataparāyananti vuttappakāraṃ amataṃ paraṃ ayanaṃ gati patiṭṭhā assāti amataparāyanaṃ. Amatapariyosānanti taṃ amataṃ saṃsārassa niṭṭhābhūtattā pariyosānamassāti amatapariyosānaṃ.

    ༨༩. ལཱབྷཀམྱཱ ན སིཀྑཏཱིཏི ལཱབྷཔཏྠནཱཡ སུཏྟནྟཱདཱིནི ན སིཀྑཏི། ཨཝིརུདྡྷོ ཙ ཏཎྷཱཡ, རསེསུ ནཱནུགིཛ྄ཛྷཏཱིཏི ཝིརོདྷཱབྷཱཝེན ཙ ཨཝིརུདྡྷོ ཧུཏྭཱ ཏཎྷཱཡ མཱུལརསཱདཱིསུ གེདྷཾ ནཱཔཛྫཏི།

    89.Lābhakamyā na sikkhatīti lābhapatthanāya suttantādīni na sikkhati. Aviruddho ca taṇhāya, rasesu nānugijjhatīti virodhābhāvena ca aviruddho hutvā taṇhāya mūlarasādīsu gedhaṃ nāpajjati.

    ཀེན ནུ ཁོཏི ལཱབྷཔཏྠནཱཡ ཀཱརཎཙིནྟེན པིཧསྶ པརིཡེསནེ ནིཔཱཏོ། ལཱབྷཱབྷིནིབྦཏྟིཡཱཏི ཙཏུནྣཾ པཙྩཡཱནཾ ཝིསེསེན ཨུཔྤཏྟིཡཱ། ལཱབྷཾ པརིཔཱཙེནྟོཏི པཙྩཡེ པརིཔཱཙཡནྟོ།

    Kena nu khoti lābhapatthanāya kāraṇacintena pihassa pariyesane nipāto. Lābhābhinibbattiyāti catunnaṃ paccayānaṃ visesena uppattiyā. Lābhaṃ paripācentoti paccaye paripācayanto.

    ཨཏྟདམཏྠཱཡཱཏི ཝིཔསྶནཱསམྤཡུཏྟཱཡ པཉྙཱཡ ཨཏྟནོ དམནཏྠཱཡ། ཨཏྟསམཏྠཱཡཱཏི སམཱདྷིསམྤཡུཏྟཱཡ པཉྙཱཡ ཨཏྟནོ སམཱདྷཱནཏྠཱཡ། ཨཏྟཔརིནིབྦཱཔནཏྠཱཡཱཏི དུཝིདྷེནཱཔི ཉཱཎེན ཨཏྟནོ ཨནུཔཱདཱཔརིནིབྦཱནཏྠཱཡ། ཝུཏྟཉྷེཏཾ ‘‘ཨནུཔཱདཱཔརིནིབྦཱནཏྠཾ ཁོ ཨཱཝུསོ བྷགཝཏི བྲཧྨཙརིཡཾ ཝུསྶཏཱི’’ཏི (མ॰ ནི॰ ༡.༢༥༩)། ཨཔྤིཙྪཉྙེཝ ནིསྶཱཡཱཏི ཨེཏྠ པཙྩཡཨཔྤིཙྪོ ཨདྷིགམཨཔྤིཙྪོ པརིཡཏྟིཨཔྤིཙྪོ དྷུཏངྒཨཔྤིཙྪོཏི ཙཏྟཱརོ ཨཔྤིཙྪཱ, ཏེསཾ ནཱནཏྠཾ ཧེཊྛཱ ཝིཏྠཱརིཏཾ ཨེཝ, ཏཾ ཨཔྤིཙྪཾ ཨལླཱིཡིཏྭཱ། སནྟུཊྛིཉྙེཝཱཏི ཙཏཱུསུ པཙྩཡེསུ ཙ ཏིཝིདྷཾ སནྟོསཾ ཨལླཱིཡིཏྭཱ, ཨེཏེསཾ ཝིབྷཱགོ ཧེཊྛཱ ཝིཏྠཱརིཏོཡེཝ། སལླེཁཉྙེཝཱཏི ཀིལེསལེཁནཾ། ཨིདམཏྠིཏཉྙེཝཱཏི ཨིམེཧི ཀུསལདྷམྨེཧི ཨཏྠི ཨིདམཏྠི, ཏསྶ བྷཱཝོ ཨིདམཏྠིཏཱ, ཏཾ ཨིདམཏྠིཏཾཡེཝ ནིསྶཱཡ ཨལླཱིཡིཏྭཱ།

    Attadamatthāyāti vipassanāsampayuttāya paññāya attano damanatthāya. Attasamatthāyāti samādhisampayuttāya paññāya attano samādhānatthāya. Attaparinibbāpanatthāyāti duvidhenāpi ñāṇena attano anupādāparinibbānatthāya. Vuttañhetaṃ ‘‘anupādāparinibbānatthaṃ kho āvuso bhagavati brahmacariyaṃ vussatī’’ti (ma. ni. 1.259). Appicchaññeva nissāyāti ettha paccayaappiccho adhigamaappiccho pariyattiappiccho dhutaṅgaappicchoti cattāro appicchā, tesaṃ nānatthaṃ heṭṭhā vitthāritaṃ eva, taṃ appicchaṃ allīyitvā. Santuṭṭhiññevāti catūsu paccayesu ca tividhaṃ santosaṃ allīyitvā, etesaṃ vibhāgo heṭṭhā vitthāritoyeva. Sallekhaññevāti kilesalekhanaṃ. Idamatthitaññevāti imehi kusaladhammehi atthi idamatthi, tassa bhāvo idamatthitā, taṃ idamatthitaṃyeva nissāya allīyitvā.

    རསོཏི ནིདྡེསསྶ ཨུདྡེསཔདཾ། མཱུལརསོཏི ཡཾཀིཉྩི མཱུལཾ པཊིཙྩ ནིབྦཏྟརསོ། ཁནྡྷརསཱདཱིསུཔི ཨེསེཝ ནཡོ། ཨམྦིལནྟི ཏཀྐམྦིལཱདི། མདྷུརནྟི ཨེཀནྟཏོ གོསཔྤིཨཱདི། མདྷུ པན ཀསཱཝཡུཏྟཾ ཙིརནིཀྑིཏྟཾ ཀསཱཝཾ ཧོཏི, ཕཱཎིཏཾ ཁཱརིཡུཏྟཾ ཙིརནིཀྑིཏྟཾ ཁཱརིཡཾ ཧོཏི། སཔྤི པན ཙིརནིཀྑིཏྟཾ ཝཎྞགནྡྷེ ཛཧནྟམྤི རསཾ ན ཛཧཏཱིཏི ཏདེཝ ཨེཀནྟམདྷུརཾ། ཏིཏྟཀནྟི ནིམྦཔཎྞཱདི། ཀཊུཀནྟི སིངྒིཝེརམརིཙཱདི། ལོཎིཀནྟི སཱམུདྡིཀལོཎཱདི། ཁཱརིཀནྟི ཝཱཏིངྒཎཀལཱི༹རཱདི། ལམྦིཀནྟི བདརཱམལཀཀཔིཊྛསཱལཝཱདི། ཀསཱཝནྟི ཧརཱིཏཀཱདི། ཨིམེ སབྦེཔི རསཱ ཝཏྠུཝསེན ཝུཏྟཱ། ཏཾཏཾཝཏྠུཀོ པནེཏྠ རསོ ཙ ཨམྦིལཱདཱིནི ནཱམེཧི ཝུཏྟོཏི ཝེདིཏབྦོ། སཱདཱུཏི ཨིཊྛརསོ། ཨསཱདཱུཏི ཨནིཊྛརསོ། ཨིམིནཱ པདདྭཡེན སབྦོཔི རསོ པརིཡཱདིནྣོ། སཱིཏནྟི སཱིཏརསོ། ཨུཎྷནྟི ཨུཎྷརསོ། ཨེཝམཡཾ མཱུལརསཱདིནཱ བྷེདེན བྷིནྣོཔི རསོ ལཀྑཎཱདཱིཧི ཨབྷིནྣོཡེཝ། སབྦོཔི ཧེས ཛིཝ྄ཧཱཔཊིཧནནལཀྑཎོ, ཛིཝ྄ཧཱཝིཉྙཱཎསྶ ཝིསཡབྷཱཝརསོ, ཏསྶེཝ གོཙརཔཙྩུཔཊྛཱནོ། ཏེ ཛིཝ྄ཧགྒེན རསགྒཱནཱིཏི ཨེཏེ སམཎབྲཱཧྨཎཱ པསཱདཛིཝ྄ཧགྒེན ཨུཏྟམརསཱནི། པརིཡེསནྟཱཏི གཝེསམཱནཱ། ཨཱཧིཎྜནྟཱིཏི ཏཏྠ ཏཏྠ ཝིཙརནྟི། ཏེ ཨམྦིལཾ ལབྷིཏྭཱ ཨནམྦིལཾ པརིཡེསནྟཱིཏི ཏཀྐཱདིཨམྦིལཾ ལདྡྷཱ ཨནམྦིལཾ གཝེསནྟི། ཨེཝཾ སབྦཾ པརིཝཏྟེཏྭཱ པརིཝཏྟེཏྭཱ ཡོཛིཏཾ།

    Rasoti niddesassa uddesapadaṃ. Mūlarasoti yaṃkiñci mūlaṃ paṭicca nibbattaraso. Khandharasādīsupi eseva nayo. Ambilanti takkambilādi. Madhuranti ekantato gosappiādi. Madhu pana kasāvayuttaṃ ciranikkhittaṃ kasāvaṃ hoti, phāṇitaṃ khāriyuttaṃ ciranikkhittaṃ khāriyaṃ hoti. Sappi pana ciranikkhittaṃ vaṇṇagandhe jahantampi rasaṃ na jahatīti tadeva ekantamadhuraṃ. Tittakanti nimbapaṇṇādi. Kaṭukanti siṅgiveramaricādi. Loṇikanti sāmuddikaloṇādi. Khārikanti vātiṅgaṇakaḷīrādi. Lambikanti badarāmalakakapiṭṭhasālavādi. Kasāvanti harītakādi. Ime sabbepi rasā vatthuvasena vuttā. Taṃtaṃvatthuko panettha raso ca ambilādīni nāmehi vuttoti veditabbo. Sādūti iṭṭharaso. Asādūti aniṭṭharaso. Iminā padadvayena sabbopi raso pariyādinno. Sītanti sītaraso. Uṇhanti uṇharaso. Evamayaṃ mūlarasādinā bhedena bhinnopi raso lakkhaṇādīhi abhinnoyeva. Sabbopi hesa jivhāpaṭihananalakkhaṇo, jivhāviññāṇassa visayabhāvaraso, tasseva gocarapaccupaṭṭhāno. Te jivhaggena rasaggānīti ete samaṇabrāhmaṇā pasādajivhaggena uttamarasāni. Pariyesantāti gavesamānā. Āhiṇḍantīti tattha tattha vicaranti. Te ambilaṃ labhitvā anambilaṃ pariyesantīti takkādiambilaṃ laddhā anambilaṃ gavesanti. Evaṃ sabbaṃ parivattetvā parivattetvā yojitaṃ.

    པཊིསངྑཱ ཡོནིསོ ཨཱཧཱརཾ ཨཱཧཱརེཏཱིཏི པཊིསངྑཱནཔཉྙཱཡ ཛཱནིཏྭཱ ཨུཔཱཡེན ཨཱཧཱརཾ ཨཱཧཱརེཏི། ཨིདཱནི ཨུཔཱཡཾ དསྶེཏུཾ ‘‘ནེཝ དཝཱཡཱ’’ཏིཨཱདི ཝུཏྟཾ།

    Paṭisaṅkhā yoniso āhāraṃ āhāretīti paṭisaṅkhānapaññāya jānitvā upāyena āhāraṃ āhāreti. Idāni upāyaṃ dassetuṃ ‘‘neva davāyā’’tiādi vuttaṃ.

    ཏཏྠ ནེཝ དཝཱཡཱཏི དཝཏྠཱཡ ན ཨཱཧཱརེཏི། ཏཏྠ ནཊལངྒྷཀཱདཡོ དཝཏྠཱཡ ཨཱཧཱརེནྟི ནཱམ། ཡཉྷི བྷོཛནཾ བྷུཏྟསྶ ནཙྩགཱིཏཀབྦསིལོཀསངྑཱཏོ དཝོ ཨཏིརེཀཏརེན པཊིབྷཱཏི, ཏཾ བྷོཛནཾ ཨདྷམྨེན ཝིསམེན པརིཡེསིཏྭཱ ཏེ ཨཱཧཱརེནྟི། ཨཡཾ པན བྷིཀྑུ ན ཨེཝམཱཧཱརེཏི།

    Tattha neva davāyāti davatthāya na āhāreti. Tattha naṭalaṅghakādayo davatthāya āhārenti nāma. Yañhi bhojanaṃ bhuttassa naccagītakabbasilokasaṅkhāto davo atirekatarena paṭibhāti, taṃ bhojanaṃ adhammena visamena pariyesitvā te āhārenti. Ayaṃ pana bhikkhu na evamāhāreti.

    ན མདཱཡཱཏི མཱནམདཔུརིསམདཱནཾ ཝཌྜྷནཏྠཱཡ ན ཨཱཧཱརེཏི། ཏཏྠ རཱཛརཱཛམཧཱམཏྟཱ མདཏྠཱཡ ཨཱཧཱརེནྟི ནཱམ། ཏེ ཧི ཨཏྟནོ མཱནམདཔུརིསམདཱནཾ ཝཌྜྷནཏྠཱཡ པིཎྜརསབྷོཛནཱདཱིནི པཎཱིཏབྷོཛནཱནི བྷུཉྫནྟི། ཨཡཾ པན བྷིཀྑུ ཨེཝཾ ནཱཧཱརེཏི།

    Namadāyāti mānamadapurisamadānaṃ vaḍḍhanatthāya na āhāreti. Tattha rājarājamahāmattā madatthāya āhārenti nāma. Te hi attano mānamadapurisamadānaṃ vaḍḍhanatthāya piṇḍarasabhojanādīni paṇītabhojanāni bhuñjanti. Ayaṃ pana bhikkhu evaṃ nāhāreti.

    ན མཎྜནཱཡཱཏི སརཱིརམཎྜནཏྠཱཡ ན ཨཱཧཱརེཏི། ཏཏྠ རཱུཔཱུཔཛཱིཝིནིཡོ མཱཏུགཱམཱ ཨནྟེཔུརིཀཱདཡོ ཙ སཔྤིཕཱཎིཏཱདཱིནི པིཝནྟི, སིནིདྡྷམུདུམདྡཝབྷོཛནཾ ཨཱཧཱརེནྟི། ཨེཝཾ ནོ ཨངྒལཊྛི སུསཎྛིཏཱ བྷཝིསྶཏི, སརཱིརེ ཚཝིཝཎྞོ པསནྣོ བྷཝིསྶཏཱིཏི། ཨཡཾ པན བྷིཀྑུ ཨེཝཾ ན ཨཱཧཱརེཏི།

    Namaṇḍanāyāti sarīramaṇḍanatthāya na āhāreti. Tattha rūpūpajīviniyo mātugāmā antepurikādayo ca sappiphāṇitādīni pivanti, siniddhamudumaddavabhojanaṃ āhārenti. Evaṃ no aṅgalaṭṭhi susaṇṭhitā bhavissati, sarīre chavivaṇṇo pasanno bhavissatīti. Ayaṃ pana bhikkhu evaṃ na āhāreti.

    ན ཝིབྷཱུསནཱཡཱཏི སརཱིརེ མཾསཝིབྷཱུསནཏྠཱཡ ན ཨཱཧཱརེཏི། ཏཏྠ ནིབྦུདྡྷམལླམུཊྛིཀམལླཙེཊཀཱདཡོ སུསིནིདྡྷེཧི མཙྪམཾསཱདཱིཧི སརཱིརཾ པཱིཎེནྟི ‘‘ཨེཝཾ ནོ མཾསཾ ཨུསྶདཾ བྷཝིསྶཏི པཧཱརསཧནཏྠཱཡཱ’’ཏི། ཨཡཾ པན བྷིཀྑུ ཨེཝཾ སརཱིརེ མཾསཝིབྷཱུསནཏྠཱཡ ན ཨཱཧཱརེཏི།

    Na vibhūsanāyāti sarīre maṃsavibhūsanatthāya na āhāreti. Tattha nibbuddhamallamuṭṭhikamallaceṭakādayo susiniddhehi macchamaṃsādīhi sarīraṃ pīṇenti ‘‘evaṃ no maṃsaṃ ussadaṃ bhavissati pahārasahanatthāyā’’ti. Ayaṃ pana bhikkhu evaṃ sarīre maṃsavibhūsanatthāya na āhāreti.

    ཡཱཝདེཝཱཏི ཨཱཧཱརཱཧརཎཔཡོཛནསྶ པརིཙྪེདནིཡམདསྶནཾ། ཨིམསྶ ཀཱཡསྶ ཋིཏིཡཱཏི ཨིམསྶ ཙཏུམཧཱབྷཱུཏིཀསྶ ཀརཛཀཱཡསྶ ཋཔནཏྠཱཡ ཨཱཧཱརེཏི, ཨིདམསྶ ཨཱཧཱརཱཧརཎེ པཡོཛནནྟི ཨཏྠོ། ཡཱཔནཱཡཱཏི ཛཱིཝིཏིནྡྲིཡཡཱཔནཏྠཱཡ ཨཱཧཱརེཏི། ཝིཧིཾསཱུཔརཏིཡཱཏི ཝིཧིཾསཱ ནཱམ ཨབྷུཏྟཔཙྩཡཱ ཨུཔྤཛྫནཀཁུདྡཱ, ཏསྶཱ ཨུཔརཏིཡཱ ཝཱུཔསམནཏྠཱཡ ཨཱཧཱརེཏི། བྲཧྨཙརིཡཱནུགྒཧཱཡཱཏི བྲཧྨཙརིཡཾ ནཱམ ཏིསྶོ སིཀྑཱ སཀལསཱསནཾ, ཏསྶ ཨནུགྒཎྷཏྠཱཡ ཨཱཧཱརེཏི།

    Yāvadevāti āhārāharaṇapayojanassa paricchedaniyamadassanaṃ. Imassa kāyassa ṭhitiyāti imassa catumahābhūtikassa karajakāyassa ṭhapanatthāya āhāreti, idamassa āhārāharaṇe payojananti attho. Yāpanāyāti jīvitindriyayāpanatthāya āhāreti. Vihiṃsūparatiyāti vihiṃsā nāma abhuttapaccayā uppajjanakakhuddā, tassā uparatiyā vūpasamanatthāya āhāreti. Brahmacariyānuggahāyāti brahmacariyaṃ nāma tisso sikkhā sakalasāsanaṃ, tassa anuggaṇhatthāya āhāreti.

    ཨིཏཱིཏི ཨུཔཱཡནིདསྶནཾ, ཨིམིནཱ ཨུཔཱཡེནཱཏི ཨཏྠོ། པུརཱཎཉྩ ཝེདནཾ པཊིཧངྑཱམཱིཏི པུརཱཎཝེདནཾ ནཱམ ཨབྷུཏྟཔཙྩཡཱ ཨུཔྤཛྫནཀཝེདནཱ, ཏཾ པཊིཧནིསྶཱམཱིཏི ཨཱཧཱརེཏི། ནཝཉྩ ཝེདནཾ ན ཨུཔྤཱདེསྶཱམཱིཏི ནཝཝེདནཱ ནཱམ ཨཏིབྷུཏྟཔཙྩཡེན ཨུཔྤཛྫནཀཝེདནཱ, ན ཏཾ ཨུཔྤཱདེསྶཱམཱིཏི ཨཱཧཱརེཏི། ཨཐ ཝཱ ནཝཝེདནཱ ནཱམ བྷུཏྟཔཙྩཡཱ ན ཨུཔྤཛྫནཀཝེདནཱ, ཏསྶཱ ཨནུཔྤནྣཱཡ ཨནུཔྤཛྫནཏྠམེཝ ཨཱཧཱརེཏི།

    Itīti upāyanidassanaṃ, iminā upāyenāti attho. Purāṇañca vedanaṃ paṭihaṅkhāmīti purāṇavedanaṃ nāma abhuttapaccayā uppajjanakavedanā, taṃ paṭihanissāmīti āhāreti. Navañca vedanaṃ na uppādessāmīti navavedanā nāma atibhuttapaccayena uppajjanakavedanā, na taṃ uppādessāmīti āhāreti. Atha vā navavedanā nāma bhuttapaccayā na uppajjanakavedanā, tassā anuppannāya anuppajjanatthameva āhāreti.

    ཡཱཏྲཱ ཙ མེ བྷཝིསྶཏཱིཏི ཡཱཔནཱ ཙ མེ བྷཝིསྶཏི། ཨནཝཛྫཏཱ ཙཱཏི ཨེཏྠ ཨཏྠི སཱཝཛྫཾ, ཨཏྠི ཨནཝཛྫཾ། ཏཏྠ ཨདྷམྨིཀཔརིཡེསནཱ ཨདྷམྨིཀཔཊིགྒཧཎཾ ཨདྷམྨེན པརིབྷོགོཏི ཨིདཾ སཱཝཛྫཾ ནཱམ། དྷམྨེན པན པརིཡེསིཏྭཱ དྷམྨེན པཊིགྒཧེཏྭཱ པཙྩཝེཀྑིཏྭཱ པརིབྷུཉྫནཾ ཨནཝཛྫཾ ནཱམ། ཨེཀཙྩོ ཨནཝཛྫེཡེཝ སཱཝཛྫཾ ཀརོཏི, ‘‘ལདྡྷཾ མེ’’ཏི ཀཏྭཱ པམཱཎཱཏིཀྐནྟཾ བྷུཉྫཏི, ཏཾ ཛཱིརཱཔེཏུཾ ཨསཀྐོནྟོ ཨུདྡྷཾཝིརེཙནཨདྷོཝིརེཙནཱདཱིཧི ཀིལམཏི, སཀལཝིཧཱརེ བྷིཀྑཱུ ཏསྶ སརཱིརཔཊིཛགྒནབྷེསཛྫཔརིཡེསནཱདཱིསུ ཨུསྶུཀྐཾ ཨཱཔཛྫནྟི, ‘‘ཀིཾ ཨིད’’ནྟི ཝུཏྟེ ‘‘ཨསུཀསྶ ནཱམ ཨུདརཾ ཨུདྡྷུམཱཏ’’ནྟིཨཱདིཾ ཝདནྟི། ‘‘ཨེས ནིཙྩཀཱལམྤི ཨེཝཾ པཀཏིཀོཡེཝ, ཨཏྟནོ ཀུཙྪིཔྤམཱཎཾ ནཱམ ན ཛཱནཱཏཱི’’ཏི ནིནྡནྟི གརཧནྟི། ཨཡཾ ཨནཝཛྫེཡེཝ སཱཝཛྫཾ ཀརོཏི ནཱམ། ཨེཝཾ ཨཀཏྭཱ ‘‘ཨནཝཛྫཏཱ ཙ མེ བྷཝིསྶཏཱི’’ཏི ཨཱཧཱརེཏི།

    Yātrā ca me bhavissatīti yāpanā ca me bhavissati. Anavajjatā cāti ettha atthi sāvajjaṃ, atthi anavajjaṃ. Tattha adhammikapariyesanā adhammikapaṭiggahaṇaṃ adhammena paribhogoti idaṃ sāvajjaṃ nāma. Dhammena pana pariyesitvā dhammena paṭiggahetvā paccavekkhitvā paribhuñjanaṃ anavajjaṃ nāma. Ekacco anavajjeyeva sāvajjaṃ karoti, ‘‘laddhaṃ me’’ti katvā pamāṇātikkantaṃ bhuñjati, taṃ jīrāpetuṃ asakkonto uddhaṃvirecanaadhovirecanādīhi kilamati, sakalavihāre bhikkhū tassa sarīrapaṭijagganabhesajjapariyesanādīsu ussukkaṃ āpajjanti, ‘‘kiṃ ida’’nti vutte ‘‘asukassa nāma udaraṃ uddhumāta’’ntiādiṃ vadanti. ‘‘Esa niccakālampi evaṃ pakatikoyeva, attano kucchippamāṇaṃ nāma na jānātī’’ti nindanti garahanti. Ayaṃ anavajjeyeva sāvajjaṃ karoti nāma. Evaṃ akatvā ‘‘anavajjatā ca me bhavissatī’’ti āhāreti.

    ཕཱསུཝིཧཱརོ ཙཱཏི ཨེཏྠཱཔི ཨཏྠི ཕཱསུཝིཧཱརོ, ཨཏྠི ན ཕཱསུཝིཧཱརོ། ཏཏྠ ཨཱཧརཧཏྠཀོ ཨལཾསཱཊཀོ ཏཏྲཝཊྚཀོ ཀཱཀམཱསཀོ བྷུཏྟཝམིཏཀོཏི ཨིམེསཾ པཉྩནྣཾ བྲཱཧྨཎཱནཾ བྷོཛནཾ ན ཕཱསུཝིཧཱརོ ནཱམ། ཨེཏེསུ ཧི ཨཱཧརཧཏྠཀོ ནཱམ བཧུཾ བྷུཉྫིཏྭཱ ཨཏྟནོ དྷམྨཏཱཡ ཨུཊྛཱཏུཾ ཨསཀྐོནྟོ ‘‘ཨཱཧར ཧཏྠ’’ནྟི ཝདཏི། ཨལཾསཱཊཀོ ནཱམ ཨཙྩུདྡྷུམཱཏཀུཙྪིཏཱཡ ཨུཊྛིཏོཔི སཱཊཀཾ ནིཝཱསེཏུཾ ན སཀྐོཏི། ཏཏྲཝཊྚཀོ ནཱམ ཨུཊྛཱཏུཾ ཨསཀྐོནྟོ ཏཏྲེཝ པརིཝཊྚཏི། ཀཱཀམཱསཀོ ནཱམ ཡཐཱ ཀཱཀེཧི ཨཱམསིཏུཾ སཀྐོཏི, ཨེཝཾ ཡཱཝ མུཁདྭཱརཱ ཨཱཧཱརེཏི། བྷུཏྟཝམིཏཀོ ནཱམ མུཁེན སནྡྷཱརེཏུཾ ཨསཀྐོནྟོ ཏཏྠེཝ ཝམཏི། ཨེཝཾ ཨཀཏྭཱ ‘‘ཕཱསུཝིཧཱརོ ཙ མེ བྷཝིསྶཏཱི’’ཏི ཨཱཧཱརེཏི། ཕཱསུཝིཧཱརོ ནཱམ ཙཏཱུཧི པཉྩཧི ཨཱལོཔེཏི ཨཱུནཱུདརཏཱ། ཨེཏྟཀཉྷི བྷུཉྫིཏྭཱ པཱནཱིཡཾ པིཝཏོ ཙཏྟཱརོ ཨིརིཡཱཔཐཱ སུཁེན པཝཏྟནྟི། ཏསྨཱ དྷམྨསེནཱཔཏི ཨེཝམཱཧ –

    Phāsuvihāro cāti etthāpi atthi phāsuvihāro, atthi na phāsuvihāro. Tattha āharahatthako alaṃsāṭako tatravaṭṭako kākamāsako bhuttavamitakoti imesaṃ pañcannaṃ brāhmaṇānaṃ bhojanaṃ na phāsuvihāro nāma. Etesu hi āharahatthako nāma bahuṃ bhuñjitvā attano dhammatāya uṭṭhātuṃ asakkonto ‘‘āhara hattha’’nti vadati. Alaṃsāṭako nāma accuddhumātakucchitāya uṭṭhitopi sāṭakaṃ nivāsetuṃ na sakkoti. Tatravaṭṭako nāma uṭṭhātuṃ asakkonto tatreva parivaṭṭati. Kākamāsako nāma yathā kākehi āmasituṃ sakkoti, evaṃ yāva mukhadvārā āhāreti. Bhuttavamitako nāma mukhena sandhāretuṃ asakkonto tattheva vamati. Evaṃ akatvā ‘‘phāsuvihāro ca me bhavissatī’’ti āhāreti. Phāsuvihāro nāma catūhi pañcahi ālopeti ūnūdaratā. Ettakañhi bhuñjitvā pānīyaṃ pivato cattāro iriyāpathā sukhena pavattanti. Tasmā dhammasenāpati evamāha –

    ‘‘ཙཏྟཱརོ པཉྩ ཨཱལོཔེ, ཨབྷུཏྭཱ ཨུདཀཾ པིཝེ།

    ‘‘Cattāro pañca ālope, abhutvā udakaṃ pive;

    ཨལཾ ཕཱསུཝིཧཱརཱཡ, པཧིཏཏྟསྶ བྷིཀྑུནོ’’ཏི༎ (ཐེརགཱ॰ ༩༨༣; མི॰ པ॰ ༦.༥.༡༠)།

    Alaṃ phāsuvihārāya, pahitattassa bhikkhuno’’ti. (theragā. 983; mi. pa. 6.5.10);

    ཨིམསྨིཾ པན ཋཱནེ ཨངྒཱནི སམོདྷཱནེཏབྦཱནི། ནེཝ དཝཱཡཱཏི ཧི ཨེཀཾ ཨངྒཾ, ན མདཱཡཱཏི ཨེཀཾ, ན མཎྜནཱཡཱཏི ཨེཀཾ, ན ཝིབྷཱུསནཱཡཱཏི ཨེཀཾ, ཡཱཝདེཝ ཨིམསྶ ཀཱཡསྶ ཋིཏིཡཱ ཡཱཔནཱཡཱཏི ཨེཀཾ, ཝིཧིཾསཱུཔརཏིཡཱ བྲཧྨཙརིཡཱནུགྒཧཱཡཱཏི ཨེཀཾ, ཨིཏི པུརཱཎཉྩ ཝེདནཾ པཊིཧངྑཱམི ནཝཉྩ ཝེདནཾ ན ཨུཔྤཱདེསྶཱམཱིཏི ཨེཀཾ, ཡཱཏྲཱ ཙ མེ བྷཝིསྶཏཱིཏི ཨེཀཾ ཨངྒཾ, ཨནཝཛྫཏཱ ཙ ཕཱསུཝིཧཱརོ ཙཱཏི ཨཡམེཏྠ བྷོཛནཱནིསཾསོ།

    Imasmiṃ pana ṭhāne aṅgāni samodhānetabbāni. Neva davāyāti hi ekaṃ aṅgaṃ, na madāyāti ekaṃ, na maṇḍanāyāti ekaṃ, na vibhūsanāyāti ekaṃ, yāvadeva imassa kāyassa ṭhitiyā yāpanāyāti ekaṃ, vihiṃsūparatiyā brahmacariyānuggahāyāti ekaṃ, iti purāṇañca vedanaṃ paṭihaṅkhāmi navañca vedanaṃ na uppādessāmīti ekaṃ, yātrā ca me bhavissatīti ekaṃ aṅgaṃ, anavajjatā ca phāsuvihāro cāti ayamettha bhojanānisaṃso.

    མཧཱསིཝཏྠེརོ པནཱཧ – ‘‘ཧེཊྛཱ ཙཏྟཱརི ཨངྒཱནི པཊིཀྑེཔོ ནཱམ, ཨུཔརི པན ཨཊྛངྒཱནི སམོདྷཱནེཏབྦཱནཱི’’ཏི། ཏཏྠ ཡཱཝདེཝ ཨིམསྶ ཀཱཡསྶ ཋིཏིཡཱཏི ཨེཀཾ ཨངྒཾ, ཡཱཔནཱཡཱཏི ཨེཀཾ, ཝིཧིཾསཱུཔརཏིཡཱཏི ཨེཀཾ, བྲཧྨཙརིཡཱནུགྒཧཱཡཱཏི ཨེཀཾ, ཨིཏི པུརཱཎཉྩ ཝེདནཾ པཊིཧངྑཱམཱིཏི ཨེཀཾ, ནཝཉྩ ཝེདནཾ ན ཨུཔྤཱདེསྶཱམཱིཏི ཨེཀཾ, ཡཱཏྲཱ ཙ མེ བྷཝིསྶཏཱིཏི ཨེཀཾ, ཨནཝཛྫཏཱ ཙཱཏི ཨེཀཾ, ཕཱསུཝིཧཱརོ པན བྷོཛནཱནིསཾསོཏི། ཨེཝཾ ཨཊྛངྒསམནྣཱགཏཾ ཨཱཧཱརཾ ཨཱཧཱརེཏི།

    Mahāsivatthero panāha – ‘‘heṭṭhā cattāri aṅgāni paṭikkhepo nāma, upari pana aṭṭhaṅgāni samodhānetabbānī’’ti. Tattha yāvadeva imassa kāyassa ṭhitiyāti ekaṃ aṅgaṃ, yāpanāyāti ekaṃ, vihiṃsūparatiyāti ekaṃ, brahmacariyānuggahāyāti ekaṃ, iti purāṇañca vedanaṃ paṭihaṅkhāmīti ekaṃ, navañca vedanaṃ na uppādessāmīti ekaṃ, yātrā ca me bhavissatīti ekaṃ, anavajjatā cāti ekaṃ, phāsuvihāro pana bhojanānisaṃsoti. Evaṃ aṭṭhaṅgasamannāgataṃ āhāraṃ āhāreti.

    ༩༠. ཨུཔེཀྑཀོཏི ཚལ༹ངྒུཔེཀྑཱཡ སམནྣཱགཏོ། སཏོཏི ཀཱཡཱནུཔསྶནཱདིསཏིཡུཏྟོ།

    90.Upekkhakoti chaḷaṅgupekkhāya samannāgato. Satoti kāyānupassanādisatiyutto.

    ཨུཔེཀྑཀོཏི ཚལ༹ངྒུཔེཀྑཱཡ སམནྣཱགཏོཏི ཨེཏྠ ཚལ༹ངྒུཔེཀྑཱདྷམྨོ ནཱམ ཀོཏི? ཉཱཎཱདཡོ། ‘‘ཉཱཎ’’ནྟི ཝུཏྟེ ཀིརིཡཏོ ཙཏྟཱརི ཉཱཎསམྤཡུཏྟཱནི ལབྦྷནྟི, ‘‘སཏཏཝིཧཱརོ’’ཏི ཝུཏྟེ ཨཊྛ མཧཱཙིཏྟཱནི ལབྦྷནྟི, ‘‘རཛྫནདུསྶནཾ ནཏྠཱི’’ཏི ཝུཏྟེ དས ཙིཏྟཱནི ལབྦྷནྟི། སོམནསྶཾ ཨཱསེཝནཝསེན ལབྦྷཏི། ཙཀྑུནཱ རཱུཔཾ དིསྭཱཏི ཀཱརཎཝསེན ཙཀྑཱུཏི ལདྡྷཝོཧཱརེན རཱུཔདསྶནསམཏྠེན ཙཀྑུཝིཉྙཱཎེན རཱུཔཾ དིསྭཱ། པོརཱཎཱ པནཱཧུ – ཙཀྑུ རཱུཔཾ ན པསྶཏི ཨཙིཏྟཀཏྟཱ, ཙིཏྟམྤི ན པསྶཏི ཨཙཀྑུཀཏྟཱ། དྭཱརཱརམྨཎསངྒྷཊྚནེན པན པསཱདཝཏྠུཀེན ཙིཏྟེན པསྶཏི། ཨཱིདིསེསུ པན ཋཱནེསུ ‘‘དྷནུནཱ ཝིཛ྄ཛྷཏཱི’’ཏིཨཱདཱིསུ ཝིཡ སསམྦྷཱརཀཐཱ ནཱམ ཧོཏི། ཏསྨཱ ཙཀྑུཝིཉྙཱཎེན རཱུཔཾ དིསྭཱཏི ཨཡམེཝེཏྠ ཨཏྠོ།

    Upekkhakoti chaḷaṅgupekkhāya samannāgatoti ettha chaḷaṅgupekkhādhammo nāma koti? Ñāṇādayo. ‘‘Ñāṇa’’nti vutte kiriyato cattāri ñāṇasampayuttāni labbhanti, ‘‘satatavihāro’’ti vutte aṭṭha mahācittāni labbhanti, ‘‘rajjanadussanaṃ natthī’’ti vutte dasa cittāni labbhanti. Somanassaṃ āsevanavasena labbhati. Cakkhunā rūpaṃ disvāti kāraṇavasena cakkhūti laddhavohārena rūpadassanasamatthena cakkhuviññāṇena rūpaṃ disvā. Porāṇā panāhu – cakkhu rūpaṃ na passati acittakattā, cittampi na passati acakkhukattā. Dvārārammaṇasaṅghaṭṭanena pana pasādavatthukena cittena passati. Īdisesu pana ṭhānesu ‘‘dhanunā vijjhatī’’tiādīsu viya sasambhārakathā nāma hoti. Tasmā cakkhuviññāṇena rūpaṃ disvāti ayamevettha attho.

    ནེཝ སུམནོ ཧོཏཱིཏི ལོབྷུཔྤཏྟིཝསེན ཚནྡརཱགུཔྤཏྟིཝསེན སོམནསྶོ ན ཧོཏི། ན དུམྨནོཏི པཊིགྷུཔྤཏྟིཝསེན དུཊྛཙིཏྟོ ན ཧོཏི། ཨུཔེཀྑཀོཏི ཨུཔཔཏྟིཏོ ཨིཀྑཀོ ཧོཏི, ཨཔཀྑཔཏིཏོ ཧུཏྭཱ ཨིརིཡཱཔཐཾ པཝཏྟེཏི། སཏོ སམྤཛཱནོཏི སཏིམཱ ཉཱཎསམྤནྣོ། མནཱཔཾ ནཱབྷིགིཛ྄ཛྷཏཱིཏི མནཝཌྜྷནཀཾ ཨིཊྛཱརམྨཎཾ ནཱབྷིགིཛ྄ཛྷཏི ན པཏྠེཏི། ནཱབྷིཧཾསཏཱིཏི ན ཏུསྶཏི། ན རཱགཾ ཛནེཏཱིཏི ཏཏྠ ཏཏྠ རཉྫནཾ ན ཨུཔྤཱདེཏི། ཏསྶ ཋིཏོཝ ཀཱཡོ ཧོཏཱིཏི ཏསྶ ཁཱིཎཱསཝསྶ ཙཀྑཱདིཀཱཡོ ཀམྤཱརཧིཏཏྟཱ ཋིཏོ ནིཙྩལོ ཧོཏི། ཨམནཱཔནྟི ཨནིཊྛཱརམྨཎཾ ། ན མངྐུ ཧོཏཱིཏི དོམནསྶིཏོ ན ཧོཏི། ཨཔྤཏིཊྛིཏཙིཏྟོཏི ཀོདྷཝསེན ཋིཏམནོ ན ཧོཏི། ཨལཱིནམནསོཏི ཨལཱིནཙིཏྟོ། ཨབྱཱཔནྣཙེཏསོཏི བྱཱཔཱདརཧིཏཙིཏྟོ།

    Neva sumano hotīti lobhuppattivasena chandarāguppattivasena somanasso na hoti. Na dummanoti paṭighuppattivasena duṭṭhacitto na hoti. Upekkhakoti upapattito ikkhako hoti, apakkhapatito hutvā iriyāpathaṃ pavatteti. Sato sampajānoti satimā ñāṇasampanno. Manāpaṃ nābhigijjhatīti manavaḍḍhanakaṃ iṭṭhārammaṇaṃ nābhigijjhati na pattheti. Nābhihaṃsatīti na tussati. Na rāgaṃ janetīti tattha tattha rañjanaṃ na uppādeti. Tassaṭhitova kāyo hotīti tassa khīṇāsavassa cakkhādikāyo kampārahitattā ṭhito niccalo hoti. Amanāpanti aniṭṭhārammaṇaṃ . Na maṅku hotīti domanassito na hoti. Appatiṭṭhitacittoti kodhavasena ṭhitamano na hoti. Alīnamanasoti alīnacitto. Abyāpannacetasoti byāpādarahitacitto.

    རཛནཱིཡེ ན རཛྫཏཱིཏི རཛནཱིཡསྨིཾ ཝཏྠུསྨིཾ ན རཱགཾ ཨུཔྤཱདེཏི། དུསྶནཱིཡེ ན དུསྶཏཱིཏི དོསུཔྤཱདེ ཝཏྠུསྨིཾ ན དོསཾ ཨུཔྤཱདེཏི། མོཧནཱིཡེ ན མུཡ྄ཧཏཱིཏི མོཧནཱིཡསྨིཾ ཝཏྠུསྨིཾ ན མོཧཾ ཨུཔྤཱདེཏི། ཀོཔནཱིཡེ ན ཀུཔྤཏཱིཏི ཀོདྷནཱིཡསྨིཾ ཝཏྠུསྨིཾ ན ཙལཏི། མདནཱིཡེ ན མཛྫཏཱིཏི མདནཱིཡསྨིཾ ཝཏྠུསྨིཾ ན སཾསཱིདཏི། ཀིལེསནཱིཡེ ན ཀིལིསྶཏཱིཏི ཨུཔཏཔནཱིཡསྨིཾ ཝཏྠུསྨིཾ ན ཨུཔཏཔྤཏི། དིཊྛེ དིཊྛམཏྟོཏི རཱུཔཱརམྨཎེ ཙཀྑུཝིཉྙཱཎེན དིཊྛེ དིཊྛམཏྟོ། སུཏེ སུཏམཏྟོཏི སདྡཱཡཏནེ སོཏཝིཉྙཱཎེན སུཏེ སུཏམཏྟོ། མུཏེ མུཏམཏྟོཏི གྷཱནཛིཝ྄ཧཱཀཱཡཝིཉྙཱཎེན པཱཔུཎིཏྭཱ གཧིཏེ གཧིཏམཏྟོ། ཝིཉྙཱཏེ ཝིཉྙཱཏམཏྟོཏི མནོཝིཉྙཱཎེན ཉཱཏེ ཉཱཏམཏྟོ། དིཊྛེ ན ལིམྤཏཱིཏི ཙཀྑུཝིཉྙཱཎེན དིཊྛེ རཱུཔཱརམྨཎེ ཏཎྷཱདིཊྛིལེཔེན ན ལིམྤཏི། དིཊྛེ ཨནཱུཔཡོཏི རཱུཔཱརམྨཎེ ནིཏྟཎྷོ ཧོཏི། ཨནཔཱཡོཏི ཨཔདུཊྛཙིཏྟོ།

    Rajanīye na rajjatīti rajanīyasmiṃ vatthusmiṃ na rāgaṃ uppādeti. Dussanīye na dussatīti dosuppāde vatthusmiṃ na dosaṃ uppādeti. Mohanīye na muyhatīti mohanīyasmiṃ vatthusmiṃ na mohaṃ uppādeti. Kopanīye na kuppatīti kodhanīyasmiṃ vatthusmiṃ na calati. Madanīye na majjatīti madanīyasmiṃ vatthusmiṃ na saṃsīdati. Kilesanīye na kilissatīti upatapanīyasmiṃ vatthusmiṃ na upatappati. Diṭṭhe diṭṭhamattoti rūpārammaṇe cakkhuviññāṇena diṭṭhe diṭṭhamatto. Sute sutamattoti saddāyatane sotaviññāṇena sute sutamatto. Mute mutamattoti ghānajivhākāyaviññāṇena pāpuṇitvā gahite gahitamatto. Viññāte viññātamattoti manoviññāṇena ñāte ñātamatto. Diṭṭhe na limpatīti cakkhuviññāṇena diṭṭhe rūpārammaṇe taṇhādiṭṭhilepena na limpati. Diṭṭhe anūpayoti rūpārammaṇe nittaṇho hoti. Anapāyoti apaduṭṭhacitto.

    སཾཝིཛྫཏཱིཏི ལབྦྷཏི། པསྶཏཱིཏི ཨོལོཀེཏི། ཚནྡརཱགོཏི སིནེཧོ། རཱུཔཱརཱམནྟི རཱུཔཾ ཨཱརཱམཾ ཨསྶཱཏི རཱུཔཱརཱམཾ། རཱུཔེ རཏནྟི རཱུཔརཏཾ། རཱུཔེ སནྟུཊྛཱིཏི རཱུཔསམྨུདིཏཾ།

    Saṃvijjatīti labbhati. Passatīti oloketi. Chandarāgoti sineho. Rūpārāmanti rūpaṃ ārāmaṃ assāti rūpārāmaṃ. Rūpe ratanti rūparataṃ. Rūpe santuṭṭhīti rūpasammuditaṃ.

    དནྟཾ ནཡནྟི སམིཏིནྟི ཨུཡྻཱནཀཱིལཱ༹མཎྜལཱདཱིསུ མཧཱཛནམཛ྄ཛྷཾ གཙྪནྟཱ དནྟམེཝ གོཎཛཱཏིཾ ཝཱ ཨསྶཛཱཏིཾ ཝཱ ཡཱནེ ཡོཛེཏྭཱ ནཡནྟི། རཱཛཱཏི ཏཐཱརཱུཔཱནེཝ ཋཱནཱནི གཙྪནྟོ རཱཛཱཔི དནྟམེཝ ཨབྷིརུཧཏི། མནུསྶེསཱུཏི མནུསྶེསུཔི ཙཏཱུཧི ཨརིཡམགྒེཧི དནྟོ ནིབྦིསེཝནོཝ སེཊྛོ། ཡོཏིཝཱཀྱནྟི ཡོ ཨེཝརཱུཔཾ ཨཏིཀྐམཝཙནཾ པུནཔྤུནཾ ཝུཙྩམཱནམྤི ཏིཏིཀྑཏི ན པཊིཔྥནྡཏི ན ཝིཧཉྙཏི, ཨེཝརཱུཔོ དནྟོ སེཊྛོཏི ཨཏྠོ།

    Dantaṃ nayanti samitinti uyyānakīḷāmaṇḍalādīsu mahājanamajjhaṃ gacchantā dantameva goṇajātiṃ vā assajātiṃ vā yāne yojetvā nayanti. Rājāti tathārūpāneva ṭhānāni gacchanto rājāpi dantameva abhiruhati. Manussesūti manussesupi catūhi ariyamaggehi danto nibbisevanova seṭṭho. Yotivākyanti yo evarūpaṃ atikkamavacanaṃ punappunaṃ vuccamānampi titikkhati na paṭipphandati na vihaññati, evarūpo danto seṭṭhoti attho.

    ཨསྶཏརཱཏི ཝལ༹ཝཱཡ གདྲབྷེན ཛཱཏཱ། ཨཱཛཱནཱིཡཱཏི ཡཾ ཨསྶདམྨསཱརཐི ཀཱརཎཾ ཀཱརེཏི, ཏསྶ ཁིཔྤཾ ཛཱནནསམཏྠཱ། སིནྡྷཝཱཏི སིནྡྷཝརཊྛེ ཛཱཏཱ ཨསྶཱ། མཧཱནཱགཱཏི ཀུཉྫརསངྑཱཏཱ མཧཱཧཏྠིནོ། ཨཏྟདནྟོཏི ཨེཏེ ཨསྶཏརཱ ཝཱ ཨཱཛཱནཱིཡཱ ཝཱ སིནྡྷཝཱ ཝཱ ཀུཉྫརཱ ཝཱ ཝརཱ དནྟཱ, ན ཨདནྟཱ། ཡོ པན ཙཏུམགྒསངྑཱཏེན ཨཏྟདནྟེན དནྟཏཱཡ ཨཏྟདནྟོ ནིབྦིསེཝནོ, ཨཡཾ ཏཏོཔི ཝརཾ, སབྦེཧིཔི ཨེཏེཧི ཨུཏྟརིཏརོཏི ཨཏྠོ།

    Assatarāti vaḷavāya gadrabhena jātā. Ājānīyāti yaṃ assadammasārathi kāraṇaṃ kāreti, tassa khippaṃ jānanasamatthā. Sindhavāti sindhavaraṭṭhe jātā assā. Mahānāgāti kuñjarasaṅkhātā mahāhatthino. Attadantoti ete assatarā vā ājānīyā vā sindhavā vā kuñjarā vā varā dantā, na adantā. Yo pana catumaggasaṅkhātena attadantena dantatāya attadanto nibbisevano, ayaṃ tatopi varaṃ, sabbehipi etehi uttaritaroti attho.

    ན ཧི ཨེཏེཧི ཡཱནེཧཱིཏི ཡཱནི ཨེཏཱནི ཧཏྠིཡཱནཱདིཡཱནཱནི, ན ཧི ཨེཏེཧི ཡཱནེཧི ཀོཙི པུགྒལོ སུཔིནནྟེནཔི ཨགཏཔུབྦཏྟཱ ‘‘ཨགཏ’’ནྟི སངྑཱཏཾ ནིབྦཱནདིསཾ, ཏཾ ཋཱནཾ གཙྪེཡྻ། ཡཐཱ པུབྦབྷཱགེ ཨིནྡྲིཡདམེན དནྟེན ཨཔརབྷཱགེ ཨརིཡམགྒབྷཱཝནཱཡ སུདནྟེན དནྟོ ནིབྦིསེཝནོ སཔྤཉྙོ པུགྒལོ ཏཾ ཨགཏཔུབྦཾ དིསཾ གཙྪཏི, དནྟབྷཱུམིཾ པཱཔུཎཱཏི། ཏསྨཱ ཨཏྟདམནམེཝ ཝརནྟི ཨཏྠོ།

    Na hi etehi yānehīti yāni etāni hatthiyānādiyānāni, na hi etehi yānehi koci puggalo supinantenapi agatapubbattā ‘‘agata’’nti saṅkhātaṃ nibbānadisaṃ, taṃ ṭhānaṃ gaccheyya. Yathā pubbabhāge indriyadamena dantena aparabhāge ariyamaggabhāvanāya sudantena danto nibbisevano sappañño puggalo taṃ agatapubbaṃ disaṃ gacchati, dantabhūmiṃ pāpuṇāti. Tasmā attadamanameva varanti attho.

    ཝིདྷཱསུ ན ཝིཀམྤནྟཱིཏི སེཡྻསྶ སེཡྻོཧམསྨཱིཏིཨཱདཱིསུ མཱནཝིདྷཱསུ ན ཙལནྟི ནཔྤཝེདྷནྟི། ཝིཔྤམུཏྟཱ པུནབྦྷཝཱཏི པུནབྦྷཝཔཊིསནྡྷིཡཱ པུནཔྤུནཾ ཨུཔྤཏྟིཏོ སུཊྛུ མུཏྟཱ མུཉྩིཏྭཱ ཋིཏཱ། དནྟབྷཱུམིམནུཔྤཏྟཱཏི ཨེཀནྟདམནཾ ཨརཧཏྟཕལབྷཱུམིཾ པཱཔུཎིཏྭཱ ཋིཏཱ། ཏེ ལོཀེ ཝིཛིཏཱཝིནོཏི ཏེ ཨརཧནྟོ སཏྟལོཀེ ཝིཛིཏཝིཛཡཱ ཝིཛིཏཝནྟོ ནཱམ ཧོནྟི།

    Vidhāsu na vikampantīti seyyassa seyyohamasmītiādīsu mānavidhāsu na calanti nappavedhanti. Vippamuttā punabbhavāti punabbhavapaṭisandhiyā punappunaṃ uppattito suṭṭhu muttā muñcitvā ṭhitā. Dantabhūmimanuppattāti ekantadamanaṃ arahattaphalabhūmiṃ pāpuṇitvā ṭhitā. Te loke vijitāvinoti te arahanto sattaloke vijitavijayā vijitavanto nāma honti.

    ཡསྨཱ ཙ བྷཱཝིཏིནྡྲིཡོ ནིབྦྷཡོ ནིབྦིཀཱརོ དནྟོ ཧོཏི, ཏསྨཱ ཏམཏྠཾ དསྶེནྟོ ‘‘ཡསྶིནྡྲིཡཱནཱི’’ཏི གཱཐམཱཧ། ཏསྶཏྠོ – ཡསྶ ཙཀྑཱདཱིནི ཚལི༹ནྡྲིཡཱནི གོཙརབྷཱཝནཱཡ ཨནིཙྩཱདིཏིལཀྑཎཾ ཨཱརོཔེཏྭཱ ཝཱསནཱབྷཱཝནཱཡ སཏིསམྤཛཉྙགནྡྷཾ གཱཧཱཔེཏྭཱ བྷཱཝིཏཱནི, ཏཱནི ཙ ཁོ ཨཛ྄ཛྷཏྟགོཙརབྷཱཝནཱཡ, ཨེཝཾ པན བཧིདྡྷཱ ཙ སབྦལོཀེཏི ཡཏྠ ཡཏྠ ཨིནྡྲིཡཱནཾ ཝེཀལླཏཱ ཝེཀལླཏོ ཝཱ སམྦྷཝོ, ཏཏྠ ནཱབྷིཛ྄ཛྷཱདིཝསེན བྷཱཝིཏཱནཱིཏི ཨེཝཾ ནིབྦིཛ྄ཛྷ ཉཏྭཱ པཊིཝིཛ྄ཛྷིཏྭཱ ཨིམཾ པརཉྩ ལོཀཾ སཀསནྟཏིཁནྡྷལོཀཾ པརསནྟཏིཁནྡྷལོཀཉྩ དནྟམརཎཾ མརིཏུཀཱམོ ཀཱལཾ ཀངྑཏི, ཛཱིཝིཏཀྑཡཀཱལཾ ཨཱགམེཏི པཏིམཱནེཏི, ན བྷཱཡཏི མརཎསྶ། ཡཐཱཧ –

    Yasmā ca bhāvitindriyo nibbhayo nibbikāro danto hoti, tasmā tamatthaṃ dassento ‘‘yassindriyānī’’ti gāthamāha. Tassattho – yassa cakkhādīni chaḷindriyāni gocarabhāvanāya aniccāditilakkhaṇaṃ āropetvā vāsanābhāvanāya satisampajaññagandhaṃ gāhāpetvā bhāvitāni, tāni ca kho ajjhattagocarabhāvanāya, evaṃ pana bahiddhā ca sabbaloketi yattha yattha indriyānaṃ vekallatā vekallato vā sambhavo, tattha nābhijjhādivasena bhāvitānīti evaṃ nibbijjha ñatvā paṭivijjhitvā imaṃ parañca lokaṃ sakasantatikhandhalokaṃ parasantatikhandhalokañca dantamaraṇaṃ maritukāmo kālaṃ kaṅkhati, jīvitakkhayakālaṃ āgameti patimāneti, na bhāyati maraṇassa. Yathāha –

    ‘‘མརཎེ མེ བྷཡཾ ནཏྠི, ནིཀནྟི ནཏྠཱི ཛཱིཝིཏེ’’༎ (ཐེརགཱ॰ ༢༠)།

    ‘‘Maraṇe me bhayaṃ natthi, nikanti natthī jīvite’’. (theragā. 20);

    ‘‘ནཱབྷིཀངྑཱམི མརཎཾ, ནཱབྷིཀངྑཱམི ཛཱིཝིཏཾ།

    ‘‘Nābhikaṅkhāmi maraṇaṃ, nābhikaṅkhāmi jīvitaṃ;

    ཀཱལཉྩ པཏིམཱནེམི, ནིབྦིསཾ བྷཏཀོ ཡཐཱ’’ཏི༎ (ཐེརགཱ॰ ༦༠༦, ༦༥༤, ༡༠༠༢; མི॰ པ॰ ༢.༢.༤ ཐོཀཾ ཝིསདིསཾ)།

    Kālañca patimānemi, nibbisaṃ bhatako yathā’’ti. (theragā. 606, 654, 1002; mi. pa. 2.2.4 thokaṃ visadisaṃ);

    བྷཱཝིཏོ ས དནྟོཏི ཨེཝཾ བྷཱཝིཏིནྡྲིཡོ སོ དནྟོ།

    Bhāvitosa dantoti evaṃ bhāvitindriyo so danto.

    ༩༡. ནིསྶཡཏཱཏི ཏཎྷཱདིཊྛིནིསྶཡཱ། ཉཏྭཱ དྷམྨནྟི ཨནིཙྩཱདཱིཧི ཨཱཀཱརེཧི དྷམྨཾ ཛཱནིཏྭཱ། ཨནིསྶིཏོཏི ཨེཝཾ ཏེཧི ནིསྶཡེཧི ཨནིསྶིཏོ། ཏེན ཨཉྙཏྲ དྷམྨཉཱཎཱ ནཏྠི ནིསྶཡཱནཾ ཨབྷཱཝོཏི དཱིཔེཏི། བྷཝཱཡ ཝིབྷཝཱཡ ཝཱཏི སསྶཏཱཡ ཨུཙྪེདཱཡ ཝཱ། ཨིམིསྶཱ གཱཐཱཡ ནིདྡེསོ ཨུཏྟཱནོ།

    91.Nissayatāti taṇhādiṭṭhinissayā. Ñatvā dhammanti aniccādīhi ākārehi dhammaṃ jānitvā. Anissitoti evaṃ tehi nissayehi anissito. Tena aññatra dhammañāṇā natthi nissayānaṃ abhāvoti dīpeti. Bhavāya vibhavāya vāti sassatāya ucchedāya vā. Imissā gāthāya niddeso uttāno.

    ༩༢. ཏཾ བྲཱུམི ཨུཔསནྟོཏི ཏཾ ཨེཝརཱུཔཾ ཨེཀེཀགཱཐཱཡ ཝུཏྟཾ ཨུཔསནྟོཏི ཀཐེམི། ཨཏརཱི སོ ཝིསཏྟིཀནྟི སོ ཨིམཾ ཝིསཏཱདིབྷཱཝེན ཝིསཏྟིཀཱསངྑཱཏཾ མཧཱཏཎྷཾ ཨཏརི།

    92.Taṃ brūmi upasantoti taṃ evarūpaṃ ekekagāthāya vuttaṃ upasantoti kathemi. Atarī so visattikanti so imaṃ visatādibhāvena visattikāsaṅkhātaṃ mahātaṇhaṃ atari.

    ཨཏྟནོ དིཊྛིཡཱ རཱགོ ཨབྷིཛ྄ཛྷཱཀཱཡགནྠོཏི སཡཾ གཧིཏདིཊྛིཡཱ རཉྫནསངྑཱཏོ རཱགོ ཨབྷིཛ྄ཛྷཱཀཱཡགནྠོ། པརཝཱདེསུ ཨཱགྷཱཏོ ཨཔྤཙྩཡོཏི པརེསཾ ཝཱདཔཊིཝཱདེསུ ཀོཔོ ཙ ཨཏུཊྛཱཀཱརོ ཙ བྱཱཔཱདོ ཀཱཡགནྠོ། ཨཏྟནོ སཱིལཾ ཝཱ ཝཏཾ ཝཱཏི སཡཾ གཧིཏམེཐུནཝིརཏིསངྑཱཏཾ སཱིལཾ ཝཱ གོཝཏཱདིཝཏཾ ཝཱ། སཱིལབྦཏཾ ཝཱཏི ཏདུབྷཡཾ ཝཱ། པརཱམཱསོཏི ཨིམིནཱ སུདྡྷཱིཏིཨཱདིཝསེན པརཏོ ཨཱམསཏི། ཨཏྟནོ དིཊྛི ཨིདཾསཙྩཱབྷིནིཝེསོ ཀཱཡགནྠོཏི སཡཾ གཧིཏདིཊྛིཾ ‘‘ཨིདམེཝ སཙྩཾ མོགྷམཉྙ’’ནྟི (ཨུདཱ॰ ༥༤; མ॰ ནི॰ ༣.༢༧, ༣༠༡) ཨཡོནིསོ ཨབྷིནིཝེསོ ཨིདཾསཙྩཱབྷིནིཝེསོ ཀཱཡགནྠོ། གནྠཱ ཏསྶ ན ཝིཛྫནྟཱིཏི ཏསྶ ཁཱིཎཱསཝསྶ དྭེ དིཊྛིགནྠཱ སོཏཱཔཏྟིམགྒེན ན སནྟི། བྱཱཔཱདོ ཀཱཡགནྠོ ཨནཱགཱམིམགྒེན། ཨབྷིཛ྄ཛྷཱཀཱཡགནྠོ ཨརཧཏྟམགྒེན།

    Attano diṭṭhiyā rāgo abhijjhākāyaganthoti sayaṃ gahitadiṭṭhiyā rañjanasaṅkhāto rāgo abhijjhākāyagantho. Paravādesu āghāto appaccayoti paresaṃ vādapaṭivādesu kopo ca atuṭṭhākāro ca byāpādo kāyagantho. Attano sīlaṃ vā vataṃ vāti sayaṃ gahitamethunaviratisaṅkhātaṃ sīlaṃ vā govatādivataṃ vā. Sīlabbataṃ vāti tadubhayaṃ vā. Parāmāsoti iminā suddhītiādivasena parato āmasati. Attano diṭṭhi idaṃsaccābhiniveso kāyaganthoti sayaṃ gahitadiṭṭhiṃ ‘‘idameva saccaṃ moghamañña’’nti (udā. 54; ma. ni. 3.27, 301) ayoniso abhiniveso idaṃsaccābhiniveso kāyagantho. Ganthā tassa na vijjantīti tassa khīṇāsavassa dve diṭṭhiganthā sotāpattimaggena na santi. Byāpādo kāyagantho anāgāmimaggena. Abhijjhākāyagantho arahattamaggena.

    ༩༣. ཨིདཱནི ཏམེཝ ཨུཔསནྟཾ པསཾསནྟོ ཨཱཧ ‘‘ན ཏསྶ པུཏྟཱ’’ཏི ཨེཝམཱདི། ཏཏྠ པུཏྟཱ ཨཏྲཛཱདཡོ ཙཏྟཱརོ། ཨེཏྠ ཙ པུཏྟཔརིགྒཧཱདཡོ པུཏྟཱདིནཱམེན ཝུཏྟཱཏི ཝེདིཏབྦཱ། ཏེ ཧིསྶ ན ཝིཛྫནྟི, ཏེསཾ ཝཱ ཨབྷཱཝེན པུཏྟཱདཡོ ན ཝིཛྫནྟཱིཏི། ཨཏྟཱཏི ‘‘ཨཏྟཱ ཨཏྠཱི’’ཏི གཧིཏཱ སསྶཏདིཊྛིཾ ནཏྠི། ནིརཏྟཱཏི ‘‘ཨུཙྪིཛྫཏཱི’’ཏི གཧིཏཱ ཨུཙྪེདདིཊྛི།

    93. Idāni tameva upasantaṃ pasaṃsanto āha ‘‘na tassa puttā’’ti evamādi. Tattha puttā atrajādayo cattāro. Ettha ca puttapariggahādayo puttādināmena vuttāti veditabbā. Te hissa na vijjanti, tesaṃ vā abhāvena puttādayo na vijjantīti. Attāti ‘‘attā atthī’’ti gahitā sassatadiṭṭhiṃ natthi. Nirattāti ‘‘ucchijjatī’’ti gahitā ucchedadiṭṭhi.

    ནཏྠཱིཏི གཧེཏབྦཾ ནཏྠི། མུཉྩིཏབྦཾ ནཏྠཱིཏི མོཙེཏབྦཾ ནཏྠི། ཡསྶ ནཏྠི གཧིཏནྟི ཡསྶ པུགྒལསྶ ཏཎྷཱདིཊྛིཝསེན གཧིཏཾ ན ཝིཛྫཏི། ཏསྶ ནཏྠི མུཉྩིཏབྦནྟི ཏསྶ པུགྒལསྶ མུཉྩིཏབྦཾ ན ཝིཛྫཏི། གཱཧམུཉྩནསམཏིཀྐནྟོཏི གཧཎཉྩ མོཙནཉྩ ཝཱིཏིཝཏྟོ། ཝུདྡྷིཔརིཧཱནིཝཱིཏིཝཏྟོཏི ཝུཌྜྷིཉྩ ཧཱནིཉྩ ཨཏིཀྐནྟོ།

    Natthīti gahetabbaṃ natthi. Muñcitabbaṃ natthīti mocetabbaṃ natthi. Yassa natthi gahitanti yassa puggalassa taṇhādiṭṭhivasena gahitaṃ na vijjati. Tassa natthi muñcitabbanti tassa puggalassa muñcitabbaṃ na vijjati. Gāhamuñcanasamatikkantoti gahaṇañca mocanañca vītivatto. Vuddhiparihānivītivattoti vuḍḍhiñca hāniñca atikkanto.

    ༩༤. ཡེན ནཾ ཝཛྫུཾ པུཐུཛྫནཱ, ཨཐོ སམཎབྲཱཧྨཎཱཏི ཡེན ཏཾ རཱགཱདིནཱ ཝཛྫེན པུཐུཛྫནཱ སབྦེཔི དེཝམནུསྶཱ ཨིཏོཝ བཧིདྡྷཱ སམཎབྲཱཧྨཎཱ ཙ རཏྟོཏི ཝཱ དུཊྛོཏི ཝཱ ཝདེཡྻུཾ། ཏཾ ཏསྶ ཨཔུརཀྑཏནྟི ཏཾ རཱགཱདིཝཛྫཾ ཏསྶ ཨརཧཏོ ཨཔུརཀྑཏཾ། ཏསྨཱ ཝཱདེསུ ནེཛཏཱིཏི ཏཾཀཱརཎཱ ནིནྡཱཝཙནེསུ ན ཀམྤཏི།

    94.Yena naṃ vajjuṃ puthujjanā, atho samaṇabrāhmaṇāti yena taṃ rāgādinā vajjena puthujjanā sabbepi devamanussā itova bahiddhā samaṇabrāhmaṇā ca rattoti vā duṭṭhoti vā vadeyyuṃ. Taṃ tassa apurakkhatanti taṃ rāgādivajjaṃ tassa arahato apurakkhataṃ. Tasmā vādesu nejatīti taṃkāraṇā nindāvacanesu na kampati.

    ནེཛཏཱིཏི ནིདྡེསསྶ ཨུདྡེསཔདཾ། ན ཨིཉྫཏཱིཏི ཙལནཾ ན ཀརོཏི། ན ཙལཏཱིཏི ན ཏཏྠ ནམཏི། ན ཝེདྷཏཱིཏི ཀམྤེཏུཾ ཨསཀྐུཎེཡྻཏཱཡ ན ཕནྡཏི། ནཔྤཝེདྷཏཱིཏི ན ཀམྤཏི། ན སམྤཝེདྷཏཱིཏི ན པརིཝཏྟཏི།

    Nejatīti niddesassa uddesapadaṃ. Na iñjatīti calanaṃ na karoti. Na calatīti na tattha namati. Na vedhatīti kampetuṃ asakkuṇeyyatāya na phandati. Nappavedhatīti na kampati. Na sampavedhatīti na parivattati.

    ༩༥. ན ཨུསྶེསུ ཝདཏེཏི ཝིསིཊྛེསུ ཨཏྟཱནཾ ཨནྟོཀཏྭཱ ‘‘ཨཧཾ ཝིསིཊྛོ’’ཏི ཨཏིམཱནཝསེན ན ཝདཏི། ཨེས ནཡོ ཨིཏརེསུ དྭཱིསུ། ཀཔྤཾ ནེཏི ཨཀཔྤིཡོཏི སོ ཨེཝརཱུཔོ དུཝིདྷམྤི ཀཔྤཾ ན ཨེཏི། ཀསྨཱ? ཡསྨཱ ཨཀཔྤིཡོ, པཧཱིནཀཔྤོཏི ཝུཏྟཾ ཧོཏི། ཨིམིསྶཱཔི གཱཐཱཡ ནིདྡེསོ ཨུཏྟཱནོཝ།

    95.Na ussesu vadateti visiṭṭhesu attānaṃ antokatvā ‘‘ahaṃ visiṭṭho’’ti atimānavasena na vadati. Esa nayo itaresu dvīsu. Kappaṃ neti akappiyoti so evarūpo duvidhampi kappaṃ na eti. Kasmā? Yasmā akappiyo, pahīnakappoti vuttaṃ hoti. Imissāpi gāthāya niddeso uttānova.

    ༩༦. སཀནྟི མཡ྄ཧནྟི པརིགྒཧིཏཾ། ཨསཏཱ ཙ ན སོཙཏཱིཏི ཨཝིཛྫམཱནཱདིནཱ ཨསཏཱ ཙ ན སོཙཏི། དྷམྨེསུ ཙ ན གཙྪཏཱིཏི སབྦདྷམྨེསུ ཚནྡཱདིཝསེན ན གཙྪཏི། ས ཝེ སནྟོཏི ཝུཙྩཏཱིཏི སོ ཨེཝརཱུཔོ ནརུཏྟམོ ‘‘སནྟོ’’ཏི ཝུཙྩཏི། ཨིམིསྶཱཔི གཱཐཱཡ ནིདྡེསོ ཨུཏྟཱནོཝ། ཨརཧཏྟནིཀཱུཊེན དེསནཾ ནིཊྛཱཔེསི། དེསནཱཔརིཡོསཱནེ ཀོཊིསཏསཧསྶདེཝཏཱནཾ ཨརཧཏྟཔྤཏྟི ཨཧོསི, སོཏཱཔནྣཱདཱིནཾ གཎནཱ ནཏྠཱིཏི།

    96.Sakanti mayhanti pariggahitaṃ. Asatā ca na socatīti avijjamānādinā asatā ca na socati. Dhammesu ca na gacchatīti sabbadhammesu chandādivasena na gacchati. Sa ve santoti vuccatīti so evarūpo naruttamo ‘‘santo’’ti vuccati. Imissāpi gāthāya niddeso uttānova. Arahattanikūṭena desanaṃ niṭṭhāpesi. Desanāpariyosāne koṭisatasahassadevatānaṃ arahattappatti ahosi, sotāpannādīnaṃ gaṇanā natthīti.

    སདྡྷམྨཔྤཛྫོཏིཀཱཡ མཧཱནིདྡེསཊྛཀཐཱཡ

    Saddhammappajjotikāya mahāniddesaṭṭhakathāya

    པུརཱབྷེདསུཏྟནིདྡེསཝཎྞནཱ ནིཊྛིཏཱ།

    Purābhedasuttaniddesavaṇṇanā niṭṭhitā.




    Next: ༡༡. ཀལཧཝིཝཱདསུཏྟནིདྡེསཝཎྞནཱ • 11. Kalahavivādasuttaniddesavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / མཧཱནིདྡེསཔཱལི༹ • Mahāniddesapāḷi / ༡༠. པུརཱབྷེདསུཏྟནིདྡེསོ • 10. Purābhedasuttaniddeso


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact