Library / Tipiṭaka / তিপিটক • Tipiṭaka / মহানিদ্দেসপাল়ি • Mahāniddesapāḷi

১০. পুরাভেদসুত্তনিদ্দেসো

10. Purābhedasuttaniddeso

অথ পুরাভেদসুত্তনিদ্দেসং ৰক্খতি –

Atha purābhedasuttaniddesaṃ vakkhati –

৮৩.

83.

কথংদস্সী কথংসীলো, উপসন্তোতি ৰুচ্চতি।

Kathaṃdassīkathaṃsīlo, upasantoti vuccati;

তং মে গোতম পব্রূহি, পুচ্ছিতো উত্তমং নরং॥

Taṃ me gotama pabrūhi, pucchito uttamaṃ naraṃ.

কথংদস্সী কথংসীলো, উপসন্তোতি ৰুচ্চতীতি। কথংদস্সীতি কীদিসেন দস্সনেন সমন্নাগতো, কিংসণ্ঠিতেন, কিংপকারেন, কিংপটিভাগেনাতি – কথংদস্সী। কথংসীলোতি কীদিসেন সীলেন সমন্নাগতো, কিংসণ্ঠিতেন, কিংপকারেন, কিংপটিভাগেনাতি – কথংদস্সী কথংসীলো। উপসন্তোতি ৰুচ্চতীতি সন্তো উপসন্তো ৰূপসন্তো নিব্বুতো পটিপস্সদ্ধোতি ৰুচ্চতি পৰুচ্চতি কথীযতি ভণীযতি দীপীযতি ৰোহরীযতি। কথংদস্সীতি অধিপঞ্ঞং পুচ্ছতি, কথংসীলোতি অধিসীলং পুচ্ছতি, উপসন্তোতি অধিচিত্তং পুচ্ছতীতি – কথংদস্সী কথংসীলো উপসন্তোতি ৰুচ্চতি।

Kathaṃdassī kathaṃsīlo, upasantoti vuccatīti. Kathaṃdassīti kīdisena dassanena samannāgato, kiṃsaṇṭhitena, kiṃpakārena, kiṃpaṭibhāgenāti – kathaṃdassī. Kathaṃsīloti kīdisena sīlena samannāgato, kiṃsaṇṭhitena, kiṃpakārena, kiṃpaṭibhāgenāti – kathaṃdassī kathaṃsīlo. Upasantoti vuccatīti santo upasanto vūpasanto nibbuto paṭipassaddhoti vuccati pavuccati kathīyati bhaṇīyati dīpīyati voharīyati. Kathaṃdassīti adhipaññaṃ pucchati, kathaṃsīloti adhisīlaṃ pucchati, upasantoti adhicittaṃ pucchatīti – kathaṃdassī kathaṃsīlo upasantoti vuccati.

তং মে গোতম পব্রূহীতি। তন্তি যং পুচ্ছামি, যং যাচামি, যং অজ্ঝেসামি, যং পসাদেমি। গোতমাতি সো নিম্মিতো বুদ্ধং ভগৰন্তং গোত্তেন আলপতি। পব্রূহীতি ব্রূহি আচিক্খ দেসেহি পঞ্ঞপেহি পট্ঠপেহি ৰিৰর ৰিভজ উত্তানীকরোহি পকাসেহীতি – তং মে গোতম পব্রূহি।

Taṃ me gotama pabrūhīti. Tanti yaṃ pucchāmi, yaṃ yācāmi, yaṃ ajjhesāmi, yaṃ pasādemi. Gotamāti so nimmito buddhaṃ bhagavantaṃ gottena ālapati. Pabrūhīti brūhi ācikkha desehi paññapehi paṭṭhapehi vivara vibhaja uttānīkarohi pakāsehīti – taṃ me gotama pabrūhi.

পুচ্ছিতো উত্তমং নরন্তি। পুচ্ছিতোতি পুট্ঠো পুচ্ছিতো যাচিতো অজ্ঝেসিতো পসাদিতো। উত্তমং নরন্তি অগ্গং সেট্ঠং ৰিসিট্ঠং পামোক্খং উত্তমং পৰরং নরন্তি – পুচ্ছিতো উত্তমং নরং।

Pucchito uttamaṃ naranti. Pucchitoti puṭṭho pucchito yācito ajjhesito pasādito. Uttamaṃ naranti aggaṃ seṭṭhaṃ visiṭṭhaṃ pāmokkhaṃ uttamaṃ pavaraṃ naranti – pucchito uttamaṃ naraṃ.

তেনাহ সো নিম্মিতো –

Tenāha so nimmito –

‘‘কথংদস্সী কথংসীলো, উপসন্তোতি ৰুচ্চতি।

‘‘Kathaṃdassī kathaṃsīlo, upasantoti vuccati;

তং মে গোতম পব্রূহি, পুচ্ছিতো উত্তমং নর’’ন্তি॥

Taṃ me gotama pabrūhi, pucchito uttamaṃ nara’’nti.

৮৪.

84.

ৰীততণ্হো পুরাভেদা, [ইতি ভগৰা]

Vītataṇhopurābhedā, [iti bhagavā]

পুব্বমন্তমনিস্সিতো।

Pubbamantamanissito;

ৰেমজ্ঝে নুপসঙ্খেয্যো,

Vemajjhe nupasaṅkheyyo,

তস্স নত্থি পুরক্খতং॥

Tassa natthi purakkhataṃ.

ৰীততণ্হো পুরাভেদাতি। পুরা কাযস্স ভেদা, পুরা অত্তভাৰস্স ভেদা, পুরা কল়েৰরস্স নিক্খেপা, পুরা জীৰিতিন্দ্রিযস্স উপচ্ছেদা ৰীততণ্হো ৰিগততণ্হো চত্ততণ্হো ৰন্ততণ্হো মুত্ততণ্হো পহীনতণ্হো পটিনিস্সট্ঠতণ্হো, ৰীতরাগো ৰিগতরাগো চত্তরাগো ৰন্তরাগো মুত্তরাগো পহীনরাগো পটিনিস্সট্ঠরাগো, নিচ্ছাতো নিব্বুতো সীতিভূতো সুখপ্পটিসংৰেদী ব্রহ্মভূতেন অত্তনা ৰিহরতি।

Vītataṇho purābhedāti. Purā kāyassa bhedā, purā attabhāvassa bhedā, purā kaḷevarassa nikkhepā, purā jīvitindriyassa upacchedā vītataṇho vigatataṇho cattataṇho vantataṇho muttataṇho pahīnataṇho paṭinissaṭṭhataṇho, vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo, nicchāto nibbuto sītibhūto sukhappaṭisaṃvedī brahmabhūtena attanā viharati.

ভগৰাতি গারৰাধিৰচনং। অপি চ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গতণ্হোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা, ভজি ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং অরূপসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিভাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং পঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা। ভগৰাতি নেতং নামং মাতরা কতং, ন পিতরা কতং, ন ভাতরা কতং, ন ভগিনিযা কতং, ন মিত্তামচ্চেহি কতং, ন ঞাতিসালোহিতেহি কতং , ন সমণব্রাহ্মণেহি কতং, ন দেৰতাহি কতং; ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞাণস্স পটিলাভা সচ্ছিকা পঞ্ঞত্তি যদিদং ভগৰাতি – ৰীততণ্হো পুরাভেদাতি ভগৰা।

Bhagavāti gāravādhivacanaṃ. Api ca bhaggarāgoti bhagavā, bhaggadosoti bhagavā, bhaggamohoti bhagavā, bhaggamānoti bhagavā, bhaggadiṭṭhīti bhagavā, bhaggataṇhoti bhagavā, bhaggakilesoti bhagavā, bhaji vibhaji pavibhaji dhammaratananti bhagavā, bhavānaṃ antakaroti bhagavā, bhāvitakāyo bhāvitasīlo bhāvitacitto bhāvitapaññoti bhagavā, bhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā, bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā, bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā, bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti bhagavā, bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ navannaṃ anupubbavihārasamāpattīnanti bhagavā, bhāgī vā bhagavā dasannaṃ paññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā, bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā, bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā. Bhagavāti netaṃ nāmaṃ mātarā kataṃ, na pitarā kataṃ, na bhātarā kataṃ, na bhaginiyā kataṃ, na mittāmaccehi kataṃ, na ñātisālohitehi kataṃ , na samaṇabrāhmaṇehi kataṃ, na devatāhi kataṃ; vimokkhantikametaṃ buddhānaṃ bhagavantānaṃ bodhiyā mūle saha sabbaññutañāṇassa paṭilābhā sacchikā paññatti yadidaṃ bhagavāti – vītataṇho purābhedāti bhagavā.

পুব্বমন্তমনিস্সিতোতি পুব্বন্তো ৰুচ্চতি অতীতো অদ্ধা। অতীতং অদ্ধানং আরব্ভ তণ্হা পহীনা, দিট্ঠি পটিনিস্সট্ঠা তণ্হায পহীনত্তা, দিট্ঠিযা পটিনিস্সট্ঠত্তা। এৰম্পি পুব্বমন্তমনিস্সিতো। অথ ৰা ‘‘এৰংরূপো অহোসিং অতীতমদ্ধান’’ন্তি তত্থ নন্দিং ন সমন্নানেতি, ‘‘এৰংৰেদনো অহোসিং… এৰংসঞ্ঞো অহোসিং… এৰংসঙ্খারো অহোসিং… এৰংৰিঞ্ঞাণো অহোসিং অতীতমদ্ধান’’ন্তি তত্থ নন্দিং ন সমন্নানেতি। এৰম্পি পুব্বমন্তমনিস্সিতো। অথ ৰা ‘‘ইতি মে চক্খু ¹ অহোসি অতীতমদ্ধানং – ইতি রূপা’’তি তত্থ ন ছন্দরাগপটিবদ্ধং হোতি ৰিঞ্ঞাণং, ন ছন্দরাগপটিবদ্ধত্তা ৰিঞ্ঞাণস্স ন তদভিনন্দতি; ন তদভিনন্দন্তো। এৰম্পি পুব্বমন্তমনিস্সিতো। ‘‘ইতি মে সোতং অহোসি অতীতমদ্ধানং – ইতি সদ্দা’’তি, ‘‘ইতি মে ঘানং অহোসি অতীতমদ্ধানং – ইতি গন্ধা’’তি, ‘‘ইতি মে জিৰ্হা অহোসি অতীতমদ্ধানং – ইতি রসা’’তি, ‘‘ইতি মে কাযো অহোসি অতীতমদ্ধানং – ইতি ফোট্ঠব্বা’’তি, ‘‘ইতি মে মনো অহোসি অতীতমদ্ধানং – ইতি ধম্মা’’তি তত্থ ন ছন্দরাগপটিবদ্ধং হোতি ৰিঞ্ঞাণং, ন ছন্দরাগপটিবদ্ধত্তা ৰিঞ্ঞাণস্স ন তদভিনন্দতি; ন তদভিনন্দন্তো। এৰম্পি পুব্বমন্তমনিস্সিতো। অথ ৰা যানি তানি পুব্বে মাতুগামেন সদ্ধিং হসিতলপিতকীল়িতানি ন তদস্সাদেতি, ন তং নিকামেতি, ন চ তেন ৰিত্তিং আপজ্জতি। এৰম্পি পুব্বমন্তমনিস্সিতো।

Pubbamantamanissitoti pubbanto vuccati atīto addhā. Atītaṃ addhānaṃ ārabbha taṇhā pahīnā, diṭṭhi paṭinissaṭṭhā taṇhāya pahīnattā, diṭṭhiyā paṭinissaṭṭhattā. Evampi pubbamantamanissito. Atha vā ‘‘evaṃrūpo ahosiṃ atītamaddhāna’’nti tattha nandiṃ na samannāneti, ‘‘evaṃvedano ahosiṃ… evaṃsañño ahosiṃ… evaṃsaṅkhāro ahosiṃ… evaṃviññāṇo ahosiṃ atītamaddhāna’’nti tattha nandiṃ na samannāneti. Evampi pubbamantamanissito. Atha vā ‘‘iti me cakkhu ² ahosi atītamaddhānaṃ – iti rūpā’’ti tattha na chandarāgapaṭibaddhaṃ hoti viññāṇaṃ, na chandarāgapaṭibaddhattā viññāṇassa na tadabhinandati; na tadabhinandanto. Evampi pubbamantamanissito. ‘‘Iti me sotaṃ ahosi atītamaddhānaṃ – iti saddā’’ti, ‘‘iti me ghānaṃ ahosi atītamaddhānaṃ – iti gandhā’’ti, ‘‘iti me jivhā ahosi atītamaddhānaṃ – iti rasā’’ti, ‘‘iti me kāyo ahosi atītamaddhānaṃ – iti phoṭṭhabbā’’ti, ‘‘iti me mano ahosi atītamaddhānaṃ – iti dhammā’’ti tattha na chandarāgapaṭibaddhaṃ hoti viññāṇaṃ, na chandarāgapaṭibaddhattā viññāṇassa na tadabhinandati; na tadabhinandanto. Evampi pubbamantamanissito. Atha vā yāni tāni pubbe mātugāmena saddhiṃ hasitalapitakīḷitāni na tadassādeti, na taṃ nikāmeti, na ca tena vittiṃ āpajjati. Evampi pubbamantamanissito.

ৰেমজ্ঝে নুপসঙ্খেয্যোতি। ৰেমজ্ঝং ৰুচ্চতি পচ্চুপ্পন্নো অদ্ধা। পচ্চুপ্পন্নং অদ্ধানং আরব্ভ তণ্হা পহীনা, দিট্ঠি পটিনিস্সট্ঠা । তণ্হায পহীনত্তা, দিট্ঠিযা পটিনিস্সট্ঠত্তা রত্তোতি নুপসঙ্খেয্যো, দুট্ঠোতি নুপসঙ্খেয্যো, মূল়্হোতি নুপসঙ্খেয্যো, ৰিনিবদ্ধোতি নুপসঙ্খেয্যো, পরামট্ঠোতি নুপসঙ্খেয্যো, ৰিক্খেপগতোতি নুপসঙ্খেয্যো, অনিট্ঠঙ্গতোতি নুপসঙ্খেয্যো, থামগতোতি নুপসঙ্খেয্যো; তে অভিসঙ্খারা পহীনা; অভিসঙ্খারানং পহীনত্তা গতিযা নুপসঙ্খেয্যো, নেরযিকোতি ৰা তিরচ্ছানযোনিকোতি ৰা পেত্তিৰিসযিকোতি ৰা মনুস্সোতি ৰা দেৰোতি ৰা রূপীতি ৰা অরূপীতি ৰা সঞ্ঞীতি ৰা অসঞ্ঞীতি ৰা নেৰসঞ্ঞীনাসঞ্ঞীতি ৰা। সো হেতু নত্থি পচ্চযো নত্থি কারণং নত্থি যেন সঙ্খং গচ্ছেয্যাতি – ৰেমজ্ঝে নুপসঙ্খেয্যো।

Vemajjhe nupasaṅkheyyoti. Vemajjhaṃ vuccati paccuppanno addhā. Paccuppannaṃ addhānaṃ ārabbha taṇhā pahīnā, diṭṭhi paṭinissaṭṭhā . Taṇhāya pahīnattā, diṭṭhiyā paṭinissaṭṭhattā rattoti nupasaṅkheyyo, duṭṭhoti nupasaṅkheyyo, mūḷhoti nupasaṅkheyyo, vinibaddhoti nupasaṅkheyyo, parāmaṭṭhoti nupasaṅkheyyo, vikkhepagatoti nupasaṅkheyyo, aniṭṭhaṅgatoti nupasaṅkheyyo, thāmagatoti nupasaṅkheyyo; te abhisaṅkhārā pahīnā; abhisaṅkhārānaṃ pahīnattā gatiyā nupasaṅkheyyo, nerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā. So hetu natthi paccayo natthi kāraṇaṃ natthi yena saṅkhaṃ gaccheyyāti – vemajjhe nupasaṅkheyyo.

তস্স নত্থি পুরক্খতন্তি। তস্সাতি অরহতো খীণাসৰস্স। পুরেক্খারাতি দ্ৰে পুরেক্খারা – তণ্হাপুরেক্খারো চ দিট্ঠিপুরেক্খারো চ…পে॰… অযং তণ্হাপুরেক্খারো…পে॰… অযং দিট্ঠিপুরেক্খারো। তস্স তণ্হাপুরেক্খারো পহীনো, দিট্ঠিপুরেক্খারো পটিনিস্সট্ঠো। তণ্হাপুরেক্খারস্স পহীনত্তা, দিট্ঠিপুরেক্খারস্স পটিনিস্সট্ঠত্তা ন তণ্হং ৰা দিট্ঠিং ৰা পুরতো কত্ৰা চরতি, ন তণ্হাধজো ন তণ্হাকেতু ন তণ্হাধিপতেয্যো, ন দিট্ঠিধজো ন দিট্ঠিকেতু ন দিট্ঠাধিপতেয্যো, ন তণ্হায ৰা দিট্ঠিযা ৰা পরিৰারিতো চরতি। এৰম্পি তস্স নত্থি পুরক্খতং। অথ ৰা ‘‘এৰংরূপো সিযং অনাগতমদ্ধান’’ন্তি তত্থ নন্দিং ন সমন্নানেতি, ‘‘এৰংৰেদনো সিযং… এৰংসঞ্ঞো সিযং… এৰংসঙ্খারো সিযং… এৰংৰিঞ্ঞাণো সিযং অনাগতমদ্ধান’’ন্তি তত্থ নন্দিং ন সমন্নানেতি। এৰম্পি তস্স নত্থি পুরক্খতং। অথ ৰা ‘‘ইতি মে চক্খু সিযা অনাগতমদ্ধানং – ইতি রূপা’’তি অপ্পটিলদ্ধস্স পটিলাভায চিত্তং ন পণিদহতি, চেতসো অপ্পণিধানপ্পচ্চযা ন তদভিনন্দতি; ন তদভিনন্দন্তো। এৰম্পি তস্স নত্থি পুরক্খতং। ‘‘ইতি মে সোতং সিযা অনাগতমদ্ধানং – ইতি সদ্দা’’তি, ‘‘ইতি মে ঘানং সিযা অনাগতমদ্ধানং – ইতি গন্ধা’’তি, ‘‘ইতি মে জিৰ্হা সিযা অনাগতমদ্ধানং – ইতি রসা’’তি, ‘‘ইতি মে কাযো সিযা অনাগতমদ্ধানং – ইতি ফোট্ঠব্বা’’তি, ‘‘ইতি মে মনো সিযা অনাগতমদ্ধানং – ইতি ধম্মা’’তি অপ্পটিলদ্ধস্স পটিলাভায চিত্তং ন পণিদহতি, চেতসো অপ্পণিধানপ্পচ্চযা ন তদভিনন্দতি; ন তদভিনন্দন্তো। এৰম্পি তস্স নত্থি পুরক্খতং। অথ ৰা ‘‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো’’তি ৰা অপ্পটিলদ্ধস্স পটিলাভায চিত্তং ন পণিদহতি, চেতসো অপ্পণিধানপ্পচ্চযা ন তদভিনন্দতি; ন তদভিনন্দতো। এৰম্পি তস্স নত্থি পুরক্খতং।

Tassa natthi purakkhatanti. Tassāti arahato khīṇāsavassa. Purekkhārāti dve purekkhārā – taṇhāpurekkhāro ca diṭṭhipurekkhāro ca…pe… ayaṃ taṇhāpurekkhāro…pe… ayaṃ diṭṭhipurekkhāro. Tassa taṇhāpurekkhāro pahīno, diṭṭhipurekkhāro paṭinissaṭṭho. Taṇhāpurekkhārassa pahīnattā, diṭṭhipurekkhārassa paṭinissaṭṭhattā na taṇhaṃ vā diṭṭhiṃ vā purato katvā carati, na taṇhādhajo na taṇhāketu na taṇhādhipateyyo, na diṭṭhidhajo na diṭṭhiketu na diṭṭhādhipateyyo, na taṇhāya vā diṭṭhiyā vā parivārito carati. Evampi tassa natthi purakkhataṃ. Atha vā ‘‘evaṃrūpo siyaṃ anāgatamaddhāna’’nti tattha nandiṃ na samannāneti, ‘‘evaṃvedano siyaṃ… evaṃsañño siyaṃ… evaṃsaṅkhāro siyaṃ… evaṃviññāṇo siyaṃ anāgatamaddhāna’’nti tattha nandiṃ na samannāneti. Evampi tassa natthi purakkhataṃ. Atha vā ‘‘iti me cakkhu siyā anāgatamaddhānaṃ – iti rūpā’’ti appaṭiladdhassa paṭilābhāya cittaṃ na paṇidahati, cetaso appaṇidhānappaccayā na tadabhinandati; na tadabhinandanto. Evampi tassa natthi purakkhataṃ. ‘‘Iti me sotaṃ siyā anāgatamaddhānaṃ – iti saddā’’ti, ‘‘iti me ghānaṃ siyā anāgatamaddhānaṃ – iti gandhā’’ti, ‘‘iti me jivhā siyā anāgatamaddhānaṃ – iti rasā’’ti, ‘‘iti me kāyo siyā anāgatamaddhānaṃ – iti phoṭṭhabbā’’ti, ‘‘iti me mano siyā anāgatamaddhānaṃ – iti dhammā’’ti appaṭiladdhassa paṭilābhāya cittaṃ na paṇidahati, cetaso appaṇidhānappaccayā na tadabhinandati; na tadabhinandanto. Evampi tassa natthi purakkhataṃ. Atha vā ‘‘imināhaṃ sīlena vā vatena vā tapena vā brahmacariyena vā devo vā bhavissāmi devaññataro’’ti vā appaṭiladdhassa paṭilābhāya cittaṃ na paṇidahati, cetaso appaṇidhānappaccayā na tadabhinandati; na tadabhinandato. Evampi tassa natthi purakkhataṃ.

তেনাহ ভগৰা –

Tenāha bhagavā –

‘‘ৰীততণ্হো পুরাভেদা, [ইতি ভগৰা]

‘‘Vītataṇho purābhedā, [iti bhagavā]

পুব্বমন্তমনিস্সিতো।

Pubbamantamanissito;

ৰেমজ্ঝে নুপসঙ্খেয্যো,

Vemajjhe nupasaṅkheyyo,

তস্স নত্থি পুরক্খত’’ন্তি॥

Tassa natthi purakkhata’’nti.

৮৫.

85.

অক্কোধনো অসন্তাসী, অৰিকত্থী অকুক্কুচো।

Akkodhanoasantāsī, avikatthī akukkuco;

মন্তভাণী অনুদ্ধতো, স ৰে ৰাচাযতো মুনি॥

Mantabhāṇī anuddhato, sa ve vācāyato muni.

অক্কোধনো অসন্তাসীতি। অক্কোধনোতি যঞ্হি খো ৰুত্তং। অপি চ কোধো তাৰ ৰত্তব্বো। দসহাকারেহি কোধো জাযতি – ‘‘অনত্থং মে অচরী’’তি কোধো জাযতি, ‘‘অনত্থং মে চরতী’’তি কোধো জাযতি, ‘‘অনত্থং মে চরিস্সতী’’তি কোধো জাযতি, ‘‘পিযস্স মে মনাপস্স অনত্থং অচরি… অনত্থং চরতি… অনত্থং চরিস্সতী’’তি কোধো জাযতি, ‘‘অপ্পিযস্স মে অমনাপস্স অত্থং অচরি… অত্থং চরতি… অত্থং চরিস্সতী’’তি কোধো জাযতি, অট্ঠানে ৰা পন কোধো জাযতি। যো এৰরূপো চিত্তস্স আঘাতো পটিঘাতো, পটিঘং পটিৰিরোধো, কোপো পকোপো সম্পকোপো, দোসো পদোসো সম্পদোসো, চিত্তস্স ব্যাপত্তি মনোপদোসো , কোধো কুজ্ঝনা কুজ্ঝিতত্তং, দোসো দুস্সনা দুস্সিতত্তং, ব্যাপত্তি ব্যাপজ্জনা ব্যাপজ্জিতত্তং, ৰিরোধো পটিৰিরোধো চণ্ডিক্কং, অসুরোপো ³ অনত্তমনতা চিত্তস্স – অযং ৰুচ্চতি কোধো।

Akkodhano asantāsīti. Akkodhanoti yañhi kho vuttaṃ. Api ca kodho tāva vattabbo. Dasahākārehi kodho jāyati – ‘‘anatthaṃ me acarī’’ti kodho jāyati, ‘‘anatthaṃ me caratī’’ti kodho jāyati, ‘‘anatthaṃ me carissatī’’ti kodho jāyati, ‘‘piyassa me manāpassa anatthaṃ acari… anatthaṃ carati… anatthaṃ carissatī’’ti kodho jāyati, ‘‘appiyassa me amanāpassa atthaṃ acari… atthaṃ carati… atthaṃ carissatī’’ti kodho jāyati, aṭṭhāne vā pana kodho jāyati. Yo evarūpo cittassa āghāto paṭighāto, paṭighaṃ paṭivirodho, kopo pakopo sampakopo, doso padoso sampadoso, cittassa byāpatti manopadoso , kodho kujjhanā kujjhitattaṃ, doso dussanā dussitattaṃ, byāpatti byāpajjanā byāpajjitattaṃ, virodho paṭivirodho caṇḍikkaṃ, asuropo ⁴ anattamanatā cittassa – ayaṃ vuccati kodho.

অপি চ কোধস্স অধিমত্তপরিত্ততা ৰেদিতব্বা। অত্থি কঞ্চি ⁵ কালং কোধো চিত্তাৰিলকরণমত্তো হোতি, ন চ তাৰ মুখকুলানৰিকুলানো হোতি; অত্থি কঞ্চি কালং কোধো মুখকুলানৰিকুলানমত্তো হোতি, ন চ তাৰ হনুসঞ্চোপনো হোতি; অত্থি কঞ্চি কালং কোধো হনুসঞ্চোপনমত্তো হোতি, ন চ তাৰ ফরুসৰাচং নিচ্ছারণো ⁶ হোতি; অত্থি কঞ্চি কালং কোধো ফরুসৰাচং নিচ্ছারণমত্তো হোতি, ন চ তাৰ দিসাৰিদিসানুৰিলোকনো হোতি; অত্থি কঞ্চি কালং কোধো দিসাৰিদিসানুৰিলোকনমত্তো হোতি, ন চ তাৰ দণ্ডসত্থপরামসনো হোতি; অত্থি কঞ্চি কালং কোধো দণ্ডসত্থপরামসনমত্তো হোতি, ন চ তাৰ দণ্ডসত্থঅব্ভুক্কিরণো হোতি; অত্থি কঞ্চি কালং কোধো দণ্ডসত্থঅব্ভুক্কিরণমত্তো হোতি, ন চ তাৰ দণ্ডসত্থঅভিনিপাতনো হোতি; অত্থি কঞ্চি কালং কোধো দণ্ডসত্থঅভিনিপাতমত্তো হোতি, ন চ তাৰ ছিন্নৰিচ্ছিন্নকরণো হোতি; অত্থি কঞ্চি কালং কোধো ছিন্নৰিচ্ছিন্নকরণমত্তো হোতি, ন চ তাৰ সম্ভঞ্জনপলিভঞ্জনো হোতি; অত্থি কঞ্চি কালং কোধো সম্ভঞ্জনপলিভঞ্জনমত্তো হোতি, ন চ তাৰ অঙ্গমঙ্গঅপকড্ঢনো হোতি; অত্থি কঞ্চি কালং কোধো অঙ্গমঙ্গঅপকড্ঢনমত্তো হোতি, ন চ তাৰ জীৰিতাৰোরোপনো ⁷ হোতি; অত্থি কঞ্চি কালং কোধো জীৰিতাৰোরোপনমত্তো হোতি, ন চ তাৰ সব্বচাগপরিচ্চাগায সণ্ঠিতো হোতি। যতো কোধো পরপুগ্গলং ঘাটেত্ৰা অত্তানং ঘাটেতি, এত্তাৰতা কোধো পরমুস্সদগতো পরমৰেপুল্লপ্পত্তো হোতি। যস্স সো কোধো পহীনো সমুচ্ছিন্নো ৰূপসন্তো পটিপস্সদ্ধো অভব্বুপ্পত্তিকো ঞাণগ্গিনা দড্ঢো, সো ৰুচ্চতি অক্কোধনো। কোধস্স পহীনত্তা অক্কোধনো, কোধৰত্থুস্স পরিঞ্ঞাতত্তা অক্কোধনো, কোধহেতুস্স উপচ্ছিন্নত্তা অক্কোধনোতি – অক্কোধনো।

Api ca kodhassa adhimattaparittatā veditabbā. Atthi kañci ⁸ kālaṃ kodho cittāvilakaraṇamatto hoti, na ca tāva mukhakulānavikulāno hoti; atthi kañci kālaṃ kodho mukhakulānavikulānamatto hoti, na ca tāva hanusañcopano hoti; atthi kañci kālaṃ kodho hanusañcopanamatto hoti, na ca tāva pharusavācaṃ nicchāraṇo ⁹ hoti; atthi kañci kālaṃ kodho pharusavācaṃ nicchāraṇamatto hoti, na ca tāva disāvidisānuvilokano hoti; atthi kañci kālaṃ kodho disāvidisānuvilokanamatto hoti, na ca tāva daṇḍasatthaparāmasano hoti; atthi kañci kālaṃ kodho daṇḍasatthaparāmasanamatto hoti, na ca tāva daṇḍasatthaabbhukkiraṇo hoti; atthi kañci kālaṃ kodho daṇḍasatthaabbhukkiraṇamatto hoti, na ca tāva daṇḍasatthaabhinipātano hoti; atthi kañci kālaṃ kodho daṇḍasatthaabhinipātamatto hoti, na ca tāva chinnavicchinnakaraṇo hoti; atthi kañci kālaṃ kodho chinnavicchinnakaraṇamatto hoti, na ca tāva sambhañjanapalibhañjano hoti; atthi kañci kālaṃ kodho sambhañjanapalibhañjanamatto hoti, na ca tāva aṅgamaṅgaapakaḍḍhano hoti; atthi kañci kālaṃ kodho aṅgamaṅgaapakaḍḍhanamatto hoti, na ca tāva jīvitāvoropano ¹⁰ hoti; atthi kañci kālaṃ kodho jīvitāvoropanamatto hoti, na ca tāva sabbacāgapariccāgāya saṇṭhito hoti. Yato kodho parapuggalaṃ ghāṭetvā attānaṃ ghāṭeti, ettāvatā kodho paramussadagato paramavepullappatto hoti. Yassa so kodho pahīno samucchinno vūpasanto paṭipassaddho abhabbuppattiko ñāṇagginā daḍḍho, so vuccati akkodhano. Kodhassa pahīnattā akkodhano, kodhavatthussa pariññātattā akkodhano, kodhahetussa upacchinnattā akkodhanoti – akkodhano.

অসন্তাসীতি ইধেকচ্চো তাসী হোতি উত্তাসী পরিত্তাসী, সো তসতি ন উত্তসতি পরিত্তসতি ভাযতি সন্তাসং আপজ্জতি। কুলং ৰা ন লভামি, গণং ৰা ন লভামি, আৰাসং ৰা ন লভামি, লাভং ৰা ন লভামি, যসং ৰা ন লভামি, পসংসং ৰা ন লভামি, সুখং ৰা ন লভামি, চীৰরং ৰা ন লভামি, পিণ্ডপাতং ৰা ন লভামি, সেনাসনং ৰা ন লভামি, গিলানপচ্চযভেসজ্জপরিক্খারং ৰা ন লভামি, গিলানুপট্ঠাকং ৰা ন লভামি, অপ্পঞ্ঞাতোম্হীতি তসতি উত্তসতি পরিত্তসতি ভাযতি সন্তাসং আপজ্জতি।

Asantāsīti idhekacco tāsī hoti uttāsī parittāsī, so tasati na uttasati parittasati bhāyati santāsaṃ āpajjati. Kulaṃ vā na labhāmi, gaṇaṃ vā na labhāmi, āvāsaṃ vā na labhāmi, lābhaṃ vā na labhāmi, yasaṃ vā na labhāmi, pasaṃsaṃ vā na labhāmi, sukhaṃ vā na labhāmi, cīvaraṃ vā na labhāmi, piṇḍapātaṃ vā na labhāmi, senāsanaṃ vā na labhāmi, gilānapaccayabhesajjaparikkhāraṃ vā na labhāmi, gilānupaṭṭhākaṃ vā na labhāmi, appaññātomhīti tasati uttasati parittasati bhāyati santāsaṃ āpajjati.

ইধ ভিক্খু অসন্তাসী হোতি অনুত্তাসী অপরিত্তাসী; সো ন তসতি ন উত্তসতি ন পরিত্তসতি ন ভাযতি ন সন্তাসং আপজ্জতি। কুলং ৰা ন লভামি, গণং ৰা ন লভামি, আৰাসং ৰা ন লভামি, লাভং ৰা ন লভামি, যসং ৰা ন লভামি, পসংসং ৰা ন লভামি, সুখং ৰা ন লভামি, চীৰরং ৰা ন লভামি, পিণ্ডপাতং ৰা ন লভামি, সেনাসনং ৰা ন লভামি, গিলানপচ্চযভেসজ্জপরিক্খারং ৰা ন লভামি, গিলানুপট্ঠাকং ৰা ন লভামি, অপ্পঞ্ঞাতোম্হীতি ন তসতি ন উত্তসতি ন পরিত্তসতি ন ভাযতি ন সন্তাসং আপজ্জতীতি – অক্কোধনো অসন্তাসী।

Idha bhikkhu asantāsī hoti anuttāsī aparittāsī; so na tasati na uttasati na parittasati na bhāyati na santāsaṃ āpajjati. Kulaṃ vā na labhāmi, gaṇaṃ vā na labhāmi, āvāsaṃ vā na labhāmi, lābhaṃ vā na labhāmi, yasaṃ vā na labhāmi, pasaṃsaṃ vā na labhāmi, sukhaṃ vā na labhāmi, cīvaraṃ vā na labhāmi, piṇḍapātaṃ vā na labhāmi, senāsanaṃ vā na labhāmi, gilānapaccayabhesajjaparikkhāraṃ vā na labhāmi, gilānupaṭṭhākaṃ vā na labhāmi, appaññātomhīti na tasati na uttasati na parittasati na bhāyati na santāsaṃ āpajjatīti – akkodhano asantāsī.

অৰিকত্থী অকুক্কুচোতি। ইধেকচ্চো কত্থী হোতি ৰিকত্থী, সো কত্থতি ৰিকত্থতি – অহমস্মি সীলসম্পন্নোতি ৰা ৰতসম্পন্নোতি ৰা সীলব্বতসম্পন্নোতি ৰা জাতিযা ৰা গোত্তেন ৰা কোলপুত্তিযেন ৰা ৰণ্ণপোক্খরতায ৰা ধনেন ৰা অজ্ঝেনেন ৰা কম্মাযতনেন ৰা সিপ্পাযতনেন ৰা ৰিজ্জাট্ঠানেন ৰা সুতেন ৰা পটিভানেন ৰা অঞ্ঞতরঞ্ঞতরেন ৰা ৰত্থুনা। উচ্চা কুলা পব্বজিতোতি ৰা মহাকুলা পব্বজিতোতি ৰা, মহাভোগকুলা পব্বজিতোতি ৰা উল়ারভোগকুলা পব্বজিতোতি ৰা, ঞাতো যসস্সী গহট্ঠপব্বজিতানন্তি ৰা, লাভিম্হি চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ৰা, সুত্তন্তিকোতি ৰা ৰিনযধরোতি ৰা ধম্মকথিকোতি ৰা, আরঞ্ঞিকোতি ৰা পিণ্ডপাতিকোতি ৰা পংসুকূলিকোতি ৰা তেচীৰরিকোতি ৰা, সপদানচারিকোতি ৰা খলুপচ্ছাভত্তিকোতি ৰা নেসজ্জিকোতি ৰা যথাসন্থতিকোতি ৰা, পঠমস্স ঝানস্স লাভীতি ৰা দুতিযস্স ঝানস্স লাভীতি ৰা ততিযস্স ঝানস্স লাভীতি ৰা চতুত্থস্স ঝানস্স লাভীতি ৰা, আকাসানঞ্চাযতনসমাপত্তিযা… ৰিঞ্ঞাণঞ্চাযতনসমাপত্তিযা… আকিঞ্চঞ্ঞাযতনসমাপত্তিযা… নেৰসঞ্ঞানাসঞ্ঞাযতনসমাপত্তিযা লাভীতি ৰা কত্থতি ৰিকত্থতি। এৰং ন কত্থতি ন ৰিকত্থতি, কত্থনা ৰিকত্থনা আরতো ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – অৰিকত্থী।

Avikatthī akukkucoti. Idhekacco katthī hoti vikatthī, so katthati vikatthati – ahamasmi sīlasampannoti vā vatasampannoti vā sīlabbatasampannoti vā jātiyā vā gottena vā kolaputtiyena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjāṭṭhānena vā sutena vā paṭibhānena vā aññataraññatarena vā vatthunā. Uccā kulā pabbajitoti vā mahākulā pabbajitoti vā, mahābhogakulā pabbajitoti vā uḷārabhogakulā pabbajitoti vā, ñāto yasassī gahaṭṭhapabbajitānanti vā, lābhimhi cīvarapiṇḍapātasenāsanagilānapaccayabhesajjaparikkhārānanti vā, suttantikoti vā vinayadharoti vā dhammakathikoti vā, āraññikoti vā piṇḍapātikoti vā paṃsukūlikoti vā tecīvarikoti vā, sapadānacārikoti vā khalupacchābhattikoti vā nesajjikoti vā yathāsanthatikoti vā, paṭhamassa jhānassa lābhīti vā dutiyassa jhānassa lābhīti vā tatiyassa jhānassa lābhīti vā catutthassa jhānassa lābhīti vā, ākāsānañcāyatanasamāpattiyā… viññāṇañcāyatanasamāpattiyā… ākiñcaññāyatanasamāpattiyā… nevasaññānāsaññāyatanasamāpattiyā lābhīti vā katthati vikatthati. Evaṃ na katthati na vikatthati, katthanā vikatthanā ārato virato paṭivirato nikkhanto nissaṭo vippamutto visaññutto vimariyādikatena cetasā viharatīti – avikatthī.

অকুক্কুচোতি। কুক্কুচ্চন্তি হত্থকুক্কুচ্চম্পি কুক্কুচ্চং, পাদকুক্কুচ্চম্পি কুক্কুচ্চং, হত্থপাদকুক্কুচ্চম্পি কুক্কুচ্চং, অকপ্পিযে কপ্পিযসঞ্ঞিতা কপ্পিযে অকপ্পিযসঞ্ঞিতা, ৰিকালে কালসঞ্ঞিতা কালে ৰিকালসঞ্ঞিতা, অৰজ্জে ৰজ্জসঞ্ঞিতা ৰজ্জে অৰজ্জসঞ্ঞিতা; যং এৰরূপং কুক্কুচ্চং কুক্কুচ্চাযনা কুক্কুচ্চাযিতত্তং চেতসো ৰিপ্পটিসারো মনোৰিলেখো – ইদং ৰুচ্চতি কুক্কুচ্চং।

Akukkucoti. Kukkuccanti hatthakukkuccampi kukkuccaṃ, pādakukkuccampi kukkuccaṃ, hatthapādakukkuccampi kukkuccaṃ, akappiye kappiyasaññitā kappiye akappiyasaññitā, vikāle kālasaññitā kāle vikālasaññitā, avajje vajjasaññitā vajje avajjasaññitā; yaṃ evarūpaṃ kukkuccaṃ kukkuccāyanā kukkuccāyitattaṃ cetaso vippaṭisāro manovilekho – idaṃ vuccati kukkuccaṃ.

অপি চ দ্ৰীহি কারণেহি উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো কতত্তা চ অকতত্তা চ। কথং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো? ‘‘কতং মে কাযদুচ্চরিতং, অকতং মে কাযসুচরিত’’ন্তিউপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘কতং মে ৰচীদুচ্চরিতং, অকতং মে ৰচীসুচরিতং… কতং মে মনোদুচ্চরিতং, অকতং মে মনোসুচরিত’’ন্তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘কতো মে পাণাতিপাতো, অকতা মে পাণাতিপাতা ৰেরমণী’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘কতং মে অদিন্নাদানং , অকতা মে অদিন্নাদানা ৰেরমণী’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘কতো মে কামেসুমিচ্ছাচারো, অকতা মে কামেসুমিচ্ছাচারা ৰেরমণী’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘কতো মে মুসাৰাদো, অকতা মে মুসাৰাদা ৰেরমণী’’তি… ‘‘কতা মে পিসুণা ৰাচা, অকতা মে পিসুণায ৰাচায ৰেরমণী’’তি… ‘‘কতা মে ফরুসা ৰাচা, অকতা মে ফরুসায ৰাচায ৰেরমণী’’তি… ‘‘কতো মে সম্ফপ্পলাপো, অকতা মে সম্ফপ্পলাপা ৰেরমণী’’তি… ‘‘কতা মে অভিজ্ঝা, অকতা মে অনভিজ্ঝা’’তি… ‘‘কতো মে ব্যাপাদো, অকতো মে অব্যাপাদো’’তি… ‘‘কতা মে মিচ্ছাদিট্ঠি, অকতা মে সম্মাদিট্ঠী’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। এৰং কতত্তা চ অকতত্তা চ উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো।

Api ca dvīhi kāraṇehi uppajjati kukkuccaṃ cetaso vippaṭisāro manovilekho katattā ca akatattā ca. Kathaṃ katattā ca akatattā ca uppajjati kukkuccaṃ cetaso vippaṭisāro manovilekho? ‘‘Kataṃ me kāyaduccaritaṃ, akataṃ me kāyasucarita’’ntiuppajjati kukkuccaṃ cetaso vippaṭisāro manovilekho; ‘‘kataṃ me vacīduccaritaṃ, akataṃ me vacīsucaritaṃ… kataṃ me manoduccaritaṃ, akataṃ me manosucarita’’nti – uppajjati kukkuccaṃ cetaso vippaṭisāro manovilekho; ‘‘kato me pāṇātipāto, akatā me pāṇātipātā veramaṇī’’ti – uppajjati kukkuccaṃ cetaso vippaṭisāro manovilekho; ‘‘kataṃ me adinnādānaṃ , akatā me adinnādānā veramaṇī’’ti – uppajjati kukkuccaṃ cetaso vippaṭisāro manovilekho; ‘‘kato me kāmesumicchācāro, akatā me kāmesumicchācārā veramaṇī’’ti – uppajjati kukkuccaṃ cetaso vippaṭisāro manovilekho; ‘‘kato me musāvādo, akatā me musāvādā veramaṇī’’ti… ‘‘katā me pisuṇā vācā, akatā me pisuṇāya vācāya veramaṇī’’ti… ‘‘katā me pharusā vācā, akatā me pharusāya vācāya veramaṇī’’ti… ‘‘kato me samphappalāpo, akatā me samphappalāpā veramaṇī’’ti… ‘‘katā me abhijjhā, akatā me anabhijjhā’’ti… ‘‘kato me byāpādo, akato me abyāpādo’’ti… ‘‘katā me micchādiṭṭhi, akatā me sammādiṭṭhī’’ti – uppajjati kukkuccaṃ cetaso vippaṭisāro manovilekho. Evaṃ katattā ca akatattā ca uppajjati kukkuccaṃ cetaso vippaṭisāro manovilekho.

অথ ৰা ‘‘সীলেসুম্হি ন পরিপূরকারী’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো; ‘‘ইন্দ্রিযেসুম্হি অগুত্তদ্ৰারো’’তি… ‘‘ভোজনে অমত্তঞ্ঞুম্হী’’তি… ‘‘জাগরিযং অননুযুত্তোম্হী’’তি… ‘‘ন সতিসম্পজঞ্ঞেন সমন্নাগতোম্হী’’তি… ‘‘অভাৰিতা মে চত্তারো সতিপট্ঠানা’’তি… ‘‘অভাৰিতা মে চত্তারো সম্মপ্পধানা’’তি… ‘‘অভাৰিতা মে চত্তারো ইদ্ধিপাদা’’তি… ‘‘অভাৰিতানি মে পঞ্চিন্দ্রিযানী’’তি… ‘‘অভাৰিতানি মে পঞ্চ বলানী’’তি… ‘‘অভাৰিতা মে সত্ত বোজ্ঝঙ্গা’’তি… ‘‘অভাৰিতো মে অরিযো অট্ঠঙ্গিকো মগ্গো’’তি… ‘‘দুক্খং মে অপরিঞ্ঞাত’’ন্তি… ‘‘সমুদযো মে অপ্পহীনো’’তি… ‘‘মগ্গো মে অভাৰিতো’’তি… ‘‘নিরোধো মে অসচ্ছিকতো’’তি – উপ্পজ্জতি কুক্কুচ্চং চেতসো ৰিপ্পটিসারো মনোৰিলেখো। যস্সেতং কুক্কুচ্চং পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢং, সো ৰুচ্চতি অকুক্কুচ্চোতি – অৰিকত্থী অকুক্কুচো।

Atha vā ‘‘sīlesumhi na paripūrakārī’’ti – uppajjati kukkuccaṃ cetaso vippaṭisāro manovilekho; ‘‘indriyesumhi aguttadvāro’’ti… ‘‘bhojane amattaññumhī’’ti… ‘‘jāgariyaṃ ananuyuttomhī’’ti… ‘‘na satisampajaññena samannāgatomhī’’ti… ‘‘abhāvitā me cattāro satipaṭṭhānā’’ti… ‘‘abhāvitā me cattāro sammappadhānā’’ti… ‘‘abhāvitā me cattāro iddhipādā’’ti… ‘‘abhāvitāni me pañcindriyānī’’ti… ‘‘abhāvitāni me pañca balānī’’ti… ‘‘abhāvitā me satta bojjhaṅgā’’ti… ‘‘abhāvito me ariyo aṭṭhaṅgiko maggo’’ti… ‘‘dukkhaṃ me apariññāta’’nti… ‘‘samudayo me appahīno’’ti… ‘‘maggo me abhāvito’’ti… ‘‘nirodho me asacchikato’’ti – uppajjati kukkuccaṃ cetaso vippaṭisāro manovilekho. Yassetaṃ kukkuccaṃ pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhaṃ, so vuccati akukkuccoti – avikatthī akukkuco.

মন্তভাণী অনুদ্ধতোতি। মন্তা ৰুচ্চতি পঞ্ঞা। যা পঞ্ঞা পজাননা…পে॰… অমোহো ধম্মৰিচযো সম্মাদিট্ঠি। মন্তায পরিগ্গহেত্ৰা পরিগ্গহেত্ৰা ৰাচং ভাসতি বহুম্পি কথেন্তো বহুম্পি ভণন্তো বহুম্পি দীপযন্তো বহুম্পি ৰোহরন্তো। দুক্কথিতং দুব্ভণিতং দুল্লপিতং দুরুত্তং দুব্ভাসিতং ৰাচং ন ভাসতীতি – মন্তভাণী। অনুদ্ধতোতি। তত্থ কতমং উদ্ধচ্চং? যং চিত্তস্স উদ্ধচ্চং অৰূপসমো চেতসো ৰিক্খেপো ভন্তত্তং চিত্তস্স – ইদং ৰুচ্চতি উদ্ধচ্চং। যস্সেতং উদ্ধচ্চং পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢং, সো ৰুচ্চতি অনুদ্ধতোতি – মন্তভাণী অনুদ্ধতো।

Mantabhāṇī anuddhatoti. Mantā vuccati paññā. Yā paññā pajānanā…pe… amoho dhammavicayo sammādiṭṭhi. Mantāya pariggahetvā pariggahetvā vācaṃ bhāsati bahumpi kathento bahumpi bhaṇanto bahumpi dīpayanto bahumpi voharanto. Dukkathitaṃ dubbhaṇitaṃ dullapitaṃ duruttaṃ dubbhāsitaṃ vācaṃ na bhāsatīti – mantabhāṇī. Anuddhatoti. Tattha katamaṃ uddhaccaṃ? Yaṃ cittassa uddhaccaṃ avūpasamo cetaso vikkhepo bhantattaṃ cittassa – idaṃ vuccati uddhaccaṃ. Yassetaṃ uddhaccaṃ pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhaṃ, so vuccati anuddhatoti – mantabhāṇī anuddhato.

স ৰে ৰাচাযতো মুনীতি। ইধ ভিক্খু মুসাৰাদং পহায মুসাৰাদা পটিৰিরতো হোতি সচ্চৰাদী সচ্চসন্ধো থেতো পচ্চযিকো অৰিসংৰাদকো লোকস্স। পিসুণং ৰাচং পহায পিসুণায ৰাচায পটিৰিরতো হোতি – ইতো সুত্ৰা ন অমুত্র অক্খাতা ইমেসং ভেদায, অমুত্র ৰা সুত্ৰা ন ইমেসং অক্খাতা অমূসং ভেদায। ইতি ভিন্নানং ৰা সন্ধাতা, সহিতানং ৰা অনুপ্পদাতা, সমগ্গারামো সমগ্গরতো সমগ্গনন্দী সমগ্গকরণিং ৰাচং ভাসিতা হোতি। ফরুসং ৰাচং পহায ফরুসায ৰাচায পটিৰিরতো হোতি – যা সা ৰাচা নেলা কণ্ণসুখা পেমনীযা হদযঙ্গমা পোরী বহুজনকন্তা বহুজনমনাপা তথারূপিং ৰাচং ভাসিতা হোতি। সম্ফপ্পলাপং পহায সম্ফপ্পলাপা পটিৰিরতো হোতি – কালৰাদী ভূতৰাদী অত্থৰাদী ধম্মৰাদী ৰিনযৰাদী নিধানৰতিং ৰাচং ভাসিতা হোতি কালেন সাপদেসং পরিযন্তৰতিং অত্থসংহিতং। চতূহি ৰচীসুচরিতেহি সমন্নাগতো চতুদ্দোসাপগতং ৰাচং ভাসতি, বাত্তিংসায তিরচ্ছানকথায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতি।

Sa ve vācāyato munīti. Idha bhikkhu musāvādaṃ pahāya musāvādā paṭivirato hoti saccavādī saccasandho theto paccayiko avisaṃvādako lokassa. Pisuṇaṃ vācaṃ pahāya pisuṇāya vācāya paṭivirato hoti – ito sutvā na amutra akkhātā imesaṃ bhedāya, amutra vā sutvā na imesaṃ akkhātā amūsaṃ bhedāya. Iti bhinnānaṃ vā sandhātā, sahitānaṃ vā anuppadātā, samaggārāmo samaggarato samagganandī samaggakaraṇiṃ vācaṃ bhāsitā hoti. Pharusaṃ vācaṃ pahāya pharusāya vācāya paṭivirato hoti – yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti. Samphappalāpaṃ pahāya samphappalāpā paṭivirato hoti – kālavādī bhūtavādī atthavādī dhammavādī vinayavādī nidhānavatiṃ vācaṃ bhāsitā hoti kālena sāpadesaṃ pariyantavatiṃ atthasaṃhitaṃ. Catūhi vacīsucaritehi samannāgato catuddosāpagataṃ vācaṃ bhāsati, bāttiṃsāya tiracchānakathāya ārato assa virato paṭivirato nikkhanto nissaṭo vippamutto visaññutto vimariyādikatena cetasā viharati.

দস কথাৰত্থূনি কথেসি, সেয্যথিদং – অপ্পিচ্ছকথং কথেতি, সন্তুট্ঠীকথং কথেতি, পৰিৰেককথং… অসংসগ্গকথং… ৰীরিযারম্ভকথং… সীলকথং… সমাধিকথং… পঞ্ঞাকথং… ৰিমুত্তিকথং … ৰিমুত্তিঞাণদস্সনকথং… সতিপট্ঠানকথং… সম্মপ্পধানকথং… ইদ্ধিপাদকথং… ইন্দ্রিযকথং… বলকথং… বোজ্ঝঙ্গকথং… মগ্গকথং… ফলকথং… নিব্বানকথং কথেতি। ৰাচাযতোতি যত্তো পরিযত্তো গুত্তো গোপিতো রক্খিতো ৰূপসন্তো। মুনীতি। মোনং ৰুচ্চতি ঞাণং। যা পঞ্ঞা পজাননা…পে॰… অমোহো ধম্মৰিচযো সম্মাদিট্ঠি…পে॰… সঙ্গজালমতিচ্চ সো মুনীতি – স ৰে ৰাচাযতো মুনি।

Dasa kathāvatthūni kathesi, seyyathidaṃ – appicchakathaṃ katheti, santuṭṭhīkathaṃ katheti, pavivekakathaṃ… asaṃsaggakathaṃ… vīriyārambhakathaṃ… sīlakathaṃ… samādhikathaṃ… paññākathaṃ… vimuttikathaṃ … vimuttiñāṇadassanakathaṃ… satipaṭṭhānakathaṃ… sammappadhānakathaṃ… iddhipādakathaṃ… indriyakathaṃ… balakathaṃ… bojjhaṅgakathaṃ… maggakathaṃ… phalakathaṃ… nibbānakathaṃ katheti. Vācāyatoti yatto pariyatto gutto gopito rakkhito vūpasanto. Munīti. Monaṃ vuccati ñāṇaṃ. Yā paññā pajānanā…pe… amoho dhammavicayo sammādiṭṭhi…pe… saṅgajālamaticca so munīti – sa ve vācāyato muni.

তেনাহ ভগৰা –

Tenāha bhagavā –

‘‘অক্কোধনো অসন্তাসী, অৰিকত্থী অকুক্কুচো।

‘‘Akkodhano asantāsī, avikatthī akukkuco;

মন্তভাণী অনুদ্ধতো, স ৰে ৰাচাযতো মুনী’’তি॥

Mantabhāṇī anuddhato, sa ve vācāyato munī’’ti.

৮৬.

86.

নিরাসত্তি অনাগতে, অতীতং নানুসোচতি।

Nirāsattianāgate, atītaṃ nānusocati;

ৰিৰেকদস্সী ফস্সেসু, দিট্ঠীসু চ ন নীযতি॥

Vivekadassī phassesu, diṭṭhīsu ca na nīyati.

নিরাসত্তি অনাগতেতি। আসত্তি ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। যস্সেসা আসত্তি তণ্হা পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি। এৰম্পি নিরাসত্তি অনাগতে। অথ ৰা ‘‘এৰংরূপো সিযং অনাগতমদ্ধান’’ন্তি তত্থ নন্দিং ন সমন্নানেতি, ‘‘এৰংৰেদনো সিযং… এৰংসঞ্ঞো সিযং… এৰংসঙ্খারো সিযং… এৰংৰিঞ্ঞাণো সিযং অনাগতমদ্ধান’’ন্তি তত্থ নন্দিং ন সমন্নানেতি। এৰম্পি নিরাসত্তি অনাগতে। অথ ৰা ‘‘ইতি মে চক্খু সিযা অনাগতমদ্ধানং – ইতি রূপা’’তি অপ্পটিলদ্ধস্স পটিলাভায চিত্তং ন পণিদহতি , চেতসো অপ্পণিধানপ্পচ্চযা ন তদভিনন্দতি; ন তদভিনন্দন্তো। এৰম্পি নিরাসত্তি অনাগতে। ‘‘ইতি মে সোতং সিযা অনাগতমদ্ধানং – ইতি সদ্দা’’তি…পে॰… ‘‘ইতি মে মনো সিযা অনাগতমদ্ধানং – ইতি ধম্মা’’তি অপ্পটিলদ্ধস্স পটিলাভায চিত্তং ন পণিদহতি, চেতসো অপ্পণিধানপ্পচ্চযা ন তদভিনন্দতি; ন তদভিনন্দন্তো। এৰম্পি নিরাসত্তি অনাগতে। অথ ৰা ‘‘ইমিনাহং সীলেন ৰা ৰতেন ৰা তপেন ৰা ব্রহ্মচরিযেন ৰা দেৰো ৰা ভৰিস্সামি দেৰঞ্ঞতরো ৰা’’তি অপ্পটিলদ্ধস্স পটিলাভায চিত্তং ন পণিদহতি, চেতসো অপ্পণিধানপ্পচ্চযা ন তদভিনন্দতি; ন তদভিনন্দন্তো। এৰম্পি নিরাসত্তি অনাগতে।

Nirāsatti anāgateti. Āsatti vuccati taṇhā. Yo rāgo sārāgo…pe… abhijjhā lobho akusalamūlaṃ. Yassesā āsatti taṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti. Evampi nirāsatti anāgate. Atha vā ‘‘evaṃrūpo siyaṃ anāgatamaddhāna’’nti tattha nandiṃ na samannāneti, ‘‘evaṃvedano siyaṃ… evaṃsañño siyaṃ… evaṃsaṅkhāro siyaṃ… evaṃviññāṇo siyaṃ anāgatamaddhāna’’nti tattha nandiṃ na samannāneti. Evampi nirāsatti anāgate. Atha vā ‘‘iti me cakkhu siyā anāgatamaddhānaṃ – iti rūpā’’ti appaṭiladdhassa paṭilābhāya cittaṃ na paṇidahati , cetaso appaṇidhānappaccayā na tadabhinandati; na tadabhinandanto. Evampi nirāsatti anāgate. ‘‘Iti me sotaṃ siyā anāgatamaddhānaṃ – iti saddā’’ti…pe… ‘‘iti me mano siyā anāgatamaddhānaṃ – iti dhammā’’ti appaṭiladdhassa paṭilābhāya cittaṃ na paṇidahati, cetaso appaṇidhānappaccayā na tadabhinandati; na tadabhinandanto. Evampi nirāsatti anāgate. Atha vā ‘‘imināhaṃ sīlena vā vatena vā tapena vā brahmacariyena vā devo vā bhavissāmi devaññataro vā’’ti appaṭiladdhassa paṭilābhāya cittaṃ na paṇidahati, cetaso appaṇidhānappaccayā na tadabhinandati; na tadabhinandanto. Evampi nirāsatti anāgate.

অতীতং নানুসোচতীতি। ৰিপরিণতং ৰা ৰত্থুং ন সোচতি, ৰিপরিণতস্মিং ৰা ৰত্থুস্মিং ন সোচতি, ‘‘চক্খু মে ৰিপরিণত’’ন্তি ন সোচতি, ‘‘সোতং মে… ঘানং মে… জিৰ্হা মে… কাযো মে… রূপা মে… সদ্দা মে… গন্ধা মে… রসা মে… ফোট্ঠব্বা মে… কুলং মে… গণো মে… আৰাসো মে… লাভো মে… যসো মে… পসংসা মে… সুখং মে… চীৰরং মে… পিণ্ডপাতো মে… সেনাসনং মে… গিলানপচ্চযভেসজ্জপরিক্খারো মে… মাতা মে… পিতা মে… ভাতা মে… ভগিনী মে… পুত্তো মে… ধীতা মে… মিত্তা মে… অমচ্চা মে… ঞাতকা মে… সালোহিতা মে ৰিপরিণতা’’তি ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতীতি – অতীতং নানুসোচতি।

Atītaṃ nānusocatīti. Vipariṇataṃ vā vatthuṃ na socati, vipariṇatasmiṃ vā vatthusmiṃ na socati, ‘‘cakkhu me vipariṇata’’nti na socati, ‘‘sotaṃ me… ghānaṃ me… jivhā me… kāyo me… rūpā me… saddā me… gandhā me… rasā me… phoṭṭhabbā me… kulaṃ me… gaṇo me… āvāso me… lābho me… yaso me… pasaṃsā me… sukhaṃ me… cīvaraṃ me… piṇḍapāto me… senāsanaṃ me… gilānapaccayabhesajjaparikkhāro me… mātā me… pitā me… bhātā me… bhaginī me… putto me… dhītā me… mittā me… amaccā me… ñātakā me… sālohitā me vipariṇatā’’ti na socati na kilamati na paridevati na urattāḷiṃ kandati na sammohaṃ āpajjatīti – atītaṃ nānusocati.

ৰিৰেকদস্সী ফস্সেসূতি। চক্খুসম্ফস্সো সোতসম্ফস্সো ঘানসম্ফস্সো জিৰ্হাসম্ফস্সো কাযসম্ফস্সো মনোসম্ফস্সো, অধিৰচনসম্ফস্সো পটিঘসম্ফস্সো, সুখৰেদনীযো ফস্সো দুক্খৰেদনীযো ফস্সো অদুক্খমসুখৰেদনীযো ফস্সো, কুসলো ফস্সো অকুসলো ফস্সো অব্যাকতো ফস্সো, কামাৰচরো ফস্সো রূপাৰচরো ফস্সো অরূপাৰচরো ফস্সো, সুঞ্ঞতো ফস্সো অনিমিত্তো ফস্সো অপ্পণিহিতো ফস্সো, লোকিযো ফস্সো লোকুত্তরো ফস্সো, অতীতো ফস্সো অনাগতো ফস্সো পচ্চুপ্পন্নো ফস্সো; যো এৰরূপো ফস্সো ফুসনা সম্ফুসনা সম্ফুসিতত্তং – অযং ৰুচ্চতি ফস্সো।

Vivekadassīphassesūti. Cakkhusamphasso sotasamphasso ghānasamphasso jivhāsamphasso kāyasamphasso manosamphasso, adhivacanasamphasso paṭighasamphasso, sukhavedanīyo phasso dukkhavedanīyo phasso adukkhamasukhavedanīyo phasso, kusalo phasso akusalo phasso abyākato phasso, kāmāvacaro phasso rūpāvacaro phasso arūpāvacaro phasso, suññato phasso animitto phasso appaṇihito phasso, lokiyo phasso lokuttaro phasso, atīto phasso anāgato phasso paccuppanno phasso; yo evarūpo phasso phusanā samphusanā samphusitattaṃ – ayaṃ vuccati phasso.

ৰিৰেকদস্সী ফস্সেসূতি। চক্খুসম্ফস্সং ৰিৰিত্তং পস্সতি অত্তেন ৰা অত্তনিযেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা, সোতসম্ফস্সং ৰিৰিত্তং পস্সতি… ঘানসম্ফস্সং ৰিৰিত্তং পস্সতি… জিৰ্হাসম্ফস্সং ৰিৰিত্তং পস্সতি… কাযসম্ফস্সং ৰিৰিত্তং পস্সতি… মনোসম্ফস্সং ৰিৰিত্তং পস্সতি… অধিৰচনসম্ফস্সং ৰিৰিত্তং পস্সতি… পটিঘসম্ফস্সং ৰিৰিত্তং পস্সতি… সুখৰেদনীযং ফস্সং… দুক্খৰেদনীযং ফস্সং… অদুক্খমসুখৰেদনীযং ফস্সং… কুসলং ফস্সং… অকুসলং ফস্সং… অব্যাকতং ফস্সং… কামাৰচরং ফস্সং… রূপাৰচরং ফস্সং… অরূপাৰচরং ফস্সং… লোকিযং ফস্সং ৰিৰিত্তং পস্সতি অত্তেন ৰা অত্তনিযেন ৰা নিচ্চেন ৰা ধুৰেন ৰা সস্সতেন ৰা অৰিপরিণামধম্মেন ৰা।

Vivekadassī phassesūti. Cakkhusamphassaṃ vivittaṃ passati attena vā attaniyena vā niccena vā dhuvena vā sassatena vā avipariṇāmadhammena vā, sotasamphassaṃ vivittaṃ passati… ghānasamphassaṃ vivittaṃ passati… jivhāsamphassaṃ vivittaṃ passati… kāyasamphassaṃ vivittaṃ passati… manosamphassaṃ vivittaṃ passati… adhivacanasamphassaṃ vivittaṃ passati… paṭighasamphassaṃ vivittaṃ passati… sukhavedanīyaṃ phassaṃ… dukkhavedanīyaṃ phassaṃ… adukkhamasukhavedanīyaṃ phassaṃ… kusalaṃ phassaṃ… akusalaṃ phassaṃ… abyākataṃ phassaṃ… kāmāvacaraṃ phassaṃ… rūpāvacaraṃ phassaṃ… arūpāvacaraṃ phassaṃ… lokiyaṃ phassaṃ vivittaṃ passati attena vā attaniyena vā niccena vā dhuvena vā sassatena vā avipariṇāmadhammena vā.

অথ ৰা অতীতং ফস্সং অনাগতেহি চ পচ্চুপ্পন্নেহি চ ফস্সেহি ৰিৰিত্তং পস্সতি, অনাগতং ফস্সং অতীতেহি চ পচ্চুপ্পন্নেহি চ ফস্সেহি ৰিৰিত্তং পস্সতি, পচ্চুপ্পন্নং ফস্সং অতীতেহি চ অনাগতেহি চ ফস্সেহি ৰিৰিত্তং পস্সতি। অথ ৰা যে তে ফস্সা অরিযা অনাসৰা লোকুত্তরা সুঞ্ঞতপটিসঞ্ঞুত্তা, তে ফস্সে ৰিৰিত্তে পস্সতি রাগেন দোসেন মোহেন কোধেন উপনাহেন মক্খেন পল়াসেন ইস্সায মচ্ছরিযেন মাযায সাঠেয্যেন থম্ভেন সারম্ভেন মানেন অতিমানেন মদেন পমাদেন সব্বকিলেসেহি সব্বদুচ্চরিতেহি সব্বদরথেহি সব্বপরিল়াহেহি সব্বসন্তাপেহি সব্বাকুসলাভিসঙ্খারেহি ৰিৰিত্তে পস্সতীতি – ৰিৰেকদস্সী ফস্সেসু।

Atha vā atītaṃ phassaṃ anāgatehi ca paccuppannehi ca phassehi vivittaṃ passati, anāgataṃ phassaṃ atītehi ca paccuppannehi ca phassehi vivittaṃ passati, paccuppannaṃ phassaṃ atītehi ca anāgatehi ca phassehi vivittaṃ passati. Atha vā ye te phassā ariyā anāsavā lokuttarā suññatapaṭisaññuttā, te phasse vivitte passati rāgena dosena mohena kodhena upanāhena makkhena paḷāsena issāya macchariyena māyāya sāṭheyyena thambhena sārambhena mānena atimānena madena pamādena sabbakilesehi sabbaduccaritehi sabbadarathehi sabbapariḷāhehi sabbasantāpehi sabbākusalābhisaṅkhārehi vivitte passatīti – vivekadassī phassesu.

দিট্ঠীসু চ ন নীযতীতি। তস্স দ্ৰাসট্ঠি দিট্ঠিগতানি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি। সো দিট্ঠিযা ন যাযতি ন নীযতি ন ৰুয্হতি ন সংহরীযতি; নপি তং দিট্ঠিগতং সারতো পচ্চেতি ন পচ্চাগচ্ছতীতি – দিট্ঠীসু চ ন নীযতি।

Diṭṭhīsu ca na nīyatīti. Tassa dvāsaṭṭhi diṭṭhigatāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni. So diṭṭhiyā na yāyati na nīyati na vuyhati na saṃharīyati; napi taṃ diṭṭhigataṃ sārato pacceti na paccāgacchatīti – diṭṭhīsu ca na nīyati.

তেনাহ ভগৰা –

Tenāha bhagavā –

‘‘নিরাসত্তি অনাগতে, অতীতং নানুসোচতি।

‘‘Nirāsatti anāgate, atītaṃ nānusocati;

ৰিৰেকদস্সী ফস্সেসু, দিট্ঠীসু চ ন নীযতী’’তি॥

Vivekadassī phassesu, diṭṭhīsu ca na nīyatī’’ti.

৮৭.

87.

পতিলীনো অকুহকো, অপিহালু অমচ্ছরী।

Patilīno akuhako, apihālu amaccharī;

অপ্পগব্ভো অজেগুচ্ছো, পেসুণেয্যে চ নো যুতো॥

Appagabbho ajeguccho, pesuṇeyye ca no yuto.

পতিলীনো অকুহকোতি। পতিলীনোতি রাগস্স পহীনত্তা পতিলীনো, দোসস্স পহীনত্তা পতিলীনো, মোহস্স পহীনত্তা পতিলীনো, কোধস্স… উপনাহস্স … মক্খস্স… পল়াসস্স… ইস্সায… মচ্ছরিযস্স…পে॰… সব্বাকুসলাভিসঙ্খারানং পহীনত্তা পতিলীনো। ৰুত্তঞ্হেতং ভগৰতা – ‘‘কথঞ্চ, ভিক্খৰে, ভিক্খু পতিলীনো হোতি? ইমস্স, ভিক্খৰে, ভিক্খুনো অস্মিমানো পহীনো হোতি উচ্ছিন্নমূলো তালাৰত্থুকতো অনভাৰংকতো আযতিং অনুপ্পাদধম্মো। এৰং খো, ভিক্খৰে, ভিক্খু পতিলীনো হোতী’’তি – পতিলীনো।

Patilīno akuhakoti. Patilīnoti rāgassa pahīnattā patilīno, dosassa pahīnattā patilīno, mohassa pahīnattā patilīno, kodhassa… upanāhassa … makkhassa… paḷāsassa… issāya… macchariyassa…pe… sabbākusalābhisaṅkhārānaṃ pahīnattā patilīno. Vuttañhetaṃ bhagavatā – ‘‘kathañca, bhikkhave, bhikkhu patilīno hoti? Imassa, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṃkato āyatiṃ anuppādadhammo. Evaṃ kho, bhikkhave, bhikkhu patilīno hotī’’ti – patilīno.

অকুহকোতি তীণি কুহনৰত্থূনি – পচ্চযপটিসেৰনসঙ্খাতং কুহনৰত্থু, ইরিযাপথসঙ্খাতং কুহনৰত্থু, সামন্তজপ্পনসঙ্খাতং কুহনৰত্থু।

Akuhakoti tīṇi kuhanavatthūni – paccayapaṭisevanasaṅkhātaṃ kuhanavatthu, iriyāpathasaṅkhātaṃ kuhanavatthu, sāmantajappanasaṅkhātaṃ kuhanavatthu.

কতমং পচ্চযপটিসেৰনসঙ্খাতং কুহনৰত্থু? ইধ গহপতিকা ভিক্খুং নিমন্তেন্তি চীৰরপিণ্ডপাতসেনাসনগিলানপচ্চযভেসজ্জপরিক্খারেহি। সো পাপিচ্ছো ইচ্ছাপকতো অত্থিকো চীৰরপিণ্ডপাতসেনাসনগিলানপচ্চযভেসজ্জপরিক্খারানং ভিয্যোকম্যতং উপাদায চীৰরং পচ্চক্খাতি, পিণ্ডপাতং পচ্চক্খাতি, সেনাসনং পচ্চক্খাতি, গিলানপচ্চযভেসজ্জপরিক্খারং পচ্চক্খাতি। সো এৰমাহ – ‘‘কিং সমণস্স মহগ্ঘেন চীৰরেন! এতং সারুপ্পং যং সমণো সুসানা ৰা সঙ্কারকূটা ৰা পাপণিকা ৰা নন্তকানি উচ্চিনিত্ৰা সঙ্ঘাটিং কত্ৰা ধারেয্য। কিং সমণস্স মহগ্ঘেন পিণ্ডপাতেন ! এতং সারুপ্পং যং সমণো উঞ্ছাচরিযায পিণ্ডিযালোপেন জীৰিকং কপ্পেয্য। কিং সমণস্স মহগ্ঘেন সেনাসনেন! এতং সারুপ্পং যং সমণো রুক্খমূলিকো ৰা অস্স সোসানিকো ৰা অব্ভোকাসিকো ৰা। কিং সমণস্স মহগ্ঘেন গিলানপচ্চযভেসজ্জপরিক্খারেন! এতং সারুপ্পং যং সমণো পূতিমুত্তেন ৰা হরিতকীখণ্ডেন ৰা ওসধং করেয্যা’’তি। তদুপাদায লূখং চীৰরং ধারেতি, লূখং পিণ্ডপাতং পরিভুঞ্জতি, লূখং সেনাসনং পটিসেৰতি , লূখং গিলানপচ্চযভেসজ্জপরিক্খারং পটিসেৰতি। তমেনং গহপতিকা এৰং জানন্তি – ‘‘অযং সমণো অপ্পিচ্ছো সন্তুট্ঠো পৰিৰিত্তো অসংসট্ঠো আরদ্ধৰীরিযো ধুতৰাদো’’তি ভিয্যো ভিয্যো নিমন্তেন্তি চীৰরপিণ্ডপাতসেনাসনগিলানপচ্চযভেসজ্জপরিক্খারেহি। সো এৰমাহ – ‘‘তিণ্ণং সম্মুখীভাৰা সদ্ধো কুলপুত্তো বহুং পুঞ্ঞং পসৰতি। সদ্ধায সম্মুখীভাৰা সদ্ধো কুলপুত্তো বহুং পুঞ্ঞং পসৰতি, দেয্যধম্মস্স সম্মুখীভাৰা সদ্ধো কুলপুত্তো বহুং পুঞ্ঞং পসৰতি, দক্খিণেয্যানং সম্মুখীভাৰা সদ্ধো কুলপুত্তো বহুং পুঞ্ঞং পসৰতি। ‘তুম্হাকঞ্চেৰাযং সদ্ধা অত্থি, দেয্যধম্মো চ সংৰিজ্জতি, অহঞ্চ পটিগ্গাহকো। সচেহং ন পটিগ্গহেস্সামি, এৰং তুম্হে পুঞ্ঞেন পরিবাহিরা ভৰিস্সন্তি। ন ময্হং ইমিনা অত্থো। অপি চ তুম্হাকংযেৰ অনুকম্পায পটিগ্গণ্হামী’’’তি। তদুপাদায বহুম্পি চীৰরং পটিগ্গণ্হাতি, বহুম্পি পিণ্ডপাতং পটিগ্গণ্হাতি, বহুম্পি গিলানপচ্চযভেসজ্জপরিক্খারং পটিগ্গণ্হাতি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং পচ্চযপটিসেৰনসঙ্খাতং কুহনৰত্থু।

Katamaṃ paccayapaṭisevanasaṅkhātaṃ kuhanavatthu? Idha gahapatikā bhikkhuṃ nimantenti cīvarapiṇḍapātasenāsanagilānapaccayabhesajjaparikkhārehi. So pāpiccho icchāpakato atthiko cīvarapiṇḍapātasenāsanagilānapaccayabhesajjaparikkhārānaṃ bhiyyokamyataṃ upādāya cīvaraṃ paccakkhāti, piṇḍapātaṃ paccakkhāti, senāsanaṃ paccakkhāti, gilānapaccayabhesajjaparikkhāraṃ paccakkhāti. So evamāha – ‘‘kiṃ samaṇassa mahagghena cīvarena! Etaṃ sāruppaṃ yaṃ samaṇo susānā vā saṅkārakūṭā vā pāpaṇikā vā nantakāni uccinitvā saṅghāṭiṃ katvā dhāreyya. Kiṃ samaṇassa mahagghena piṇḍapātena ! Etaṃ sāruppaṃ yaṃ samaṇo uñchācariyāya piṇḍiyālopena jīvikaṃ kappeyya. Kiṃ samaṇassa mahagghena senāsanena! Etaṃ sāruppaṃ yaṃ samaṇo rukkhamūliko vā assa sosāniko vā abbhokāsiko vā. Kiṃ samaṇassa mahagghena gilānapaccayabhesajjaparikkhārena! Etaṃ sāruppaṃ yaṃ samaṇo pūtimuttena vā haritakīkhaṇḍena vā osadhaṃ kareyyā’’ti. Tadupādāya lūkhaṃ cīvaraṃ dhāreti, lūkhaṃ piṇḍapātaṃ paribhuñjati, lūkhaṃ senāsanaṃ paṭisevati , lūkhaṃ gilānapaccayabhesajjaparikkhāraṃ paṭisevati. Tamenaṃ gahapatikā evaṃ jānanti – ‘‘ayaṃ samaṇo appiccho santuṭṭho pavivitto asaṃsaṭṭho āraddhavīriyo dhutavādo’’ti bhiyyo bhiyyo nimantenti cīvarapiṇḍapātasenāsanagilānapaccayabhesajjaparikkhārehi. So evamāha – ‘‘tiṇṇaṃ sammukhībhāvā saddho kulaputto bahuṃ puññaṃ pasavati. Saddhāya sammukhībhāvā saddho kulaputto bahuṃ puññaṃ pasavati, deyyadhammassa sammukhībhāvā saddho kulaputto bahuṃ puññaṃ pasavati, dakkhiṇeyyānaṃ sammukhībhāvā saddho kulaputto bahuṃ puññaṃ pasavati. ‘Tumhākañcevāyaṃ saddhā atthi, deyyadhammo ca saṃvijjati, ahañca paṭiggāhako. Sacehaṃ na paṭiggahessāmi, evaṃ tumhe puññena paribāhirā bhavissanti. Na mayhaṃ iminā attho. Api ca tumhākaṃyeva anukampāya paṭiggaṇhāmī’’’ti. Tadupādāya bahumpi cīvaraṃ paṭiggaṇhāti, bahumpi piṇḍapātaṃ paṭiggaṇhāti, bahumpi gilānapaccayabhesajjaparikkhāraṃ paṭiggaṇhāti. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ paccayapaṭisevanasaṅkhātaṃ kuhanavatthu.

কতমং ইরিযাপথসঙ্খাতং কুহনৰত্থু? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো, ‘‘এৰং মং জনো সম্ভাৰেস্সতী’’তি, গমনং সণ্ঠপেতি ঠানং সণ্ঠপেতি নিসজ্জং সণ্ঠপেতি সযনং সণ্ঠপেতি, পণিধায গচ্ছতি পণিধায তিট্ঠতি পণিধায নিসীদতি পণিধায সেয্যং কপ্পেতি, সমাহিতো ৰিয গচ্ছতি সমাহিতো ৰিয তিট্ঠতি সমাহিতো ৰিয নিসীদতি সমাহিতো ৰিয সেয্যং কপ্পেতি, আপাথকজ্ঝাযীৰ হোতি। যা এৰরূপা ইরিযাপথস্স ঠপনা আঠপনা ¹¹ সণ্ঠপনা ভাকুটিকা ভাকুটিযং কুহনা কুহাযনা কুহিতত্তং – ইদং ইরিযাপথসঙ্খাতং কুহনৰত্থু।

Katamaṃ iriyāpathasaṅkhātaṃ kuhanavatthu? Idhekacco pāpiccho icchāpakato sambhāvanādhippāyo, ‘‘evaṃ maṃ jano sambhāvessatī’’ti, gamanaṃ saṇṭhapeti ṭhānaṃ saṇṭhapeti nisajjaṃ saṇṭhapeti sayanaṃ saṇṭhapeti, paṇidhāya gacchati paṇidhāya tiṭṭhati paṇidhāya nisīdati paṇidhāya seyyaṃ kappeti, samāhito viya gacchati samāhito viya tiṭṭhati samāhito viya nisīdati samāhito viya seyyaṃ kappeti, āpāthakajjhāyīva hoti. Yā evarūpā iriyāpathassa ṭhapanā āṭhapanā ¹² saṇṭhapanā bhākuṭikā bhākuṭiyaṃ kuhanā kuhāyanā kuhitattaṃ – idaṃ iriyāpathasaṅkhātaṃ kuhanavatthu.

কতমং সামন্তজপ্পনসঙ্খাতং কুহনৰত্থু? ইধেকচ্চো পাপিচ্ছো ইচ্ছাপকতো সম্ভাৰনাধিপ্পাযো, ‘‘এৰং মং জনো সম্ভাৰেস্সতী’’তি, অরিযধম্মসন্নিস্সিতং ৰাচং ভাসতি। ‘‘যো এৰরূপং চীৰরং ধারেতি সো সমণো মহেসক্খো’’তি ভণতি; ‘‘যো এৰরূপং পত্তং ধারেতি… লোহথালকং ধারেতি… ধম্মকরণং ধারেতি… পরিসাৰনং ধারেতি… কুঞ্চিকং ধারেতি… উপাহনং ধারেতি… কাযবন্ধনং ধারেতি… আযোগং ধারেতি সো সমণো মহেসক্খো’’তি ভণতি; ‘‘যস্স এৰরূপো উপজ্ঝাযো সো সমণো মহেসক্খো’’তি ভণতি; ‘‘যস্স এৰরূপো আচরিযো… এৰরূপা সমানুপজ্ঝাযকা… সমানাচরিযকা… মিত্তা… সন্দিট্ঠা… সম্ভত্তা… সহাযা সো সমণো মহেসক্খো’’তি ভণতি; ‘‘যো এৰরূপে ৰিহারে ৰসতি সো সমণো মহেসক্খো’’তি ভণতি; ‘‘যো এৰরূপে অড্ঢযোগে ৰসতি… পাসাদে ৰসতি… হম্মিযে ৰসতি… গুহাযং ৰসতি… লেণে ৰসতি… কুটিযা ৰসতি… কূটাগারে ৰসতি… অট্টে ৰসতি … মাল়ে ৰসতি… উদ্দণ্ডে ৰসতি… উপট্ঠানসালাযং ৰসতি… মণ্ডপে ৰসতি… রুক্খমূলে ৰসতি, সো সমণো মহেসক্খো’’তি ভণতি।

Katamaṃ sāmantajappanasaṅkhātaṃ kuhanavatthu? Idhekacco pāpiccho icchāpakato sambhāvanādhippāyo, ‘‘evaṃ maṃ jano sambhāvessatī’’ti, ariyadhammasannissitaṃ vācaṃ bhāsati. ‘‘Yo evarūpaṃ cīvaraṃ dhāreti so samaṇo mahesakkho’’ti bhaṇati; ‘‘yo evarūpaṃ pattaṃ dhāreti… lohathālakaṃ dhāreti… dhammakaraṇaṃ dhāreti… parisāvanaṃ dhāreti… kuñcikaṃ dhāreti… upāhanaṃ dhāreti… kāyabandhanaṃ dhāreti… āyogaṃ dhāreti so samaṇo mahesakkho’’ti bhaṇati; ‘‘yassa evarūpo upajjhāyo so samaṇo mahesakkho’’ti bhaṇati; ‘‘yassa evarūpo ācariyo… evarūpā samānupajjhāyakā… samānācariyakā… mittā… sandiṭṭhā… sambhattā… sahāyā so samaṇo mahesakkho’’ti bhaṇati; ‘‘yo evarūpe vihāre vasati so samaṇo mahesakkho’’ti bhaṇati; ‘‘yo evarūpe aḍḍhayoge vasati… pāsāde vasati… hammiye vasati… guhāyaṃ vasati… leṇe vasati… kuṭiyā vasati… kūṭāgāre vasati… aṭṭe vasati … māḷe vasati… uddaṇḍe vasati… upaṭṭhānasālāyaṃ vasati… maṇḍape vasati… rukkhamūle vasati, so samaṇo mahesakkho’’ti bhaṇati.

অথ ৰা কোরজিককোরজিকো ¹³ ভাকুটিকভাকুটিকো কুহককুহকো লপকলপকো মুখসম্ভাৰিকো, ‘‘অযং সমণো ইমাসং এৰরূপানং সন্তানং ৰিহারসমাপত্তীনং লাভী’’তি তাদিসং গম্ভীরং গূল়্হং নিপুণং পটিচ্ছন্নং লোকুত্তরং সুঞ্ঞতাপটিসংযুত্তং কথং কথেসি। যা এৰরূপা ভাকুটিকা ভাকুটিযং কুহনা কুহাযনা কুহিতত্তং – ইদং সামন্তজপ্পনসঙ্খাতং কুহনৰত্থু। যস্সিমানি তীণি কুহনৰত্থূনি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি, সো ৰুচ্চতি অকুহকোতি – পতিলীনো অকুহকো।

Atha vā korajikakorajiko ¹⁴ bhākuṭikabhākuṭiko kuhakakuhako lapakalapako mukhasambhāviko, ‘‘ayaṃ samaṇo imāsaṃ evarūpānaṃ santānaṃ vihārasamāpattīnaṃ lābhī’’ti tādisaṃ gambhīraṃ gūḷhaṃ nipuṇaṃ paṭicchannaṃ lokuttaraṃ suññatāpaṭisaṃyuttaṃ kathaṃ kathesi. Yā evarūpā bhākuṭikā bhākuṭiyaṃ kuhanā kuhāyanā kuhitattaṃ – idaṃ sāmantajappanasaṅkhātaṃ kuhanavatthu. Yassimāni tīṇi kuhanavatthūni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni, so vuccati akuhakoti – patilīno akuhako.

অপিহালু অমচ্ছরীতি। পিহা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। যস্সেসা পিহা তণ্হা পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢা, সো ৰুচ্চতি অপিহালু। সো রূপে ন পিহেতি, সদ্দে… গন্ধে… রসে… ফোট্ঠব্বে… কুলং… গণং… আৰাসং… লাভং… যসং… পসংসং… সুখং… চীৰরং… পিণ্ডপাতং… সেনাসনং… গিলানপচ্চযভেসজ্জপরিক্খারং… কামধাতুং… রূপধাতুং… অরূপধাতুং… কামভৰং… রূপভৰং… অরূপভৰং… সঞ্ঞাভৰং… অসঞ্ঞাভৰং … নেৰসঞ্ঞানাসঞ্ঞাভৰং… একৰোকারভৰং… চতুৰোকারভৰং… পঞ্চৰোকারভৰং… অতীতং… অনাগতং… পচ্চুপ্পন্নং… দিট্ঠসুতমুতৰিঞ্ঞাতব্বে ধম্মে ন পিহেতি ন ইচ্ছতি ন সাদিযতি ন পত্থেতি নাভিজপ্পতীতি – অপিহালু। অমচ্ছরীতি পঞ্চ মচ্ছরিযানি – আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং। যং এৰরূপং মচ্ছরং মচ্ছরাযনা মচ্ছরাযিতত্তং ৰেৰিচ্ছং কদরিযং কটুকঞ্চুকতা অগ্গহিতত্তং চিত্তস্স – ইদং ৰুচ্চতি মচ্ছরিযং। অপি চ খন্ধমচ্ছরিযম্পি মচ্ছরিযং, ধাতুমচ্ছরিযম্পি মচ্ছরিযং, আযতনমচ্ছরিযম্পি মচ্ছরিযং গাহো – ইদং ৰুচ্চতি মচ্ছরিযং। যস্সেতং মচ্ছরিযং পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢং, সো ৰুচ্চতি অমচ্ছরীতি – অপিহালু অমচ্ছরী।

Apihālu amaccharīti. Pihā vuccati taṇhā. Yo rāgo sārāgo…pe… abhijjhā lobho akusalamūlaṃ. Yassesā pihā taṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so vuccati apihālu. So rūpe na piheti, sadde… gandhe… rase… phoṭṭhabbe… kulaṃ… gaṇaṃ… āvāsaṃ… lābhaṃ… yasaṃ… pasaṃsaṃ… sukhaṃ… cīvaraṃ… piṇḍapātaṃ… senāsanaṃ… gilānapaccayabhesajjaparikkhāraṃ… kāmadhātuṃ… rūpadhātuṃ… arūpadhātuṃ… kāmabhavaṃ… rūpabhavaṃ… arūpabhavaṃ… saññābhavaṃ… asaññābhavaṃ … nevasaññānāsaññābhavaṃ… ekavokārabhavaṃ… catuvokārabhavaṃ… pañcavokārabhavaṃ… atītaṃ… anāgataṃ… paccuppannaṃ… diṭṭhasutamutaviññātabbe dhamme na piheti na icchati na sādiyati na pattheti nābhijappatīti – apihālu. Amaccharīti pañca macchariyāni – āvāsamacchariyaṃ, kulamacchariyaṃ, lābhamacchariyaṃ, vaṇṇamacchariyaṃ, dhammamacchariyaṃ. Yaṃ evarūpaṃ maccharaṃ maccharāyanā maccharāyitattaṃ vevicchaṃ kadariyaṃ kaṭukañcukatā aggahitattaṃ cittassa – idaṃ vuccati macchariyaṃ. Api ca khandhamacchariyampi macchariyaṃ, dhātumacchariyampi macchariyaṃ, āyatanamacchariyampi macchariyaṃ gāho – idaṃ vuccati macchariyaṃ. Yassetaṃ macchariyaṃ pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhaṃ, so vuccati amaccharīti – apihālu amaccharī.

অপ্পগব্ভো অজেগুচ্ছোতি। পাগব্ভিযন্তি তীণি পাগব্ভিযানি – কাযিকং পাগব্ভিযং, ৰাচসিকং পাগব্ভিযং, চেতসিকং পাগব্ভিযং। কতমং কাযিকং পাগব্ভিযং? ইধেকচ্চো সঙ্ঘগতোপি কাযিকং পাগব্ভিযং দস্সেতি, গণগতোপি কাযিকং পাগব্ভিযং দস্সেতি, ভোজনসালাযম্পি কাযিকং পাগব্ভিযং দস্সেতি, জন্তাঘরেপি কাযিকং পাগব্ভিযং দস্সেতি, উদকতিত্থেপি কাযিকং পাগব্ভিযং দস্সেতি, অন্তরঘরং পৰিসন্তোপি কাযিকং পাগব্ভিযং দস্সেতি, অন্তরঘরং পৰিট্ঠোপি কাযিকং পাগব্ভিযং দস্সেতি।

Appagabbhoajegucchoti. Pāgabbhiyanti tīṇi pāgabbhiyāni – kāyikaṃ pāgabbhiyaṃ, vācasikaṃ pāgabbhiyaṃ, cetasikaṃ pāgabbhiyaṃ. Katamaṃ kāyikaṃ pāgabbhiyaṃ? Idhekacco saṅghagatopi kāyikaṃ pāgabbhiyaṃ dasseti, gaṇagatopi kāyikaṃ pāgabbhiyaṃ dasseti, bhojanasālāyampi kāyikaṃ pāgabbhiyaṃ dasseti, jantāgharepi kāyikaṃ pāgabbhiyaṃ dasseti, udakatitthepi kāyikaṃ pāgabbhiyaṃ dasseti, antaragharaṃ pavisantopi kāyikaṃ pāgabbhiyaṃ dasseti, antaragharaṃ paviṭṭhopi kāyikaṃ pāgabbhiyaṃ dasseti.

কথং সঙ্ঘগতো কাযিকং পাগব্ভিযং দস্সেতি? ইধেকচ্চো সঙ্ঘগতো অচিত্তীকারকতো ¹⁵ থেরে ভিক্খূ ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰাপি নিসীদতি, ঠিতকোপি ভণতি, বাহাৰিক্খেপকোপি ভণতি। এৰং সঙ্ঘগতো কাযিকং পাগব্ভিযং দস্সেতি।

Kathaṃ saṅghagato kāyikaṃ pāgabbhiyaṃ dasseti? Idhekacco saṅghagato acittīkārakato ¹⁶ there bhikkhū ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvāpi nisīdati, ṭhitakopi bhaṇati, bāhāvikkhepakopi bhaṇati. Evaṃ saṅghagato kāyikaṃ pāgabbhiyaṃ dasseti.

কথং গণগতো কাযিকং পাগব্ভিযং দস্সেতি? ইধেকচ্চো গণগতো অচিত্তীকারকতো থেরানং ভিক্খূনং অনুপাহনানং চঙ্কমন্তানং সউপাহনো চঙ্কমতি, নীচে চঙ্কমে চঙ্কমন্তানং উচ্চে চঙ্কমে চঙ্কমতি, ছমায চঙ্কমন্তানং চঙ্কমে চঙ্কমতি, ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰা নিসীদতি, ঠিতকোপি ভণতি, বাহাৰিক্খেপকোপি ভণতি। এৰং গণগতো কাযিকং পাগব্ভিযং দস্সেতি।

Kathaṃ gaṇagato kāyikaṃ pāgabbhiyaṃ dasseti? Idhekacco gaṇagato acittīkārakato therānaṃ bhikkhūnaṃ anupāhanānaṃ caṅkamantānaṃ saupāhano caṅkamati, nīce caṅkame caṅkamantānaṃ ucce caṅkame caṅkamati, chamāya caṅkamantānaṃ caṅkame caṅkamati, ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvā nisīdati, ṭhitakopi bhaṇati, bāhāvikkhepakopi bhaṇati. Evaṃ gaṇagato kāyikaṃ pāgabbhiyaṃ dasseti.

কথং ভোজনসালাযং কাযিকং পাগব্ভিযং দস্সেতি? ইধেকচ্চো ভোজনসালাযং অচিত্তীকারকতো থেরে ভিক্খূ অনুপখজ্জ নিসীদতি, নৰেপি ভিক্খূ আসনেন পটিবাহতি, ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি, সসীসং পারুপিত্ৰাপি নিসীদতি, ঠিতকোপি ভণতি, বাহাৰিক্খেপকোপি ভণতি। এৰং ভোজনসালাযং কাযিকং পাগব্ভিযং দস্সেতি।

Kathaṃ bhojanasālāyaṃ kāyikaṃ pāgabbhiyaṃ dasseti? Idhekacco bhojanasālāyaṃ acittīkārakato there bhikkhū anupakhajja nisīdati, navepi bhikkhū āsanena paṭibāhati, ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati, sasīsaṃ pārupitvāpi nisīdati, ṭhitakopi bhaṇati, bāhāvikkhepakopi bhaṇati. Evaṃ bhojanasālāyaṃ kāyikaṃ pāgabbhiyaṃ dasseti.

কথং জন্তাঘরে কাযিকং পাগব্ভিযং দস্সেতি? ইধেকচ্চো জন্তাঘরে অচিত্তীকারকতো থেরে ভিক্খূ ঘট্টযন্তোপি তিট্ঠতি, ঘট্টযন্তোপি নিসীদতি, পুরতোপি তিট্ঠতি, পুরতোপি নিসীদতি, উচ্চেপি আসনে নিসীদতি , অনাপুচ্ছম্পি অনজ্ঝিট্ঠোপি কট্ঠং পক্খিপতি, দ্ৰারম্পি পিদহতি, বাহাৰিক্খেপকোপি ভণতি। এৰং জন্তাঘরে কাযিকং পাগব্ভিযং দস্সেতি।

Kathaṃ jantāghare kāyikaṃ pāgabbhiyaṃ dasseti? Idhekacco jantāghare acittīkārakato there bhikkhū ghaṭṭayantopi tiṭṭhati, ghaṭṭayantopi nisīdati, puratopi tiṭṭhati, puratopi nisīdati, uccepi āsane nisīdati , anāpucchampi anajjhiṭṭhopi kaṭṭhaṃ pakkhipati, dvārampi pidahati, bāhāvikkhepakopi bhaṇati. Evaṃ jantāghare kāyikaṃ pāgabbhiyaṃ dasseti.

কথং উদকতিত্থে কাযিকং পাগব্ভিযং দস্সেতি? ইধেকচ্চো উদকতিত্থে অচিত্তীকারকতো থেরে ভিক্খূ ঘট্টযন্তোপি ওতরতি, পুরতোপি ওতরতি, ঘট্টযন্তোপি ন্হাযতি ¹⁷, পুরতোপি ন্হাযতি , উপরিতোপি ন্হাযতি, ঘট্টযন্তোপি উত্তরতি, পুরতোপি উত্তরতি, উপরিতোপি উত্তরতি। এৰং উদকতিত্থে কাযিকং পাগব্ভিযং দস্সেতি।

Kathaṃ udakatitthe kāyikaṃ pāgabbhiyaṃ dasseti? Idhekacco udakatitthe acittīkārakato there bhikkhū ghaṭṭayantopi otarati, puratopi otarati, ghaṭṭayantopi nhāyati ¹⁸, puratopi nhāyati , uparitopi nhāyati, ghaṭṭayantopi uttarati, puratopi uttarati, uparitopi uttarati. Evaṃ udakatitthe kāyikaṃ pāgabbhiyaṃ dasseti.

কথং অন্তরঘরং পৰিসন্তো কাযিকং পাগব্ভিযং দস্সেতি? ইধেকচ্চো অন্তরঘরং পৰিসন্তো অচিত্তীকারকতো থেরে ভিক্খূ ঘট্টযন্তোপি গচ্ছতি, পুরতোপি গচ্ছতি, ৰোক্কম্মাপি থেরানং ভিক্খূনং পুরতো পুরতো গচ্ছতি। এৰং অন্তরঘরং পৰিসন্তো কাযিকং পাগব্ভিযং দস্সেতি।

Kathaṃ antaragharaṃ pavisanto kāyikaṃ pāgabbhiyaṃ dasseti? Idhekacco antaragharaṃ pavisanto acittīkārakato there bhikkhū ghaṭṭayantopi gacchati, puratopi gacchati, vokkammāpi therānaṃ bhikkhūnaṃ purato purato gacchati. Evaṃ antaragharaṃ pavisanto kāyikaṃ pāgabbhiyaṃ dasseti.

কথং অন্তরঘরং পৰিট্ঠো কাযিকং পাগব্ভিযং দস্সেতি? ইধেকচ্চো অন্তরঘরং পৰিট্ঠো, ‘‘ন পৰিস ¹⁹, ভন্তে’’তি ৰুচ্চমানো পৰিসতি, ‘‘ন তিট্ঠ, ভন্তে’’তি ৰুচ্চমানো তিট্ঠতি, ‘‘ন নিসীদ, ভন্তে’’তি ৰুচ্চমানো নিসীদতি, অনোকাসম্পি পৰিসতি, অনোকাসেপি তিট্ঠতি, অনোকাসেপি নিসীদতি, যানিপি তানি হোন্তি কুলানং ওৰরকানি গূল়্হানি চ পটিচ্ছন্নানি চ। যত্থ কুলিত্থিযো কুলধীতরো কুলসুণ্হাযো কুলকুমারিযো নিসীদন্তি, তত্থপি সহসা পৰিসতি কুমারকস্সপি সিরং পরামসতি। এৰং অন্তরঘরং পৰিট্ঠো কাযিকং পাগব্ভিযং দস্সেতি – ইদং কাযিকং পাগব্ভিযং দস্সেতি।

Kathaṃ antaragharaṃ paviṭṭho kāyikaṃ pāgabbhiyaṃ dasseti? Idhekacco antaragharaṃ paviṭṭho, ‘‘na pavisa ²⁰, bhante’’ti vuccamāno pavisati, ‘‘na tiṭṭha, bhante’’ti vuccamāno tiṭṭhati, ‘‘na nisīda, bhante’’ti vuccamāno nisīdati, anokāsampi pavisati, anokāsepi tiṭṭhati, anokāsepi nisīdati, yānipi tāni honti kulānaṃ ovarakāni gūḷhāni ca paṭicchannāni ca. Yattha kulitthiyo kuladhītaro kulasuṇhāyo kulakumāriyo nisīdanti, tatthapi sahasā pavisati kumārakassapi siraṃ parāmasati. Evaṃ antaragharaṃ paviṭṭho kāyikaṃ pāgabbhiyaṃ dasseti – idaṃ kāyikaṃ pāgabbhiyaṃ dasseti.

কতমং ৰাচসিকং পাগব্ভিযং দস্সেতি? ইধেকচ্চো সঙ্ঘগতোপি ৰাচসিকং পাগব্ভিযং দস্সেতি, গণগতোপি ৰাচসিকং পাগব্ভিযং দস্সেতি, অন্তরঘরং পৰিট্ঠোপি ৰাচসিকং পাগব্ভিযং দস্সেতি।

Katamaṃ vācasikaṃ pāgabbhiyaṃ dasseti? Idhekacco saṅghagatopi vācasikaṃ pāgabbhiyaṃ dasseti, gaṇagatopi vācasikaṃ pāgabbhiyaṃ dasseti, antaragharaṃ paviṭṭhopi vācasikaṃ pāgabbhiyaṃ dasseti.

কথং সঙ্ঘগতো ৰাচসিকং পাগব্ভিযং দস্সেতি? ইধেকচ্চো সঙ্ঘগতো অচিত্তীকারকতো থেরে ভিক্খূ অনাপুচ্ছং ৰা অনজ্ঝিট্ঠো ৰা আরামগতানং ভিক্খূনং ধম্মং ভণতি, পঞ্হং ৰিসজ্জেতি, পাতিমোক্খং উদ্দিসতি, ঠিতকোপি ভণতি, বাহাৰিক্খেপকোপি ভণতি। এৰং সঙ্ঘগতো ৰাচসিকং পাগব্ভিযং দস্সেতি।

Kathaṃ saṅghagato vācasikaṃ pāgabbhiyaṃ dasseti? Idhekacco saṅghagato acittīkārakato there bhikkhū anāpucchaṃ vā anajjhiṭṭho vā ārāmagatānaṃ bhikkhūnaṃ dhammaṃ bhaṇati, pañhaṃ visajjeti, pātimokkhaṃ uddisati, ṭhitakopi bhaṇati, bāhāvikkhepakopi bhaṇati. Evaṃ saṅghagato vācasikaṃ pāgabbhiyaṃ dasseti.

কথং গণগতো ৰাচসিকং পাগব্ভিযং দস্সেতি? ইধেকচ্চো গণগতো অচিত্তীকারকতো থেরে ভিক্খূ অনাপুচ্ছং ৰা অনজ্ঝিট্ঠো ৰা আরামগতানং ভিক্খূনং ধম্মং ভণতি, পঞ্হং ৰিসজ্জেতি, ঠিতকোপি ভণতি, বাহাৰিক্খেপকোপি ভণতি। আরামগতানং ভিক্খুনীনং উপাসকানং উপাসিকানং ধম্মং ভণতি, পঞ্হং ৰিসজ্জেতি, ঠিতকোপি ভণতি, বাহাৰিক্খেপকোপি ভণতি। এৰং গণগতো ৰাচসিকং পাগব্ভিযং দস্সেতি।

Kathaṃ gaṇagato vācasikaṃ pāgabbhiyaṃ dasseti? Idhekacco gaṇagato acittīkārakato there bhikkhū anāpucchaṃ vā anajjhiṭṭho vā ārāmagatānaṃ bhikkhūnaṃ dhammaṃ bhaṇati, pañhaṃ visajjeti, ṭhitakopi bhaṇati, bāhāvikkhepakopi bhaṇati. Ārāmagatānaṃ bhikkhunīnaṃ upāsakānaṃ upāsikānaṃ dhammaṃ bhaṇati, pañhaṃ visajjeti, ṭhitakopi bhaṇati, bāhāvikkhepakopi bhaṇati. Evaṃ gaṇagato vācasikaṃ pāgabbhiyaṃ dasseti.

কথং অন্তরঘরং পৰিট্ঠো ৰাচসিকং পাগব্ভিযং দস্সেতি? ইধেকচ্চো অন্তরঘরং পৰিট্ঠো ইত্থিং ৰা কুমারিং ৰা এৰমাহ – ‘‘ইত্থংনামে ইত্থংগোত্তে কিং অত্থি? যাগু অত্থি, ভত্তং অত্থি, খাদনীযং অত্থি। কিং পিৰিস্সাম, কিং ভুঞ্জিস্সাম, কিং খাদিস্সাম? কিং ৰা অত্থি, কিং ৰা মে দস্সথা’’তি ৰিপ্পলপতি, যা এৰরূপা ৰাচা পলাপো ৰিপ্পলাপো লালপ্পো লালপ্পনা লালপ্পিতত্তং। এৰং অন্তরঘরং পৰিট্ঠো ৰাচসিকং পাগব্ভিযং দস্সেতি – ইদং ৰাচসিকং পাগব্ভিযং।

Kathaṃ antaragharaṃ paviṭṭho vācasikaṃ pāgabbhiyaṃ dasseti? Idhekacco antaragharaṃ paviṭṭho itthiṃ vā kumāriṃ vā evamāha – ‘‘itthaṃnāme itthaṃgotte kiṃ atthi? Yāgu atthi, bhattaṃ atthi, khādanīyaṃ atthi. Kiṃ pivissāma, kiṃ bhuñjissāma, kiṃ khādissāma? Kiṃ vā atthi, kiṃ vā me dassathā’’ti vippalapati, yā evarūpā vācā palāpo vippalāpo lālappo lālappanā lālappitattaṃ. Evaṃ antaragharaṃ paviṭṭho vācasikaṃ pāgabbhiyaṃ dasseti – idaṃ vācasikaṃ pāgabbhiyaṃ.

কতমং চেতসিকং পাগব্ভিযং? ইধেকচ্চো ন উচ্চা কুলা পব্বজিতো সমানো উচ্চা কুলা পব্বজিতেন সদ্ধিং সদিসং অত্তানং দহতি চিত্তেন, ন মহাকুলা পব্বজিতো সমানো মহাকুলা পব্বজিতেন সদ্ধিং সদিসং অত্তানং দহতি চিত্তেন, ন মহাভোগকুলা পব্বজিতো সমানো মহাভোগকুলা পব্বজিতেন সদ্ধিং সদিসং অত্তানং দহতি চিত্তেন, ন উল়ারভোগকুলা পব্বজিতো সমানো… ন সুত্তন্তিকো সমানো সুত্তন্তিকেন সদ্ধিং সদিসং অত্তানং দহতি চিত্তেন, ন ৰিনযধরো সমানো… ন ধম্মকথিকো সমানো… ন আরঞ্ঞিকো সমানো… ন পিণ্ডপাতিকো সমানো… ন পংসুকূলিকো সমানো… ন তেচীৰরিকো সমানো… ন সপদানচারিকো সমানো… ন খলুপচ্ছাভত্তিকো সমানো… ন নেসজ্জিকো সমানো… ন যথাসন্থতিকো সমানো… ন পঠমস্স ঝানস্স লাভী সমানো পঠমস্স ঝানস্স লাভিনা সদ্ধিং সদিসং অত্তানং দহতি চিত্তেন…পে॰… ন নেৰসঞ্ঞানাসঞ্ঞাযতনসমাপত্তিযা লাভী সমানো নেৰসঞ্ঞানাসঞ্ঞাযতনসমাপত্তিযা লাভিনা সদ্ধিং সদিসং অত্তানং দহতি চিত্তেন – ইদং চেতসিকং পাগব্ভিযং। যস্সিমানি তীণি পাগব্ভিযানি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি, সো ৰুচ্চতি অপ্পগব্ভোতি – অপ্পগব্ভো।

Katamaṃ cetasikaṃ pāgabbhiyaṃ? Idhekacco na uccā kulā pabbajito samāno uccā kulā pabbajitena saddhiṃ sadisaṃ attānaṃ dahati cittena, na mahākulā pabbajito samāno mahākulā pabbajitena saddhiṃ sadisaṃ attānaṃ dahati cittena, na mahābhogakulā pabbajito samāno mahābhogakulā pabbajitena saddhiṃ sadisaṃ attānaṃ dahati cittena, na uḷārabhogakulā pabbajito samāno… na suttantiko samāno suttantikena saddhiṃ sadisaṃ attānaṃ dahati cittena, na vinayadharo samāno… na dhammakathiko samāno… na āraññiko samāno… na piṇḍapātiko samāno… na paṃsukūliko samāno… na tecīvariko samāno… na sapadānacāriko samāno… na khalupacchābhattiko samāno… na nesajjiko samāno… na yathāsanthatiko samāno… na paṭhamassa jhānassa lābhī samāno paṭhamassa jhānassa lābhinā saddhiṃ sadisaṃ attānaṃ dahati cittena…pe… na nevasaññānāsaññāyatanasamāpattiyā lābhī samāno nevasaññānāsaññāyatanasamāpattiyā lābhinā saddhiṃ sadisaṃ attānaṃ dahati cittena – idaṃ cetasikaṃ pāgabbhiyaṃ. Yassimāni tīṇi pāgabbhiyāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni, so vuccati appagabbhoti – appagabbho.

অজেগুচ্ছোতি । অত্থি পুগ্গলো জেগুচ্ছো, অত্থি অজেগুচ্ছো। কতমো চ পুগ্গলো জেগুচ্ছো? ইধেকচ্চো পুগ্গলো দুস্সীলো হোতি পাপধম্মো অসুচিসঙ্কস্সরসমাচারো পটিচ্ছন্নকম্মন্তো অস্সমণো সমণপটিঞ্ঞো অব্রহ্মচারী ব্রহ্মচারিপটিঞ্ঞো অন্তোপূতি অৰস্সুতো কসম্বুজাতো – অযং ৰুচ্চতি পুগ্গলো জেগুচ্ছো। অথ ৰা কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিট্ঠীযতি, কোপঞ্চ দোসঞ্চ অপ্পচ্চযঞ্চ পাতুকরোতি – অযং ৰুচ্চতি পুগ্গলো জেগুচ্ছো। অথ ৰা কোধনো হোতি উপনাহী, মক্খী হোতি পল়াসী, ইস্সুকী হোতি মচ্ছরী, সঠো হোতি মাযাৰী , থদ্ধো হোতি অতিমানী, পাপিচ্ছো হোতি মিচ্ছাদিট্ঠি ²¹, সন্দিট্ঠিপরামাসী হোতি আদানগ্গাহী দুপ্পটিনিস্সগ্গী – অযং ৰুচ্চতি পুগ্গলো জেগুচ্ছো।

Ajegucchoti . Atthi puggalo jeguccho, atthi ajeguccho. Katamo ca puggalo jeguccho? Idhekacco puggalo dussīlo hoti pāpadhammo asucisaṅkassarasamācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto – ayaṃ vuccati puggalo jeguccho. Atha vā kodhano hoti upāyāsabahulo, appampi vutto samāno abhisajjati kuppati byāpajjati patiṭṭhīyati, kopañca dosañca appaccayañca pātukaroti – ayaṃ vuccati puggalo jeguccho. Atha vā kodhano hoti upanāhī, makkhī hoti paḷāsī, issukī hoti maccharī, saṭho hoti māyāvī , thaddho hoti atimānī, pāpiccho hoti micchādiṭṭhi ²², sandiṭṭhiparāmāsī hoti ādānaggāhī duppaṭinissaggī – ayaṃ vuccati puggalo jeguccho.

কতমো চ পুগ্গলো অজেগুচ্ছো? ইধ ভিক্খু সীলৰা হোতি পাতিমোক্খসংৰরসংৰুতো ৰিহরতি আচারগোচরসম্পন্নো অণুমত্তেসু ৰজ্জেসু ভযদস্সাৰী, সমাদায সিক্খতি সিক্খাপদেসু – অযং ৰুচ্চতি পুগ্গলো অজেগুচ্ছো। অথ ৰা অক্কোধনো হোতি অনুপাযাসবহুলো, বহুম্পি ৰুত্তো সমানো ন অভিসজ্জতি ন কুপ্পতি ন ব্যাপজ্জতি ন পতিট্ঠীযতি, ন কোপঞ্চ দোসঞ্চ অপ্পচ্চযঞ্চ পাতুকরোতি – অযং ৰুচ্চতি পুগ্গলো অজেগুচ্ছো। অথ ৰা অক্কোধনো হোতি অনুপনাহী, অমক্খী হোতি অপল়াসী, অনিস্সুকী হোতি অমচ্ছরী, অসঠো হোতি অমাযাৰী, অথদ্ধো হোতি অনতিমানী , ন পাপিচ্ছো হোতি ন মিচ্ছাদিট্ঠি, অসন্দিট্ঠিপরামাসী হোতি অনাদানগ্গাহী সুপ্পটিনিস্সগ্গী – অযং ৰুচ্চতি পুগ্গলো অজেগুচ্ছো। সব্বে বালপুথুজ্জনা জেগুচ্ছা, পুথুজ্জনকল্যাণকং উপাদায অট্ঠ অরিযপুগ্গলা অজেগুচ্ছাতি – অপ্পগব্ভো অজেগুচ্ছো।

Katamo ca puggalo ajeguccho? Idha bhikkhu sīlavā hoti pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu – ayaṃ vuccati puggalo ajeguccho. Atha vā akkodhano hoti anupāyāsabahulo, bahumpi vutto samāno na abhisajjati na kuppati na byāpajjati na patiṭṭhīyati, na kopañca dosañca appaccayañca pātukaroti – ayaṃ vuccati puggalo ajeguccho. Atha vā akkodhano hoti anupanāhī, amakkhī hoti apaḷāsī, anissukī hoti amaccharī, asaṭho hoti amāyāvī, athaddho hoti anatimānī , na pāpiccho hoti na micchādiṭṭhi, asandiṭṭhiparāmāsī hoti anādānaggāhī suppaṭinissaggī – ayaṃ vuccati puggalo ajeguccho. Sabbe bālaputhujjanā jegucchā, puthujjanakalyāṇakaṃ upādāya aṭṭha ariyapuggalā ajegucchāti – appagabbho ajeguccho.

পেসুণেয্যে চ নো যুতোতি। পেসুঞ্ঞন্তি ইধেকচ্চো পিসুণৰাচো হোতি, ইতো সুত্ৰা অমুত্র অক্খাতা ইমেসং ভেদায, অমুত্র ৰা সুত্ৰা ইমেসং অক্খাতা অমূসং ভেদায। ইতি সমগ্গানং ৰা ভেত্তা ²³, ভিন্নানং ৰা অনুপ্পদাতা, ৰগ্গারামো, ৰগ্গরতো, ৰগ্গনন্দী, ৰগ্গকরণিং ৰাচং ভাসিতা হোতি – ইদং ৰুচ্চতি পেসুঞ্ঞং।

Pesuṇeyye ca no yutoti. Pesuññanti idhekacco pisuṇavāco hoti, ito sutvā amutra akkhātā imesaṃ bhedāya, amutra vā sutvā imesaṃ akkhātā amūsaṃ bhedāya. Iti samaggānaṃ vā bhettā ²⁴, bhinnānaṃ vā anuppadātā, vaggārāmo, vaggarato, vagganandī, vaggakaraṇiṃ vācaṃ bhāsitā hoti – idaṃ vuccati pesuññaṃ.

অপি চ দ্ৰীহি কারণেহি পেসুঞ্ঞং উপসংহরতি – পিযকম্যতায ৰা, ভেদাধিপ্পাযেন ²⁵ ৰা। কথং পিযকম্যতায পেসুঞ্ঞং উপসংহরতি? ইমস্স পিযো ভৰিস্সামি, মনাপো ভৰিস্সামি, ৰিস্সাসিকো ভৰিস্সামি, অব্ভন্তরিকো ভৰিস্সামি, সুহদযো ভৰিস্সামীতি। এৰং পিযকম্যতায পেসুঞ্ঞং উপসংহরতি। কথং ভেদাধিপ্পাযেন পেসুঞ্ঞং উপসংহরতি? ‘‘কথং ইমে নানা অস্সু ৰিনা অস্সু ৰগ্গা অস্সু দ্ৰেধা অস্সু দ্ৰেজ্ঝা অস্সু দ্ৰে পক্খা অস্সু ভিজ্জেয্যুং ন সমাগচ্ছেয্যুং দুক্খং ন ফাসু ²⁶ ৰিহরেয্যু’’ন্তি। এৰং ভেদাধিপ্পাযেন পেসুঞ্ঞং উপসংহরতি। যস্সেতং পেসুঞ্ঞং পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢং, সো পেসুঞ্ঞে নো যুতো ন যুত্তো ন পযুত্তো ন সম্মাযুত্তোতি – পেসুণেয্যে চ নো যুতো।

Api ca dvīhi kāraṇehi pesuññaṃ upasaṃharati – piyakamyatāya vā, bhedādhippāyena ²⁷ vā. Kathaṃ piyakamyatāya pesuññaṃ upasaṃharati? Imassa piyo bhavissāmi, manāpo bhavissāmi, vissāsiko bhavissāmi, abbhantariko bhavissāmi, suhadayo bhavissāmīti. Evaṃ piyakamyatāya pesuññaṃ upasaṃharati. Kathaṃ bhedādhippāyena pesuññaṃ upasaṃharati? ‘‘Kathaṃ ime nānā assu vinā assu vaggā assu dvedhā assu dvejjhā assu dve pakkhā assu bhijjeyyuṃ na samāgaccheyyuṃ dukkhaṃ na phāsu ²⁸ vihareyyu’’nti. Evaṃ bhedādhippāyena pesuññaṃ upasaṃharati. Yassetaṃ pesuññaṃ pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhaṃ, so pesuññe no yuto na yutto na payutto na sammāyuttoti – pesuṇeyye ca no yuto.

তেনাহ ভগৰা –

Tenāha bhagavā –

‘‘পতিলীনো অকুহকো, অপিহালু অমচ্ছরী।

‘‘Patilīno akuhako, apihālu amaccharī;

অপ্পগব্ভো অজেগুচ্ছো, পেসুণেয্যে চ নো যুতো’’তি॥

Appagabbho ajeguccho, pesuṇeyye ca no yuto’’ti.

৮৮.

88.

সাতিযেসু অনস্সাৰী, অতিমানে চ নো যুতো।

Sātiyesu anassāvī, atimāne ca no yuto;

সণ্হো চ পটিভানৰা, ন সদ্ধো ন ৰিরজ্জতি॥

Saṇho ca paṭibhānavā, na saddho na virajjati.

সাতিযেসু অনস্সাৰীতি। সাতিযা ৰুচ্চন্তি পঞ্চ কামগুণা। কিংকারণা সাতিযা ৰুচ্চন্তি পঞ্চ কামগুণা? যেভুয্যেন দেৰমনুস্সা পঞ্চ কামগুণে ইচ্ছন্তি সাতিযন্তি পত্থযন্তি পিহযন্তি অভিজপ্পন্তি, তংকারণা সাতিযা ৰুচ্চন্তি পঞ্চ কামগুণা। যেসং এসা সাতিযা তণ্হা অপ্পহীনা তেসং চক্খুতো রূপতণ্হা সৰতি আসৰতি ²⁹ সন্দতি পৰত্ততি, সোততো সদ্দতণ্হা… ঘানতো গন্ধতণ্হা… জিৰ্হাতো রসতণ্হা… কাযতো ফোট্ঠব্বতণ্হা… মনতো ধম্মতণ্হা সৰতি আসৰতি সন্দতি পৰত্ততি। যেসং এসা সাতিযা তণ্হা পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢা তেসং চক্খুতো রূপতণ্হা ন সৰতি নাসৰতি ³⁰ ন সন্দতি ন পৰত্ততি , সোততো সদ্দতণ্হা…পে॰… মনতো ধম্মতণ্হা ন সৰতি নাসৰতি ন সন্দতি ন পৰত্ততীতি – সাতিযেসু অনস্সাৰী।

Sātiyesu anassāvīti. Sātiyā vuccanti pañca kāmaguṇā. Kiṃkāraṇā sātiyā vuccanti pañca kāmaguṇā? Yebhuyyena devamanussā pañca kāmaguṇe icchanti sātiyanti patthayanti pihayanti abhijappanti, taṃkāraṇā sātiyā vuccanti pañca kāmaguṇā. Yesaṃ esā sātiyā taṇhā appahīnā tesaṃ cakkhuto rūpataṇhā savati āsavati ³¹ sandati pavattati, sotato saddataṇhā… ghānato gandhataṇhā… jivhāto rasataṇhā… kāyato phoṭṭhabbataṇhā… manato dhammataṇhā savati āsavati sandati pavattati. Yesaṃ esā sātiyā taṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā tesaṃ cakkhuto rūpataṇhā na savati nāsavati ³² na sandati na pavattati , sotato saddataṇhā…pe… manato dhammataṇhā na savati nāsavati na sandati na pavattatīti – sātiyesu anassāvī.

অতিমানে চ নো যুতোতি। কতমো অতিমানো? ইধেকচ্চো পরং অতিমঞ্ঞতি জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনা। যো এৰরূপো মানো মঞ্ঞনা মঞ্ঞিতত্তং উন্নতি উন্নমো ধজো সম্পগ্গাহো কেতুকম্যতা চিত্তস্স – অযং ৰুচ্চতি অতিমানো। যস্সেসো অতিমানো পহীনো সমুচ্ছিন্নো ৰূপসন্তো পটিপস্সদ্ধো অভব্বুপ্পত্তিকো ঞাণগ্গিনা দড্ঢো, সো অতিমানে চ নো যুতো ন যুত্তো নপ্পযুত্তো ন সম্মাযুত্তোতি – অতিমানে চ নো যুতো।

Atimāne ca no yutoti. Katamo atimāno? Idhekacco paraṃ atimaññati jātiyā vā gottena vā…pe… aññataraññatarena vā vatthunā. Yo evarūpo māno maññanā maññitattaṃ unnati unnamo dhajo sampaggāho ketukamyatā cittassa – ayaṃ vuccati atimāno. Yasseso atimāno pahīno samucchinno vūpasanto paṭipassaddho abhabbuppattiko ñāṇagginā daḍḍho, so atimāne ca no yuto na yutto nappayutto na sammāyuttoti – atimāne ca no yuto.

সণ্হো চ পটিভানৰাতি। সণ্হোতি সণ্হেন কাযকম্মেন সমন্নাগতোতি সণ্হো, সণ্হেন ৰচীকম্মেন… সণ্হেন মনোকম্মেন সমন্নাগতোতি সণ্হো, সণ্হেহি সতিপট্ঠানেহি সমন্নাগতোতি সণ্হো, সণ্হেহি সম্মপ্পধানেহি… সণ্হেহি ইদ্ধিপাদেহি… সণ্হেহি ইন্দ্রিযেহি… সণ্হেহি বলেহি… সণ্হেহি বোজ্ঝঙ্গেহি সমন্নাগতোতি সণ্হো, সণ্হেন অরিযেন অট্ঠঙ্গিকেন মগ্গেন সমন্নাগতোতি – সণ্হো।

Saṇho ca paṭibhānavāti. Saṇhoti saṇhena kāyakammena samannāgatoti saṇho, saṇhena vacīkammena… saṇhena manokammena samannāgatoti saṇho, saṇhehi satipaṭṭhānehi samannāgatoti saṇho, saṇhehi sammappadhānehi… saṇhehi iddhipādehi… saṇhehi indriyehi… saṇhehi balehi… saṇhehi bojjhaṅgehi samannāgatoti saṇho, saṇhena ariyena aṭṭhaṅgikena maggena samannāgatoti – saṇho.

পটিভানৰাতি তযো পটিভানৰন্তো – পরিযত্তিপটিভানৰা, পরিপুচ্ছাপটিভানৰা, অধিগমপটিভানৰা। কতমো পরিযত্তিপটিভানৰা? ইধেকচ্চস্স পকতিযা পরিযাপুটং হোতি – সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লং, তস্স পরিযত্তিং নিস্সায পটিভাযতি – অযং পরিযত্তিপটিভানৰা। কতমো পরিপুচ্ছাপটিভানৰা? ইধেকচ্চো পরিপুচ্ছিতা ³³ হোতি অত্তত্থে চ ঞাযত্থে চ লক্খণে চ কারণে চ ঠানাঠানে চ, তস্স তং পরিপুচ্ছং নিস্সায পটিভাযতি – অযং পরিপুচ্ছাপটিভানৰা। কতমো অধিগমপটিভানৰা? ইধেকচ্চস্স অধিগতা হোন্তি চত্তারো সতিপট্ঠানা চত্তারো সম্মপ্পধানা চত্তারো ইদ্ধিপাদা পঞ্চিন্দ্রিযানি পঞ্চ বলানি সত্ত বোজ্ঝঙ্গা অরিযো অট্ঠঙ্গিকো মগ্গো চত্তারো অরিযমগ্গা চত্তারি সামঞ্ঞফলানি চতস্সো পটিসম্ভিদাযো ছ অভিঞ্ঞাযো, তস্স অত্থো ঞাতো ধম্মো ঞাতো নিরুত্তি ঞাতা, অত্থে ঞাতে অত্থো পটিভাযতি , ধম্মে ঞাতে ধম্মো পটিভাযতি, নিরুত্তিযা ঞাতায নিরুত্তি পটিভাযতি; ইমেসু তীসু ঞাণেসু ঞাণং পটিভানপটিসম্ভিদা। ইমায পটিভানপটিসম্ভিদায উপেতো সমুপেতো উপগতো সমুপগতো উপপন্নো সমুপপন্নো সমন্নাগতো সো ৰুচ্চতি পটিভানৰা। যস্স পরিযত্তি নত্থি, পরিপুচ্ছা নত্থি, অধিগমো নত্থি, কিং তস্স পটিভাযিস্সতীতি – সণ্হো চ পটিভানৰা।

Paṭibhānavāti tayo paṭibhānavanto – pariyattipaṭibhānavā, paripucchāpaṭibhānavā, adhigamapaṭibhānavā. Katamo pariyattipaṭibhānavā? Idhekaccassa pakatiyā pariyāpuṭaṃ hoti – suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhutadhammaṃ vedallaṃ, tassa pariyattiṃ nissāya paṭibhāyati – ayaṃ pariyattipaṭibhānavā. Katamo paripucchāpaṭibhānavā? Idhekacco paripucchitā ³⁴ hoti attatthe ca ñāyatthe ca lakkhaṇe ca kāraṇe ca ṭhānāṭhāne ca, tassa taṃ paripucchaṃ nissāya paṭibhāyati – ayaṃ paripucchāpaṭibhānavā. Katamo adhigamapaṭibhānavā? Idhekaccassa adhigatā honti cattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo cattāro ariyamaggā cattāri sāmaññaphalāni catasso paṭisambhidāyo cha abhiññāyo, tassa attho ñāto dhammo ñāto nirutti ñātā, atthe ñāte attho paṭibhāyati , dhamme ñāte dhammo paṭibhāyati, niruttiyā ñātāya nirutti paṭibhāyati; imesu tīsu ñāṇesu ñāṇaṃ paṭibhānapaṭisambhidā. Imāya paṭibhānapaṭisambhidāya upeto samupeto upagato samupagato upapanno samupapanno samannāgato so vuccati paṭibhānavā. Yassa pariyatti natthi, paripucchā natthi, adhigamo natthi, kiṃ tassa paṭibhāyissatīti – saṇho ca paṭibhānavā.

ন সদ্ধো ন ৰিরজ্জতীতি। ন সদ্ধোতি সামং সযং অভিঞ্ঞাতং অত্তপচ্চক্খং ধম্মং ন কস্সচি সদ্দহতি অঞ্ঞস্স সমণস্স ৰা ব্রাহ্মণস্স ৰা দেৰস্স ৰা মারস্স ৰা ব্রহ্মুনো ৰা। ‘‘সব্বে সঙ্খারা অনিচ্চা’’তি সামং সযং অভিঞ্ঞাতং…পে॰… ‘‘সব্বে সঙ্খারা দুক্খা’’তি… ‘‘সব্বে ধম্মা অনত্তা’’তি… ‘‘অৰিজ্জাপচ্চযা সঙ্খারা’’তি…পে॰… ‘‘জাতিপচ্চযা জরামরণ’’ন্তি… ‘‘অৰিজ্জানিরোধা সঙ্খারনিরোধো’’তি…পে॰… ‘‘জাতিনিরোধা জরামরণনিরোধো’’তি… ‘‘ইদং দুক্খ’’ন্তি…পে॰… ‘‘অযং দুক্খনিরোধগামিনী পটিপদা’’তি… ‘‘ইমে আসৰা’’তি…পে॰… ‘‘অযং আসৰনিরোধগামিনী পটিপদা’’তি… ‘‘ইমে ধম্মা অভিঞ্ঞেয্যা’’তি…পে॰… ‘‘ইমে ধম্মা সচ্ছিকাতব্বা’’তি সামং সযং অভিঞ্ঞাতং…পে॰… ছন্নং ফস্সাযতনানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ, পঞ্চন্নং উপাদানক্খন্ধানং সমুদযঞ্চ…পে॰… চতুন্নং মহাভূতানং সমুদযঞ্চ অত্থঙ্গমঞ্চ অস্সাদঞ্চ আদীনৰঞ্চ নিস্সরণঞ্চ সামং সযং অভিঞ্ঞাতং…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্তি সামং সযং অভিঞ্ঞাতং অত্তপচ্চক্খং ধম্মং ন কস্সচি সদ্দহতি অঞ্ঞস্স সমণস্স ৰা ব্রাহ্মণস্স ৰা দেৰস্স ৰা মারস্স ৰা ব্রহ্মুনো ৰা ³⁵।

Na saddho na virajjatīti. Na saddhoti sāmaṃ sayaṃ abhiññātaṃ attapaccakkhaṃ dhammaṃ na kassaci saddahati aññassa samaṇassa vā brāhmaṇassa vā devassa vā mārassa vā brahmuno vā. ‘‘Sabbe saṅkhārā aniccā’’ti sāmaṃ sayaṃ abhiññātaṃ…pe… ‘‘sabbe saṅkhārā dukkhā’’ti… ‘‘sabbe dhammā anattā’’ti… ‘‘avijjāpaccayā saṅkhārā’’ti…pe… ‘‘jātipaccayā jarāmaraṇa’’nti… ‘‘avijjānirodhā saṅkhāranirodho’’ti…pe… ‘‘jātinirodhā jarāmaraṇanirodho’’ti… ‘‘idaṃ dukkha’’nti…pe… ‘‘ayaṃ dukkhanirodhagāminī paṭipadā’’ti… ‘‘ime āsavā’’ti…pe… ‘‘ayaṃ āsavanirodhagāminī paṭipadā’’ti… ‘‘ime dhammā abhiññeyyā’’ti…pe… ‘‘ime dhammā sacchikātabbā’’ti sāmaṃ sayaṃ abhiññātaṃ…pe… channaṃ phassāyatanānaṃ samudayañca atthaṅgamañca assādañca ādīnavañca nissaraṇañca, pañcannaṃ upādānakkhandhānaṃ samudayañca…pe… catunnaṃ mahābhūtānaṃ samudayañca atthaṅgamañca assādañca ādīnavañca nissaraṇañca sāmaṃ sayaṃ abhiññātaṃ…pe… ‘‘yaṃ kiñci samudayadhammaṃ sabbaṃ taṃ nirodhadhamma’’nti sāmaṃ sayaṃ abhiññātaṃ attapaccakkhaṃ dhammaṃ na kassaci saddahati aññassa samaṇassa vā brāhmaṇassa vā devassa vā mārassa vā brahmuno vā ³⁶.

ৰুত্তঞ্হেতং ভগৰতা – ‘‘সদ্দহসি ত্ৰং, সারিপুত্ত, সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানং; ৰীরিযিন্দ্রিযং… সতিন্দ্রিযং… সমাধিন্দ্রিযং… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসান’’ন্তি?

Vuttañhetaṃ bhagavatā – ‘‘saddahasi tvaṃ, sāriputta, saddhindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ; vīriyindriyaṃ… satindriyaṃ… samādhindriyaṃ… paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosāna’’nti?

‘‘ন খ্ৰাহং এত্থ, ভন্তে, ভগৰতো সদ্ধায গচ্ছামি সদ্ধিন্দ্রিযং… ৰীরিযিন্দ্রিযং… সতিন্দ্রিযং… সমাধিন্দ্রিযং… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানং। যেসং নূনেতং, ভন্তে , অঞ্ঞাতং অস্স অদিট্ঠং অৰিদিতং অসচ্ছিকতং অফস্সিতং পঞ্ঞায, তে তত্থ পরেসং সদ্ধায গচ্ছেয্যুং সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানং। ৰীরিযিন্দ্রিযং… সতিন্দ্রিযং… সমাধিন্দ্রিযং … পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানং। যেসঞ্চ খো এতং, ভন্তে, ঞাতং দিট্ঠং ৰিদিতং সচ্ছিকতং ফস্সিতং পঞ্ঞায, নিক্কঙ্খা তে তত্থ নিব্বিচিকিচ্ছা। সদ্ধিন্দ্রিযং… ৰীরিযিন্দ্রিযং… সতিন্দ্রিযং… সমাধিন্দ্রিযং… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানং। ময্হঞ্চ খো, এতং ভন্তে, ঞাতং দিট্ঠং ৰিদিতং সচ্ছিকতং ফস্সিতং পঞ্ঞায, নিক্কঙ্খোহং তত্থ নিব্বিচিকিচ্ছো। সদ্ধিন্দ্রিযং… ৰীরিযিন্দ্রিযং… সতিন্দ্রিযং… সমাধিন্দ্রিযং… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসান’’ন্তি।

‘‘Na khvāhaṃ ettha, bhante, bhagavato saddhāya gacchāmi saddhindriyaṃ… vīriyindriyaṃ… satindriyaṃ… samādhindriyaṃ… paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ. Yesaṃ nūnetaṃ, bhante , aññātaṃ assa adiṭṭhaṃ aviditaṃ asacchikataṃ aphassitaṃ paññāya, te tattha paresaṃ saddhāya gaccheyyuṃ saddhindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ. Vīriyindriyaṃ… satindriyaṃ… samādhindriyaṃ … paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ. Yesañca kho etaṃ, bhante, ñātaṃ diṭṭhaṃ viditaṃ sacchikataṃ phassitaṃ paññāya, nikkaṅkhā te tattha nibbicikicchā. Saddhindriyaṃ… vīriyindriyaṃ… satindriyaṃ… samādhindriyaṃ… paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ. Mayhañca kho, etaṃ bhante, ñātaṃ diṭṭhaṃ viditaṃ sacchikataṃ phassitaṃ paññāya, nikkaṅkhohaṃ tattha nibbicikiccho. Saddhindriyaṃ… vīriyindriyaṃ… satindriyaṃ… samādhindriyaṃ… paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosāna’’nti.

‘‘সাধু সাধু, সারিপুত্ত! যেসঞ্হেতং, সারিপুত্ত, অঞ্ঞাতং অস্স অদিট্ঠং অৰিদিতং অসচ্ছিকতং অফস্সিতং পঞ্ঞায, তে তত্থ পরেসং সদ্ধায গচ্ছেয্যুং সদ্ধিন্দ্রিযং…পে॰… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযনং অমতপরিযোসানন্তি।

‘‘Sādhu sādhu, sāriputta! Yesañhetaṃ, sāriputta, aññātaṃ assa adiṭṭhaṃ aviditaṃ asacchikataṃ aphassitaṃ paññāya, te tattha paresaṃ saddhāya gaccheyyuṃ saddhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānanti.

‘‘অস্সদ্ধো অকতঞ্ঞূ চ, সন্ধিচ্ছেদো চ যো নরো।

‘‘Assaddho akataññū ca, sandhicchedo ca yo naro;

হতাৰকাসো ৰন্তাসো, স ৰে উত্তমপোরিসো’’তি॥

Hatāvakāso vantāso, sa ve uttamaporiso’’ti.

ন সদ্ধো ন ৰিরজ্জতীতি। সব্বে বালপুথুজ্জনা রজ্জন্তি, পুথুজ্জনকল্যাণকং উপাদায সত্ত সেক্খা ৰিরজ্জন্তি। অরহা নেৰ রজ্জতি নো ৰিরজ্জতি, ৰিরত্তো সো খযা রাগস্স ৰীতরাগত্তা খযা দোসস্স ৰীতদোসত্তা, খযা মোহস্স ৰীতমোহত্তা। সো ৰুট্ঠৰাসো চিণ্ণচরণো…পে॰… জাতিমরণসংসারো নত্থি তস্স পুনব্ভৰোতি – ন সদ্ধো ন ৰিরজ্জতি।

Na saddho na virajjatīti. Sabbe bālaputhujjanā rajjanti, puthujjanakalyāṇakaṃ upādāya satta sekkhā virajjanti. Arahā neva rajjati no virajjati, viratto so khayā rāgassa vītarāgattā khayā dosassa vītadosattā, khayā mohassa vītamohattā. So vuṭṭhavāso ciṇṇacaraṇo…pe… jātimaraṇasaṃsāro natthi tassa punabbhavoti – na saddho na virajjati.

তেনাহ ভগৰা –

Tenāha bhagavā –

‘‘সাতিযেসু অনস্সাৰী, অতিমানে চ নো যুতো।

‘‘Sātiyesu anassāvī, atimāne ca no yuto;

সণ্হো চ পটিভানৰা, ন সদ্ধো ন ৰিরজ্জতী’’তি॥

Saṇho ca paṭibhānavā, na saddho na virajjatī’’ti.

৮৯.

89.

লাভকম্যা ন সিক্খতি, অলাভে চ ন কুপ্পতি।

Lābhakamyā na sikkhati, alābhe ca na kuppati;

অৰিরুদ্ধো চ তণ্হায, রসেসু ³⁷ নানুগিজ্ঝতি॥

Aviruddho ca taṇhāya, rasesu³⁸nānugijjhati.

লাভকম্যা ন সিক্খতি, অলাভে চ ন কুপ্পতীতি। কথং লাভকম্যা সিক্খতি? ইধ, ভিক্খৰে, ভিক্খু ভিক্খুং পস্সতি লাভিং চীৰরপিণ্ডপাতসেনাসনগিলানপচ্চযভেসজ্জপরিক্খারানং। তস্স এৰং হোতি – ‘‘কেন নু খো অযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি? তস্স এৰং হোতি – ‘‘অযং খো আযস্মা সুত্তন্তিকো, তেনাযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি। সো লাভহেতু লাভপচ্চযা লাভকারণা লাভাভিনিব্বত্তিযা লাভং পরিপাচেন্তো সুত্তন্তং পরিযাপুণাতি। এৰম্পি লাভকম্যা সিক্খতি।

Lābhakamyā na sikkhati, alābhe ca na kuppatīti. Kathaṃ lābhakamyā sikkhati? Idha, bhikkhave, bhikkhu bhikkhuṃ passati lābhiṃ cīvarapiṇḍapātasenāsanagilānapaccayabhesajjaparikkhārānaṃ. Tassa evaṃ hoti – ‘‘kena nu kho ayamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti? Tassa evaṃ hoti – ‘‘ayaṃ kho āyasmā suttantiko, tenāyamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti. So lābhahetu lābhapaccayā lābhakāraṇā lābhābhinibbattiyā lābhaṃ paripācento suttantaṃ pariyāpuṇāti. Evampi lābhakamyā sikkhati.

অথ ৰা ভিক্খু ভিক্খুং পস্সতি লাভিং চীৰরপিণ্ডপাতসেনাসনগিলানপচ্চযভেসজ্জপরিক্খারানং। তস্স এৰং হোতি – ‘‘কেন নু খো অযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি? তস্স এৰং হোতি – ‘‘অযং খো আযস্মা ৰিনযধরো…পে॰… ধম্মকথিকো… আভিধম্মিকো, তেনাযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি। সো লাভহেতু লাভপচ্চযা লাভকারণা লাভাভিনিব্বত্তিযা লাভং পরিপাচেন্তো অভিধম্মং পরিযাপুণাতি। এৰম্পি লাভকম্যা সিক্খতি।

Atha vā bhikkhu bhikkhuṃ passati lābhiṃ cīvarapiṇḍapātasenāsanagilānapaccayabhesajjaparikkhārānaṃ. Tassa evaṃ hoti – ‘‘kena nu kho ayamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti? Tassa evaṃ hoti – ‘‘ayaṃ kho āyasmā vinayadharo…pe… dhammakathiko… ābhidhammiko, tenāyamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti. So lābhahetu lābhapaccayā lābhakāraṇā lābhābhinibbattiyā lābhaṃ paripācento abhidhammaṃ pariyāpuṇāti. Evampi lābhakamyā sikkhati.

অথ ৰা ভিক্খু ভিক্খুং পস্সতি লাভিং চীৰরপিণ্ডপাতসেনাসনগিলানপচ্চযভেসজ্জপরিক্খারানং। তস্স এৰং হোতি – ‘‘কেন নু খো অযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি? তস্স এৰং হোতি – ‘‘অযং খো আযস্মা আরঞ্ঞিকো… পিণ্ডপাতিকো… পংসুকূলিকো… তেচীৰরিকো… সপদানচারিকো… খলুপচ্ছাভত্তিকো… নেসজ্জিকো… যথাসন্থতিকো, তেনাযমাযস্মা লাভী চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি। সো লাভহেতু লাভপচ্চযা লাভকারণা লাভাভিনিব্বত্তিযা লাভং পরিপাচেন্তো আরঞ্ঞিকো হোতি…পে॰… যথাসন্থতিকো হোতি। এৰম্পি লাভকম্যা সিক্খতি।

Atha vā bhikkhu bhikkhuṃ passati lābhiṃ cīvarapiṇḍapātasenāsanagilānapaccayabhesajjaparikkhārānaṃ. Tassa evaṃ hoti – ‘‘kena nu kho ayamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti? Tassa evaṃ hoti – ‘‘ayaṃ kho āyasmā āraññiko… piṇḍapātiko… paṃsukūliko… tecīvariko… sapadānacāriko… khalupacchābhattiko… nesajjiko… yathāsanthatiko, tenāyamāyasmā lābhī cīvarapiṇḍapātasenāsanagilānapaccayabhesajjaparikkhārāna’’nti. So lābhahetu lābhapaccayā lābhakāraṇā lābhābhinibbattiyā lābhaṃ paripācento āraññiko hoti…pe… yathāsanthatiko hoti. Evampi lābhakamyā sikkhati.

কথং ন লাভকম্যা সিক্খতি? ইধ ভিক্খু ন লাভহেতু, ন লাভপচ্চযা, ন লাভকারণা, ন লাভাভিনিব্বত্তিযা, ন লাভং পরিপাচেন্তো, যাৰদেৰ অত্তদমত্থায অত্তসমত্থায অত্তপরিনিব্বাপনত্থায সুত্তন্তং পরিযাপুণাতি, ৰিনযং পরিযাপুণাতি, অভিধম্মং পরিযাপুণাতি। এৰম্পি ন লাভকম্যা সিক্খতি।

Kathaṃ na lābhakamyā sikkhati? Idha bhikkhu na lābhahetu, na lābhapaccayā, na lābhakāraṇā, na lābhābhinibbattiyā, na lābhaṃ paripācento, yāvadeva attadamatthāya attasamatthāya attaparinibbāpanatthāya suttantaṃ pariyāpuṇāti, vinayaṃ pariyāpuṇāti, abhidhammaṃ pariyāpuṇāti. Evampi na lābhakamyā sikkhati.

অথ ৰা ভিক্খু ন লাভহেতু, ন লাভপচ্চযা, ন লাভকারণা, ন লাভাভিনিব্বত্তিযা, ন লাভং পরিপাচেন্তো, যাৰদেৰ অপ্পিচ্ছঞ্ঞেৰ ³⁹ নিস্সায সন্তুট্ঠিঞ্ঞেৰ নিস্সায সল্লেখঞ্ঞেৰ নিস্সায পৰিৰেকঞ্ঞেৰ নিস্সায ইদমত্থিতঞ্ঞেৰ ⁴⁰ নিস্সায আরঞ্ঞিকো হোতি, পিণ্ডপাতিকো হোতি, পংসুকূলিকো হোতি, তেচীৰরিকো হোতি , সপদানচারিকো হোতি, খলুপচ্ছাভত্তিকো হোতি, নেসজ্জিকো হোতি, যথাসন্থতিকো হোতি। এৰম্পি ন লাভকম্যা সিক্খতীতি – লাভকম্যা ন সিক্খতি।

Atha vā bhikkhu na lābhahetu, na lābhapaccayā, na lābhakāraṇā, na lābhābhinibbattiyā, na lābhaṃ paripācento, yāvadeva appicchaññeva ⁴¹ nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva ⁴² nissāya āraññiko hoti, piṇḍapātiko hoti, paṃsukūliko hoti, tecīvariko hoti , sapadānacāriko hoti, khalupacchābhattiko hoti, nesajjiko hoti, yathāsanthatiko hoti. Evampi na lābhakamyā sikkhatīti – lābhakamyā na sikkhati.

অলাভে চ ন কুপ্পতীতি। কথং অলাভে কুপ্পতি? ইধেকচ্চো ‘‘কুলং ৰা ন লভামি, গণং ৰা ন লভামি, আৰাসং ৰা ন লভামি, লাভং ৰা ন লভামি, যসং ৰা ন লভামি, পসংসং ৰা ন লভামি, সুখং ৰা ন লভামি, চীৰরং ৰা ন লভামি, পিণ্ডপাতং ৰা ন লভামি, সেনাসনং ৰা ন লভামি, গিলানপচ্চযভেসজ্জপরিক্খারং ৰা ন লভামি, গিলানুপট্ঠাকং ৰা ন লভামি, অপ্পঞ্ঞাতোম্হী’’তি কুপ্পতি ব্যাপজ্জতি পতিট্ঠীযতি, কোপঞ্চ দোসঞ্চ অপ্পচ্চযঞ্চ পাতুকরোতি। এৰং অলাভে কুপ্পতি।

Alābheca na kuppatīti. Kathaṃ alābhe kuppati? Idhekacco ‘‘kulaṃ vā na labhāmi, gaṇaṃ vā na labhāmi, āvāsaṃ vā na labhāmi, lābhaṃ vā na labhāmi, yasaṃ vā na labhāmi, pasaṃsaṃ vā na labhāmi, sukhaṃ vā na labhāmi, cīvaraṃ vā na labhāmi, piṇḍapātaṃ vā na labhāmi, senāsanaṃ vā na labhāmi, gilānapaccayabhesajjaparikkhāraṃ vā na labhāmi, gilānupaṭṭhākaṃ vā na labhāmi, appaññātomhī’’ti kuppati byāpajjati patiṭṭhīyati, kopañca dosañca appaccayañca pātukaroti. Evaṃ alābhe kuppati.

কথং অলাভে ন কুপ্পতি? ইধ ভিক্খু ‘‘কুলং ৰা ন লভামি গণং ৰা ন লভামি…পে॰… অপ্পঞ্ঞাতোম্হী’’তি ন কুপ্পতি ন ব্যাপজ্জতি ন পতিট্ঠীযতি, ন কোপঞ্চ দোসঞ্চ অপ্পচ্চযঞ্চ পাতুকরোতি। এৰং অলাভে ন কুপ্পতীতি – লাভকম্যা ন সিক্খতি অলাভে চ ন কুপ্পতি।

Kathaṃ alābhe na kuppati? Idha bhikkhu ‘‘kulaṃ vā na labhāmi gaṇaṃ vā na labhāmi…pe… appaññātomhī’’ti na kuppati na byāpajjati na patiṭṭhīyati, na kopañca dosañca appaccayañca pātukaroti. Evaṃ alābhe na kuppatīti – lābhakamyā na sikkhati alābhe ca na kuppati.

অৰিরুদ্ধো চ তণ্হায, রসেসু নানুগিজ্ঝতীতি। ৰিরুদ্ধোতি যো চিত্তস্স আঘাতো পটিঘাতো, পটিঘং পটিৰিরোধো, কোপো পকোপো সম্পকোপো, দোসো পদোসো সম্পদোসো, চিত্তস্স ব্যাপত্তি মনোপদোসো, কোধো কুজ্ঝনা কুজ্ঝিতত্তং, দোসো দুস্সনা দুস্সিতত্তং, ব্যাপত্তি ব্যাপজ্জনা ব্যাপজ্জিতত্তং ৰিরোধো পটিৰিরোধো, চণ্ডিক্কং, অসুরোপো, অনত্তমনতা চিত্তস্স – অযং ৰুচ্চতি ৰিরোধো। যস্সেসো ৰিরোধো পহীনো সমুচ্ছিন্নো ৰূপসন্তো পটিপস্সদ্ধো অভব্বুপ্পত্তিকো ঞাণগ্গিনা দড্ঢো, সো ৰুচ্চতি অৰিরুদ্ধো। তণ্হাতি রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা। রসোতি মূলরসো খন্ধরসো তচরসো পত্তরসো পুপ্ফরসো ফলরসো, অম্বিলং মধুরং তিত্তকং কটুকং লোণিকং খারিকং লম্বিকং ⁴³ কসাৰো সাদু অসাদু সীতং উণ্হং। সন্তেকে সমণব্রাহ্মণা রসগিদ্ধা। তে জিৰ্হগ্গেন রসগ্গানি পরিযেসন্তা আহিণ্ডন্তি, তে অম্বিলং লভিত্ৰা অনম্বিলং পরিযেসন্তি, অনম্বিলং লভিত্ৰা অম্বিলং পরিযেসন্তি; মধুরং লভিত্ৰা অমধুরং পরিযেসন্তি, অমধুরং লভিত্ৰা মধুরং পরিযেসন্তি; তিত্তকং লভিত্ৰা অতিত্তকং পরিযেসন্তি, অতিত্তকং লভিত্ৰা তিত্তকং পরিযেসন্তি; কটুকং লভিত্ৰা অকটুকং পরিযেসন্তি, অকটুকং লভিত্ৰা কটুকং পরিযেসন্তি; লোণিকং লভিত্ৰা অলোণিকং পরিযেসন্তি, অলোণিকং লভিত্ৰা লোণিকং পরিযেসন্তি; খারিকং লভিত্ৰা অখারিকং পরিযেসন্তি, অখারিকং লভিত্ৰা খারিকং পরিযেসন্তি; লম্বিকং লভিত্ৰা কসাৰং পরিযেসন্তি , কসাৰং লভিত্ৰা লম্বিকং পরিযেসন্তি; সাদুং লভিত্ৰা অসাদুং পরিযেসন্তি, অসাদুং লভিত্ৰা সাদুং পরিযেসন্তি; সীতং লভিত্ৰা উণ্হং পরিযেসন্তি, উণ্হং লভিত্ৰা সীতং পরিযেসন্তি। তে যং যং লভিত্ৰা তেন তেন ন সন্তুস্সন্তি অপরাপরং পরিযেসন্তি, মনাপিকেসু রসেসু রত্তা গিদ্ধা গধিতা মুচ্ছিতা অজ্ঝোসন্না লগ্গা লগ্গিতা পলিবুদ্ধা। যস্সেসা রসতণ্হা পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢা, সো পটিসঙ্খা যোনিসো আহারং আহারেতি – ‘‘নেৰ দৰায ন মদায ন মণ্ডনায ন ৰিভূসনায, যাৰদেৰ ইমস্স কাযস্স ঠিতিযা যাপনায ৰিহিংসূপরতিযা ব্রহ্মচরিযানুগ্গহায। ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি অনৰজ্জতা চ ফাসুৰিহারো চা’’তি।

Aviruddhoca taṇhāya, rasesu nānugijjhatīti. Viruddhoti yo cittassa āghāto paṭighāto, paṭighaṃ paṭivirodho, kopo pakopo sampakopo, doso padoso sampadoso, cittassa byāpatti manopadoso, kodho kujjhanā kujjhitattaṃ, doso dussanā dussitattaṃ, byāpatti byāpajjanā byāpajjitattaṃ virodho paṭivirodho, caṇḍikkaṃ, asuropo, anattamanatā cittassa – ayaṃ vuccati virodho. Yasseso virodho pahīno samucchinno vūpasanto paṭipassaddho abhabbuppattiko ñāṇagginā daḍḍho, so vuccati aviruddho. Taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā. Rasoti mūlaraso khandharaso tacaraso pattaraso puppharaso phalaraso, ambilaṃ madhuraṃ tittakaṃ kaṭukaṃ loṇikaṃ khārikaṃ lambikaṃ ⁴⁴ kasāvo sādu asādu sītaṃ uṇhaṃ. Santeke samaṇabrāhmaṇā rasagiddhā. Te jivhaggena rasaggāni pariyesantā āhiṇḍanti, te ambilaṃ labhitvā anambilaṃ pariyesanti, anambilaṃ labhitvā ambilaṃ pariyesanti; madhuraṃ labhitvā amadhuraṃ pariyesanti, amadhuraṃ labhitvā madhuraṃ pariyesanti; tittakaṃ labhitvā atittakaṃ pariyesanti, atittakaṃ labhitvā tittakaṃ pariyesanti; kaṭukaṃ labhitvā akaṭukaṃ pariyesanti, akaṭukaṃ labhitvā kaṭukaṃ pariyesanti; loṇikaṃ labhitvā aloṇikaṃ pariyesanti, aloṇikaṃ labhitvā loṇikaṃ pariyesanti; khārikaṃ labhitvā akhārikaṃ pariyesanti, akhārikaṃ labhitvā khārikaṃ pariyesanti; lambikaṃ labhitvā kasāvaṃ pariyesanti , kasāvaṃ labhitvā lambikaṃ pariyesanti; sāduṃ labhitvā asāduṃ pariyesanti, asāduṃ labhitvā sāduṃ pariyesanti; sītaṃ labhitvā uṇhaṃ pariyesanti, uṇhaṃ labhitvā sītaṃ pariyesanti. Te yaṃ yaṃ labhitvā tena tena na santussanti aparāparaṃ pariyesanti, manāpikesu rasesu rattā giddhā gadhitā mucchitā ajjhosannā laggā laggitā palibuddhā. Yassesā rasataṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so paṭisaṅkhā yoniso āhāraṃ āhāreti – ‘‘neva davāya na madāya na maṇḍanāya na vibhūsanāya, yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya. Iti purāṇañca vedanaṃ paṭihaṅkhāmi, navañca vedanaṃ na uppādessāmi, yātrā ca me bhavissati anavajjatā ca phāsuvihāro cā’’ti.

যথা ৰনং আলিম্পেয্য যাৰদেৰ রোপনত্থায, যথা ৰা পন অক্খং অব্ভঞ্জেয্য যাৰদেৰ ভারস্স নিত্থরণত্থায, যথা ৰা পন পুত্তমংসং আহারং আহরেয্য যাৰদেৰ কন্তারস্স নিত্থরণত্থায; এৰমেৰ ভিক্খু পটিসঙ্খা যোনিসো আহারং আহারেতি – ‘‘নেৰ দৰায…পে॰… ফাসুৰিহারো চা’’তি। রসতণ্হং পজহতি ৰিনোদেতি ব্যন্তিং করোতি অনভাৰং গমেতি, রসতণ্হায আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – অৰিরুদ্ধো চ তণ্হায রসেসু নানুগিজ্ঝতি।

Yathā vanaṃ ālimpeyya yāvadeva ropanatthāya, yathā vā pana akkhaṃ abbhañjeyya yāvadeva bhārassa nittharaṇatthāya, yathā vā pana puttamaṃsaṃ āhāraṃ āhareyya yāvadeva kantārassa nittharaṇatthāya; evameva bhikkhu paṭisaṅkhā yoniso āhāraṃ āhāreti – ‘‘neva davāya…pe… phāsuvihāro cā’’ti. Rasataṇhaṃ pajahati vinodeti byantiṃ karoti anabhāvaṃ gameti, rasataṇhāya ārato assa virato paṭivirato nikkhanto nissaṭo vippamutto visaññutto vimariyādikatena cetasā viharatīti – aviruddho ca taṇhāya rasesu nānugijjhati.

তেনাহ ভগৰা –

Tenāha bhagavā –

‘‘লাভকম্যা ন সিক্খতি, অলাভে চ ন কুপ্পতি।

‘‘Lābhakamyā na sikkhati, alābhe ca na kuppati;

অৰিরুদ্ধো চ তণ্হায, রসেসু নানুগিজ্ঝতী’’তি॥

Aviruddho ca taṇhāya, rasesu nānugijjhatī’’ti.

৯০.

90.

উপেক্খকো সদা সতো, ন লোকে মঞ্ঞতে সমং।

Upekkhako sadā sato, na loke maññate samaṃ;

ন ৰিসেসী ন নীচেয্যো, তস্স নো সন্তি উস্সদা॥

Na visesī na nīceyyo, tassa no santi ussadā.

উপেক্খকো সদা সতোতি। উপেক্খকোতি ছল়ঙ্গুপেক্খায সমন্নাগতো। চক্খুনা রূপং দিস্ৰা নেৰ সুমনো হোতি ন দুম্মনো, উপেক্খকো ৰিহরতি সতো সম্পজানো। সোতেন সদ্দং সুত্ৰা…পে॰… মনসা ধম্মং ৰিঞ্ঞায নেৰ সুমনো হোতি ন দুম্মনো, উপেক্খকো ৰিহরতি সতো সম্পজানো। চক্খুনা রূপং দিস্ৰা মনাপং নাভিগিজ্ঝতি নাভিহংসতি ⁴⁵ ন রাগং জনেতি, তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং। চক্খুনা খো পনেৰ রূপং দিস্ৰা অমনাপং ন মঙ্কু হোতি অপ্পতিট্ঠিতচিত্তো ⁴⁶ অলীনমনসো ⁴⁷ অব্যাপন্নচেতসো, তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং। সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায মনাপং নাভিগিজ্ঝতি নাভিহংসতি ন রাগং জনেতি, তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং। মনসা খো পনেৰ ধম্মং ৰিঞ্ঞায অমনাপং ন মঙ্কু হোতি অপ্পতিট্ঠিতচিত্তো অলীনমনসো অব্যাপন্নচেতসো, তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং।

Upekkhako sadā satoti. Upekkhakoti chaḷaṅgupekkhāya samannāgato. Cakkhunā rūpaṃ disvā neva sumano hoti na dummano, upekkhako viharati sato sampajāno. Sotena saddaṃ sutvā…pe… manasā dhammaṃ viññāya neva sumano hoti na dummano, upekkhako viharati sato sampajāno. Cakkhunā rūpaṃ disvā manāpaṃ nābhigijjhati nābhihaṃsati ⁴⁸ na rāgaṃ janeti, tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Cakkhunā kho paneva rūpaṃ disvā amanāpaṃ na maṅku hoti appatiṭṭhitacitto ⁴⁹ alīnamanaso ⁵⁰ abyāpannacetaso, tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya manāpaṃ nābhigijjhati nābhihaṃsati na rāgaṃ janeti, tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Manasā kho paneva dhammaṃ viññāya amanāpaṃ na maṅku hoti appatiṭṭhitacitto alīnamanaso abyāpannacetaso, tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ.

চক্খুনা রূপং দিস্ৰা মনাপামনাপেসু রূপেসু তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং। সোতেন সদ্দং সুত্ৰা…পে॰… মনসা ধম্মং ৰিঞ্ঞায মনাপামনাপেসু ধম্মেসু তস্স ঠিতোৰ কাযো হোতি, ঠিতং চিত্তং অজ্ঝত্তং সুসণ্ঠিতং সুৰিমুত্তং।

Cakkhunā rūpaṃ disvā manāpāmanāpesu rūpesu tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Sotena saddaṃ sutvā…pe… manasā dhammaṃ viññāya manāpāmanāpesu dhammesu tassa ṭhitova kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ.

চক্খুনা রূপং দিস্ৰা রজনীযে ন রজ্জতি, দুস্সনীযে ⁵¹ ন দুস্সতি, মোহনীযে ন মুয্হতি, কোপনীযে ন কুপ্পতি, মদনীযে ন মজ্জতি, কিলেসনীযে ন কিলিস্সতি। সোতেন সদ্দং সুত্ৰা…পে॰… মনসা ধম্মং ৰিঞ্ঞায রজনীযে ন রজ্জতি দুস্সনীযে ন দুস্সতি, মোহনীযে ন মুয্হতি, কোপনীযে ন কুপ্পতি, মদনীযে ন মজ্জতি, কিলেসনীযে ন কিলিস্সতি। দিট্ঠে দিট্ঠমত্তো, সুতে সুতমত্তো, মুতে মুতমত্তো, ৰিঞ্ঞাতে ৰিঞ্ঞাতমত্তো। দিট্ঠে ন লিম্পতি, সুতে ন লিম্পতি, মুতে ন লিম্পতি, ৰিঞ্ঞাতে ন লিম্পতি। দিট্ঠে অনূপযো অনপাযো অনিস্সিতো অপ্পটিবদ্ধো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতি। সুতে… মুতে… ৰিঞ্ঞাতে অনূপযো অনপাযো অনিস্সিতো অপ্পটিবদ্ধো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতি।

Cakkhunā rūpaṃ disvā rajanīye na rajjati, dussanīye ⁵² na dussati, mohanīye na muyhati, kopanīye na kuppati, madanīye na majjati, kilesanīye na kilissati. Sotena saddaṃ sutvā…pe… manasā dhammaṃ viññāya rajanīye na rajjati dussanīye na dussati, mohanīye na muyhati, kopanīye na kuppati, madanīye na majjati, kilesanīye na kilissati. Diṭṭhe diṭṭhamatto, sute sutamatto, mute mutamatto, viññāte viññātamatto. Diṭṭhe na limpati, sute na limpati, mute na limpati, viññāte na limpati. Diṭṭhe anūpayo anapāyo anissito appaṭibaddho vippamutto visaññutto vimariyādikatena cetasā viharati. Sute… mute… viññāte anūpayo anapāyo anissito appaṭibaddho vippamutto visaññutto vimariyādikatena cetasā viharati.

সংৰিজ্জতি অরহতো চক্খু, পস্সতি অরহা চক্খুনা রূপং। ছন্দরাগো অরহতো নত্থি, সুৰিমুত্তচিত্তো অরহা। সংৰিজ্জতি অরহতো সোতং, সুণাতি অরহা সোতেন সদ্দং। ছন্দরাগো অরহতো নত্থি, সুৰিমুত্তচিত্তো অরহা। সংৰিজ্জতি অরহতো ঘানং, ঘাযতি অরহা ঘানেন গন্ধং। ছন্দরাগো অরহতো নত্থি, সুৰিমুত্তচিত্তো অরহা। সংৰিজ্জতি অরহতো জিৰ্হা, সাযতি অরহা জিৰ্হায রসং…পে॰… সংৰিজ্জতি অরহতো কাযো, ফুসতি অরহা কাযেন ফোট্ঠব্বং…পে॰… সংৰিজ্জতি অরহতো মনো, ৰিজানাতি অরহা মনসা ধম্মং। ছন্দরাগো অরহতো নত্থি সুৰিমুত্তচিত্তো অরহা।

Saṃvijjati arahato cakkhu, passati arahā cakkhunā rūpaṃ. Chandarāgo arahato natthi, suvimuttacitto arahā. Saṃvijjati arahato sotaṃ, suṇāti arahā sotena saddaṃ. Chandarāgo arahato natthi, suvimuttacitto arahā. Saṃvijjati arahato ghānaṃ, ghāyati arahā ghānena gandhaṃ. Chandarāgo arahato natthi, suvimuttacitto arahā. Saṃvijjati arahato jivhā, sāyati arahā jivhāya rasaṃ…pe… saṃvijjati arahato kāyo, phusati arahā kāyena phoṭṭhabbaṃ…pe… saṃvijjati arahato mano, vijānāti arahā manasā dhammaṃ. Chandarāgo arahato natthi suvimuttacitto arahā.

চক্খু রূপারামং রূপরতং রূপসম্মুদিতং, তং অরহতো দন্তং গুত্তং রক্খিতং সংৰুতং, তস্স চ সংৰরায ধম্মং দেসেতি। সোতং সদ্দারামং…পে॰… ঘানং গন্ধারামং… জিৰ্হা রসারামা রসরতা রসসম্মুদিতা, সা অরহতো দন্তা গুত্তা রক্খিতা সংৰুতা, তস্সা চ সংৰরায ধম্মং দেসেতি। কাযো ফোট্ঠব্বারামো…পে॰… মনো ধম্মারামো ধম্মরতো ধম্মসম্মুদিতো, সো অরহতো দন্তো গুত্তো রক্খিতো সংৰুতো, তস্স চ সংৰরায ধম্মং দেসেতি।

Cakkhu rūpārāmaṃ rūparataṃ rūpasammuditaṃ, taṃ arahato dantaṃ guttaṃ rakkhitaṃ saṃvutaṃ, tassa ca saṃvarāya dhammaṃ deseti. Sotaṃ saddārāmaṃ…pe… ghānaṃ gandhārāmaṃ… jivhā rasārāmā rasaratā rasasammuditā, sā arahato dantā guttā rakkhitā saṃvutā, tassā ca saṃvarāya dhammaṃ deseti. Kāyo phoṭṭhabbārāmo…pe… mano dhammārāmo dhammarato dhammasammudito, so arahato danto gutto rakkhito saṃvuto, tassa ca saṃvarāya dhammaṃ deseti.

‘‘দন্তং নযন্তি সমিতিং, দন্তং রাজাভিরূহতি।

‘‘Dantaṃ nayanti samitiṃ, dantaṃ rājābhirūhati;

দন্তো সেট্ঠো মনুস্সেসু, যোতিৰাক্যং তিতিক্খতি॥

Danto seṭṭho manussesu, yotivākyaṃ titikkhati.

‘‘ৰরমস্সতরা দন্তা, আজানীযা চ ⁵³ সিন্ধৰা।

‘‘Varamassatarā dantā, ājānīyā ca ⁵⁴ sindhavā;

কুঞ্জরা চ মহানাগা, অত্তদন্তো ততো ৰরং॥

Kuñjarā ca mahānāgā, attadanto tato varaṃ.

‘‘ন হি এতেহি যানেহি, গচ্ছেয্য অগতং দিসং।

‘‘Na hi etehi yānehi, gaccheyya agataṃ disaṃ;

যথাত্তনা সুদন্তেন, দন্তো দন্তেন গচ্ছতি॥

Yathāttanā sudantena, danto dantena gacchati.

‘‘ৰিধাসু ন ৰিকম্পন্তি, ৰিপ্পমুত্তা পুনব্ভৰা।

‘‘Vidhāsu na vikampanti, vippamuttā punabbhavā;

দন্তভূমিমনুপ্পত্তা, তে লোকে ৰিজিতাৰিনো॥

Dantabhūmimanuppattā, te loke vijitāvino.

‘‘যস্সিন্দ্রিযানি ভাৰিতানি ⁵⁵, অজ্ঝত্তং বহিদ্ধা চ ⁵⁶ সব্বলোকে।

‘‘Yassindriyāni bhāvitāni ⁵⁷, ajjhattaṃ bahiddhā ca ⁵⁸ sabbaloke;

নিব্বিজ্ঝ ইমং ⁵⁹ পরঞ্চ লোকং, কালং কঙ্খতি ভাৰিতো স দন্তো’’তি॥

Nibbijjha imaṃ ⁶⁰ parañca lokaṃ, kālaṃ kaṅkhati bhāvito sa danto’’ti.

উপেক্খকো সদাতি। সদা সব্বদা সব্বকালং নিচ্চকালং ধুৰকালং…পে॰… পচ্ছিমে ৰযোখন্ধে। সতোতি চতূহি কারণেহি সতো – কাযে কাযানুপস্সনাসতিপট্ঠানং ভাৰেন্তো সতো, ৰেদনাসু… চিত্তে… ধম্মেসু ধম্মানুপস্সনাসতিপট্ঠানং ভাৰেন্তো সতো…পে॰… সো ৰুচ্চতি সতোতি – উপেক্খকো সদা সতো।

Upekkhako sadāti. Sadā sabbadā sabbakālaṃ niccakālaṃ dhuvakālaṃ…pe… pacchime vayokhandhe. Satoti catūhi kāraṇehi sato – kāye kāyānupassanāsatipaṭṭhānaṃ bhāvento sato, vedanāsu… citte… dhammesu dhammānupassanāsatipaṭṭhānaṃ bhāvento sato…pe… so vuccati satoti – upekkhako sadā sato.

ন লোকে মঞ্ঞতে সমন্তি। ‘‘সদিসোহমস্মী’’তি মানং ন জনেতি জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনাতি – ন লোকে মঞ্ঞতে সমং।

Na loke maññate samanti. ‘‘Sadisohamasmī’’ti mānaṃ na janeti jātiyā vā gottena vā…pe… aññataraññatarena vā vatthunāti – na loke maññate samaṃ.

ন ৰিসেসী ন নীচেয্যোতি। ‘‘সেয্যোহমস্মী’’তি অতিমানং ন জনেতি জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনা । ‘‘হীনোহমস্মী’’তি ওমানং ন জনেতি জাতিযা ৰা গোত্তেন ৰা…পে॰… অঞ্ঞতরঞ্ঞতরেন ৰা ৰত্থুনাতি – ন ৰিসেসী ন নীচেয্যো।

Na visesī na nīceyyoti. ‘‘Seyyohamasmī’’ti atimānaṃ na janeti jātiyā vā gottena vā…pe… aññataraññatarena vā vatthunā . ‘‘Hīnohamasmī’’ti omānaṃ na janeti jātiyā vā gottena vā…pe… aññataraññatarena vā vatthunāti – na visesī na nīceyyo.

তস্স নো সন্তি উস্সদাতি। তস্সাতি অরহতো খীণাসৰস্স। উস্সদাতি সত্তুস্সদা – রাগুস্সদো দোসুস্সদো মোহুস্সদো মানুস্সদো দিট্ঠুস্সদো কিলেসুস্সদো কম্মুস্সদো। তস্সিমে উস্সদা নত্থি ন সন্তি ন সংৰিজ্জন্তি নুপলব্ভন্তি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – তস্স নো সন্তি উস্সদা।

Tassa no santi ussadāti. Tassāti arahato khīṇāsavassa. Ussadāti sattussadā – rāgussado dosussado mohussado mānussado diṭṭhussado kilesussado kammussado. Tassime ussadā natthi na santi na saṃvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – tassa no santi ussadā.

তেনাহ ভগৰা –

Tenāha bhagavā –

‘‘উপেক্খকো সদা সতো, ন লোকে মঞ্ঞতে সমং।

‘‘Upekkhako sadā sato, na loke maññate samaṃ;

ন ৰিসেসী ন নীচেয্যো, তস্স নো সন্তি উস্সদা’’তি॥

Na visesī na nīceyyo, tassa no santi ussadā’’ti.

৯১.

91.

যস্স নিস্সযতা ⁶¹ নত্থি, ঞত্ৰা ধম্মং অনিস্সিতো।

Yassanissayatā⁶²natthi, ñatvā dhammaṃ anissito;

ভৰায ৰিভৰায ৰা, তণ্হা যস্স ন ৰিজ্জতি॥

Bhavāya vibhavāya vā, taṇhā yassa na vijjati.

যস্স নিস্সযতা নত্থীতি। যস্সাতি অরহতো খীণাসৰস্স। নিস্সযাতি দ্ৰে নিস্সযা – তণ্হানিস্সযো চ দিট্ঠিনিস্সযো চ…পে॰… অযং তণ্হানিস্সযো…পে॰… অযং দিট্ঠিনিস্সযো । তস্স তণ্হানিস্সযো পহীনো, দিট্ঠিনিস্সযো পটিনিস্সট্ঠো; তণ্হানিস্সযস্স পহীনত্তা দিট্ঠিনিস্সযস্স পটিনিস্সট্ঠত্তা নিস্সযতা যস্স নত্থি ন সন্তি ন সংৰিজ্জতি নুপলব্ভতি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – যস্স নিস্সযতা নত্থি।

Yassanissayatā natthīti. Yassāti arahato khīṇāsavassa. Nissayāti dve nissayā – taṇhānissayo ca diṭṭhinissayo ca…pe… ayaṃ taṇhānissayo…pe… ayaṃ diṭṭhinissayo . Tassa taṇhānissayo pahīno, diṭṭhinissayo paṭinissaṭṭho; taṇhānissayassa pahīnattā diṭṭhinissayassa paṭinissaṭṭhattā nissayatā yassa natthi na santi na saṃvijjati nupalabbhati, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – yassa nissayatā natthi.

ঞত্ৰা ধম্মং অনিস্সিতোতি। ঞত্ৰাতি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা, ‘‘সব্বে সঙ্খারা অনিচ্চা’’তি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা, ‘‘সব্বে সঙ্খারা দুক্খা’’তি… ‘‘সব্বে ধম্মা অনত্তা’’তি…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্ত্ন্ত্তি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা। অনিস্সিতোতি দ্ৰে নিস্সযা – তণ্হানিস্সযো চ দিট্ঠিনিস্সযো চ…পে॰… অযং তণ্হানিস্সযো…পে॰… অযং দিট্ঠিনিস্সযো। তণ্হানিস্সযং পহায দিট্ঠিনিস্সযং পটিনিস্সজ্জিত্ৰা চক্খুং অনিস্সিতো, সোতং অনিস্সিতো, ঘানং অনিস্সিতো, জিৰ্হং অনিস্সিতো, কাযং অনিস্সিতো, মনং অনিস্সিতো, রূপে… সদ্দে… গন্ধে… রসে… ফোট্ঠব্বে… কুলং… গণং… আৰাসং…পে॰… দিট্ঠসুতমুতৰিঞ্ঞাতব্বে ধম্মে অনিস্সিতো অনল্লীনো অনুপগতো অনজ্ঝোসিতো অনধিমুত্তো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – ঞত্ৰা ধম্মং অনিস্সিতো।

Ñatvādhammaṃ anissitoti. Ñatvāti ñatvā jānitvā tulayitvā tīrayitvā vibhāvayitvā vibhūtaṃ katvā, ‘‘sabbe saṅkhārā aniccā’’ti ñatvā jānitvā tulayitvā tīrayitvā vibhāvayitvā vibhūtaṃ katvā, ‘‘sabbe saṅkhārā dukkhā’’ti… ‘‘sabbe dhammā anattā’’ti…pe… ‘‘yaṃ kiñci samudayadhammaṃ sabbaṃ taṃ nirodhadhamma’’ntntti ñatvā jānitvā tulayitvā tīrayitvā vibhāvayitvā vibhūtaṃ katvā. Anissitoti dve nissayā – taṇhānissayo ca diṭṭhinissayo ca…pe… ayaṃ taṇhānissayo…pe… ayaṃ diṭṭhinissayo. Taṇhānissayaṃ pahāya diṭṭhinissayaṃ paṭinissajjitvā cakkhuṃ anissito, sotaṃ anissito, ghānaṃ anissito, jivhaṃ anissito, kāyaṃ anissito, manaṃ anissito, rūpe… sadde… gandhe… rase… phoṭṭhabbe… kulaṃ… gaṇaṃ… āvāsaṃ…pe… diṭṭhasutamutaviññātabbe dhamme anissito anallīno anupagato anajjhosito anadhimutto nikkhanto nissaṭo vippamutto visaññutto vimariyādikatena cetasā viharatīti – ñatvā dhammaṃ anissito.

ভৰায ৰিভৰায ৰা, তণ্হা যস্স ন ৰিজ্জতীতি। তণ্হাতি রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা। যস্সাতি অরহতো খীণাসৰস্স। ভৰাযাতি ভৰদিট্ঠিযা, ৰিভৰাযাতি ৰিভৰদিট্ঠিযা; ভৰাযাতি সস্সতদিট্ঠিযা, ৰিভৰাযাতি উচ্ছেদদিট্ঠিযা; ভৰাযাতি পুনপ্পুনভৰায পুনপ্পুনগতিযা পুনপ্পুনউপপত্তিযা পুনপ্পুনপটিসন্ধিযা পুনপ্পুনঅত্তভাৰাভিনিব্বত্তিযা । তণ্হা যস্স নত্থি ন সন্তি ন সংৰিজ্জতি নুপলব্ভতি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – ভৰায ৰিভৰায ৰা তণ্হা যস্স ন ৰিজ্জতি।

Bhavāya vibhavāya vā, taṇhā yassa na vijjatīti. Taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā. Yassāti arahato khīṇāsavassa. Bhavāyāti bhavadiṭṭhiyā, vibhavāyāti vibhavadiṭṭhiyā; bhavāyāti sassatadiṭṭhiyā, vibhavāyāti ucchedadiṭṭhiyā; bhavāyāti punappunabhavāya punappunagatiyā punappunaupapattiyā punappunapaṭisandhiyā punappunaattabhāvābhinibbattiyā . Taṇhā yassa natthi na santi na saṃvijjati nupalabbhati, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – bhavāya vibhavāya vā taṇhā yassa na vijjati.

তেনাহ ভগৰা –

Tenāha bhagavā –

‘‘যস্স নিস্সযতা নত্থি, ঞত্ৰা ধম্মং অনিস্সিতো।

‘‘Yassa nissayatā natthi, ñatvā dhammaṃ anissito;

ভৰায ৰিভৰায ৰা, তণ্হা যস্স ন ৰিজ্জতী’’তি॥

Bhavāya vibhavāya vā, taṇhā yassa na vijjatī’’ti.

৯২.

92.

তং ব্রূমি উপসন্তোতি, কামেসু অনপেক্খিনং।

Taṃbrūmi upasantoti, kāmesu anapekkhinaṃ;

গন্থা তস্স ন ৰিজ্জন্তি, অতরী সো ৰিসত্তিকং॥

Ganthā tassa na vijjanti, atarī so visattikaṃ.

তং ব্রূমি উপসন্তোতি। উপসন্তো ৰূপসন্তো নিব্বুতো পটিপস্সদ্ধোতি। তং ব্রূমি তং কথেমি তং ভণামি তং দীপযামি তং ৰোহরামীতি – তং ব্রূমি উপসন্তোতি।

Taṃ brūmi upasantoti. Upasanto vūpasanto nibbuto paṭipassaddhoti. Taṃ brūmi taṃ kathemi taṃ bhaṇāmi taṃ dīpayāmi taṃ voharāmīti – taṃ brūmi upasantoti.

কামেসু অনপেক্খিনন্তি। কামাতি উদ্দানতো দ্ৰে কামা – ৰত্থুকামা চ কিলেসকামা চ…পে॰… ইমে ৰুচ্চন্তি ৰত্থুকামা…পে॰… ইমে ৰুচ্চন্তি কিলেসকামা। ৰত্থুকামে পরিজানিত্ৰা, কিলেসকামে পহায পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰা কামেসু অনপেক্খিনো ৰীতকামো চত্তকামো ৰন্তকামো মুত্তকামো পহীনকামো পটিনিস্সট্ঠকামো, কামেসু ৰীতরাগো ৰিগতরাগো চত্তরাগো ৰন্তরাগো মুত্তরাগো পহীনরাগো পটিনিস্সট্ঠরাগো নিচ্ছাতো নিব্বুতো সীতিভূতো সুখপ্পটিসংৰেদী ব্রহ্মভূতেন অত্তনা ৰিহরতীতি – কামেসু অনপেক্খিনং।

Kāmesu anapekkhinanti. Kāmāti uddānato dve kāmā – vatthukāmā ca kilesakāmā ca…pe… ime vuccanti vatthukāmā…pe… ime vuccanti kilesakāmā. Vatthukāme parijānitvā, kilesakāme pahāya pajahitvā vinodetvā byantiṃ karitvā anabhāvaṃ gametvā kāmesu anapekkhino vītakāmo cattakāmo vantakāmo muttakāmo pahīnakāmo paṭinissaṭṭhakāmo, kāmesu vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhappaṭisaṃvedī brahmabhūtena attanā viharatīti – kāmesu anapekkhinaṃ.

গন্থা তস্স ন ৰিজ্জন্তীতি। গন্থাতি চত্তারো গন্থা – অভিজ্ঝা কাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো। অত্তনো দিট্ঠিযা রাগো অভিজ্ঝা কাযগন্থো, পরৰাদেসু আঘাতো অপ্পচ্চযো ব্যাপাদো কাযগন্থো, অত্তনো সীলং ৰা ৰতং ৰা সীলব্বতং ৰা পরামাসো সীলব্বতপরামাসো কাযগন্থো, অত্তনো দিট্ঠি ইদংসচ্চাভিনিৰেসো কাযগন্থো। তস্সাতি অরহতো খীণাসৰস্স। গন্থা তস্স ন ৰিজ্জন্তীতি। গন্থা তস্স নত্থি ন সন্তি ন সংৰিজ্জন্তি নুপলব্ভন্তি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – গন্থা তস্স ন ৰিজ্জন্তি।

Ganthātassa na vijjantīti. Ganthāti cattāro ganthā – abhijjhā kāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Attano diṭṭhiyā rāgo abhijjhā kāyagantho, paravādesu āghāto appaccayo byāpādo kāyagantho, attano sīlaṃ vā vataṃ vā sīlabbataṃ vā parāmāso sīlabbataparāmāso kāyagantho, attano diṭṭhi idaṃsaccābhiniveso kāyagantho. Tassāti arahato khīṇāsavassa. Ganthā tassa na vijjantīti. Ganthā tassa natthi na santi na saṃvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – ganthā tassa na vijjanti.

অতরী সো ৰিসত্তিকন্তি। ৰিসত্তিকা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। ৰিসত্তিকাতি কেনট্ঠেন ৰিসত্তিকা ? ৰিসতাতি ৰিসত্তিকা, ৰিসালাতি ৰিসত্তিকা, ৰিসটাতি ৰিসত্তিকা, ৰিসমাতি ৰিসত্তিকা, ৰিসক্কতীতি ৰিসত্তিকা, ৰিসংহরতীতি ৰিসত্তিকা, ৰিসংৰাদিকাতি ৰিসত্তিকা, ৰিসমূলাতি ৰিসত্তিকা, ৰিসফলাতি ৰিসত্তিকা, ৰিসপরিভোগাতি ৰিসত্তিকা, ৰিসালা ৰা পন সা তণ্হা রূপে… সদ্দে… গন্ধে… রসে… ফোট্ঠব্বে… কুলে… গণে… আৰাসে…পে॰… দিট্ঠসুতমুতৰিঞ্ঞাতব্বেসু ধম্মেসু ৰিসতং ৰিত্থতাতি ৰিসত্তিকা। অতরী সো ৰিসত্তিকন্তি। সো ইমং ৰিসত্তিকং তণ্হং অতরি উত্তরি পতরি সমতিক্কমি ৰীতিৰত্তীতি – অতরী সো ৰিসত্তিকং।

Atarī so visattikanti. Visattikā vuccati taṇhā. Yo rāgo sārāgo…pe… abhijjhā lobho akusalamūlaṃ. Visattikāti kenaṭṭhena visattikā ? Visatāti visattikā, visālāti visattikā, visaṭāti visattikā, visamāti visattikā, visakkatīti visattikā, visaṃharatīti visattikā, visaṃvādikāti visattikā, visamūlāti visattikā, visaphalāti visattikā, visaparibhogāti visattikā, visālā vā pana sā taṇhā rūpe… sadde… gandhe… rase… phoṭṭhabbe… kule… gaṇe… āvāse…pe… diṭṭhasutamutaviññātabbesu dhammesu visataṃ vitthatāti visattikā. Atarī so visattikanti. So imaṃ visattikaṃ taṇhaṃ atari uttari patari samatikkami vītivattīti – atarī so visattikaṃ.

তেনাহ ভগৰা –

Tenāha bhagavā –

‘‘তং ব্রূমি উপসন্তোতি, কামেসু অনপেক্খিনং।

‘‘Taṃ brūmi upasantoti, kāmesu anapekkhinaṃ;

গন্থা তস্স ন ৰিজ্জন্তি, অতরী সো ৰিসত্তিক’’ন্তি॥

Ganthā tassa na vijjanti, atarī so visattika’’nti.

৯৩.

93.

ন তস্স পুত্তা পসৰো, খেত্তং ৰত্থুঞ্চ ৰিজ্জতি।

Na tassa puttā pasavo, khettaṃ vatthuñca vijjati;

অত্তা ৰাপি নিরত্তা ৰা, ন তস্মিং উপলব্ভতি॥

Attā vāpi nirattā vā, na tasmiṃ upalabbhati.

ন তস্স পুত্তা পসৰো, খেত্তং ৰত্থুঞ্চ ৰিজ্জতীতি। নাতি পটিক্খেপো। তস্সাতি অরহতো খীণাসৰস্স। পুত্তাতি চত্তারো পুত্তা – অত্তজো পুত্তো, খেত্তজো পুত্তো, দিন্নকো পুত্তো , অন্তেৰাসিকো পুত্তো। পসৰোতি। অজেল়কা কুক্কুটসূকরা হত্থিগাৰাস্সৰল়ৰা। খেত্তন্তি সালিখেত্তং ৰীহিখেত্তং মুগ্গখেত্তং মাসখেত্তং যৰখেত্তং গোধুমখেত্তং তিলখেত্তং। ৰত্থুন্তি ঘরৰত্থুং কোট্ঠৰত্থুং পুরেৰত্থুং পচ্ছাৰত্থুং আরামৰত্থুং ৰিহারৰত্থুং। ন তস্স পুত্তা পসৰো, খেত্তং ৰত্থুঞ্চ ৰিজ্জতীতি। তস্স পুত্তপরিগ্গহো ৰা পসুপরিগ্গহো ৰা খেত্তপরিগ্গহো ৰা ৰত্থুপরিগ্গহো ৰা নত্থি ন সন্তি ন সংৰিজ্জন্তি নুপলব্ভন্তি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – ন তস্স পুত্তা পসৰো, খেত্তং ৰত্থুঞ্চ ৰিজ্জতি।

Na tassa puttā pasavo, khettaṃ vatthuñca vijjatīti. Nāti paṭikkhepo. Tassāti arahato khīṇāsavassa. Puttāti cattāro puttā – attajo putto, khettajo putto, dinnako putto , antevāsiko putto. Pasavoti. Ajeḷakā kukkuṭasūkarā hatthigāvāssavaḷavā. Khettanti sālikhettaṃ vīhikhettaṃ muggakhettaṃ māsakhettaṃ yavakhettaṃ godhumakhettaṃ tilakhettaṃ. Vatthunti gharavatthuṃ koṭṭhavatthuṃ purevatthuṃ pacchāvatthuṃ ārāmavatthuṃ vihāravatthuṃ. Na tassa puttā pasavo, khettaṃ vatthuñca vijjatīti. Tassa puttapariggaho vā pasupariggaho vā khettapariggaho vā vatthupariggaho vā natthi na santi na saṃvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – na tassa puttā pasavo, khettaṃ vatthuñca vijjati.

অত্তা ৰাপি নিরত্তা ৰা, ন তস্মিং উপলব্ভতীতি। অত্তাতি অত্তদিট্ঠি, নিরত্তাতি উচ্ছেদদিট্ঠি; অত্তাতি গহিতং নত্থি, নিরত্তাতি মুঞ্চিতব্বং নত্থি। যস্স নত্থি গহিতং তস্স নত্থি মুঞ্চিতব্বং। যস্স নত্থি মুঞ্চিতব্বং তস্স নত্থি গহিতং। গাহমুঞ্চনসমতিক্কন্তো অরহা ৰুদ্ধিপরিহানিৰীতিৰত্তো। সো ৰুট্ঠৰাসো চিণ্ণচরণো…পে॰… জাতিমরণসংসারো নত্থি তস্স পুনব্ভৰোতি – অত্তা ৰাপি নিরত্তা ৰা, ন তস্মিং উপলব্ভতি।

Attā vāpi nirattā vā, na tasmiṃ upalabbhatīti. Attāti attadiṭṭhi, nirattāti ucchedadiṭṭhi; attāti gahitaṃ natthi, nirattāti muñcitabbaṃ natthi. Yassa natthi gahitaṃ tassa natthi muñcitabbaṃ. Yassa natthi muñcitabbaṃ tassa natthi gahitaṃ. Gāhamuñcanasamatikkanto arahā vuddhiparihānivītivatto. So vuṭṭhavāso ciṇṇacaraṇo…pe… jātimaraṇasaṃsāro natthi tassa punabbhavoti – attā vāpi nirattā vā, na tasmiṃ upalabbhati.

তেনাহ ভগৰা –

Tenāha bhagavā –

‘‘ন তস্স পুত্তা পসৰো, খেত্তং ৰত্থুঞ্চ ৰিজ্জতি।

‘‘Na tassa puttā pasavo, khettaṃ vatthuñca vijjati;

অত্তা ৰাপি নিরত্তা ৰা, ন তস্মিং উপলব্ভতী’’তি॥

Attā vāpi nirattā vā, na tasmiṃ upalabbhatī’’ti.

৯৪.

94.

যেন নং ৰজ্জুং পুথুজ্জনা, অথো সমণব্রাহ্মণা।

Yena naṃ vajjuṃ puthujjanā, atho samaṇabrāhmaṇā;

তং তস্স অপুরক্খতং, তস্মা ৰাদেসু নেজতি॥

Taṃ tassa apurakkhataṃ, tasmā vādesu nejati.

যেন নং ৰজ্জুং পুথুজ্জনা, অথো সমণব্রাহ্মণাতি। পুথুজ্জনাতি পুথু কিলেসে জনেন্তীতি পুথুজ্জনা , পুথু অৰিহতসক্কাযদিট্ঠিকাতি পুথুজ্জনা, পুথু সত্থারানং মুখুল্লোকিকাতি ⁶³ পুথুজ্জনা, পুথু সব্বগতীহি অৰুট্ঠিতাতি পুথুজ্জনা, পুথু নানাভিসঙ্খারে অভিসঙ্খরোন্তীতি পুথুজ্জনা, পুথু নানাওঘেহি ৰুয্হন্তীতি পুথুজ্জনা, পুথু নানাসন্তাপেহি সন্তপ্পেন্তীতি পুথুজ্জনা, পুথু নানাপরিল়াহেহি পরিডয্হন্তীতি পুথুজ্জনা, পুথু পঞ্চসু কামগুণেসু রত্তা গিদ্ধা গধিতা মুচ্ছিতা অজ্ঝোসন্না লগ্গা লগ্গিতা পলিবুদ্ধাতি পুথুজ্জনা, পুথু পঞ্চহি নীৰরণেহি আৰুতা নিৰুতা ওৰুতা পিহিতা পটিচ্ছন্না পটিকুজ্জিতাতি – পুথুজ্জনা। সমণাতি যে কেচি ইতো বহিদ্ধা পরিব্বজূপগতা পরিব্বজসমাপন্না। ব্রাহ্মণাতি যে কেচি ভোৰাদিকা। যেন নং ৰজ্জুং পুথুজ্জনা, অথো সমণব্রাহ্মণাতি । পুথুজ্জনা যেন তং রাগেন ৰদেয্যুং, যেন দোসেন ৰদেয্যুং, যেন মোহেন ৰদেয্যুং, যেন মানেন ৰদেয্যুং, যায দিট্ঠিযা ৰদেয্যুং, যেন উদ্ধচ্চেন ৰদেয্যুং, যায ৰিচিকিচ্ছায ৰদেয্যুং, যেহি অনুসযেহি ৰদেয্যুং, রত্তোতি ৰা দুট্ঠোতি ৰা মূল়্হোতি ৰা ৰিনিবদ্ধোতি ৰা পরামট্ঠোতি ৰা ৰিক্খেপগতোতি ৰা অনিট্ঠঙ্গতোতি ৰা থামগতোতি ৰা তে অভিসঙ্খারা পহীনা; অভিসঙ্খারানং পহীনত্তা গতিযা ⁶⁴ যেন তং ৰদেয্যুং – নেরযিকোতি ৰা তিরচ্ছানযোনিকোতি ৰা পেত্তিৰিসযিকোতি ৰা মনুস্সোতি ৰা দেৰোতি ৰা রূপীতি ৰা অরূপীতি ৰা সঞ্ঞীতি ৰা অসঞ্ঞীতি ৰা নেৰসঞ্ঞীনাসঞ্ঞীতি ৰা। সো হেতু নত্থি পচ্চযো নত্থি কারণং নত্থি যেন নং ৰদেয্যুং কথেয্যুং ভণেয্যুং দীপযেয্যুং ৰোহরেয্যুন্তি – যেন নং ৰজ্জুং পুথুজ্জনা, অথো সমণব্রাহ্মণা।

Yena naṃ vajjuṃ puthujjanā, atho samaṇabrāhmaṇāti. Puthujjanāti puthu kilese janentīti puthujjanā , puthu avihatasakkāyadiṭṭhikāti puthujjanā, puthu satthārānaṃ mukhullokikāti ⁶⁵ puthujjanā, puthu sabbagatīhi avuṭṭhitāti puthujjanā, puthu nānābhisaṅkhāre abhisaṅkharontīti puthujjanā, puthu nānāoghehi vuyhantīti puthujjanā, puthu nānāsantāpehi santappentīti puthujjanā, puthu nānāpariḷāhehi pariḍayhantīti puthujjanā, puthu pañcasu kāmaguṇesu rattā giddhā gadhitā mucchitā ajjhosannā laggā laggitā palibuddhāti puthujjanā, puthu pañcahi nīvaraṇehi āvutā nivutā ovutā pihitā paṭicchannā paṭikujjitāti – puthujjanā. Samaṇāti ye keci ito bahiddhā paribbajūpagatā paribbajasamāpannā. Brāhmaṇāti ye keci bhovādikā. Yena naṃ vajjuṃ puthujjanā, atho samaṇabrāhmaṇāti . Puthujjanā yena taṃ rāgena vadeyyuṃ, yena dosena vadeyyuṃ, yena mohena vadeyyuṃ, yena mānena vadeyyuṃ, yāya diṭṭhiyā vadeyyuṃ, yena uddhaccena vadeyyuṃ, yāya vicikicchāya vadeyyuṃ, yehi anusayehi vadeyyuṃ, rattoti vā duṭṭhoti vā mūḷhoti vā vinibaddhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā te abhisaṅkhārā pahīnā; abhisaṅkhārānaṃ pahīnattā gatiyā ⁶⁶ yena taṃ vadeyyuṃ – nerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā. So hetu natthi paccayo natthi kāraṇaṃ natthi yena naṃ vadeyyuṃ katheyyuṃ bhaṇeyyuṃ dīpayeyyuṃ vohareyyunti – yena naṃ vajjuṃ puthujjanā, atho samaṇabrāhmaṇā.

তং তস্স অপুরক্খতন্তি। তস্সাতি অরহতো খীণাসৰস্স। পুরেক্খারাতি দ্ৰে পুরেক্খারা – তণ্হাপুরেক্খারো চ দিট্ঠিপুরেক্খারো চ…পে॰… অযং তণ্হাপুরেক্খারো…পে॰… অযং দিট্ঠিপুরেক্খারো। তস্স তণ্হাপুরেক্খারো পহীনো, দিট্ঠিপুরেক্খারো পটিনিস্সট্ঠো; তণ্হাপুরেক্খারস্স পহীনত্তা, দিট্ঠিপুরেক্খারস্স পটিনিস্সট্ঠত্তা ন তণ্হং ৰা দিট্ঠিং ৰা পুরতো কত্ৰা চরতি, ন তণ্হাধজো ন তণ্হাকেতু ন তণ্হাধিপতেয্যো, ন দিট্ঠিধজো ন দিট্ঠিকেতু ন দিট্ঠাধিপতেয্যো, ন তণ্হায ৰা ন দিট্ঠিযা ৰা পরিৰারিতো চরতীতি – তং তস্স অপুরক্খতং।

Taṃ tassa apurakkhatanti. Tassāti arahato khīṇāsavassa. Purekkhārāti dve purekkhārā – taṇhāpurekkhāro ca diṭṭhipurekkhāro ca…pe… ayaṃ taṇhāpurekkhāro…pe… ayaṃ diṭṭhipurekkhāro. Tassa taṇhāpurekkhāro pahīno, diṭṭhipurekkhāro paṭinissaṭṭho; taṇhāpurekkhārassa pahīnattā, diṭṭhipurekkhārassa paṭinissaṭṭhattā na taṇhaṃ vā diṭṭhiṃ vā purato katvā carati, na taṇhādhajo na taṇhāketu na taṇhādhipateyyo, na diṭṭhidhajo na diṭṭhiketu na diṭṭhādhipateyyo, na taṇhāya vā na diṭṭhiyā vā parivārito caratīti – taṃ tassa apurakkhataṃ.

তস্মা ৰাদেসু নেজতীতি। তস্মাতি তস্মা তংকারণা তংহেতু তপ্পচ্চযা তংনিদানা ৰাদেসু উপৰাদেসু নিন্দায গরহায অকিত্তিযা অৰণ্ণহারিকায নেজতি ন ইঞ্জতি ন চলতি ন ৰেধতি নপ্পৰেধতি ন সম্পৰেধতীতি – তস্মা ৰাদেসু নেজতি।

Tasmā vādesu nejatīti. Tasmāti tasmā taṃkāraṇā taṃhetu tappaccayā taṃnidānā vādesu upavādesu nindāya garahāya akittiyā avaṇṇahārikāya nejati na iñjati na calati na vedhati nappavedhati na sampavedhatīti – tasmā vādesu nejati.

তেনাহ ভগৰা –

Tenāha bhagavā –

‘‘যেন নং ৰজ্জুং পুথুজ্জনা, অথো সমণব্রাহ্মণা।

‘‘Yena naṃ vajjuṃ puthujjanā, atho samaṇabrāhmaṇā;

তং তস্স অপুরক্খতং, তস্মা ৰাদেসু নেজতী’’তি॥

Taṃ tassa apurakkhataṃ, tasmā vādesu nejatī’’ti.

৯৫.

95.

ৰীতগেধো অমচ্ছরী, ন উস্সেসু ৰদতে মুনি।

Vītagedho amaccharī, na ussesu vadate muni;

ন সমেসু ন ওমেসু, কপ্পং নেতি অকপ্পিযো॥

Na samesu na omesu, kappaṃ neti akappiyo.

ৰীতগেধো অমচ্ছরীতি। গেধো ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। যস্সেসো গেধো পহীনো সমুচ্ছিন্নো ৰূপসন্তো পটিপস্সদ্ধো অভব্বুপ্পত্তিকো ঞাণগ্গিনা দড্ঢো, সো ৰুচ্চতি ৰীতগেধো। সো রূপে অগিদ্ধো…পে॰… দিট্ঠসুতমুতৰিঞ্ঞাতব্বেসু ধম্মেসু অগিদ্ধো অগধিতো অমুচ্ছিতো অনজ্ঝোসিতো, ৰীতগেধো ৰিগতগেধো চত্তগেধো ৰন্তগেধো মুত্তগেধো পহীনগেধো পটিনিস্সট্ঠগেধো নিচ্ছাতো…পে॰… ব্রহ্মভূতেন অত্তনা ৰিহরতীতি – ৰীতগেধো। অমচ্ছরীতি মচ্ছরিযন্তি পঞ্চ মচ্ছরিযানি – আৰাসমচ্ছরিযং, কুলমচ্ছরিযং, লাভমচ্ছরিযং, ৰণ্ণমচ্ছরিযং, ধম্মমচ্ছরিযং। যং এৰরূপং…পে॰… গাহো – ইদং ৰুচ্চতি মচ্ছরিযং। যস্সেতং মচ্ছরিযং পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢং, সো ৰুচ্চতি অমচ্ছরীতি – ৰীতগেধো অমচ্ছরী।

Vītagedho amaccharīti. Gedho vuccati taṇhā. Yo rāgo sārāgo…pe… abhijjhā lobho akusalamūlaṃ. Yasseso gedho pahīno samucchinno vūpasanto paṭipassaddho abhabbuppattiko ñāṇagginā daḍḍho, so vuccati vītagedho. So rūpe agiddho…pe… diṭṭhasutamutaviññātabbesu dhammesu agiddho agadhito amucchito anajjhosito, vītagedho vigatagedho cattagedho vantagedho muttagedho pahīnagedho paṭinissaṭṭhagedho nicchāto…pe… brahmabhūtena attanā viharatīti – vītagedho. Amaccharīti macchariyanti pañca macchariyāni – āvāsamacchariyaṃ, kulamacchariyaṃ, lābhamacchariyaṃ, vaṇṇamacchariyaṃ, dhammamacchariyaṃ. Yaṃ evarūpaṃ…pe… gāho – idaṃ vuccati macchariyaṃ. Yassetaṃ macchariyaṃ pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhaṃ, so vuccati amaccharīti – vītagedho amaccharī.

ন উস্সেসু ৰদতে মুনি, ন সমেসু ন ওমেসূতি। মুনীতি। মোনং ৰুচ্চতি ঞাণং…পে॰… সঙ্গজালমতিচ্চ সো মুনি। ‘‘সেয্যোহমস্মী’’তি ৰা, ‘‘সদিসোহমস্মী’’তি ৰা, ‘‘হীনোহমস্মী’’তি ৰা ন ৰদতি ন কথেতি ন ভণতি ন দীপযতি ন ৰোহরতীতি – ন উস্সেসু ৰদতে মুনি, ন সমেসু ন ওমেসু।

Na ussesu vadate muni, na samesu na omesūti. Munīti. Monaṃ vuccati ñāṇaṃ…pe… saṅgajālamaticca so muni. ‘‘Seyyohamasmī’’ti vā, ‘‘sadisohamasmī’’ti vā, ‘‘hīnohamasmī’’ti vā na vadati na katheti na bhaṇati na dīpayati na voharatīti – na ussesu vadate muni, na samesu na omesu.

কপ্পং নেতি অকপ্পিযোতি। কপ্পাতি দ্ৰে কপ্পা – তণ্হাকপ্পো চ দিট্ঠিকপ্পো চ…পে॰… অযং তণ্হাকপ্পো…পে॰… অযং দিট্ঠিকপ্পো। তস্স তণ্হাকপ্পো পহীনো, দিট্ঠিকপ্পো পটিনিস্সট্ঠো; তণ্হাকপ্পস্স পহীনত্তা, দিট্ঠিকপ্পস্স পটিনিস্সট্ঠত্তা তণ্হাকপ্পং ৰা দিট্ঠিকপ্পং ৰা নেতি ন উপেতি ন উপগচ্ছতি ন গণ্হাতি ন পরামসতি নাভিনিৰিসতীতি – কপ্পং নেতি। অকপ্পিযোতি। কপ্পাতি দ্ৰে কপ্পা – তণ্হাকপ্পো চ দিট্ঠিকপ্পো চ…পে॰… অযং তণ্হাকপ্পো…পে॰… অযং দিট্ঠিকপ্পো। তস্স তণ্হাকপ্পো পহীনো, দিট্ঠিকপ্পো পটিনিস্সট্ঠো; তস্স তণ্হাকপ্পস্স পহীনত্তা, দিট্ঠিকপ্পস্স পটিনিস্সট্ঠত্তা তণ্হাকপ্পং ৰা দিট্ঠিকপ্পং ৰা ন কপ্পেতি ন জনেতি ন সঞ্জনেতি ন নিব্বত্তেতি নাভিনিব্বত্তেতীতি – কপ্পং নেতি অকপ্পিযো।

Kappaṃ neti akappiyoti. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Tassa taṇhākappo pahīno, diṭṭhikappo paṭinissaṭṭho; taṇhākappassa pahīnattā, diṭṭhikappassa paṭinissaṭṭhattā taṇhākappaṃ vā diṭṭhikappaṃ vā neti na upeti na upagacchati na gaṇhāti na parāmasati nābhinivisatīti – kappaṃ neti. Akappiyoti. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Tassa taṇhākappo pahīno, diṭṭhikappo paṭinissaṭṭho; tassa taṇhākappassa pahīnattā, diṭṭhikappassa paṭinissaṭṭhattā taṇhākappaṃ vā diṭṭhikappaṃ vā na kappeti na janeti na sañjaneti na nibbatteti nābhinibbattetīti – kappaṃ neti akappiyo.

তেনাহ ভগৰা –

Tenāha bhagavā –

‘‘ৰীতগেধো অমচ্ছরী, ন উস্সেসু ৰদতে মুনি।

‘‘Vītagedho amaccharī, na ussesu vadate muni;

ন সমেসু ন ওমেসু, কপ্পং নেতি অকপ্পিযো’’তি॥

Na samesu na omesu, kappaṃ neti akappiyo’’ti.

৯৬.

96.

যস্স লোকে সকং নত্থি, অসতা চ ন সোচতি।

Yassa loke sakaṃ natthi, asatā ca na socati;

ধম্মেসু চ ন গচ্ছতি, স ৰে সন্তোতি ৰুচ্চতি॥

Dhammesu ca na gacchati, sa ve santoti vuccati.

যস্স লোকে সকং নত্থীতি। যস্সাতি অরহতো খীণাসৰস্স। লোকে সকং নত্থীতি। তস্স ময্হং ৰা ইদং পরেসং ৰা ইদন্তি কিঞ্চি রূপগতং ৰেদনাগতং সঞ্ঞাগতং সঙ্খারগতং ৰিঞ্ঞাণগতং, গহিতং পরামট্ঠং অভিনিৰিট্ঠং অজ্ঝোসিতং অধিমুত্তং, নত্থি ন সন্তি…পে॰… ঞাণগ্গিনা দড্ঢন্তি – যস্স লোকে সকং নত্থি। অসতা চ ন সোচতীতি। ৰিপরিণতং ৰা ৰত্থুং ন সোচতি, ৰিপরিণতস্মিং ৰা ৰত্থুস্মিং ন সোচতি। চক্খু মে ৰিপরিণতন্তি ন সোচতি। সোতং মে… ঘানং মে… জিৰ্হা মে… কাযো মে… মনো মে… রূপা মে… সদ্দা মে… গন্ধা মে… রসা মে… ফোট্ঠব্বা মে… কুলং মে… গণো মে… আৰাসো মে… লাভো মে… যসো মে… পসংসা মে… সুখং মে… চীৰরং মে… পিণ্ডপাতো মে… সেনাসনং মে… গিলানপচ্চযভেসজ্জপরিক্খারো মে… মাতা মে… পিতা মে… ভাতা মে… ভগিনী মে… পুত্তো মে… ধীতা মে… মিত্তা মে… অমচ্চা মে… ঞাতকা মে… সালোহিতা মে ৰিপরিণতাতি ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতীতি। এৰম্পি, অসতা চ ন সোচতি।

Yassaloke sakaṃ natthīti. Yassāti arahato khīṇāsavassa. Loke sakaṃ natthīti. Tassa mayhaṃ vā idaṃ paresaṃ vā idanti kiñci rūpagataṃ vedanāgataṃ saññāgataṃ saṅkhāragataṃ viññāṇagataṃ, gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ, natthi na santi…pe… ñāṇagginā daḍḍhanti – yassa loke sakaṃ natthi. Asatā ca na socatīti. Vipariṇataṃ vā vatthuṃ na socati, vipariṇatasmiṃ vā vatthusmiṃ na socati. Cakkhu me vipariṇatanti na socati. Sotaṃ me… ghānaṃ me… jivhā me… kāyo me… mano me… rūpā me… saddā me… gandhā me… rasā me… phoṭṭhabbā me… kulaṃ me… gaṇo me… āvāso me… lābho me… yaso me… pasaṃsā me… sukhaṃ me… cīvaraṃ me… piṇḍapāto me… senāsanaṃ me… gilānapaccayabhesajjaparikkhāro me… mātā me… pitā me… bhātā me… bhaginī me… putto me… dhītā me… mittā me… amaccā me… ñātakā me… sālohitā me vipariṇatāti na socati na kilamati na paridevati na urattāḷiṃ kandati na sammohaṃ āpajjatīti. Evampi, asatā ca na socati.

অথ ৰা অসন্তায ⁶⁷ দুক্খায ৰেদনায ফুট্ঠো পরেতো সমোহিতো সমন্নাগতো ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতি। চক্খুরোগেন ফুট্ঠো পরেতো সমোহিতো সমন্নাগতো ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতি, সোতরোগেন… ঘানরোগেন… জিৰ্হারোগেন… কাযরোগেন… সীসরোগেন… কণ্ণরোগেন… মুখরোগেন… দন্তরোগেন… কাসেন… সাসেন… পিনাসেন… ডাহেন… জরেন… কুচ্ছিরোগেন… মুচ্ছায… পক্খন্দিকায… সূলেন… ৰিসূচিকায… কুট্ঠেন… গণ্ডেন… কিলাসেন… সোসেন… অপমারেন… দদ্দুযা… কণ্ডুযা… কচ্ছুযা… রখসায … ৰিতচ্ছিকায… লোহিতেন… পিত্তেন… মধুমেহেন… অংসায… পিল়কায… ভগন্দলেন ⁶⁸ … পিত্তসমুট্ঠানেন আবাধেন… সেম্হসমুট্ঠানেন আবাধেন… ৰাতসমুট্ঠানেন আবাধেন… সন্নিপাতিকেন আবাধেন… উতুপরিণামজেন আবাধেন… ৰিসমপরিহারজেন আবাধেন… ওপক্কমিকেন আবাধেন… কম্মৰিপাকজেন আবাধেন… সীতেন… উণ্হেন… জিঘচ্ছায… পিপাসায… ডংসমকসৰাতাতপসরীসপসম্ফস্সেহি ফুট্ঠো পরেতো সমোহিতো সমন্নাগতো ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতীতি। এৰম্পি, অসতা চ ন সোচতি।

Atha vā asantāya ⁶⁹ dukkhāya vedanāya phuṭṭho pareto samohito samannāgato na socati na kilamati na paridevati na urattāḷiṃ kandati na sammohaṃ āpajjati. Cakkhurogena phuṭṭho pareto samohito samannāgato na socati na kilamati na paridevati na urattāḷiṃ kandati na sammohaṃ āpajjati, sotarogena… ghānarogena… jivhārogena… kāyarogena… sīsarogena… kaṇṇarogena… mukharogena… dantarogena… kāsena… sāsena… pināsena… ḍāhena… jarena… kucchirogena… mucchāya… pakkhandikāya… sūlena… visūcikāya… kuṭṭhena… gaṇḍena… kilāsena… sosena… apamārena… dadduyā… kaṇḍuyā… kacchuyā… rakhasāya … vitacchikāya… lohitena… pittena… madhumehena… aṃsāya… piḷakāya… bhagandalena ⁷⁰ … pittasamuṭṭhānena ābādhena… semhasamuṭṭhānena ābādhena… vātasamuṭṭhānena ābādhena… sannipātikena ābādhena… utupariṇāmajena ābādhena… visamaparihārajena ābādhena… opakkamikena ābādhena… kammavipākajena ābādhena… sītena… uṇhena… jighacchāya… pipāsāya… ḍaṃsamakasavātātapasarīsapasamphassehi phuṭṭho pareto samohito samannāgato na socati na kilamati na paridevati na urattāḷiṃ kandati na sammohaṃ āpajjatīti. Evampi, asatā ca na socati.

অথ ৰা অসন্তে অসংৰিজ্জমানে অনুপলব্ভমানে ⁷¹ – ‘‘অহো ৰত মে তং নত্থি, সিযা ৰত মে তং, তং ৰতাহং ন চ লভামী’’তি ন সোচতি ন কিলমতি ন পরিদেৰতি ন উরত্তাল়িং কন্দতি ন সম্মোহং আপজ্জতীতি। এৰম্পি অসতা চ ন সোচতি। ধম্মেসু চ ন গচ্ছতীতি ন ছন্দাগতিং গচ্ছতি, ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, ন রাগৰসেন গচ্ছতি, ন দোসৰসেন গচ্ছতি, ন মোহৰসেন গচ্ছতি, ন মানৰসেন গচ্ছতি, ন দিট্ঠিৰসেন গচ্ছতি, ন উদ্ধচ্চৰসেন গচ্ছতি, ন ৰিচিকিচ্ছাৰসেন গচ্ছতি, ন অনুসযৰসেন গচ্ছতি ন চ ৰগ্গেহি ধম্মেহি যাযতি নীযতি ৰুয্হতি সংহরীযতীতি – ধম্মেসু চ ন গচ্ছতি।

Atha vā asante asaṃvijjamāne anupalabbhamāne ⁷² – ‘‘aho vata me taṃ natthi, siyā vata me taṃ, taṃ vatāhaṃ na ca labhāmī’’ti na socati na kilamati na paridevati na urattāḷiṃ kandati na sammohaṃ āpajjatīti. Evampi asatā ca na socati. Dhammesuca na gacchatīti na chandāgatiṃ gacchati, na dosāgatiṃ gacchati, na mohāgatiṃ gacchati, na bhayāgatiṃ gacchati, na rāgavasena gacchati, na dosavasena gacchati, na mohavasena gacchati, na mānavasena gacchati, na diṭṭhivasena gacchati, na uddhaccavasena gacchati, na vicikicchāvasena gacchati, na anusayavasena gacchati na ca vaggehi dhammehi yāyati nīyati vuyhati saṃharīyatīti – dhammesu ca na gacchati.

স ৰে সন্তোতি ৰুচ্চতীতি। সো সন্তো উপসন্তো ৰূপসন্তো নিব্বুতো পটিপস্সদ্ধোতি ৰুচ্চতি পৰুচ্চতি কথীযতি ভণীযতি দীপীযতি ৰোহরীযতীতি – স ৰে সন্তোতি ৰুচ্চতি।

Sa ve santoti vuccatīti. So santo upasanto vūpasanto nibbuto paṭipassaddhoti vuccati pavuccati kathīyati bhaṇīyati dīpīyati voharīyatīti – sa ve santoti vuccati.

তেনাহ ভগৰা –

Tenāha bhagavā –

‘‘যস্স লোকে সকং নত্থি, অসতা চ ন সোচতি।

‘‘Yassa loke sakaṃ natthi, asatā ca na socati;

ধম্মেসু চ ন গচ্ছতি, স ৰে সন্তোতি ৰুচ্চতী’’তি॥

Dhammesu ca na gacchati, sa ve santoti vuccatī’’ti.

পুরাভেদসুত্তনিদ্দেসো দসমো।

Purābhedasuttaniddeso dasamo.

Next: ১১. কলহৰিৰাদসুত্তনিদ্দেসো • 11. Kalahavivādasuttaniddeso

Footnotes:

1. চক্খুং (সী॰ ক॰)

2. cakkhuṃ (sī. ka.)

3. অস্সুরোপো (সী॰ ক॰)

4. assuropo (sī. ka.)

5. কিঞ্চি (ক॰)

6. ফরুসৰাচনিচ্ছারণো (স্যা॰)

7. জীৰিতপনাসনো (স্যা॰)

8. kiñci (ka.)

9. pharusavācanicchāraṇo (syā.)

10. jīvitapanāsano (syā.)

11. অট্ঠপনা (সী॰)

12. aṭṭhapanā (sī.)

13. কোরঞ্জিককোরঞ্জিকো (সী॰)

14. korañjikakorañjiko (sī.)

15. অচিত্তিকারকতো (স্যা॰ ক॰)

16. acittikārakato (syā. ka.)

17. নহাযতি (সী॰)

18. nahāyati (sī.)

19. পৰিসথ (সী॰) এৰমঞ্ঞেসু পদদ্ৰযেসুপি

20. pavisatha (sī.) evamaññesu padadvayesupi

21. মিচ্ছাদিট্ঠী (সী॰)

22. micchādiṭṭhī (sī.)

23. ভেদো (ক॰)

24. bhedo (ka.)

25. ভেদাধিপ্পাযো (বহূসু)

26. অফাসুং (সী॰)

27. bhedādhippāyo (bahūsu)

28. aphāsuṃ (sī.)

29. পসৰতি (স্যা॰)

30. ন পসৰতি (স্যা॰)

31. pasavati (syā.)

32. na pasavati (syā.)

33. পরিপুচ্ছিতং (সী॰), পরিপুচ্ছকো (স্যা॰)

34. paripucchitaṃ (sī.), paripucchako (syā.)

35. ব্রহ্মুনো ৰা…পে॰… (সী॰ ক॰)

36. brahmuno vā…pe… (sī. ka.)

37. রসে চ (সী॰ স্যা॰)

38. rase ca (sī. syā.)

39. অপ্পিচ্ছংযেৰ (সী॰)

40. ইদমত্থিকতঞ্ঞেৰ (সী॰)

41. appicchaṃyeva (sī.)

42. idamatthikataññeva (sī.)

43. লপিলং (সী॰), লম্বিলং (স্যা॰), লবিলং (ক॰), আযতনৰিভঙ্গে

44. lapilaṃ (sī.), lambilaṃ (syā.), labilaṃ (ka.), āyatanavibhaṅge

45. নাভিহসতি (সী॰ স্যা॰)

46. অপ্পতিট্ঠীন চিত্তো (স্যা॰), অপ্পতিট্ঠনচিত্তো (ক॰)

47. আদিনমনসো (স্যা॰)

48. nābhihasati (sī. syā.)

49. appatiṭṭhīna citto (syā.), appatiṭṭhanacitto (ka.)

50. ādinamanaso (syā.)

51. দোসনীযে (বহূসু)

52. dosanīye (bahūsu)

53. আজানিযাৰ (স্যা॰)

54. ājāniyāva (syā.)

55. ৰিভাৰিতানি (সী॰)

56. অজ্ঝত্তবহিদ্ধা চ (সী॰), অজ্ঝত্তঞ্চ বহিদ্ধা চ (স্যা॰ ক॰) সু॰ নি॰ ৫২১

57. vibhāvitāni (sī.)

58. ajjhattabahiddhā ca (sī.), ajjhattañca bahiddhā ca (syā. ka.) su. ni. 521

59. নিব্বিজ্ঝিমং (স্যা॰), নিব্বিজ্জ ইমং (ক॰)

60. nibbijjhimaṃ (syā.), nibbijja imaṃ (ka.)

61. নিস্সযনা (ক॰)

62. nissayanā (ka.)

63. মুখুল্লোককাতি (সী॰)

64. গতিযো (স্যা॰)

65. mukhullokakāti (sī.)

66. gatiyo (syā.)

67. অসতায (সী॰), অসাতায (স্যা॰)

68. ভগন্দলায (সী॰ স্যা॰)

69. asatāya (sī.), asātāya (syā.)

70. bhagandalāya (sī. syā.)

71. অনুপলব্ভিযমানে (স্যা॰ ক॰)

72. anupalabbhiyamāne (syā. ka.)

Related texts:

অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / মহানিদ্দেস-অট্ঠকথা • Mahāniddesa-aṭṭhakathā / ১০. পুরাভেদসুত্তনিদ্দেসৰণ্ণনা • 10. Purābhedasuttaniddesavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact