| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
4. буурал̣аасасуд̇д̇а-(сунд̣̇аригабхаарад̣̇вааж̇асуд̇д̇а)-ван̣н̣анаа
4. Pūraḷāsasutta-(sundarikabhāradvājasutta)-vaṇṇanā
звам̣ мз суд̇анд̇и буурал̣аасасуд̇д̇ам̣. гаа уббад̇д̇и? бхаг̇аваа бажчаабхад̇д̇агижжаавасаанз б̣уд̣̇д̇хажагкунаа логам̣ вологзнд̇о сунд̣̇аригабхаарад̣̇вааж̇аб̣раахман̣ам̣ арахад̇д̇асса убаниссаяасамбаннам̣ д̣̇исваа ‘‘д̇ад̇т̇а маяи г̇ад̇з гат̇аа бавад̇д̇иссад̇и, д̇ад̇о гат̇аавасаанз д̇хаммад̣̇зсанам̣ суд̇ваа зса б̣раахман̣о баб̣б̣аж̇ид̇ваа арахад̇д̇ам̣ баабун̣иссад̇ий’’д̇и жа н̃ад̇ваа д̇ад̇т̇а г̇анд̇ваа гат̇ам̣ самудтаабзд̇ваа имам̣ суд̇д̇амабхааси.
Evaṃme sutanti pūraḷāsasuttaṃ. Kā uppatti? Bhagavā pacchābhattakiccāvasāne buddhacakkhunā lokaṃ volokento sundarikabhāradvājabrāhmaṇaṃ arahattassa upanissayasampannaṃ disvā ‘‘tattha mayi gate kathā pavattissati, tato kathāvasāne dhammadesanaṃ sutvā esa brāhmaṇo pabbajitvā arahattaṃ pāpuṇissatī’’ti ca ñatvā tattha gantvā kathaṃ samuṭṭhāpetvā imaṃ suttamabhāsi.
д̇ад̇т̇а звам̣ мз суд̇анд̇иаад̣̇и сан̇г̇ийд̇игаарагаанам̣ важанам̣. гим̣ж̇ажжо бхаванд̇иаад̣̇и д̇асса б̣раахман̣асса, на б̣раахман̣о номхийд̇иаад̣̇и бхаг̇авад̇о. д̇ам̣ саб̣б̣амби самод̇хаанзд̇ваа ‘‘буурал̣аасасуд̇д̇а’’нд̇и вужжад̇и. д̇ад̇т̇а вуд̇д̇асад̣̇исам̣ вуд̇д̇анаязнзва взд̣̇ид̇аб̣б̣ам̣, авуд̇д̇ам̣ ван̣н̣аяиссаама, д̇ан̃жа ко уд̇д̇аанад̇т̇аани бад̣̇аани анаамасанд̇аа. госалзсууд̇и госалаа наама ж̇аанабад̣̇ино рааж̇агумаараа. д̇зсам̣ ниваасо згоби ж̇анабад̣̇о рул̣хисад̣̇д̣̇зна ‘‘госалаа’’д̇и вужжад̇и. д̇асмим̣ госалзсу ж̇анабад̣̇з. гзжи бана ‘‘яасмаа буб̣б̣з махаабанаад̣̇ам̣ рааж̇агумаарам̣ наанаанаадагаад̣̇ийни д̣̇исваа сид̇амад̇д̇амби агаронд̇ам̣ суд̇ваа рааж̇аа аан̣аабзси ‘яо мама буд̇д̇ам̣ хасаабзд̇и, саб̣б̣аабхаран̣зхи нам̣ алан̇гаромий’д̇и. д̇ад̇о нан̇г̇алаани чад̣д̣зд̇ваа махааж̇анагааяо саннибад̇и. д̇з жа мануссаа ад̇ирзгасад̇д̇авассаани наанаагийл̣игаад̣̇аяо д̣̇ассзнд̇ааби д̇ам̣ наасагким̣су хасаабзд̇ум̣. д̇ад̇о сагго д̣̇званадам̣ бзсзси, со д̣̇иб̣б̣анаадагам̣ д̣̇ассзд̇ваа хасаабзси. ат̇а д̇з мануссаа ад̇д̇ано ад̇д̇ано васаногаасаабхимукаа баггамим̣су. д̇з бадибат̇з мид̇д̇асухаж̇ж̇аад̣̇аяо д̣̇исваа бадисант̇аарамагам̣су ‘гажжи бхо гусалам̣, гажжи бхо гусала’нд̇и . д̇асмаа д̇ам̣ ‘гусала’нд̇и сад̣̇д̣̇ам̣ убаад̣̇ааяа со бад̣̇зсо ‘госало’д̇и вужжад̇ий’’д̇и ван̣н̣аяанд̇и. сунд̣̇аригааяа над̣̇ияаа д̇ийрзд̇и сунд̣̇аригаад̇и звам̣наамигааяа над̣̇ияаа д̇ийрз.
Tattha evaṃ me sutantiādi saṅgītikārakānaṃ vacanaṃ. Kiṃjacco bhavantiādi tassa brāhmaṇassa, na brāhmaṇo nomhītiādi bhagavato. Taṃ sabbampi samodhānetvā ‘‘pūraḷāsasutta’’nti vuccati. Tattha vuttasadisaṃ vuttanayeneva veditabbaṃ, avuttaṃ vaṇṇayissāma, tañca kho uttānatthāni padāni anāmasantā. Kosalesūti kosalā nāma jānapadino rājakumārā. Tesaṃ nivāso ekopi janapado ruḷhisaddena ‘‘kosalā’’ti vuccati. Tasmiṃ kosalesu janapade. Keci pana ‘‘yasmā pubbe mahāpanādaṃ rājakumāraṃ nānānāṭakādīni disvā sitamattampi akarontaṃ sutvā rājā āṇāpesi ‘yo mama puttaṃ hasāpeti, sabbābharaṇehi naṃ alaṅkaromī’ti. Tato naṅgalāni chaḍḍetvā mahājanakāyo sannipati. Te ca manussā atirekasattavassāni nānākīḷikādayo dassentāpi taṃ nāsakkhiṃsu hasāpetuṃ. Tato sakko devanaṭaṃ pesesi, so dibbanāṭakaṃ dassetvā hasāpesi. Atha te manussā attano attano vasanokāsābhimukhā pakkamiṃsu. Te paṭipathe mittasuhajjādayo disvā paṭisanthāramakaṃsu ‘kacci bho kusalaṃ, kacci bho kusala’nti . Tasmā taṃ ‘kusala’nti saddaṃ upādāya so padeso ‘kosalo’ti vuccatī’’ti vaṇṇayanti. Sundarikāya nadiyā tīreti sundarikāti evaṃnāmikāya nadiyā tīre.
д̇зна ко банаад̇и язна самаязна бхаг̇аваа д̇ам̣ б̣раахман̣ам̣ винзд̇угаамо г̇анд̇ваа д̇ассаа над̣̇ияаа д̇ийрз сасийсам̣ баарубид̇ваа ругкамуулз нисаж̇ж̇аасан̇каад̇зна ирияаабат̇авихаарзна вихарад̇и. сунд̣̇аригабхаарад̣̇вааж̇од̇и со б̣раахман̣о д̇ассаа над̣̇ияаа д̇ийрз васад̇и аг̇г̇ин̃жа ж̇ухад̇и, бхаарад̣̇вааж̇од̇и жасса г̇од̇д̇ам̣, д̇асмаа звам̣ вужжад̇и. аг̇г̇им̣ ж̇ухад̇ийд̇и аахуд̇ибагкибанзна ж̇аалзд̇и. аг̇г̇ихуд̇д̇ам̣ барижарад̇ийд̇и аг̇яааяад̇анам̣ саммаж̇ж̇ануубалзбанаб̣алигаммаад̣̇инаа баяирубаасад̇и. го ну ко имам̣ хаб̣яасзсам̣ бхун̃ж̇зяяаад̇и со гира б̣раахман̣о аг̇г̇имхи ж̇ухид̇ваа авасзсам̣ бааяаасам̣ д̣̇исваа жинд̇зси – ‘‘аг̇г̇имхи д̇аава багкид̇д̇абааяаасо махааб̣рахмунаа бхуд̇д̇о, аяам̣ бана авасзсо ад̇т̇и. д̇ам̣ яад̣̇и б̣рахмуно мукад̇о ж̇аад̇асса б̣раахман̣ассзва д̣̇ад̣̇зяяам̣, звам̣ мз бид̇араа саха буд̇д̇оби санд̇аббид̇о бхавзяяа, сувисод̇хид̇о жа б̣рахмалогаг̇аамимаг̇г̇о асса, ханд̣̇аахам̣ б̣раахман̣ам̣ г̇авзсаамий’’д̇и. д̇ад̇о б̣раахман̣ад̣̇ассанад̇т̇ам̣ удтааяаасанаа жад̇уд̣̇д̣̇исаа анувилогзси – ‘‘го ну ко имам̣ хаб̣яасзсам̣ бхун̃ж̇зяяаа’’д̇и.
Tena kho panāti yena samayena bhagavā taṃ brāhmaṇaṃ vinetukāmo gantvā tassā nadiyā tīre sasīsaṃ pārupitvā rukkhamūle nisajjāsaṅkhātena iriyāpathavihārena viharati. Sundarikabhāradvājoti so brāhmaṇo tassā nadiyā tīre vasati aggiñca juhati, bhāradvājoti cassa gottaṃ, tasmā evaṃ vuccati. Aggiṃ juhatīti āhutipakkhipanena jāleti. Aggihuttaṃ paricaratīti agyāyatanaṃ sammajjanūpalepanabalikammādinā payirupāsati. Ko nu kho imaṃ habyasesaṃ bhuñjeyyāti so kira brāhmaṇo aggimhi juhitvā avasesaṃ pāyāsaṃ disvā cintesi – ‘‘aggimhi tāva pakkhittapāyāso mahābrahmunā bhutto, ayaṃ pana avaseso atthi. Taṃ yadi brahmuno mukhato jātassa brāhmaṇasseva dadeyyaṃ, evaṃ me pitarā saha puttopi santappito bhaveyya, suvisodhito ca brahmalokagāmimaggo assa, handāhaṃ brāhmaṇaṃ gavesāmī’’ti. Tato brāhmaṇadassanatthaṃ uṭṭhāyāsanā catuddisā anuvilokesi – ‘‘ko nu kho imaṃ habyasesaṃ bhuñjeyyā’’ti.
ан̃н̃ад̇арасмим̣ ругкамуулзд̇и д̇асмим̣ ванасан̣д̣з сздтаругкамуулз. сасийсам̣ бааруд̇анд̇и саха сийсзна бааруд̇агааяам̣. гасмаа бана бхаг̇аваа звамагааси, гим̣ наарааяанасан̇каад̇аб̣алоби худ̇ваа наасагки химабаад̇ам̣ сийд̇аваад̇ан̃жа бадиб̣аахид̇унд̇и? ад̇т̇зд̇ам̣ гааран̣ам̣. на хи б̣уд̣̇д̇хаа саб̣б̣асо гааяабадиж̇аг̇г̇анам̣ гаронд̇и зва, абижа бхаг̇аваа ‘‘ааг̇ад̇з б̣раахман̣з сийсам̣ вивариссаами, мам̣ д̣̇исваа б̣раахман̣о гат̇ам̣ бавад̇д̇зссад̇и, ат̇асса гат̇аанусаарзна д̇хаммам̣ д̣̇зсзссаамий’’д̇и гат̇аабавад̇д̇анад̇т̇ам̣ звамагааси. д̣̇исваана ваамзна…бз… д̇знубасан̇гамийд̇и со гира бхаг̇аванд̇ам̣ д̣̇исваа б̣раахман̣о ‘‘аяам̣ сасийсам̣ баарубид̇ваа саб̣б̣арад̇д̇им̣ бад̇хаанамануяуд̇д̇о, имасса д̣̇агкин̣од̣̇агам̣ д̣̇ад̇ваа имам̣ хаб̣яасзсам̣ д̣̇ассаамий’’д̇и б̣раахман̣асан̃н̃ий худ̇ваа зва убасан̇гами. мун̣д̣о аяам̣ бхавам̣, мун̣д̣аго аяам̣ бхаванд̇и сийсз виварид̇амад̇д̇зва гзсанд̇ам̣ д̣̇исваа ‘‘мун̣д̣о’’д̇и ааха. д̇ад̇о судтуд̇арам̣ ологзнд̇о барид̇д̇амби сикам̣ ад̣̇исваа хийл̣знд̇о ‘‘мун̣д̣аго’’д̇и ааха. зваруубаа хи нзсам̣ б̣раахман̣аанам̣ д̣̇идти. д̇ад̇о ваад̇и яад̇т̇а тид̇о ад̣̇д̣̇аса, д̇амхаа бад̣̇зсаа мун̣д̣аабийд̇и гзнажи гааран̣зна мун̣д̣ид̇асийсааби хонд̇и.
Aññatarasmiṃ rukkhamūleti tasmiṃ vanasaṇḍe seṭṭharukkhamūle. Sasīsaṃ pārutanti saha sīsena pārutakāyaṃ. Kasmā pana bhagavā evamakāsi, kiṃ nārāyanasaṅkhātabalopi hutvā nāsakkhi himapātaṃ sītavātañca paṭibāhitunti? Atthetaṃ kāraṇaṃ. Na hi buddhā sabbaso kāyapaṭijagganaṃ karonti eva, apica bhagavā ‘‘āgate brāhmaṇe sīsaṃ vivarissāmi, maṃ disvā brāhmaṇo kathaṃ pavattessati, athassa kathānusārena dhammaṃ desessāmī’’ti kathāpavattanatthaṃ evamakāsi. Disvāna vāmena…pe… tenupasaṅkamīti so kira bhagavantaṃ disvā brāhmaṇo ‘‘ayaṃ sasīsaṃ pārupitvā sabbarattiṃ padhānamanuyutto, imassa dakkhiṇodakaṃ datvā imaṃ habyasesaṃ dassāmī’’ti brāhmaṇasaññī hutvā eva upasaṅkami. Muṇḍo ayaṃ bhavaṃ, muṇḍako ayaṃ bhavanti sīse vivaritamatteva kesantaṃ disvā ‘‘muṇḍo’’ti āha. Tato suṭṭhutaraṃ olokento parittampi sikhaṃ adisvā hīḷento ‘‘muṇḍako’’ti āha. Evarūpā hi nesaṃ brāhmaṇānaṃ diṭṭhi. Tato vāti yattha ṭhito addasa, tamhā padesā muṇḍāpīti kenaci kāraṇena muṇḍitasīsāpi honti.
458. на б̣раахман̣о номхийд̇и зд̇т̇а нагааро бадисзд̇хз, ногааро авад̇хааран̣з ‘‘на но сама’’нд̇иаад̣̇ийсу (ку. баа. 6.3; су. ни. 226) вияа. д̇зна нзвамхи б̣раахман̣од̇и д̣̇ассзд̇и. на рааж̇абуд̇д̇од̇и кад̇д̇ияо намхи. на взссааяанод̇и взссоби намхи. уд̣̇агожи номхийд̇и ан̃н̃оби суд̣̇д̣̇о ваа жан̣д̣аало ваа гожи на хомийд̇и звам̣ згам̣сзнзва ж̇аад̇иваад̣̇асамуд̣̇аажаарам̣ бадигкибад̇и. гасмаа? махаасамуд̣̇д̣̇ам̣ бад̇д̇аа вияа хи над̣̇ияо баб̣б̣аж̇ж̇уубаг̇ад̇аа гулабуд̇д̇аа ж̇аханд̇и буримаани наамаг̇од̇д̇аани. бахаараад̣̇асуд̇д̇ан̃жзд̇т̇а (а. ни. 8.19) саад̇хагам̣. звам̣ ж̇аад̇иваад̣̇ам̣ бадигкибид̇ваа яат̇аабхууд̇амад̇д̇аанам̣ аавигаронд̇о ааха – ‘‘г̇од̇д̇ам̣ барин̃н̃ааяа бут̇уж̇ж̇анаанам̣, агин̃жано манд̇а жараами логз’’д̇и. гат̇ам̣ г̇од̇д̇ам̣ барин̃н̃аасийд̇и жз? бхаг̇аваа хи д̇ийхи барин̃н̃аахи бан̃жагканд̇хз барин̃н̃ааси, д̇зсу жа барин̃н̃аад̇зсу г̇од̇д̇ам̣ барин̃н̃аад̇амзва ход̇и. рааг̇аад̣̇игин̃жанаанам̣ бана абхаавзна со агин̃жано манд̇аа ж̇аанид̇ваа н̃аан̣аанубаривад̇д̇ийхи гааяагаммаад̣̇ийхи жарад̇и. д̇знааха – ‘‘г̇од̇д̇ам̣…бз… логз’’д̇и. манд̇аа вужжад̇и бан̃н̃аа, д̇ааяа жзса жарад̇и. д̇знзвааха – ‘‘манд̇ам̣ жараами логз’’д̇и чанд̣̇авасзна рассам̣ гад̇ваа.
458.Na brāhmaṇo nomhīti ettha nakāro paṭisedhe, nokāro avadhāraṇe ‘‘na no sama’’ntiādīsu (khu. pā. 6.3; su. ni. 226) viya. Tena nevamhi brāhmaṇoti dasseti. Na rājaputtoti khattiyo namhi. Na vessāyanoti vessopi namhi. Udakoci nomhīti aññopi suddo vā caṇḍālo vā koci na homīti evaṃ ekaṃseneva jātivādasamudācāraṃ paṭikkhipati. Kasmā? Mahāsamuddaṃ pattā viya hi nadiyo pabbajjūpagatā kulaputtā jahanti purimāni nāmagottāni. Pahārādasuttañcettha (a. ni. 8.19) sādhakaṃ. Evaṃ jātivādaṃ paṭikkhipitvā yathābhūtamattānaṃ āvikaronto āha – ‘‘gottaṃ pariññāya puthujjanānaṃ, akiñcano manta carāmi loke’’ti. Kathaṃ gottaṃ pariññāsīti ce? Bhagavā hi tīhi pariññāhi pañcakkhandhe pariññāsi, tesu ca pariññātesu gottaṃ pariññātameva hoti. Rāgādikiñcanānaṃ pana abhāvena so akiñcano mantā jānitvā ñāṇānuparivattīhi kāyakammādīhi carati. Tenāha – ‘‘gottaṃ…pe… loke’’ti. Mantā vuccati paññā, tāya cesa carati. Tenevāha – ‘‘mantaṃ carāmi loke’’ti chandavasena rassaṃ katvā.
459-60. звам̣ ад̇д̇аанам̣ аавигад̇ваа ид̣̇аани ‘‘звам̣ ол̣ааригам̣ лин̇г̇амби д̣̇исваа бужчид̇аб̣б̣аабужчид̇аб̣б̣ам̣ на ж̇аанаасий’’д̇и б̣раахман̣асса убаарамбхам̣ ааробзнд̇о ааха – ‘‘сан̇гхаадиваасий…бз… г̇од̇д̇абан̃ха’’нд̇и. зд̇т̇а жа чиннасан̇гхадид̇адтзна д̇ийн̣иби жийвараани ‘‘сан̇гхаадий’’д̇и ад̇хиббзд̇аани, д̇аани ниваасзд̇и барид̣̇ахад̇ийд̇и сан̇гхаадиваасий. аг̇аход̇и аг̇зхо, нид̇д̇ан̣ход̇и ад̇хиббааяо. ниваасааг̇аарам̣ бана бхаг̇авад̇о ж̇зд̇аванз махааг̇анд̇хагудигарзриман̣д̣аламаал̣агосамб̣агудижанд̣̇анамаалаад̣̇ианзгаббагаарам̣, д̇ам̣ санд̇хааяа на яуж̇ж̇ад̇и. нивуд̇д̇агзсод̇и абанийд̇агзсо, охаарид̇агзсамассууд̇и вуд̇д̇ам̣ ход̇и. абхиниб̣б̣уд̇ад̇д̇од̇и ад̇ийва вуубасанд̇абарил̣аахажид̇д̇о, г̇уд̇д̇ажид̇д̇о ваа. алиббамаано ид̇ха маан̣авзхийд̇и убагаран̣асинзхасса бахийнад̇д̇аа мануссзхи алид̇д̇о асам̣садто зганд̇авивид̇д̇о. агаллам̣ мам̣ б̣раахман̣аад̇и яваахам̣ звам̣ сан̇гхаадиваасий…бз… алиббамаано ид̇ха маан̣авзхи, д̇ам̣ мам̣ д̇вам̣, б̣раахман̣а, баагад̇игаани наамаг̇од̇д̇аани ад̇ийд̇ам̣ баб̣б̣аж̇ид̇ам̣ самаанам̣ аббад̇ируубам̣ г̇од̇д̇абан̃хам̣ бужчасийд̇и.
459-60. Evaṃ attānaṃ āvikatvā idāni ‘‘evaṃ oḷārikaṃ liṅgampi disvā pucchitabbāpucchitabbaṃ na jānāsī’’ti brāhmaṇassa upārambhaṃ āropento āha – ‘‘saṅghāṭivāsī…pe… gottapañha’’nti. Ettha ca chinnasaṅghaṭitaṭṭhena tīṇipi cīvarāni ‘‘saṅghāṭī’’ti adhippetāni, tāni nivāseti paridahatīti saṅghāṭivāsī. Agahoti ageho, nittaṇhoti adhippāyo. Nivāsāgāraṃ pana bhagavato jetavane mahāgandhakuṭikarerimaṇḍalamāḷakosambakuṭicandanamālādianekappakāraṃ, taṃ sandhāya na yujjati. Nivuttakesoti apanītakeso, ohāritakesamassūti vuttaṃ hoti. Abhinibbutattoti atīva vūpasantapariḷāhacitto, guttacitto vā. Alippamāno idha māṇavehīti upakaraṇasinehassa pahīnattā manussehi alitto asaṃsaṭṭho ekantavivitto. Akallaṃ maṃ brāhmaṇāti yvāhaṃ evaṃ saṅghāṭivāsī…pe… alippamāno idha māṇavehi, taṃ maṃ tvaṃ, brāhmaṇa, pākatikāni nāmagottāni atītaṃ pabbajitaṃ samānaṃ appatirūpaṃ gottapañhaṃ pucchasīti.
звам̣ вуд̇д̇з убаарамбхам̣ можзнд̇о б̣раахман̣о ааха – бужчанд̇и вз, бхо б̣раахман̣аа, б̣раахман̣збхи саха ‘‘б̣раахман̣о но бхава’’нд̇и. д̇ад̇т̇а б̣раахман̣о нод̇и б̣раахман̣о нууд̇и ад̇т̇о. ид̣̇ам̣ вуд̇д̇ам̣ ход̇и – наахам̣ бхо агаллам̣ бужчаами. амхааган̃хи б̣раахман̣асамаяз б̣раахман̣аа б̣раахман̣зхи саха самааг̇анд̇ваа ‘‘б̣раахман̣о ну бхавам̣, бхаарад̣̇вааж̇о ну бхава’’нд̇и звам̣ ж̇аад̇имби г̇од̇д̇амби бужчанд̇и зваад̇и.
Evaṃ vutte upārambhaṃ mocento brāhmaṇo āha – pucchanti ve, bho brāhmaṇā, brāhmaṇebhi saha ‘‘brāhmaṇo no bhava’’nti. Tattha brāhmaṇo noti brāhmaṇo nūti attho. Idaṃ vuttaṃ hoti – nāhaṃ bho akallaṃ pucchāmi. Amhākañhi brāhmaṇasamaye brāhmaṇā brāhmaṇehi saha samāgantvā ‘‘brāhmaṇo nu bhavaṃ, bhāradvājo nu bhava’’nti evaṃ jātimpi gottampi pucchanti evāti.
461-2. звам̣ вуд̇д̇з бхаг̇аваа б̣раахман̣асса жид̇д̇амуд̣̇убхаавагаран̣ад̇т̇ам̣ манд̇зсу ад̇д̇ано багад̇ан̃н̃уд̇ам̣ багаасзнд̇о ааха – ‘‘б̣раахман̣о хи жз д̇вам̣ б̣рууси…бз… жад̇увийсад̇агкара’’нд̇и. д̇ассад̇т̇о – сажз д̇вам̣ ‘‘б̣раахман̣о ахам̣’’д̇и б̣рууси, ман̃жа аб̣раахман̣ам̣ б̣рууси, д̇асмаа бхаванд̇ам̣ саавид̇д̇им̣ бужчаами д̇ибад̣̇ам̣ жад̇увийсад̇агкарам̣, д̇ам̣ мз б̣руухийд̇и. зд̇т̇а жа бхаг̇аваа барамад̇т̇авзд̣̇аанам̣ д̇ин̣н̣ам̣ бидагаанам̣ аад̣̇ибхууд̇ам̣ барамад̇т̇аб̣раахман̣зхи саб̣б̣аб̣уд̣̇д̇хзхи багаасид̇ам̣ ад̇т̇асамбаннам̣ б̣яан̃ж̇анасамбаннан̃жа ‘‘б̣уд̣̇д̇хам̣ саран̣ам̣ г̇ажчаами, д̇хаммам̣ саран̣ам̣ г̇ажчаами, сан̇гхам̣ саран̣ам̣ г̇ажчаамий’’д̇и имам̣ арияасаавид̇д̇им̣ санд̇хааяа бужчад̇и. яад̣̇иби хи б̣раахман̣о ан̃н̃ам̣ вад̣̇зяяа, ад̣̇д̇хаа нам̣ бхаг̇аваа ‘‘нааяам̣, б̣раахман̣а, арияасса винаяз саавид̇д̇ийд̇и вужжад̇ий’’д̇и д̇асса асаарагад̇д̇ам̣ д̣̇ассзд̇ваа ид̇хзва бад̇идтаабзяяа. б̣раахман̣о бана ‘‘саавид̇д̇им̣ бужчаами д̇ибад̣̇ам̣ жад̇увийсад̇агкара’’нд̇и ид̣̇ам̣ ад̇д̇ано самаяасид̣̇д̇хам̣ саавид̇д̇илагкан̣аб̣яан̃ж̇анагам̣ б̣рахмассарзна нижчаарид̇аважанам̣ суд̇ваава ‘‘ад̣̇д̇хааяам̣ саман̣о б̣раахман̣асамаяз нидтам̣ г̇ад̇о, ахам̣ бана ан̃н̃аан̣зна ‘аб̣раахман̣о аяа’нд̇и барибхавим̣, саад̇хуруубо манд̇абаараг̇уу б̣раахман̣ова зсо’’д̇и нидтам̣ г̇анд̇ваа ‘‘ханд̣̇а нам̣ яан̃н̃авид̇хим̣ д̣̇агкин̣зяяавид̇хин̃жа бужчаамий’’д̇и д̇амад̇т̇ам̣ бужчанд̇о ‘‘гим̣ниссид̇аа…бз… логз’’д̇и имам̣ висамаг̇аат̇аабад̣̇ад̇д̇аяамааха. д̇ассад̇т̇о – гим̣ниссид̇аа гимад̇хиббааяаа гим̣ бад̇т̇знд̇аа исаяо жа кад̇д̇ияаа жа б̣раахман̣аа жа ан̃н̃з жа мануж̇аа д̣̇звад̇аанам̣ ад̇т̇ааяа яан̃н̃ам̣ агаббаяим̣су. яан̃н̃амагаббаяим̣сууд̇и магааро бад̣̇асанд̇хигаро. агаббаяим̣сууд̇и сам̣вид̣̇ахим̣су агам̣су. бут̇ууд̇и б̣ахуу аннабаанад̣̇аанаад̣̇инаа бхзд̣̇зна анзгаббагаарз бут̇уу ваа исаяо мануж̇аа кад̇д̇ияаа б̣раахман̣аа жа гим̣ниссид̇аа яан̃н̃амагаббаяим̣су. гат̇ам̣ нзсам̣ д̇ам̣ гаммам̣ самиж̇жхад̇ийд̇и иминаад̇хиббааязна бужчад̇и.
461-2. Evaṃ vutte bhagavā brāhmaṇassa cittamudubhāvakaraṇatthaṃ mantesu attano pakataññutaṃ pakāsento āha – ‘‘brāhmaṇo hi ce tvaṃ brūsi…pe… catuvīsatakkhara’’nti. Tassattho – sace tvaṃ ‘‘brāhmaṇo ahaṃ’’ti brūsi, mañca abrāhmaṇaṃ brūsi, tasmā bhavantaṃ sāvittiṃ pucchāmi tipadaṃ catuvīsatakkharaṃ, taṃ me brūhīti. Ettha ca bhagavā paramatthavedānaṃ tiṇṇaṃ piṭakānaṃ ādibhūtaṃ paramatthabrāhmaṇehi sabbabuddhehi pakāsitaṃ atthasampannaṃ byañjanasampannañca ‘‘buddhaṃ saraṇaṃ gacchāmi, dhammaṃ saraṇaṃ gacchāmi, saṅghaṃ saraṇaṃ gacchāmī’’ti imaṃ ariyasāvittiṃ sandhāya pucchati. Yadipi hi brāhmaṇo aññaṃ vadeyya, addhā naṃ bhagavā ‘‘nāyaṃ, brāhmaṇa, ariyassa vinaye sāvittīti vuccatī’’ti tassa asārakattaṃ dassetvā idheva patiṭṭhāpeyya. Brāhmaṇo pana ‘‘sāvittiṃ pucchāmi tipadaṃ catuvīsatakkhara’’nti idaṃ attano samayasiddhaṃ sāvittilakkhaṇabyañjanakaṃ brahmassarena nicchāritavacanaṃ sutvāva ‘‘addhāyaṃ samaṇo brāhmaṇasamaye niṭṭhaṃ gato, ahaṃ pana aññāṇena ‘abrāhmaṇo aya’nti paribhaviṃ, sādhurūpo mantapāragū brāhmaṇova eso’’ti niṭṭhaṃ gantvā ‘‘handa naṃ yaññavidhiṃ dakkhiṇeyyavidhiñca pucchāmī’’ti tamatthaṃ pucchanto ‘‘kiṃnissitā…pe… loke’’ti imaṃ visamagāthāpadattayamāha. Tassattho – kiṃnissitā kimadhippāyā kiṃ patthentā isayo ca khattiyā ca brāhmaṇā ca aññe ca manujā devatānaṃ atthāya yaññaṃ akappayiṃsu. Yaññamakappayiṃsūti makāro padasandhikaro. Akappayiṃsūti saṃvidahiṃsu akaṃsu. Puthūti bahū annapānadānādinā bhedena anekappakāre puthū vā isayo manujā khattiyā brāhmaṇā ca kiṃnissitā yaññamakappayiṃsu. Kathaṃ nesaṃ taṃ kammaṃ samijjhatīti iminādhippāyena pucchati.
463. ат̇асса бхаг̇аваа д̇амад̇т̇ам̣ б̣яаагаронд̇о ‘‘яад̣̇анд̇аг̇уу взд̣̇аг̇уу яан̃н̃агаалз. яассаахуд̇им̣ лабхз д̇ассиж̇жхзд̇и б̣руумий’’д̇и ид̣̇ам̣ сзсабад̣̇ад̣̇ваяамааха. д̇ад̇т̇а яад̣̇анд̇аг̇ууд̇и яо анд̇аг̇уу, огаарасса агааро, д̣̇агааро жа бад̣̇асанд̇хигаро ‘‘асаад̇хааран̣аман̃н̃зса’’нд̇иаад̣̇ийсу (ку. баа. 8.9) магааро вияа. аяам̣ бана ад̇т̇о – яо ваддад̣̇угкасса д̇ийхи барин̃н̃аахи анд̇аг̇ад̇ад̇д̇аа анд̇аг̇уу, жад̇уухи жа маг̇г̇ан̃аан̣авзд̣̇зхи гилзсз виж̇жхид̇ваа г̇ад̇ад̇д̇аа взд̣̇аг̇уу, со яасса исимануж̇акад̇д̇ияаб̣раахман̣аанам̣ ан̃н̃ад̇арасса яан̃н̃агаалз яасмим̣ гисмин̃жи аахаарз бажжубадтид̇з анд̇амасо ванабан̣н̣амуулапалаад̣̇имхиби аахуд̇им̣ лабхз, д̇ад̇о гин̃жи д̣̇зяяад̇хаммам̣ лабхзяяа, д̇асса д̇ам̣ яан̃н̃агаммам̣ иж̇жхз самиж̇жхзяяа, махабпалам̣ бхавзяяаад̇и б̣руумийд̇и.
463. Athassa bhagavā tamatthaṃ byākaronto ‘‘yadantagū vedagū yaññakāle. Yassāhutiṃ labhe tassijjheti brūmī’’ti idaṃ sesapadadvayamāha. Tattha yadantagūti yo antagū, okārassa akāro, dakāro ca padasandhikaro ‘‘asādhāraṇamaññesa’’ntiādīsu (khu. pā. 8.9) makāro viya. Ayaṃ pana attho – yo vaṭṭadukkhassa tīhi pariññāhi antagatattā antagū, catūhi ca maggañāṇavedehi kilese vijjhitvā gatattā vedagū, so yassa isimanujakhattiyabrāhmaṇānaṃ aññatarassa yaññakāle yasmiṃ kismiñci āhāre paccupaṭṭhite antamaso vanapaṇṇamūlaphalādimhipi āhutiṃ labhe, tato kiñci deyyadhammaṃ labheyya, tassa taṃ yaññakammaṃ ijjhe samijjheyya, mahapphalaṃ bhaveyyāti brūmīti.
464. ат̇а б̣раахман̣о д̇ам̣ бхаг̇авад̇о барамад̇т̇аяог̇аг̇амбхийрам̣ ад̇имад̇хураг̇ираниб̣б̣игаарасарасамбаннам̣ д̣̇зсанам̣ суд̇ваа сарийрасамбад̇д̇исуужид̇ан̃жасса саб̣б̣аг̇ун̣асамбад̇д̇им̣ самбхааваяамаано бийд̇исоманассаж̇аад̇о ‘‘ад̣̇д̇хаа хи д̇ассаа’’д̇и г̇аат̇амааха. д̇ад̇т̇а ид̇и б̣раахман̣од̇и сан̇г̇ийд̇игаараанам̣ важанам̣, сзсам̣ б̣раахман̣асса. д̇ассад̇т̇о – ад̣̇д̇хаа хи д̇асса маяхам̣ худ̇амиж̇жхз, аяам̣ аж̇ж̇а д̣̇зяяад̇хаммо иж̇жхиссад̇и самиж̇жхиссад̇и махабпало бхависсад̇и яам̣ д̇аад̣̇исам̣ взд̣̇аг̇умад̣̇д̣̇асаама, яасмаа д̇аад̣̇исам̣ бхаванд̇аруубам̣ взд̣̇аг̇ум̣ ад̣̇д̣̇асаама. д̇ван̃н̃зва хи со взд̣̇аг̇уу, на ан̃н̃о. ид̇о буб̣б̣з бана д̇умхаад̣̇исаанам̣ взд̣̇аг̇уунам̣ анд̇аг̇уунан̃жа ад̣̇ассанзна амхаад̣̇исаанам̣ яан̃н̃з бадияад̇д̇ам̣ ан̃н̃о ж̇ано бхун̃ж̇ад̇и буурал̣аасам̣ жаруган̃жа бууван̃жаад̇и.
464. Atha brāhmaṇo taṃ bhagavato paramatthayogagambhīraṃ atimadhuragiranibbikārasarasampannaṃ desanaṃ sutvā sarīrasampattisūcitañcassa sabbaguṇasampattiṃ sambhāvayamāno pītisomanassajāto ‘‘addhā hi tassā’’ti gāthamāha. Tattha iti brāhmaṇoti saṅgītikārānaṃ vacanaṃ, sesaṃ brāhmaṇassa. Tassattho – addhā hi tassa mayhaṃ hutamijjhe, ayaṃ ajja deyyadhammo ijjhissati samijjhissati mahapphalo bhavissati yaṃ tādisaṃ vedagumaddasāma, yasmā tādisaṃ bhavantarūpaṃ vedaguṃ addasāma. Tvaññeva hi so vedagū, na añño. Ito pubbe pana tumhādisānaṃ vedagūnaṃ antagūnañca adassanena amhādisānaṃ yaññe paṭiyattaṃ añño jano bhuñjati pūraḷāsaṃ carukañca pūvañcāti.
465. д̇ад̇о бхаг̇аваа ад̇д̇ани басаннам̣ важанабадиг̇г̇ахан̣асаж̇ж̇ам̣ б̣раахман̣ам̣ вид̣̇ид̇ваа яат̇аасса судту баагадаа хонд̇и, звам̣ наанаббагаарзхи д̣̇агкин̣зяяз багаасзд̇угаамо ‘‘д̇асмаад̇иха д̇ва’’нд̇и г̇аат̇амааха. д̇ассад̇т̇о – яасмаа маяи басанноси, д̇асмаа бана иха д̇вам̣, б̣раахман̣а, убасан̇гамма бужчаад̇и ад̇д̇аанам̣ д̣̇ассзнд̇о ааха. ид̣̇аани ид̇о буб̣б̣ам̣ ад̇т̇знаад̇т̇игабад̣̇ам̣ барабад̣̇зна самб̣анд̇хид̇аб̣б̣ам̣ – ад̇т̇зна ад̇т̇иго д̇асса ад̇т̇ад̇т̇игабхаавасса ануруубам̣ гилзсаг̇г̇ивуубасамзна санд̇ам̣, год̇хад̇хуумавиг̇амзна вид̇хуумам̣, д̣̇угкаабхаавзна анийгхам̣, анзгавид̇хааасаабхаавзна нираасам̣ аббзвид̇ха згам̣сзна ид̇ха тид̇ова ид̇ха ваа саасанз абхивинд̣̇з лажчаси ад̇хиг̇ажчиссаси сумзд̇хам̣ варабан̃н̃ам̣ кийн̣аасавад̣̇агкин̣зяяанд̇и. ат̇а ваа яасмаа маяи басанноси, д̇асмаад̇иха, д̇вам̣ б̣раахман̣а, ад̇т̇зна ад̇т̇иго самаано убасан̇гамма бужча санд̇ам̣ вид̇хуумам̣ анийгхам̣ нираасанд̇и ад̇д̇аанам̣ д̣̇ассзнд̇о ааха. звам̣ бужчанд̇о аббзвид̇ха абхивинд̣̇з сумзд̇хам̣ кийн̣аасавад̣̇агкин̣зяяанд̇и звамбзд̇т̇а яож̇анаа взд̣̇ид̇аб̣б̣аа.
465. Tato bhagavā attani pasannaṃ vacanapaṭiggahaṇasajjaṃ brāhmaṇaṃ viditvā yathāssa suṭṭhu pākaṭā honti, evaṃ nānappakārehi dakkhiṇeyye pakāsetukāmo ‘‘tasmātiha tva’’nti gāthamāha. Tassattho – yasmā mayi pasannosi, tasmā pana iha tvaṃ, brāhmaṇa, upasaṅkamma pucchāti attānaṃ dassento āha. Idāni ito pubbaṃ atthenaatthikapadaṃ parapadena sambandhitabbaṃ – atthena atthiko tassa atthatthikabhāvassa anurūpaṃ kilesaggivūpasamena santaṃ, kodhadhūmavigamena vidhūmaṃ, dukkhābhāvena anīghaṃ, anekavidhaāsābhāvena nirāsaṃ appevidha ekaṃsena idha ṭhitova idha vā sāsane abhivinde lacchasi adhigacchissasi sumedhaṃ varapaññaṃ khīṇāsavadakkhiṇeyyanti. Atha vā yasmā mayi pasannosi, tasmātiha, tvaṃ brāhmaṇa, atthena atthiko samāno upasaṅkamma puccha santaṃ vidhūmaṃ anīghaṃ nirāsanti attānaṃ dassento āha. Evaṃ pucchanto appevidha abhivinde sumedhaṃ khīṇāsavadakkhiṇeyyanti evampettha yojanā veditabbā.
466. ат̇а б̣раахман̣о яат̇аанусидтам̣ бадибаж̇ж̇амаано бхаг̇аванд̇ам̣ ааха – ‘‘яан̃н̃з рад̇охам̣…бз… б̣руухи мзд̇а’’нд̇и. д̇ад̇т̇а яан̃н̃о яааг̇о д̣̇аананд̇и ад̇т̇ад̇о згам̣. д̇асмаа д̣̇аанарад̇о ахам̣, д̇ааяа зва д̣̇аанаараамад̇ааяа д̣̇аанам̣ д̣̇аад̇угаамо, на бана ж̇аанаами, звам̣ аж̇аананд̇ам̣ анусаасад̇у мам̣ бхавам̣. анусаасанд̇о жа уд̇д̇аанзнзва наязна яад̇т̇а худ̇ам̣ иж̇жхад̇з б̣руухи мзд̇анд̇и звамзд̇т̇а ад̇т̇аяож̇анаа взд̣̇ид̇аб̣б̣аа. ‘‘яат̇аахуд̇а’’нд̇иби баато.
466. Atha brāhmaṇo yathānusiṭṭhaṃ paṭipajjamāno bhagavantaṃ āha – ‘‘yaññe ratohaṃ…pe… brūhi meta’’nti. Tattha yañño yāgo dānanti atthato ekaṃ. Tasmā dānarato ahaṃ, tāya eva dānārāmatāya dānaṃ dātukāmo, na pana jānāmi, evaṃ ajānantaṃ anusāsatu maṃ bhavaṃ. Anusāsanto ca uttāneneva nayena yattha hutaṃ ijjhate brūhi metanti evamettha atthayojanā veditabbā. ‘‘Yathāhuta’’ntipi pāṭho.
467. ат̇асса бхаг̇аваа вад̇д̇угаамо ааха – ‘‘д̇зна хи…бз… д̣̇зсзссаамий’’д̇и. охид̇асод̇асса жасса анусаасанад̇т̇ам̣ д̇аава ‘‘маа ж̇аад̇им̣ бужчий’’д̇и г̇аат̇амааха. д̇ад̇т̇а маа ж̇аад̇им̣ бужчийд̇и яад̣̇и худ̇асамид̣̇д̇хим̣ д̣̇аанамахабпалад̇ам̣ бажжаасийсаси, ж̇аад̇им̣ маа бужча. агааран̣ан̃хи д̣̇агкин̣зяяавижааран̣ааяа ж̇аад̇и. жаран̣ан̃жа бужчаад̇и абижа ко сийлаад̣̇иг̇ун̣абхзд̣̇ам̣ жаран̣ам̣ бужча. зд̇ан̃хи д̣̇агкин̣зяяавижааран̣ааяа гааран̣ам̣.
467. Athassa bhagavā vattukāmo āha – ‘‘tena hi…pe… desessāmī’’ti. Ohitasotassa cassa anusāsanatthaṃ tāva ‘‘mā jātiṃ pucchī’’ti gāthamāha. Tattha mā jātiṃ pucchīti yadi hutasamiddhiṃ dānamahapphalataṃ paccāsīsasi, jātiṃ mā puccha. Akāraṇañhi dakkhiṇeyyavicāraṇāya jāti. Caraṇañca pucchāti apica kho sīlādiguṇabhedaṃ caraṇaṃ puccha. Etañhi dakkhiṇeyyavicāraṇāya kāraṇaṃ.
ид̣̇аанисса д̇амад̇т̇ам̣ вибхаавзнд̇о нид̣̇ассанамааха – ‘‘гадтаа хавз ж̇ааяад̇и ж̇аад̇авзд̣̇о’’д̇иаад̣̇и. д̇ад̇рааяамад̇хиббааяо – ид̇ха гадтаа аг̇г̇и ж̇ааяад̇и, на жа со саалаад̣̇игадтаа ж̇аад̇о зва аг̇г̇игижжам̣ гарод̇и, саабаанад̣̇он̣иаад̣̇игадтаа ж̇аад̇о на гарод̇и, абижа ко ад̇д̇ано ажжиаад̣̇иг̇ун̣асамбаннад̇д̇аа зва гарод̇и. звам̣ на б̣раахман̣агулаад̣̇ийсу ж̇аад̇о зва д̣̇агкин̣зяяо ход̇и, жан̣д̣аалагулаад̣̇ийсу ж̇аад̇о на ход̇и, абижа ко нийжаагулийноби ужжаагулийноби кийн̣аасавамуни д̇хид̇имаа хирийнисзд̇хо ааж̇аанияо ход̇и, имааяа д̇хид̇ихирибамукааяа г̇ун̣асамбад̇д̇ияаа ж̇аад̇имаа уд̇д̇амад̣̇агкин̣зяяо ход̇и. со хи д̇хид̇ияаа г̇ун̣з д̇хаараяад̇и, хирияаа д̣̇осз нисзд̇хзд̇и. вуд̇д̇ан̃жзд̇ам̣ ‘‘хирияаа хи санд̇о на гаронд̇и бааба’’нд̇и. д̇зна д̇з б̣рууми –
Idānissa tamatthaṃ vibhāvento nidassanamāha – ‘‘kaṭṭhā have jāyati jātavedo’’tiādi. Tatrāyamadhippāyo – idha kaṭṭhā aggi jāyati, na ca so sālādikaṭṭhā jāto eva aggikiccaṃ karoti, sāpānadoṇiādikaṭṭhā jāto na karoti, apica kho attano acciādiguṇasampannattā eva karoti. Evaṃ na brāhmaṇakulādīsu jāto eva dakkhiṇeyyo hoti, caṇḍālakulādīsu jāto na hoti, apica kho nīcākulīnopi uccākulīnopi khīṇāsavamuni dhitimā hirīnisedho ājāniyo hoti, imāya dhitihiripamukhāya guṇasampattiyā jātimā uttamadakkhiṇeyyo hoti. So hi dhitiyā guṇe dhārayati, hiriyā dose nisedheti. Vuttañcetaṃ ‘‘hiriyā hi santo na karonti pāpa’’nti. Tena te brūmi –
‘‘маа ж̇аад̇им̣ бужчий жаран̣ан̃жа бужча,
‘‘Mā jātiṃ pucchī caraṇañca puccha,
гадтаа хавз ж̇ааяад̇и ж̇аад̇авзд̣̇о;
Kaṭṭhā have jāyati jātavedo;
нийжаагулийноби муний д̇хид̇иймаа,
Nīcākulīnopi munī dhitīmā,
ааж̇аанияо ход̇и хирийнисзд̇хо’’д̇и. –
Ājāniyo hoti hirīnisedho’’ti. –
зса сан̇кзбо, вид̇т̇ааро бана ассалааяанасуд̇д̇аанусаарзна (ма. ни. 2.401 аад̣̇аяо) взд̣̇ид̇аб̣б̣о.
Esa saṅkhepo, vitthāro pana assalāyanasuttānusārena (ma. ni. 2.401 ādayo) veditabbo.
468. звамзд̇ам̣ бхаг̇аваа жаад̇уван̣н̣исуд̣̇д̇хияаа анусаасид̇ваа ид̣̇аани яад̇т̇а худ̇ам̣ иж̇жхад̇з, яат̇аа жа худ̇ам̣ иж̇жхад̇з, д̇амад̇т̇ам̣ д̣̇ассзд̇ум̣ ‘‘сажжзна д̣̇анд̇о’’д̇иаад̣̇иг̇аат̇амааха. д̇ад̇т̇а сажжзнаад̇и барамад̇т̇асажжзна. д̇ан̃хи бад̇д̇о д̣̇анд̇о ход̇и. д̇знааха – ‘‘сажжзна д̣̇анд̇о’’д̇и. д̣̇амасаа убзд̇од̇и инд̣̇рияад̣̇амзна саманнааг̇ад̇о. взд̣̇анд̇аг̇ууд̇и взд̣̇зхи ваа гилзсаанам̣ анд̇ам̣ г̇ад̇о, взд̣̇аанам̣ ваа анд̇ам̣ жад̇уд̇т̇амаг̇г̇ан̃аан̣ам̣ г̇ад̇о. вуусид̇аб̣рахмажарияод̇и буна васид̇аб̣б̣аабхаавад̇о вуд̇т̇амаг̇г̇аб̣рахмажарияо. гаалзна д̇амхи хаб̣яам̣ бавзжчзд̇и ад̇д̇ано д̣̇зяяад̇хаммадтид̇агаалам̣ д̇асса саммукийбхаавагаалан̃жа убалагкзд̇ваа д̇зна гаалзна д̇аад̣̇исз д̣̇агкин̣зяяз д̣̇зяяад̇хаммам̣ бавзжчзяяа, бавзсзяяа бадибаад̣̇зяяа.
468. Evametaṃ bhagavā cātuvaṇṇisuddhiyā anusāsitvā idāni yattha hutaṃ ijjhate, yathā ca hutaṃ ijjhate, tamatthaṃ dassetuṃ ‘‘saccena danto’’tiādigāthamāha. Tattha saccenāti paramatthasaccena. Tañhi patto danto hoti. Tenāha – ‘‘saccena danto’’ti. Damasā upetoti indriyadamena samannāgato. Vedantagūti vedehi vā kilesānaṃ antaṃ gato, vedānaṃ vā antaṃ catutthamaggañāṇaṃ gato. Vūsitabrahmacariyoti puna vasitabbābhāvato vutthamaggabrahmacariyo. Kālena tamhi habyaṃ paveccheti attano deyyadhammaṭṭhitakālaṃ tassa sammukhībhāvakālañca upalakkhetvā tena kālena tādise dakkhiṇeyye deyyadhammaṃ paveccheyya, paveseyya paṭipādeyya.
469-71. гаамзд̇и вад̇т̇угаамз жа гилзсагаамз жа. сусамаахид̇инд̣̇рияаад̇и судту самаахид̇аинд̣̇рияаа, авигкид̇д̇аинд̣̇рияаад̇и вуд̇д̇ам̣ ход̇и. жанд̣̇ова раахуг̇г̇ахан̣аа бамуд̇д̇аад̇и яат̇аа жанд̣̇о раахуг̇г̇ахан̣аа, звам̣ гилзсаг̇г̇ахан̣аа бамуд̇д̇аа яз ад̇ийва бхаасанд̇и жзва д̇абанд̇и жа. сад̇аад̇и сад̇исамбаннаа. мамааяид̇аанийд̇и д̇ан̣хаад̣̇идтимамааяид̇аани.
469-71.Kāmeti vatthukāme ca kilesakāme ca. Susamāhitindriyāti suṭṭhu samāhitaindriyā, avikkhittaindriyāti vuttaṃ hoti. Candova rāhuggahaṇā pamuttāti yathā cando rāhuggahaṇā, evaṃ kilesaggahaṇā pamuttā ye atīva bhāsanti ceva tapanti ca. Satāti satisampannā. Mamāyitānīti taṇhādiṭṭhimamāyitāni.
472. яо гаамз хид̇ваад̇и ид̇о бабхуд̇и ад̇д̇аанам̣ санд̇хааяа вад̣̇ад̇и. д̇ад̇т̇а гаамз хид̇ваад̇и гилзсагаамз бахааяа. абхибхуяяажаарийд̇и д̇зсам̣ бахийнад̇д̇аа вад̇т̇угаамз абхибхуяяажаарий. ж̇аад̇имаран̣асса анд̇ам̣ наама ниб̣б̣аанам̣ вужжад̇и, д̇ан̃жа яо взд̣̇и ад̇д̇ано бан̃н̃ааб̣алзна ан̃н̃ааси. уд̣̇агарахад̣̇о ваад̇и яз имз анод̇ад̇д̇ад̣̇ахо ган̣н̣амун̣д̣ад̣̇ахо рат̇агаарад̣̇ахо чад̣̇д̣̇анд̇ад̣̇ахо гун̣аалад̣̇ахо манд̣̇аагинид̣̇ахо сийхаббабаад̇ад̣̇аход̇и химавад̇и сад̇д̇а махаарахад̣̇аа аг̇г̇исуурияасанд̇аабзхи асампудтад̇д̇аа нижжам̣ сийд̇алаа, д̇зсам̣ ан̃н̃ад̇аро уд̣̇агарахад̣̇ова сийд̇о бариниб̣б̣уд̇агилзсабарил̣аахад̇д̇аа.
472.Yo kāme hitvāti ito pabhuti attānaṃ sandhāya vadati. Tattha kāme hitvāti kilesakāme pahāya. Abhibhuyyacārīti tesaṃ pahīnattā vatthukāme abhibhuyyacārī. Jātimaraṇassa antaṃ nāma nibbānaṃ vuccati, tañca yo vedi attano paññābalena aññāsi. Udakarahado vāti ye ime anotattadaho kaṇṇamuṇḍadaho rathakāradaho chaddantadaho kuṇāladaho mandākinidaho sīhappapātadahoti himavati satta mahārahadā aggisūriyasantāpehi asamphuṭṭhattā niccaṃ sītalā, tesaṃ aññataro udakarahadova sīto parinibbutakilesapariḷāhattā.
473. самод̇и д̇уляо. самзхийд̇и вибассиаад̣̇ийхи б̣уд̣̇д̇хзхи. д̇з хи бадивзд̇хасамад̇д̇аа ‘‘самаа’’д̇и вужжанд̇и. над̇т̇и д̇зсам̣ бадивзд̇хзнаад̇хиг̇анд̇аб̣б̣зсу г̇ун̣зсу, бахаад̇аб̣б̣зсу ваа д̣̇осзсу взмад̇д̇ад̇аа , ад̣̇д̇хаанаааяугулаббамаан̣аабхинигкаманабад̇хаанаб̣од̇хирасмийхи бана нзсам̣ взмад̇д̇ад̇аа ход̇и. д̇ат̇аа хи д̇з хздтимабарижчзд̣̇зна жад̇уухи асан̇кязяязхи габбасад̇асахассзна жа баарамияо буурзнд̇и, убаримабарижчзд̣̇зна сол̣асахи асан̇кязяязхи габбасад̇асахассзна жа. аяам̣ нзсам̣ ад̣̇д̇хаанавзмад̇д̇ад̇аа. хздтимабарижчзд̣̇зна жа вассасад̇ааяугагаалз уббаж̇ж̇анд̇и, убаримабарижчзд̣̇зна вассасад̇асахассааяугагаалз. аяам̣ нзсам̣ ааяувзмад̇д̇ад̇аа. кад̇д̇ияагулз ваа б̣раахман̣агулз ваа уббаж̇ж̇анд̇и. аяам̣ гулавзмад̇д̇ад̇аа. ужжаа ваа хонд̇и адтаасийд̇ихад̇т̇аббамаан̣аа, нийжаа ваа баннарасаадтаарасахад̇т̇аббамаан̣аа. аяам̣ бамаан̣авзмад̇д̇ад̇аа. хад̇т̇иассарат̇асивигаад̣̇ийхи нигкаманд̇и взхаасзна ваа. д̇ат̇аа хи вибассигагусанд̇хаа ассарат̇зна нигкамим̣су, сикийгон̣ааг̇аманаа хад̇т̇игканд̇хзна, взссабхуу сивигааяа, гассабо взхаасзна, сагяамуни ассабидтияаа. аяам̣ нзгкаммавзмад̇д̇ад̇аа. сад̇д̇аахам̣ ваа бад̇хаанамануяун̃ж̇анд̇и, ад̣дхамаасам̣, маасам̣, д̣̇взмаасам̣, д̇змаасам̣, жад̇умаасам̣, бан̃жамаасам̣, чамаасам̣, згавассам̣ д̣̇вид̇ижад̇убан̃жачавассаани ваа. аяам̣ бад̇хаанавзмад̇д̇ад̇аа. ассад̇т̇о ваа б̣од̇хиругко ход̇и ниг̇род̇хаад̣̇ийнам̣ ваа ан̃н̃ад̇аро. аяам̣ б̣од̇хивзмад̇д̇ад̇аа. б̣яаамаасийд̇иананд̇абабхааяуд̇д̇аа хонд̇и. д̇ад̇т̇а б̣яаамаббабхаа ваа асийд̇иббабхаа ваа саб̣б̣зсам̣ самаанаа, ананд̇аббабхаа бана д̣̇уурамби г̇ажчад̇и аасаннамби, згаг̇аавуд̇ам̣ д̣̇виг̇аавуд̇ам̣ яож̇анам̣ анзгаяож̇анам̣ жаггаваал̣абарияанд̇амби, ман̇г̇аласса б̣уд̣̇д̇хасса сарийраббабхаа д̣̇асасахассажаггаваал̣ам̣ аг̇амааси. звам̣ санд̇зби манасаа жинд̇ааяад̇д̇аава саб̣б̣аб̣уд̣̇д̇хаанам̣, яо яад̇д̇агамижчад̇и, д̇асса д̇ад̇д̇агам̣ г̇ажчад̇и. аяам̣ расмивзмад̇д̇ад̇аа. имаа адта взмад̇д̇ад̇аа табзд̇ваа авасзсзсу бадивзд̇хзнаад̇хиг̇анд̇аб̣б̣зсу г̇ун̣зсу, бахаад̇аб̣б̣зсу ваа д̣̇осзсу над̇т̇и нзсам̣ висзсо, д̇асмаа ‘‘самаа’’д̇и вужжанд̇и. звамзд̇зхи само самзхи.
473.Samoti tulyo. Samehīti vipassiādīhi buddhehi. Te hi paṭivedhasamattā ‘‘samā’’ti vuccanti. Natthi tesaṃ paṭivedhenādhigantabbesu guṇesu, pahātabbesu vā dosesu vemattatā , addhānaāyukulappamāṇābhinikkhamanapadhānabodhirasmīhi pana nesaṃ vemattatā hoti. Tathā hi te heṭṭhimaparicchedena catūhi asaṅkhyeyyehi kappasatasahassena ca pāramiyo pūrenti, uparimaparicchedena soḷasahi asaṅkhyeyyehi kappasatasahassena ca. Ayaṃ nesaṃ addhānavemattatā. Heṭṭhimaparicchedena ca vassasatāyukakāle uppajjanti, uparimaparicchedena vassasatasahassāyukakāle. Ayaṃ nesaṃ āyuvemattatā. Khattiyakule vā brāhmaṇakule vā uppajjanti. Ayaṃ kulavemattatā. Uccā vā honti aṭṭhāsītihatthappamāṇā, nīcā vā pannarasaaṭṭhārasahatthappamāṇā. Ayaṃ pamāṇavemattatā. Hatthiassarathasivikādīhi nikkhamanti vehāsena vā. Tathā hi vipassikakusandhā assarathena nikkhamiṃsu, sikhīkoṇāgamanā hatthikkhandhena, vessabhū sivikāya, kassapo vehāsena, sakyamuni assapiṭṭhiyā. Ayaṃ nekkhammavemattatā. Sattāhaṃ vā padhānamanuyuñjanti, aḍḍhamāsaṃ, māsaṃ, dvemāsaṃ, temāsaṃ, catumāsaṃ, pañcamāsaṃ, chamāsaṃ, ekavassaṃ dviticatupañcachavassāni vā. Ayaṃ padhānavemattatā. Assattho vā bodhirukkho hoti nigrodhādīnaṃ vā aññataro. Ayaṃ bodhivemattatā. Byāmāsītianantapabhāyuttā honti. Tattha byāmappabhā vā asītippabhā vā sabbesaṃ samānā, anantappabhā pana dūrampi gacchati āsannampi, ekagāvutaṃ dvigāvutaṃ yojanaṃ anekayojanaṃ cakkavāḷapariyantampi, maṅgalassa buddhassa sarīrappabhā dasasahassacakkavāḷaṃ agamāsi. Evaṃ santepi manasā cintāyattāva sabbabuddhānaṃ, yo yattakamicchati, tassa tattakaṃ gacchati. Ayaṃ rasmivemattatā. Imā aṭṭha vemattatā ṭhapetvā avasesesu paṭivedhenādhigantabbesu guṇesu, pahātabbesu vā dosesu natthi nesaṃ viseso, tasmā ‘‘samā’’ti vuccanti. Evametehi samo samehi.
висамзхи д̣̇уурзд̇и на самаа висамаа, бажжзгаб̣уд̣̇д̇хаад̣̇аяо авасзсасаб̣б̣асад̇д̇аа. д̇зхи висамзхи асад̣̇исад̇ааяа д̣̇уурз. сагалаж̇амб̣уд̣̇ийбам̣ буурзд̇ваа баллан̇гзна баллан̇гам̣ сан̇гхаддзд̇ваа нисиннаа бажжзгаб̣уд̣̇д̇хааби хи г̇ун̣зхи згасса саммаасамб̣уд̣̇д̇хасса галам̣ нааг̇гханд̇и сол̣асим̣ , го бана ваад̣̇о саавагаад̣̇ийсу. д̇знааха – ‘‘висамзхи д̣̇уурз’’д̇и. д̇ат̇ааг̇ад̇о ход̇ийд̇и убхаяабад̣̇зхи д̣̇уурзд̇и яож̇зд̇аб̣б̣ам̣. ананд̇абан̃н̃од̇и абаримид̇абан̃н̃о. логияамануссаанан̃хи бан̃н̃ам̣ убанид̇хааяа адтамагасса бан̃н̃аа ад̇хигаа, д̇асса бан̃н̃ам̣ убанид̇хааяа сод̇аабаннасса. звам̣ яаава арахад̇о бан̃н̃ам̣ убанид̇хааяа бажжзгаб̣уд̣̇д̇хасса бан̃н̃аа ад̇хигаа, бажжзгаб̣уд̣̇д̇хасса бан̃н̃ам̣ бана убанид̇хааяа д̇ат̇ааг̇ад̇асса бан̃н̃аа ад̇хигаад̇и на вад̇д̇аб̣б̣аа, ананд̇аа ижжзва бана вад̇д̇аб̣б̣аа. д̇знааха – ‘‘ананд̇абан̃н̃о’’д̇и. ануубалид̇д̇од̇и д̇ан̣хаад̣̇идтилзбзхи алид̇д̇о. ид̇ха ваа хурам̣ ваад̇и ид̇халогз ваа баралогз ваа. яож̇анаа банзд̇т̇а – само самзхи висамзхи д̣̇уурз д̇ат̇ааг̇ад̇о ход̇и. гасмаа? яасмаа ананд̇абан̃н̃о анубалид̇д̇о ид̇ха ваа хурам̣ ваа, д̇зна д̇ат̇ааг̇ад̇о арахад̇и буурал̣аасанд̇и.
Visamehidūreti na samā visamā, paccekabuddhādayo avasesasabbasattā. Tehi visamehi asadisatāya dūre. Sakalajambudīpaṃ pūretvā pallaṅkena pallaṅkaṃ saṅghaṭṭetvā nisinnā paccekabuddhāpi hi guṇehi ekassa sammāsambuddhassa kalaṃ nāgghanti soḷasiṃ , ko pana vādo sāvakādīsu. Tenāha – ‘‘visamehi dūre’’ti. Tathāgato hotīti ubhayapadehi dūreti yojetabbaṃ. Anantapaññoti aparimitapañño. Lokiyamanussānañhi paññaṃ upanidhāya aṭṭhamakassa paññā adhikā, tassa paññaṃ upanidhāya sotāpannassa. Evaṃ yāva arahato paññaṃ upanidhāya paccekabuddhassa paññā adhikā, paccekabuddhassa paññaṃ pana upanidhāya tathāgatassa paññā adhikāti na vattabbā, anantā icceva pana vattabbā. Tenāha – ‘‘anantapañño’’ti. Anūpalittoti taṇhādiṭṭhilepehi alitto. Idha vā huraṃ vāti idhaloke vā paraloke vā. Yojanā panettha – samo samehi visamehi dūre tathāgato hoti. Kasmā? Yasmā anantapañño anupalitto idha vā huraṃ vā, tena tathāgato arahati pūraḷāsanti.
474. яамхи на мааяаад̇и аяам̣ бана г̇аат̇аа ан̃н̃аа жа ийд̣̇исаа мааяаад̣̇ид̣̇осаяуд̇д̇зсу б̣раахман̣зсу д̣̇агкин̣зяяасан̃н̃аабахаанад̇т̇ам̣ вуд̇д̇аад̇и взд̣̇ид̇аб̣б̣аа. д̇ад̇т̇а амамод̇и сад̇д̇асан̇каарзсу ‘‘ид̣̇ам̣ мамаа’’д̇и бахийнамамааяид̇абхааво.
474.Yamhina māyāti ayaṃ pana gāthā aññā ca īdisā māyādidosayuttesu brāhmaṇesu dakkhiṇeyyasaññāpahānatthaṃ vuttāti veditabbā. Tattha amamoti sattasaṅkhāresu ‘‘idaṃ mamā’’ti pahīnamamāyitabhāvo.
475. нивзсананд̇и д̇ан̣хаад̣̇идтинивзсанам̣. д̇зна хи мано д̇ийсу бхавзсу нивисад̇и, д̇зна д̇ам̣ ‘‘нивзсанам̣ манасо’’д̇и вужжад̇и. д̇ад̇т̇зва ваа нивисад̇и д̇ам̣ хид̇ваа г̇анд̇ум̣ асамад̇т̇ад̇ааяа. д̇знаби ‘‘нивзсана’’нд̇и вужжад̇и. бариг̇г̇ахаад̇и д̇ан̣хаад̣̇идтияо зва, д̇аахи бариг̇г̇ахид̇ад̇хаммаа ваа. гзжийд̇и аббамад̇д̇агааби. анубаад̣̇ияаанод̇и д̇зсам̣ нивзсанабариг̇г̇ахаанам̣ абхааваа ган̃жи д̇хаммам̣ анубаад̣̇ияамаано.
475.Nivesananti taṇhādiṭṭhinivesanaṃ. Tena hi mano tīsu bhavesu nivisati, tena taṃ ‘‘nivesanaṃ manaso’’ti vuccati. Tattheva vā nivisati taṃ hitvā gantuṃ asamatthatāya. Tenapi ‘‘nivesana’’nti vuccati. Pariggahāti taṇhādiṭṭhiyo eva, tāhi pariggahitadhammā vā. Kecīti appamattakāpi. Anupādiyānoti tesaṃ nivesanapariggahānaṃ abhāvā kañci dhammaṃ anupādiyamāno.
476. самаахид̇о маг̇г̇асамаад̇хинаа. уд̣̇ад̇аарийд̇и уд̇д̇ин̣н̣о. д̇хаммам̣ жан̃н̃аасийд̇и саб̣б̣ан̃жа н̃зяяад̇хаммам̣ ан̃н̃ааси. барамааяа д̣̇идтияаад̇и саб̣б̣ан̃н̃уд̇ан̃н̃аан̣зна.
476.Samāhito maggasamādhinā. Udatārīti uttiṇṇo. Dhammaṃ caññāsīti sabbañca ñeyyadhammaṃ aññāsi. Paramāya diṭṭhiyāti sabbaññutaññāṇena.
477. бхаваасаваад̇и бхавад̇ан̣хаажхаананиганд̇исассад̇ад̣̇идтисахаг̇ад̇аа рааг̇аа. важийд̇и ваажаа. караад̇и гагкал̣аа парусаа. вид̇хуубид̇аад̇и д̣̇ад̣дхаа. ад̇т̇аг̇ад̇аад̇и ад̇т̇ан̇г̇ад̇аа. на санд̇ийд̇и вид̇хуубид̇ад̇д̇аа ад̇т̇ан̇г̇ад̇ад̇д̇аа жа. убхаязхи бана убхаяам̣ яож̇зд̇аб̣б̣ам̣ саб̣б̣ад̇хийд̇и саб̣б̣зсу канд̇хааяад̇анаад̣̇ийсу.
477.Bhavāsavāti bhavataṇhājhānanikantisassatadiṭṭhisahagatā rāgā. Vacīti vācā. Kharāti kakkhaḷā pharusā. Vidhūpitāti daḍḍhā. Atthagatāti atthaṅgatā. Na santīti vidhūpitattā atthaṅgatattā ca. Ubhayehi pana ubhayaṃ yojetabbaṃ sabbadhīti sabbesu khandhāyatanādīsu.
478. маанасад̇д̇зсууд̇и маанзна лаг̇г̇зсу. д̣̇угкам̣ барин̃н̃ааяаад̇и ваддад̣̇угкам̣ д̇ийхи барин̃н̃аахи бариж̇аанид̇ваа. сакзд̇д̇авад̇т̇унд̇и сахзд̇убажжаяам̣, сад̣̇д̇хим̣ гаммагилзсзхийд̇и вуд̇д̇ам̣ ход̇и.
478.Mānasattesūti mānena laggesu. Dukkhaṃ pariññāyāti vaṭṭadukkhaṃ tīhi pariññāhi parijānitvā. Sakhettavatthunti sahetupaccayaṃ, saddhiṃ kammakilesehīti vuttaṃ hoti.
479. аасам̣ аниссааяаад̇и д̇ан̣хам̣ аналлийяид̇ваа. вивзгад̣̇ассийд̇и ниб̣б̣аанад̣̇ассий. баравзд̣̇ияанд̇и барзхи н̃аабзд̇аб̣б̣ам̣. д̣̇идтимубаад̇ивад̇д̇од̇и д̣̇ваасадтибхзд̣̇амби мижчаад̣̇идтим̣ ад̇игганд̇о. аарамман̣аад̇и бажжаяаа, бунаб̣бхавагааран̣аанийд̇и вуд̇д̇ам̣ ход̇и.
479.Āsaṃ anissāyāti taṇhaṃ anallīyitvā. Vivekadassīti nibbānadassī. Paravediyanti parehi ñāpetabbaṃ. Diṭṭhimupātivattoti dvāsaṭṭhibhedampi micchādiṭṭhiṃ atikkanto. Ārammaṇāti paccayā, punabbhavakāraṇānīti vuttaṃ hoti.
480. баробараад̇и вараавараа сунд̣̇араасунд̣̇араа. бараа ваа б̣аахираа, абараа аж̇жхад̇д̇игаа. самзжжаад̇и н̃аан̣зна бадивиж̇жхид̇ваа. д̇хаммаад̇и канд̇хааяад̇анаад̣̇аяо д̇хаммаа. убаад̣̇аанакаяз вимуд̇д̇од̇и ниб̣б̣аанз ниб̣б̣аанаарамман̣ад̇о вимуд̇д̇о, ниб̣б̣аанаарамман̣авимуд̇д̇илаабхийд̇и ад̇т̇о.
480.Paroparāti varāvarā sundarāsundarā. Parā vā bāhirā, aparā ajjhattikā. Sameccāti ñāṇena paṭivijjhitvā. Dhammāti khandhāyatanādayo dhammā. Upādānakhaye vimuttoti nibbāne nibbānārammaṇato vimutto, nibbānārammaṇavimuttilābhīti attho.
481. сам̣яож̇анам̣ж̇аад̇икаяанд̇ад̣̇ассийд̇и сам̣яож̇анагкаяанд̇ад̣̇ассий ж̇аад̇игкаяанд̇ад̣̇ассий жа. сам̣яож̇анагкаяанд̇зна жзд̇т̇а саубаад̣̇исзсаа ниб̣б̣аанад̇хаад̇у, ж̇аад̇игкаяанд̇зна анубаад̣̇исзсаа вуд̇д̇аа. каяанд̇од̇и хи ажжанд̇акаяасса самужчзд̣̇аббахаанассзд̇ам̣ ад̇хиважанам̣. анунаасигалобо жзд̇т̇а ‘‘вивзгаж̇ам̣ бийд̇исука’’нд̇иаад̣̇ийсу вияа на гад̇о. яобаануд̣̇ийд̇и яо абануд̣̇и. рааг̇абат̇анд̇и рааг̇аарамман̣ам̣, рааг̇амзва ваа. рааг̇оби хи д̣̇уг̇г̇ад̇ийнам̣ бат̇ад̇д̇аа ‘‘рааг̇абат̇о’’д̇и вужжад̇и гаммабат̇о вияа. суд̣̇д̇хо нид̣̇осо вимало агаажод̇и барисуд̣̇д̇хагааяасамаажаараад̣̇ид̇ааяа суд̣̇д̇хо. язхи ‘‘рааг̇ад̣̇осаа аяам̣ баж̇аа, д̣̇осад̣̇осаа, мохад̣̇осаа’’д̇и вужжад̇и. д̇зсам̣ абхааваа нид̣̇осо. адтабурисамалавиг̇амаа вимало, убаггилзсаабхаавад̇о агаажо. убаггилидто хи убаггилзсзна ‘‘сагаажо’’д̇и вужжад̇и. суд̣̇д̇хо ваа яасмаа нид̣̇д̣̇осо, нид̣̇д̣̇осад̇ааяа вимало, б̣аахирамалаабхаавзна вималад̇д̇аа агаажо. самало хи ‘‘сагаажо’’д̇и вужжад̇и. вималад̇д̇аа ваа ааг̇ум̣ на гарод̇и, д̇зна агаажо. ааг̇угирияаа хи убагхаад̇агаран̣ад̇о ‘‘гаажо’’д̇и вужжад̇и.
481.Saṃyojanaṃjātikhayantadassīti saṃyojanakkhayantadassī jātikkhayantadassī ca. Saṃyojanakkhayantena cettha saupādisesā nibbānadhātu, jātikkhayantena anupādisesā vuttā. Khayantoti hi accantakhayassa samucchedappahānassetaṃ adhivacanaṃ. Anunāsikalopo cettha ‘‘vivekajaṃ pītisukha’’ntiādīsu viya na kato. Yopānudīti yo apanudi. Rāgapathanti rāgārammaṇaṃ, rāgameva vā. Rāgopi hi duggatīnaṃ pathattā ‘‘rāgapatho’’ti vuccati kammapatho viya. Suddho nidoso vimalo akācoti parisuddhakāyasamācārāditāya suddho. Yehi ‘‘rāgadosā ayaṃ pajā, dosadosā, mohadosā’’ti vuccati. Tesaṃ abhāvā nidoso. Aṭṭhapurisamalavigamā vimalo, upakkilesābhāvato akāco. Upakkiliṭṭho hi upakkilesena ‘‘sakāco’’ti vuccati. Suddho vā yasmā niddoso, niddosatāya vimalo, bāhiramalābhāvena vimalattā akāco. Samalo hi ‘‘sakāco’’ti vuccati. Vimalattā vā āguṃ na karoti, tena akāco. Āgukiriyā hi upaghātakaraṇato ‘‘kāco’’ti vuccati.
482. ад̇д̇ано ад̇д̇аанам̣ наанубассад̇ийд̇и н̃аан̣асамбаяуд̇д̇зна жид̇д̇зна вибассанд̇о ад̇д̇ано канд̇хзсу ан̃н̃ам̣ ад̇д̇аанам̣ наама на бассад̇и, канд̇хамад̇д̇амзва бассад̇и. яаа жааяам̣ ‘‘ад̇д̇анаава ад̇д̇аанам̣ сан̃ж̇аанаамий’’д̇и д̇асса сажжад̇о т̇зд̇ад̇о д̣̇идти уббаж̇ж̇ад̇и, д̇ассаа абхааваа ад̇д̇ано ад̇д̇аанам̣ наанубассад̇и, ан̃н̃ад̣̇ад̇т̇у бан̃н̃ааяа канд̇хз бассад̇и. маг̇г̇асамаад̇хинаа самаахид̇о, гааяаван̇гаад̣̇ийнам̣ абхааваа уж̇ж̇уг̇ад̇о, логад̇хаммзхи агамбанийяад̇о тид̇ад̇д̇о, д̇ан̣хаасан̇каад̇ааяа зж̇ааяа бан̃жаннам̣ жзд̇окилаанан̃жа адтадтаанааяа ган̇кааяа жа абхааваа анзж̇о акило аган̇ко.
482.Attano attānaṃ nānupassatīti ñāṇasampayuttena cittena vipassanto attano khandhesu aññaṃ attānaṃ nāma na passati, khandhamattameva passati. Yā cāyaṃ ‘‘attanāva attānaṃ sañjānāmī’’ti tassa saccato thetato diṭṭhi uppajjati, tassā abhāvā attano attānaṃ nānupassati, aññadatthu paññāya khandhe passati. Maggasamādhinā samāhito, kāyavaṅkādīnaṃ abhāvā ujjugato, lokadhammehi akampanīyato ṭhitatto, taṇhāsaṅkhātāya ejāya pañcannaṃ cetokhilānañca aṭṭhaṭṭhānāya kaṅkhāya ca abhāvā anejo akhilo akaṅkho.
483. моханд̇араад̇и мохагааран̣аа мохабажжаяаа, саб̣б̣агилзсаанамзд̇ам̣ ад̇хиважанам̣. саб̣б̣зсу д̇хаммзсу жа н̃аан̣ад̣̇ассийд̇и сажчигад̇асаб̣б̣ан̃н̃уд̇ан̃н̃аан̣о. д̇ан̃хи саб̣б̣зсу д̇хаммзсу н̃аан̣ам̣, д̇ан̃жа бхаг̇аваа басси, ‘‘ад̇хиг̇ад̇ам̣ мз’’д̇и сажчигад̇ваа вихааси. д̇зна вужжад̇и ‘‘саб̣б̣зсу д̇хаммзсу жа н̃аан̣ад̣̇ассий’’д̇и. самб̣од̇хинд̇и арахад̇д̇ам̣. ануд̇д̇аранд̇и бажжзгаб̣уд̣̇д̇хасаавагзхи асаад̇хааран̣ам̣. сиванд̇и кзмам̣ нирубад̣̇д̣̇авам̣ сассиригам̣ ваа. яагкассаад̇и бурисасса. суд̣̇д̇хийд̇и вод̣̇аанад̇аа. зд̇т̇а хи моханд̇араабхаавзна саб̣б̣ад̣̇осаабхааво, д̇зна сам̣саарагааран̣асамужчзд̣̇о анд̇имасарийрад̇хаарид̇аа, н̃аан̣ад̣̇ассид̇ааяа саб̣б̣аг̇ун̣асамбхаво. д̇зна ануд̇д̇араа самб̣од̇хибад̇д̇и, ид̇о баран̃жа бахаад̇аб̣б̣амад̇хиг̇анд̇аб̣б̣ам̣ ваа над̇т̇и. д̇знааха – ‘‘зд̇д̇аавад̇аа яагкасса суд̣̇д̇хий’’д̇и.
483.Mohantarāti mohakāraṇā mohapaccayā, sabbakilesānametaṃ adhivacanaṃ. Sabbesu dhammesu ca ñāṇadassīti sacchikatasabbaññutaññāṇo. Tañhi sabbesu dhammesu ñāṇaṃ, tañca bhagavā passi, ‘‘adhigataṃ me’’ti sacchikatvā vihāsi. Tena vuccati ‘‘sabbesu dhammesu ca ñāṇadassī’’ti. Sambodhinti arahattaṃ. Anuttaranti paccekabuddhasāvakehi asādhāraṇaṃ. Sivanti khemaṃ nirupaddavaṃ sassirikaṃ vā. Yakkhassāti purisassa. Suddhīti vodānatā. Ettha hi mohantarābhāvena sabbadosābhāvo, tena saṃsārakāraṇasamucchedo antimasarīradhāritā, ñāṇadassitāya sabbaguṇasambhavo. Tena anuttarā sambodhipatti, ito parañca pahātabbamadhigantabbaṃ vā natthi. Tenāha – ‘‘ettāvatā yakkhassa suddhī’’ti.
484. звам̣ вуд̇д̇з б̣раахман̣о бхияяосомад̇д̇ааяа бхаг̇авад̇и басанно басаннаагаарам̣ гаронд̇о ааха ‘‘худ̇ан̃жа маяха’’нд̇и. д̇ассад̇т̇о – яамахам̣ ид̇о буб̣б̣з б̣рахмаанам̣ аараб̣бха аг̇г̇имхи аж̇ухам̣, д̇ам̣ мз худ̇ам̣ сажжам̣ ваа ход̇и, алигам̣ ваад̇и на ж̇аанаами. аж̇ж̇а бана ид̣̇ам̣ худ̇ан̃жа маяхам̣ худ̇амад̇т̇у сажжам̣, сажжахуд̇амзва ад̇т̇ууд̇и яаажанд̇о бхан̣ад̇и. яам̣ д̇аад̣̇исам̣ взд̣̇аг̇унам̣ алад̇т̇ам̣, яасмаа ид̇хзва тид̇о бхаванд̇аруубам̣ взд̣̇аг̇ум̣ алад̇т̇ам̣. б̣рахмаа хи сагки, бажжагкамзва хи д̇вам̣ б̣рахмаа, яад̇о бадиг̇г̇ан̣хаад̇у мз бхаг̇аваа, бадиг̇г̇ахзд̇ваа жа бхун̃ж̇ад̇у мз бхаг̇аваа буурал̣аасанд̇и д̇ам̣ хаб̣яасзсам̣ убанаамзнд̇о ааха.
484. Evaṃ vutte brāhmaṇo bhiyyosomattāya bhagavati pasanno pasannākāraṃ karonto āha ‘‘hutañca mayha’’nti. Tassattho – yamahaṃ ito pubbe brahmānaṃ ārabbha aggimhi ajuhaṃ, taṃ me hutaṃ saccaṃ vā hoti, alikaṃ vāti na jānāmi. Ajja pana idaṃ hutañca mayhaṃ hutamatthu saccaṃ, saccahutameva atthūti yācanto bhaṇati. Yaṃ tādisaṃ vedagunaṃ alatthaṃ, yasmā idheva ṭhito bhavantarūpaṃ vedaguṃ alatthaṃ. Brahmā hi sakkhi, paccakkhameva hi tvaṃ brahmā, yato paṭiggaṇhātu me bhagavā, paṭiggahetvā ca bhuñjatu me bhagavā pūraḷāsanti taṃ habyasesaṃ upanāmento āha.
487. ат̇а бхаг̇аваа гасибхаарад̣̇вааж̇асуд̇д̇з вуд̇д̇анаязна г̇аат̇аад̣̇ваяамабхааси. д̇ад̇о б̣раахман̣о ‘‘аяам̣ ад̇д̇анаа на ижчад̇и, гамби жан̃н̃ам̣ санд̇хааяа ‘гзвалинам̣ махзсим̣ кийн̣аасавам̣ гуггужжавуубасанд̇ам̣ аннзна баанзна убадтахассуу’д̇и бхан̣ад̇ий’’д̇и звам̣ г̇аат̇ааяа ад̇т̇ам̣ асаллагкзд̇ваа д̇ам̣ н̃аад̇угаамо ааха ‘‘саад̇хаахам̣ бхаг̇аваа’’д̇и. д̇ад̇т̇а саад̇хууд̇и ааяаажанад̇т̇з нибаад̇о. д̇ат̇аад̇и язна д̇вамааха, д̇зна багаарзна. виж̇ан̃н̃анд̇и ж̇аанзяяам̣. яанд̇и яам̣ д̣̇агкин̣зяяам̣ яан̃н̃агаалз бариязсамаано убадтахзяяанд̇и баатасзсо. баббуяяаад̇и бад̇ваа. д̇ава саасананд̇и д̇ава оваад̣̇ам̣. ид̣̇ам̣ вуд̇д̇ам̣ ход̇и. саад̇хаахам̣ бхаг̇аваа д̇ава оваад̣̇ам̣ ааг̇амма д̇ат̇аа виж̇ан̃н̃ам̣ аарожзхи мз д̇ам̣ гзвалинанд̇и ад̇хиббааяо. яо д̣̇агкин̣ам̣ бхун̃ж̇зяяа маад̣̇исасса, яам̣ жаахам̣ яан̃н̃агаалз бариязсамаано убадтахзяяам̣, д̇ат̇ааруубам̣ мз д̣̇агкин̣зяяам̣ д̣̇ассзхи, сажз д̇вам̣ на бхун̃ж̇асийд̇и.
487. Atha bhagavā kasibhāradvājasutte vuttanayena gāthādvayamabhāsi. Tato brāhmaṇo ‘‘ayaṃ attanā na icchati, kampi caññaṃ sandhāya ‘kevalinaṃ mahesiṃ khīṇāsavaṃ kukkuccavūpasantaṃ annena pānena upaṭṭhahassū’ti bhaṇatī’’ti evaṃ gāthāya atthaṃ asallakkhetvā taṃ ñātukāmo āha ‘‘sādhāhaṃ bhagavā’’ti. Tattha sādhūti āyācanatthe nipāto. Tathāti yena tvamāha, tena pakārena. Vijaññanti jāneyyaṃ. Yanti yaṃ dakkhiṇeyyaṃ yaññakāle pariyesamāno upaṭṭhaheyyanti pāṭhaseso. Pappuyyāti patvā. Tava sāsananti tava ovādaṃ. Idaṃ vuttaṃ hoti. Sādhāhaṃ bhagavā tava ovādaṃ āgamma tathā vijaññaṃ ārocehi me taṃ kevalinanti adhippāyo. Yo dakkhiṇaṃ bhuñjeyya mādisassa, yaṃ cāhaṃ yaññakāle pariyesamāno upaṭṭhaheyyaṃ, tathārūpaṃ me dakkhiṇeyyaṃ dassehi, sace tvaṃ na bhuñjasīti.
488-90. ат̇асса бхаг̇аваа баагадзна наязна д̇ат̇ааруубам̣ д̣̇агкин̣зяяам̣ д̣̇ассзнд̇о ‘‘саарамбхаа яассаа’’д̇и г̇аат̇аад̇д̇аяамааха. д̇ад̇т̇а сийманд̇аанам̣ винзд̇ааранд̇и сиймаад̇и марияаад̣̇аа саад̇хуж̇анавуд̇д̇и, д̇ассаа анд̇аа барияосаанаа абарабхааг̇аад̇и гад̇ваа сийманд̇аа вужжанд̇и гилзсаа, д̇зсам̣ винзд̇ааранд̇и ад̇т̇о. сийманд̇аад̇и б̣уд̣̇д̇хавзнзяяаа сзгкаа жа бут̇уж̇ж̇анаа жа, д̇зсам̣ винзд̇ааранд̇иби згз. ж̇аад̇имаран̣аговид̣̇анд̇и ‘‘звам̣ ж̇аад̇и звам̣ маран̣а’’нд̇и зд̇т̇а гусалам̣. монзяяасамбаннанд̇и бан̃н̃аасамбаннам̣, гааяамонзяяаад̣̇исамбаннам̣ ваа. бхагудим̣ винаяид̇ваанаад̇и яам̣ згажжз д̣̇уб̣б̣уд̣̇д̇хино яаажагам̣ д̣̇исваа бхагудим̣ гаронд̇и, д̇ам̣ винаяид̇ваа, басаннамукаа худ̇ваад̇и ад̇т̇о. бан̃ж̇алигаад̇и баг̇г̇ахид̇аан̃ж̇алино худ̇ваа.
488-90. Athassa bhagavā pākaṭena nayena tathārūpaṃ dakkhiṇeyyaṃ dassento ‘‘sārambhā yassā’’ti gāthāttayamāha. Tattha sīmantānaṃ vinetāranti sīmāti mariyādā sādhujanavutti, tassā antā pariyosānā aparabhāgāti katvā sīmantā vuccanti kilesā, tesaṃ vinetāranti attho. Sīmantāti buddhaveneyyā sekkhā ca puthujjanā ca, tesaṃ vinetārantipi eke. Jātimaraṇakovidanti ‘‘evaṃ jāti evaṃ maraṇa’’nti ettha kusalaṃ. Moneyyasampannanti paññāsampannaṃ, kāyamoneyyādisampannaṃ vā. Bhakuṭiṃ vinayitvānāti yaṃ ekacce dubbuddhino yācakaṃ disvā bhakuṭiṃ karonti, taṃ vinayitvā, pasannamukhā hutvāti attho. Pañjalikāti paggahitaañjalino hutvā.
491. ат̇а б̣раахман̣о бхаг̇аванд̇ам̣ т̇омаяамаано ‘‘б̣уд̣̇д̇хо бхава’’нд̇и г̇аат̇амааха. д̇ад̇т̇а ааяааг̇од̇и ааяаж̇ид̇аб̣б̣о, д̇ад̇о д̇ад̇о ааг̇амма ваа яаж̇ид̇аб̣б̣амзд̇т̇аад̇иби ааяааг̇о, д̣̇зяяад̇хаммаанам̣ ад̇хидтаанабхууд̇од̇и вуд̇д̇ам̣ ход̇и . сзсамзд̇т̇а ид̇о буримаг̇аат̇аасу жа яам̣ на ван̣н̣ид̇ам̣, д̇ам̣ саггаа аван̣н̣ид̇амби ж̇аанид̇унд̇и уд̇д̇аанад̇т̇ад̇д̇ааязва на ван̣н̣ид̇ам̣. ид̇о барам̣ бана гасибхаарад̣̇вааж̇асуд̇д̇з вуд̇д̇анаяамзваад̇и.
491. Atha brāhmaṇo bhagavantaṃ thomayamāno ‘‘buddho bhava’’nti gāthamāha. Tattha āyāgoti āyajitabbo, tato tato āgamma vā yajitabbametthātipi āyāgo, deyyadhammānaṃ adhiṭṭhānabhūtoti vuttaṃ hoti . Sesamettha ito purimagāthāsu ca yaṃ na vaṇṇitaṃ, taṃ sakkā avaṇṇitampi jānitunti uttānatthattāyeva na vaṇṇitaṃ. Ito paraṃ pana kasibhāradvājasutte vuttanayamevāti.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа буурал̣аасасуд̇д̇аван̣н̣анаа нидтид̇аа.
Suttanipāta-aṭṭhakathāya pūraḷāsasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 4. сунд̣̇аригабхаарад̣̇вааж̇асуд̇д̇ам̣ • 4. Sundarikabhāradvājasuttaṃ
