| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
4. புராணசீவரஸிக்கா²பத³ங்
4. Purāṇacīvarasikkhāpadaṃ
503. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மதோ உதா³யிஸ்ஸ புராணது³தியிகா பி⁴க்கு²னீஸு பப்³ப³ஜிதா ஹோதி. ஸா ஆயஸ்மதோ உதா³யிஸ்ஸ ஸந்திகே அபி⁴க்க²ணங் ஆக³ச்ச²தி. ஆயஸ்மாபி உதா³யீ தஸ்ஸா பி⁴க்கு²னியா ஸந்திகே அபி⁴க்க²ணங் க³ச்ச²தி. தேன கோ² பன ஸமயேன ஆயஸ்மா உதா³யீ தஸ்ஸா பி⁴க்கு²னியா ஸந்திகே ப⁴த்தவிஸ்ஸக்³க³ங் கரோதி. அத² கோ² ஆயஸ்மா உதா³யீ புப்³ப³ண்ஹஸமயங் நிவாஸெத்வா பத்தசீவரமாதா³ய யேன ஸா பி⁴க்கு²னீ தேனுபஸங்கமி; உபஸங்கமித்வா தஸ்ஸா பி⁴க்கு²னியா புரதோ அங்க³ஜாதங் விவரித்வா ஆஸனே நிஸீதி³. ஸாபி கோ² பி⁴க்கு²னீ ஆயஸ்மதோ உதா³யிஸ்ஸ புரதோ அங்க³ஜாதங் விவரித்வா ஆஸனே நிஸீதி³. அத² கோ² ஆயஸ்மா உதா³யீ ஸாரத்தோ தஸ்ஸா பி⁴க்கு²னியா அங்க³ஜாதங் உபனிஜ்ஜா²யி. தஸ்ஸ அஸுசி முச்சி. அத² கோ² ஆயஸ்மா உதா³யீ தங் பி⁴க்கு²னிங் ஏதத³வோச – ‘‘க³ச்ச², ப⁴கி³னி, உத³கங் ஆஹர, அந்தரவாஸகங் தோ⁴விஸ்ஸாமீ’’தி. ‘‘ஆஹரய்ய , அஹமேவ தோ⁴விஸ்ஸாமீ’’தி தங் அஸுசிங் ஏகதே³ஸங் முகே²ன அக்³க³ஹேஸி ஏகதே³ஸங் அங்க³ஜாதே பக்கி²பி. ஸா தேன க³ப்³ப⁴ங் க³ண்ஹி. பி⁴க்கு²னியோ ஏவமாஹங்ஸு – ‘‘அப்³ரஹ்மசாரினீ அயங் பி⁴க்கு²னீ, க³ப்³பி⁴னீ’’தி. ‘‘நாஹங், அய்யே, அப்³ரஹ்மசாரினீ’’தி பி⁴க்கு²னீனங் ஏதமத்த²ங் ஆரோசேஸி. பி⁴க்கு²னியோ உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யோ உதா³யீ பி⁴க்கு²னியா புராணசீவரங் தோ⁴வாபெஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ பி⁴க்கு²னியா புராணசீவரங் தோ⁴வாபெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உதா³யி, பி⁴க்கு²னியா புராணசீவரங் தோ⁴வாபேஸீ’’தி? ‘‘ஸச்சங், ப⁴க³வா’’தி. ‘‘ஞாதிகா தே, உதா³யி, அஞ்ஞாதிகா’’தி? ‘‘அஞ்ஞாதிகா, ப⁴க³வா’’தி. ‘‘அஞ்ஞாதகோ, மோக⁴புரிஸ, அஞ்ஞாதிகாய ந ஜானாதி பதிரூபங் வா அப்பதிரூபங் வா பாஸாதி³கங் வா அபாஸாதி³கங் வா. தத்த² நாம த்வங், மோக⁴புரிஸ, அஞ்ஞாதிகாய பி⁴க்கு²னியா புராணசீவரங் தோ⁴வாபெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
503. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmato udāyissa purāṇadutiyikā bhikkhunīsu pabbajitā hoti. Sā āyasmato udāyissa santike abhikkhaṇaṃ āgacchati. Āyasmāpi udāyī tassā bhikkhuniyā santike abhikkhaṇaṃ gacchati. Tena kho pana samayena āyasmā udāyī tassā bhikkhuniyā santike bhattavissaggaṃ karoti. Atha kho āyasmā udāyī pubbaṇhasamayaṃ nivāsetvā pattacīvaramādāya yena sā bhikkhunī tenupasaṅkami; upasaṅkamitvā tassā bhikkhuniyā purato aṅgajātaṃ vivaritvā āsane nisīdi. Sāpi kho bhikkhunī āyasmato udāyissa purato aṅgajātaṃ vivaritvā āsane nisīdi. Atha kho āyasmā udāyī sāratto tassā bhikkhuniyā aṅgajātaṃ upanijjhāyi. Tassa asuci mucci. Atha kho āyasmā udāyī taṃ bhikkhuniṃ etadavoca – ‘‘gaccha, bhagini, udakaṃ āhara, antaravāsakaṃ dhovissāmī’’ti. ‘‘Āharayya , ahameva dhovissāmī’’ti taṃ asuciṃ ekadesaṃ mukhena aggahesi ekadesaṃ aṅgajāte pakkhipi. Sā tena gabbhaṃ gaṇhi. Bhikkhuniyo evamāhaṃsu – ‘‘abrahmacārinī ayaṃ bhikkhunī, gabbhinī’’ti. ‘‘Nāhaṃ, ayye, abrahmacārinī’’ti bhikkhunīnaṃ etamatthaṃ ārocesi. Bhikkhuniyo ujjhāyanti khiyyanti vipācenti – ‘‘kathañhi nāma ayyo udāyī bhikkhuniyā purāṇacīvaraṃ dhovāpessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī bhikkhuniyā purāṇacīvaraṃ dhovāpessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, bhikkhuniyā purāṇacīvaraṃ dhovāpesī’’ti? ‘‘Saccaṃ, bhagavā’’ti. ‘‘Ñātikā te, udāyi, aññātikā’’ti? ‘‘Aññātikā, bhagavā’’ti. ‘‘Aññātako, moghapurisa, aññātikāya na jānāti patirūpaṃ vā appatirūpaṃ vā pāsādikaṃ vā apāsādikaṃ vā. Tattha nāma tvaṃ, moghapurisa, aññātikāya bhikkhuniyā purāṇacīvaraṃ dhovāpessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
504. ‘‘யோ பன பி⁴க்கு² அஞ்ஞாதிகாய பி⁴க்கு²னியா புராணசீவரங் தோ⁴வாபெய்ய வா ரஜாபெய்ய வா ஆகோடாபெய்ய வா, நிஸ்ஸக்³கி³யங் பாசித்திய’’ந்தி.
504.‘‘Yopana bhikkhu aññātikāya bhikkhuniyā purāṇacīvaraṃ dhovāpeyya vā rajāpeyya vā ākoṭāpeyya vā, nissaggiyaṃ pācittiya’’nti.
505. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
505.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
அஞ்ஞாதிகா நாம மாதிதோ வா பிதிதோ வா யாவ ஸத்தமா பிதாமஹயுகா³ அஸம்ப³த்³தா⁴.
Aññātikā nāma mātito vā pitito vā yāva sattamā pitāmahayugā asambaddhā.
பி⁴க்கு²னீ நாம உப⁴தோஸங்கே⁴ உபஸம்பன்னா.
Bhikkhunī nāma ubhatosaṅghe upasampannā.
புராணசீவரங் நாம ஸகிங் நிவத்த²ம்பி ஸகிங் பாருதம்பி.
Purāṇacīvaraṃ nāma sakiṃ nivatthampi sakiṃ pārutampi.
தோ⁴வாதி ஆணாபேதி, ஆபத்தி து³க்கடஸ்ஸ. தோ⁴தங் நிஸ்ஸக்³கி³யங் ஹோதி. ரஜாதி ஆணாபேதி, ஆபத்தி து³க்கடஸ்ஸ. ரத்தங் நிஸ்ஸக்³கி³யங் ஹோதி. ஆகோடேஹீதி ஆணாபேதி, ஆபத்தி து³க்கடஸ்ஸ. ஸகிங் பாணிப்பஹாரங் வா முக்³க³ரப்பஹாரங் வா தி³ன்னே நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, புராணசீவரங் அஞ்ஞாதிகாய பி⁴க்கு²னியா தோ⁴வாபிதங் நிஸ்ஸக்³கி³யங். இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Dhovāti āṇāpeti, āpatti dukkaṭassa. Dhotaṃ nissaggiyaṃ hoti. Rajāti āṇāpeti, āpatti dukkaṭassa. Rattaṃ nissaggiyaṃ hoti. Ākoṭehīti āṇāpeti, āpatti dukkaṭassa. Sakiṃ pāṇippahāraṃ vā muggarappahāraṃ vā dinne nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, purāṇacīvaraṃ aññātikāya bhikkhuniyā dhovāpitaṃ nissaggiyaṃ. Imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
506. அஞ்ஞாதிகாய அஞ்ஞாதிகஸஞ்ஞீ புராணசீவரங் தோ⁴வாபேதி, நிஸ்ஸக்³கி³யங் பாசித்தியங். அஞ்ஞாதிகாய அஞ்ஞாதிகஸஞ்ஞீ புராணசீவரங் தோ⁴வாபேதி ரஜாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் தோ⁴வாபேதி ஆகோடாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் தோ⁴வாபேதி ரஜாபேதி ஆகோடாபேதி, நிஸ்ஸக்³கி³யேன ஆபத்தி த்³வின்னங் து³க்கடானங்.
506. Aññātikāya aññātikasaññī purāṇacīvaraṃ dhovāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ dhovāpeti rajāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ dhovāpeti ākoṭāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ dhovāpeti rajāpeti ākoṭāpeti, nissaggiyena āpatti dvinnaṃ dukkaṭānaṃ.
அஞ்ஞாதிகாய அஞ்ஞாதிகஸஞ்ஞீ புராணசீவரங் ரஜாபேதி, நிஸ்ஸக்³கி³யங் பாசித்தியங். அஞ்ஞாதிகாய அஞ்ஞாதிகஸஞ்ஞீ புராணசீவரங் ரஜாபேதி ஆகோடாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் ரஜாபேதி தோ⁴வாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் ரஜாபேதி ஆகோடாபேதி தோ⁴வாபேதி, நிஸ்ஸக்³கி³யேன ஆபத்தி த்³வின்னங் து³க்கடானங்.
Aññātikāya aññātikasaññī purāṇacīvaraṃ rajāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ rajāpeti ākoṭāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ rajāpeti dhovāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ rajāpeti ākoṭāpeti dhovāpeti, nissaggiyena āpatti dvinnaṃ dukkaṭānaṃ.
அஞ்ஞாதிகாய அஞ்ஞாதிகஸஞ்ஞீ புராணசீவரங் ஆகோடாபேதி, நிஸ்ஸக்³கி³யங் பாசித்தியங். அஞ்ஞாதிகாய அஞ்ஞாதிகஸஞ்ஞீ புராணசீவரங் ஆகோடாபேதி தோ⁴வாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் ஆகோடாபேதி ரஜாபேதி, நிஸ்ஸக்³கி³யேன ஆபத்தி து³க்கடஸ்ஸ. அஞ்ஞாதிகாய அஞ்ஞாதிகஸஞ்ஞீ புராணசீவரங் ஆகோடாபேதி தோ⁴வாபேதி ரஜாபேதி, நிஸ்ஸக்³கி³யேன ஆபத்தி த்³வின்னங் து³க்கடானங்.
Aññātikāya aññātikasaññī purāṇacīvaraṃ ākoṭāpeti, nissaggiyaṃ pācittiyaṃ. Aññātikāya aññātikasaññī purāṇacīvaraṃ ākoṭāpeti dhovāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ ākoṭāpeti rajāpeti, nissaggiyena āpatti dukkaṭassa. Aññātikāya aññātikasaññī purāṇacīvaraṃ ākoṭāpeti dhovāpeti rajāpeti, nissaggiyena āpatti dvinnaṃ dukkaṭānaṃ.
அஞ்ஞாதிகாய வேமதிகோ…பே॰… அஞ்ஞாதிகாய ஞாதிகஸஞ்ஞீ…பே॰… அஞ்ஞஸ்ஸ புராணசீவரங் தோ⁴வாபேதி, ஆபத்தி து³க்கடஸ்ஸ. நிஸீத³னபச்சத்த²ரணங் தோ⁴வாபேதி, ஆபத்தி து³க்கடஸ்ஸ. ஏகதோஉபஸம்பன்னாய தோ⁴வாபேதி, ஆபத்தி து³க்கடஸ்ஸ. ஞாதிகாய அஞ்ஞாதிகஸஞ்ஞீ, ஆபத்தி து³க்கடஸ்ஸ . ஞாதிகாய வேமதிகோ, ஆபத்தி து³க்கடஸ்ஸ. ஞாதிகாய ஞாதிகஸஞ்ஞீ, அனாபத்தி.
Aññātikāya vematiko…pe… aññātikāya ñātikasaññī…pe… aññassa purāṇacīvaraṃ dhovāpeti, āpatti dukkaṭassa. Nisīdanapaccattharaṇaṃ dhovāpeti, āpatti dukkaṭassa. Ekatoupasampannāya dhovāpeti, āpatti dukkaṭassa. Ñātikāya aññātikasaññī, āpatti dukkaṭassa . Ñātikāya vematiko, āpatti dukkaṭassa. Ñātikāya ñātikasaññī, anāpatti.
507. அனாபத்தி ஞாதிகாய தோ⁴வந்தியா அஞ்ஞாதிகா து³தியா ஹோதி, அவுத்தா தோ⁴வதி, அபரிபு⁴த்தங் தோ⁴வாபேதி, சீவரங் ட²பெத்வா அஞ்ஞங் பரிக்கா²ரங் தோ⁴வாபேதி, ஸிக்க²மானாய, ஸாமணேரியா, உம்மத்தகஸ்ஸ, ஆதி³கம்மிகஸ்ஸாதி.
507. Anāpatti ñātikāya dhovantiyā aññātikā dutiyā hoti, avuttā dhovati, aparibhuttaṃ dhovāpeti, cīvaraṃ ṭhapetvā aññaṃ parikkhāraṃ dhovāpeti, sikkhamānāya, sāmaṇeriyā, ummattakassa, ādikammikassāti.
புராணசீவரஸிக்கா²பத³ங் நிட்டி²தங் சதுத்த²ங்.
Purāṇacīvarasikkhāpadaṃ niṭṭhitaṃ catutthaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
