| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
4. புராணசீவரஸிக்கா²பத³வண்ணனா
4. Purāṇacīvarasikkhāpadavaṇṇanā
503-5. தேன ஸமயேனாதி புராணசீவரஸிக்கா²பத³ங். தத்த² யாவ ஸத்தமா பிதாமஹயுகா³தி பிதுபிதா பிதாமஹோ, பிதாமஹஸ்ஸ யுக³ங் பிதாமஹயுக³ங். யுக³ந்தி ஆயுப்பமாணங் வுச்சதி. அபி⁴லாப மத்தமேவ சேதங். அத்த²தோ பன பிதாமஹோயேவ பிதாமஹயுக³ங். ததோ உத்³த⁴ங் ஸப்³பே³பி புப்³ப³புரிஸா பிதாமஹக்³க³ஹணேனேவ க³ஹிதா. ஏவங் யாவ ஸத்தமோ புரிஸோ தாவ யா அஸம்ப³த்³தா⁴ ஸா யாவ ஸத்தமா பிதாமஹயுகா³ அஸம்ப³த்³தா⁴தி வுச்சதி. தே³ஸனாமுக²மேவ சேதங். ‘‘மாதிதோ வா பிதிதோ வா’’திவசனதோ பன பிதாமஹயுக³ம்பி பிதாமஹியுக³ம்பி மாதாமஹயுக³ம்பி மாதாமஹியுக³ம்பி தேஸங் பா⁴துப⁴கி³னீபா⁴கி³னெய்யபுத்தபபுத்தாத³யோபி ஸப்³பே³ இத⁴ ஸங்க³ஹிதா ஏவாதி வேதி³தப்³பா³.
503-5.Tena samayenāti purāṇacīvarasikkhāpadaṃ. Tattha yāva sattamā pitāmahayugāti pitupitā pitāmaho, pitāmahassa yugaṃ pitāmahayugaṃ. Yuganti āyuppamāṇaṃ vuccati. Abhilāpa mattameva cetaṃ. Atthato pana pitāmahoyeva pitāmahayugaṃ. Tato uddhaṃ sabbepi pubbapurisā pitāmahaggahaṇeneva gahitā. Evaṃ yāva sattamo puriso tāva yā asambaddhā sā yāva sattamā pitāmahayugā asambaddhāti vuccati. Desanāmukhameva cetaṃ. ‘‘Mātito vā pitito vā’’tivacanato pana pitāmahayugampi pitāmahiyugampi mātāmahayugampi mātāmahiyugampi tesaṃ bhātubhaginībhāgineyyaputtapaputtādayopi sabbe idha saṅgahitā evāti veditabbā.
தத்ராயங் வித்தா²ரனயோ – பிதா பிதுபிதா தஸ்ஸ பிதா தஸ்ஸாபி பிதாதி ஏவங் யாவ ஸத்தமா யுகா³, பிதா பிதுமாதா தஸ்ஸா பிதா ச மாதா ச பா⁴தா ச ப⁴கி³னீ ச புத்தா ச தீ⁴தரோ சாதி ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, பிதா பிதுபா⁴தா பிதுப⁴கி³னீ பிதுபுத்தா பிதுதீ⁴தரோ தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, மாதா மாதுமாதா தஸ்ஸா மாதா தஸ்ஸாபி மாதாதி ஏவம்பி யாவ ஸத்தமா யுகா³, மாதா மாதுபிதா தஸ்ஸ மாதா ச பிதா ச பா⁴தா ச ப⁴கி³னீ ச புத்தா ச தீ⁴தரோ சாதி, ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, மாதா மாதுபா⁴தா மாதுப⁴கி³னீ மாதுபுத்தா மாதுதீ⁴தரோ தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, நேவ மாதுஸம்ப³ந்தே⁴ன ந பிதுஸம்ப³ந்தே⁴ன ஸம்ப³த்³தா⁴, அயங் அஞ்ஞாதிகா நாம.
Tatrāyaṃ vitthāranayo – pitā pitupitā tassa pitā tassāpi pitāti evaṃ yāva sattamā yugā, pitā pitumātā tassā pitā ca mātā ca bhātā ca bhaginī ca puttā ca dhītaro cāti evampi uddhañca adho ca yāva sattamā yugā, pitā pitubhātā pitubhaginī pituputtā pitudhītaro tesampi puttadhītuparamparāti evampi yāva sattamā yugā, mātā mātumātā tassā mātā tassāpi mātāti evampi yāva sattamā yugā, mātā mātupitā tassa mātā ca pitā ca bhātā ca bhaginī ca puttā ca dhītaro cāti, evampi uddhañca adho ca yāva sattamā yugā, mātā mātubhātā mātubhaginī mātuputtā mātudhītaro tesampi puttadhītuparamparāti evampi yāva sattamā yugā, neva mātusambandhena na pitusambandhena sambaddhā, ayaṃ aññātikā nāma.
உப⁴தோ ஸங்கே⁴தி பி⁴க்கு²னிஸங்கே⁴ ஞத்திசதுத்தே²ன பி⁴க்கு²ஸங்கே⁴ ஞத்திசதுத்தே²னாதி அட்ட²வாசிகவினயகம்மேன உபஸம்பன்னா.
Ubhato saṅgheti bhikkhunisaṅghe ñatticatutthena bhikkhusaṅghe ñatticatutthenāti aṭṭhavācikavinayakammena upasampannā.
ஸகிங் நிவத்த²ம்பி ஸகிங் பாருதம்பீதி ரஜித்வா கப்பங் கத்வா ஏகவாரம்பி நிவத்த²ங் வா பாருதங் வா. அந்தமஸோ பரிபோ⁴க³ஸீஸேன அங்ஸே வா மத்த²கே வா கத்வா மக்³க³ங் க³தோ ஹோதி, உஸ்ஸீஸகங் வா கத்வா நிபன்னோ ஹோதி, ஏதம்பி புராணசீவரமேவ. ஸசே பன பச்சத்த²ரணஸ்ஸ ஹெட்டா² கத்வா நிபஜ்ஜதி, ஹத்தே²ஹி வா உக்கி²பித்வா ஆகாஸே விதானங் கத்வா ஸீஸேன அபு²ஸந்தோ க³ச்ச²தி, அயங் பரிபோ⁴கோ³ நாம ந ஹோதீதி குருந்தி³யங் வுத்தங்.
Sakiṃ nivatthampi sakiṃ pārutampīti rajitvā kappaṃ katvā ekavārampi nivatthaṃ vā pārutaṃ vā. Antamaso paribhogasīsena aṃse vā matthake vā katvā maggaṃ gato hoti, ussīsakaṃ vā katvā nipanno hoti, etampi purāṇacīvarameva. Sace pana paccattharaṇassa heṭṭhā katvā nipajjati, hatthehi vā ukkhipitvā ākāse vitānaṃ katvā sīsena aphusanto gacchati, ayaṃ paribhogo nāma na hotīti kurundiyaṃ vuttaṃ.
தோ⁴தங் நிஸ்ஸக்³கி³யந்தி எத்த² ஏவங் ஆணத்தா பி⁴க்கு²னீ தோ⁴வனத்தா²ய உத்³த⁴னங் ஸஜ்ஜேதி, தா³ரூனி ஸங்ஹரதி, அக்³கி³ங் கரோதி, உத³கங் ஆஹரதி யாவ நங் தோ⁴வித்வா உக்கி²பதி, தாவ பி⁴க்கு²னியா பயோகே³ பயோகே³ பி⁴க்கு²ஸ்ஸ து³க்கடங். தோ⁴வித்வா உக்கி²த்தமத்தே நிஸ்ஸக்³கி³யங் ஹோதி. ஸசே து³த்³தோ⁴தந்தி மஞ்ஞமானா புன ஸிஞ்சதி வா தோ⁴வதி வா யாவ நிட்டா²னங் ந க³ச்ச²தி தாவ பயோகே³ பயோகே³ து³க்கடங். ஏஸ நயோ ரஜனாகோடனேஸு. ரஜனதோ³ணியஞ்ஹி ரஜனங் ஆகிரித்வா யாவ ஸகிங் சீவரங் ரஜதி, ததோ புப்³பே³ யங்கிஞ்சி ரஜனத்தா²ய கரோதி, பச்சா² வா படிரஜதி, ஸப்³ப³த்த² பயோகே³ பயோகே³ பி⁴க்கு²ஸ்ஸ து³க்கடங். ஏவங் ஆகோடனேபி பயோகோ³ வேதி³தப்³போ³.
Dhotaṃ nissaggiyanti ettha evaṃ āṇattā bhikkhunī dhovanatthāya uddhanaṃ sajjeti, dārūni saṃharati, aggiṃ karoti, udakaṃ āharati yāva naṃ dhovitvā ukkhipati, tāva bhikkhuniyā payoge payoge bhikkhussa dukkaṭaṃ. Dhovitvā ukkhittamatte nissaggiyaṃ hoti. Sace duddhotanti maññamānā puna siñcati vā dhovati vā yāva niṭṭhānaṃ na gacchati tāva payoge payoge dukkaṭaṃ. Esa nayo rajanākoṭanesu. Rajanadoṇiyañhi rajanaṃ ākiritvā yāva sakiṃ cīvaraṃ rajati, tato pubbe yaṃkiñci rajanatthāya karoti, pacchā vā paṭirajati, sabbattha payoge payoge bhikkhussa dukkaṭaṃ. Evaṃ ākoṭanepi payogo veditabbo.
506. அஞ்ஞாதிகாய அஞ்ஞாதிகஸஞ்ஞீ புராணசீவரங் தோ⁴வாபேதீதி நோ சேபி ‘‘இமங் தோ⁴வா’’தி வத³தி, அத² கோ² தோ⁴வனத்தா²ய காயவிகாரங் கத்வா ஹத்தே²ன வா ஹத்தே² தே³தி, பாத³மூலே வா ட²பேதி, உபரி வா கி²பதி, ஸிக்க²மானாஸாமணேரீஸாமணேரஉபாஸகதித்தி²யாதீ³னங் வா ஹத்தே² பேஸேதி, நதீ³தித்தே² தோ⁴வந்தியா உபசாரே வா கி²பதி, அந்தொத்³வாத³ஸஹத்தே² ஓகாஸே ட²த்வா, தோ⁴வாபிதங்யேவ ஹோதி. ஸசே பன உபசாரங் முஞ்சித்வா ஓரதோ ட²பேதி ஸா சே தோ⁴வித்வா ஆனேதி, அனாபத்தி. ஸிக்க²மானாய வா ஸாமணேரியா வா உபாஸிகாய வா ஹத்தே² தோ⁴வனத்தா²ய தே³தி, ஸா சே உபஸம்பஜ்ஜித்வா தோ⁴வதி, ஆபத்தியேவ. உபாஸகஸ்ஸ ஹத்தே² தே³தி, ஸோ சே லிங்கே³ பரிவத்தே பி⁴க்கு²னீஸு பப்³ப³ஜித்வா உபஸம்பஜ்ஜித்வா தோ⁴வதி , ஆபத்தியேவ. ஸாமணேரஸ்ஸ வா பி⁴க்கு²ஸ்ஸ வா ஹத்தே² தி³ன்னேபி லிங்க³பரிவத்தனே ஏஸேவ நயோ.
506.Aññātikāya aññātikasaññī purāṇacīvaraṃ dhovāpetīti no cepi ‘‘imaṃ dhovā’’ti vadati, atha kho dhovanatthāya kāyavikāraṃ katvā hatthena vā hatthe deti, pādamūle vā ṭhapeti, upari vā khipati, sikkhamānāsāmaṇerīsāmaṇeraupāsakatitthiyādīnaṃ vā hatthe peseti, nadītitthe dhovantiyā upacāre vā khipati, antodvādasahatthe okāse ṭhatvā, dhovāpitaṃyeva hoti. Sace pana upacāraṃ muñcitvā orato ṭhapeti sā ce dhovitvā āneti, anāpatti. Sikkhamānāya vā sāmaṇeriyā vā upāsikāya vā hatthe dhovanatthāya deti, sā ce upasampajjitvā dhovati, āpattiyeva. Upāsakassa hatthe deti, so ce liṅge parivatte bhikkhunīsu pabbajitvā upasampajjitvā dhovati , āpattiyeva. Sāmaṇerassa vā bhikkhussa vā hatthe dinnepi liṅgaparivattane eseva nayo.
தோ⁴வாபேதி ரஜாபேதீதிஆதீ³ஸு ஏகேன வத்து²னா நிஸ்ஸக்³கி³யங், து³தியேன து³க்கடங். தீணிபி காராபெந்தஸ்ஸ ஏகேன நிஸ்ஸக்³கி³யங், ஸேஸேஹி த்³வே து³க்கடானி. யஸ்மா பனேதானி தோ⁴வனாதீ³னி படிபாடியா வா உப்படிபாடியா வா காரெந்தஸ்ஸ மொக்கோ² நத்தி², தஸ்மா எத்த² தீணி சதுக்கானி வுத்தானி. ஸசேபி ஹி ‘‘இமங் சீவரங் ரஜித்வா தோ⁴வித்வா ஆனேஹீ’’தி வுத்தே ஸா பி⁴க்கு²னீ பட²மங் தோ⁴வித்வா பச்சா² ரஜதி, நிஸ்ஸக்³கி³யேன து³க்கடமேவ. ஏவங் ஸப்³பே³ஸு விபரீதவசனேஸு நயோ நேதப்³போ³. ஸசே பன ‘‘தோ⁴வித்வா ஆனேஹீ’’தி வுத்தா தோ⁴வதி சேவ ரஜதி ச, தோ⁴வாபனபச்சயா ஏவ ஆபத்தி, ரஜனே அனாபத்தி. ஏவங் ஸப்³ப³த்த² வுத்தாதி⁴ககரணே ‘‘அவுத்தா தோ⁴வதீ’’தி இமினா லக்க²ணேன அனாபத்தி வேதி³தப்³பா³. ‘‘இமஸ்மிங் சீவரே யங் காதப்³ப³ங், ஸப்³ப³ங் தங் துய்ஹங் பா⁴ரோ’’தி வத³ந்தோ பன ஏகவாசாய ஸம்ப³ஹுலா ஆபத்தியோ ஆபஜ்ஜதீதி.
Dhovāpeti rajāpetītiādīsu ekena vatthunā nissaggiyaṃ, dutiyena dukkaṭaṃ. Tīṇipi kārāpentassa ekena nissaggiyaṃ, sesehi dve dukkaṭāni. Yasmā panetāni dhovanādīni paṭipāṭiyā vā uppaṭipāṭiyā vā kārentassa mokkho natthi, tasmā ettha tīṇi catukkāni vuttāni. Sacepi hi ‘‘imaṃ cīvaraṃ rajitvā dhovitvā ānehī’’ti vutte sā bhikkhunī paṭhamaṃ dhovitvā pacchā rajati, nissaggiyena dukkaṭameva. Evaṃ sabbesu viparītavacanesu nayo netabbo. Sace pana ‘‘dhovitvā ānehī’’ti vuttā dhovati ceva rajati ca, dhovāpanapaccayā eva āpatti, rajane anāpatti. Evaṃ sabbattha vuttādhikakaraṇe ‘‘avuttā dhovatī’’ti iminā lakkhaṇena anāpatti veditabbā. ‘‘Imasmiṃ cīvare yaṃ kātabbaṃ, sabbaṃ taṃ tuyhaṃ bhāro’’ti vadanto pana ekavācāya sambahulā āpattiyo āpajjatīti.
அஞ்ஞாதிகாய வேமதிகோ அஞ்ஞாதிகாய ஞாதிகஸஞ்ஞீதி இமானிபி பதா³னி வுத்தானங்யேவ திண்ணங் சதுக்கானங் வஸேன வித்தா²ரதோ வேதி³தப்³பா³னி.
Aññātikāya vematiko aññātikāya ñātikasaññīti imānipi padāni vuttānaṃyeva tiṇṇaṃ catukkānaṃ vasena vitthārato veditabbāni.
ஏகதோ உபஸம்பன்னாயாதி பி⁴க்கு²னீனங் ஸந்திகே உபஸம்பன்னாய தோ⁴வாபெந்தஸ்ஸ து³க்கடங். பி⁴க்கூ²னங் ஸந்திகே உபஸம்பன்னாய பன யதா²வத்து²கமேவ, பி⁴க்கூ²னங் ஸந்திகே உபஸம்பன்னா நாம பஞ்சஸதா ஸாகியானியோ.
Ekato upasampannāyāti bhikkhunīnaṃ santike upasampannāya dhovāpentassa dukkaṭaṃ. Bhikkhūnaṃ santike upasampannāya pana yathāvatthukameva, bhikkhūnaṃ santike upasampannā nāma pañcasatā sākiyāniyo.
507. அவுத்தா தோ⁴வதீதி உத்³தே³ஸாய வா ஓவாதா³ய வா ஆக³தா கிலின்னங் சீவரங் தி³ஸ்வா ட²பிதட்டா²னதோ க³ஹெத்வா வா ‘‘தே³த², அய்ய, தோ⁴விஸ்ஸாமீ’’தி ஆஹராபெத்வா வா தோ⁴வதி சேவ ரஜதி ச ஆகோடேதி ச, அயங் அவுத்தா தோ⁴வதி நாம. யாபி ‘‘இமங் சீவரங் தோ⁴வா’’தி த³ஹரங் வா ஸாமணேரங் வா ஆணாபெந்தஸ்ஸ பி⁴க்கு²னோ ஸுத்வா ‘‘ஆஹரத²ய்ய அஹங் தோ⁴விஸ்ஸாமீ’’தி தோ⁴வதி, தாவகாலிகங் வா க³ஹெத்வா தோ⁴வித்வா ரஜித்வா தே³தி, அயம்பி அவுத்தா தோ⁴வதி நாம.
507.Avuttā dhovatīti uddesāya vā ovādāya vā āgatā kilinnaṃ cīvaraṃ disvā ṭhapitaṭṭhānato gahetvā vā ‘‘detha, ayya, dhovissāmī’’ti āharāpetvā vā dhovati ceva rajati ca ākoṭeti ca, ayaṃ avuttā dhovati nāma. Yāpi ‘‘imaṃ cīvaraṃ dhovā’’ti daharaṃ vā sāmaṇeraṃ vā āṇāpentassa bhikkhuno sutvā ‘‘āharathayya ahaṃ dhovissāmī’’ti dhovati, tāvakālikaṃ vā gahetvā dhovitvā rajitvā deti, ayampi avuttā dhovati nāma.
அஞ்ஞங் பரிக்கா²ரந்தி உபாஹனத்த²விகபத்தத்த²விகஅங்ஸப³த்³த⁴ககாயப³ந்த⁴னமஞ்சபீட²பி⁴ஸிதட்டிகாதி³ங் யங்கிஞ்சி தோ⁴வாபேதி, அனாபத்தி. ஸேஸமெத்த² உத்தானத்த²மேவ.
Aññaṃ parikkhāranti upāhanatthavikapattatthavikaaṃsabaddhakakāyabandhanamañcapīṭhabhisitaṭṭikādiṃ yaṃkiñci dhovāpeti, anāpatti. Sesamettha uttānatthameva.
ஸமுட்டா²னாதீ³ஸு பன இத³ங் ஸிக்கா²பத³ங் ச²ஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Samuṭṭhānādīsu pana idaṃ sikkhāpadaṃ chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
புராணசீவரஸிக்கா²பத³வண்ணனா நிட்டி²தா.
Purāṇacīvarasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. புராணசீவரஸிக்கா²பத³ங் • 4. Purāṇacīvarasikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
