| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
4. புராணசீவரஸிக்கா²பத³வண்ணனா
4. Purāṇacīvarasikkhāpadavaṇṇanā
‘‘அம்ஹாகமேவ ஞாதீ’’தி ஞாயதீதி ஞாதி, ஸாவ ஞாதிகா, ந ஞாதிகா அஞ்ஞாதிகா, தாய அஞ்ஞாதிகாய. தேனாஹ ‘‘ந ஞாதிகாயா’’தி. மாதிதோ வா பிதிதோ வாதி மாதிபக்க²தோ வா பிதிபக்க²தோ வா. யாவ ஸத்தமங் யுக³ந்தி (பாரா॰ அட்ட²॰ 2.503-505) யாவ ஸத்தமஸ்ஸ புரிஸஸ்ஸ, ஸத்தமாய வா இத்தி²யா ஆயுப்பமாணங், யாவ பிதாமஹயுக³ங் பிதாமஹியுக³ங் மாதாமஹயுக³ங் மாதாமஹியுக³ந்தி வுத்தங் ஹோதி. அத² வா யாவ ஸத்தமங் யுக³ந்தி யாவ ஸத்தமத்³வந்த³ந்தி அத்தோ². யுக³ஸத்³தோ³ செத்த² ஏகஸேஸனயேன த³ட்ட²ப்³போ³ ‘‘யுகோ³ ச யுகோ³ ச யுகா³’’தி. ஏவஞ்ஹி தத்த² தத்த² த்³வந்த³ங் க³ஹிதங் ஹோதி. கேனசி ஆகாரேன அஸம்ப³த்³தா⁴யாதி பா⁴துப⁴கி³னிபா⁴கி³னெய்யபுத்தபபுத்தாதீ³ஸு யேன கேனசி ஆகாரேன அஸம்ப³த்³தா⁴ய. பிதா, பிதுபிதா, தஸ்ஸ பிதா, தஸ்ஸாபி பிதாதி ஏவங் யாவ ஸத்தமா யுகா³, பிதா, பிதுமாதா, தஸ்ஸா பிதா ச மாதா ச பா⁴தா ச ப⁴கி³னீ ச, புத்தா ச, தீ⁴தரோ சாதி ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, பிதா, பிதுபா⁴தா, பிதுப⁴கி³னீ, பிதுபுத்தா, பிதுதீ⁴தரோ, தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, மாதா, மாதுமாதா, தஸ்ஸா மாதா, தஸ்ஸாபி மாதாதி ஏவங் யாவ ஸத்தமா யுகா³, மாதா, மாதுபிதா, தஸ்ஸ பிதா ச மாதா ச பா⁴தா ச ப⁴கி³னீ ச புத்தா ச தீ⁴தரோ சாதி ஏவம்பி உத்³த⁴ஞ்ச அதோ⁴ ச யாவ ஸத்தமா யுகா³, மாதா, மாதுபா⁴தா, மாதுப⁴கி³னீ, மாதுபுத்தா, மாதுதீ⁴தரோ , தேஸம்பி புத்ததீ⁴துபரம்பராதி ஏவம்பி யாவ ஸத்தமா யுகா³, தாவ நேவ மாதுஸம்ப³ந்தே⁴ன, ந பிதுஸம்ப³ந்தே⁴ன யா ஸம்ப³த்³தா⁴, ஸா ‘‘அஞ்ஞாதிகா நாமா’’தி வுத்தங் ஹோதி.
‘‘Amhākameva ñātī’’ti ñāyatīti ñāti, sāva ñātikā, na ñātikā aññātikā, tāya aññātikāya. Tenāha ‘‘na ñātikāyā’’ti. Mātito vā pitito vāti mātipakkhato vā pitipakkhato vā. Yāva sattamaṃ yuganti (pārā. aṭṭha. 2.503-505) yāva sattamassa purisassa, sattamāya vā itthiyā āyuppamāṇaṃ, yāva pitāmahayugaṃ pitāmahiyugaṃ mātāmahayugaṃ mātāmahiyuganti vuttaṃ hoti. Atha vā yāva sattamaṃ yuganti yāva sattamadvandanti attho. Yugasaddo cettha ekasesanayena daṭṭhabbo ‘‘yugo ca yugo ca yugā’’ti. Evañhi tattha tattha dvandaṃ gahitaṃ hoti. Kenaci ākārena asambaddhāyāti bhātubhaginibhāgineyyaputtapaputtādīsu yena kenaci ākārena asambaddhāya. Pitā, pitupitā, tassa pitā, tassāpi pitāti evaṃ yāva sattamā yugā, pitā, pitumātā, tassā pitā ca mātā ca bhātā ca bhaginī ca, puttā ca, dhītaro cāti evampi uddhañca adho ca yāva sattamā yugā, pitā, pitubhātā, pitubhaginī, pituputtā, pitudhītaro, tesampi puttadhītuparamparāti evampi yāva sattamā yugā, mātā, mātumātā, tassā mātā, tassāpi mātāti evaṃ yāva sattamā yugā, mātā, mātupitā, tassa pitā ca mātā ca bhātā ca bhaginī ca puttā ca dhītaro cāti evampi uddhañca adho ca yāva sattamā yugā, mātā, mātubhātā, mātubhaginī, mātuputtā, mātudhītaro , tesampi puttadhītuparamparāti evampi yāva sattamā yugā, tāva neva mātusambandhena, na pitusambandhena yā sambaddhā, sā ‘‘aññātikā nāmā’’ti vuttaṃ hoti.
ஸாகியானியோ வியாதி பஞ்சஸதமத்தா ஸாகியானியோ விய. நித³ஸ்ஸனமத்தஞ்சேதங், தஸ்மா பி⁴க்கு²பா⁴வே ட²த்வா பரிவத்தலிங்கா³ பி⁴க்கு²னியோபி இத⁴ ஸுத்³த⁴பி⁴க்கு²ஸங்கே⁴ ‘‘உபஸம்பன்னா’’ இச்சேவ வேதி³தப்³பா³. உப⁴தோஸங்கே⁴ வாதி பி⁴க்கு²னிஸங்கே⁴ ஞத்திசதுத்தே²ன, பி⁴க்கு²ஸங்கே⁴ ஞத்திசதுத்தே²னாதி ஏவங் உப⁴தோஸங்கே⁴ வா. புராணசீவரந்தி எத்த² சீவரந்தி நிவாஸனபாருபனுபக³மேவ அதி⁴ப்பேதந்தி ஆஹ ‘‘ரஜித்வா’’திஆதி³. கப்பங் கத்வாதி கப்பபி³ந்து³ங் த³த்வா. ‘‘இமினா அதி³ன்னகப்பங் பாசித்தியவத்து² ந ஹோதீதி த³ஸ்ஸேதீ’’தி (ஸாரத்த²॰ டீ॰ 2.505) வத³ந்தி. பரிபோ⁴க³ஸீஸேனாதி காயேன பு²ஸித்வா பரிபோ⁴க³ஸீஸேன. அங்ஸேதி ஜத்தும்ஹி. மத்த²கேதி ஸீஸமத்த²கே. ஸசே பன பச்சத்த²ரணஸ்ஸ ஹெட்டா² கத்வா நிபஜ்ஜதி, ஹத்தே²ஹி வா உக்கி²பித்வா ஆகாஸே விதானங் கத்வா ஸீஸேன அஸம்பு²ஸந்தோ க³ச்ச²தி, அயங் பரிபோ⁴கோ³ நாம ந ஹோதி.
Sākiyāniyo viyāti pañcasatamattā sākiyāniyo viya. Nidassanamattañcetaṃ, tasmā bhikkhubhāve ṭhatvā parivattaliṅgā bhikkhuniyopi idha suddhabhikkhusaṅghe ‘‘upasampannā’’ icceva veditabbā. Ubhatosaṅghe vāti bhikkhunisaṅghe ñatticatutthena, bhikkhusaṅghe ñatticatutthenāti evaṃ ubhatosaṅghe vā. Purāṇacīvaranti ettha cīvaranti nivāsanapārupanupagameva adhippetanti āha ‘‘rajitvā’’tiādi. Kappaṃ katvāti kappabinduṃ datvā. ‘‘Iminā adinnakappaṃ pācittiyavatthu na hotīti dassetī’’ti (sārattha. ṭī. 2.505) vadanti. Paribhogasīsenāti kāyena phusitvā paribhogasīsena. Aṃseti jattumhi. Matthaketi sīsamatthake. Sace pana paccattharaṇassa heṭṭhā katvā nipajjati, hatthehi vā ukkhipitvā ākāse vitānaṃ katvā sīsena asamphusanto gacchati, ayaṃ paribhogo nāma na hoti.
காயவிகாரங் வா கரோதீதி யதா² ஸா ‘‘தோ⁴வாபேதுகாமோ அய’’ந்தி ஜானாதி, ஏவங் காயவிகாரங் கரோதி. ‘‘அந்தொத்³வாத³ஸஹத்தே² ஓகாஸே ட²த்வா உபரி வா கி²பதீ’’தி இமினா உபசாரங் முஞ்சித்வா ஓரதோ கி²பந்தஸ்ஸ அனாபத்தீதி த³ஸ்ஸேதி. அஞ்ஞஸ்ஸ வா ஹத்தே² பேஸேதீதி அந்தொத்³வாத³ஸஹத்தே² ஓகாஸே ட²த்வா ஸிக்க²மானஸாமணேரஸாமணேரிஉபாஸகஇத்தி²யாதீ³ஸு யஸ்ஸ கஸ்ஸசி அஞ்ஞஸ்ஸ ஹத்தே² வா பேஸேதி. ஸோதி உபாஸகோ ச ஸாமணேரோ ச. உபஸம்பஜ்ஜித்வா தோ⁴வதீதி எத்த² உபாஸகோ லிங்கே³ பரிவத்தே பி⁴க்கு²னீஸு பப்³ப³ஜித்வா உபஸம்பஜ்ஜித்வா தோ⁴வதி, ஸாமணேரோ லிங்கே³ பரிவத்தே பி⁴க்கு²னீஸு உபஸம்பஜ்ஜித்வா தோ⁴வதீதி யதா²யோக³ங் அத்தோ² க³ஹேதப்³போ³. ஸசே பன பி⁴க்கு²னியா ஹத்தே² தி³ன்னங் ஹோதி, ஸசே லிங்கே³ பரிவத்தே தோ⁴வதி, வட்டதி.
Kāyavikāraṃ vā karotīti yathā sā ‘‘dhovāpetukāmo aya’’nti jānāti, evaṃ kāyavikāraṃ karoti. ‘‘Antodvādasahatthe okāse ṭhatvā upari vā khipatī’’ti iminā upacāraṃ muñcitvā orato khipantassa anāpattīti dasseti. Aññassa vā hatthe pesetīti antodvādasahatthe okāse ṭhatvā sikkhamānasāmaṇerasāmaṇeriupāsakaitthiyādīsu yassa kassaci aññassa hatthe vā peseti. Soti upāsako ca sāmaṇero ca. Upasampajjitvā dhovatīti ettha upāsako liṅge parivatte bhikkhunīsu pabbajitvā upasampajjitvā dhovati, sāmaṇero liṅge parivatte bhikkhunīsu upasampajjitvā dhovatīti yathāyogaṃ attho gahetabbo. Sace pana bhikkhuniyā hatthe dinnaṃ hoti, sace liṅge parivatte dhovati, vaṭṭati.
எத்த² ச ஏகஸ்ஸ திக்க²த்துங் நிஸ்ஸஜ்ஜனாபா⁴வதோ தீணிபி காரெந்தஸ்ஸ ஏகேன நிஸ்ஸக்³கி³யங், த்³வீஹி த்³வே து³க்கடானி. த்³வே காரெந்தஸ்ஸ ஏகேன நிஸ்ஸக்³கி³யங், து³தியேன து³க்கடங். தேனாஹ ‘‘தோ⁴வனாதீ³னி தீணீ’’திஆதி³. ‘‘ஏகேன வத்து²னா’’தி பட²மங் கத்வா நிட்டா²பிதங் ஸந்தா⁴ய வுத்தங். ஸசே பன ‘‘இமங் சீவரங் ரஜித்வா தோ⁴வித்வா ஆனேஹீ’’தி வுத்தே ஸா பி⁴க்கு²னீ பட²மங் தோ⁴வித்வா பச்சா² ரஜதி, நிஸ்ஸக்³கி³யேன து³க்கடமேவ, ஏவங் ஸப்³பே³ஸு விபரீதவசனேஸு நயோ நேதப்³போ³. ஸசே பன ‘‘தோ⁴வித்வா ஆனேஹீ’’தி வுத்தா தோ⁴வதி சேவ ரஜதி ச, தோ⁴வாபனபச்சயா ஏவ ஆபத்தி, ரஜனே அனாபத்தி. ஏவங் ஸப்³ப³த்த². தேனாஹ ‘‘ஸசே பன‘தோ⁴வா’தி வுத்தா’’திஆதி³. பி⁴க்கூ²னங் வஸேன ஏகதோ உபஸம்பன்னாய தோ⁴வாபெந்தஸ்ஸ யதா²வத்து²கமேவாதி ஆஹ ‘‘பி⁴க்கு²னிஸங்க⁴வஸேனா’’திஆதி³.
Ettha ca ekassa tikkhattuṃ nissajjanābhāvato tīṇipi kārentassa ekena nissaggiyaṃ, dvīhi dve dukkaṭāni. Dve kārentassa ekena nissaggiyaṃ, dutiyena dukkaṭaṃ. Tenāha ‘‘dhovanādīni tīṇī’’tiādi. ‘‘Ekena vatthunā’’ti paṭhamaṃ katvā niṭṭhāpitaṃ sandhāya vuttaṃ. Sace pana ‘‘imaṃ cīvaraṃ rajitvā dhovitvā ānehī’’ti vutte sā bhikkhunī paṭhamaṃ dhovitvā pacchā rajati, nissaggiyena dukkaṭameva, evaṃ sabbesu viparītavacanesu nayo netabbo. Sace pana ‘‘dhovitvā ānehī’’ti vuttā dhovati ceva rajati ca, dhovāpanapaccayā eva āpatti, rajane anāpatti. Evaṃ sabbattha. Tenāha ‘‘sace pana‘dhovā’ti vuttā’’tiādi. Bhikkhūnaṃ vasena ekato upasampannāya dhovāpentassa yathāvatthukamevāti āha ‘‘bhikkhunisaṅghavasenā’’tiādi.
அஞ்ஞஸ்ஸ வா ஸந்தகந்தி அஞ்ஞஸ்ஸ ஸந்தகங் புராணசீவரங் தோ⁴வாபெந்தஸ்ஸாதி அத்தோ². நிஸீத³னபச்சத்த²ரணந்தி அஞ்ஞஸ்ஸ வா அத்தனோ வா ஸந்தகங் நிஸீத³னஞ்சேவ பச்சத்த²ரணஞ்ச. நிவாஸனபாருபனுபக³ஸ்ஸேவ ச இத⁴ ‘‘புராணசீவர’’ந்தி அதி⁴ப்பேதத்தா அத்தனோ ஸந்தகம்பி நிஸீத³னபச்சத்த²ரணங் தோ⁴வாபெந்தஸ்ஸ து³க்கடமேவ ஹோதி, ந நிஸ்ஸக்³கி³யங். அவுத்தா வா தோ⁴வதீதி உத்³தே³ஸாய வா ஓவாதா³ய வா ஆக³தா கிலிட்ட²சீவரங் தி³ஸ்வா ட²பிதட்டா²னதோ வா க³ஹெத்வா, ‘‘தே³த² அய்ய, தோ⁴விஸ்ஸாமீ’’தி ஆஹராபெத்வா வா தோ⁴வதி சேவ ரஜதி ச ஆகோடேதி ச, அயங் அவுத்தா தோ⁴வதி நாம. யாபி ‘‘இமங் சீவரங் தோ⁴வா’’தி த³ஹரங் வா ஸாமணேரங் வா ஆணாபெந்தஸ்ஸ பி⁴க்கு²னோ வசனங் ஸுத்வா ‘‘ஆஹரத²ய்ய, அஹங் தோ⁴விஸ்ஸாமீ’’தி தோ⁴வதி, தாவகாலிகங் வா க³ஹெத்வா தோ⁴வித்வா ரஜித்வா தே³தி, அயம்பி அவுத்தா தோ⁴வதி நாம.
Aññassavā santakanti aññassa santakaṃ purāṇacīvaraṃ dhovāpentassāti attho. Nisīdanapaccattharaṇanti aññassa vā attano vā santakaṃ nisīdanañceva paccattharaṇañca. Nivāsanapārupanupagasseva ca idha ‘‘purāṇacīvara’’nti adhippetattā attano santakampi nisīdanapaccattharaṇaṃ dhovāpentassa dukkaṭameva hoti, na nissaggiyaṃ. Avuttā vā dhovatīti uddesāya vā ovādāya vā āgatā kiliṭṭhacīvaraṃ disvā ṭhapitaṭṭhānato vā gahetvā, ‘‘detha ayya, dhovissāmī’’ti āharāpetvā vā dhovati ceva rajati ca ākoṭeti ca, ayaṃ avuttā dhovati nāma. Yāpi ‘‘imaṃ cīvaraṃ dhovā’’ti daharaṃ vā sāmaṇeraṃ vā āṇāpentassa bhikkhuno vacanaṃ sutvā ‘‘āharathayya, ahaṃ dhovissāmī’’ti dhovati, tāvakālikaṃ vā gahetvā dhovitvā rajitvā deti, ayampi avuttā dhovati nāma.
அஞ்ஞங் வா பரிக்கா²ரந்தி உபாஹனத்த²விகபத்தத்த²விகஅங்ஸப³த்³த⁴ககாயப³ந்த⁴னமஞ்சபீட²தட்டிகாதி³ங் யங் கிஞ்சி. ‘‘உபசாரே ட²த்வா’’தி வசனதோ பேஸித்வா தோ⁴வனேபி அனாபத்தி. உபசாரேதி அந்தொத்³வாத³ஸஹத்தே² ஓகாஸே.
Aññaṃ vā parikkhāranti upāhanatthavikapattatthavikaaṃsabaddhakakāyabandhanamañcapīṭhataṭṭikādiṃ yaṃ kiñci. ‘‘Upacāre ṭhatvā’’ti vacanato pesitvā dhovanepi anāpatti. Upacāreti antodvādasahatthe okāse.
புராணசீவரஸிக்கா²பத³வண்ணனா நிட்டி²தா.
Purāṇacīvarasikkhāpadavaṇṇanā niṭṭhitā.
