| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
4. புராணசீவரஸிக்கா²பத³வண்ணனா
4. Purāṇacīvarasikkhāpadavaṇṇanā
503. சதுத்தே² ப⁴த்தவிஸ்ஸக்³க³ந்தி பாளிபத³ஸ்ஸ ப⁴த்தகிச்சந்தி அத்தோ² வேதி³தப்³போ³, ‘‘ப⁴த்தஸங்விதா⁴ன’’ந்திபி கேசி. தத்த² நாம த்வந்தி இமஸ்ஸபி ஸோ நாம த்வந்தி அத்தோ² வேதி³தப்³போ³, ‘‘தாய நாம த்வ’’ந்தி கேசி.
503. Catutthe bhattavissagganti pāḷipadassa bhattakiccanti attho veditabbo, ‘‘bhattasaṃvidhāna’’ntipi keci. Tattha nāma tvanti imassapi so nāma tvanti attho veditabbo, ‘‘tāya nāma tva’’nti keci.
505. பிதா ச மாதா ச பிதரோ, பிதூனங் பிதரோ பிதாமஹா, தேஸங்யேவ யுகோ³ பிதாமஹயுகோ³, தஸ்மா யாவ ஸத்தமா பிதாமஹயுகா³ பிதாமஹத்³வந்தா³தி ஏவமெத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேனேவ மாதாமஹோபி க³ஹிதோதி. ‘‘யாவ ஸத்தமா பிதாமஹயுகா³’’தி வசனதோ ஹெட்டா² ச உத்³த⁴ஞ்ச அட்ட²மயுகோ³ ஞாதி நாம ந ஹோதி. தே³ஸனாமுக²மேவ சேதந்தி பிதாமஹயுகா³தி பிதாமஹ-க்³க³ஹணங் தே³ஸனாமுக²ங் பிதாமஹீமாதாமஹீஆதீ³னம்பி அதி⁴ப்பேதத்தா. பிது மாதா பிதாமஹீ. மாது பிதா மாதாமஹோ . மாது மாதா மாதாமஹீ. எத்த² கிஞ்சாபி பஞ்சஸதஸாகியானீனங் வஸேன பி⁴க்கு²பா⁴வே ட²த்வா பரிவத்தலிங்கா³ய பி⁴க்கு²னியா ச வஸேன ஏகதோஉபஸம்பன்னா பி⁴க்கு²னீ லப்³ப⁴தி, ததா²பி பகதினியாமேனேவ த³ஸ்ஸேதுங் ‘‘பி⁴க்கு²னீ நாம உப⁴தோஸங்கே⁴ உபஸம்பன்னா’’தி வுத்தங். ‘‘கப்பங் கத்வாதி வசனதோ தி³ன்னகப்பமேவ பாசித்தியங் ஜனேதீ’’தி வத³ந்தி. ‘‘புராணசீவரங் நாம ஸகிங் நிவத்த²ம்பி ஸகிங் பாருதம்பீ’’தி இத³ங் நித³ஸ்ஸனமத்தந்தி ஆஹ ‘‘அந்தமஸோ பரிபோ⁴க³ஸீஸேனா’’திஆதி³. ‘‘காயேன பு²ஸித்வா பரிபோ⁴கோ³யேவ பரிபோ⁴கோ³ நாமா’’தி குருந்தி³யங் அதி⁴ப்பாயோ.
505. Pitā ca mātā ca pitaro, pitūnaṃ pitaro pitāmahā, tesaṃyeva yugo pitāmahayugo, tasmā yāva sattamā pitāmahayugā pitāmahadvandāti evamettha attho daṭṭhabbo. Evañhi pitāmahaggahaṇeneva mātāmahopi gahitoti. ‘‘Yāva sattamā pitāmahayugā’’ti vacanato heṭṭhā ca uddhañca aṭṭhamayugo ñāti nāma na hoti. Desanāmukhameva cetanti pitāmahayugāti pitāmaha-ggahaṇaṃ desanāmukhaṃ pitāmahīmātāmahīādīnampi adhippetattā. Pitu mātā pitāmahī. Mātu pitā mātāmaho. Mātu mātā mātāmahī. Ettha kiñcāpi pañcasatasākiyānīnaṃ vasena bhikkhubhāve ṭhatvā parivattaliṅgāya bhikkhuniyā ca vasena ekatoupasampannā bhikkhunī labbhati, tathāpi pakatiniyāmeneva dassetuṃ ‘‘bhikkhunī nāma ubhatosaṅghe upasampannā’’ti vuttaṃ. ‘‘Kappaṃ katvāti vacanato dinnakappameva pācittiyaṃ janetī’’ti vadanti. ‘‘Purāṇacīvaraṃ nāma sakiṃ nivatthampi sakiṃ pārutampī’’ti idaṃ nidassanamattanti āha ‘‘antamaso paribhogasīsenā’’tiādi. ‘‘Kāyena phusitvā paribhogoyeva paribhogo nāmā’’ti kurundiyaṃ adhippāyo.
506. காயவிகாரங் கத்வாதி இத³ங் யாவ ‘‘ஓரதோ ட²பேதீ’’தி பத³ங், தாவ ஸப்³ப³பதே³ஸு ஸம்ப³ந்தி⁴தப்³ப³ங். யதா² ஸா ‘‘தோ⁴வாபேதுகாமோ அய’’ந்தி ஜானாதி, ஏவங் காயவிகாரங் கத்வாதி அத்தோ². ‘‘காயவிகாரங் கத்வா’’தி வசனதோ காயவாசாஹி கஞ்சி விகாரங் அகத்வா ஹத்தே²ன ஹத்தே² தெ³ந்தஸ்ஸபி அனாபத்தி. அந்தொத்³வாத³ஸஹத்தே² ஓகாஸேதி இத³ங் விஸேஸனங் யதா²ஸம்ப⁴வங் யோஜேதப்³ப³ங். ததா² ஹி ஹத்தே²ன ஹத்தே² தெ³ந்தஸ்ஸ பாத³மூலே ச ட²பெத்வா தெ³ந்தஸ்ஸ ‘‘அந்தொத்³வாத³ஸஹத்தே² ஓகாஸே’’தி இத³ங் வத்தப்³ப³ந்தி நத்தி² அஞ்ஞதா² அஸம்ப⁴வதோ. ஸதி ஹி ஸம்ப⁴வே ப்³யபி⁴சாரே ச விஸேஸனங் ஸாத்த²கங் ஹோதி. உபரி ‘‘கி²பதீ’’திஆதீ³னி பன ஸந்தா⁴ய இத³ங் விஸேஸனங் வுத்தங், தஸ்மா அந்தொத்³வாத³ஸஹத்தே² ஓகாஸே ட²த்வா உபரி கி²பந்தஸ்ஸ அஞ்ஞஸ்ஸ ஹத்தே² பேஸெந்தஸ்ஸ ச ஆபத்தி. உபசாரங் பன முஞ்சித்வா காயவாசாஹி விகாரங் கத்வா ஆணாபெந்தஸ்ஸபி அனாபத்தி. உபசாரேதி அந்தொத்³வாத³ஸஹத்த²மேவ ஓகாஸங் வத³தி. உபசாரங் முஞ்சித்வாதி த்³வாத³ஸஹத்தூ²பசாரங் முஞ்சித்வா.
506.Kāyavikāraṃ katvāti idaṃ yāva ‘‘orato ṭhapetī’’ti padaṃ, tāva sabbapadesu sambandhitabbaṃ. Yathā sā ‘‘dhovāpetukāmo aya’’nti jānāti, evaṃ kāyavikāraṃ katvāti attho. ‘‘Kāyavikāraṃ katvā’’ti vacanato kāyavācāhi kañci vikāraṃ akatvā hatthena hatthe dentassapi anāpatti. Antodvādasahatthe okāseti idaṃ visesanaṃ yathāsambhavaṃ yojetabbaṃ. Tathā hi hatthena hatthe dentassa pādamūle ca ṭhapetvā dentassa ‘‘antodvādasahatthe okāse’’ti idaṃ vattabbanti natthi aññathā asambhavato. Sati hi sambhave byabhicāre ca visesanaṃ sātthakaṃ hoti. Upari ‘‘khipatī’’tiādīni pana sandhāya idaṃ visesanaṃ vuttaṃ, tasmā antodvādasahatthe okāse ṭhatvā upari khipantassa aññassa hatthe pesentassa ca āpatti. Upacāraṃ pana muñcitvā kāyavācāhi vikāraṃ katvā āṇāpentassapi anāpatti. Upacāreti antodvādasahatthameva okāsaṃ vadati. Upacāraṃ muñcitvāti dvādasahatthūpacāraṃ muñcitvā.
ஏகேன வத்து²னாதி பட²மங் கத்வா நிட்டா²பிதங் ஸந்தா⁴ய வுத்தங். ரஜனே அனாபத்தீதி ரஜனங் பச்சாஸீஸந்தஸ்ஸபி ‘‘தோ⁴வித்வா ஆனேஹீ’’தி வுத்தத்தா அனாபத்தி அனாணத்தியா கதத்தா. ‘‘அவுத்தா தோ⁴வதீ’’தி இமினா ‘‘அவுத்தா ரஜதி, அவுத்தா ஆகோடேதீ’’தி இத³ம்பி வுத்தமேவ ஹோதீதி ஆஹ – ‘‘அவுத்தா தோ⁴வதீதி இமினா லக்க²ணேன அனாபத்தீ’’தி. ஸம்ப³ஹுலா ஆபத்தியோ ஆபஜ்ஜதீதி பாசித்தியேன ஸத்³தி⁴ங் த்³வே து³க்கடானி ஆபஜ்ஜதி. யதா²வத்து²கமேவாதி நிஸ்ஸக்³கி³யமேவாதி அத்தோ². பஞ்ச ஸதானி பரிமாணமேதாஸந்தி பஞ்சஸதா.
Ekena vatthunāti paṭhamaṃ katvā niṭṭhāpitaṃ sandhāya vuttaṃ. Rajane anāpattīti rajanaṃ paccāsīsantassapi ‘‘dhovitvā ānehī’’ti vuttattā anāpatti anāṇattiyā katattā. ‘‘Avuttā dhovatī’’ti iminā ‘‘avuttā rajati, avuttā ākoṭetī’’ti idampi vuttameva hotīti āha – ‘‘avuttā dhovatīti iminā lakkhaṇena anāpattī’’ti. Sambahulā āpattiyo āpajjatīti pācittiyena saddhiṃ dve dukkaṭāni āpajjati. Yathāvatthukamevāti nissaggiyamevāti attho. Pañca satāni parimāṇametāsanti pañcasatā.
507. சீவரங் தோ⁴வாதி…பே॰… ஆணாபெந்தஸ்ஸாதி எத்த² தாய தோ⁴வனங் பச்சாஸீஸந்தஸ்ஸபி அனாபத்தி. புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனங், தஸ்ஸா தோ⁴வனாதீ³னி சாதி இமானெத்த² தீணி அங்கா³னி.
507.Cīvaraṃdhovāti…pe… āṇāpentassāti ettha tāya dhovanaṃ paccāsīsantassapi anāpatti. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovanādīni cāti imānettha tīṇi aṅgāni.
புராணசீவரஸிக்கா²பத³வண்ணனா நிட்டி²தா.
Purāṇacīvarasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. புராணசீவரஸிக்கா²பத³ங் • 4. Purāṇacīvarasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
