| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
4. புராணசீவரஸிக்கா²பத³வண்ணனா
4. Purāṇacīvarasikkhāpadavaṇṇanā
503-5. சதுத்தே² பாளியங் ப⁴த்தவிஸ்ஸக்³க³ந்தி ப⁴த்தஸ்ஸ உத³ரே விஸ்ஸஜ்ஜனங், பவேஸனங் அஜ்ஜோ²ஹரணங் ப⁴த்தகிச்சந்தி அத்தோ², போ⁴ஜனபரியோஸானேன ப⁴த்தஸ்ஸ விஸ்ஸஜ்ஜனந்திபி வத³ந்தி. தத்த² நாம த்வந்தி ஸோ நாம த்வங், தாய நாம த்வந்தி வா அத்தோ². பிதா ச மாதா ச பிதரோ, பிதூனங் பிதா ச மாதா ச பிதாமஹா, தே ஏவ யுக³ளட்டே²ன யுகோ³, தஸ்மா யாவ ஸத்தமா பிதாமஹயுகா³ பிதாமஹாவட்டாதி ஏவமெத்த² அத்தோ² த³ட்ட²ப்³போ³. ஏவஞ்ஹி பிதாமஹக்³க³ஹணேன மாதாமஹோ ச பிதாமஹீ மாதாமஹீ ச க³ஹிதாவ ஹொந்தி. ஸத்தமயுக³தோ பரங் ‘‘அஞ்ஞாதகா’’தி வேதி³தப்³ப³ங். யாதி பி⁴க்கு²னீ. பிது மாதா பிதாமஹீ, மாது பிதா மாதாமஹோ.
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
பயோகே³ பயோகே³ பி⁴க்கு²ஸ்ஸ து³க்கடந்தி ‘‘தோ⁴வா’’தி ஆணாபனவாசாய ஏகாய ஏவ தத³னுகு³ணஸ்ஸ ஸப்³ப³ஸ்ஸாபி பயோக³ஸ்ஸ ஆணத்தத்தா வுத்தங்.
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
506. தத³வினாபா⁴வதோ தோ⁴வனஸ்ஸ ‘‘காயவிகாரங் கத்வா’’தி ச ‘‘அந்தொத்³வாத³ஸஹத்தே²’’தி ச வுத்தத்தா காயேன தோ⁴வாபேதுகாமதங் அப்பகாஸெத்வா தா³னகி²பனபேஸனாதி³ங் கரொந்தஸ்ஸ ச த்³வாத³ஸஹத்த²ங் உபசாரங் முஞ்சித்வா ப³ஹி ட²த்வா காயவாசாஹி ஆணாபெத்வா கி²பனபேஸனாதி³ங் கரொந்தஸ்ஸ ச அனாபத்தி ஏவ.
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
ஏகேன வத்து²னாதி பட²மகதேன. பஞ்சஸதானி பமாணங் ஏதாஸந்தி பஞ்சஸதா. பி⁴க்கு²பா⁴வதோ பரிவத்தலிங்கா³பி பி⁴க்கு²னீ பி⁴க்கூ²னங் ஸந்திகே ஏகதோஉபஸம்பன்னா ஏவ.
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
507. தாவகாலிகங் க³ஹெத்வாதி அத்தனா கதிபாஹங் பாருபனாதி³அத்தா²ய தாவகாலிகங் யாசித்வா. புராணசீவரதா, உபசாரே ட²த்வா அஞ்ஞாதிகாய பி⁴க்கு²னியா ஆணாபனங், தஸ்ஸா தோ⁴வாபனாதீ³னி சாதி இமானெத்த² தீணி அங்கா³னி.
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
புராணசீவரஸிக்கா²பத³வண்ணனா நிட்டி²தா.
Purāṇacīvarasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. புராணசீவரஸிக்கா²பத³ங் • 4. Purāṇacīvarasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. புராணசீவரஸிக்கா²பத³வண்ணனா • 4. Purāṇacīvarasikkhāpadavaṇṇanā
