| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৪. পুরাণচীৰরসিক্খাপদৰণ্ণনা
4. Purāṇacīvarasikkhāpadavaṇṇanā
৫০৩-৫. চতুত্থে পাল়িযং ভত্তৰিস্সগ্গন্তি ভত্তস্স উদরে ৰিস্সজ্জনং, পৰেসনং অজ্ঝোহরণং ভত্তকিচ্চন্তি অত্থো, ভোজনপরিযোসানেন ভত্তস্স ৰিস্সজ্জনন্তিপি ৰদন্তি। তত্থ নাম ত্ৰন্তি সো নাম ত্ৰং, তায নাম ত্ৰন্তি ৰা অত্থো। পিতা চ মাতা চ পিতরো, পিতূনং পিতা চ মাতা চ পিতামহা, তে এৰ যুগল়ট্ঠেন যুগো, তস্মা যাৰ সত্তমা পিতামহযুগা পিতামহাৰট্টাতি এৰমেত্থ অত্থো দট্ঠব্বো। এৰঞ্হি পিতামহগ্গহণেন মাতামহো চ পিতামহী মাতামহী চ গহিতাৰ হোন্তি। সত্তমযুগতো পরং ‘‘অঞ্ঞাতকা’’তি ৰেদিতব্বং। যাতি ভিক্খুনী। পিতু মাতা পিতামহী, মাতু পিতা মাতামহো।
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
পযোগে পযোগে ভিক্খুস্স দুক্কটন্তি ‘‘ধোৰা’’তি আণাপনৰাচায একায এৰ তদনুগুণস্স সব্বস্সাপি পযোগস্স আণত্তত্তা ৰুত্তং।
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
৫০৬. তদৰিনাভাৰতো ধোৰনস্স ‘‘কাযৰিকারং কত্ৰা’’তি চ ‘‘অন্তোদ্ৰাদসহত্থে’’তি চ ৰুত্তত্তা কাযেন ধোৰাপেতুকামতং অপ্পকাসেত্ৰা দানখিপনপেসনাদিং করোন্তস্স চ দ্ৰাদসহত্থং উপচারং মুঞ্চিত্ৰা বহি ঠত্ৰা কাযৰাচাহি আণাপেত্ৰা খিপনপেসনাদিং করোন্তস্স চ অনাপত্তি এৰ।
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
একেন ৰত্থুনাতি পঠমকতেন। পঞ্চসতানি পমাণং এতাসন্তি পঞ্চসতা। ভিক্খুভাৰতো পরিৰত্তলিঙ্গাপি ভিক্খুনী ভিক্খূনং সন্তিকে একতোউপসম্পন্না এৰ।
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
৫০৭. তাৰকালিকং গহেত্ৰাতি অত্তনা কতিপাহং পারুপনাদিঅত্থায তাৰকালিকং যাচিত্ৰা। পুরাণচীৰরতা, উপচারে ঠত্ৰা অঞ্ঞাতিকায ভিক্খুনিযা আণাপনং, তস্সা ধোৰাপনাদীনি চাতি ইমানেত্থ তীণি অঙ্গানি।
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
পুরাণচীৰরসিক্খাপদৰণ্ণনা নিট্ঠিতা।
Purāṇacīvarasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. পুরাণচীৰরসিক্খাপদং • 4. Purāṇacīvarasikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৪. পুরাণচীৰরসিক্খাপদৰণ্ণনা • 4. Purāṇacīvarasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. পুরাণচীৰরসিক্খাপদৰণ্ণনা • 4. Purāṇacīvarasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. পুরাণচীৰরসিক্খাপদৰণ্ণনা • 4. Purāṇacīvarasikkhāpadavaṇṇanā
