| Library / Tipiṭaka / తిపిటక • Tipiṭaka / కఙ్ఖావితరణీ-పురాణ-టీకా • Kaṅkhāvitaraṇī-purāṇa-ṭīkā |
౪. పురాణచీవరసిక్ఖాపదవణ్ణనా
4. Purāṇacīvarasikkhāpadavaṇṇanā
‘‘సాకియానియో వియ సుద్ధభిక్ఖుసఙ్ఘే వా’’తి ఇదం ‘‘భిక్ఖునీ నామ ఉభతోసఙ్ఘే ఉపసమ్పన్నా’’తి (పారా॰ ౫౦౫) ఇమినా విరుజ్ఝతీతి చే? న, అధిప్పాయాజాననతో . భిక్ఖూనం సన్తికే ఉపసమ్పదాయ పటిక్ఖిత్తత్తా తదనుప్పసఙ్గభయా ఏవం వుత్తన్తి వేదితబ్బం.
‘‘Sākiyāniyo viya suddhabhikkhusaṅghe vā’’ti idaṃ ‘‘bhikkhunī nāma ubhatosaṅghe upasampannā’’ti (pārā. 505) iminā virujjhatīti ce? Na, adhippāyājānanato . Bhikkhūnaṃ santike upasampadāya paṭikkhittattā tadanuppasaṅgabhayā evaṃ vuttanti veditabbaṃ.
ఏకేన వత్థునాతి యేన కేనచి పఠమేన. అవుత్తా వా ధోవతీతి అవుత్తా ధోవతి, రజతి ఆకోటేతీతి అత్థో. ‘‘‘అవుత్తా’తి వచనతో అవాదాపేత్వా ధోవనాదీసు అనాపత్తీ’’తి లిఖితం. ఇధ చీవరం నామ నివాసనపారుపనూపగమేవ. యది ఏవం ‘‘నివాసనపారుపనూపగమేవ వత్తబ్బ’’న్తి చే? తం న వత్తబ్బం ‘‘పురాణచీవర’’న్తి ఇమినావ సిద్ధత్తా. వుత్తఞ్హేతం ‘‘పురాణచీవరం నామ సకిం నివత్థమ్పి సకిం పారుతమ్పీ’’తి (పారా॰ ౫౦౫).
Ekena vatthunāti yena kenaci paṭhamena. Avuttā vā dhovatīti avuttā dhovati, rajati ākoṭetīti attho. ‘‘‘Avuttā’ti vacanato avādāpetvā dhovanādīsu anāpattī’’ti likhitaṃ. Idha cīvaraṃ nāma nivāsanapārupanūpagameva. Yadi evaṃ ‘‘nivāsanapārupanūpagameva vattabba’’nti ce? Taṃ na vattabbaṃ ‘‘purāṇacīvara’’nti imināva siddhattā. Vuttañhetaṃ ‘‘purāṇacīvaraṃ nāma sakiṃ nivatthampi sakiṃ pārutampī’’ti (pārā. 505).
పురాణచీవరసిక్ఖాపదవణ్ణనా నిట్ఠితా.
Purāṇacīvarasikkhāpadavaṇṇanā niṭṭhitā.
