| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၄. ပုရာဏစီဝရသိက္ခာပဒဝဏ္ဏနာ
4. Purāṇacīvarasikkhāpadavaṇṇanā
၅၀၃-၅. စတုတ္ထေ ပာဠိယံ ဘတ္တဝိသ္သဂ္ဂန္တိ ဘတ္တသ္သ ဥဒရေ ဝိသ္သဇ္ဇနံ, ပဝေသနံ အဇ္ဈောဟရဏံ ဘတ္တကိစ္စန္တိ အတ္ထော, ဘောဇနပရိယောသာနေန ဘတ္တသ္သ ဝိသ္သဇ္ဇနန္တိပိ ဝဒန္တိ။ တတ္ထ နာမ တ္ဝန္တိ သော နာမ တ္ဝံ, တာယ နာမ တ္ဝန္တိ ဝာ အတ္ထော။ ပိတာ စ မာတာ စ ပိတရော, ပိတူနံ ပိတာ စ မာတာ စ ပိတာမဟာ, တေ ဧဝ ယုဂဠဋ္ဌေန ယုဂော, တသ္မာ ယာဝ သတ္တမာ ပိတာမဟယုဂာ ပိတာမဟာဝဋ္ဋာတိ ဧဝမေတ္ထ အတ္ထော ဒဋ္ဌဗ္ဗော။ ဧဝဉ္ဟိ ပိတာမဟဂ္ဂဟဏေန မာတာမဟော စ ပိတာမဟီ မာတာမဟီ စ ဂဟိတာဝ ဟောန္တိ။ သတ္တမယုဂတော ပရံ ‘‘အညာတကာ’’တိ ဝေဒိတဗ္ဗံ။ ယာတိ ဘိက္ခုနီ။ ပိတု မာတာ ပိတာမဟီ, မာတု ပိတာ မာတာမဟော။
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
ပယောဂေ ပယောဂေ ဘိက္ခုသ္သ ဒုက္ကဋန္တိ ‘‘ဓောဝာ’’တိ အာဏာပနဝာစာယ ဧကာယ ဧဝ တဒနုဂုဏသ္သ သဗ္ဗသ္သာပိ ပယောဂသ္သ အာဏတ္တတ္တာ ဝုတ္တံ။
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
၅၀၆. တဒဝိနာဘာဝတော ဓောဝနသ္သ ‘‘ကာယဝိကာရံ ကတ္ဝာ’’တိ စ ‘‘အန္တောဒ္ဝာဒသဟတ္ထေ’’တိ စ ဝုတ္တတ္တာ ကာယေန ဓောဝာပေတုကာမတံ အပ္ပကာသေတ္ဝာ ဒာနခိပနပေသနာဒိံ ကရောန္တသ္သ စ ဒ္ဝာဒသဟတ္ထံ ဥပစာရံ မုဉ္စိတ္ဝာ ဗဟိ ဌတ္ဝာ ကာယဝာစာဟိ အာဏာပေတ္ဝာ ခိပနပေသနာဒိံ ကရောန္တသ္သ စ အနာပတ္တိ ဧဝ။
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
ဧကေန ဝတ္ထုနာတိ ပဌမကတေန။ ပဉ္စသတာနိ ပမာဏံ ဧတာသန္တိ ပဉ္စသတာ။ ဘိက္ခုဘာဝတော ပရိဝတ္တလိင္ဂာပိ ဘိက္ခုနီ ဘိက္ခူနံ သန္တိကေ ဧကတောဥပသမ္ပန္နာ ဧဝ။
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
၅၀၇. တာဝကာလိကံ ဂဟေတ္ဝာတိ အတ္တနာ ကတိပာဟံ ပာရုပနာဒိအတ္ထာယ တာဝကာလိကံ ယာစိတ္ဝာ။ ပုရာဏစီဝရတာ, ဥပစာရေ ဌတ္ဝာ အညာတိကာယ ဘိက္ခုနိယာ အာဏာပနံ, တသ္သာ ဓောဝာပနာဒီနိ စာတိ ဣမာနေတ္ထ တီဏိ အင္ဂာနိ။
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
ပုရာဏစီဝရသိက္ခာပဒဝဏ္ဏနာ နိဋ္ဌိတာ။
Purāṇacīvarasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. ပုရာဏစီဝရသိက္ခာပဒံ • 4. Purāṇacīvarasikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၄. ပုရာဏစီဝရသိက္ခာပဒဝဏ္ဏနာ • 4. Purāṇacīvarasikkhāpadavaṇṇanā
