| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
೪. ಪುರಾಣಚೀವರಸಿಕ್ಖಾಪದವಣ್ಣನಾ
4. Purāṇacīvarasikkhāpadavaṇṇanā
೫೦೩-೫. ಚತುತ್ಥೇ ಪಾಳಿಯಂ ಭತ್ತವಿಸ್ಸಗ್ಗನ್ತಿ ಭತ್ತಸ್ಸ ಉದರೇ ವಿಸ್ಸಜ್ಜನಂ, ಪವೇಸನಂ ಅಜ್ಝೋಹರಣಂ ಭತ್ತಕಿಚ್ಚನ್ತಿ ಅತ್ಥೋ, ಭೋಜನಪರಿಯೋಸಾನೇನ ಭತ್ತಸ್ಸ ವಿಸ್ಸಜ್ಜನನ್ತಿಪಿ ವದನ್ತಿ। ತತ್ಥ ನಾಮ ತ್ವನ್ತಿ ಸೋ ನಾಮ ತ್ವಂ, ತಾಯ ನಾಮ ತ್ವನ್ತಿ ವಾ ಅತ್ಥೋ। ಪಿತಾ ಚ ಮಾತಾ ಚ ಪಿತರೋ, ಪಿತೂನಂ ಪಿತಾ ಚ ಮಾತಾ ಚ ಪಿತಾಮಹಾ, ತೇ ಏವ ಯುಗಳಟ್ಠೇನ ಯುಗೋ, ತಸ್ಮಾ ಯಾವ ಸತ್ತಮಾ ಪಿತಾಮಹಯುಗಾ ಪಿತಾಮಹಾವಟ್ಟಾತಿ ಏವಮೇತ್ಥ ಅತ್ಥೋ ದಟ್ಠಬ್ಬೋ। ಏವಞ್ಹಿ ಪಿತಾಮಹಗ್ಗಹಣೇನ ಮಾತಾಮಹೋ ಚ ಪಿತಾಮಹೀ ಮಾತಾಮಹೀ ಚ ಗಹಿತಾವ ಹೋನ್ತಿ। ಸತ್ತಮಯುಗತೋ ಪರಂ ‘‘ಅಞ್ಞಾತಕಾ’’ತಿ ವೇದಿತಬ್ಬಂ। ಯಾತಿ ಭಿಕ್ಖುನೀ। ಪಿತು ಮಾತಾ ಪಿತಾಮಹೀ, ಮಾತು ಪಿತಾ ಮಾತಾಮಹೋ।
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
ಪಯೋಗೇ ಪಯೋಗೇ ಭಿಕ್ಖುಸ್ಸ ದುಕ್ಕಟನ್ತಿ ‘‘ಧೋವಾ’’ತಿ ಆಣಾಪನವಾಚಾಯ ಏಕಾಯ ಏವ ತದನುಗುಣಸ್ಸ ಸಬ್ಬಸ್ಸಾಪಿ ಪಯೋಗಸ್ಸ ಆಣತ್ತತ್ತಾ ವುತ್ತಂ।
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
೫೦೬. ತದವಿನಾಭಾವತೋ ಧೋವನಸ್ಸ ‘‘ಕಾಯವಿಕಾರಂ ಕತ್ವಾ’’ತಿ ಚ ‘‘ಅನ್ತೋದ್ವಾದಸಹತ್ಥೇ’’ತಿ ಚ ವುತ್ತತ್ತಾ ಕಾಯೇನ ಧೋವಾಪೇತುಕಾಮತಂ ಅಪ್ಪಕಾಸೇತ್ವಾ ದಾನಖಿಪನಪೇಸನಾದಿಂ ಕರೋನ್ತಸ್ಸ ಚ ದ್ವಾದಸಹತ್ಥಂ ಉಪಚಾರಂ ಮುಞ್ಚಿತ್ವಾ ಬಹಿ ಠತ್ವಾ ಕಾಯವಾಚಾಹಿ ಆಣಾಪೇತ್ವಾ ಖಿಪನಪೇಸನಾದಿಂ ಕರೋನ್ತಸ್ಸ ಚ ಅನಾಪತ್ತಿ ಏವ।
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
ಏಕೇನ ವತ್ಥುನಾತಿ ಪಠಮಕತೇನ। ಪಞ್ಚಸತಾನಿ ಪಮಾಣಂ ಏತಾಸನ್ತಿ ಪಞ್ಚಸತಾ। ಭಿಕ್ಖುಭಾವತೋ ಪರಿವತ್ತಲಿಙ್ಗಾಪಿ ಭಿಕ್ಖುನೀ ಭಿಕ್ಖೂನಂ ಸನ್ತಿಕೇ ಏಕತೋಉಪಸಮ್ಪನ್ನಾ ಏವ।
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
೫೦೭. ತಾವಕಾಲಿಕಂ ಗಹೇತ್ವಾತಿ ಅತ್ತನಾ ಕತಿಪಾಹಂ ಪಾರುಪನಾದಿಅತ್ಥಾಯ ತಾವಕಾಲಿಕಂ ಯಾಚಿತ್ವಾ। ಪುರಾಣಚೀವರತಾ, ಉಪಚಾರೇ ಠತ್ವಾ ಅಞ್ಞಾತಿಕಾಯ ಭಿಕ್ಖುನಿಯಾ ಆಣಾಪನಂ, ತಸ್ಸಾ ಧೋವಾಪನಾದೀನಿ ಚಾತಿ ಇಮಾನೇತ್ಥ ತೀಣಿ ಅಙ್ಗಾನಿ।
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
ಪುರಾಣಚೀವರಸಿಕ್ಖಾಪದವಣ್ಣನಾ ನಿಟ್ಠಿತಾ।
Purāṇacīvarasikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೪. ಪುರಾಣಚೀವರಸಿಕ್ಖಾಪದಂ • 4. Purāṇacīvarasikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೪. ಪುರಾಣಚೀವರಸಿಕ್ಖಾಪದವಣ್ಣನಾ • 4. Purāṇacīvarasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೪. ಪುರಾಣಚೀವರಸಿಕ್ಖಾಪದವಣ್ಣನಾ • 4. Purāṇacīvarasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೪. ಪುರಾಣಚೀವರಸಿಕ್ಖಾಪದವಣ್ಣನಾ • 4. Purāṇacīvarasikkhāpadavaṇṇanā
