| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
༤. པུརཱཎཙཱིཝརསིཀྑཱཔདཝཎྞནཱ
4. Purāṇacīvarasikkhāpadavaṇṇanā
༥༠༣-༥. ཙཏུཏྠེ པཱལི༹ཡཾ བྷཏྟཝིསྶགྒནྟི བྷཏྟསྶ ཨུདརེ ཝིསྶཛྫནཾ, པཝེསནཾ ཨཛ྄ཛྷོཧརཎཾ བྷཏྟཀིཙྩནྟི ཨཏྠོ, བྷོཛནཔརིཡོསཱནེན བྷཏྟསྶ ཝིསྶཛྫནནྟིཔི ཝདནྟི། ཏཏྠ ནཱམ ཏྭནྟི སོ ནཱམ ཏྭཾ, ཏཱཡ ནཱམ ཏྭནྟི ཝཱ ཨཏྠོ། པིཏཱ ཙ མཱཏཱ ཙ པིཏརོ, པིཏཱུནཾ པིཏཱ ཙ མཱཏཱ ཙ པིཏཱམཧཱ, ཏེ ཨེཝ ཡུགལ༹ཊྛེན ཡུགོ, ཏསྨཱ ཡཱཝ སཏྟམཱ པིཏཱམཧཡུགཱ པིཏཱམཧཱཝཊྚཱཏི ཨེཝམེཏྠ ཨཏྠོ དཊྛབྦོ། ཨེཝཉྷི པིཏཱམཧགྒཧཎེན མཱཏཱམཧོ ཙ པིཏཱམཧཱི མཱཏཱམཧཱི ཙ གཧིཏཱཝ ཧོནྟི། སཏྟམཡུགཏོ པརཾ ‘‘ཨཉྙཱཏཀཱ’’ཏི ཝེདིཏབྦཾ། ཡཱཏི བྷིཀྑུནཱི། པིཏུ མཱཏཱ པིཏཱམཧཱི, མཱཏུ པིཏཱ མཱཏཱམཧོ།
503-5. Catutthe pāḷiyaṃ bhattavissagganti bhattassa udare vissajjanaṃ, pavesanaṃ ajjhoharaṇaṃ bhattakiccanti attho, bhojanapariyosānena bhattassa vissajjanantipi vadanti. Tattha nāma tvanti so nāma tvaṃ, tāya nāma tvanti vā attho. Pitā ca mātā ca pitaro, pitūnaṃ pitā ca mātā ca pitāmahā, te eva yugaḷaṭṭhena yugo, tasmā yāva sattamā pitāmahayugā pitāmahāvaṭṭāti evamettha attho daṭṭhabbo. Evañhi pitāmahaggahaṇena mātāmaho ca pitāmahī mātāmahī ca gahitāva honti. Sattamayugato paraṃ ‘‘aññātakā’’ti veditabbaṃ. Yāti bhikkhunī. Pitu mātā pitāmahī, mātu pitā mātāmaho.
པཡོགེ པཡོགེ བྷིཀྑུསྶ དུཀྐཊནྟི ‘‘དྷོཝཱ’’ཏི ཨཱཎཱཔནཝཱཙཱཡ ཨེཀཱཡ ཨེཝ ཏདནུགུཎསྶ སབྦསྶཱཔི པཡོགསྶ ཨཱཎཏྟཏྟཱ ཝུཏྟཾ།
Payoge payoge bhikkhussa dukkaṭanti ‘‘dhovā’’ti āṇāpanavācāya ekāya eva tadanuguṇassa sabbassāpi payogassa āṇattattā vuttaṃ.
༥༠༦. ཏདཝིནཱབྷཱཝཏོ དྷོཝནསྶ ‘‘ཀཱཡཝིཀཱརཾ ཀཏྭཱ’’ཏི ཙ ‘‘ཨནྟོདྭཱདསཧཏྠེ’’ཏི ཙ ཝུཏྟཏྟཱ ཀཱཡེན དྷོཝཱཔེཏུཀཱམཏཾ ཨཔྤཀཱསེཏྭཱ དཱནཁིཔནཔེསནཱདིཾ ཀརོནྟསྶ ཙ དྭཱདསཧཏྠཾ ཨུཔཙཱརཾ མུཉྩིཏྭཱ བཧི ཋཏྭཱ ཀཱཡཝཱཙཱཧི ཨཱཎཱཔེཏྭཱ ཁིཔནཔེསནཱདིཾ ཀརོནྟསྶ ཙ ཨནཱཔཏྟི ཨེཝ།
506. Tadavinābhāvato dhovanassa ‘‘kāyavikāraṃ katvā’’ti ca ‘‘antodvādasahatthe’’ti ca vuttattā kāyena dhovāpetukāmataṃ appakāsetvā dānakhipanapesanādiṃ karontassa ca dvādasahatthaṃ upacāraṃ muñcitvā bahi ṭhatvā kāyavācāhi āṇāpetvā khipanapesanādiṃ karontassa ca anāpatti eva.
ཨེཀེན ཝཏྠུནཱཏི པཋམཀཏེན། པཉྩསཏཱནི པམཱཎཾ ཨེཏཱསནྟི པཉྩསཏཱ། བྷིཀྑུབྷཱཝཏོ པརིཝཏྟལིངྒཱཔི བྷིཀྑུནཱི བྷིཀྑཱུནཾ སནྟིཀེ ཨེཀཏོཨུཔསམྤནྣཱ ཨེཝ།
Ekena vatthunāti paṭhamakatena. Pañcasatāni pamāṇaṃ etāsanti pañcasatā. Bhikkhubhāvato parivattaliṅgāpi bhikkhunī bhikkhūnaṃ santike ekatoupasampannā eva.
༥༠༧. ཏཱཝཀཱལིཀཾ གཧེཏྭཱཏི ཨཏྟནཱ ཀཏིཔཱཧཾ པཱརུཔནཱདིཨཏྠཱཡ ཏཱཝཀཱལིཀཾ ཡཱཙིཏྭཱ། པུརཱཎཙཱིཝརཏཱ, ཨུཔཙཱརེ ཋཏྭཱ ཨཉྙཱཏིཀཱཡ བྷིཀྑུནིཡཱ ཨཱཎཱཔནཾ, ཏསྶཱ དྷོཝཱཔནཱདཱིནི ཙཱཏི ཨིམཱནེཏྠ ཏཱིཎི ཨངྒཱནི།
507.Tāvakālikaṃ gahetvāti attanā katipāhaṃ pārupanādiatthāya tāvakālikaṃ yācitvā. Purāṇacīvaratā, upacāre ṭhatvā aññātikāya bhikkhuniyā āṇāpanaṃ, tassā dhovāpanādīni cāti imānettha tīṇi aṅgāni.
པུརཱཎཙཱིཝརསིཀྑཱཔདཝཎྞནཱ ནིཊྛིཏཱ།
Purāṇacīvarasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༤. པུརཱཎཙཱིཝརསིཀྑཱཔདཾ • 4. Purāṇacīvarasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༤. པུརཱཎཙཱིཝརསིཀྑཱཔདཝཎྞནཱ • 4. Purāṇacīvarasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༤. པུརཱཎཙཱིཝརསིཀྑཱཔདཝཎྞནཱ • 4. Purāṇacīvarasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༤. པུརཱཎཙཱིཝརསིཀྑཱཔདཝཎྞནཱ • 4. Purāṇacīvarasikkhāpadavaṇṇanā
