| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਅਭਿਨવ-ਟੀਕਾ • Kaṅkhāvitaraṇī-abhinava-ṭīkā |
੪. ਪੁਰਾਣਚੀવਰਸਿਕ੍ਖਾਪਦવਣ੍ਣਨਾ
4. Purāṇacīvarasikkhāpadavaṇṇanā
‘‘ਅਮ੍ਹਾਕਮੇવ ਞਾਤੀ’’ਤਿ ਞਾਯਤੀਤਿ ਞਾਤਿ, ਸਾવ ਞਾਤਿਕਾ, ਨ ਞਾਤਿਕਾ ਅਞ੍ਞਾਤਿਕਾ, ਤਾਯ ਅਞ੍ਞਾਤਿਕਾਯ। ਤੇਨਾਹ ‘‘ਨ ਞਾਤਿਕਾਯਾ’’ਤਿ। ਮਾਤਿਤੋ વਾ ਪਿਤਿਤੋ વਾਤਿ ਮਾਤਿਪਕ੍ਖਤੋ વਾ ਪਿਤਿਪਕ੍ਖਤੋ વਾ। ਯਾવ ਸਤ੍ਤਮਂ ਯੁਗਨ੍ਤਿ (ਪਾਰਾ॰ ਅਟ੍ਠ॰ ੨.੫੦੩-੫੦੫) ਯਾવ ਸਤ੍ਤਮਸ੍ਸ ਪੁਰਿਸਸ੍ਸ, ਸਤ੍ਤਮਾਯ વਾ ਇਤ੍ਥਿਯਾ ਆਯੁਪ੍ਪਮਾਣਂ, ਯਾવ ਪਿਤਾਮਹਯੁਗਂ ਪਿਤਾਮਹਿਯੁਗਂ ਮਾਤਾਮਹਯੁਗਂ ਮਾਤਾਮਹਿਯੁਗਨ੍ਤਿ વੁਤ੍ਤਂ ਹੋਤਿ। ਅਥ વਾ ਯਾવ ਸਤ੍ਤਮਂ ਯੁਗਨ੍ਤਿ ਯਾવ ਸਤ੍ਤਮਦ੍વਨ੍ਦਨ੍ਤਿ ਅਤ੍ਥੋ। ਯੁਗਸਦ੍ਦੋ ਚੇਤ੍ਥ ਏਕਸੇਸਨਯੇਨ ਦਟ੍ਠਬ੍ਬੋ ‘‘ਯੁਗੋ ਚ ਯੁਗੋ ਚ ਯੁਗਾ’’ਤਿ। ਏવਞ੍ਹਿ ਤਤ੍ਥ ਤਤ੍ਥ ਦ੍વਨ੍ਦਂ ਗਹਿਤਂ ਹੋਤਿ। ਕੇਨਚਿ ਆਕਾਰੇਨ ਅਸਮ੍ਬਦ੍ਧਾਯਾਤਿ ਭਾਤੁਭਗਿਨਿਭਾਗਿਨੇਯ੍ਯਪੁਤ੍ਤਪਪੁਤ੍ਤਾਦੀਸੁ ਯੇਨ ਕੇਨਚਿ ਆਕਾਰੇਨ ਅਸਮ੍ਬਦ੍ਧਾਯ। ਪਿਤਾ, ਪਿਤੁਪਿਤਾ, ਤਸ੍ਸ ਪਿਤਾ, ਤਸ੍ਸਾਪਿ ਪਿਤਾਤਿ ਏવਂ ਯਾવ ਸਤ੍ਤਮਾ ਯੁਗਾ, ਪਿਤਾ, ਪਿਤੁਮਾਤਾ, ਤਸ੍ਸਾ ਪਿਤਾ ਚ ਮਾਤਾ ਚ ਭਾਤਾ ਚ ਭਗਿਨੀ ਚ, ਪੁਤ੍ਤਾ ਚ, ਧੀਤਰੋ ਚਾਤਿ ਏવਮ੍ਪਿ ਉਦ੍ਧਞ੍ਚ ਅਧੋ ਚ ਯਾવ ਸਤ੍ਤਮਾ ਯੁਗਾ, ਪਿਤਾ, ਪਿਤੁਭਾਤਾ, ਪਿਤੁਭਗਿਨੀ, ਪਿਤੁਪੁਤ੍ਤਾ, ਪਿਤੁਧੀਤਰੋ, ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏવਮ੍ਪਿ ਯਾવ ਸਤ੍ਤਮਾ ਯੁਗਾ, ਮਾਤਾ, ਮਾਤੁਮਾਤਾ, ਤਸ੍ਸਾ ਮਾਤਾ, ਤਸ੍ਸਾਪਿ ਮਾਤਾਤਿ ਏવਂ ਯਾવ ਸਤ੍ਤਮਾ ਯੁਗਾ, ਮਾਤਾ, ਮਾਤੁਪਿਤਾ, ਤਸ੍ਸ ਪਿਤਾ ਚ ਮਾਤਾ ਚ ਭਾਤਾ ਚ ਭਗਿਨੀ ਚ ਪੁਤ੍ਤਾ ਚ ਧੀਤਰੋ ਚਾਤਿ ਏવਮ੍ਪਿ ਉਦ੍ਧਞ੍ਚ ਅਧੋ ਚ ਯਾવ ਸਤ੍ਤਮਾ ਯੁਗਾ, ਮਾਤਾ, ਮਾਤੁਭਾਤਾ, ਮਾਤੁਭਗਿਨੀ, ਮਾਤੁਪੁਤ੍ਤਾ, ਮਾਤੁਧੀਤਰੋ , ਤੇਸਮ੍ਪਿ ਪੁਤ੍ਤਧੀਤੁਪਰਮ੍ਪਰਾਤਿ ਏવਮ੍ਪਿ ਯਾવ ਸਤ੍ਤਮਾ ਯੁਗਾ, ਤਾવ ਨੇવ ਮਾਤੁਸਮ੍ਬਨ੍ਧੇਨ, ਨ ਪਿਤੁਸਮ੍ਬਨ੍ਧੇਨ ਯਾ ਸਮ੍ਬਦ੍ਧਾ, ਸਾ ‘‘ਅਞ੍ਞਾਤਿਕਾ ਨਾਮਾ’’ਤਿ વੁਤ੍ਤਂ ਹੋਤਿ।
‘‘Amhākameva ñātī’’ti ñāyatīti ñāti, sāva ñātikā, na ñātikā aññātikā, tāya aññātikāya. Tenāha ‘‘na ñātikāyā’’ti. Mātito vā pitito vāti mātipakkhato vā pitipakkhato vā. Yāva sattamaṃ yuganti (pārā. aṭṭha. 2.503-505) yāva sattamassa purisassa, sattamāya vā itthiyā āyuppamāṇaṃ, yāva pitāmahayugaṃ pitāmahiyugaṃ mātāmahayugaṃ mātāmahiyuganti vuttaṃ hoti. Atha vā yāva sattamaṃ yuganti yāva sattamadvandanti attho. Yugasaddo cettha ekasesanayena daṭṭhabbo ‘‘yugo ca yugo ca yugā’’ti. Evañhi tattha tattha dvandaṃ gahitaṃ hoti. Kenaci ākārena asambaddhāyāti bhātubhaginibhāgineyyaputtapaputtādīsu yena kenaci ākārena asambaddhāya. Pitā, pitupitā, tassa pitā, tassāpi pitāti evaṃ yāva sattamā yugā, pitā, pitumātā, tassā pitā ca mātā ca bhātā ca bhaginī ca, puttā ca, dhītaro cāti evampi uddhañca adho ca yāva sattamā yugā, pitā, pitubhātā, pitubhaginī, pituputtā, pitudhītaro, tesampi puttadhītuparamparāti evampi yāva sattamā yugā, mātā, mātumātā, tassā mātā, tassāpi mātāti evaṃ yāva sattamā yugā, mātā, mātupitā, tassa pitā ca mātā ca bhātā ca bhaginī ca puttā ca dhītaro cāti evampi uddhañca adho ca yāva sattamā yugā, mātā, mātubhātā, mātubhaginī, mātuputtā, mātudhītaro , tesampi puttadhītuparamparāti evampi yāva sattamā yugā, tāva neva mātusambandhena, na pitusambandhena yā sambaddhā, sā ‘‘aññātikā nāmā’’ti vuttaṃ hoti.
ਸਾਕਿਯਾਨਿਯੋ વਿਯਾਤਿ ਪਞ੍ਚਸਤਮਤ੍ਤਾ ਸਾਕਿਯਾਨਿਯੋ વਿਯ। ਨਿਦਸ੍ਸਨਮਤ੍ਤਞ੍ਚੇਤਂ, ਤਸ੍ਮਾ ਭਿਕ੍ਖੁਭਾવੇ ਠਤ੍વਾ ਪਰਿવਤ੍ਤਲਿਙ੍ਗਾ ਭਿਕ੍ਖੁਨਿਯੋਪਿ ਇਧ ਸੁਦ੍ਧਭਿਕ੍ਖੁਸਙ੍ਘੇ ‘‘ਉਪਸਮ੍ਪਨ੍ਨਾ’’ ਇਚ੍ਚੇવ વੇਦਿਤਬ੍ਬਾ। ਉਭਤੋਸਙ੍ਘੇ વਾਤਿ ਭਿਕ੍ਖੁਨਿਸਙ੍ਘੇ ਞਤ੍ਤਿਚਤੁਤ੍ਥੇਨ, ਭਿਕ੍ਖੁਸਙ੍ਘੇ ਞਤ੍ਤਿਚਤੁਤ੍ਥੇਨਾਤਿ ਏવਂ ਉਭਤੋਸਙ੍ਘੇ વਾ। ਪੁਰਾਣਚੀવਰਨ੍ਤਿ ਏਤ੍ਥ ਚੀવਰਨ੍ਤਿ ਨਿવਾਸਨਪਾਰੁਪਨੁਪਗਮੇવ ਅਧਿਪ੍ਪੇਤਨ੍ਤਿ ਆਹ ‘‘ਰਜਿਤ੍વਾ’’ਤਿਆਦਿ। ਕਪ੍ਪਂ ਕਤ੍વਾਤਿ ਕਪ੍ਪਬਿਨ੍ਦੁਂ ਦਤ੍વਾ। ‘‘ਇਮਿਨਾ ਅਦਿਨ੍ਨਕਪ੍ਪਂ ਪਾਚਿਤ੍ਤਿਯવਤ੍ਥੁ ਨ ਹੋਤੀਤਿ ਦਸ੍ਸੇਤੀ’’ਤਿ (ਸਾਰਤ੍ਥ॰ ਟੀ॰ ੨.੫੦੫) વਦਨ੍ਤਿ। ਪਰਿਭੋਗਸੀਸੇਨਾਤਿ ਕਾਯੇਨ ਫੁਸਿਤ੍વਾ ਪਰਿਭੋਗਸੀਸੇਨ। ਅਂਸੇਤਿ ਜਤ੍ਤੁਮ੍ਹਿ। ਮਤ੍ਥਕੇਤਿ ਸੀਸਮਤ੍ਥਕੇ। ਸਚੇ ਪਨ ਪਚ੍ਚਤ੍ਥਰਣਸ੍ਸ ਹੇਟ੍ਠਾ ਕਤ੍વਾ ਨਿਪਜ੍ਜਤਿ, ਹਤ੍ਥੇਹਿ વਾ ਉਕ੍ਖਿਪਿਤ੍વਾ ਆਕਾਸੇ વਿਤਾਨਂ ਕਤ੍વਾ ਸੀਸੇਨ ਅਸਮ੍ਫੁਸਨ੍ਤੋ ਗਚ੍ਛਤਿ, ਅਯਂ ਪਰਿਭੋਗੋ ਨਾਮ ਨ ਹੋਤਿ।
Sākiyāniyo viyāti pañcasatamattā sākiyāniyo viya. Nidassanamattañcetaṃ, tasmā bhikkhubhāve ṭhatvā parivattaliṅgā bhikkhuniyopi idha suddhabhikkhusaṅghe ‘‘upasampannā’’ icceva veditabbā. Ubhatosaṅghe vāti bhikkhunisaṅghe ñatticatutthena, bhikkhusaṅghe ñatticatutthenāti evaṃ ubhatosaṅghe vā. Purāṇacīvaranti ettha cīvaranti nivāsanapārupanupagameva adhippetanti āha ‘‘rajitvā’’tiādi. Kappaṃ katvāti kappabinduṃ datvā. ‘‘Iminā adinnakappaṃ pācittiyavatthu na hotīti dassetī’’ti (sārattha. ṭī. 2.505) vadanti. Paribhogasīsenāti kāyena phusitvā paribhogasīsena. Aṃseti jattumhi. Matthaketi sīsamatthake. Sace pana paccattharaṇassa heṭṭhā katvā nipajjati, hatthehi vā ukkhipitvā ākāse vitānaṃ katvā sīsena asamphusanto gacchati, ayaṃ paribhogo nāma na hoti.
ਕਾਯવਿਕਾਰਂ વਾ ਕਰੋਤੀਤਿ ਯਥਾ ਸਾ ‘‘ਧੋવਾਪੇਤੁਕਾਮੋ ਅਯ’’ਨ੍ਤਿ ਜਾਨਾਤਿ, ਏવਂ ਕਾਯવਿਕਾਰਂ ਕਰੋਤਿ। ‘‘ਅਨ੍ਤੋਦ੍વਾਦਸਹਤ੍ਥੇ ਓਕਾਸੇ ਠਤ੍વਾ ਉਪਰਿ વਾ ਖਿਪਤੀ’’ਤਿ ਇਮਿਨਾ ਉਪਚਾਰਂ ਮੁਞ੍ਚਿਤ੍વਾ ਓਰਤੋ ਖਿਪਨ੍ਤਸ੍ਸ ਅਨਾਪਤ੍ਤੀਤਿ ਦਸ੍ਸੇਤਿ। ਅਞ੍ਞਸ੍ਸ વਾ ਹਤ੍ਥੇ ਪੇਸੇਤੀਤਿ ਅਨ੍ਤੋਦ੍વਾਦਸਹਤ੍ਥੇ ਓਕਾਸੇ ਠਤ੍વਾ ਸਿਕ੍ਖਮਾਨਸਾਮਣੇਰਸਾਮਣੇਰਿਉਪਾਸਕਇਤ੍ਥਿਯਾਦੀਸੁ ਯਸ੍ਸ ਕਸ੍ਸਚਿ ਅਞ੍ਞਸ੍ਸ ਹਤ੍ਥੇ વਾ ਪੇਸੇਤਿ। ਸੋਤਿ ਉਪਾਸਕੋ ਚ ਸਾਮਣੇਰੋ ਚ। ਉਪਸਮ੍ਪਜ੍ਜਿਤ੍વਾ ਧੋવਤੀਤਿ ਏਤ੍ਥ ਉਪਾਸਕੋ ਲਿਙ੍ਗੇ ਪਰਿવਤ੍ਤੇ ਭਿਕ੍ਖੁਨੀਸੁ ਪਬ੍ਬਜਿਤ੍વਾ ਉਪਸਮ੍ਪਜ੍ਜਿਤ੍વਾ ਧੋવਤਿ, ਸਾਮਣੇਰੋ ਲਿਙ੍ਗੇ ਪਰਿવਤ੍ਤੇ ਭਿਕ੍ਖੁਨੀਸੁ ਉਪਸਮ੍ਪਜ੍ਜਿਤ੍વਾ ਧੋવਤੀਤਿ ਯਥਾਯੋਗਂ ਅਤ੍ਥੋ ਗਹੇਤਬ੍ਬੋ। ਸਚੇ ਪਨ ਭਿਕ੍ਖੁਨਿਯਾ ਹਤ੍ਥੇ ਦਿਨ੍ਨਂ ਹੋਤਿ, ਸਚੇ ਲਿਙ੍ਗੇ ਪਰਿવਤ੍ਤੇ ਧੋવਤਿ, વਟ੍ਟਤਿ।
Kāyavikāraṃ vā karotīti yathā sā ‘‘dhovāpetukāmo aya’’nti jānāti, evaṃ kāyavikāraṃ karoti. ‘‘Antodvādasahatthe okāse ṭhatvā upari vā khipatī’’ti iminā upacāraṃ muñcitvā orato khipantassa anāpattīti dasseti. Aññassa vā hatthe pesetīti antodvādasahatthe okāse ṭhatvā sikkhamānasāmaṇerasāmaṇeriupāsakaitthiyādīsu yassa kassaci aññassa hatthe vā peseti. Soti upāsako ca sāmaṇero ca. Upasampajjitvā dhovatīti ettha upāsako liṅge parivatte bhikkhunīsu pabbajitvā upasampajjitvā dhovati, sāmaṇero liṅge parivatte bhikkhunīsu upasampajjitvā dhovatīti yathāyogaṃ attho gahetabbo. Sace pana bhikkhuniyā hatthe dinnaṃ hoti, sace liṅge parivatte dhovati, vaṭṭati.
ਏਤ੍ਥ ਚ ਏਕਸ੍ਸ ਤਿਕ੍ਖਤ੍ਤੁਂ ਨਿਸ੍ਸਜ੍ਜਨਾਭਾવਤੋ ਤੀਣਿਪਿ ਕਾਰੇਨ੍ਤਸ੍ਸ ਏਕੇਨ ਨਿਸ੍ਸਗ੍ਗਿਯਂ, ਦ੍વੀਹਿ ਦ੍વੇ ਦੁਕ੍ਕਟਾਨਿ। ਦ੍વੇ ਕਾਰੇਨ੍ਤਸ੍ਸ ਏਕੇਨ ਨਿਸ੍ਸਗ੍ਗਿਯਂ, ਦੁਤਿਯੇਨ ਦੁਕ੍ਕਟਂ। ਤੇਨਾਹ ‘‘ਧੋવਨਾਦੀਨਿ ਤੀਣੀ’’ਤਿਆਦਿ। ‘‘ਏਕੇਨ વਤ੍ਥੁਨਾ’’ਤਿ ਪਠਮਂ ਕਤ੍વਾ ਨਿਟ੍ਠਾਪਿਤਂ ਸਨ੍ਧਾਯ વੁਤ੍ਤਂ। ਸਚੇ ਪਨ ‘‘ਇਮਂ ਚੀવਰਂ ਰਜਿਤ੍વਾ ਧੋવਿਤ੍વਾ ਆਨੇਹੀ’’ਤਿ વੁਤ੍ਤੇ ਸਾ ਭਿਕ੍ਖੁਨੀ ਪਠਮਂ ਧੋવਿਤ੍વਾ ਪਚ੍ਛਾ ਰਜਤਿ, ਨਿਸ੍ਸਗ੍ਗਿਯੇਨ ਦੁਕ੍ਕਟਮੇવ, ਏવਂ ਸਬ੍ਬੇਸੁ વਿਪਰੀਤવਚਨੇਸੁ ਨਯੋ ਨੇਤਬ੍ਬੋ। ਸਚੇ ਪਨ ‘‘ਧੋવਿਤ੍વਾ ਆਨੇਹੀ’’ਤਿ વੁਤ੍ਤਾ ਧੋવਤਿ ਚੇવ ਰਜਤਿ ਚ, ਧੋવਾਪਨਪਚ੍ਚਯਾ ਏવ ਆਪਤ੍ਤਿ, ਰਜਨੇ ਅਨਾਪਤ੍ਤਿ। ਏવਂ ਸਬ੍ਬਤ੍ਥ। ਤੇਨਾਹ ‘‘ਸਚੇ ਪਨ‘ਧੋવਾ’ਤਿ વੁਤ੍ਤਾ’’ਤਿਆਦਿ। ਭਿਕ੍ਖੂਨਂ વਸੇਨ ਏਕਤੋ ਉਪਸਮ੍ਪਨ੍ਨਾਯ ਧੋવਾਪੇਨ੍ਤਸ੍ਸ ਯਥਾવਤ੍ਥੁਕਮੇવਾਤਿ ਆਹ ‘‘ਭਿਕ੍ਖੁਨਿਸਙ੍ਘવਸੇਨਾ’’ਤਿਆਦਿ।
Ettha ca ekassa tikkhattuṃ nissajjanābhāvato tīṇipi kārentassa ekena nissaggiyaṃ, dvīhi dve dukkaṭāni. Dve kārentassa ekena nissaggiyaṃ, dutiyena dukkaṭaṃ. Tenāha ‘‘dhovanādīni tīṇī’’tiādi. ‘‘Ekena vatthunā’’ti paṭhamaṃ katvā niṭṭhāpitaṃ sandhāya vuttaṃ. Sace pana ‘‘imaṃ cīvaraṃ rajitvā dhovitvā ānehī’’ti vutte sā bhikkhunī paṭhamaṃ dhovitvā pacchā rajati, nissaggiyena dukkaṭameva, evaṃ sabbesu viparītavacanesu nayo netabbo. Sace pana ‘‘dhovitvā ānehī’’ti vuttā dhovati ceva rajati ca, dhovāpanapaccayā eva āpatti, rajane anāpatti. Evaṃ sabbattha. Tenāha ‘‘sace pana‘dhovā’ti vuttā’’tiādi. Bhikkhūnaṃ vasena ekato upasampannāya dhovāpentassa yathāvatthukamevāti āha ‘‘bhikkhunisaṅghavasenā’’tiādi.
ਅਞ੍ਞਸ੍ਸ વਾ ਸਨ੍ਤਕਨ੍ਤਿ ਅਞ੍ਞਸ੍ਸ ਸਨ੍ਤਕਂ ਪੁਰਾਣਚੀવਰਂ ਧੋવਾਪੇਨ੍ਤਸ੍ਸਾਤਿ ਅਤ੍ਥੋ। ਨਿਸੀਦਨਪਚ੍ਚਤ੍ਥਰਣਨ੍ਤਿ ਅਞ੍ਞਸ੍ਸ વਾ ਅਤ੍ਤਨੋ વਾ ਸਨ੍ਤਕਂ ਨਿਸੀਦਨਞ੍ਚੇવ ਪਚ੍ਚਤ੍ਥਰਣਞ੍ਚ। ਨਿવਾਸਨਪਾਰੁਪਨੁਪਗਸ੍ਸੇવ ਚ ਇਧ ‘‘ਪੁਰਾਣਚੀવਰ’’ਨ੍ਤਿ ਅਧਿਪ੍ਪੇਤਤ੍ਤਾ ਅਤ੍ਤਨੋ ਸਨ੍ਤਕਮ੍ਪਿ ਨਿਸੀਦਨਪਚ੍ਚਤ੍ਥਰਣਂ ਧੋવਾਪੇਨ੍ਤਸ੍ਸ ਦੁਕ੍ਕਟਮੇવ ਹੋਤਿ, ਨ ਨਿਸ੍ਸਗ੍ਗਿਯਂ। ਅવੁਤ੍ਤਾ વਾ ਧੋવਤੀਤਿ ਉਦ੍ਦੇਸਾਯ વਾ ਓવਾਦਾਯ વਾ ਆਗਤਾ ਕਿਲਿਟ੍ਠਚੀવਰਂ ਦਿਸ੍વਾ ਠਪਿਤਟ੍ਠਾਨਤੋ વਾ ਗਹੇਤ੍વਾ, ‘‘ਦੇਥ ਅਯ੍ਯ, ਧੋવਿਸ੍ਸਾਮੀ’’ਤਿ ਆਹਰਾਪੇਤ੍વਾ વਾ ਧੋવਤਿ ਚੇવ ਰਜਤਿ ਚ ਆਕੋਟੇਤਿ ਚ, ਅਯਂ ਅવੁਤ੍ਤਾ ਧੋવਤਿ ਨਾਮ। ਯਾਪਿ ‘‘ਇਮਂ ਚੀવਰਂ ਧੋવਾ’’ਤਿ ਦਹਰਂ વਾ ਸਾਮਣੇਰਂ વਾ ਆਣਾਪੇਨ੍ਤਸ੍ਸ ਭਿਕ੍ਖੁਨੋ વਚਨਂ ਸੁਤ੍વਾ ‘‘ਆਹਰਥਯ੍ਯ, ਅਹਂ ਧੋવਿਸ੍ਸਾਮੀ’’ਤਿ ਧੋવਤਿ, ਤਾવਕਾਲਿਕਂ વਾ ਗਹੇਤ੍વਾ ਧੋવਿਤ੍વਾ ਰਜਿਤ੍વਾ ਦੇਤਿ, ਅਯਮ੍ਪਿ ਅવੁਤ੍ਤਾ ਧੋવਤਿ ਨਾਮ।
Aññassavā santakanti aññassa santakaṃ purāṇacīvaraṃ dhovāpentassāti attho. Nisīdanapaccattharaṇanti aññassa vā attano vā santakaṃ nisīdanañceva paccattharaṇañca. Nivāsanapārupanupagasseva ca idha ‘‘purāṇacīvara’’nti adhippetattā attano santakampi nisīdanapaccattharaṇaṃ dhovāpentassa dukkaṭameva hoti, na nissaggiyaṃ. Avuttā vā dhovatīti uddesāya vā ovādāya vā āgatā kiliṭṭhacīvaraṃ disvā ṭhapitaṭṭhānato vā gahetvā, ‘‘detha ayya, dhovissāmī’’ti āharāpetvā vā dhovati ceva rajati ca ākoṭeti ca, ayaṃ avuttā dhovati nāma. Yāpi ‘‘imaṃ cīvaraṃ dhovā’’ti daharaṃ vā sāmaṇeraṃ vā āṇāpentassa bhikkhuno vacanaṃ sutvā ‘‘āharathayya, ahaṃ dhovissāmī’’ti dhovati, tāvakālikaṃ vā gahetvā dhovitvā rajitvā deti, ayampi avuttā dhovati nāma.
ਅਞ੍ਞਂ વਾ ਪਰਿਕ੍ਖਾਰਨ੍ਤਿ ਉਪਾਹਨਤ੍ਥવਿਕਪਤ੍ਤਤ੍ਥવਿਕਅਂਸਬਦ੍ਧਕਕਾਯਬਨ੍ਧਨਮਞ੍ਚਪੀਠਤਟ੍ਟਿਕਾਦਿਂ ਯਂ ਕਿਞ੍ਚਿ। ‘‘ਉਪਚਾਰੇ ਠਤ੍વਾ’’ਤਿ વਚਨਤੋ ਪੇਸਿਤ੍વਾ ਧੋવਨੇਪਿ ਅਨਾਪਤ੍ਤਿ। ਉਪਚਾਰੇਤਿ ਅਨ੍ਤੋਦ੍વਾਦਸਹਤ੍ਥੇ ਓਕਾਸੇ।
Aññaṃ vā parikkhāranti upāhanatthavikapattatthavikaaṃsabaddhakakāyabandhanamañcapīṭhataṭṭikādiṃ yaṃ kiñci. ‘‘Upacāre ṭhatvā’’ti vacanato pesitvā dhovanepi anāpatti. Upacāreti antodvādasahatthe okāse.
ਪੁਰਾਣਚੀવਰਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Purāṇacīvarasikkhāpadavaṇṇanā niṭṭhitā.
