| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
10. புரேஜாதபச்சயனித்³தே³ஸவண்ணனா
10. Purejātapaccayaniddesavaṇṇanā
10. த³ஸ்ஸிதமேவ நயத³ஸ்ஸனவஸேனாதி யோஜனா. யதி³ த³ஸ்ஸிதமேவ, கஸ்மா வுத்தங் ‘‘ஸாவஸேஸவஸேன தே³ஸனா கதா’’தி ஆஹ ‘‘ஸரூபேன அத³ஸ்ஸிதத்தா’’தி. ‘‘யங் யங் த⁴ம்மங் புரேஜாதங் ஆரப்³ப⁴ யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸங் தேஸங் த⁴ம்மானங் புரேஜாதபச்சயேன பச்சயோ’’தி ஏவங் ஸரூபேன பாளியங் அத³ஸ்ஸிதத்தா. இத்³தி⁴விதா⁴பி⁴ஞ்ஞாய சாதி ச-ஸத்³தே³ன சுதூபபாதஞாணஸ்ஸபி ஸங்க³ஹோ த³ட்ட²ப்³போ³. தஸ்ஸபி ஹி ரூபத⁴ம்மாரம்மணகாலே அட்டா²ரஸஸு யங் கிஞ்சி ஆரம்மணபுரேஜாதங் ஹோதி பச்சுப்பன்னாரம்மணத்தா. ‘‘சவமானே உபபஜ்ஜமானே’’தி ஹி வுத்தங். தி³ப்³ப³சக்கு²தி³ப்³ப³ஸோதஞாணேஸு ச வத்தப்³ப³மேவ நத்தி².
10. Dassitameva nayadassanavasenāti yojanā. Yadi dassitameva, kasmā vuttaṃ ‘‘sāvasesavasena desanā katā’’ti āha ‘‘sarūpena adassitattā’’ti. ‘‘Yaṃ yaṃ dhammaṃ purejātaṃ ārabbha ye ye dhammā uppajjanti cittacetasikā dhammā, te te dhammā tesaṃ tesaṃ dhammānaṃ purejātapaccayena paccayo’’ti evaṃ sarūpena pāḷiyaṃ adassitattā. Iddhividhābhiññāya cāti ca-saddena cutūpapātañāṇassapi saṅgaho daṭṭhabbo. Tassapi hi rūpadhammārammaṇakāle aṭṭhārasasu yaṃ kiñci ārammaṇapurejātaṃ hoti paccuppannārammaṇattā. ‘‘Cavamāne upapajjamāne’’ti hi vuttaṃ. Dibbacakkhudibbasotañāṇesu ca vattabbameva natthi.
இதரஸ்ஸபி அபா⁴வாதி ஆரம்மணபுரேஜாதஸ்ஸபி அபா⁴வா அக்³க³ஹணங் படிஸந்தி⁴பா⁴வினோதி யோஜனா. ஸதிபி கஸ்ஸசி படிஸந்தி⁴பா⁴வினோ ஆரம்மணபுரேஜாதே விபூ⁴தங் பன கத்வா ஆரம்மணகரணாபா⁴வதோ அவிஜ்ஜமானஸதி³ஸந்தி கத்வா வுத்தங் ‘‘இதரஸ்ஸபி அபா⁴வா’’தி. தேனேவாஹ ‘‘படிஸந்தி⁴யா விய அபரிப்³யத்தஸ்ஸ ஆரம்மணஸ்ஸ ஆரம்மணமத்தபா⁴வதோ’’தி. ஸந்தீரணபா⁴வினோ மனோவிஞ்ஞாணதா⁴துயாபி ஏகந்தேனேவ புரேஜாதபச்சயோ ரூபாதீ³னி பஞ்சாரம்மணானீதி யோஜனா. எத்த² ச ‘‘மனோதா⁴தூனஞ்சா’’திஆதி³ ‘‘ததா³ரம்மணபா⁴வினோ’’தி பத³ஸ்ஸ புரதோ வத்தப்³போ³, உப்படிபாடியா லிகி²தங்.
Itarassapi abhāvāti ārammaṇapurejātassapi abhāvā aggahaṇaṃ paṭisandhibhāvinoti yojanā. Satipi kassaci paṭisandhibhāvino ārammaṇapurejāte vibhūtaṃ pana katvā ārammaṇakaraṇābhāvato avijjamānasadisanti katvā vuttaṃ ‘‘itarassapi abhāvā’’ti. Tenevāha ‘‘paṭisandhiyā viya aparibyattassa ārammaṇassa ārammaṇamattabhāvato’’ti. Santīraṇabhāvino manoviññāṇadhātuyāpi ekanteneva purejātapaccayo rūpādīni pañcārammaṇānīti yojanā. Ettha ca ‘‘manodhātūnañcā’’tiādi ‘‘tadārammaṇabhāvino’’ti padassa purato vattabbo, uppaṭipāṭiyā likhitaṃ.
புரேஜாதபச்சயனித்³தே³ஸவண்ணனா நிட்டி²தா.
Purejātapaccayaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. புரேஜாதபச்சயனித்³தே³ஸவண்ணனா • 10. Purejātapaccayaniddesavaṇṇanā
