| Library / Tipiṭaka / तिपिटक • Tipiṭaka / पञ्चपकरण-मूलटीका • Pañcapakaraṇa-mūlaṭīkā |
१०. पुरेजातपच्चयनिद्देसवण्णना
10. Purejātapaccayaniddesavaṇṇanā
१०. नयदस्सनवसेन यानि विना आरम्मणपुरेजातेन न वत्तन्ति, तेसं चक्खुविञ्ञाणादीनं आरम्मणपुरेजातदस्सनेन मनोद्वारेपि यं यदारम्मणपुरेजातेन वत्तति, तस्स तदालम्बितं सब्बम्पि रूपरूपं आरम्मणपुरेजातन्ति दस्सितमेव होति, सरूपेन पन अदस्सितत्ता ‘‘सावसेसवसेन देसना कता’’ति आह। चित्तवसेन कायं परिणामयतो इद्धिविधाभिञ्ञाय च अट्ठारससु यंकिञ्चि आरम्मणपुरेजातं होतीति दट्ठब्बं।
10. Nayadassanavasena yāni vinā ārammaṇapurejātena na vattanti, tesaṃ cakkhuviññāṇādīnaṃ ārammaṇapurejātadassanena manodvārepi yaṃ yadārammaṇapurejātena vattati, tassa tadālambitaṃ sabbampi rūparūpaṃ ārammaṇapurejātanti dassitameva hoti, sarūpena pana adassitattā ‘‘sāvasesavasena desanā katā’’ti āha. Cittavasena kāyaṃ pariṇāmayato iddhividhābhiññāya ca aṭṭhārasasu yaṃkiñci ārammaṇapurejātaṃ hotīti daṭṭhabbaṃ.
तदारम्मणभाविनोति एत्थ पटिसन्धिभाविनो वत्थुपुरेजाताभावेन इतरस्सपि अभावा अग्गहणं। भवङ्गभाविनो पन गहणं कातब्बं न वा कातब्बं पटिसन्धिया विय अपरिब्यत्तस्स आरम्मणस्स आरम्मणमत्तभावतो, ‘‘मनोधातूनञ्चा’’ति एत्थ सन्तीरणभाविनो मनोविञ्ञाणधातुयापि।
Tadārammaṇabhāvinoti ettha paṭisandhibhāvino vatthupurejātābhāvena itarassapi abhāvā aggahaṇaṃ. Bhavaṅgabhāvino pana gahaṇaṃ kātabbaṃ na vā kātabbaṃ paṭisandhiyā viya aparibyattassa ārammaṇassa ārammaṇamattabhāvato, ‘‘manodhātūnañcā’’ti ettha santīraṇabhāvino manoviññāṇadhātuyāpi.
पुरेजातपच्चयनिद्देसवण्णना निट्ठिता।
Purejātapaccayaniddesavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / पट्ठानपाळि • Paṭṭhānapāḷi / (२) पच्चयनिद्देसो • (2) Paccayaniddeso
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / १०. पुरेजातपच्चयनिद्देसवण्णना • 10. Purejātapaccayaniddesavaṇṇanā
