| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. புரிமகோடிபஞ்ஹோ
2. Purimakoṭipañho
2. ராஜா ஆஹ ‘‘ப⁴ந்தே நாக³ஸேன, யங் பனேதங் ப்³ரூஸி ‘புரிமா கோடி ந பஞ்ஞாயதீ’தி, தஸ்ஸ ஓபம்மங் கரோஹீ’’தி. ‘‘யதா², மஹாராஜ, புரிஸோ பரித்தங் 1 பீ³ஜங் பத²வியங் நிக்கி²பெய்ய, ததோ அங்குரோ உட்ட²ஹித்வா அனுபுப்³பே³ன வுட்³டி⁴ங் விரூள்ஹிங் வேபுல்லங் ஆபஜ்ஜித்வா ப²லங் த³தெ³ய்ய. ததோ பீ³ஜங் க³ஹெத்வா புன ரோபெய்ய, ததோபி அங்குரோ உட்ட²ஹித்வா அனுபுப்³பே³ன வுட்³டி⁴ங் விரூள்ஹிங் வேபுல்லங் ஆபஜ்ஜித்வா ப²லங் த³தெ³ய்ய. ஏவமேதிஸ்ஸா ஸந்ததியா அத்தி² அந்தோ’’தி? ‘‘நத்தி² ப⁴ந்தே’’தி. ‘‘ஏவமேவ கோ², மஹாராஜ, அத்³தா⁴னஸ்ஸாபி புரிமா கோடி ந பஞ்ஞாயதீ’’தி.
2. Rājā āha ‘‘bhante nāgasena, yaṃ panetaṃ brūsi ‘purimā koṭi na paññāyatī’ti, tassa opammaṃ karohī’’ti. ‘‘Yathā, mahārāja, puriso parittaṃ 2 bījaṃ pathaviyaṃ nikkhipeyya, tato aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Tato bījaṃ gahetvā puna ropeyya, tatopi aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘பி⁴ய்யோ ஓபம்மங் கரோஹீ’’தி. ‘‘யதா², மஹாராஜ, குக்குடியா அண்ட³ங் ப⁴வெய்ய, அண்ட³தோ குக்குடீ குக்குடியா அண்ட³ந்தி. ஏவமேதிஸ்ஸா ஸந்ததியா அத்தி² அந்தோ’’தி? ‘‘நத்தி² ப⁴ந்தே’’தி. ‘‘ஏவமேவ கோ², மஹாராஜ, அத்³தா⁴னஸ்ஸாபி புரிமா கோடி ந பஞ்ஞாயதீ’’தி.
‘‘Bhiyyo opammaṃ karohī’’ti. ‘‘Yathā, mahārāja, kukkuṭiyā aṇḍaṃ bhaveyya, aṇḍato kukkuṭī kukkuṭiyā aṇḍanti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘பி⁴ய்யோ ஓபம்மங் கரோஹீ’’தி. தே²ரோ பத²வியா சக்கங் லிகி²த்வா மிலிந்த³ங் ராஜானங் ஏதத³வோச ‘‘அத்தி², மஹாராஜ, இமஸ்ஸ சக்கஸ்ஸ அந்தோ’’தி? ‘‘நத்தி² ப⁴ந்தே’’தி. ‘‘ஏவமேவ கோ², மஹாராஜ, இமானி சக்கானி வுத்தானி ப⁴க³வதா ‘சக்கு²ஞ்ச படிச்ச ரூபே ச உப்பஜ்ஜதி சக்கு²விஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங், உபாதா³னபச்சயா கம்மங், கம்மதோ புன சக்கு²ங் ஜாயதீ’தி. ஏவமேதிஸ்ஸா ஸந்ததியா அத்தி² அந்தோ’’தி? ‘‘நத்தி² ப⁴ந்தே’’தி.
‘‘Bhiyyo opammaṃ karohī’’ti. Thero pathaviyā cakkaṃ likhitvā milindaṃ rājānaṃ etadavoca ‘‘atthi, mahārāja, imassa cakkassa anto’’ti? ‘‘Natthi bhante’’ti. ‘‘Evameva kho, mahārāja, imāni cakkāni vuttāni bhagavatā ‘cakkhuñca paṭicca rūpe ca uppajjati cakkhuviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna cakkhuṃ jāyatī’ti. Evametissā santatiyā atthi anto’’ti? ‘‘Natthi bhante’’ti.
‘‘‘ஸோதஞ்ச படிச்ச ஸத்³தே³ ச…பே॰… மனஞ்ச படிச்ச த⁴ம்மே ச உப்பஜ்ஜதி மனோவிஞ்ஞாணங், திண்ணங் ஸங்க³தி ப²ஸ்ஸோ, ப²ஸ்ஸபச்சயா வேத³னா, வேத³னாபச்சயா தண்ஹா, தண்ஹாபச்சயா உபாதா³னங், உபாதா³னபச்சயா கம்மங், கம்மதோ புன மனோ ஜாயதீ’தி. ஏவமேதிஸ்ஸா ஸந்ததியா அத்தி² அந்தோ’’தி? ‘‘நத்தி² ப⁴ந்தே’’தி. ‘‘ஏவமேவ கோ², மஹாராஜ, அத்³தா⁴னஸ்ஸாபி புரிமா கோடி ந பஞ்ஞாயதீ’’தி.
‘‘‘Sotañca paṭicca sadde ca…pe… manañca paṭicca dhamme ca uppajjati manoviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna mano jāyatī’ti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
புரிமகோடிபஞ்ஹோ து³தியோ.
Purimakoṭipañho dutiyo.
Footnotes:
