| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. པུརིམཀོཊིཔཉྷོ
2. Purimakoṭipañho
༢. རཱཛཱ ཨཱཧ ‘‘བྷནྟེ ནཱགསེན, ཡཾ པནེཏཾ བྲཱུསི ‘པུརིམཱ ཀོཊི ན པཉྙཱཡཏཱི’ཏི, ཏསྶ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, པུརིསོ པརིཏྟཾ 1 བཱིཛཾ པཐཝིཡཾ ནིཀྑིཔེཡྻ, ཏཏོ ཨངྐུརོ ཨུཊྛཧིཏྭཱ ཨནུཔུབྦེན ཝུཌྜྷིཾ ཝིརཱུལ༹ྷིཾ ཝེཔུལླཾ ཨཱཔཛྫིཏྭཱ ཕལཾ དདེཡྻ། ཏཏོ བཱིཛཾ གཧེཏྭཱ པུན རོཔེཡྻ, ཏཏོཔི ཨངྐུརོ ཨུཊྛཧིཏྭཱ ཨནུཔུབྦེན ཝུཌྜྷིཾ ཝིརཱུལ༹ྷིཾ ཝེཔུལླཾ ཨཱཔཛྫིཏྭཱ ཕལཾ དདེཡྻ། ཨེཝམེཏིསྶཱ སནྟཏིཡཱ ཨཏྠི ཨནྟོ’’ཏི? ‘‘ནཏྠི བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨདྡྷཱནསྶཱཔི པུརིམཱ ཀོཊི ན པཉྙཱཡཏཱི’’ཏི།
2. Rājā āha ‘‘bhante nāgasena, yaṃ panetaṃ brūsi ‘purimā koṭi na paññāyatī’ti, tassa opammaṃ karohī’’ti. ‘‘Yathā, mahārāja, puriso parittaṃ 2 bījaṃ pathaviyaṃ nikkhipeyya, tato aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Tato bījaṃ gahetvā puna ropeyya, tatopi aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཀུཀྐུཊིཡཱ ཨཎྜཾ བྷཝེཡྻ, ཨཎྜཏོ ཀུཀྐུཊཱི ཀུཀྐུཊིཡཱ ཨཎྜནྟི། ཨེཝམེཏིསྶཱ སནྟཏིཡཱ ཨཏྠི ཨནྟོ’’ཏི? ‘‘ནཏྠི བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨདྡྷཱནསྶཱཔི པུརིམཱ ཀོཊི ན པཉྙཱཡཏཱི’’ཏི།
‘‘Bhiyyo opammaṃ karohī’’ti. ‘‘Yathā, mahārāja, kukkuṭiyā aṇḍaṃ bhaveyya, aṇḍato kukkuṭī kukkuṭiyā aṇḍanti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘བྷིཡྻོ ཨོཔམྨཾ ཀརོཧཱི’’ཏི། ཐེརོ པཐཝིཡཱ ཙཀྐཾ ལིཁིཏྭཱ མིལིནྡཾ རཱཛཱནཾ ཨེཏདཝོཙ ‘‘ཨཏྠི, མཧཱརཱཛ, ཨིམསྶ ཙཀྐསྶ ཨནྟོ’’ཏི? ‘‘ནཏྠི བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨིམཱནི ཙཀྐཱནི ཝུཏྟཱནི བྷགཝཏཱ ‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ ཀམྨཾ, ཀམྨཏོ པུན ཙཀྑུཾ ཛཱཡཏཱི’ཏི། ཨེཝམེཏིསྶཱ སནྟཏིཡཱ ཨཏྠི ཨནྟོ’’ཏི? ‘‘ནཏྠི བྷནྟེ’’ཏི།
‘‘Bhiyyo opammaṃ karohī’’ti. Thero pathaviyā cakkaṃ likhitvā milindaṃ rājānaṃ etadavoca ‘‘atthi, mahārāja, imassa cakkassa anto’’ti? ‘‘Natthi bhante’’ti. ‘‘Evameva kho, mahārāja, imāni cakkāni vuttāni bhagavatā ‘cakkhuñca paṭicca rūpe ca uppajjati cakkhuviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna cakkhuṃ jāyatī’ti. Evametissā santatiyā atthi anto’’ti? ‘‘Natthi bhante’’ti.
‘‘‘སོཏཉྩ པཊིཙྩ སདྡེ ཙ…པེ॰… མནཉྩ པཊིཙྩ དྷམྨེ ཙ ཨུཔྤཛྫཏི མནོཝིཉྙཱཎཾ, ཏིཎྞཾ སངྒཏི ཕསྶོ, ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱནཾ, ཨུཔཱདཱནཔཙྩཡཱ ཀམྨཾ, ཀམྨཏོ པུན མནོ ཛཱཡཏཱི’ཏི། ཨེཝམེཏིསྶཱ སནྟཏིཡཱ ཨཏྠི ཨནྟོ’’ཏི? ‘‘ནཏྠི བྷནྟེ’’ཏི། ‘‘ཨེཝམེཝ ཁོ, མཧཱརཱཛ, ཨདྡྷཱནསྶཱཔི པུརིམཱ ཀོཊི ན པཉྙཱཡཏཱི’’ཏི།
‘‘‘Sotañca paṭicca sadde ca…pe… manañca paṭicca dhamme ca uppajjati manoviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna mano jāyatī’ti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
པུརིམཀོཊིཔཉྷོ དུཏིཡོ།
Purimakoṭipañho dutiyo.
Footnotes:
