| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২. পুরিসগতিসুত্তৰণ্ণনা
2. Purisagatisuttavaṇṇanā
৫৫. দুতিযে পুরিসগতিযোতি পুরিসস্স ঞাণগতিযো। অনুপাদাপরিনিব্বানন্তি অপচ্চযনিব্বানং। নো চস্সাতি অতীতে অত্তভাৰনিব্বত্তকং কম্মং নো চে অভৰিস্স। নো চ মে সিযাতি এতরহি মে অযং অত্তভাৰো ন সিযা। ন ভৰিস্সতীতি এতরহি মে অনাগতত্তভাৰনিব্বত্তকং কম্মং ন ভৰিস্সতি। ন চ মে ভৰিস্সতীতি অনাগতে মে অত্তভাৰো ন ভৰিস্সতি। যদত্থি যং ভূতন্তি যং অত্থি যং ভূতং পচ্চুপ্পন্নক্খন্ধপঞ্চকং। তং পজহামীতি উপেক্খং পটিলভতীতি তং তত্থ ছন্দরাগপ্পহানেন পজহামীতি ৰিপস্সনুপেক্খং পটিলভতি। ভৰে ন রজ্জতীতি অতীতে খন্ধপঞ্চকে তণ্হাদিট্ঠীহি ন রজ্জতি। সম্ভৰে ন রজ্জতীতি অনাগতেপি তথেৰ ন রজ্জতি। অত্থুত্তরি পদং সন্তন্তি উত্তরি সন্তং নিব্বানপদং নাম অত্থি। সম্মপ্পঞ্ঞায পস্সতীতি তং সহৰিপস্সনায মগ্গপঞ্ঞায সম্মা পস্সতি। ন সব্বেন সব্বন্তি একচ্চানং কিলেসানং অপ্পহীনত্তা সচ্চপটিচ্ছাদকস্স তমস্স সব্বসো অৰিদ্ধংসিতত্তা ন সব্বাকারেন সব্বং। হঞ্ঞমানেতি সণ্ডাসেন গহেত্ৰা মুট্ঠিকায কোট্টিযমানে। অন্তরাপরিনিব্বাযীতি উপপত্তিসমনন্তরতো পট্ঠায আযুনো ৰেমজ্ঝং অনতিক্কমিত্ৰা এত্থন্তরে কিলেসপরিনিব্বানেন পরিনিব্বুতো হোতি। অনুপহচ্চ তলন্তি আকাসতলং অনুপহচ্চ অনতিক্কমিত্ৰা , ভূমিং অপ্পত্ৰা আকাসেযেৰ নিব্বাযেয্যাতি ইমাহি তীহি উপমাহি তযো অন্তরাপরিনিব্বাযী দস্সিতা।
55. Dutiye purisagatiyoti purisassa ñāṇagatiyo. Anupādāparinibbānanti apaccayanibbānaṃ. No cassāti atīte attabhāvanibbattakaṃ kammaṃ no ce abhavissa. No ca me siyāti etarahi me ayaṃ attabhāvo na siyā. Na bhavissatīti etarahi me anāgatattabhāvanibbattakaṃ kammaṃ na bhavissati. Na ca me bhavissatīti anāgate me attabhāvo na bhavissati. Yadatthi yaṃ bhūtanti yaṃ atthi yaṃ bhūtaṃ paccuppannakkhandhapañcakaṃ. Taṃ pajahāmīti upekkhaṃ paṭilabhatīti taṃ tattha chandarāgappahānena pajahāmīti vipassanupekkhaṃ paṭilabhati. Bhave na rajjatīti atīte khandhapañcake taṇhādiṭṭhīhi na rajjati. Sambhave na rajjatīti anāgatepi tatheva na rajjati. Atthuttaripadaṃ santanti uttari santaṃ nibbānapadaṃ nāma atthi. Sammappaññāya passatīti taṃ sahavipassanāya maggapaññāya sammā passati. Na sabbena sabbanti ekaccānaṃ kilesānaṃ appahīnattā saccapaṭicchādakassa tamassa sabbaso aviddhaṃsitattā na sabbākārena sabbaṃ. Haññamāneti saṇḍāsena gahetvā muṭṭhikāya koṭṭiyamāne. Antarāparinibbāyīti upapattisamanantarato paṭṭhāya āyuno vemajjhaṃ anatikkamitvā etthantare kilesaparinibbānena parinibbuto hoti. Anupahacca talanti ākāsatalaṃ anupahacca anatikkamitvā , bhūmiṃ appatvā ākāseyeva nibbāyeyyāti imāhi tīhi upamāhi tayo antarāparinibbāyī dassitā.
উপহচ্চপরিনিব্বাযীতি আযুৰেমজ্ঝং অতিক্কমিত্ৰা পচ্ছিমকোটিং অপ্পত্ৰা পরিনিব্বুতো হোতি। উপহচ্চ তলন্তি জলমানা গন্ত্ৰা আকাসতলং অতিক্কমিত্ৰা পথৰীতলং ৰা উপহনিত্ৰা পথৰিযং পতিতমত্তাৰ নিব্বাযেয্য। অসঙ্খারেন অপ্পযোগেন কিলেসে খেপেত্ৰা পরিনিব্বাযীতি অসঙ্খারপরিনিব্বাযী। সসঙ্খারেন সপ্পযোগেন কিলেসে খেপেত্ৰা পরিনিব্বাযীতি সসঙ্খারপরিনিব্বাযী। গচ্ছন্তি নিরারক্খং অরঞ্ঞং। দাযন্তি সারক্খং অভযত্থায দিন্নং অরঞ্ঞং। সেসমেত্থ উত্তানত্থমেৰ। ইমস্মিং সুত্তে অরিযপুগ্গলাৰ কথিতাতি।
Upahaccaparinibbāyīti āyuvemajjhaṃ atikkamitvā pacchimakoṭiṃ appatvā parinibbuto hoti. Upahacca talanti jalamānā gantvā ākāsatalaṃ atikkamitvā pathavītalaṃ vā upahanitvā pathaviyaṃ patitamattāva nibbāyeyya. Asaṅkhārena appayogena kilese khepetvā parinibbāyīti asaṅkhāraparinibbāyī. Sasaṅkhārena sappayogena kilese khepetvā parinibbāyīti sasaṅkhāraparinibbāyī. Gacchanti nirārakkhaṃ araññaṃ. Dāyanti sārakkhaṃ abhayatthāya dinnaṃ araññaṃ. Sesamettha uttānatthameva. Imasmiṃ sutte ariyapuggalāva kathitāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২. পুরিসগতিসুত্তং • 2. Purisagatisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. অব্যাকতসুত্তাদিৰণ্ণনা • 1-2. Abyākatasuttādivaṇṇanā
