| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. புத்தமங்ஸூபமஸுத்தங்
3. Puttamaṃsūpamasuttaṃ
63. ஸாவத்தி²யங் …பே॰… ‘‘சத்தாரோமே , பி⁴க்க²வே, ஆஹாரா பூ⁴தானங் வா ஸத்தானங் டி²தியா ஸம்ப⁴வேஸீனங் வா அனுக்³க³ஹாய . கதமே சத்தாரோ? கப³ளீகாரோ ஆஹாரோ ஓளாரிகோ வா ஸுகு²மோ வா, ப²ஸ்ஸோ து³தியோ, மனோஸஞ்சேதனா ததியா, விஞ்ஞாணங் சதுத்த²ங். இமே கோ², பி⁴க்க²வே, சத்தாரோ ஆஹாரா பூ⁴தானங் வா ஸத்தானங் டி²தியா ஸம்ப⁴வேஸீனங் வா அனுக்³க³ஹாய’’.
63. Sāvatthiyaṃ …pe… ‘‘cattārome , bhikkhave, āhārā bhūtānaṃ vā sattānaṃ ṭhitiyā sambhavesīnaṃ vā anuggahāya . Katame cattāro? Kabaḷīkāro āhāro oḷāriko vā sukhumo vā, phasso dutiyo, manosañcetanā tatiyā, viññāṇaṃ catutthaṃ. Ime kho, bhikkhave, cattāro āhārā bhūtānaṃ vā sattānaṃ ṭhitiyā sambhavesīnaṃ vā anuggahāya’’.
‘‘கத²ஞ்ச, பி⁴க்க²வே, கப³ளீகாரோ ஆஹாரோ த³ட்ட²ப்³போ³? ஸெய்யதா²பி, பி⁴க்க²வே, த்³வே ஜாயம்பதிகா 1 பரித்தங் ஸம்ப³லங் ஆதா³ய கந்தாரமக்³க³ங் படிபஜ்ஜெய்யுங். தேஸமஸ்ஸ ஏகபுத்தகோ பியோ மனாபோ. அத² கோ² தேஸங், பி⁴க்க²வே, த்³வின்னங் ஜாயம்பதிகானங் கந்தாரக³தானங் யா பரித்தா ஸம்ப³லமத்தா, ஸா பரிக்க²யங் பரியாதா³னங் க³ச்செ²ய்ய. ஸியா ச நேஸங் கந்தாராவஸேஸோ அனதிண்ணோ. அத² கோ² தேஸங், பி⁴க்க²வே, த்³வின்னங் ஜாயம்பதிகானங் ஏவமஸ்ஸ – ‘அம்ஹாகங் கோ² யா பரித்தா ஸம்ப³லமத்தா ஸா பரிக்கீ²ணா பரியாதி³ண்ணா 2. அத்தி² சாயங் கந்தாராவஸேஸோ அனித்திண்ணோ 3. யங்னூன மயங் இமங் ஏகபுத்தகங் பியங் மனாபங் வதி⁴த்வா வல்லூரஞ்ச ஸொண்டி³கஞ்ச கரித்வா புத்தமங்ஸானி கா²த³ந்தா ஏவங் தங் கந்தாராவஸேஸங் நித்த²ரெய்யாம, மா ஸப்³பே³வ தயோ வினஸ்ஸிம்ஹா’தி. அத² கோ² தே, பி⁴க்க²வே, த்³வே ஜாயம்பதிகா தங் ஏகபுத்தகங் பியங் மனாபங் வதி⁴த்வா வல்லூரஞ்ச ஸொண்டி³கஞ்ச கரித்வா புத்தமங்ஸானி கா²த³ந்தா ஏவங் தங் கந்தாராவஸேஸங் நித்த²ரெய்யுங். தே புத்தமங்ஸானி சேவ கா²தெ³ய்யுங், உரே ச படிபிஸெய்யுங் – ‘கஹங், ஏகபுத்தக, கஹங், ஏகபுத்தகா’தி.
‘‘Kathañca, bhikkhave, kabaḷīkāro āhāro daṭṭhabbo? Seyyathāpi, bhikkhave, dve jāyampatikā 4 parittaṃ sambalaṃ ādāya kantāramaggaṃ paṭipajjeyyuṃ. Tesamassa ekaputtako piyo manāpo. Atha kho tesaṃ, bhikkhave, dvinnaṃ jāyampatikānaṃ kantāragatānaṃ yā parittā sambalamattā, sā parikkhayaṃ pariyādānaṃ gaccheyya. Siyā ca nesaṃ kantārāvaseso anatiṇṇo. Atha kho tesaṃ, bhikkhave, dvinnaṃ jāyampatikānaṃ evamassa – ‘amhākaṃ kho yā parittā sambalamattā sā parikkhīṇā pariyādiṇṇā 5. Atthi cāyaṃ kantārāvaseso anittiṇṇo 6. Yaṃnūna mayaṃ imaṃ ekaputtakaṃ piyaṃ manāpaṃ vadhitvā vallūrañca soṇḍikañca karitvā puttamaṃsāni khādantā evaṃ taṃ kantārāvasesaṃ nitthareyyāma, mā sabbeva tayo vinassimhā’ti. Atha kho te, bhikkhave, dve jāyampatikā taṃ ekaputtakaṃ piyaṃ manāpaṃ vadhitvā vallūrañca soṇḍikañca karitvā puttamaṃsāni khādantā evaṃ taṃ kantārāvasesaṃ nitthareyyuṃ. Te puttamaṃsāni ceva khādeyyuṃ, ure ca paṭipiseyyuṃ – ‘kahaṃ, ekaputtaka, kahaṃ, ekaputtakā’ti.
‘‘தங் கிங் மஞ்ஞத², பி⁴க்க²வே, அபி நு தே த³வாய வா ஆஹாரங் ஆஹாரெய்யுங், மதா³ய வா ஆஹாரங் ஆஹாரெய்யுங், மண்ட³னாய வா ஆஹாரங் ஆஹாரெய்யுங், விபூ⁴ஸனாய வா ஆஹாரங் ஆஹாரெய்யு’’ந்தி? ‘‘நோ ஹேதங், ப⁴ந்தே’’. ‘‘நனு தே, பி⁴க்க²வே, யாவதே³வ கந்தாரஸ்ஸ நித்த²ரணத்தா²ய ஆஹாரங் ஆஹாரெய்யு’’ந்தி? ‘‘ஏவங், ப⁴ந்தே’’. ‘‘ஏவமேவ க்²வாஹங், பி⁴க்க²வே, கப³ளீகாரோ ஆஹாரோ த³ட்ட²ப்³போ³’’தி வதா³மி. கப³ளீகாரே, பி⁴க்க²வே, ஆஹாரே பரிஞ்ஞாதே பஞ்சகாமகு³ணிகோ ராகோ³ பரிஞ்ஞாதோ ஹோதி. பஞ்சகாமகு³ணிகே ராகே³ பரிஞ்ஞாதே நத்தி² தங் ஸங்யோஜனங் யேன ஸங்யோஜனேன ஸங்யுத்தோ அரியஸாவகோ புன இமங் லோகங் ஆக³ச்செ²ய்ய.
‘‘Taṃ kiṃ maññatha, bhikkhave, api nu te davāya vā āhāraṃ āhāreyyuṃ, madāya vā āhāraṃ āhāreyyuṃ, maṇḍanāya vā āhāraṃ āhāreyyuṃ, vibhūsanāya vā āhāraṃ āhāreyyu’’nti? ‘‘No hetaṃ, bhante’’. ‘‘Nanu te, bhikkhave, yāvadeva kantārassa nittharaṇatthāya āhāraṃ āhāreyyu’’nti? ‘‘Evaṃ, bhante’’. ‘‘Evameva khvāhaṃ, bhikkhave, kabaḷīkāro āhāro daṭṭhabbo’’ti vadāmi. Kabaḷīkāre, bhikkhave, āhāre pariññāte pañcakāmaguṇiko rāgo pariññāto hoti. Pañcakāmaguṇike rāge pariññāte natthi taṃ saṃyojanaṃ yena saṃyojanena saṃyutto ariyasāvako puna imaṃ lokaṃ āgaccheyya.
‘‘கத²ஞ்ச, பி⁴க்க²வே, ப²ஸ்ஸாஹாரோ த³ட்ட²ப்³போ³? ஸெய்யதா²பி, பி⁴க்க²வே, கா³வீ நிச்சம்மா குட்டங் சே 7 நிஸ்ஸாய திட்டெ²ய்ய. யே குட்டனிஸ்ஸிதா பாணா தே நங் கா²தெ³ய்யுங். ருக்க²ங் சே நிஸ்ஸாய திட்டெ²ய்ய, யே ருக்க²னிஸ்ஸிதா பாணா தே நங் கா²தெ³ய்யுங். உத³கங் சே நிஸ்ஸாய திட்டெ²ய்ய, யே உத³கனிஸ்ஸிதா பாணா தே நங் கா²தெ³ய்யுங். ஆகாஸங் சே நிஸ்ஸாய திட்டெ²ய்ய, யே ஆகாஸனிஸ்ஸிதா பாணா தே நங் கா²தெ³ய்யுங். யங் யதே³வ ஹி ஸா, பி⁴க்க²வே, கா³வீ நிச்சம்மா நிஸ்ஸாய திட்டெ²ய்ய, யே தன்னிஸ்ஸிதா 8 பாணா தே நங் கா²தெ³ய்யுங். ஏவமேவ க்²வாஹங், பி⁴க்க²வே, ‘‘ப²ஸ்ஸாஹாரோ த³ட்ட²ப்³போ³’’தி வதா³மி. ப²ஸ்ஸே, பி⁴க்க²வே, ஆஹாரே பரிஞ்ஞாதே திஸ்ஸோ வேத³னா பரிஞ்ஞாதா ஹொந்தி. தீஸு வேத³னாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி 9 வதா³மி.
‘‘Kathañca, bhikkhave, phassāhāro daṭṭhabbo? Seyyathāpi, bhikkhave, gāvī niccammā kuṭṭaṃ ce 10 nissāya tiṭṭheyya. Ye kuṭṭanissitā pāṇā te naṃ khādeyyuṃ. Rukkhaṃ ce nissāya tiṭṭheyya, ye rukkhanissitā pāṇā te naṃ khādeyyuṃ. Udakaṃ ce nissāya tiṭṭheyya, ye udakanissitā pāṇā te naṃ khādeyyuṃ. Ākāsaṃ ce nissāya tiṭṭheyya, ye ākāsanissitā pāṇā te naṃ khādeyyuṃ. Yaṃ yadeva hi sā, bhikkhave, gāvī niccammā nissāya tiṭṭheyya, ye tannissitā 11 pāṇā te naṃ khādeyyuṃ. Evameva khvāhaṃ, bhikkhave, ‘‘phassāhāro daṭṭhabbo’’ti vadāmi. Phasse, bhikkhave, āhāre pariññāte tisso vedanā pariññātā honti. Tīsu vedanāsu pariññātāsu ariyasāvakassa natthi kiñci uttarikaraṇīyanti 12 vadāmi.
‘‘கத²ஞ்ச , பி⁴க்க²வே, மனோஸஞ்சேதனாஹாரோ த³ட்ட²ப்³போ³? ஸெய்யதா²பி , பி⁴க்க²வே, அங்கா³ரகாஸு ஸாதி⁴கபோரிஸா புண்ணா அங்கா³ரானங் வீதச்சிகானங் வீததூ⁴மானங். அத² புரிஸோ ஆக³ச்செ²ய்ய ஜீவிதுகாமோ அமரிதுகாமோ ஸுக²காமோ து³க்க²ப்படிகூலோ. தமேனங் த்³வே ப³லவந்தோ புரிஸா நானாபா³ஹாஸு க³ஹெத்வா தங் அங்கா³ரகாஸுங் உபகட்³டெ⁴ய்யுங். அத² கோ², பி⁴க்க²வே, தஸ்ஸ புரிஸஸ்ஸ ஆரகாவஸ்ஸ சேதனா ஆரகா பத்த²னா ஆரகா பணிதி⁴. தங் கிஸ்ஸ ஹேது? ஏவஞ்ஹி, பி⁴க்க²வே, தஸ்ஸ புரிஸஸ்ஸ ஹோதி – ‘இமங் சாஹங் அங்கா³ரகாஸுங் பபதிஸ்ஸாமி, ததோனிதா³னங் மரணங் வா நிக³ச்சா²மி மரணமத்தங் வா து³க்க²’ந்தி. ஏவமேவ க்²வாஹங், பி⁴க்க²வே, ‘மனோஸஞ்சேதனாஹாரோ த³ட்ட²ப்³போ³’தி வதா³மி. மனோஸஞ்சேதனாய, பி⁴க்க²வே, ஆஹாரே பரிஞ்ஞாதே திஸ்ஸோ தண்ஹா பரிஞ்ஞாதா ஹொந்தி. தீஸு தண்ஹாஸு பரிஞ்ஞாதாஸு அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மி.
‘‘Kathañca , bhikkhave, manosañcetanāhāro daṭṭhabbo? Seyyathāpi , bhikkhave, aṅgārakāsu sādhikaporisā puṇṇā aṅgārānaṃ vītaccikānaṃ vītadhūmānaṃ. Atha puriso āgaccheyya jīvitukāmo amaritukāmo sukhakāmo dukkhappaṭikūlo. Tamenaṃ dve balavanto purisā nānābāhāsu gahetvā taṃ aṅgārakāsuṃ upakaḍḍheyyuṃ. Atha kho, bhikkhave, tassa purisassa ārakāvassa cetanā ārakā patthanā ārakā paṇidhi. Taṃ kissa hetu? Evañhi, bhikkhave, tassa purisassa hoti – ‘imaṃ cāhaṃ aṅgārakāsuṃ papatissāmi, tatonidānaṃ maraṇaṃ vā nigacchāmi maraṇamattaṃ vā dukkha’nti. Evameva khvāhaṃ, bhikkhave, ‘manosañcetanāhāro daṭṭhabbo’ti vadāmi. Manosañcetanāya, bhikkhave, āhāre pariññāte tisso taṇhā pariññātā honti. Tīsu taṇhāsu pariññātāsu ariyasāvakassa natthi kiñci uttarikaraṇīyanti vadāmi.
‘‘கத²ஞ்ச, பி⁴க்க²வே, விஞ்ஞாணாஹாரோ த³ட்ட²ப்³போ³? ஸெய்யதா²பி, பி⁴க்க²வே, சோரங் ஆகு³சாரிங் க³ஹெத்வா ரஞ்ஞோ த³ஸ்ஸெய்யுங் – ‘அயங் தே, தே³வ, சோரோ ஆகு³சாரீ, இமஸ்ஸ யங் இச்ச²ஸி தங் த³ண்ட³ங் பணேஹீ’தி. தமேனங் ராஜா ஏவங் வதெ³ய்ய – ‘க³ச்ச²த², போ⁴, இமங் புரிஸங் புப்³ப³ண்ஹஸமயங் ஸத்திஸதேன ஹனதா²’தி. தமேனங் புப்³ப³ண்ஹஸமயங் ஸத்திஸதேன ஹனெய்யுங். அத² ராஜா மஜ்ஜ²ன்ஹிகஸமயங் ஏவங் வதெ³ய்ய – ‘அம்போ⁴, கத²ங் ஸோ புரிஸோ’தி? ‘ததே²வ, தே³வ, ஜீவதீ’தி. தமேனங் ராஜா ஏவங் வதெ³ய்ய – ‘க³ச்ச²த², போ⁴, தங் புரிஸங் மஜ்ஜ²ன்ஹிகஸமயங் ஸத்திஸதேன ஹனதா²’தி. தமேனங் மஜ்ஜ²ன்ஹிகஸமயங் ஸத்திஸதேன ஹனெய்யுங். அத² ராஜா ஸாயன்ஹஸமயங் ஏவங் வதெ³ய்ய – ‘அம்போ⁴, கத²ங் ஸோ புரிஸோ’தி? ‘ததே²வ, தே³வ, ஜீவதீ’தி. தமேனங் ராஜா ஏவங் வதெ³ய்ய – ‘க³ச்ச²த², போ⁴, தங் புரிஸங் ஸாயன்ஹஸமயங் ஸத்திஸதேன ஹனதா²’தி. தமேனங் ஸாயன்ஹஸமயங் ஸத்திஸதேன ஹனெய்யுங். தங் கிங் மஞ்ஞத² , பி⁴க்க²வே, அபி நு ஸோ புரிஸோ தி³வஸங் தீஹி ஸத்திஸதேஹி ஹஞ்ஞமானோ ததோனிதா³னங் து³க்க²ங் தோ³மனஸ்ஸங் படிஸங்வேதி³யேதா²’’தி? ‘‘ஏகிஸ்ஸாபி, ப⁴ந்தே, ஸத்தியா ஹஞ்ஞமானோ ததோனிதா³னங் து³க்க²ங் தோ³மனஸ்ஸங் படிஸங்வேதி³யேத²; கோ பன வாதோ³ தீஹி ஸத்திஸதேஹி ஹஞ்ஞமானோ’’தி! ‘‘ஏவமேவ க்²வாஹங், பி⁴க்க²வே, விஞ்ஞாணாஹாரோ த³ட்ட²ப்³போ³தி வதா³மி. விஞ்ஞாணே, பி⁴க்க²வே, ஆஹாரே பரிஞ்ஞாதே நாமரூபங் பரிஞ்ஞாதங் ஹோதி, நாமரூபே பரிஞ்ஞாதே அரியஸாவகஸ்ஸ நத்தி² கிஞ்சி உத்தரிகரணீயந்தி வதா³மீ’’தி. ததியங்.
‘‘Kathañca, bhikkhave, viññāṇāhāro daṭṭhabbo? Seyyathāpi, bhikkhave, coraṃ āgucāriṃ gahetvā rañño dasseyyuṃ – ‘ayaṃ te, deva, coro āgucārī, imassa yaṃ icchasi taṃ daṇḍaṃ paṇehī’ti. Tamenaṃ rājā evaṃ vadeyya – ‘gacchatha, bho, imaṃ purisaṃ pubbaṇhasamayaṃ sattisatena hanathā’ti. Tamenaṃ pubbaṇhasamayaṃ sattisatena haneyyuṃ. Atha rājā majjhanhikasamayaṃ evaṃ vadeyya – ‘ambho, kathaṃ so puriso’ti? ‘Tatheva, deva, jīvatī’ti. Tamenaṃ rājā evaṃ vadeyya – ‘gacchatha, bho, taṃ purisaṃ majjhanhikasamayaṃ sattisatena hanathā’ti. Tamenaṃ majjhanhikasamayaṃ sattisatena haneyyuṃ. Atha rājā sāyanhasamayaṃ evaṃ vadeyya – ‘ambho, kathaṃ so puriso’ti? ‘Tatheva, deva, jīvatī’ti. Tamenaṃ rājā evaṃ vadeyya – ‘gacchatha, bho, taṃ purisaṃ sāyanhasamayaṃ sattisatena hanathā’ti. Tamenaṃ sāyanhasamayaṃ sattisatena haneyyuṃ. Taṃ kiṃ maññatha , bhikkhave, api nu so puriso divasaṃ tīhi sattisatehi haññamāno tatonidānaṃ dukkhaṃ domanassaṃ paṭisaṃvediyethā’’ti? ‘‘Ekissāpi, bhante, sattiyā haññamāno tatonidānaṃ dukkhaṃ domanassaṃ paṭisaṃvediyetha; ko pana vādo tīhi sattisatehi haññamāno’’ti! ‘‘Evameva khvāhaṃ, bhikkhave, viññāṇāhāro daṭṭhabboti vadāmi. Viññāṇe, bhikkhave, āhāre pariññāte nāmarūpaṃ pariññātaṃ hoti, nāmarūpe pariññāte ariyasāvakassa natthi kiñci uttarikaraṇīyanti vadāmī’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. புத்தமங்ஸூபமஸுத்தவண்ணனா • 3. Puttamaṃsūpamasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. புத்தமங்ஸூபமஸுத்தவண்ணனா • 3. Puttamaṃsūpamasuttavaṇṇanā
