| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
९-१०. पुत्तसुत्तादिवण्णना
9-10. Puttasuttādivaṇṇanā
३९-४०. नवमे भतोति पोसितो। तं पन भरणं जातकालतो पट्ठाय सुखपच्चयूपहरणेन दुक्खपच्चयापहरणेन च पवत्तितन्ति दस्सेतुं ‘‘अम्हेही’’तिआदि वुत्तं। हत्थपादवड्ढनादीहीति आदि-सद्देन मुखेन सिङ्घानिकापनयननहापनमण्डनादिञ्च सङ्गण्हाति। मातापितूनं सन्तकं खेत्तादिं अविनासेत्वा रक्खितं तेसं परम्पराय ठितिया कारणं होतीति आह ‘‘अम्हाकं सन्तकं…पे॰… कुलवंसो चिरं ठस्सती’’ति। सलाकभत्तादीनि अनुपच्छिन्दित्वाति सलाकभत्तादीनि अविच्छिन्दित्वा। यस्मा दायज्जप्पटिलाभस्स योग्यभावेन वत्तमानोयेव दायस्स पटिपज्जिस्सति, न इतरोति आह ‘‘कुलवंसानुरूपाय पटिपत्तिया’’तिआदि । अत्तना दायज्जारहं करोन्तोति अत्तानं दायज्जारहं करोन्तो। मातापितरो हि अत्तनो ओवादे अवत्तमाने मिच्छापटिपन्ने दारके विनिच्छयं गन्त्वा अपुत्ते करोन्ति, ते दायज्जारहा न होन्ति। ओवादे वत्तमाने पन कुलसन्तकस्स सामिके करोन्ति। ततियदिवसतो पट्ठायाति मतदिवसतो ततियदिवसतो पट्ठाय। सेसं सुविञ्ञेय्यमेव। दसमं उत्तानमेव।
39-40. Navame bhatoti posito. Taṃ pana bharaṇaṃ jātakālato paṭṭhāya sukhapaccayūpaharaṇena dukkhapaccayāpaharaṇena ca pavattitanti dassetuṃ ‘‘amhehī’’tiādi vuttaṃ. Hatthapādavaḍḍhanādīhīti ādi-saddena mukhena siṅghānikāpanayananahāpanamaṇḍanādiñca saṅgaṇhāti. Mātāpitūnaṃ santakaṃ khettādiṃ avināsetvā rakkhitaṃ tesaṃ paramparāya ṭhitiyā kāraṇaṃ hotīti āha ‘‘amhākaṃ santakaṃ…pe… kulavaṃso ciraṃ ṭhassatī’’ti. Salākabhattādīni anupacchinditvāti salākabhattādīni avicchinditvā. Yasmā dāyajjappaṭilābhassa yogyabhāvena vattamānoyeva dāyassa paṭipajjissati, na itaroti āha ‘‘kulavaṃsānurūpāya paṭipattiyā’’tiādi . Attanā dāyajjārahaṃ karontoti attānaṃ dāyajjārahaṃ karonto. Mātāpitaro hi attano ovāde avattamāne micchāpaṭipanne dārake vinicchayaṃ gantvā aputte karonti, te dāyajjārahā na honti. Ovāde vattamāne pana kulasantakassa sāmike karonti. Tatiyadivasato paṭṭhāyāti matadivasato tatiyadivasato paṭṭhāya. Sesaṃ suviññeyyameva. Dasamaṃ uttānameva.
पुत्तसुत्तादिवण्णना निट्ठिता।
Puttasuttādivaṇṇanā niṭṭhitā.
सुमनवग्गवण्णना निट्ठिता।
Sumanavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
९. पुत्तसुत्तं • 9. Puttasuttaṃ
१०. महासालपुत्तसुत्तं • 10. Mahāsālaputtasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
९. पुत्तसुत्तवण्णना • 9. Puttasuttavaṇṇanā
१०. महासालपुत्तसुत्तवण्णना • 10. Mahāsālaputtasuttavaṇṇanā
