| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
9-10. පුත්‌තසුත්‌තාදිවණ්‌ණනා
9-10. Puttasuttādivaṇṇanā
39-40. නවමෙ භතොති පොසිතො. තං පන භරණං ජාතකාලතො පට්‌ඨාය සුඛපච්‌චයූපහරණෙන දුක්‌ඛපච්‌චයාපහරණෙන ච පවත්‌තිතන්‌ති දස්‌සෙතුං ‘‘අම්‌හෙහී’’තිආදි වුත්‌තං. හත්‌ථපාදවඩ්‌ඪනාදීහීති ආදි-සද්‌දෙන මුඛෙන සිඞ්‌ඝානිකාපනයනනහාපනමණ්‌ඩනාදිඤ්‌ච සඞ්‌ගණ්‌හාති. මාතාපිතූනං සන්‌තකං ඛෙත්‌තාදිං අවිනාසෙත්‌වා රක්‌ඛිතං තෙසං පරම්‌පරාය ඨිතියා කාරණං හොතීති ආහ ‘‘අම්‌හාකං සන්‌තකං…පෙ.… කුලවංසො චිරං ඨස්‌සතී’’ති. සලාකභත්‌තාදීනි අනුපච්‌ඡින්‌දිත්‌වාති සලාකභත්‌තාදීනි අවිච්‌ඡින්‌දිත්‌වා. යස්‌මා දායජ්‌ජප්‌පටිලාභස්‌ස යොග්‍යභාවෙන වත්‌තමානොයෙව දායස්‌ස පටිපජ්‌ජිස්‌සති, න ඉතරොති ආහ ‘‘කුලවංසානුරූපාය පටිපත්‌තියා’’තිආදි . අත්‌තනා දායජ්‌ජාරහං කරොන්‌තොති අත්‌තානං දායජ්‌ජාරහං කරොන්‌තො. මාතාපිතරො හි අත්‌තනො ඔවාදෙ අවත්‌තමානෙ මිච්‌ඡාපටිපන්‌නෙ දාරකෙ විනිච්‌ඡයං ගන්‌ත්‌වා අපුත්‌තෙ කරොන්‌ති, තෙ දායජ්‌ජාරහා න හොන්‌ති. ඔවාදෙ වත්‌තමානෙ පන කුලසන්‌තකස්‌ස සාමිකෙ කරොන්‌ති. තතියදිවසතො පට්‌ඨායාති මතදිවසතො තතියදිවසතො පට්‌ඨාය. සෙසං සුවිඤ්‌ඤෙය්‍යමෙව. දසමං උත්‌තානමෙව.
39-40. Navame bhatoti posito. Taṃ pana bharaṇaṃ jātakālato paṭṭhāya sukhapaccayūpaharaṇena dukkhapaccayāpaharaṇena ca pavattitanti dassetuṃ ‘‘amhehī’’tiādi vuttaṃ. Hatthapādavaḍḍhanādīhīti ādi-saddena mukhena siṅghānikāpanayananahāpanamaṇḍanādiñca saṅgaṇhāti. Mātāpitūnaṃ santakaṃ khettādiṃ avināsetvā rakkhitaṃ tesaṃ paramparāya ṭhitiyā kāraṇaṃ hotīti āha ‘‘amhākaṃ santakaṃ…pe… kulavaṃso ciraṃ ṭhassatī’’ti. Salākabhattādīni anupacchinditvāti salākabhattādīni avicchinditvā. Yasmā dāyajjappaṭilābhassa yogyabhāvena vattamānoyeva dāyassa paṭipajjissati, na itaroti āha ‘‘kulavaṃsānurūpāya paṭipattiyā’’tiādi . Attanā dāyajjārahaṃ karontoti attānaṃ dāyajjārahaṃ karonto. Mātāpitaro hi attano ovāde avattamāne micchāpaṭipanne dārake vinicchayaṃ gantvā aputte karonti, te dāyajjārahā na honti. Ovāde vattamāne pana kulasantakassa sāmike karonti. Tatiyadivasato paṭṭhāyāti matadivasato tatiyadivasato paṭṭhāya. Sesaṃ suviññeyyameva. Dasamaṃ uttānameva.
පුත්‌තසුත්‌තාදිවණ්‌ණනා නිට්‌ඨිතා.
Puttasuttādivaṇṇanā niṭṭhitā.
සුමනවග්‌ගවණ්‌ණනා නිට්‌ඨිතා.
Sumanavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya
9. පුත්‌තසුත්‌තං • 9. Puttasuttaṃ
10. මහාසාලපුත්‌තසුත්‌තං • 10. Mahāsālaputtasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā)
9. පුත්‌තසුත්‌තවණ්‌ණනා • 9. Puttasuttavaṇṇanā
10. මහාසාලපුත්‌තසුත්‌තවණ්‌ණනා • 10. Mahāsālaputtasuttavaṇṇanā
