| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৫. পুত্তসুত্তং
5. Puttasuttaṃ
৭৪. ৰুত্তঞ্হেতং ভগৰতা, ৰুত্তমরহতাতি মে সুতং –
74. Vuttañhetaṃ bhagavatā, vuttamarahatāti me sutaṃ –
‘‘তযোমে, ভিক্খৰে, পুত্তা সন্তো সংৰিজ্জমানা লোকস্মিং। কতমে তযো? অতিজাতো, অনুজাতো, অৰজাতোতি।
‘‘Tayome, bhikkhave, puttā santo saṃvijjamānā lokasmiṃ. Katame tayo? Atijāto, anujāto, avajātoti.
‘‘কথঞ্চ , ভিক্খৰে, পুত্তো অতিজাতো হোতি? ইধ, ভিক্খৰে, পুত্তস্স মাতাপিতরো হোন্তি ন বুদ্ধং সরণং গতা, ন ধম্মং সরণং গতা, ন সঙ্ঘং সরণং গতা; পাণাতিপাতা অপ্পটিৰিরতা, অদিন্নাদানা অপ্পটিৰিরতা, কামেসুমিচ্ছাচারা অপ্পটিৰিরতা, মুসাৰাদা অপ্পটিৰিরতা, সুরামেরযমজ্জপমাদট্ঠানা অপ্পটিৰিরতা, দুস্সীলা পাপধম্মা। পুত্তো চ নেসং হোতি বুদ্ধং সরণং গতো, ধম্মং সরণং গতো, সঙ্ঘং সরণং গতো; পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো, সীলৰা কল্যাণধম্মো। এৰং খো, ভিক্খৰে, পুত্তো অতিজাতো হোতি।
‘‘Kathañca , bhikkhave, putto atijāto hoti? Idha, bhikkhave, puttassa mātāpitaro honti na buddhaṃ saraṇaṃ gatā, na dhammaṃ saraṇaṃ gatā, na saṅghaṃ saraṇaṃ gatā; pāṇātipātā appaṭiviratā, adinnādānā appaṭiviratā, kāmesumicchācārā appaṭiviratā, musāvādā appaṭiviratā, surāmerayamajjapamādaṭṭhānā appaṭiviratā, dussīlā pāpadhammā. Putto ca nesaṃ hoti buddhaṃ saraṇaṃ gato, dhammaṃ saraṇaṃ gato, saṅghaṃ saraṇaṃ gato; pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo. Evaṃ kho, bhikkhave, putto atijāto hoti.
‘‘কথঞ্চ , ভিক্খৰে, পুত্তো অনুজাতো হোতি? ইধ, ভিক্খৰে, পুত্তস্স মাতাপিতরো হোন্তি বুদ্ধং সরণং গতা, ধম্মং সরণং গতা, সঙ্ঘং সরণং গতা; পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা, সীলৰন্তো কল্যাণধম্মা। পুত্তোপি নেসং হোতি বুদ্ধং সরণং গতো, ধম্মং সরণং গতো, সঙ্ঘং সরণং গতো; পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো, সীলৰা কল্যাণধম্মো। এৰং খো, ভিক্খৰে, পুত্তো অনুজাতো হোতি।
‘‘Kathañca , bhikkhave, putto anujāto hoti? Idha, bhikkhave, puttassa mātāpitaro honti buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā; pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā. Puttopi nesaṃ hoti buddhaṃ saraṇaṃ gato, dhammaṃ saraṇaṃ gato, saṅghaṃ saraṇaṃ gato; pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo. Evaṃ kho, bhikkhave, putto anujāto hoti.
‘‘কথঞ্চ , ভিক্খৰে, পুত্তো অৰজাতো হোতি? ইধ, ভিক্খৰে, পুত্তস্স মাতাপিতরো হোন্তি বুদ্ধং সরণং গতা, ধম্মং সরণং গতা, সঙ্ঘং সরণং গতা; পাণাতিপাতা পটিৰিরতা, অদিন্নাদানা পটিৰিরতা, কামেসুমিচ্ছাচারা পটিৰিরতা, মুসাৰাদা পটিৰিরতা, সুরামেরযমজ্জপমাদট্ঠানা পটিৰিরতা, সীলৰন্তো কল্যাণধম্মা। পুত্তো চ নেসং হোতি ন বুদ্ধং সরণং গতো, ন ধম্মং সরণং গতো, ন সঙ্ঘং সরণং গতো; পাণাতিপাতা অপ্পটিৰিরতো, অদিন্নাদানা অপ্পটিৰিরতো, কামেসুমিচ্ছাচারা অপ্পটিৰিরতো, মুসাৰাদা অপ্পটিৰিরতো, সুরামেরযমজ্জপমাদট্ঠানা অপ্পটিৰিরতো, দুস্সীলো পাপধম্মো। এৰং খো, ভিক্খৰে, পুত্তো অৰজাতো হোতি। ইমে খো, ভিক্খৰে, তযো পুত্তা সন্তো সংৰিজ্জমানা লোকস্মি’’ন্তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Kathañca , bhikkhave, putto avajāto hoti? Idha, bhikkhave, puttassa mātāpitaro honti buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā; pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā. Putto ca nesaṃ hoti na buddhaṃ saraṇaṃ gato, na dhammaṃ saraṇaṃ gato, na saṅghaṃ saraṇaṃ gato; pāṇātipātā appaṭivirato, adinnādānā appaṭivirato, kāmesumicchācārā appaṭivirato, musāvādā appaṭivirato, surāmerayamajjapamādaṭṭhānā appaṭivirato, dussīlo pāpadhammo. Evaṃ kho, bhikkhave, putto avajāto hoti. Ime kho, bhikkhave, tayo puttā santo saṃvijjamānā lokasmi’’nti. Etamatthaṃ bhagavā avoca. Tatthetaṃ iti vuccati –
‘‘অতিজাতং অনুজাতং, পুত্তমিচ্ছন্তি পণ্ডিতা।
‘‘Atijātaṃ anujātaṃ, puttamicchanti paṇḍitā;
অৰজাতং ন ইচ্ছন্তি, যো হোতি কুলগন্ধনো॥
Avajātaṃ na icchanti, yo hoti kulagandhano.
‘‘এতে খো পুত্তা লোকস্মিং, যে ভৰন্তি উপাসকা।
‘‘Ete kho puttā lokasmiṃ, ye bhavanti upāsakā;
সদ্ধা সীলেন সম্পন্না, ৰদঞ্ঞূ ৰীতমচ্ছরা।
Saddhā sīlena sampannā, vadaññū vītamaccharā;
চন্দো অব্ভঘনা মুত্তো, পরিসাসু ৰিরোচরে’’তি॥
Cando abbhaghanā mutto, parisāsu virocare’’ti.
অযম্পি অত্থো ৰুত্তো ভগৰতা, ইতি মে সুতন্তি। পঞ্চমং।
Ayampi attho vutto bhagavatā, iti me sutanti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৫. পুত্তসুত্তৰণ্ণনা • 5. Puttasuttavaṇṇanā
