| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
९. पुत्तसुत्तं
9. Puttasuttaṃ
३९. ‘‘पञ्चिमानि , भिक्खवे, ठानानि सम्पस्सन्ता मातापितरो पुत्तं इच्छन्ति कुले जायमानं। कतमानि पञ्च? भतो वा नो भरिस्सति; किच्चं वा नो करिस्सति; कुलवंसो चिरं ठस्सति; दायज्जं पटिपज्जिस्सति; अथ वा पन पेतानं कालङ्कतानं दक्खिणं अनुप्पदस्सतीति। इमानि खो, भिक्खवे, पञ्च ठानानि सम्पस्सन्ता मातापितरो पुत्तं इच्छन्ति कुले जायमान’’न्ति।
39. ‘‘Pañcimāni , bhikkhave, ṭhānāni sampassantā mātāpitaro puttaṃ icchanti kule jāyamānaṃ. Katamāni pañca? Bhato vā no bharissati; kiccaṃ vā no karissati; kulavaṃso ciraṃ ṭhassati; dāyajjaṃ paṭipajjissati; atha vā pana petānaṃ kālaṅkatānaṃ dakkhiṇaṃ anuppadassatīti. Imāni kho, bhikkhave, pañca ṭhānāni sampassantā mātāpitaro puttaṃ icchanti kule jāyamāna’’nti.
1 ‘‘पञ्च ठानानि सम्पस्सं, पुत्तं इच्छन्ति पण्डिता।
2 ‘‘Pañca ṭhānāni sampassaṃ, puttaṃ icchanti paṇḍitā;
भतो वा नो भरिस्सति, किच्चं वा नो करिस्सति॥
Bhato vā no bharissati, kiccaṃ vā no karissati.
‘‘कुलवंसो चिरं तिट्ठे, दायज्जं पटिपज्जति।
‘‘Kulavaṃso ciraṃ tiṭṭhe, dāyajjaṃ paṭipajjati;
अथ वा पन पेतानं, दक्खिणं अनुप्पदस्सति॥
Atha vā pana petānaṃ, dakkhiṇaṃ anuppadassati.
‘‘ठानानेतानि सम्पस्सं, पुत्तं इच्छन्ति पण्डिता।
‘‘Ṭhānānetāni sampassaṃ, puttaṃ icchanti paṇḍitā;
तस्मा सन्तो सप्पुरिसा, कतञ्ञू कतवेदिनो॥
Tasmā santo sappurisā, kataññū katavedino.
‘‘भरन्ति मातापितरो, पुब्बे कतमनुस्सरं।
‘‘Bharanti mātāpitaro, pubbe katamanussaraṃ;
करोन्ति नेसं किच्चानि, यथा तं पुब्बकारिनं॥
Karonti nesaṃ kiccāni, yathā taṃ pubbakārinaṃ.
‘‘ओवादकारी भतपोसी, कुलवंसं अहापयं।
‘‘Ovādakārī bhataposī, kulavaṃsaṃ ahāpayaṃ;
सद्धो सीलेन सम्पन्नो, पुत्तो होति पसंसियो’’ति॥ नवमं।
Saddho sīlena sampanno, putto hoti pasaṃsiyo’’ti. navamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ९. पुत्तसुत्तवण्णना • 9. Puttasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ९-१०. पुत्तसुत्तादिवण्णना • 9-10. Puttasuttādivaṇṇanā
