| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៥. បុត្តសុត្តំ
5. Puttasuttaṃ
៧៤. វុត្តញ្ហេតំ ភគវតា, វុត្តមរហតាតិ មេ សុតំ –
74. Vuttañhetaṃ bhagavatā, vuttamarahatāti me sutaṃ –
‘‘តយោមេ, ភិក្ខវេ, បុត្តា សន្តោ សំវិជ្ជមានា លោកស្មិំ។ កតមេ តយោ? អតិជាតោ, អនុជាតោ, អវជាតោតិ។
‘‘Tayome, bhikkhave, puttā santo saṃvijjamānā lokasmiṃ. Katame tayo? Atijāto, anujāto, avajātoti.
‘‘កថញ្ច , ភិក្ខវេ, បុត្តោ អតិជាតោ ហោតិ? ឥធ, ភិក្ខវេ, បុត្តស្ស មាតាបិតរោ ហោន្តិ ន ពុទ្ធំ សរណំ គតា, ន ធម្មំ សរណំ គតា, ន សង្ឃំ សរណំ គតា; បាណាតិបាតា អប្បដិវិរតា, អទិន្នាទានា អប្បដិវិរតា, កាមេសុមិច្ឆាចារា អប្បដិវិរតា, មុសាវាទា អប្បដិវិរតា, សុរាមេរយមជ្ជបមាទដ្ឋានា អប្បដិវិរតា, ទុស្សីលា បាបធម្មា។ បុត្តោ ច នេសំ ហោតិ ពុទ្ធំ សរណំ គតោ, ធម្មំ សរណំ គតោ, សង្ឃំ សរណំ គតោ; បាណាតិបាតា បដិវិរតោ, អទិន្នាទានា បដិវិរតោ, កាមេសុមិច្ឆាចារា បដិវិរតោ, មុសាវាទា បដិវិរតោ, សុរាមេរយមជ្ជបមាទដ្ឋានា បដិវិរតោ, សីលវា កល្យាណធម្មោ។ ឯវំ ខោ, ភិក្ខវេ, បុត្តោ អតិជាតោ ហោតិ។
‘‘Kathañca , bhikkhave, putto atijāto hoti? Idha, bhikkhave, puttassa mātāpitaro honti na buddhaṃ saraṇaṃ gatā, na dhammaṃ saraṇaṃ gatā, na saṅghaṃ saraṇaṃ gatā; pāṇātipātā appaṭiviratā, adinnādānā appaṭiviratā, kāmesumicchācārā appaṭiviratā, musāvādā appaṭiviratā, surāmerayamajjapamādaṭṭhānā appaṭiviratā, dussīlā pāpadhammā. Putto ca nesaṃ hoti buddhaṃ saraṇaṃ gato, dhammaṃ saraṇaṃ gato, saṅghaṃ saraṇaṃ gato; pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo. Evaṃ kho, bhikkhave, putto atijāto hoti.
‘‘កថញ្ច , ភិក្ខវេ, បុត្តោ អនុជាតោ ហោតិ? ឥធ, ភិក្ខវេ, បុត្តស្ស មាតាបិតរោ ហោន្តិ ពុទ្ធំ សរណំ គតា, ធម្មំ សរណំ គតា, សង្ឃំ សរណំ គតា; បាណាតិបាតា បដិវិរតា, អទិន្នាទានា បដិវិរតា, កាមេសុមិច្ឆាចារា បដិវិរតា, មុសាវាទា បដិវិរតា, សុរាមេរយមជ្ជបមាទដ្ឋានា បដិវិរតា, សីលវន្តោ កល្យាណធម្មា។ បុត្តោបិ នេសំ ហោតិ ពុទ្ធំ សរណំ គតោ, ធម្មំ សរណំ គតោ, សង្ឃំ សរណំ គតោ; បាណាតិបាតា បដិវិរតោ, អទិន្នាទានា បដិវិរតោ, កាមេសុមិច្ឆាចារា បដិវិរតោ, មុសាវាទា បដិវិរតោ, សុរាមេរយមជ្ជបមាទដ្ឋានា បដិវិរតោ, សីលវា កល្យាណធម្មោ។ ឯវំ ខោ, ភិក្ខវេ, បុត្តោ អនុជាតោ ហោតិ។
‘‘Kathañca , bhikkhave, putto anujāto hoti? Idha, bhikkhave, puttassa mātāpitaro honti buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā; pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā. Puttopi nesaṃ hoti buddhaṃ saraṇaṃ gato, dhammaṃ saraṇaṃ gato, saṅghaṃ saraṇaṃ gato; pāṇātipātā paṭivirato, adinnādānā paṭivirato, kāmesumicchācārā paṭivirato, musāvādā paṭivirato, surāmerayamajjapamādaṭṭhānā paṭivirato, sīlavā kalyāṇadhammo. Evaṃ kho, bhikkhave, putto anujāto hoti.
‘‘កថញ្ច , ភិក្ខវេ, បុត្តោ អវជាតោ ហោតិ? ឥធ, ភិក្ខវេ, បុត្តស្ស មាតាបិតរោ ហោន្តិ ពុទ្ធំ សរណំ គតា, ធម្មំ សរណំ គតា, សង្ឃំ សរណំ គតា; បាណាតិបាតា បដិវិរតា, អទិន្នាទានា បដិវិរតា, កាមេសុមិច្ឆាចារា បដិវិរតា, មុសាវាទា បដិវិរតា, សុរាមេរយមជ្ជបមាទដ្ឋានា បដិវិរតា, សីលវន្តោ កល្យាណធម្មា។ បុត្តោ ច នេសំ ហោតិ ន ពុទ្ធំ សរណំ គតោ, ន ធម្មំ សរណំ គតោ, ន សង្ឃំ សរណំ គតោ; បាណាតិបាតា អប្បដិវិរតោ, អទិន្នាទានា អប្បដិវិរតោ, កាមេសុមិច្ឆាចារា អប្បដិវិរតោ, មុសាវាទា អប្បដិវិរតោ, សុរាមេរយមជ្ជបមាទដ្ឋានា អប្បដិវិរតោ, ទុស្សីលោ បាបធម្មោ។ ឯវំ ខោ, ភិក្ខវេ, បុត្តោ អវជាតោ ហោតិ។ ឥមេ ខោ, ភិក្ខវេ, តយោ បុត្តា សន្តោ សំវិជ្ជមានា លោកស្មិ’’ន្តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Kathañca , bhikkhave, putto avajāto hoti? Idha, bhikkhave, puttassa mātāpitaro honti buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā; pāṇātipātā paṭiviratā, adinnādānā paṭiviratā, kāmesumicchācārā paṭiviratā, musāvādā paṭiviratā, surāmerayamajjapamādaṭṭhānā paṭiviratā, sīlavanto kalyāṇadhammā. Putto ca nesaṃ hoti na buddhaṃ saraṇaṃ gato, na dhammaṃ saraṇaṃ gato, na saṅghaṃ saraṇaṃ gato; pāṇātipātā appaṭivirato, adinnādānā appaṭivirato, kāmesumicchācārā appaṭivirato, musāvādā appaṭivirato, surāmerayamajjapamādaṭṭhānā appaṭivirato, dussīlo pāpadhammo. Evaṃ kho, bhikkhave, putto avajāto hoti. Ime kho, bhikkhave, tayo puttā santo saṃvijjamānā lokasmi’’nti. Etamatthaṃ bhagavā avoca. Tatthetaṃ iti vuccati –
‘‘អតិជាតំ អនុជាតំ, បុត្តមិច្ឆន្តិ បណ្ឌិតា;
‘‘Atijātaṃ anujātaṃ, puttamicchanti paṇḍitā;
អវជាតំ ន ឥច្ឆន្តិ, យោ ហោតិ កុលគន្ធនោ។
Avajātaṃ na icchanti, yo hoti kulagandhano.
‘‘ឯតេ ខោ បុត្តា លោកស្មិំ, យេ ភវន្តិ ឧបាសកា;
‘‘Ete kho puttā lokasmiṃ, ye bhavanti upāsakā;
សទ្ធា សីលេន សម្បន្នា, វទញ្ញូ វីតមច្ឆរា;
Saddhā sīlena sampannā, vadaññū vītamaccharā;
ចន្ទោ អព្ភឃនា មុត្តោ, បរិសាសុ វិរោចរេ’’តិ។
Cando abbhaghanā mutto, parisāsu virocare’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ បញ្ចមំ។
Ayampi attho vutto bhagavatā, iti me sutanti. Pañcamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៥. បុត្តសុត្តវណ្ណនា • 5. Puttasuttavaṇṇanā
