| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. புத்தஸுத்தவண்ணனா
9. Puttasuttavaṇṇanā
39. நவமே ப⁴தோ வா நோ ப⁴ரிஸ்ஸதீதி அம்ஹேஹி த²ஞ்ஞபாயனஹத்த²பாத³வட்³ட⁴னாதீ³ஹி ப⁴தோ படிஜக்³கி³தோ அம்ஹே மஹல்லககாலே ஹத்த²பாத³தோ⁴வன-ந்ஹாபனயாகு³ப⁴த்ததா³னாதீ³ஹி ப⁴ரிஸ்ஸதி. கிச்சங் வா நோ கரிஸ்ஸதீதி அத்தனோ கம்மங் ட²பெத்வா அம்ஹாகங் ராஜகுலாதீ³ஸு உப்பன்னங் கிச்சங் க³ந்த்வா கரிஸ்ஸதி . குலவங்ஸோ சிரங் ட²ஸ்ஸதீதி அம்ஹாகங் ஸந்தகங் கெ²த்தவத்து²ஹிரஞ்ஞஸுவண்ணாதி³ங் அவினாஸெத்வா ரக்க²ந்தே புத்தே குலவங்ஸோ சிரங் ட²ஸ்ஸதி, அம்ஹேஹி வா பவத்திதானி ஸலாகப⁴த்தாதீ³னி அனுபச்சி²ந்தி³த்வா பவத்தெஸ்ஸதி, ஏவம்பி நோ குலவங்ஸோ சிரங் ட²ஸ்ஸதி. தா³யஜ்ஜங் படிபஜ்ஜிஸ்ஸதீதி குலவங்ஸானுரூபாய படிபத்தியா அத்தானங் தா³யஜ்ஜாரஹங் கரொந்தோ அம்ஹாகங் ஸந்தகங் தா³யஜ்ஜங் படிபஜ்ஜிஸ்ஸதி. த³க்கி²ணங் அனுப்பத³ஸ்ஸதீதி பத்திதா³னங் கத்வா ததியதி³வஸதோ பட்டா²ய தா³னங் அனுப்பத³ஸ்ஸதி.
39. Navame bhato vā no bharissatīti amhehi thaññapāyanahatthapādavaḍḍhanādīhi bhato paṭijaggito amhe mahallakakāle hatthapādadhovana-nhāpanayāgubhattadānādīhi bharissati. Kiccaṃ vā no karissatīti attano kammaṃ ṭhapetvā amhākaṃ rājakulādīsu uppannaṃ kiccaṃ gantvā karissati . Kulavaṃso ciraṃ ṭhassatīti amhākaṃ santakaṃ khettavatthuhiraññasuvaṇṇādiṃ avināsetvā rakkhante putte kulavaṃso ciraṃ ṭhassati, amhehi vā pavattitāni salākabhattādīni anupacchinditvā pavattessati, evampi no kulavaṃso ciraṃ ṭhassati. Dāyajjaṃ paṭipajjissatīti kulavaṃsānurūpāya paṭipattiyā attānaṃ dāyajjārahaṃ karonto amhākaṃ santakaṃ dāyajjaṃ paṭipajjissati. Dakkhiṇaṃ anuppadassatīti pattidānaṃ katvā tatiyadivasato paṭṭhāya dānaṃ anuppadassati.
ஸந்தோ ஸப்புரிஸாதி இமஸ்மிங் டா²னே மாதாபிதூஸு ஸம்மா படிபத்தியா ஸந்தோ ஸப்புரிஸாதி வேதி³தப்³பா³. புப்³பே³ கதமனுஸ்ஸரந்தி மாதாபிதூஹி பட²மதரங் கதகு³ணங் அனுஸ்ஸரந்தா. ஓவாத³காரீதி மாதாபிதூஹி தி³ன்னஸ்ஸ ஓவாத³ஸ்ஸ கத்தா. ப⁴தபோஸீதி யேஹி ப⁴தோ, தேஸங் போஸகோ. பஸங்ஸியோதி தி³ட்டே²வ த⁴ம்மே மஹாஜனேன பஸங்ஸிதப்³போ³ ஹோதி.
Santo sappurisāti imasmiṃ ṭhāne mātāpitūsu sammā paṭipattiyā santo sappurisāti veditabbā. Pubbe katamanussaranti mātāpitūhi paṭhamataraṃ kataguṇaṃ anussarantā. Ovādakārīti mātāpitūhi dinnassa ovādassa kattā. Bhataposīti yehi bhato, tesaṃ posako. Pasaṃsiyoti diṭṭheva dhamme mahājanena pasaṃsitabbo hoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. புத்தஸுத்தங் • 9. Puttasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9-10. புத்தஸுத்தாதி³வண்ணனா • 9-10. Puttasuttādivaṇṇanā
