| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๙. ปุตฺตสุตฺตวณฺณนา
9. Puttasuttavaṇṇanā
๓๙. นวเม ภโต วา โน ภริสฺสตีติ อเมฺหหิ ถญฺญปายนหตฺถปาทวฑฺฒนาทีหิ ภโต ปฎิชคฺคิโต อเมฺห มหลฺลกกาเล หตฺถปาทโธวน-นฺหาปนยาคุภตฺตทานาทีหิ ภริสฺสติฯ กิจฺจํ วา โน กริสฺสตีติ อตฺตโน กมฺมํ ฐเปตฺวา อมฺหากํ ราชกุลาทีสุ อุปฺปนฺนํ กิจฺจํ คนฺตฺวา กริสฺสติ ฯ กุลวํโส จิรํ ฐสฺสตีติ อมฺหากํ สนฺตกํ เขตฺตวตฺถุหิรญฺญสุวณฺณาทิํ อวินาเสตฺวา รกฺขเนฺต ปุเตฺต กุลวํโส จิรํ ฐสฺสติ, อเมฺหหิ วา ปวตฺติตานิ สลากภตฺตาทีนิ อนุปจฺฉินฺทิตฺวา ปวเตฺตสฺสติ, เอวมฺปิ โน กุลวํโส จิรํ ฐสฺสติฯ ทายชฺชํ ปฎิปชฺชิสฺสตีติ กุลวํสานุรูปาย ปฎิปตฺติยา อตฺตานํ ทายชฺชารหํ กโรโนฺต อมฺหากํ สนฺตกํ ทายชฺชํ ปฎิปชฺชิสฺสติฯ ทกฺขิณํ อนุปฺปทสฺสตีติ ปตฺติทานํ กตฺวา ตติยทิวสโต ปฎฺฐาย ทานํ อนุปฺปทสฺสติฯ
39. Navame bhato vā no bharissatīti amhehi thaññapāyanahatthapādavaḍḍhanādīhi bhato paṭijaggito amhe mahallakakāle hatthapādadhovana-nhāpanayāgubhattadānādīhi bharissati. Kiccaṃ vā no karissatīti attano kammaṃ ṭhapetvā amhākaṃ rājakulādīsu uppannaṃ kiccaṃ gantvā karissati . Kulavaṃso ciraṃ ṭhassatīti amhākaṃ santakaṃ khettavatthuhiraññasuvaṇṇādiṃ avināsetvā rakkhante putte kulavaṃso ciraṃ ṭhassati, amhehi vā pavattitāni salākabhattādīni anupacchinditvā pavattessati, evampi no kulavaṃso ciraṃ ṭhassati. Dāyajjaṃ paṭipajjissatīti kulavaṃsānurūpāya paṭipattiyā attānaṃ dāyajjārahaṃ karonto amhākaṃ santakaṃ dāyajjaṃ paṭipajjissati. Dakkhiṇaṃ anuppadassatīti pattidānaṃ katvā tatiyadivasato paṭṭhāya dānaṃ anuppadassati.
สโนฺต สปฺปุริสาติ อิมสฺมิํ ฐาเน มาตาปิตูสุ สมฺมา ปฎิปตฺติยา สโนฺต สปฺปุริสาติ เวทิตพฺพาฯ ปุเพฺพ กตมนุสฺสรนฺติ มาตาปิตูหิ ปฐมตรํ กตคุณํ อนุสฺสรนฺตาฯ โอวาทการีติ มาตาปิตูหิ ทินฺนสฺส โอวาทสฺส กตฺตาฯ ภตโปสีติ เยหิ ภโต, เตสํ โปสโกฯ ปสํสิโยติ ทิเฎฺฐว ธเมฺม มหาชเนน ปสํสิตโพฺพ โหติฯ
Santo sappurisāti imasmiṃ ṭhāne mātāpitūsu sammā paṭipattiyā santo sappurisāti veditabbā. Pubbe katamanussaranti mātāpitūhi paṭhamataraṃ kataguṇaṃ anussarantā. Ovādakārīti mātāpitūhi dinnassa ovādassa kattā. Bhataposīti yehi bhato, tesaṃ posako. Pasaṃsiyoti diṭṭheva dhamme mahājanena pasaṃsitabbo hoti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๙. ปุตฺตสุตฺตํ • 9. Puttasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙-๑๐. ปุตฺตสุตฺตาทิวณฺณนา • 9-10. Puttasuttādivaṇṇanā
