| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៧. បុត្តសុត្តវណ្ណនា
7. Puttasuttavaṇṇanā
៨៧. សត្តមេ ម-ការោ បទសន្ធិករោ ‘‘អញ្ញមញ្ញ’’ន្តិអាទីសុ វិយ។ និច្ចលសមណោតិ ថិរសមណោ។ អភិសិញ្ចិតព្ពោតិ អភិសេកោតិ កម្មសាធនោ អភិសេកសទ្ទោ។ តេនាហ ‘‘អភិសេកំ កាតុំ យុត្តោ’’តិ។
87. Sattame ma-kāro padasandhikaro ‘‘aññamañña’’ntiādīsu viya. Niccalasamaṇoti thirasamaṇo. Abhisiñcitabboti abhisekoti kammasādhano abhisekasaddo. Tenāha ‘‘abhisekaṃ kātuṃ yutto’’ti.
ពាកុលត្ថេរោ វិយាតិ ថេរោ ហិ មហាយសស្សី, តស្ស បុត្តធីតរោ នត្តុបនត្តកា សុខុមសាដកេហិ ចីវរានិ ការេត្វា រជាបេត្វា សមុគ្គេ បក្ខិបិត្វា បហិណន្តិ។ ថេរស្ស នហានកាលេ នហានកោដ្ឋកេ ឋបេន្តិ។ ថេរោ តានិ និវាសេតិ ចេវ បារុបតិ ច។ តេនេវេតំ វុត្តំ។
Bākulatthero viyāti thero hi mahāyasassī, tassa puttadhītaro nattupanattakā sukhumasāṭakehi cīvarāni kāretvā rajāpetvā samugge pakkhipitvā pahiṇanti. Therassa nahānakāle nahānakoṭṭhake ṭhapenti. Thero tāni nivāseti ceva pārupati ca. Tenevetaṃ vuttaṃ.
ខទិរវនមគ្គេ សីវលិត្ថេរោ វិយាតិ សត្ថរិ កិរ តំ មគ្គំ បដិបន្នេ ទេវតា ‘‘អម្ហាកំ អយ្យស្ស សីវលិត្ថេរស្ស សក្ការំ ករិស្សាមា’’តិ ចិន្តេត្វា ឯកេកយោជនេ វិហារំ ការេត្វា ឯកយោជនតោ ឧទ្ធំ គន្តុំ អទត្វា បាតោវ ឧដ្ឋាយ ទិព្ពានិ យាគុអាទីនិ គហេត្វា ‘‘អម្ហាកំ អយ្យោ សីវលិត្ថេរោ កហំ និសិន្នោ’’តិ វិចរន្តិ។ ថេរោ អត្តនោ អភិហដំ ពុទ្ធប្បមុខស្ស ភិក្ខុសង្ឃស្ស ទាបេសិ។ ឯវំ សត្ថា សបរិវារោ តិំសយោជនិកំ កន្តារំ សីវលិត្ថេរស្ស បុញ្ញផលំ អនុភវមានោវ អគមាសិ។ តេនេវេតំ វុត្តំ។
Khadiravanamagge sīvalitthero viyāti satthari kira taṃ maggaṃ paṭipanne devatā ‘‘amhākaṃ ayyassa sīvalittherassa sakkāraṃ karissāmā’’ti cintetvā ekekayojane vihāraṃ kāretvā ekayojanato uddhaṃ gantuṃ adatvā pātova uṭṭhāya dibbāni yāguādīni gahetvā ‘‘amhākaṃ ayyo sīvalitthero kahaṃ nisinno’’ti vicaranti. Thero attano abhihaṭaṃ buddhappamukhassa bhikkhusaṅghassa dāpesi. Evaṃ satthā saparivāro tiṃsayojanikaṃ kantāraṃ sīvalittherassa puññaphalaṃ anubhavamānova agamāsi. Tenevetaṃ vuttaṃ.
អដ្ឋកនាគរសុត្តេ អានន្ទត្ថេរោ វិយាតិ អដ្ឋកនាគរកោ កិរ គហបតិ ថេរស្ស ធម្មទេសនាយ បសីទិត្វា បញ្ចសតគ្ឃនកំ វិហារំ ការេត្វា អទាសិ។ តំ សន្ធាយេតំ វុត្តំ។
Aṭṭhakanāgarasutte ānandatthero viyāti aṭṭhakanāgarako kira gahapati therassa dhammadesanāya pasīditvā pañcasatagghanakaṃ vihāraṃ kāretvā adāsi. Taṃ sandhāyetaṃ vuttaṃ.
បិលិន្ទវច្ឆត្ថេរោ វិយាតិ ថេរស្ស កិរ ឥទ្ធានុភាវេន បសន្នា មនុស្សា សប្បិអាទីនិ ពហូនិ ភេសជ្ជានិ អភិហរិំសុ។ បកតិយាបិ ច អាយស្មា បិលិន្ទវច្ឆោ លាភី ហោតិ បញ្ចន្នំ ភេសជ្ជានំ, លទ្ធំ លទ្ធំ បរិសាយ វិស្សជ្ជេតិ។ តេនេតំ វុត្តំ ‘‘គិលានបច្ចយំ បិលិន្ទវច្ឆត្ថេរោ វិយា’’តិ។
Pilindavacchatthero viyāti therassa kira iddhānubhāvena pasannā manussā sappiādīni bahūni bhesajjāni abhihariṃsu. Pakatiyāpi ca āyasmā pilindavaccho lābhī hoti pañcannaṃ bhesajjānaṃ, laddhaṃ laddhaṃ parisāya vissajjeti. Tenetaṃ vuttaṃ ‘‘gilānapaccayaṃ pilindavacchatthero viyā’’ti.
តិណ្ណម្បិ សន្និបាតេន និព្ពត្តានីតិ បិត្តាទីនំ តិណ្ណម្បិ វិសមានំ សន្និបាតេន ជាតានិ។ អតិសីតាទិភាវេន ឧតូនំ បរិណាមោតិ អាហ ‘‘អតិសីតអតិឧណ្ហឧតុតោ ជាតានី’’តិ។ បុរិមឧតុតោ វិសទិសោ ឧតុ ឧតុបរិណាមោ, តតោ ជាតានិ ឧតុបរិណាមជានិ, វិសភាគឧតុតោ ជាតានីតិ អត្ថោ។ ជង្គលទេសវាសីនញ្ហិ អនូបទេសេ វសន្តានំ វិសភាគោវ ឧតុ ឧប្បជ្ជតិ, អនូបទេសវាសីនញ្ច ជង្គលទេសេតិ។ ឯវំ មលយសមុទ្ទតីរាទិវសេនបិ ឧតុវិសភាគតា ឧប្បជ្ជតិយេវ។ តតោ ជាតានិ ឧតុបរិណាមជានិ នាម។
Tiṇṇampi sannipātena nibbattānīti pittādīnaṃ tiṇṇampi visamānaṃ sannipātena jātāni. Atisītādibhāvena utūnaṃ pariṇāmoti āha ‘‘atisītaatiuṇhaututo jātānī’’ti. Purimaututo visadiso utu utupariṇāmo, tato jātāni utupariṇāmajāni, visabhāgaututo jātānīti attho. Jaṅgaladesavāsīnañhi anūpadese vasantānaṃ visabhāgova utu uppajjati, anūpadesavāsīnañca jaṅgaladeseti. Evaṃ malayasamuddatīrādivasenapi utuvisabhāgatā uppajjatiyeva. Tato jātāni utupariṇāmajāni nāma.
អត្តនោ បកតិចរិយានំ វិសមំ កាយស្ស បរិហរណវសេន វិសមបរិហារជានិ។ តានិ បន អច្ចាសនអតិដ្ឋានាទិនា វេទិតព្ពានីតិ អាហ ‘‘អច្ចាសនអតិដ្ឋានាទិកា’’តិ។ អាទិ-សទ្ទេន មហាភារវហណសុធាកោដ្ដនអទេសកាលចរណាទីនិ សង្គណ្ហាតិ។ បរស្ស ឧបក្កមតោ និព្ពត្តានិ ឱបក្កមិកានិ, អយំ ចោរោតិ វា បារទារិកោតិ វា គហេត្វា ជណ្ណុកកប្បរមុគ្គរាទីហិ និប្បោថនឧបក្កមំ បច្ចយំ កត្វា ឧប្បន្នានីតិ អត្ថោ។ តេនាហ ‘‘វធពន្ធនាទិឧបក្កមេន និព្ពត្តានី’’តិ។ កេវលន្តិ ពាហិរំ បច្ចយំ អនបេក្ខិត្វា កេវលំ, តេន វិនាតិ អត្ថោ។ តេនាហ ‘‘បុព្ពេកតកម្មវិបាកវសេនេវ ជាតានី’’តិ។
Attano pakaticariyānaṃ visamaṃ kāyassa pariharaṇavasena visamaparihārajāni. Tāni pana accāsanaatiṭṭhānādinā veditabbānīti āha ‘‘accāsanaatiṭṭhānādikā’’ti. Ādi-saddena mahābhāravahaṇasudhākoṭṭanaadesakālacaraṇādīni saṅgaṇhāti. Parassa upakkamato nibbattāni opakkamikāni, ayaṃ coroti vā pāradārikoti vā gahetvā jaṇṇukakapparamuggarādīhi nippothanaupakkamaṃ paccayaṃ katvā uppannānīti attho. Tenāha ‘‘vadhabandhanādiupakkamena nibbattānī’’ti. Kevalanti bāhiraṃ paccayaṃ anapekkhitvā kevalaṃ, tena vināti attho. Tenāha ‘‘pubbekatakammavipākavaseneva jātānī’’ti.
បុត្តសុត្តវណ្ណនា និដ្ឋិតា។
Puttasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៧. បុត្តសុត្តំ • 7. Puttasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៧. បុត្តសុត្តវណ្ណនា • 7. Puttasuttavaṇṇanā
