| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೭. ಪುತ್ತಸುತ್ತವಣ್ಣನಾ
7. Puttasuttavaṇṇanā
೮೭. ಸತ್ತಮೇ ಮ-ಕಾರೋ ಪದಸನ್ಧಿಕರೋ ‘‘ಅಞ್ಞಮಞ್ಞ’’ನ್ತಿಆದೀಸು ವಿಯ। ನಿಚ್ಚಲಸಮಣೋತಿ ಥಿರಸಮಣೋ। ಅಭಿಸಿಞ್ಚಿತಬ್ಬೋತಿ ಅಭಿಸೇಕೋತಿ ಕಮ್ಮಸಾಧನೋ ಅಭಿಸೇಕಸದ್ದೋ। ತೇನಾಹ ‘‘ಅಭಿಸೇಕಂ ಕಾತುಂ ಯುತ್ತೋ’’ತಿ।
87. Sattame ma-kāro padasandhikaro ‘‘aññamañña’’ntiādīsu viya. Niccalasamaṇoti thirasamaṇo. Abhisiñcitabboti abhisekoti kammasādhano abhisekasaddo. Tenāha ‘‘abhisekaṃ kātuṃ yutto’’ti.
ಬಾಕುಲತ್ಥೇರೋ ವಿಯಾತಿ ಥೇರೋ ಹಿ ಮಹಾಯಸಸ್ಸೀ, ತಸ್ಸ ಪುತ್ತಧೀತರೋ ನತ್ತುಪನತ್ತಕಾ ಸುಖುಮಸಾಟಕೇಹಿ ಚೀವರಾನಿ ಕಾರೇತ್ವಾ ರಜಾಪೇತ್ವಾ ಸಮುಗ್ಗೇ ಪಕ್ಖಿಪಿತ್ವಾ ಪಹಿಣನ್ತಿ। ಥೇರಸ್ಸ ನಹಾನಕಾಲೇ ನಹಾನಕೋಟ್ಠಕೇ ಠಪೇನ್ತಿ। ಥೇರೋ ತಾನಿ ನಿವಾಸೇತಿ ಚೇವ ಪಾರುಪತಿ ಚ। ತೇನೇವೇತಂ ವುತ್ತಂ।
Bākulatthero viyāti thero hi mahāyasassī, tassa puttadhītaro nattupanattakā sukhumasāṭakehi cīvarāni kāretvā rajāpetvā samugge pakkhipitvā pahiṇanti. Therassa nahānakāle nahānakoṭṭhake ṭhapenti. Thero tāni nivāseti ceva pārupati ca. Tenevetaṃ vuttaṃ.
ಖದಿರವನಮಗ್ಗೇ ಸೀವಲಿತ್ಥೇರೋ ವಿಯಾತಿ ಸತ್ಥರಿ ಕಿರ ತಂ ಮಗ್ಗಂ ಪಟಿಪನ್ನೇ ದೇವತಾ ‘‘ಅಮ್ಹಾಕಂ ಅಯ್ಯಸ್ಸ ಸೀವಲಿತ್ಥೇರಸ್ಸ ಸಕ್ಕಾರಂ ಕರಿಸ್ಸಾಮಾ’’ತಿ ಚಿನ್ತೇತ್ವಾ ಏಕೇಕಯೋಜನೇ ವಿಹಾರಂ ಕಾರೇತ್ವಾ ಏಕಯೋಜನತೋ ಉದ್ಧಂ ಗನ್ತುಂ ಅದತ್ವಾ ಪಾತೋವ ಉಟ್ಠಾಯ ದಿಬ್ಬಾನಿ ಯಾಗುಆದೀನಿ ಗಹೇತ್ವಾ ‘‘ಅಮ್ಹಾಕಂ ಅಯ್ಯೋ ಸೀವಲಿತ್ಥೇರೋ ಕಹಂ ನಿಸಿನ್ನೋ’’ತಿ ವಿಚರನ್ತಿ। ಥೇರೋ ಅತ್ತನೋ ಅಭಿಹಟಂ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ದಾಪೇಸಿ। ಏವಂ ಸತ್ಥಾ ಸಪರಿವಾರೋ ತಿಂಸಯೋಜನಿಕಂ ಕನ್ತಾರಂ ಸೀವಲಿತ್ಥೇರಸ್ಸ ಪುಞ್ಞಫಲಂ ಅನುಭವಮಾನೋವ ಅಗಮಾಸಿ। ತೇನೇವೇತಂ ವುತ್ತಂ।
Khadiravanamagge sīvalitthero viyāti satthari kira taṃ maggaṃ paṭipanne devatā ‘‘amhākaṃ ayyassa sīvalittherassa sakkāraṃ karissāmā’’ti cintetvā ekekayojane vihāraṃ kāretvā ekayojanato uddhaṃ gantuṃ adatvā pātova uṭṭhāya dibbāni yāguādīni gahetvā ‘‘amhākaṃ ayyo sīvalitthero kahaṃ nisinno’’ti vicaranti. Thero attano abhihaṭaṃ buddhappamukhassa bhikkhusaṅghassa dāpesi. Evaṃ satthā saparivāro tiṃsayojanikaṃ kantāraṃ sīvalittherassa puññaphalaṃ anubhavamānova agamāsi. Tenevetaṃ vuttaṃ.
ಅಟ್ಠಕನಾಗರಸುತ್ತೇ ಆನನ್ದತ್ಥೇರೋ ವಿಯಾತಿ ಅಟ್ಠಕನಾಗರಕೋ ಕಿರ ಗಹಪತಿ ಥೇರಸ್ಸ ಧಮ್ಮದೇಸನಾಯ ಪಸೀದಿತ್ವಾ ಪಞ್ಚಸತಗ್ಘನಕಂ ವಿಹಾರಂ ಕಾರೇತ್ವಾ ಅದಾಸಿ। ತಂ ಸನ್ಧಾಯೇತಂ ವುತ್ತಂ।
Aṭṭhakanāgarasutte ānandatthero viyāti aṭṭhakanāgarako kira gahapati therassa dhammadesanāya pasīditvā pañcasatagghanakaṃ vihāraṃ kāretvā adāsi. Taṃ sandhāyetaṃ vuttaṃ.
ಪಿಲಿನ್ದವಚ್ಛತ್ಥೇರೋ ವಿಯಾತಿ ಥೇರಸ್ಸ ಕಿರ ಇದ್ಧಾನುಭಾವೇನ ಪಸನ್ನಾ ಮನುಸ್ಸಾ ಸಪ್ಪಿಆದೀನಿ ಬಹೂನಿ ಭೇಸಜ್ಜಾನಿ ಅಭಿಹರಿಂಸು। ಪಕತಿಯಾಪಿ ಚ ಆಯಸ್ಮಾ ಪಿಲಿನ್ದವಚ್ಛೋ ಲಾಭೀ ಹೋತಿ ಪಞ್ಚನ್ನಂ ಭೇಸಜ್ಜಾನಂ, ಲದ್ಧಂ ಲದ್ಧಂ ಪರಿಸಾಯ ವಿಸ್ಸಜ್ಜೇತಿ। ತೇನೇತಂ ವುತ್ತಂ ‘‘ಗಿಲಾನಪಚ್ಚಯಂ ಪಿಲಿನ್ದವಚ್ಛತ್ಥೇರೋ ವಿಯಾ’’ತಿ।
Pilindavacchatthero viyāti therassa kira iddhānubhāvena pasannā manussā sappiādīni bahūni bhesajjāni abhihariṃsu. Pakatiyāpi ca āyasmā pilindavaccho lābhī hoti pañcannaṃ bhesajjānaṃ, laddhaṃ laddhaṃ parisāya vissajjeti. Tenetaṃ vuttaṃ ‘‘gilānapaccayaṃ pilindavacchatthero viyā’’ti.
ತಿಣ್ಣಮ್ಪಿ ಸನ್ನಿಪಾತೇನ ನಿಬ್ಬತ್ತಾನೀತಿ ಪಿತ್ತಾದೀನಂ ತಿಣ್ಣಮ್ಪಿ ವಿಸಮಾನಂ ಸನ್ನಿಪಾತೇನ ಜಾತಾನಿ। ಅತಿಸೀತಾದಿಭಾವೇನ ಉತೂನಂ ಪರಿಣಾಮೋತಿ ಆಹ ‘‘ಅತಿಸೀತಅತಿಉಣ್ಹಉತುತೋ ಜಾತಾನೀ’’ತಿ। ಪುರಿಮಉತುತೋ ವಿಸದಿಸೋ ಉತು ಉತುಪರಿಣಾಮೋ, ತತೋ ಜಾತಾನಿ ಉತುಪರಿಣಾಮಜಾನಿ, ವಿಸಭಾಗಉತುತೋ ಜಾತಾನೀತಿ ಅತ್ಥೋ। ಜಙ್ಗಲದೇಸವಾಸೀನಞ್ಹಿ ಅನೂಪದೇಸೇ ವಸನ್ತಾನಂ ವಿಸಭಾಗೋವ ಉತು ಉಪ್ಪಜ್ಜತಿ, ಅನೂಪದೇಸವಾಸೀನಞ್ಚ ಜಙ್ಗಲದೇಸೇತಿ। ಏವಂ ಮಲಯಸಮುದ್ದತೀರಾದಿವಸೇನಪಿ ಉತುವಿಸಭಾಗತಾ ಉಪ್ಪಜ್ಜತಿಯೇವ। ತತೋ ಜಾತಾನಿ ಉತುಪರಿಣಾಮಜಾನಿ ನಾಮ।
Tiṇṇampi sannipātena nibbattānīti pittādīnaṃ tiṇṇampi visamānaṃ sannipātena jātāni. Atisītādibhāvena utūnaṃ pariṇāmoti āha ‘‘atisītaatiuṇhaututo jātānī’’ti. Purimaututo visadiso utu utupariṇāmo, tato jātāni utupariṇāmajāni, visabhāgaututo jātānīti attho. Jaṅgaladesavāsīnañhi anūpadese vasantānaṃ visabhāgova utu uppajjati, anūpadesavāsīnañca jaṅgaladeseti. Evaṃ malayasamuddatīrādivasenapi utuvisabhāgatā uppajjatiyeva. Tato jātāni utupariṇāmajāni nāma.
ಅತ್ತನೋ ಪಕತಿಚರಿಯಾನಂ ವಿಸಮಂ ಕಾಯಸ್ಸ ಪರಿಹರಣವಸೇನ ವಿಸಮಪರಿಹಾರಜಾನಿ। ತಾನಿ ಪನ ಅಚ್ಚಾಸನಅತಿಟ್ಠಾನಾದಿನಾ ವೇದಿತಬ್ಬಾನೀತಿ ಆಹ ‘‘ಅಚ್ಚಾಸನಅತಿಟ್ಠಾನಾದಿಕಾ’’ತಿ। ಆದಿ-ಸದ್ದೇನ ಮಹಾಭಾರವಹಣಸುಧಾಕೋಟ್ಟನಅದೇಸಕಾಲಚರಣಾದೀನಿ ಸಙ್ಗಣ್ಹಾತಿ। ಪರಸ್ಸ ಉಪಕ್ಕಮತೋ ನಿಬ್ಬತ್ತಾನಿ ಓಪಕ್ಕಮಿಕಾನಿ, ಅಯಂ ಚೋರೋತಿ ವಾ ಪಾರದಾರಿಕೋತಿ ವಾ ಗಹೇತ್ವಾ ಜಣ್ಣುಕಕಪ್ಪರಮುಗ್ಗರಾದೀಹಿ ನಿಪ್ಪೋಥನಉಪಕ್ಕಮಂ ಪಚ್ಚಯಂ ಕತ್ವಾ ಉಪ್ಪನ್ನಾನೀತಿ ಅತ್ಥೋ। ತೇನಾಹ ‘‘ವಧಬನ್ಧನಾದಿಉಪಕ್ಕಮೇನ ನಿಬ್ಬತ್ತಾನೀ’’ತಿ। ಕೇವಲನ್ತಿ ಬಾಹಿರಂ ಪಚ್ಚಯಂ ಅನಪೇಕ್ಖಿತ್ವಾ ಕೇವಲಂ, ತೇನ ವಿನಾತಿ ಅತ್ಥೋ। ತೇನಾಹ ‘‘ಪುಬ್ಬೇಕತಕಮ್ಮವಿಪಾಕವಸೇನೇವ ಜಾತಾನೀ’’ತಿ।
Attano pakaticariyānaṃ visamaṃ kāyassa pariharaṇavasena visamaparihārajāni. Tāni pana accāsanaatiṭṭhānādinā veditabbānīti āha ‘‘accāsanaatiṭṭhānādikā’’ti. Ādi-saddena mahābhāravahaṇasudhākoṭṭanaadesakālacaraṇādīni saṅgaṇhāti. Parassa upakkamato nibbattāni opakkamikāni, ayaṃ coroti vā pāradārikoti vā gahetvā jaṇṇukakapparamuggarādīhi nippothanaupakkamaṃ paccayaṃ katvā uppannānīti attho. Tenāha ‘‘vadhabandhanādiupakkamena nibbattānī’’ti. Kevalanti bāhiraṃ paccayaṃ anapekkhitvā kevalaṃ, tena vināti attho. Tenāha ‘‘pubbekatakammavipākavaseneva jātānī’’ti.
ಪುತ್ತಸುತ್ತವಣ್ಣನಾ ನಿಟ್ಠಿತಾ।
Puttasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಪುತ್ತಸುತ್ತಂ • 7. Puttasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೭. ಪುತ್ತಸುತ್ತವಣ್ಣನಾ • 7. Puttasuttavaṇṇanā
