| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
7. පුත්‌තසුත්‌තවණ්‌ණනා
7. Puttasuttavaṇṇanā
87. සත්‌තමෙ ම-කාරො පදසන්‌ධිකරො ‘‘අඤ්‌ඤමඤ්‌ඤ’’න්‌තිආදීසු විය. නිච්‌චලසමණොති ථිරසමණො. අභිසිඤ්‌චිතබ්‌බොති අභිසෙකොති කම්‌මසාධනො අභිසෙකසද්‌දො. තෙනාහ ‘‘අභිසෙකං කාතුං යුත්‌තො’’ති.
87. Sattame ma-kāro padasandhikaro ‘‘aññamañña’’ntiādīsu viya. Niccalasamaṇoti thirasamaṇo. Abhisiñcitabboti abhisekoti kammasādhano abhisekasaddo. Tenāha ‘‘abhisekaṃ kātuṃ yutto’’ti.
බාකුලත්‌ථෙරො වියාති ථෙරො හි මහායසස්‌සී, තස්‌ස පුත්‌තධීතරො නත්‌තුපනත්‌තකා සුඛුමසාටකෙහි චීවරානි කාරෙත්‌වා රජාපෙත්‌වා සමුග්‌ගෙ පක්‌ඛිපිත්‌වා පහිණන්‌ති. ථෙරස්‌ස නහානකාලෙ නහානකොට්‌ඨකෙ ඨපෙන්‌ති. ථෙරො තානි නිවාසෙති චෙව පාරුපති ච. තෙනෙවෙතං වුත්‌තං.
Bākulatthero viyāti thero hi mahāyasassī, tassa puttadhītaro nattupanattakā sukhumasāṭakehi cīvarāni kāretvā rajāpetvā samugge pakkhipitvā pahiṇanti. Therassa nahānakāle nahānakoṭṭhake ṭhapenti. Thero tāni nivāseti ceva pārupati ca. Tenevetaṃ vuttaṃ.
ඛදිරවනමග්‌ගෙ සීවලිත්‌ථෙරො වියාති සත්‌ථරි කිර තං මග්‌ගං පටිපන්‌නෙ දෙවතා ‘‘අම්‌හාකං අය්‍යස්‌ස සීවලිත්‌ථෙරස්‌ස සක්‌කාරං කරිස්‌සාමා’’ති චින්‌තෙත්‌වා එකෙකයොජනෙ විහාරං කාරෙත්‌වා එකයොජනතො උද්‌ධං ගන්‌තුං අදත්‌වා පාතොව උට්‌ඨාය දිබ්‌බානි යාගුආදීනි ගහෙත්‌වා ‘‘අම්‌හාකං අය්‍යො සීවලිත්‌ථෙරො කහං නිසින්‌නො’’ති විචරන්‌ති. ථෙරො අත්‌තනො අභිහටං බුද්‌ධප්‌පමුඛස්‌ස භික්‌ඛුසඞ්‌ඝස්‌ස දාපෙසි. එවං සත්‌ථා සපරිවාරො තිංසයොජනිකං කන්‌තාරං සීවලිත්‌ථෙරස්‌ස පුඤ්‌ඤඵලං අනුභවමානොව අගමාසි. තෙනෙවෙතං වුත්‌තං.
Khadiravanamagge sīvalitthero viyāti satthari kira taṃ maggaṃ paṭipanne devatā ‘‘amhākaṃ ayyassa sīvalittherassa sakkāraṃ karissāmā’’ti cintetvā ekekayojane vihāraṃ kāretvā ekayojanato uddhaṃ gantuṃ adatvā pātova uṭṭhāya dibbāni yāguādīni gahetvā ‘‘amhākaṃ ayyo sīvalitthero kahaṃ nisinno’’ti vicaranti. Thero attano abhihaṭaṃ buddhappamukhassa bhikkhusaṅghassa dāpesi. Evaṃ satthā saparivāro tiṃsayojanikaṃ kantāraṃ sīvalittherassa puññaphalaṃ anubhavamānova agamāsi. Tenevetaṃ vuttaṃ.
අට්‌ඨකනාගරසුත්‌තෙ ආනන්‌දත්‌ථෙරො වියාති අට්‌ඨකනාගරකො කිර ගහපති ථෙරස්‌ස ධම්‌මදෙසනාය පසීදිත්‌වා පඤ්‌චසතග්‌ඝනකං විහාරං කාරෙත්‌වා අදාසි. තං සන්‌ධායෙතං වුත්‌තං.
Aṭṭhakanāgarasutte ānandatthero viyāti aṭṭhakanāgarako kira gahapati therassa dhammadesanāya pasīditvā pañcasatagghanakaṃ vihāraṃ kāretvā adāsi. Taṃ sandhāyetaṃ vuttaṃ.
පිලින්‌දවච්‌ඡත්‌ථෙරො වියාති ථෙරස්‌ස කිර ඉද්‌ධානුභාවෙන පසන්‌නා මනුස්‌සා සප්‌පිආදීනි බහූනි භෙසජ්‌ජානි අභිහරිංසු. පකතියාපි ච ආයස්‌මා පිලින්‌දවච්‌ඡො ලාභී හොති පඤ්‌චන්‌නං භෙසජ්‌ජානං, ලද්‌ධං ලද්‌ධං පරිසාය විස්‌සජ්‌ජෙති. තෙනෙතං වුත්‌තං ‘‘ගිලානපච්‌චයං පිලින්‌දවච්‌ඡත්‌ථෙරො වියා’’ති.
Pilindavacchatthero viyāti therassa kira iddhānubhāvena pasannā manussā sappiādīni bahūni bhesajjāni abhihariṃsu. Pakatiyāpi ca āyasmā pilindavaccho lābhī hoti pañcannaṃ bhesajjānaṃ, laddhaṃ laddhaṃ parisāya vissajjeti. Tenetaṃ vuttaṃ ‘‘gilānapaccayaṃ pilindavacchatthero viyā’’ti.
තිණ්‌ණම්‌පි සන්‌නිපාතෙන නිබ්‌බත්‌තානීති පිත්‌තාදීනං තිණ්‌ණම්‌පි විසමානං සන්‌නිපාතෙන ජාතානි. අතිසීතාදිභාවෙන උතූනං පරිණාමොති ආහ ‘‘අතිසීතඅතිඋණ්‌හඋතුතො ජාතානී’’ති. පුරිමඋතුතො විසදිසො උතු උතුපරිණාමො, තතො ජාතානි උතුපරිණාමජානි, විසභාගඋතුතො ජාතානීති අත්‌ථො. ජඞ්‌ගලදෙසවාසීනඤ්‌හි අනූපදෙසෙ වසන්‌තානං විසභාගොව උතු උප්‌පජ්‌ජති, අනූපදෙසවාසීනඤ්‌ච ජඞ්‌ගලදෙසෙති. එවං මලයසමුද්‌දතීරාදිවසෙනපි උතුවිසභාගතා උප්‌පජ්‌ජතියෙව. තතො ජාතානි උතුපරිණාමජානි නාම.
Tiṇṇampi sannipātena nibbattānīti pittādīnaṃ tiṇṇampi visamānaṃ sannipātena jātāni. Atisītādibhāvena utūnaṃ pariṇāmoti āha ‘‘atisītaatiuṇhaututo jātānī’’ti. Purimaututo visadiso utu utupariṇāmo, tato jātāni utupariṇāmajāni, visabhāgaututo jātānīti attho. Jaṅgaladesavāsīnañhi anūpadese vasantānaṃ visabhāgova utu uppajjati, anūpadesavāsīnañca jaṅgaladeseti. Evaṃ malayasamuddatīrādivasenapi utuvisabhāgatā uppajjatiyeva. Tato jātāni utupariṇāmajāni nāma.
අත්‌තනො පකතිචරියානං විසමං කායස්‌ස පරිහරණවසෙන විසමපරිහාරජානි. තානි පන අච්‌චාසනඅතිට්‌ඨානාදිනා වෙදිතබ්‌බානීති ආහ ‘‘අච්‌චාසනඅතිට්‌ඨානාදිකා’’ති. ආදි-සද්‌දෙන මහාභාරවහණසුධාකොට්‌ටනඅදෙසකාලචරණාදීනි සඞ්‌ගණ්‌හාති. පරස්‌ස උපක්‌කමතො නිබ්‌බත්‌තානි ඔපක්‌කමිකානි, අයං චොරොති වා පාරදාරිකොති වා ගහෙත්‌වා ජණ්‌ණුකකප්‌පරමුග්‌ගරාදීහි නිප්‌පොථනඋපක්‌කමං පච්‌චයං කත්‌වා උප්‌පන්‌නානීති අත්‌ථො. තෙනාහ ‘‘වධබන්‌ධනාදිඋපක්‌කමෙන නිබ්‌බත්‌තානී’’ති. කෙවලන්‌ති බාහිරං පච්‌චයං අනපෙක්‌ඛිත්‌වා කෙවලං, තෙන විනාති අත්‌ථො. තෙනාහ ‘‘පුබ්‌බෙකතකම්‌මවිපාකවසෙනෙව ජාතානී’’ති.
Attano pakaticariyānaṃ visamaṃ kāyassa pariharaṇavasena visamaparihārajāni. Tāni pana accāsanaatiṭṭhānādinā veditabbānīti āha ‘‘accāsanaatiṭṭhānādikā’’ti. Ādi-saddena mahābhāravahaṇasudhākoṭṭanaadesakālacaraṇādīni saṅgaṇhāti. Parassa upakkamato nibbattāni opakkamikāni, ayaṃ coroti vā pāradārikoti vā gahetvā jaṇṇukakapparamuggarādīhi nippothanaupakkamaṃ paccayaṃ katvā uppannānīti attho. Tenāha ‘‘vadhabandhanādiupakkamena nibbattānī’’ti. Kevalanti bāhiraṃ paccayaṃ anapekkhitvā kevalaṃ, tena vināti attho. Tenāha ‘‘pubbekatakammavipākavaseneva jātānī’’ti.
පුත්‌තසුත්‌තවණ්‌ණනා නිට්‌ඨිතා.
Puttasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. පුත්‌තසුත්‌තං • 7. Puttasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. පුත්‌තසුත්‌තවණ්‌ණනා • 7. Puttasuttavaṇṇanā
