| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ராத⁴ப்³ராஹ்மணவத்து²கதா²
Rādhabrāhmaṇavatthukathā
69. ராத⁴ப்³ராஹ்மணவத்து²ஸ்மிங் – கிஞ்சாபி ஆயஸ்மா ஸாரிபுத்தோ ப⁴க³வதா பா³ராணஸியங் தீஹி ஸரணக³மனேஹி அனுஞ்ஞாதங் பப்³ப³ஜ்ஜஞ்சேவ உபஸம்பத³ஞ்ச ஜானாதி, ப⁴க³வா பன தங் லஹுகங் உபஸம்பத³ங் படிக்கி²பித்வா ஞத்திசதுத்த²கம்மேன க³ருகங் கத்வா உபஸம்பத³ங் அனுஞ்ஞாதுகாமோ. அத²ஸ்ஸ தே²ரோ அஜ்ஜா²ஸயங் விதி³த்வா ‘‘கதா²ஹங் ப⁴ந்தே தங் ப்³ராஹ்மணங் பப்³பா³ஜேமி உபஸம்பாதே³மீ’’தி ஆஹ. பு³த்³தா⁴னஞ்ஹி பரிஸா அஜ்ஜா²ஸயகுஸலா ஹொந்தி, அயஞ்ச பு³த்³த⁴பரிஸாய அக்³கோ³.
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
ப்³யத்தேன பி⁴க்கு²னா படிப³லேனாதி எத்த² ப்³யத்தோ நாம யஸ்ஸ ஸாட்ட²கத²ங் வினயபிடகங் வாசுக்³க³தங் பவத்ததி, தஸ்மிங் அஸதி யஸ்ஸ அந்தமஸோ இத³ங் ஞத்திசதுத்த²கம்மவாசாமத்தம்பி ஸுக்³க³ஹிதங் ஹோதி, வாசுக்³க³தங் பவத்ததி, அயம்பி இமஸ்மிங் அத்தே² ப்³யத்தோ. யோ பன காஸஸோஸஸெம்ஹாதி³னா வா கே³லஞ்ஞேன ஒட்ட²த³ந்தஜிவ்ஹாதீ³னங் வா அஸம்பத்தியா பரியத்தியங் வா அகதபரிசயத்தா ந ஸக்கோதி பரிமண்ட³லேஹி பத³ப்³யஞ்ஜனேஹி கம்மவாசங் ஸாவேதுங், ப்³யஞ்ஜனங் வா பத³ங் வா ஹாபேதி, அஞ்ஞதா² வா வத்தப்³ப³ங் அஞ்ஞதா² வத³தி, அயங் அப்படிப³லோ. தப்³பி³பரீதோ இமஸ்மிங் அத்தே² ‘‘படிப³லோ’’தி வேதி³தப்³போ³. ஸங்கோ⁴ ஞாபேதப்³போ³தி ஸங்கோ⁴ ஜானாபேதப்³போ³. ததோ பரங் யங் ஸங்கோ⁴ ஜானாபேதப்³போ³, தங் த³ஸ்ஸேதுங் ‘‘ஸுணாது மே ப⁴ந்தே’’திஆதி³மாஹ.
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
71. உபஸம்பன்னஸமனந்தராதி உபஸம்பன்னோ ஹுத்வா ஸமனந்தரா. அனாசாரங் ஆசரதீதி பண்ணத்திவீதிக்கமங் கரோதி. உல்லும்பது மந்தி உத்³த⁴ரது மங், அகுஸலா வுட்டா²பெத்வா குஸலே பதிட்ட²பேது; ஸாமணேரபா⁴வா வா உத்³த⁴ரித்வா பி⁴க்கு²பா⁴வே பதிட்டா²பேதூதி. அனுகம்பங் உபாதா³யாதி அனுத்³த³யங் படிச்ச; மயி அனுகப்பங் கத்வாதி அத்தோ².
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
73. அட்டி²தா ஹோதீதி நிச்சப்பவத்தினீ ஹோதி. சத்தாரோ நிஸ்ஸயேதி சத்தாரோ பச்சயே. யஸ்மா சத்தாரோ பச்சயே நிஸ்ஸாய அத்தபா⁴வோ பவத்ததி, தஸ்மா தே நிஸ்ஸயாதி வுச்சந்தி.
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
ராத⁴ப்³ராஹ்மணவத்து²கதா² நிட்டி²தா.
Rādhabrāhmaṇavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 17. பணாமிதகதா² • 17. Paṇāmitakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராத⁴ப்³ராஹ்மணவத்து²கதா²வண்ணனா • Rādhabrāhmaṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ராத⁴ப்³ராஹ்மணவத்து²கதா²வண்ணனா • Rādhabrāhmaṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ராத⁴ப்³ராஹ்மணவத்து²கதா²வண்ணனா • Rādhabrāhmaṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ராத⁴ப்³ராஹ்மணவத்து²கதா² • Rādhabrāhmaṇavatthukathā
