| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
রাধব্রাহ্মণৰত্থুকথা
Rādhabrāhmaṇavatthukathā
৬৯. রাধব্রাহ্মণৰত্থুস্মিং – কিঞ্চাপি আযস্মা সারিপুত্তো ভগৰতা বারাণসিযং তীহি সরণগমনেহি অনুঞ্ঞাতং পব্বজ্জঞ্চেৰ উপসম্পদঞ্চ জানাতি, ভগৰা পন তং লহুকং উপসম্পদং পটিক্খিপিত্ৰা ঞত্তিচতুত্থকম্মেন গরুকং কত্ৰা উপসম্পদং অনুঞ্ঞাতুকামো। অথস্স থেরো অজ্ঝাসযং ৰিদিত্ৰা ‘‘কথাহং ভন্তে তং ব্রাহ্মণং পব্বাজেমি উপসম্পাদেমী’’তি আহ। বুদ্ধানঞ্হি পরিসা অজ্ঝাসযকুসলা হোন্তি, অযঞ্চ বুদ্ধপরিসায অগ্গো।
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
ব্যত্তেন ভিক্খুনা পটিবলেনাতি এত্থ ব্যত্তো নাম যস্স সাট্ঠকথং ৰিনযপিটকং ৰাচুগ্গতং পৰত্ততি, তস্মিং অসতি যস্স অন্তমসো ইদং ঞত্তিচতুত্থকম্মৰাচামত্তম্পি সুগ্গহিতং হোতি, ৰাচুগ্গতং পৰত্ততি, অযম্পি ইমস্মিং অত্থে ব্যত্তো। যো পন কাসসোসসেম্হাদিনা ৰা গেলঞ্ঞেন ওট্ঠদন্তজিৰ্হাদীনং ৰা অসম্পত্তিযা পরিযত্তিযং ৰা অকতপরিচযত্তা ন সক্কোতি পরিমণ্ডলেহি পদব্যঞ্জনেহি কম্মৰাচং সাৰেতুং, ব্যঞ্জনং ৰা পদং ৰা হাপেতি, অঞ্ঞথা ৰা ৰত্তব্বং অঞ্ঞথা ৰদতি, অযং অপ্পটিবলো। তব্বিপরীতো ইমস্মিং অত্থে ‘‘পটিবলো’’তি ৰেদিতব্বো। সঙ্ঘো ঞাপেতব্বোতি সঙ্ঘো জানাপেতব্বো। ততো পরং যং সঙ্ঘো জানাপেতব্বো, তং দস্সেতুং ‘‘সুণাতু মে ভন্তে’’তিআদিমাহ।
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
৭১. উপসম্পন্নসমনন্তরাতি উপসম্পন্নো হুত্ৰা সমনন্তরা। অনাচারং আচরতীতি পণ্ণত্তিৰীতিক্কমং করোতি। উল্লুম্পতু মন্তি উদ্ধরতু মং, অকুসলা ৰুট্ঠাপেত্ৰা কুসলে পতিট্ঠপেতু; সামণেরভাৰা ৰা উদ্ধরিত্ৰা ভিক্খুভাৰে পতিট্ঠাপেতূতি। অনুকম্পং উপাদাযাতি অনুদ্দযং পটিচ্চ; মযি অনুকপ্পং কত্ৰাতি অত্থো।
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
৭৩. অট্ঠিতা হোতীতি নিচ্চপ্পৰত্তিনী হোতি। চত্তারো নিস্সযেতি চত্তারো পচ্চযে। যস্মা চত্তারো পচ্চযে নিস্সায অত্তভাৰো পৰত্ততি, তস্মা তে নিস্সযাতি ৰুচ্চন্তি।
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
রাধব্রাহ্মণৰত্থুকথা নিট্ঠিতা।
Rādhabrāhmaṇavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৭. পণামিতকথা • 17. Paṇāmitakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / রাধব্রাহ্মণৰত্থুকথা • Rādhabrāhmaṇavatthukathā
