| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
রাধব্রাহ্মণৰত্থুকথা
Rādhabrāhmaṇavatthukathā
৬৯. কিঞ্চাপি আযস্মা সারিপুত্তো জানাতীতি যোজনা। ইমিনা ‘‘কিং নু খো অজানন্তো পুচ্ছী’’তি আসঙ্কং নিৰারেতি। ভগৰা অনুঞ্ঞাতুকামো হোতীতি সম্বন্ধো। পনসদ্দো গরহত্থো, তথা জানন্তোপীতি অত্থো। লহুকন্তি হেতুঅন্তোগধৰিসেসনং। লহুকত্তা পটিক্খিপিত্ৰাতি ৰুত্তং হোতি। অস্সাতি ভগৰতো, অজ্ঝাসযন্তি সম্বন্ধো। ‘‘অজ্ঝাসযং ৰিদিত্ৰা’’তিৰচনস্স যুত্তিং দস্সেন্তো আহ ‘‘বুদ্ধানং হী’’তিআদি। হীতি সচ্চং। অযঞ্চাতি সারিপুত্তত্থেরো চ। অগ্গোতি কোটিউক্কংসো। সেট্ঠোতি পৰরো উত্তমো।
69. Kiñcāpi āyasmā sāriputto jānātīti yojanā. Iminā ‘‘kiṃ nu kho ajānanto pucchī’’ti āsaṅkaṃ nivāreti. Bhagavā anuññātukāmo hotīti sambandho. Panasaddo garahattho, tathā jānantopīti attho. Lahukanti hetuantogadhavisesanaṃ. Lahukattā paṭikkhipitvāti vuttaṃ hoti. Assāti bhagavato, ajjhāsayanti sambandho. ‘‘Ajjhāsayaṃ viditvā’’tivacanassa yuttiṃ dassento āha ‘‘buddhānaṃ hī’’tiādi. Hīti saccaṃ. Ayañcāti sāriputtatthero ca. Aggoti koṭiukkaṃso. Seṭṭhoti pavaro uttamo.
‘‘ব্যত্তেন ভিক্খুনা পটিবলেনা’’তি এত্থ ব্যত্তপটিবলানং ৰিসেসং দস্সেতুং ৰুত্তং ‘‘ব্যত্তো নামা’’তিআদি। তত্থ যস্স সাট্ঠকথং ৰিনযপিটকৰাচুগ্গতং পৰত্ততি, অযং ব্যত্তো নামাতি যোজনা । তস্মিন্তি ৰিনযপিটকং ৰাচুগ্গতভিক্খুম্হি। যস্সাতি ভিক্খুনো। সুগ্গহিতন্তি সাট্ঠকথায সুট্ঠু গহিতং। অযম্পীতি পিসদ্দো পুরিমভিক্খুং অপেক্খতি। ইমস্মিং অত্থেতি ইমস্মিং ৰত্থুম্হি, ইমস্মিং ৰিসযেতি অত্থো। ব্যতিরেকান্ৰযৰসেন পটিবলং দস্সেন্তো আহ ‘‘যো পনা’’তিআদি। যো পন ন সক্কোতীতি সম্বন্ধো। কস্মাতি আহ ‘‘কাসসোসসেম্হাদিনা ৰা’’তিআদি। তত্থ কাসো চ সোসো চ সেম্হো চ, তে আদযো যস্স গেলঞ্ঞস্সাতি কাসসোসসেম্হাদি, আদিসদ্দেন এল়মূগাদযো সঙ্গণ্হাতি। ওট্ঠো চ দন্তো চ জিৰ্হা চ, তা আদযো যেসং তালুআদীনন্তি ওট্ঠদন্তজিৰ্হাদযো, তেসং। পদব্যঞ্জনেহীতি পদঅক্খরেহি। ব্যঞ্জনসদ্দো হেত্থ অক্খরৰাচকো। হাপেতীতি গলত্তা হাপেতি। অঞ্ঞথা ৰা ৰত্তব্বন্তি অঞ্ঞেন সিথিলাদিনা আকারেন ৰা ৰত্তব্বং। অঞ্ঞথা ৰদতীতি অঞ্ঞেন ধনিতাদিআকারেন ৰদতি। তব্বিপরীতোতি তস্স অপটিবলস্স ৰিপরীতো ভিক্খূতি সম্বন্ধো। ততোতি জানাপেতব্বতো। যন্তি যং আকারং ধাতুকম্মমেতং, সঙ্ঘোতি কারিতকম্মমেতং। ইধ কারিতকম্মং কিতো ৰদতি।
‘‘Byattena bhikkhunā paṭibalenā’’ti ettha byattapaṭibalānaṃ visesaṃ dassetuṃ vuttaṃ ‘‘byatto nāmā’’tiādi. Tattha yassa sāṭṭhakathaṃ vinayapiṭakavācuggataṃ pavattati, ayaṃ byatto nāmāti yojanā . Tasminti vinayapiṭakaṃ vācuggatabhikkhumhi. Yassāti bhikkhuno. Suggahitanti sāṭṭhakathāya suṭṭhu gahitaṃ. Ayampīti pisaddo purimabhikkhuṃ apekkhati. Imasmiṃ attheti imasmiṃ vatthumhi, imasmiṃ visayeti attho. Byatirekānvayavasena paṭibalaṃ dassento āha ‘‘yo panā’’tiādi. Yo pana na sakkotīti sambandho. Kasmāti āha ‘‘kāsasosasemhādinā vā’’tiādi. Tattha kāso ca soso ca semho ca, te ādayo yassa gelaññassāti kāsasosasemhādi, ādisaddena eḷamūgādayo saṅgaṇhāti. Oṭṭho ca danto ca jivhā ca, tā ādayo yesaṃ tāluādīnanti oṭṭhadantajivhādayo, tesaṃ. Padabyañjanehīti padaakkharehi. Byañjanasaddo hettha akkharavācako. Hāpetīti galattā hāpeti. Aññathā vā vattabbanti aññena sithilādinā ākārena vā vattabbaṃ. Aññathā vadatīti aññena dhanitādiākārena vadati. Tabbiparītoti tassa apaṭibalassa viparīto bhikkhūti sambandho. Tatoti jānāpetabbato. Yanti yaṃ ākāraṃ dhātukammametaṃ, saṅghoti kāritakammametaṃ. Idha kāritakammaṃ kito vadati.
৭১. উপসম্পন্নসমনন্তরাতি এত্থ উপসম্পন্নস্স সমনন্তরাতি অত্থং নিৰারেন্তো আহ ‘‘উপসম্পন্নো হুত্ৰাৰ সমনন্তরা’’তি। এৰসদ্দেন চিরকালং নিৰত্তেতি। উল্লুম্পতূতি এত্থ উপুব্বলুপধাতুযা উপসগ্গৰসেন ৰা অত্থাতিসযৰসেন ৰা ধাতূনমনেকত্থত্তা ইধ উপুব্বধরধাতুযা অত্থে ৰত্ততীতি দস্সেন্তো আহ ‘‘উদ্ধরতূ’’তি। উট্ঠাপেত্ৰা, উক্খিপিত্ৰা ৰা ধরতূতি অত্থো। তমেৰত্থং দস্সেন্তো আহ ‘‘অকুসলা’’তিআদি। তত্থ ‘‘অকুসলা ৰুট্ঠাপেত্ৰা’’তি ইমিনা সহাৰধিনা উত্যূপসগ্গস্স অত্থং দস্সেতি। ‘‘কুসলে পতিট্ঠাপেতূ’’তি ইমিনা সহাধারেন ধরধাতুস্স অত্থং দস্সেতি। উত্যূপসগ্গস্স উক্খিপনত্থং দস্সেন্তো আহ ‘‘সামণেরভাৰা ৰা উদ্ধরিত্ৰা’’তি। ‘‘পটিচ্চা’’তি ইমিনা উপাদাযাতি এত্থ সমীপে আদিযিত্ৰাতি সদ্দত্থমগহেত্ৰা সঙ্কেতত্থৰসেন পাকটত্তা তস্স সঙ্কেতত্থং দস্সেতি, অধিপ্পাযত্থং দস্সেতীতি অত্থো।
71.Upasampannasamanantarāti ettha upasampannassa samanantarāti atthaṃ nivārento āha ‘‘upasampanno hutvāva samanantarā’’ti. Evasaddena cirakālaṃ nivatteti. Ullumpatūti ettha upubbalupadhātuyā upasaggavasena vā atthātisayavasena vā dhātūnamanekatthattā idha upubbadharadhātuyā atthe vattatīti dassento āha ‘‘uddharatū’’ti. Uṭṭhāpetvā, ukkhipitvā vā dharatūti attho. Tamevatthaṃ dassento āha ‘‘akusalā’’tiādi. Tattha ‘‘akusalā vuṭṭhāpetvā’’ti iminā sahāvadhinā utyūpasaggassa atthaṃ dasseti. ‘‘Kusale patiṭṭhāpetū’’ti iminā sahādhārena dharadhātussa atthaṃ dasseti. Utyūpasaggassa ukkhipanatthaṃ dassento āha ‘‘sāmaṇerabhāvā vā uddharitvā’’ti. ‘‘Paṭiccā’’ti iminā upādāyāti ettha samīpe ādiyitvāti saddatthamagahetvā saṅketatthavasena pākaṭattā tassa saṅketatthaṃ dasseti, adhippāyatthaṃ dassetīti attho.
৭৩. অধিট্ঠিতাতি এত্থ অধি নিচ্চৰসেন ঠাতি পৰত্ততীতি অধিট্ঠিতাতি ৰচনত্থং দস্সেন্তো আহ ‘‘নিচ্চপ্পৰত্তিনী’’তি। কস্মা চত্তারো পচ্চযা নিস্সযাতি ৰুত্তাতি আহ ‘‘যস্মা’’তিআদি। ‘‘চত্তারো’’তিআদিনা চত্তারো পচ্চযে নিস্সায অত্তভাৰো সেতি পৰত্ততীতি নিস্সাযাতি অৰুত্তকম্মত্থং দস্সেতি।
73.Adhiṭṭhitāti ettha adhi niccavasena ṭhāti pavattatīti adhiṭṭhitāti vacanatthaṃ dassento āha ‘‘niccappavattinī’’ti. Kasmā cattāro paccayā nissayāti vuttāti āha ‘‘yasmā’’tiādi. ‘‘Cattāro’’tiādinā cattāro paccaye nissāya attabhāvo seti pavattatīti nissāyāti avuttakammatthaṃ dasseti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৭. পণামিতকথা • 17. Paṇāmitakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / রাধব্রাহ্মণৰত্থুকথা • Rādhabrāhmaṇavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / রাধব্রাহ্মণৰত্থুকথাৰণ্ণনা • Rādhabrāhmaṇavatthukathāvaṇṇanā
