| Library / Tipiṭaka / ติปิฎก • Tipiṭaka / มหาวคฺค-อฎฺฐกถา • Mahāvagga-aṭṭhakathā |
ราธพฺราหฺมณวตฺถุกถา
Rādhabrāhmaṇavatthukathā
๖๙. ราธพฺราหฺมณวตฺถุสฺมิํ – กิญฺจาปิ อายสฺมา สาริปุโตฺต ภควตา พาราณสิยํ ตีหิ สรณคมเนหิ อนุญฺญาตํ ปพฺพชฺชเญฺจว อุปสมฺปทญฺจ ชานาติ, ภควา ปน ตํ ลหุกํ อุปสมฺปทํ ปฎิกฺขิปิตฺวา ญตฺติจตุตฺถกเมฺมน ครุกํ กตฺวา อุปสมฺปทํ อนุญฺญาตุกาโมฯ อถสฺส เถโร อชฺฌาสยํ วิทิตฺวา ‘‘กถาหํ ภเนฺต ตํ พฺราหฺมณํ ปพฺพาเชมิ อุปสมฺปาเทมี’’ติ อาหฯ พุทฺธานญฺหิ ปริสา อชฺฌาสยกุสลา โหนฺติ, อยญฺจ พุทฺธปริสาย อโคฺคฯ
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
พฺยเตฺตน ภิกฺขุนา ปฎิพเลนาติ เอตฺถ พฺยโตฺต นาม ยสฺส สาฎฺฐกถํ วินยปิฎกํ วาจุคฺคตํ ปวตฺตติ, ตสฺมิํ อสติ ยสฺส อนฺตมโส อิทํ ญตฺติจตุตฺถกมฺมวาจามตฺตมฺปิ สุคฺคหิตํ โหติ, วาจุคฺคตํ ปวตฺตติ, อยมฺปิ อิมสฺมิํ อเตฺถ พฺยโตฺตฯ โย ปน กาสโสสเสมฺหาทินา วา เคลเญฺญน โอฎฺฐทนฺตชิวฺหาทีนํ วา อสมฺปตฺติยา ปริยตฺติยํ วา อกตปริจยตฺตา น สโกฺกติ ปริมณฺฑเลหิ ปทพฺยญฺชเนหิ กมฺมวาจํ สาเวตุํ, พฺยญฺชนํ วา ปทํ วา หาเปติ, อญฺญถา วา วตฺตพฺพํ อญฺญถา วทติ, อยํ อปฺปฎิพโลฯ ตพฺพิปรีโต อิมสฺมิํ อเตฺถ ‘‘ปฎิพโล’’ติ เวทิตโพฺพฯ สโงฺฆ ญาเปตโพฺพติ สโงฺฆ ชานาเปตโพฺพฯ ตโต ปรํ ยํ สโงฺฆ ชานาเปตโพฺพ, ตํ ทเสฺสตุํ ‘‘สุณาตุ เม ภเนฺต’’ติอาทิมาหฯ
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
๗๑. อุปสมฺปนฺนสมนนฺตราติ อุปสมฺปโนฺน หุตฺวา สมนนฺตราฯ อนาจารํ อาจรตีติ ปณฺณตฺติวีติกฺกมํ กโรติฯ อุลฺลุมฺปตุ มนฺติ อุทฺธรตุ มํ, อกุสลา วุฎฺฐาเปตฺวา กุสเล ปติฎฺฐเปตุ; สามเณรภาวา วา อุทฺธริตฺวา ภิกฺขุภาเว ปติฎฺฐาเปตูติฯ อนุกมฺปํ อุปาทายาติ อนุทฺทยํ ปฎิจฺจ; มยิ อนุกปฺปํ กตฺวาติ อโตฺถฯ
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
๗๓. อฎฺฐิตา โหตีติ นิจฺจปฺปวตฺตินี โหติฯ จตฺตาโร นิสฺสเยติ จตฺตาโร ปจฺจเยฯ ยสฺมา จตฺตาโร ปจฺจเย นิสฺสาย อตฺตภาโว ปวตฺตติ, ตสฺมา เต นิสฺสยาติ วุจฺจนฺติฯ
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
ราธพฺราหฺมณวตฺถุกถา นิฎฺฐิตาฯ
Rādhabrāhmaṇavatthukathā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๗. ปณามิตกถา • 17. Paṇāmitakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ราธพฺราหฺมณวตฺถุกถาวณฺณนา • Rādhabrāhmaṇavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ราธพฺราหฺมณวตฺถุกถาวณฺณนา • Rādhabrāhmaṇavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ราธพฺราหฺมณวตฺถุกถาวณฺณนา • Rādhabrāhmaṇavatthukathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ราธพฺราหฺมณวตฺถุกถา • Rādhabrāhmaṇavatthukathā
