| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
රාධබ්‍රාහ්‌මණවත්‌ථුකථා
Rādhabrāhmaṇavatthukathā
69. රාධබ්‍රාහ්‌මණවත්‌ථුස්‌මිං – කිඤ්‌චාපි ආයස්‌මා සාරිපුත්‌තො භගවතා බාරාණසියං තීහි සරණගමනෙහි අනුඤ්‌ඤාතං පබ්‌බජ්‌ජඤ්‌චෙව උපසම්‌පදඤ්‌ච ජානාති, භගවා පන තං ලහුකං උපසම්‌පදං පටික්‌ඛිපිත්‌වා ඤත්‌තිචතුත්‌ථකම්‌මෙන ගරුකං කත්‌වා උපසම්‌පදං අනුඤ්‌ඤාතුකාමො. අථස්‌ස ථෙරො අජ්‌ඣාසයං විදිත්‌වා ‘‘කථාහං භන්‌තෙ තං බ්‍රාහ්‌මණං පබ්‌බාජෙමි උපසම්‌පාදෙමී’’ති ආහ. බුද්‌ධානඤ්‌හි පරිසා අජ්‌ඣාසයකුසලා හොන්‌ති, අයඤ්‌ච බුද්‌ධපරිසාය අග්‌ගො.
69.Rādhabrāhmaṇavatthusmiṃ – kiñcāpi āyasmā sāriputto bhagavatā bārāṇasiyaṃ tīhi saraṇagamanehi anuññātaṃ pabbajjañceva upasampadañca jānāti, bhagavā pana taṃ lahukaṃ upasampadaṃ paṭikkhipitvā ñatticatutthakammena garukaṃ katvā upasampadaṃ anuññātukāmo. Athassa thero ajjhāsayaṃ viditvā ‘‘kathāhaṃ bhante taṃ brāhmaṇaṃ pabbājemi upasampādemī’’ti āha. Buddhānañhi parisā ajjhāsayakusalā honti, ayañca buddhaparisāya aggo.
බ්‍යත්‌තෙන භික්‌ඛුනා පටිබලෙනාති එත්‌ථ බ්‍යත්‌තො නාම යස්‌ස සාට්‌ඨකථං විනයපිටකං වාචුග්‌ගතං පවත්‌තති, තස්‌මිං අසති යස්‌ස අන්‌තමසො ඉදං ඤත්‌තිචතුත්‌ථකම්‌මවාචාමත්‌තම්‌පි සුග්‌ගහිතං හොති, වාචුග්‌ගතං පවත්‌තති, අයම්‌පි ඉමස්‌මිං අත්‌ථෙ බ්‍යත්‌තො. යො පන කාසසොසසෙම්‌හාදිනා වා ගෙලඤ්‌ඤෙන ඔට්‌ඨදන්‌තජිව්‌හාදීනං වා අසම්‌පත්‌තියා පරියත්‌තියං වා අකතපරිචයත්‌තා න සක්‌කොති පරිමණ්‌ඩලෙහි පදබ්‍යඤ්‌ජනෙහි කම්‌මවාචං සාවෙතුං, බ්‍යඤ්‌ජනං වා පදං වා හාපෙති, අඤ්‌ඤථා වා වත්‌තබ්‌බං අඤ්‌ඤථා වදති, අයං අප්‌පටිබලො. තබ්‌බිපරීතො ඉමස්‌මිං අත්‌ථෙ ‘‘පටිබලො’’ති වෙදිතබ්‌බො. සඞ්‌ඝො ඤාපෙතබ්‌බොති සඞ්‌ඝො ජානාපෙතබ්‌බො. තතො පරං යං සඞ්‌ඝො ජානාපෙතබ්‌බො, තං දස්‌සෙතුං ‘‘සුණාතු මෙ භන්‌තෙ’’තිආදිමාහ.
Byattena bhikkhunā paṭibalenāti ettha byatto nāma yassa sāṭṭhakathaṃ vinayapiṭakaṃ vācuggataṃ pavattati, tasmiṃ asati yassa antamaso idaṃ ñatticatutthakammavācāmattampi suggahitaṃ hoti, vācuggataṃ pavattati, ayampi imasmiṃ atthe byatto. Yo pana kāsasosasemhādinā vā gelaññena oṭṭhadantajivhādīnaṃ vā asampattiyā pariyattiyaṃ vā akataparicayattā na sakkoti parimaṇḍalehi padabyañjanehi kammavācaṃ sāvetuṃ, byañjanaṃ vā padaṃ vā hāpeti, aññathā vā vattabbaṃ aññathā vadati, ayaṃ appaṭibalo. Tabbiparīto imasmiṃ atthe ‘‘paṭibalo’’ti veditabbo. Saṅgho ñāpetabboti saṅgho jānāpetabbo. Tato paraṃ yaṃ saṅgho jānāpetabbo, taṃ dassetuṃ ‘‘suṇātu me bhante’’tiādimāha.
71. උපසම්‌පන්‌නසමනන්‌තරාති උපසම්‌පන්‌නො හුත්‌වා සමනන්‌තරා. අනාචාරං ආචරතීති පණ්‌ණත්‌තිවීතික්‌කමං කරොති. උල්‌ලුම්‌පතු මන්‌ති උද්‌ධරතු මං, අකුසලා වුට්‌ඨාපෙත්‌වා කුසලෙ පතිට්‌ඨපෙතු; සාමණෙරභාවා වා උද්‌ධරිත්‌වා භික්‌ඛුභාවෙ පතිට්‌ඨාපෙතූති. අනුකම්‌පං උපාදායාති අනුද්‌දයං පටිච්‌ච; මයි අනුකප්‌පං කත්‌වාති අත්‌ථො.
71.Upasampannasamanantarāti upasampanno hutvā samanantarā. Anācāraṃ ācaratīti paṇṇattivītikkamaṃ karoti. Ullumpatu manti uddharatu maṃ, akusalā vuṭṭhāpetvā kusale patiṭṭhapetu; sāmaṇerabhāvā vā uddharitvā bhikkhubhāve patiṭṭhāpetūti. Anukampaṃ upādāyāti anuddayaṃ paṭicca; mayi anukappaṃ katvāti attho.
73. අට්‌ඨිතා හොතීති නිච්‌චප්‌පවත්‌තිනී හොති. චත්‌තාරො නිස්‌සයෙති චත්‌තාරො පච්‌චයෙ. යස්‌මා චත්‌තාරො පච්‌චයෙ නිස්‌සාය අත්‌තභාවො පවත්‌තති, තස්‌මා තෙ නිස්‌සයාති වුච්‌චන්‌ති.
73.Aṭṭhitā hotīti niccappavattinī hoti. Cattāro nissayeti cattāro paccaye. Yasmā cattāro paccaye nissāya attabhāvo pavattati, tasmā te nissayāti vuccanti.
රාධබ්‍රාහ්‌මණවත්‌ථුකථා නිට්‌ඨිතා.
Rādhabrāhmaṇavatthukathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 17. පණාමිතකථා • 17. Paṇāmitakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / රාධබ්‍රාහ්‌මණවත්‌ථුකථාවණ්‌ණනා • Rādhabrāhmaṇavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / රාධබ්‍රාහ්‌මණවත්‌ථුකථාවණ්‌ණනා • Rādhabrāhmaṇavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / රාධබ්‍රාහ්‌මණවත්‌ථුකථාවණ්‌ණනා • Rādhabrāhmaṇavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / රාධබ්‍රාහ්‌මණවත්‌ථුකථා • Rādhabrāhmaṇavatthukathā
