| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ராத⁴ப்³ராஹ்மணவத்து²கதா²வண்ணனா
Rādhabrāhmaṇavatthukathāvaṇṇanā
69. ராத⁴ப்³ராஹ்மணவத்து²ம்ஹி கிஸோ அஹோஸீதி கா²தி³துங் வா பு⁴ஞ்ஜிதுங் வா அஸக்கொந்தோ தனுகோ அஹோஸி அப்பமங்ஸலோஹிதோ. உப்பண்டு³ப்பண்டு³கஜாதோதி ஸஞ்ஜாதுப்பண்டு³ப்பண்டு³கபா⁴வோ பண்டு³பலாஸப்படிபா⁴கோ³. த⁴மனிஸந்த²தக³த்தோதி பரியாதி³ன்னமங்ஸலோஹிதத்தா ஸிராஜாலேனேவ ஸந்த²ரிதக³த்தோ. அதி⁴காரந்தி அதி⁴கிரியங், ஸக்காரந்தி வுத்தங் ஹோதி. கதங் ஜானந்தீதி கதஞ்ஞுனோ, கதங் பாகடங் கத்வா ஜானந்தீதி கதவேதி³னோ. கிங் பன தே²ரோ ப⁴க³வதா பா³ராணஸியங் தீஹி ஸரணக³மனேஹி அனுஞ்ஞாதங் பப்³ப³ஜ்ஜங் உபஸம்பத³ஞ்ச ந ஜானாதீதி? நோ ந ஜானாதி. யதி³ ஏவங் ‘‘கதா²ஹங், ப⁴ந்தே, தங் ப்³ராஹ்மணங் பப்³பா³ஜேமி உபஸம்பாதே³மீ’’தி கஸ்மா ஆஹாதி இமங் அனுயோக³ங் ஸந்தா⁴யாஹ ‘‘கிஞ்சாபி ஆயஸ்மா ஸாரிபுத்தோ’’திஆதி³. பரிமண்ட³லேஹீதி பரிபுண்ணேஹி. அஞ்ஞதா² வா வத்தப்³ப³ங் அஞ்ஞதா² வத³தீதி ‘‘ப⁴ந்தே’’தி வத்தப்³ப³ங் ‘‘ப³ந்தே⁴’’தி வத³தி.
69. Rādhabrāhmaṇavatthumhi kiso ahosīti khādituṃ vā bhuñjituṃ vā asakkonto tanuko ahosi appamaṃsalohito. Uppaṇḍuppaṇḍukajātoti sañjātuppaṇḍuppaṇḍukabhāvo paṇḍupalāsappaṭibhāgo. Dhamanisanthatagattoti pariyādinnamaṃsalohitattā sirājāleneva santharitagatto. Adhikāranti adhikiriyaṃ, sakkāranti vuttaṃ hoti. Kataṃ jānantīti kataññuno, kataṃ pākaṭaṃ katvā jānantīti katavedino. Kiṃ pana thero bhagavatā bārāṇasiyaṃ tīhi saraṇagamanehi anuññātaṃ pabbajjaṃ upasampadañca na jānātīti? No na jānāti. Yadi evaṃ ‘‘kathāhaṃ, bhante, taṃ brāhmaṇaṃ pabbājemi upasampādemī’’ti kasmā āhāti imaṃ anuyogaṃ sandhāyāha ‘‘kiñcāpi āyasmā sāriputto’’tiādi. Parimaṇḍalehīti paripuṇṇehi. Aññathā vā vattabbaṃ aññathā vadatīti ‘‘bhante’’ti vattabbaṃ ‘‘bandhe’’ti vadati.
71-73. ஸமனந்தராதி அனந்தரங். பண்ணத்திவீதிக்கமங் கரோதீதி ஸிக்கா²பத³வீதிக்கமங் கரோதி. அத்தபா⁴வபரிஹரணத்த²ங் நிஸ்ஸீயந்தீதி நிஸ்ஸயா, பிண்டி³யாலோபபோ⁴ஜனாதி³கா சத்தாரோ பச்சயா. தத்த² பிண்டி³யாலோபபோ⁴ஜனந்தி ஜங்க⁴பிண்டி³யப³லேன சரித்வா ஆலோபமத்தங் லத்³த⁴போ⁴ஜனங். அதிரேகலாபோ⁴தி ‘‘பிண்டி³யாலோபபோ⁴ஜனங் நிஸ்ஸாயா’’தி ஏவங் வுத்தபி⁴க்கா²ஹாரலாப⁴தோ அதி⁴கலாபோ⁴ ஸங்க⁴ப⁴த்தாதி³. தத்த² ஸகலஸ்ஸ ஸங்க⁴ஸ்ஸ தா³தப்³ப³ப⁴த்தங் ஸங்க⁴ப⁴த்தங். கதிபயே பி⁴க்கூ² உத்³தி³ஸித்வா தா³தப்³ப³ப⁴த்தங் உத்³தே³ஸப⁴த்தங். நிமந்தெத்வா தா³தப்³ப³ப⁴த்தங் நிமந்தனங். ஸலாகங் கா³ஹாபெத்வா தா³தப்³ப³ப⁴த்தங் ஸலாகப⁴த்தங். ஏகஸ்மிங் பக்கே² ஏகதி³வஸங் தா³தப்³ப³ப⁴த்தங் பக்கி²கங். உபோஸதே² தா³தப்³ப³ப⁴த்தங் உபோஸதி²கங். பாடிபத³தி³வஸே தா³தப்³ப³ப⁴த்தங் பாடிபதி³கங். வித்தா²ரகதா² நேஸங் ஸேனாஸனக்க²ந்த⁴கவண்ணனாயங் ஆவி ப⁴விஸ்ஸதி.
71-73.Samanantarāti anantaraṃ. Paṇṇattivītikkamaṃ karotīti sikkhāpadavītikkamaṃ karoti. Attabhāvapariharaṇatthaṃ nissīyantīti nissayā, piṇḍiyālopabhojanādikā cattāro paccayā. Tattha piṇḍiyālopabhojananti jaṅghapiṇḍiyabalena caritvā ālopamattaṃ laddhabhojanaṃ. Atirekalābhoti ‘‘piṇḍiyālopabhojanaṃ nissāyā’’ti evaṃ vuttabhikkhāhāralābhato adhikalābho saṅghabhattādi. Tattha sakalassa saṅghassa dātabbabhattaṃ saṅghabhattaṃ. Katipaye bhikkhū uddisitvā dātabbabhattaṃ uddesabhattaṃ. Nimantetvā dātabbabhattaṃ nimantanaṃ. Salākaṃ gāhāpetvā dātabbabhattaṃ salākabhattaṃ. Ekasmiṃ pakkhe ekadivasaṃ dātabbabhattaṃ pakkhikaṃ. Uposathe dātabbabhattaṃ uposathikaṃ. Pāṭipadadivase dātabbabhattaṃ pāṭipadikaṃ. Vitthārakathā nesaṃ senāsanakkhandhakavaṇṇanāyaṃ āvi bhavissati.
விஹாரோதி பாகாரபரிச்சி²ன்னோ ஸகலோ ஆவாஸோ. அட்³ட⁴யோகோ³தி
Vihāroti pākāraparicchinno sakalo āvāso. Aḍḍhayogoti
தீ³க⁴பாஸாதோ³. க³ருளஸண்டா²னபாஸாதோ³திபி வத³ந்தி. பாஸாதோ³தி சதுரஸ்ஸபாஸாதோ³. ஹம்மியந்தி முண்ட³ச்ச²த³னபாஸாதோ³. அபரே பன ப⁴ணந்தி ‘‘விஹாரோ நாம தீ³க⁴முக²பாஸாதோ³, அட்³ட⁴யோகோ³ ஏகபஸ்ஸச்ச²த³னகஸேனாஸனங் , தஸ்ஸ கிர ஏகபஸ்ஸே பி⁴த்தி உச்சதரா ஹோதி, இதரபஸ்ஸே நீசா, தேன தங் ஏகபஸ்ஸச்ச²த³னகங் ஹோதி, பாஸாதோ³ ஆயதசதுரஸ்ஸபாஸாதோ³, ஹம்மியங் முண்ட³ச்ச²த³னங் சந்தி³கங்க³ணயுத்த’’ந்தி. கு³ஹாதி பப்³ப³தகு³ஹா. பூதிமுத்தந்தி யங் கிஞ்சி முத்தங். யதா² ஸுவண்ணவண்ணோபி காயோ ‘‘பூதிகாயோ’’தி வுச்சதி, ஏவங் அபி⁴னவம்பி முத்தங் பூதிமுத்தமேவ. ஸேஸமெத்த² உத்தானத்த²மேவ.
Dīghapāsādo. Garuḷasaṇṭhānapāsādotipi vadanti. Pāsādoti caturassapāsādo. Hammiyanti muṇḍacchadanapāsādo. Apare pana bhaṇanti ‘‘vihāro nāma dīghamukhapāsādo, aḍḍhayogo ekapassacchadanakasenāsanaṃ , tassa kira ekapasse bhitti uccatarā hoti, itarapasse nīcā, tena taṃ ekapassacchadanakaṃ hoti, pāsādo āyatacaturassapāsādo, hammiyaṃ muṇḍacchadanaṃ candikaṅgaṇayutta’’nti. Guhāti pabbataguhā. Pūtimuttanti yaṃ kiñci muttaṃ. Yathā suvaṇṇavaṇṇopi kāyo ‘‘pūtikāyo’’ti vuccati, evaṃ abhinavampi muttaṃ pūtimuttameva. Sesamettha uttānatthameva.
ராத⁴ப்³ராஹ்மணவத்து²கதா²வண்ணனா நிட்டி²தா.
Rādhabrāhmaṇavatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 17. பணாமிதகதா² • 17. Paṇāmitakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ராத⁴ப்³ராஹ்மணவத்து²கதா² • Rādhabrāhmaṇavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ராத⁴ப்³ராஹ்மணவத்து²கதா²வண்ணனா • Rādhabrāhmaṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ராத⁴ப்³ராஹ்மணவத்து²கதா²வண்ணனா • Rādhabrāhmaṇavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ராத⁴ப்³ராஹ்மணவத்து²கதா² • Rādhabrāhmaṇavatthukathā
