| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៤. រាគបេយ្យាលំ
4. Rāgapeyyālaṃ
៥០២. ‘‘រាគស្ស , ភិក្ខវេ, អភិញ្ញាយ ឯកាទស ធម្មា ភាវេតព្ពា។ កតមេ ឯកាទស? បឋមំ ឈានំ, ទុតិយំ ឈានំ, តតិយំ ឈានំ, ចតុត្ថំ ឈានំ, មេត្តាចេតោវិមុត្តិ, ករុណាចេតោវិមុត្តិ, មុទិតាចេតោវិមុត្តិ, ឧបេក្ខាចេតោវិមុត្តិ, អាកាសានញ្ចាយតនំ, វិញ្ញាណញ្ចាយតនំ, អាកិញ្ចញ្ញាយតនំ – រាគស្ស, ភិក្ខវេ, អភិញ្ញាយ ឥមេ ឯកាទស ធម្មា ភាវេតព្ពា។
502. ‘‘Rāgassa , bhikkhave, abhiññāya ekādasa dhammā bhāvetabbā. Katame ekādasa? Paṭhamaṃ jhānaṃ, dutiyaṃ jhānaṃ, tatiyaṃ jhānaṃ, catutthaṃ jhānaṃ, mettācetovimutti, karuṇācetovimutti, muditācetovimutti, upekkhācetovimutti, ākāsānañcāyatanaṃ, viññāṇañcāyatanaṃ, ākiñcaññāyatanaṃ – rāgassa, bhikkhave, abhiññāya ime ekādasa dhammā bhāvetabbā.
៥០៣-៥១១. ‘‘រាគស្ស, ភិក្ខវេ, បរិញ្ញាយ… បរិក្ខយាយ… បហានាយ… ខយាយ… វយាយ… វិរាគាយ… និរោធាយ… ចាគាយ… បដិនិស្សគ្គាយ… ឥមេ ឯកាទស ធម្មា ភាវេតព្ពា។
503-511. ‘‘Rāgassa, bhikkhave, pariññāya… parikkhayāya… pahānāya… khayāya… vayāya… virāgāya… nirodhāya… cāgāya… paṭinissaggāya… ime ekādasa dhammā bhāvetabbā.
៥១២-៦៧១. ‘‘ទោសស្ស …បេ.… មោហស្ស… កោធស្ស… ឧបនាហស្ស… មក្ខស្ស… បឡាសស្ស… ឥស្សាយ… មច្ឆរិយស្ស… មាយាយ… សាឋេយ្យស្ស… ថម្ភស្ស… សារម្ភស្ស… មានស្ស… អតិមានស្ស… មទស្ស… បមាទស្ស អភិញ្ញាយ…បេ.… បរិញ្ញាយ… បរិក្ខយាយ… បហានាយ… ខយាយ… វយាយ… វិរាគាយ… និរោធាយ… ចាគាយ… បដិនិស្សគ្គាយ ឥមេ ឯកាទស ធម្មា ភាវេតព្ពា’’តិ។
512-671. ‘‘Dosassa …pe… mohassa… kodhassa… upanāhassa… makkhassa… paḷāsassa… issāya… macchariyassa… māyāya… sāṭheyyassa… thambhassa… sārambhassa… mānassa… atimānassa… madassa… pamādassa abhiññāya…pe… pariññāya… parikkhayāya… pahānāya… khayāya… vayāya… virāgāya… nirodhāya… cāgāya… paṭinissaggāya ime ekādasa dhammā bhāvetabbā’’ti.
ឥទមវោច ភគវា។ អត្តមនា តេ ភិក្ខូ ភគវតោ ភាសិតំ អភិនន្ទុន្តិ។
Idamavoca bhagavā. Attamanā te bhikkhū bhagavato bhāsitaṃ abhinandunti.
រាគបេយ្យាលំ និដ្ឋិតំ។
Rāgapeyyālaṃ niṭṭhitaṃ.
ឯកាទសកនិបាតបាឡិ និដ្ឋិតា។
Ekādasakanipātapāḷi niṭṭhitā.
អង្គុត្តរនិកាយោ សមត្តោ។
Aṅguttaranikāyo samatto.
Footnotes:
