| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ரஹோக³தவக்³கோ³
2. Rahogatavaggo
1. ரஹோக³தஸுத்தங்
1. Rahogatasuttaṃ
259. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘திஸ்ஸோ வேத³னா வுத்தா ப⁴க³வதா. ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா திஸ்ஸோ வேத³னா வுத்தா ப⁴க³வதா. வுத்தங் கோ² பனேதங் ப⁴க³வதா – ‘யங் கிஞ்சி வேத³யிதங் தங் து³க்க²ஸ்மி’ந்தி. கிங் நு கோ² ஏதங் ப⁴க³வதா ஸந்தா⁴ய பா⁴ஸிதங் – ‘யங் கிஞ்சி வேத³யிதங் தங் து³க்க²ஸ்மி’’’ந்தி?
259. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘tisso vedanā vuttā bhagavatā. Sukhā vedanā, dukkhā vedanā, adukkhamasukhā vedanā – imā tisso vedanā vuttā bhagavatā. Vuttaṃ kho panetaṃ bhagavatā – ‘yaṃ kiñci vedayitaṃ taṃ dukkhasmi’nti. Kiṃ nu kho etaṃ bhagavatā sandhāya bhāsitaṃ – ‘yaṃ kiñci vedayitaṃ taṃ dukkhasmi’’’nti?
‘‘ஸாது⁴ ஸாது⁴, பி⁴க்கு²! திஸ்ஸோ இமா, பி⁴க்கு², வேத³னா வுத்தா மயா. ஸுகா² வேத³னா, து³க்கா² வேத³னா, அது³க்க²மஸுகா² வேத³னா – இமா திஸ்ஸோ வேத³னா வுத்தா மயா. வுத்தங் கோ² பனேதங், பி⁴க்கு², மயா – ‘யங் கிஞ்சி வேத³யிதங், தங் து³க்க²ஸ்மி’ந்தி. தங் கோ² பனேதங், பி⁴க்கு², மயா ஸங்கா²ரானங்யேவ அனிச்சதங் ஸந்தா⁴ய பா⁴ஸிதங் – ‘யங் கிஞ்சி வேத³யிதங் தங் து³க்க²ஸ்மி’ந்தி . தங் கோ² பனேதங், பி⁴க்கு², மயா ஸங்கா²ரானங்யேவ க²யத⁴ம்மதங்…பே॰… வயத⁴ம்மதங்…பே॰… விராக³த⁴ம்மதங் …பே॰… நிரோத⁴த⁴ம்மதங்…பே॰… விபரிணாமத⁴ம்மதங் ஸந்தா⁴ய பா⁴ஸிதங் – ‘யங் கிஞ்சி வேத³யிதங் தங் து³க்க²ஸ்மி’ந்தி. அத² கோ² பன, பி⁴க்கு², மயா அனுபுப்³ப³ஸங்கா²ரானங் நிரோதோ⁴ அக்கா²தோ. பட²மங் ஜா²னங் ஸமாபன்னஸ்ஸ வாசா நிருத்³தா⁴ ஹோதி. து³தியங் ஜா²னங் ஸமாபன்னஸ்ஸ விதக்கவிசாரா நிருத்³தா⁴ ஹொந்தி. ததியங் ஜா²னங் ஸமாபன்னஸ்ஸ பீதி நிருத்³தா⁴ ஹோதி. சதுத்த²ங் ஜா²னங் ஸமாபன்னஸ்ஸ அஸ்ஸாஸபஸ்ஸாஸா நிருத்³தா⁴ ஹொந்தி. ஆகாஸானஞ்சாயதனங் ஸமாபன்னஸ்ஸ ரூபஸஞ்ஞா நிருத்³தா⁴ ஹோதி. விஞ்ஞாணஞ்சாயதனங் ஸமாபன்னஸ்ஸ ஆகாஸானஞ்சாயதனஸஞ்ஞா நிருத்³தா⁴ ஹோதி. ஆகிஞ்சஞ்ஞாயதனங் ஸமாபன்னஸ்ஸ விஞ்ஞாணஞ்சாயதனஸஞ்ஞா நிருத்³தா⁴ ஹோதி. நேவஸஞ்ஞானாஸஞ்ஞாயதனங் ஸமாபன்னஸ்ஸ ஆகிஞ்சஞ்ஞாயதனஸஞ்ஞா நிருத்³தா⁴ ஹோதி. ஸஞ்ஞாவேத³யிதனிரோத⁴ங் ஸமாபன்னஸ்ஸ ஸஞ்ஞா ச வேத³னா ச நிருத்³தா⁴ ஹொந்தி. கீ²ணாஸவஸ்ஸ பி⁴க்கு²னோ ராகோ³ நிருத்³தோ⁴ ஹோதி, தோ³ஸோ நிருத்³தோ⁴ ஹோதி, மோஹோ நிருத்³தோ⁴ ஹோதி. அத² கோ², பி⁴க்கு², மயா அனுபுப்³ப³ஸங்கா²ரானங் வூபஸமோ அக்கா²தோ. பட²மங் ஜா²னங் ஸமாபன்னஸ்ஸ வாசா வூபஸந்தா ஹோதி. து³தியங் ஜா²னங் ஸமாபன்னஸ்ஸ விதக்கவிசாரா வூபஸந்தா ஹொந்தி…பே॰… ஸஞ்ஞாவேத³யிதனிரோத⁴ங் ஸமாபன்னஸ்ஸ ஸஞ்ஞா ச வேத³னா ச வூபஸந்தா ஹொந்தி. கீ²ணாஸவஸ்ஸ பி⁴க்கு²னோ ராகோ³ வூபஸந்தோ ஹோதி, தோ³ஸோ வூபஸந்தோ ஹோதி, மோஹோ வூபஸந்தோ ஹோதி. ச²யிமா, பி⁴க்கு², பஸ்ஸத்³தி⁴யோ. பட²மங் ஜா²னங் ஸமாபன்னஸ்ஸ வாசா படிப்பஸ்ஸத்³தா⁴ ஹோதி. து³தியங் ஜா²னங் ஸமாபன்னஸ்ஸ விதக்கவிசாரா படிப்பஸ்ஸத்³தா⁴ ஹொந்தி. ததியங் ஜா²னங் ஸமாபன்னஸ்ஸ பீதி படிப்பஸ்ஸத்³தா⁴ ஹோதி. சதுத்த²ங் ஜா²னங் ஸமாபன்னஸ்ஸ அஸ்ஸாஸபஸ்ஸாஸா படிப்பஸ்ஸத்³தா⁴ ஹொந்தி . ஸஞ்ஞாவேத³யிதனிரோத⁴ங் ஸமாபன்னஸ்ஸ ஸஞ்ஞா ச வேத³னா ச படிப்பஸ்ஸத்³தா⁴ ஹொந்தி. கீ²ணாஸவஸ்ஸ பி⁴க்கு²னோ ராகோ³ படிப்பஸ்ஸத்³தோ⁴ ஹோதி, தோ³ஸோ படிப்பஸ்ஸத்³தோ⁴ ஹோதி, மோஹோ படிப்பஸ்ஸத்³தோ⁴ ஹோதீ’’தி. பட²மங்.
‘‘Sādhu sādhu, bhikkhu! Tisso imā, bhikkhu, vedanā vuttā mayā. Sukhā vedanā, dukkhā vedanā, adukkhamasukhā vedanā – imā tisso vedanā vuttā mayā. Vuttaṃ kho panetaṃ, bhikkhu, mayā – ‘yaṃ kiñci vedayitaṃ, taṃ dukkhasmi’nti. Taṃ kho panetaṃ, bhikkhu, mayā saṅkhārānaṃyeva aniccataṃ sandhāya bhāsitaṃ – ‘yaṃ kiñci vedayitaṃ taṃ dukkhasmi’nti . Taṃ kho panetaṃ, bhikkhu, mayā saṅkhārānaṃyeva khayadhammataṃ…pe… vayadhammataṃ…pe… virāgadhammataṃ …pe… nirodhadhammataṃ…pe… vipariṇāmadhammataṃ sandhāya bhāsitaṃ – ‘yaṃ kiñci vedayitaṃ taṃ dukkhasmi’nti. Atha kho pana, bhikkhu, mayā anupubbasaṅkhārānaṃ nirodho akkhāto. Paṭhamaṃ jhānaṃ samāpannassa vācā niruddhā hoti. Dutiyaṃ jhānaṃ samāpannassa vitakkavicārā niruddhā honti. Tatiyaṃ jhānaṃ samāpannassa pīti niruddhā hoti. Catutthaṃ jhānaṃ samāpannassa assāsapassāsā niruddhā honti. Ākāsānañcāyatanaṃ samāpannassa rūpasaññā niruddhā hoti. Viññāṇañcāyatanaṃ samāpannassa ākāsānañcāyatanasaññā niruddhā hoti. Ākiñcaññāyatanaṃ samāpannassa viññāṇañcāyatanasaññā niruddhā hoti. Nevasaññānāsaññāyatanaṃ samāpannassa ākiñcaññāyatanasaññā niruddhā hoti. Saññāvedayitanirodhaṃ samāpannassa saññā ca vedanā ca niruddhā honti. Khīṇāsavassa bhikkhuno rāgo niruddho hoti, doso niruddho hoti, moho niruddho hoti. Atha kho, bhikkhu, mayā anupubbasaṅkhārānaṃ vūpasamo akkhāto. Paṭhamaṃ jhānaṃ samāpannassa vācā vūpasantā hoti. Dutiyaṃ jhānaṃ samāpannassa vitakkavicārā vūpasantā honti…pe… saññāvedayitanirodhaṃ samāpannassa saññā ca vedanā ca vūpasantā honti. Khīṇāsavassa bhikkhuno rāgo vūpasanto hoti, doso vūpasanto hoti, moho vūpasanto hoti. Chayimā, bhikkhu, passaddhiyo. Paṭhamaṃ jhānaṃ samāpannassa vācā paṭippassaddhā hoti. Dutiyaṃ jhānaṃ samāpannassa vitakkavicārā paṭippassaddhā honti. Tatiyaṃ jhānaṃ samāpannassa pīti paṭippassaddhā hoti. Catutthaṃ jhānaṃ samāpannassa assāsapassāsā paṭippassaddhā honti . Saññāvedayitanirodhaṃ samāpannassa saññā ca vedanā ca paṭippassaddhā honti. Khīṇāsavassa bhikkhuno rāgo paṭippassaddho hoti, doso paṭippassaddho hoti, moho paṭippassaddho hotī’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ரஹோக³தஸுத்தவண்ணனா • 1. Rahogatasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ரஹோக³தஸுத்தவண்ணனா • 1. Rahogatasuttavaṇṇanā
