| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ရဟောဂတဝဂ္ဂော
2. Rahogatavaggo
၁. ရဟောဂတသုတ္တံ
1. Rahogatasuttaṃ
၂၅၉. အထ ခော အညတရော ဘိက္ခု ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော သော ဘိက္ခု ဘဂဝန္တံ ဧတဒဝောစ – ‘‘ဣဓ မယ္ဟံ, ဘန္တေ, ရဟောဂတသ္သ ပဋိသလ္လီနသ္သ ဧဝံ စေတသော ပရိဝိတက္ကော ဥဒပာဒိ – ‘တိသ္သော ဝေဒနာ ဝုတ္တာ ဘဂဝတာ။ သုခာ ဝေဒနာ, ဒုက္ခာ ဝေဒနာ, အဒုက္ခမသုခာ ဝေဒနာ – ဣမာ တိသ္သော ဝေဒနာ ဝုတ္တာ ဘဂဝတာ။ ဝုတ္တံ ခော ပနေတံ ဘဂဝတာ – ‘ယံ ကိဉ္စိ ဝေဒယိတံ တံ ဒုက္ခသ္မိ’န္တိ။ ကိံ နု ခော ဧတံ ဘဂဝတာ သန္ဓာယ ဘာသိတံ – ‘ယံ ကိဉ္စိ ဝေဒယိတံ တံ ဒုက္ခသ္မိ’’’န္တိ?
259. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi – ‘tisso vedanā vuttā bhagavatā. Sukhā vedanā, dukkhā vedanā, adukkhamasukhā vedanā – imā tisso vedanā vuttā bhagavatā. Vuttaṃ kho panetaṃ bhagavatā – ‘yaṃ kiñci vedayitaṃ taṃ dukkhasmi’nti. Kiṃ nu kho etaṃ bhagavatā sandhāya bhāsitaṃ – ‘yaṃ kiñci vedayitaṃ taṃ dukkhasmi’’’nti?
‘‘သာဓု သာဓု, ဘိက္ခု! တိသ္သော ဣမာ, ဘိက္ခု, ဝေဒနာ ဝုတ္တာ မယာ။ သုခာ ဝေဒနာ, ဒုက္ခာ ဝေဒနာ, အဒုက္ခမသုခာ ဝေဒနာ – ဣမာ တိသ္သော ဝေဒနာ ဝုတ္တာ မယာ။ ဝုတ္တံ ခော ပနေတံ, ဘိက္ခု, မယာ – ‘ယံ ကိဉ္စိ ဝေဒယိတံ, တံ ဒုက္ခသ္မိ’န္တိ။ တံ ခော ပနေတံ, ဘိက္ခု, မယာ သင္ခာရာနံယေဝ အနိစ္စတံ သန္ဓာယ ဘာသိတံ – ‘ယံ ကိဉ္စိ ဝေဒယိတံ တံ ဒုက္ခသ္မိ’န္တိ ။ တံ ခော ပနေတံ, ဘိက္ခု, မယာ သင္ခာရာနံယေဝ ခယဓမ္မတံ။ပေ.။ ဝယဓမ္မတံ။ပေ.။ ဝိရာဂဓမ္မတံ ။ပေ.။ နိရောဓဓမ္မတံ။ပေ.။ ဝိပရိဏာမဓမ္မတံ သန္ဓာယ ဘာသိတံ – ‘ယံ ကိဉ္စိ ဝေဒယိတံ တံ ဒုက္ခသ္မိ’န္တိ။ အထ ခော ပန, ဘိက္ခု, မယာ အနုပုဗ္ဗသင္ခာရာနံ နိရောဓော အက္ခာတော။ ပဌမံ ဈာနံ သမာပန္နသ္သ ဝာစာ နိရုဒ္ဓာ ဟောတိ။ ဒုတိယံ ဈာနံ သမာပန္နသ္သ ဝိတက္ကဝိစာရာ နိရုဒ္ဓာ ဟောန္တိ။ တတိယံ ဈာနံ သမာပန္နသ္သ ပီတိ နိရုဒ္ဓာ ဟောတိ။ စတုတ္ထံ ဈာနံ သမာပန္နသ္သ အသ္သာသပသ္သာသာ နိရုဒ္ဓာ ဟောန္တိ။ အာကာသာနဉ္စာယတနံ သမာပန္နသ္သ ရူပသညာ နိရုဒ္ဓာ ဟောတိ။ ဝိညာဏဉ္စာယတနံ သမာပန္နသ္သ အာကာသာနဉ္စာယတနသညာ နိရုဒ္ဓာ ဟောတိ။ အာကိဉ္စညာယတနံ သမာပန္နသ္သ ဝိညာဏဉ္စာယတနသညာ နိရုဒ္ဓာ ဟောတိ။ နေဝသညာနာသညာယတနံ သမာပန္နသ္သ အာကိဉ္စညာယတနသညာ နိရုဒ္ဓာ ဟောတိ။ သညာဝေဒယိတနိရောဓံ သမာပန္နသ္သ သညာ စ ဝေဒနာ စ နိရုဒ္ဓာ ဟောန္တိ။ ခီဏာသဝသ္သ ဘိက္ခုနော ရာဂော နိရုဒ္ဓော ဟောတိ, ဒောသော နိရုဒ္ဓော ဟောတိ, မောဟော နိရုဒ္ဓော ဟောတိ။ အထ ခော, ဘိက္ခု, မယာ အနုပုဗ္ဗသင္ခာရာနံ ဝူပသမော အက္ခာတော။ ပဌမံ ဈာနံ သမာပန္နသ္သ ဝာစာ ဝူပသန္တာ ဟောတိ။ ဒုတိယံ ဈာနံ သမာပန္နသ္သ ဝိတက္ကဝိစာရာ ဝူပသန္တာ ဟောန္တိ။ပေ.။ သညာဝေဒယိတနိရောဓံ သမာပန္နသ္သ သညာ စ ဝေဒနာ စ ဝူပသန္တာ ဟောန္တိ။ ခီဏာသဝသ္သ ဘိက္ခုနော ရာဂော ဝူပသန္တော ဟောတိ, ဒောသော ဝူပသန္တော ဟောတိ, မောဟော ဝူပသန္တော ဟောတိ။ ဆယိမာ, ဘိက္ခု, ပသ္သဒ္ဓိယော။ ပဌမံ ဈာနံ သမာပန္နသ္သ ဝာစာ ပဋိပ္ပသ္သဒ္ဓာ ဟောတိ။ ဒုတိယံ ဈာနံ သမာပန္နသ္သ ဝိတက္ကဝိစာရာ ပဋိပ္ပသ္သဒ္ဓာ ဟောန္တိ။ တတိယံ ဈာနံ သမာပန္နသ္သ ပီတိ ပဋိပ္ပသ္သဒ္ဓာ ဟောတိ။ စတုတ္ထံ ဈာနံ သမာပန္နသ္သ အသ္သာသပသ္သာသာ ပဋိပ္ပသ္သဒ္ဓာ ဟောန္တိ ။ သညာဝေဒယိတနိရောဓံ သမာပန္နသ္သ သညာ စ ဝေဒနာ စ ပဋိပ္ပသ္သဒ္ဓာ ဟောန္တိ။ ခီဏာသဝသ္သ ဘိက္ခုနော ရာဂော ပဋိပ္ပသ္သဒ္ဓော ဟောတိ, ဒောသော ပဋိပ္ပသ္သဒ္ဓော ဟောတိ, မောဟော ပဋိပ္ပသ္သဒ္ဓော ဟောတီ’’တိ။ ပဌမံ။
‘‘Sādhu sādhu, bhikkhu! Tisso imā, bhikkhu, vedanā vuttā mayā. Sukhā vedanā, dukkhā vedanā, adukkhamasukhā vedanā – imā tisso vedanā vuttā mayā. Vuttaṃ kho panetaṃ, bhikkhu, mayā – ‘yaṃ kiñci vedayitaṃ, taṃ dukkhasmi’nti. Taṃ kho panetaṃ, bhikkhu, mayā saṅkhārānaṃyeva aniccataṃ sandhāya bhāsitaṃ – ‘yaṃ kiñci vedayitaṃ taṃ dukkhasmi’nti . Taṃ kho panetaṃ, bhikkhu, mayā saṅkhārānaṃyeva khayadhammataṃ…pe… vayadhammataṃ…pe… virāgadhammataṃ …pe… nirodhadhammataṃ…pe… vipariṇāmadhammataṃ sandhāya bhāsitaṃ – ‘yaṃ kiñci vedayitaṃ taṃ dukkhasmi’nti. Atha kho pana, bhikkhu, mayā anupubbasaṅkhārānaṃ nirodho akkhāto. Paṭhamaṃ jhānaṃ samāpannassa vācā niruddhā hoti. Dutiyaṃ jhānaṃ samāpannassa vitakkavicārā niruddhā honti. Tatiyaṃ jhānaṃ samāpannassa pīti niruddhā hoti. Catutthaṃ jhānaṃ samāpannassa assāsapassāsā niruddhā honti. Ākāsānañcāyatanaṃ samāpannassa rūpasaññā niruddhā hoti. Viññāṇañcāyatanaṃ samāpannassa ākāsānañcāyatanasaññā niruddhā hoti. Ākiñcaññāyatanaṃ samāpannassa viññāṇañcāyatanasaññā niruddhā hoti. Nevasaññānāsaññāyatanaṃ samāpannassa ākiñcaññāyatanasaññā niruddhā hoti. Saññāvedayitanirodhaṃ samāpannassa saññā ca vedanā ca niruddhā honti. Khīṇāsavassa bhikkhuno rāgo niruddho hoti, doso niruddho hoti, moho niruddho hoti. Atha kho, bhikkhu, mayā anupubbasaṅkhārānaṃ vūpasamo akkhāto. Paṭhamaṃ jhānaṃ samāpannassa vācā vūpasantā hoti. Dutiyaṃ jhānaṃ samāpannassa vitakkavicārā vūpasantā honti…pe… saññāvedayitanirodhaṃ samāpannassa saññā ca vedanā ca vūpasantā honti. Khīṇāsavassa bhikkhuno rāgo vūpasanto hoti, doso vūpasanto hoti, moho vūpasanto hoti. Chayimā, bhikkhu, passaddhiyo. Paṭhamaṃ jhānaṃ samāpannassa vācā paṭippassaddhā hoti. Dutiyaṃ jhānaṃ samāpannassa vitakkavicārā paṭippassaddhā honti. Tatiyaṃ jhānaṃ samāpannassa pīti paṭippassaddhā hoti. Catutthaṃ jhānaṃ samāpannassa assāsapassāsā paṭippassaddhā honti . Saññāvedayitanirodhaṃ samāpannassa saññā ca vedanā ca paṭippassaddhā honti. Khīṇāsavassa bhikkhuno rāgo paṭippassaddho hoti, doso paṭippassaddho hoti, moho paṭippassaddho hotī’’ti. Paṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ရဟောဂတသုတ္တဝဏ္ဏနာ • 1. Rahogatasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. ရဟောဂတသုတ္တဝဏ္ဏနာ • 1. Rahogatasuttavaṇṇanā
