| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. රහොගතවග්‌ගො
2. Rahogatavaggo
1. රහොගතසුත්‌තවණ්‌ණනා
1. Rahogatasuttavaṇṇanā
259. යංකිඤ්‌චි වෙදයිතන්‌ති ‘‘සුඛං දුක්‌ඛං අදුක්‌ඛමසුඛ’’න්‌ති වුත්‌තං වෙදයිතං දුක්‌ඛස්‌මිං අන්‌තොගධං, දුක්‌ඛන්‌ති වත්‌තබ්‌බතං ලභති පරියායෙනාති අත්‌ථො. තෙනාහ ‘‘තං සබ්‌බං දුක්‌ඛන්‌ති අත්‌ථො’’ති. යා එසාතිආදීසු යො සඞ්‌ඛාරානං අනිච්‌චතාසඞ්‌ඛාතො හුත්‌වා අභාවාකාරො, යා ඛයසභාවතා විනස්‌සනසභාවතා ජරාය මරණෙන චාති ද්‌විධා විපරිණාමනසභාවතා, එතං සන්‌ධාය උද්‌දිස්‌ස සබ්‌බං වෙදයිතං දුක්‌ඛන්‌ති මයා වුත්‌තන්‌ති අයං සඞ්‌ඛෙපත්‌ථො. සාති සඞ්‌ඛාරානං අනිච්‌චතා . වෙදනානම්‌පි අනිච්‌චතා එව සඞ්‌ඛාරසභාවත්‌තා. තාසං අනිච්‌චතා ච නාම මරණං භඞ්‌ගොති කත්‌වා තතො උත්‌තරි දුක්‌ඛං නාම නත්‌ථීති සබ්‌බා වෙදනා ‘‘දුක්‌ඛා’’ති වුත්‌තා, යථා ‘‘යදනිච්‌චං තං දුක්‌ඛ’’න්‌ති ච, ‘‘පඤ්‌චුපාදානක්‌ඛන්‌ධා දුක්‌ඛා’’ති ච වුත්‌තං. ඉදං සුත්‌තපදං. චත්‌තාරො ආරුප්‌පාති චතස්‌සො අරූපසමාපත්‌තියො. එත්‌ථාති ච එතස්‌මිං පටිප්‌පස්‌සද්‌ධිවාරෙ.
259.Yaṃkiñci vedayitanti ‘‘sukhaṃ dukkhaṃ adukkhamasukha’’nti vuttaṃ vedayitaṃ dukkhasmiṃ antogadhaṃ, dukkhanti vattabbataṃ labhati pariyāyenāti attho. Tenāha ‘‘taṃ sabbaṃ dukkhanti attho’’ti. Yā esātiādīsu yo saṅkhārānaṃ aniccatāsaṅkhāto hutvā abhāvākāro, yā khayasabhāvatā vinassanasabhāvatā jarāya maraṇena cāti dvidhā vipariṇāmanasabhāvatā, etaṃ sandhāya uddissa sabbaṃ vedayitaṃ dukkhanti mayā vuttanti ayaṃ saṅkhepattho. Sāti saṅkhārānaṃ aniccatā . Vedanānampi aniccatā eva saṅkhārasabhāvattā. Tāsaṃ aniccatā ca nāma maraṇaṃ bhaṅgoti katvā tato uttari dukkhaṃ nāma natthīti sabbā vedanā ‘‘dukkhā’’ti vuttā, yathā ‘‘yadaniccaṃ taṃ dukkha’’nti ca, ‘‘pañcupādānakkhandhā dukkhā’’ti ca vuttaṃ. Idaṃ suttapadaṃ. Cattāro āruppāti catasso arūpasamāpattiyo. Etthāti ca etasmiṃ paṭippassaddhivāre.
රහොගතසුත්‌තවණ්‌ණනා නිට්‌ඨිතා.
Rahogatasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. රහොගතසුත්‌තං • 1. Rahogatasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. රහොගතසුත්‌තවණ්‌ණනා • 1. Rahogatasuttavaṇṇanā
