| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၁၀. ရဟောနိသဇ္ဇသိက္ခာပဒဝဏ္ဏနာ
10. Rahonisajjasikkhāpadavaṇṇanā
ဥပရီတိ အစေလကဝဂ္ဂေ။ ဥပနန္ဒသ္သ စတုတ္ထသိက္ခာပဒေနာတိ အပ္ပဋိစ္ဆန္နေ မာတုဂာမေန သဒ္ဓိံ ရဟောနိသဇ္ဇသိက္ခာပဒေန (ပာစိ. ၂၈၄ အာဒယော)။ တဉ္ဟိ ဥပနန္ဒတ္ထေရံ အာရဗ္ဘ ပညတ္တေသု စတုတ္ထဘာဝတော ‘‘ဥပနန္ဒသ္သ စတုတ္ထသိက္ခာပဒ’’န္တိ ဝုတ္တံ။ ယဒိ ဧကပရိစ္ဆေဒံ, အထ ကသ္မာ ဝိသုံ ပညတ္တန္တိ အာဟ ‘‘အဋ္ဌုပ္ပတ္တိဝသေန ပန ဝိသုံ ပညတ္တ’’န္တိ။ တတ္ထ အဋ္ဌုပ္ပတ္တိဝသေနာတိ အတ္ထသ္သ ဥပ္ပတ္တိဝသေန, ဘိက္ခုနိယာ ဧဝ ရဟောနိသဇ္ဇာယ ဥပ္ပတ္တိဝသေနာတိ အတ္ထော။ အယံ ဟေတ္ထာဓိပ္ပာယော – စတုတ္ထသိက္ခာပဒဝတ္ထုတော ဣမသ္သ သိက္ခာပဒသ္သ ဝတ္ထုနော ပဌမံ ဥပ္ပန္နတ္တာ ဧကပရိစ္ဆေဒေပိ ဣဒံ ပဌမံ ဝိသုံ ပညတ္တန္တိ။
Uparīti acelakavagge. Upanandassa catutthasikkhāpadenāti appaṭicchanne mātugāmena saddhiṃ rahonisajjasikkhāpadena (pāci. 284 ādayo). Tañhi upanandattheraṃ ārabbha paññattesu catutthabhāvato ‘‘upanandassa catutthasikkhāpada’’nti vuttaṃ. Yadi ekaparicchedaṃ, atha kasmā visuṃ paññattanti āha ‘‘aṭṭhuppattivasena pana visuṃ paññatta’’nti. Tattha aṭṭhuppattivasenāti atthassa uppattivasena, bhikkhuniyā eva rahonisajjāya uppattivasenāti attho. Ayaṃ hetthādhippāyo – catutthasikkhāpadavatthuto imassa sikkhāpadassa vatthuno paṭhamaṃ uppannattā ekaparicchedepi idaṃ paṭhamaṃ visuṃ paññattanti.
ရဟောနိသဇ္ဇသိက္ခာပဒဝဏ္ဏနာ နိဋ္ဌိတာ။
Rahonisajjasikkhāpadavaṇṇanā niṭṭhitā.
ဩဝာဒဝဂ္ဂော တတိယော။
Ovādavaggo tatiyo.
