| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. ரஹோஸஞ்ஞகத்தே²ரஅபதா³னவண்ணனா
5. Rahosaññakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ ரஹோஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஏகஸ்மிங் பு³த்³த⁴ஸுஞ்ஞகாலே மஜ்ஜி²மதே³ஸே ப்³ராஹ்மணகுலே நிப்³ப³த்தோ வுத்³தி⁴மன்வாய ஸகஸிப்பேஸு நிப்ப²த்திங் பத்வா தத்த² ஸாரங் அபஸ்ஸந்தோ கேவலங் உத³ரங் பூரெத்வா கோத⁴மத³மானாத³யோ அகுஸலேயேவ தி³ஸ்வா க⁴ராவாஸங் பஹாய ஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா அனேகதாபஸஸதபரிவாரோ வஸப⁴பப்³ப³தஸமீபே அஸ்ஸமங் மாபெத்வா தீணி வஸ்ஸஸஹஸ்ஸானி ஹிமவந்தேயேவ வஸமானோ ‘‘அஹங் எத்தகானங் ஸிஸ்ஸானங் ஆசரியோதி ஸம்மதோ க³ருட்டா²னியோ க³ருகாதப்³போ³ வந்த³னீயோ, ஆசரியோ மே நத்தீ²’’தி தோ³மனஸ்ஸப்பத்தோ தே ஸப்³பே³ ஸிஸ்ஸே ஸன்னிபாதெத்வா பு³த்³தா⁴னங் அபா⁴வே நிப்³பா³னாதி⁴க³மாபா⁴வங் பகாஸெத்வா ஸயங் ஏககோ ரஹோ விவேகட்டா²னேவ நிஸின்னோ பு³த்³த⁴ஸ்ஸ ஸம்முகா² நிஸின்னோ விய பு³த்³த⁴ஸஞ்ஞங் மனஸி கரித்வா பு³த்³தா⁴ரம்மணங் பீதிங் உப்பாதெ³த்வா ஸாலாயங் பல்லங்கங் ஆபு⁴ஜித்வா நிஸின்னோ காலங் கத்வா ப்³ரஹ்மலோகே நிப்³ப³த்தி.
Himavantassāvidūretiādikaṃ āyasmato rahosaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ekasmiṃ buddhasuññakāle majjhimadese brāhmaṇakule nibbatto vuddhimanvāya sakasippesu nipphattiṃ patvā tattha sāraṃ apassanto kevalaṃ udaraṃ pūretvā kodhamadamānādayo akusaleyeva disvā gharāvāsaṃ pahāya himavantaṃ pavisitvā isipabbajjaṃ pabbajitvā anekatāpasasataparivāro vasabhapabbatasamīpe assamaṃ māpetvā tīṇi vassasahassāni himavanteyeva vasamāno ‘‘ahaṃ ettakānaṃ sissānaṃ ācariyoti sammato garuṭṭhāniyo garukātabbo vandanīyo, ācariyo me natthī’’ti domanassappatto te sabbe sisse sannipātetvā buddhānaṃ abhāve nibbānādhigamābhāvaṃ pakāsetvā sayaṃ ekako raho vivekaṭṭhāneva nisinno buddhassa sammukhā nisinno viya buddhasaññaṃ manasi karitvā buddhārammaṇaṃ pītiṃ uppādetvā sālāyaṃ pallaṅkaṃ ābhujitvā nisinno kālaṃ katvā brahmaloke nibbatti.
34. ஸோ தத்த² ஜா²னஸுகே²ன சிரங் வஸித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ காமேஸு அனல்லீனோ ஸத்தவஸ்ஸிகோ பப்³ப³ஜித்வா கு²ரக்³கே³யேவ அரஹத்தங் பத்வா ச²ளபி⁴ஞ்ஞோ ஹுத்வா புப்³பே³னிவாஸஞாணேன அத்தனோ புப்³ப³கம்மங் ஸரித்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. வஸபோ⁴ நாம பப்³ப³தோதி ஹிமவந்தபப்³ப³தங் வினா ஸேஸபப்³ப³தானங் உச்சதரபா⁴வேன ஸெட்ட²தரபா⁴வேன வஸபோ⁴தி ஸங்க²ங் க³தோ பப்³ப³தோதி அத்தோ². ஸேஸங் ஸப்³ப³த்த² உத்தானத்த²மேவாதி.
34. So tattha jhānasukhena ciraṃ vasitvā imasmiṃ buddhuppāde kulagehe nibbatto kāmesu anallīno sattavassiko pabbajitvā khuraggeyeva arahattaṃ patvā chaḷabhiñño hutvā pubbenivāsañāṇena attano pubbakammaṃ saritvā sañjātasomanasso pubbacaritāpadānaṃ pakāsento himavantassāvidūretiādimāha. Vasabho nāma pabbatoti himavantapabbataṃ vinā sesapabbatānaṃ uccatarabhāvena seṭṭhatarabhāvena vasabhoti saṅkhaṃ gato pabbatoti attho. Sesaṃ sabbattha uttānatthamevāti.
ரஹோஸஞ்ஞகத்தே²ரஅபதா³னவண்ணனா ஸமத்தா.
Rahosaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. ரஹோஸஞ்ஞகத்தே²ரஅபதா³னங் • 5. Rahosaññakattheraapadānaṃ
