| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၅. ရဟောသညကတ္ထေရအပဒာနဝဏ္ဏနာ
5. Rahosaññakattheraapadānavaṇṇanā
ဟိမဝန္တသ္သာဝိဒူရေတိအာဒိကံ အာယသ္မတော ရဟောသညကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဧကသ္မိံ ဗုဒ္ဓသုညကာလေ မဇ္ဈိမဒေသေ ဗ္ရာဟ္မဏကုလေ နိဗ္ဗတ္တော ဝုဒ္ဓိမန္ဝာယ သကသိပ္ပေသု နိပ္ဖတ္တိံ ပတ္ဝာ တတ္ထ သာရံ အပသ္သန္တော ကေဝလံ ဥဒရံ ပူရေတ္ဝာ ကောဓမဒမာနာဒယော အကုသလေယေဝ ဒိသ္ဝာ ဃရာဝာသံ ပဟာယ ဟိမဝန္တံ ပဝိသိတ္ဝာ ဣသိပဗ္ဗဇ္ဇံ ပဗ္ဗဇိတ္ဝာ အနေကတာပသသတပရိဝာရော ဝသဘပဗ္ဗတသမီပေ အသ္သမံ မာပေတ္ဝာ တီဏိ ဝသ္သသဟသ္သာနိ ဟိမဝန္တေယေဝ ဝသမာနော ‘‘အဟံ ဧတ္တကာနံ သိသ္သာနံ အာစရိယောတိ သမ္မတော ဂရုဋ္ဌာနိယော ဂရုကာတဗ္ဗော ဝန္ဒနီယော, အာစရိယော မေ နတ္ထီ’’တိ ဒောမနသ္သပ္ပတ္တော တေ သဗ္ဗေ သိသ္သေ သန္နိပာတေတ္ဝာ ဗုဒ္ဓာနံ အဘာဝေ နိဗ္ဗာနာဓိဂမာဘာဝံ ပကာသေတ္ဝာ သယံ ဧကကော ရဟော ဝိဝေကဋ္ဌာနေဝ နိသိန္နော ဗုဒ္ဓသ္သ သမ္မုခာ နိသိန္နော ဝိယ ဗုဒ္ဓသညံ မနသိ ကရိတ္ဝာ ဗုဒ္ဓာရမ္မဏံ ပီတိံ ဥပ္ပာဒေတ္ဝာ သာလာယံ ပလ္လင္ကံ အာဘုဇိတ္ဝာ နိသိန္နော ကာလံ ကတ္ဝာ ဗ္ရဟ္မလောကေ နိဗ္ဗတ္တိ။
Himavantassāvidūretiādikaṃ āyasmato rahosaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ekasmiṃ buddhasuññakāle majjhimadese brāhmaṇakule nibbatto vuddhimanvāya sakasippesu nipphattiṃ patvā tattha sāraṃ apassanto kevalaṃ udaraṃ pūretvā kodhamadamānādayo akusaleyeva disvā gharāvāsaṃ pahāya himavantaṃ pavisitvā isipabbajjaṃ pabbajitvā anekatāpasasataparivāro vasabhapabbatasamīpe assamaṃ māpetvā tīṇi vassasahassāni himavanteyeva vasamāno ‘‘ahaṃ ettakānaṃ sissānaṃ ācariyoti sammato garuṭṭhāniyo garukātabbo vandanīyo, ācariyo me natthī’’ti domanassappatto te sabbe sisse sannipātetvā buddhānaṃ abhāve nibbānādhigamābhāvaṃ pakāsetvā sayaṃ ekako raho vivekaṭṭhāneva nisinno buddhassa sammukhā nisinno viya buddhasaññaṃ manasi karitvā buddhārammaṇaṃ pītiṃ uppādetvā sālāyaṃ pallaṅkaṃ ābhujitvā nisinno kālaṃ katvā brahmaloke nibbatti.
၃၄. သော တတ္ထ ဈာနသုခေန စိရံ ဝသိတ္ဝာ ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ကာမေသု အနလ္လီနော သတ္တဝသ္သိကော ပဗ္ဗဇိတ္ဝာ ခုရဂ္ဂေယေဝ အရဟတ္တံ ပတ္ဝာ ဆဠဘိညော ဟုတ္ဝာ ပုဗ္ဗေနိဝာသဉာဏေန အတ္တနော ပုဗ္ဗကမ္မံ သရိတ္ဝာ သဉ္ဇာတသောမနသ္သော ပုဗ္ဗစရိတာပဒာနံ ပကာသေန္တော ဟိမဝန္တသ္သာဝိဒူရေတိအာဒိမာဟ။ ဝသဘော နာမ ပဗ္ဗတောတိ ဟိမဝန္တပဗ္ဗတံ ဝိနာ သေသပဗ္ဗတာနံ ဥစ္စတရဘာဝေန သေဋ္ဌတရဘာဝေန ဝသဘောတိ သင္ခံ ဂတော ပဗ္ဗတောတိ အတ္ထော။ သေသံ သဗ္ဗတ္ထ ဥတ္တာနတ္ထမေဝာတိ။
34. So tattha jhānasukhena ciraṃ vasitvā imasmiṃ buddhuppāde kulagehe nibbatto kāmesu anallīno sattavassiko pabbajitvā khuraggeyeva arahattaṃ patvā chaḷabhiñño hutvā pubbenivāsañāṇena attano pubbakammaṃ saritvā sañjātasomanasso pubbacaritāpadānaṃ pakāsento himavantassāvidūretiādimāha. Vasabho nāma pabbatoti himavantapabbataṃ vinā sesapabbatānaṃ uccatarabhāvena seṭṭhatarabhāvena vasabhoti saṅkhaṃ gato pabbatoti attho. Sesaṃ sabbattha uttānatthamevāti.
ရဟောသညကတ္ထေရအပဒာနဝဏ္ဏနာ သမတ္တာ။
Rahosaññakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၅. ရဟောသညကတ္ထေရအပဒာနံ • 5. Rahosaññakattheraapadānaṃ
