| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
5. රහොසඤ්‌ඤකත්‌ථෙරඅපදානවණ්‌ණනා
5. Rahosaññakattheraapadānavaṇṇanā
හිමවන්‌තස්‌සාවිදූරෙතිආදිකං ආයස්‌මතො රහොසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො එකස්‌මිං බුද්‌ධසුඤ්‌ඤකාලෙ මජ්‌ඣිමදෙසෙ බ්‍රාහ්‌මණකුලෙ නිබ්‌බත්‌තො වුද්‌ධිමන්‌වාය සකසිප්‌පෙසු නිප්‌ඵත්‌තිං පත්‌වා තත්‌ථ සාරං අපස්‌සන්‌තො කෙවලං උදරං පූරෙත්‌වා කොධමදමානාදයො අකුසලෙයෙව දිස්‌වා ඝරාවාසං පහාය හිමවන්‌තං පවිසිත්‌වා ඉසිපබ්‌බජ්‌ජං පබ්‌බජිත්‌වා අනෙකතාපසසතපරිවාරො වසභපබ්‌බතසමීපෙ අස්‌සමං මාපෙත්‌වා තීණි වස්‌සසහස්‌සානි හිමවන්‌තෙයෙව වසමානො ‘‘අහං එත්‌තකානං සිස්‌සානං ආචරියොති සම්‌මතො ගරුට්‌ඨානියො ගරුකාතබ්‌බො වන්‌දනීයො, ආචරියො මෙ නත්‌ථී’’ති දොමනස්‌සප්‌පත්‌තො තෙ සබ්‌බෙ සිස්‌සෙ සන්‌නිපාතෙත්‌වා බුද්‌ධානං අභාවෙ නිබ්‌බානාධිගමාභාවං පකාසෙත්‌වා සයං එකකො රහො විවෙකට්‌ඨානෙව නිසින්‌නො බුද්‌ධස්‌ස සම්‌මුඛා නිසින්‌නො විය බුද්‌ධසඤ්‌ඤං මනසි කරිත්‌වා බුද්‌ධාරම්‌මණං පීතිං උප්‌පාදෙත්‌වා සාලායං පල්‌ලඞ්‌කං ආභුජිත්‌වා නිසින්‌නො කාලං කත්‌වා බ්‍රහ්‌මලොකෙ නිබ්‌බත්‌ති.
Himavantassāvidūretiādikaṃ āyasmato rahosaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto ekasmiṃ buddhasuññakāle majjhimadese brāhmaṇakule nibbatto vuddhimanvāya sakasippesu nipphattiṃ patvā tattha sāraṃ apassanto kevalaṃ udaraṃ pūretvā kodhamadamānādayo akusaleyeva disvā gharāvāsaṃ pahāya himavantaṃ pavisitvā isipabbajjaṃ pabbajitvā anekatāpasasataparivāro vasabhapabbatasamīpe assamaṃ māpetvā tīṇi vassasahassāni himavanteyeva vasamāno ‘‘ahaṃ ettakānaṃ sissānaṃ ācariyoti sammato garuṭṭhāniyo garukātabbo vandanīyo, ācariyo me natthī’’ti domanassappatto te sabbe sisse sannipātetvā buddhānaṃ abhāve nibbānādhigamābhāvaṃ pakāsetvā sayaṃ ekako raho vivekaṭṭhāneva nisinno buddhassa sammukhā nisinno viya buddhasaññaṃ manasi karitvā buddhārammaṇaṃ pītiṃ uppādetvā sālāyaṃ pallaṅkaṃ ābhujitvā nisinno kālaṃ katvā brahmaloke nibbatti.
34. සො තත්‌ථ ඣානසුඛෙන චිරං වසිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො කාමෙසු අනල්‌ලීනො සත්‌තවස්‌සිකො පබ්‌බජිත්‌වා ඛුරග්‌ගෙයෙව අරහත්‌තං පත්‌වා ඡළභිඤ්‌ඤො හුත්‌වා පුබ්‌බෙනිවාසඤාණෙන අත්‌තනො පුබ්‌බකම්‌මං සරිත්‌වා සඤ්‌ජාතසොමනස්‌සො පුබ්‌බචරිතාපදානං පකාසෙන්‌තො හිමවන්‌තස්‌සාවිදූරෙතිආදිමාහ. වසභො නාම පබ්‌බතොති හිමවන්‌තපබ්‌බතං විනා සෙසපබ්‌බතානං උච්‌චතරභාවෙන සෙට්‌ඨතරභාවෙන වසභොති සඞ්‌ඛං ගතො පබ්‌බතොති අත්‌ථො. සෙසං සබ්‌බත්‌ථ උත්‌තානත්‌ථමෙවාති.
34. So tattha jhānasukhena ciraṃ vasitvā imasmiṃ buddhuppāde kulagehe nibbatto kāmesu anallīno sattavassiko pabbajitvā khuraggeyeva arahattaṃ patvā chaḷabhiñño hutvā pubbenivāsañāṇena attano pubbakammaṃ saritvā sañjātasomanasso pubbacaritāpadānaṃ pakāsento himavantassāvidūretiādimāha. Vasabho nāma pabbatoti himavantapabbataṃ vinā sesapabbatānaṃ uccatarabhāvena seṭṭhatarabhāvena vasabhoti saṅkhaṃ gato pabbatoti attho. Sesaṃ sabbattha uttānatthamevāti.
රහොසඤ්‌ඤකත්‌ථෙරඅපදානවණ්‌ණනා සමත්‌තා.
Rahosaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 5. රහොසඤ්‌ඤකත්‌ථෙරඅපදානං • 5. Rahosaññakattheraapadānaṃ
