| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
11. ராஹுலஸுத்தவண்ணனா
11. Rāhulasuttavaṇṇanā
338. கச்சி அபி⁴ண்ஹஸங்வாஸாதி ராஹுலஸுத்தங். கா உப்பத்தி? ப⁴க³வா ஸம்மாஸம்போ³தி⁴ங் அபி⁴ஸம்பு³ஜ்ஜி²த்வா போ³தி⁴மண்ட³தோ அனுபுப்³பே³ன கபிலவத்து²ங் க³ந்த்வா தத்த² ராஹுலகுமாரேன ‘‘தா³யஜ்ஜங் மே ஸமண தே³ஹீ’’தி தா³யஜ்ஜங் யாசிதோ ஸாரிபுத்தத்தே²ரங் ஆணாபேஸி – ‘‘ராஹுலகுமாரங் பப்³பா³ஜேஹீ’’தி. தங் ஸப்³ப³ங் க²ந்த⁴கட்ட²கதா²யங் (மஹாவ॰ அட்ட²॰ 105) வுத்தனயேனேவ க³ஹேதப்³ப³ங். ஏவங் பப்³ப³ஜிதங் பன ராஹுலகுமாரங் வுட்³டி⁴ப்பத்தங் ஸாரிபுத்தத்தே²ரோவ உபஸம்பாதே³ஸி, மஹாமொக்³க³ல்லானத்தே²ரோ அஸ்ஸ கம்மவாசாசரியோ அஹோஸி. தங் ப⁴க³வா ‘‘அயங் குமாரோ ஜாதிஆதி³ஸம்பன்னோ, ஸோ ஜாதிகொ³த்தகுலவண்ணபொக்க²ரதாதீ³னி நிஸ்ஸாய மானங் வா மத³ங் வா மா அகாஸீ’’தி த³ஹரகாலதோ பபு⁴தி யாவ ந அரியபூ⁴மிங் பாபுணி, தாவ ஓவத³ந்தோ அபி⁴ண்ஹங் இமங் ஸுத்தமபா⁴ஸி. தஸ்மா சேதங் ஸுத்தபரியோஸானேபி வுத்தங் ‘‘இத்த²ங் ஸுத³ங் ப⁴க³வா ஆயஸ்மந்தங் ராஹுலங் இமாஹி கா³தா²ஹி அபி⁴ண்ஹங் ஓவத³தீ’’தி. தத்த² பட²மகா³தா²யங் அயங் ஸங்கே²பத்தோ² ‘‘கச்சி த்வங், ராஹுல, அபி⁴ண்ஹங் ஸங்வாஸஹேது ஜாதிஆதீ³னங் அஞ்ஞதரேன வத்து²னா ந பரிப⁴வஸி பண்டி³தங், ஞாணபதீ³பஸ்ஸ த⁴ம்மதே³ஸனாபதீ³பஸ்ஸ ச தா⁴ரணதோ உக்காதா⁴ரோ மனுஸ்ஸானங் கச்சி அபசிதோ தயா, கச்சி நிச்சங் பூஜிதோ தயா’’தி ஆயஸ்மந்தங் ஸாரிபுத்தங் ஸந்தா⁴ய ப⁴ணதி.
338.Kacciabhiṇhasaṃvāsāti rāhulasuttaṃ. Kā uppatti? Bhagavā sammāsambodhiṃ abhisambujjhitvā bodhimaṇḍato anupubbena kapilavatthuṃ gantvā tattha rāhulakumārena ‘‘dāyajjaṃ me samaṇa dehī’’ti dāyajjaṃ yācito sāriputtattheraṃ āṇāpesi – ‘‘rāhulakumāraṃ pabbājehī’’ti. Taṃ sabbaṃ khandhakaṭṭhakathāyaṃ (mahāva. aṭṭha. 105) vuttanayeneva gahetabbaṃ. Evaṃ pabbajitaṃ pana rāhulakumāraṃ vuḍḍhippattaṃ sāriputtattherova upasampādesi, mahāmoggallānatthero assa kammavācācariyo ahosi. Taṃ bhagavā ‘‘ayaṃ kumāro jātiādisampanno, so jātigottakulavaṇṇapokkharatādīni nissāya mānaṃ vā madaṃ vā mā akāsī’’ti daharakālato pabhuti yāva na ariyabhūmiṃ pāpuṇi, tāva ovadanto abhiṇhaṃ imaṃ suttamabhāsi. Tasmā cetaṃ suttapariyosānepi vuttaṃ ‘‘itthaṃ sudaṃ bhagavā āyasmantaṃ rāhulaṃ imāhi gāthāhi abhiṇhaṃ ovadatī’’ti. Tattha paṭhamagāthāyaṃ ayaṃ saṅkhepattho ‘‘kacci tvaṃ, rāhula, abhiṇhaṃ saṃvāsahetu jātiādīnaṃ aññatarena vatthunā na paribhavasi paṇḍitaṃ, ñāṇapadīpassa dhammadesanāpadīpassa ca dhāraṇato ukkādhāro manussānaṃkacci apacito tayā, kacci niccaṃ pūjito tayā’’ti āyasmantaṃ sāriputtaṃ sandhāya bhaṇati.
339. ஏவங் வுத்தே ஆயஸ்மா ராஹுலோ ‘‘நாஹங் ப⁴க³வா நீசபுரிஸோ விய ஸங்வாஸஹேது மானங் வா மத³ங் வா கரோமீ’’தி தீ³பெந்தோ இமங் படிகா³த²மாஹ ‘‘நாஹங் அபி⁴ண்ஹஸங்வாஸா’’தி. ஸா உத்தானத்தா² ஏவ.
339. Evaṃ vutte āyasmā rāhulo ‘‘nāhaṃ bhagavā nīcapuriso viya saṃvāsahetu mānaṃ vā madaṃ vā karomī’’ti dīpento imaṃ paṭigāthamāha ‘‘nāhaṃ abhiṇhasaṃvāsā’’ti. Sā uttānatthā eva.
340. ததோ நங் ப⁴க³வா உத்தரிங் ஓவத³ந்தோ பஞ்ச காமகு³ணேதிஆதி³கா அவஸேஸகா³தா²யோ ஆஹ. தத்த² யஸ்மா பஞ்ச காமகு³ணா ஸத்தானங் பியரூபா பியஜாதிகா அதிவிய ஸத்தேஹி இச்சி²தா பத்தி²தா , மனோ ச நேஸங் ரமயந்தி, தே சாயஸ்மா ராஹுலோ ஹித்வா ஸத்³தா⁴ய க⁴ரா நிக்க²ந்தோ, ந ராஜாபி⁴னீதோ, ந சோராபி⁴னீதோ, ந இணட்டோ, ந ப⁴யட்டோ, ந ஜீவிகாபகதோ, தஸ்மா நங் ப⁴க³வா ‘‘பஞ்ச காமகு³ணே ஹித்வா, பியரூபே மனோரமே, ஸத்³தா⁴ய க⁴ரா நிக்க²ம்மா’’தி ஸமுத்தேஜெத்வா இமஸ்ஸ நெக்க²ம்மஸ்ஸ பதிரூபாய படிபத்தியா நியோஜெந்தோ ஆஹ – ‘‘து³க்க²ஸ்ஸந்தகரோ ப⁴வா’’தி.
340. Tato naṃ bhagavā uttariṃ ovadanto pañca kāmaguṇetiādikā avasesagāthāyo āha. Tattha yasmā pañca kāmaguṇā sattānaṃ piyarūpā piyajātikā ativiya sattehi icchitā patthitā , mano ca nesaṃ ramayanti, te cāyasmā rāhulo hitvā saddhāya gharā nikkhanto, na rājābhinīto, na corābhinīto, na iṇaṭṭo, na bhayaṭṭo, na jīvikāpakato, tasmā naṃ bhagavā ‘‘pañca kāmaguṇe hitvā, piyarūpe manorame, saddhāya gharā nikkhammā’’ti samuttejetvā imassa nekkhammassa patirūpāya paṭipattiyā niyojento āha – ‘‘dukkhassantakaro bhavā’’ti.
தத்த² ஸியா ‘‘நனு சாயஸ்மா தா³யஜ்ஜங் பத்தெ²ந்தோ ப³லக்காரேன பப்³பா³ஜிதோ, அத² கஸ்மா ப⁴க³வா ஆஹ – ‘ஸத்³தா⁴ய க⁴ரா நிக்க²ம்மா’’’தி வுச்சதே – நெக்க²ம்மாதி⁴முத்தத்தா. அயஞ்ஹி ஆயஸ்மா தீ³க⁴ரத்தங் நெக்க²ம்மாதி⁴முத்தோ பது³முத்தரஸம்மாஸம்பு³த்³த⁴ஸ்ஸ புத்தங் உபரேவதங் நாம ஸாமணேரங் தி³ஸ்வா ஸங்கோ² நாம நாக³ராஜா ஹுத்வா ஸத்த தி³வஸே தா³னங் த³த்வா ததா²பா⁴வங் பத்தெ²த்வா ததோ பபு⁴தி பத்த²னாஸம்பன்னோ அபி⁴னீஹாரஸம்பன்னோ ஸதஸஹஸ்ஸகப்பே பாரமியோ பூரெத்வா அந்திமப⁴வங் உபபன்னோ. ஏவங் நெக்க²ம்மாதி⁴முத்ததஞ்சஸ்ஸ ப⁴க³வா ஜானாதி. ததா²க³தப³லஞ்ஞதரஞ்ஹி ஏதங் ஞாணங். தஸ்மா ஆஹ – ‘‘ஸத்³தா⁴ய க⁴ரா நிக்க²ம்மா’’தி. அத² வா தீ³க⁴ரத்தங் ஸத்³தா⁴யேவ க⁴ரா நிக்க²ம்ம இதா³னி து³க்க²ஸ்ஸந்தகரோ ப⁴வாதி அயமெத்த² அதி⁴ப்பாயோ.
Tattha siyā ‘‘nanu cāyasmā dāyajjaṃ patthento balakkārena pabbājito, atha kasmā bhagavā āha – ‘saddhāya gharā nikkhammā’’’ti vuccate – nekkhammādhimuttattā. Ayañhi āyasmā dīgharattaṃ nekkhammādhimutto padumuttarasammāsambuddhassa puttaṃ uparevataṃ nāma sāmaṇeraṃ disvā saṅkho nāma nāgarājā hutvā satta divase dānaṃ datvā tathābhāvaṃ patthetvā tato pabhuti patthanāsampanno abhinīhārasampanno satasahassakappe pāramiyo pūretvā antimabhavaṃ upapanno. Evaṃ nekkhammādhimuttatañcassa bhagavā jānāti. Tathāgatabalaññatarañhi etaṃ ñāṇaṃ. Tasmā āha – ‘‘saddhāya gharā nikkhammā’’ti. Atha vā dīgharattaṃ saddhāyeva gharā nikkhamma idāni dukkhassantakaro bhavāti ayamettha adhippāyo.
341. இதா³னிஸ்ஸ ஆதி³தோ பபு⁴தி வட்டது³க்க²ஸ்ஸ அந்தகிரியாய படிபத்திங் த³ஸ்ஸேதுங் ‘‘மித்தே ப⁴ஜஸ்ஸு கல்யாணே’’திஆதி³மாஹ. தத்த² ஸீலாதீ³ஹி அதி⁴கா கல்யாணமித்தா நாம, தே ப⁴ஜந்தோ ஹிமவந்தங் நிஸ்ஸாய மஹாஸாலா மூலாதீ³ஹி விய ஸீலாதீ³ஹி வட்³ட⁴தி. தேனாஹ – ‘‘மித்தே ப⁴ஜஸ்ஸு கல்யாணே’’தி. பந்தஞ்ச ஸயனாஸனங், விவித்தங் அப்பனிக்³கோ⁴ஸந்தி யஞ்ச ஸயனாஸனங் பந்தங் தூ³ரங் விவித்தங் அப்பாகிண்ணங் அப்பனிக்³கோ⁴ஸங், யத்த² மிக³ஸூகராதி³ஸத்³தே³ன அரஞ்ஞஸஞ்ஞா உப்பஜ்ஜதி, ததா²ரூபங் ஸயனாஸனஞ்ச ப⁴ஜஸ்ஸு. மத்தஞ்ஞூ ஹோஹி போ⁴ஜனேதி பமாணஞ்ஞூ ஹோஹி, படிக்³க³ஹணமத்தங் பரிபோ⁴க³மத்தஞ்ச ஜானாஹீதி அத்தோ². தத்த² படிக்³க³ஹணமத்தஞ்ஞுனா தெ³ய்யத⁴ம்மேபி அப்பே தா³யகேபி அப்பங் தா³துகாமே அப்பமேவ க³ஹேதப்³ப³ங், தெ³ய்யத⁴ம்மே அப்பே தா³யகே பன ப³ஹுங் தா³துகாமேபி அப்பமேவ க³ஹேதப்³ப³ங், தெ³ய்யத⁴ம்மே பன ப³ஹுதரே தா³யகேபி அப்பங் தா³துகாமே அப்பமேவ க³ஹேதப்³ப³ங், தெ³ய்யத⁴ம்மேபி ப³ஹுதரே தா³யகேபி ப³ஹுங் தா³துகாமே அத்தனோ ப³லங் ஜானித்வா க³ஹேதப்³ப³ங். அபிச மத்தாயேவ வண்ணிதா ப⁴க³வதாதி பரிபோ⁴க³மத்தஞ்ஞுனா புத்தமங்ஸங் விய அக்க²ப்³ப⁴ஞ்ஜனமிவ ச யோனிஸோ மனஸி கரித்வா போ⁴ஜனங் பரிபு⁴ஞ்ஜிதப்³ப³ந்தி.
341. Idānissa ādito pabhuti vaṭṭadukkhassa antakiriyāya paṭipattiṃ dassetuṃ ‘‘mitte bhajassu kalyāṇe’’tiādimāha. Tattha sīlādīhi adhikā kalyāṇamittā nāma, te bhajanto himavantaṃ nissāya mahāsālā mūlādīhi viya sīlādīhi vaḍḍhati. Tenāha – ‘‘mitte bhajassu kalyāṇe’’ti. Pantañca sayanāsanaṃ, vivittaṃ appanigghosanti yañca sayanāsanaṃ pantaṃ dūraṃ vivittaṃ appākiṇṇaṃ appanigghosaṃ, yattha migasūkarādisaddena araññasaññā uppajjati, tathārūpaṃ sayanāsanañca bhajassu. Mattaññū hohi bhojaneti pamāṇaññū hohi, paṭiggahaṇamattaṃ paribhogamattañca jānāhīti attho. Tattha paṭiggahaṇamattaññunā deyyadhammepi appe dāyakepi appaṃ dātukāme appameva gahetabbaṃ, deyyadhamme appe dāyake pana bahuṃ dātukāmepi appameva gahetabbaṃ, deyyadhamme pana bahutare dāyakepi appaṃ dātukāme appameva gahetabbaṃ, deyyadhammepi bahutare dāyakepi bahuṃ dātukāme attano balaṃ jānitvā gahetabbaṃ. Apica mattāyeva vaṇṇitā bhagavatāti paribhogamattaññunā puttamaṃsaṃ viya akkhabbhañjanamiva ca yoniso manasi karitvā bhojanaṃ paribhuñjitabbanti.
342. ஏவமிமாய கா³தா²ய ப்³ரஹ்மசரியஸ்ஸ உபகாரபூ⁴தாய கல்யாணமித்தஸேவனாய நியோஜெத்வா ஸேனாஸனபோ⁴ஜனமுகே²ன ச பச்சயபரிபோ⁴க³பாரிஸுத்³தி⁴ஸீலே ஸமாத³பெத்வா இதா³னி யஸ்மா சீவராதீ³ஸு தண்ஹாய மிச்சா²ஆஜீவோ ஹோதி, தஸ்மா தங் படிஸேதெ⁴த்வா ஆஜீவபாரிஸுத்³தி⁴ஸீலே ஸமாத³பெந்தோ ‘‘சீவரே பிண்ட³பாதே சா’’தி இமங் கா³த²மாஹ. தத்த² பச்சயேதி கி³லானப்பச்சயே. ஏதேஸூதி ஏதேஸு சதூஸு சீவராதீ³ஸு பி⁴க்கூ²னங் தண்ஹுப்பாத³வத்தூ²ஸு. தண்ஹங் மாகாஸீதி ‘‘ஹிரிகோபீனபடிச்சா²த³னாதி³அத்த²மேவ தே சத்தாரோ பச்சயா நிச்சாதுரானங் புரிஸானங் படிகாரபூ⁴தா ஜஜ்ஜரக⁴ரஸ்ஸேவிமஸ்ஸ அதிது³ப்³ப³லஸ்ஸ காயஸ்ஸ உபத்த²ம்ப⁴பூ⁴தா’’திஆதி³னா நயேன ஆதீ³னவங் பஸ்ஸந்தோ தண்ஹங் மா ஜனேஸி, அஜனெந்தோ அனுப்பாதெ³ந்தோ விஹராஹீதி வுத்தங் ஹோதி. கிங் காரணங்? மா லோகங் புனராக³மி. ஏதேஸு ஹி தண்ஹங் கரொந்தோ தண்ஹாய ஆகட்³டி⁴யமானோ புனபி இமங் லோகங் ஆக³ச்ச²தி. ஸோ த்வங் ஏதேஸு தண்ஹங் மாகாஸி, ஏவங் ஸந்தே ந புன இமங் லோகங் ஆக³மிஸ்ஸஸீதி.
342. Evamimāya gāthāya brahmacariyassa upakārabhūtāya kalyāṇamittasevanāya niyojetvā senāsanabhojanamukhena ca paccayaparibhogapārisuddhisīle samādapetvā idāni yasmā cīvarādīsu taṇhāya micchāājīvo hoti, tasmā taṃ paṭisedhetvā ājīvapārisuddhisīle samādapento ‘‘cīvare piṇḍapāte cā’’ti imaṃ gāthamāha. Tattha paccayeti gilānappaccaye. Etesūti etesu catūsu cīvarādīsu bhikkhūnaṃ taṇhuppādavatthūsu. Taṇhaṃ mākāsīti ‘‘hirikopīnapaṭicchādanādiatthameva te cattāro paccayā niccāturānaṃ purisānaṃ paṭikārabhūtā jajjaragharassevimassa atidubbalassa kāyassa upatthambhabhūtā’’tiādinā nayena ādīnavaṃ passanto taṇhaṃ mā janesi, ajanento anuppādento viharāhīti vuttaṃ hoti. Kiṃ kāraṇaṃ? Mālokaṃ punarāgami. Etesu hi taṇhaṃ karonto taṇhāya ākaḍḍhiyamāno punapi imaṃ lokaṃ āgacchati. So tvaṃ etesu taṇhaṃ mākāsi, evaṃ sante na puna imaṃ lokaṃ āgamissasīti.
ஏவங் வுத்தே ஆயஸ்மா ராஹுலோ ‘‘சீவரே தண்ஹங் மாகாஸீதி மங் ப⁴க³வா ஆஹா’’தி சீவரபடிஸங்யுத்தானி த்³வே து⁴தங்கா³னி ஸமாதி³யி பங்ஸுகூலிகங்க³ஞ்ச, தேசீவரிகங்க³ஞ்ச. ‘‘பிண்ட³பாதே தண்ஹங் மாகாஸீதி மங் ப⁴க³வா ஆஹா’’தி பிண்ட³பாதபடிஸங்யுத்தானி பஞ்ச து⁴தங்கா³னி ஸமாதி³யி – பிண்ட³பாதிகங்க³ங், ஸபதா³னசாரிகங்க³ங், ஏகாஸனிகங்க³ங், பத்தபிண்டி³கங்க³ங், க²லுபச்சா²ப⁴த்திகங்க³ந்தி. ‘‘ஸேனாஸனே தண்ஹங் மாகாஸீதி மங் ப⁴க³வா ஆஹா’’தி ஸேனாஸனபடிஸங்யுத்தானி ச² து⁴தங்கா³னி ஸமாதி³யி – ஆரஞ்ஞிகங்க³ங், அப்³போ⁴காஸிகங்க³ங், ருக்க²மூலிகங்க³ங், யதா²ஸந்த²திகங்க³ங், ஸோஸானிகங்க³ங், நேஸஜ்ஜிகங்க³ந்தி. ‘‘கி³லானப்பச்சயே தண்ஹங் மாகாஸீதி மங் ப⁴க³வா ஆஹா’’தி ஸப்³ப³ப்பச்சயேஸு யதா²லாப⁴ங் யதா²ப³லங் யதா²ஸாருப்பந்தி தீஹி ஸந்தோஸேஹி ஸந்துட்டோ² அஹோஸி, யதா² தங் ஸுப்³ப³சோ குலபுத்தோ பத³க்கி²ணக்³கா³ஹீ அனுஸாஸனிந்தி.
Evaṃ vutte āyasmā rāhulo ‘‘cīvare taṇhaṃ mākāsīti maṃ bhagavā āhā’’ti cīvarapaṭisaṃyuttāni dve dhutaṅgāni samādiyi paṃsukūlikaṅgañca, tecīvarikaṅgañca. ‘‘Piṇḍapāte taṇhaṃ mākāsīti maṃ bhagavā āhā’’ti piṇḍapātapaṭisaṃyuttāni pañca dhutaṅgāni samādiyi – piṇḍapātikaṅgaṃ, sapadānacārikaṅgaṃ, ekāsanikaṅgaṃ, pattapiṇḍikaṅgaṃ, khalupacchābhattikaṅganti. ‘‘Senāsane taṇhaṃ mākāsīti maṃ bhagavā āhā’’ti senāsanapaṭisaṃyuttāni cha dhutaṅgāni samādiyi – āraññikaṅgaṃ, abbhokāsikaṅgaṃ, rukkhamūlikaṅgaṃ, yathāsanthatikaṅgaṃ, sosānikaṅgaṃ, nesajjikaṅganti. ‘‘Gilānappaccaye taṇhaṃ mākāsīti maṃ bhagavā āhā’’ti sabbappaccayesu yathālābhaṃ yathābalaṃ yathāsāruppanti tīhi santosehi santuṭṭho ahosi, yathā taṃ subbaco kulaputto padakkhiṇaggāhī anusāsaninti.
343. ஏவங் ப⁴க³வா ஆயஸ்மந்தங் ராஹுலங் ஆஜீவபாரிஸுத்³தி⁴ஸீலே ஸமாத³பெத்வா இதா³னி அவஸேஸஸீலே ஸமத²விபஸ்ஸனாஸு ச ஸமாத³பேதுங் ‘‘ஸங்வுதோ பாதிமொக்க²ஸ்மி’’ந்திஆதி³மாஹ. தத்த² ஸங்வுதோ பாதிமொக்க²ஸ்மிந்தி எத்த² ப⁴வஸ்ஸூதி பாட²ஸேஸோ. ப⁴வாதி அந்திமபதே³ன வா ஸம்ப³ந்தோ⁴ வேதி³தப்³போ³, ததா² து³தியபதே³. ஏவமேதேஹி த்³வீஹி வசனேஹி பாதிமொக்க²ஸங்வரஸீலே, இந்த்³ரியஸங்வரஸீலே ச ஸமாத³பேஸி. பாகடவஸேன செத்த² பஞ்சிந்த்³ரியானி வுத்தானி. லக்க²ணதோ பன ச²ட்ட²ம்பி வுத்தங்யேவ ஹோதீதி வேதி³தப்³ப³ங். ஸதி காயக³தா த்யத்தூ²தி ஏவங் சதுபாரிஸுத்³தி⁴ஸீலே பதிட்டி²தஸ்ஸ துய்ஹங் சதுதா⁴துவவத்தா²னசதுப்³பி³த⁴ஸம்பஜஞ்ஞானாபானஸ்ஸதிஆஹாரேபடிகூலஸஞ்ஞாபா⁴வனாதி³பே⁴தா³ காயக³தா ஸதி அத்து² ப⁴வது, பா⁴வேஹி நந்தி அத்தோ². நிப்³பி³தா³ப³ஹுலோ ப⁴வாதி ஸங்ஸாரவட்டே உக்கண்ட²னப³ஹுலோ ஸப்³ப³லோகே அனபி⁴ரதஸஞ்ஞீ ஹோஹீதி அத்தோ².
343. Evaṃ bhagavā āyasmantaṃ rāhulaṃ ājīvapārisuddhisīle samādapetvā idāni avasesasīle samathavipassanāsu ca samādapetuṃ ‘‘saṃvuto pātimokkhasmi’’ntiādimāha. Tattha saṃvuto pātimokkhasminti ettha bhavassūti pāṭhaseso. Bhavāti antimapadena vā sambandho veditabbo, tathā dutiyapade. Evametehi dvīhi vacanehi pātimokkhasaṃvarasīle, indriyasaṃvarasīle ca samādapesi. Pākaṭavasena cettha pañcindriyāni vuttāni. Lakkhaṇato pana chaṭṭhampi vuttaṃyeva hotīti veditabbaṃ. Sati kāyagatā tyatthūti evaṃ catupārisuddhisīle patiṭṭhitassa tuyhaṃ catudhātuvavatthānacatubbidhasampajaññānāpānassatiāhārepaṭikūlasaññābhāvanādibhedā kāyagatā sati atthu bhavatu, bhāvehi nanti attho. Nibbidābahulo bhavāti saṃsāravaṭṭe ukkaṇṭhanabahulo sabbaloke anabhiratasaññī hohīti attho.
344. எத்தாவதா நிப்³பே³த⁴பா⁴கி³யங் உபசாரபூ⁴மிங் த³ஸ்ஸெத்வா இதா³னி அப்பனாபூ⁴மிங் த³ஸ்ஸெந்தோ ‘‘நிமித்தங் பரிவஜ்ஜேஹீ’’திஆதி³மாஹ. தத்த² நிமித்தந்தி ராக³ட்டா²னியங் ஸுப⁴னிமித்தங். தேனேவ நங் பரதோ விஸேஸெந்தோ ஆஹ – ‘‘ஸுப⁴ங் ராகூ³பஸஞ்ஹித’’ந்தி. பரிவஜ்ஜேஹீதி அமனஸிகாரேன பரிச்சஜாஹி. அஸுபா⁴ய சித்தங் பா⁴வேஹீதி யதா² ஸவிஞ்ஞாணகே அவிஞ்ஞாணகே வா காயே அஸுப⁴பா⁴வனா ஸம்பஜ்ஜதி, ஏவங் சித்தங் பா⁴வேஹி. ஏகக்³க³ங் ஸுஸமாஹிதந்தி உபசாரஸமாதி⁴னா ஏகக்³க³ங், அப்பனாஸமாதி⁴னா ஸுஸமாஹிதங். யதா² தே ஈதி³ஸங் சித்தங் ஹோதி, ததா² நங் பா⁴வேஹீதி அத்தோ².
344. Ettāvatā nibbedhabhāgiyaṃ upacārabhūmiṃ dassetvā idāni appanābhūmiṃ dassento ‘‘nimittaṃ parivajjehī’’tiādimāha. Tattha nimittanti rāgaṭṭhāniyaṃ subhanimittaṃ. Teneva naṃ parato visesento āha – ‘‘subhaṃ rāgūpasañhita’’nti. Parivajjehīti amanasikārena pariccajāhi. Asubhāya cittaṃ bhāvehīti yathā saviññāṇake aviññāṇake vā kāye asubhabhāvanā sampajjati, evaṃ cittaṃ bhāvehi. Ekaggaṃ susamāhitanti upacārasamādhinā ekaggaṃ, appanāsamādhinā susamāhitaṃ. Yathā te īdisaṃ cittaṃ hoti, tathā naṃ bhāvehīti attho.
345. ஏவமஸ்ஸ அப்பனாபூ⁴மிங் த³ஸ்ஸெத்வா விபஸ்ஸனங் த³ஸ்ஸெந்தோ ‘‘அனிமித்த’’ந்திஆதி³மாஹ. தத்த² அனிமித்தஞ்ச பா⁴வேஹீதி ஏவங் நிப்³பே³த⁴பா⁴கி³யேன ஸமாதி⁴னா ஸமாஹிதசித்தோ விபஸ்ஸனங் பா⁴வேஹீதி வுத்தங் ஹோதி. விபஸ்ஸனா ஹி ‘‘அனிச்சானுபஸ்ஸனாஞாணங் நிச்சனிமித்ததோ விமுச்சதீதி அனிமித்தோ விமொக்கோ²’’திஆதி³னா நயேன ராக³னிமித்தாதீ³னங் வா அக்³க³ஹணேன அனிமித்தவோஹாரங் லப⁴தி. யதா²ஹ –
345. Evamassa appanābhūmiṃ dassetvā vipassanaṃ dassento ‘‘animitta’’ntiādimāha. Tattha animittañca bhāvehīti evaṃ nibbedhabhāgiyena samādhinā samāhitacitto vipassanaṃ bhāvehīti vuttaṃ hoti. Vipassanā hi ‘‘aniccānupassanāñāṇaṃ niccanimittato vimuccatīti animitto vimokkho’’tiādinā nayena rāganimittādīnaṃ vā aggahaṇena animittavohāraṃ labhati. Yathāha –
‘‘ஸோ க்²வாஹங், ஆவுஸோ, ஸப்³ப³னிமித்தானங் அமனஸிகாரா அனிமித்தங் சேதோஸமாதி⁴ங் உபஸம்பஜ்ஜ விஹராமி. தஸ்ஸ மய்ஹங், ஆவுஸோ, இமினா விஹாரேன விஹரதோ நிமித்தானுஸாரி விஞ்ஞாணங் ஹோதீ’’தி (ஸங்॰ நி॰ 4.340).
‘‘So khvāhaṃ, āvuso, sabbanimittānaṃ amanasikārā animittaṃ cetosamādhiṃ upasampajja viharāmi. Tassa mayhaṃ, āvuso, iminā vihārena viharato nimittānusāri viññāṇaṃ hotī’’ti (saṃ. ni. 4.340).
மானானுஸயமுஜ்ஜஹாதி இமாய அனிமித்தபா⁴வனாய அனிச்சஸஞ்ஞங் படிலபி⁴த்வா ‘‘அனிச்சஸஞ்ஞினோ, மேகி⁴ய, அனத்தஸஞ்ஞா ஸண்டா²தி, அனத்தஸஞ்ஞீ அஸ்மிமானஸமுக்³கா⁴தங் பாபுணாதீ’’தி ஏவமாதி³னா (அ॰ நி॰ 9.3; உதா³॰ 31) அனுக்கமேன மானானுஸயங் உஜ்ஜஹ பஜஹ பரிச்சஜாஹீதி அத்தோ². ததோ மானாபி⁴ஸமயா, உபஸந்தோ சரிஸ்ஸஸீதி அதே²வங் அரியமக்³கே³ன மானஸ்ஸ அபி⁴ஸமயா க²யா வயா பஹானா படினிஸ்ஸக்³கா³ உபஸந்தோ நிப்³பு³தோ ஸீதிபூ⁴தோ ஸப்³ப³த³ரத²பரிளாஹவிரஹிதோ யாவ அனுபாதி³ஸேஸாய நிப்³பா³னதா⁴துயா பரினிப்³பா³ஸி, தாவ ஸுஞ்ஞதானிமித்தாப்பணிஹிதானங் அஞ்ஞதரஞ்ஞதரேன ப²லஸமாபத்திவிஹாரேன சரிஸ்ஸஸி விஹரிஸ்ஸஸீதி அரஹத்தனிகூடேன தே³ஸனங் நிட்டா²பேஸி.
Mānānusayamujjahāti imāya animittabhāvanāya aniccasaññaṃ paṭilabhitvā ‘‘aniccasaññino, meghiya, anattasaññā saṇṭhāti, anattasaññī asmimānasamugghātaṃ pāpuṇātī’’ti evamādinā (a. ni. 9.3; udā. 31) anukkamena mānānusayaṃ ujjaha pajaha pariccajāhīti attho. Tato mānābhisamayā, upasanto carissasīti athevaṃ ariyamaggena mānassa abhisamayā khayā vayā pahānā paṭinissaggā upasanto nibbuto sītibhūto sabbadarathapariḷāhavirahito yāva anupādisesāya nibbānadhātuyā parinibbāsi, tāva suññatānimittāppaṇihitānaṃ aññataraññatarena phalasamāpattivihārena carissasi viharissasīti arahattanikūṭena desanaṃ niṭṭhāpesi.
ததோ பரங் ‘‘இத்த²ங் ஸுத³ங் ப⁴க³வா’’திஆதி³ ஸங்கீ³திகாரகானங் வசனங். தத்த² இத்த²ங் ஸுத³ந்தி இத்த²ங் ஸு இத³ங், ஏவமேவாதி வுத்தங் ஹோதி. ஸேஸமெத்த² உத்தானத்த²மேவ. ஏவங் ஓவதி³யமானோ சாயஸ்மா ராஹுலோ பரிபாகக³தேஸு விமுத்திபரிபாசனியேஸு த⁴ம்மேஸு சூளராஹுலோவாத³ஸுத்தபரியோஸானே அனேகேஹி தே³வதாஸஹஸ்ஸேஹி ஸத்³தி⁴ங் அரஹத்தே பதிட்டா²ஸீதி.
Tato paraṃ ‘‘itthaṃ sudaṃ bhagavā’’tiādi saṅgītikārakānaṃ vacanaṃ. Tattha itthaṃ sudanti itthaṃ su idaṃ, evamevāti vuttaṃ hoti. Sesamettha uttānatthameva. Evaṃ ovadiyamāno cāyasmā rāhulo paripākagatesu vimuttiparipācaniyesu dhammesu cūḷarāhulovādasuttapariyosāne anekehi devatāsahassehi saddhiṃ arahatte patiṭṭhāsīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய ராஹுலஸுத்தவண்ணனா நிட்டி²தா.
Suttanipāta-aṭṭhakathāya rāhulasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 11. ராஹுலஸுத்தங் • 11. Rāhulasuttaṃ
